Dipotšišo tše Tšwago go Babadi

◼ Ka ge Daniele a be a boletše gore a ka se amogele dimpho tše di tšwago go Kgoši Belesatšara bakeng sa go hlatholla mongwalo wo o lego lebotong, ke ka baka la’ng ka morago a ile a hwetšwa a apere diaparo tšeo le pheta?

Pejana ga ge ba-Meda le ba-Peresia ba phekgola Babele, Kgoši Belesatšara le kgoro ya gagwe ba be ba le monyanyeng. Lebakeng la monyanya woo, o ile a tšea dibjana tšeo di bego di e-tšwa tempeleng ya Jehofa gomme a di diriša bakeng sa go nwa beine a tumiša medimo ya Babele. Eupja monyanya o ile wa emišwa kapejana ge seatla se segolo se ngwala dilo tše di makatšago lebotong.—Daniele 5:1-5.

Banna ba bohlale le batsebi ba dinaledi ba Babele ba be ba sa kgone go hlatholla mongwalo wo, gaešita lege Belesatšara a ile a holofetša gore o tla nea motho lege e le ofe yo a bego a ka kgona go bala le go hlalosa mongwalo wo o makatšago pheta ya gauta le boemo bjo bo phagamego mmušong.—Daniele 5:7-9.

Ge mafelelong mo-Hebere yo a bitšwago Daniele a be a tlišwa, kgoši e ile ya boeletša seo e bego e tla se nea e le mpho, e lego go apeša Daniele ka mašela a purapura, go mo apeša pheta ya gauta le go mo dira mmuši wa boraro mmušong. Moporofeta o ile a araba ka tlhompho ka gore: “Ithswarêlê dineô tšeo tša xaxo; dimphô tša xaxo di fê yo mongwê. Lengwalô lôna ke tlo Xo balêla, kxoši, ka Xo nthšetša thlathollô ya lôna.”—Daniele 5:17.

Ka gona Daniele o be a sa nyake go newa pipamolomo goba go lefša gore a nee tlhathollo. Kgoši e be e ka boloka dimpho tša yona go yona goba ya di nea motho o mongwe. Daniele o be a tla nea tlhathollo, e sego bakeng sa moputso, eupja ka gobane o be a newa matla ke Jehofa gore a dire bjalo, e lego Modimo wa therešo, yoo kahlolo ya gagwe go Babele e bego e batametše.

Go etša ge re bala go Daniele 5:29, ka morago ga ge Daniele a badile le go hlalosa mantšu go etša ge a be a boletše gore o tla dira bjalo, kgoši e ile ya laela gore dimpho tšeo di newe Daniele gaešita lege a be a sa di nyake. Daniele ka noši ga se a apara diaparo tšeo le pheta yeo. O ile a di apešwa go ya ka taelo ya mmuši phare-phare, e lego Kgoši Belesatšara. Eupja se ga se ganetšane le Daniele 5:17, moo moporofeta a ilego a dira gore go be molaleng gore maikemišetšo a gagwe e be e se a boithati.

Jesu ka morago o ile a bolela gore “e a amoxêlaxo moporofeta ka xe a na le leina la moporofeta, ó tlo fiwa teboxô ya moporofeta.” (Mateo 10:41) Seo se be se sa šupe go Belesatšara, ka ge a be a sa sware Daniele ka botho goba ka tlhompho ka baka la ge a be a hlompha monna yo yo a botegago e le moporofeta wa Modimo wa therešo. Kgoši Belesatšara o be a ikemišeditše go nea dimpho tšona tšeo go motho lege e le ofe yo a bego a ka kgona go hlatholla sephiri sa mongwalo, gaešita le batsebi ba bangwe ba dinaledi ba baheitene. Kgoši e ile ya hwetša moputso o swanelago, wo o bego o dumelelana le mongwalo wa boporofeta wo o lego lebotong: ‘Bjona bošegong bjoo Belesatšara kgoši ya ba-Kaladea o ile a bolawa gomme Dario wa mo-Meda ka noši o ile a amogela mmušo.’—Daniele 5:30; 6:1.