Puku ya Bobedi ya Dikoronika

7 Ge Solomone a se na go fetša go rapela, mollo o ile wa theoga o etšwa legodimong gomme wa tšhuma dihlabelo le sebego sa go fišwa, ke moka letago la Jehofa la tlala ka ntlong. 2 Baperisita ba be ba palelwa ke go tsena ka ntlong ya Jehofa ka gobane letago la Jehofa le be le tletše ka ntlong yeo ya Jehofa. 3 Setšhaba ka moka sa Isiraele se be se lebeletše ge mollo o be o theoga le ge letago la Jehofa le be le bonagala ntlong yeo, ke moka sa khunama difahlego tša sona di kgwathile fase go bontšha gore se hlompha Jehofa ke moka sa mo leboga, “ka gobane o lokile, gomme lerato la gagwe le le botegago le dula le le gona go ya go ile.”

4 Bjale kgoši le setšhaba ka moka ba dira dihlabelo pele ga Jehofa. 5 Kgoši Solomone a dira dihlabelo tšeo ka dikgomo tše 22 000 (dikete tše masomepedi-pedi) le dinku tše 120 000 (dikete tše lekgolo-masomepedi). Ka gona kgoši le setšhaba ka moka ba neela ntlo ya Modimo wa nnete. 6 Baperisita ba be ba eme moo ba bego ba šoma gona, gomme Balefi le bona ba be ba eme ba swere diletšo tša bona tša mmino tšeo ba bego ba di letša ge Jehofa a opelelwa. (Kgoši Dafida o be a dirile diletšo tše tša mmino gore a leboge Jehofa le go mo tumiša ka tšona,* “ka gobane lerato la gagwe le le botegago le dula le le gona go ya go ile.”) Le gona baperisita ba be ba leletša diphalafala tša bona godimo ba le pele ga bona, mola Baisiraele ka moka ba eme.

7 Ke moka Solomone a kgethagatša bogare bja lapa leo le bego le le pele ga ntlo ya Jehofa, ka gobane gona moo o be a swanetše go neela dibego tša go fišwa le dikarolwana tša makhura tša dihlabelo tša go dira khutšo le Modimo,* ka ge aletare ya koporo yeo a bego a e dirile e be e le e nyenyane kudu go ka rwala dihlabelo tša go fišwa, dibego tša mabele le dikarolwana tša makhura. 8 Ka nako yeo Solomone a keteka monyanya le Baisiraele ka moka ka matšatši a šupago. E be e le ba bantšhi kudu gomme ba tlile ba etšwa Lebo-hamathi go fihla Moeding wa Egepeta. 9 Eupša ka letšatši la boseswai* ba ile ba swara seboka se sekgethwa, ka gobane ba be ba neetše aletare ka matšatši a šupago ebile ba ketekile monyanya ka matšatši a šupago. 10 Ke moka, ka letšatši la bo-23 la kgwedi ya bošupa a laela setšhaba gore se boele magaeng a sona, ke moka sa ya magaeng a sona se thabile ebile dipelo tša sona e le tše tšhweu ka baka la dilo tše dibotse tšeo Jehofa a di diretšego Dafida le Solomone gotee le setšhaba sa gagwe sa Isiraele.

11 Ka gona Solomone a fetša go aga ntlo ya Jehofa le ntlo ya kgoši le go dira dilo ka moka tšeo a bego a nyaka go di dira ntlong ya Jehofa le ntlong ya gagwe. 12 Ke moka Jehofa a iponagatša go Solomone bošego gomme a re go yena: “Ke kwele thapelo ya gago ebile ke ikgethetše lefelo le e le gore e be ntlo yeo go tlago go dirwa dihlabelo go yona. 13 Ge nka tswalela magodimo gomme pula ya se ke ya na, ke moka ka laela ditšie gore di je dibjalo tša naga, le gona ge nka romela bolwetši bjo bo bolayago gore bo hlasele batho ba ka, 14 ke moka setšhaba sa ka seo se bitšwago ka leina la ka sa ikokobetša, sa rapela, sa ba sa kgopela gore ke se gaugele, gomme sa tlogela dilo tše mpe tšeo se bego se di dira, gona ke tla se kwa ke le magodimong, ka se lebalela sebe sa sona gomme ka dira gore naga ya sona e boele e none gape. 15 Go tloga gona bjale ke tla theetša thapelo ya bao ba rapelago ba le lefelong le ebile ke tla dula ke ba lebeletše. 16 Gona bjale ke kgethile ntlo ye le go e kgethagatša e le gore leina la ka le dule le le go yona go ya go ile, le gona ke tla dula ke e lebeletše ebile ke tla dula ke e hlokometše.

17 “Ge e ba wena o ka dula o latela ditsela tša ka go swana le ge tatago e lego Dafida a ile a di latela, wa dira dilo ka moka tšeo ke go laetšego tšona, gomme wa kwa melao ya ka le go thekga dikahlolo tša ka, 18 gona ke tla dira gore setulo sa gago sa bogoši se dule se le gona go etša ge ke dirile kgwerano le Dafida tatago ka re: ‘Molokong wa gago go tla dula go na le setlogolo sa gago seo se dutšego setulong sa bogoši gore se buše Isiraele.’ 19 Eupša ge o ka ntlhanogela, gomme wa tlogela go kwa melao ya ka le ditaelo tša ka tšeo ke go filego tšona, ke moka wa ya wa hlankela medimo e mengwe le go e khunamela, 20 gona ke tla tloša Isiraele nageng ya ka yeo ke e neilego yona, ebile ntlo ye yeo ke e kgethagaditšego ka baka la leina la ka, ke tla e tloša pele ga mahlo a ka, gomme ka dira gore batho ba lefase ka moka ba e gegee le go e kwera. 21 Ntlo ye yona e tla ba mašope. Yo mongwe le yo mongwe yo a fetago kgauswi le yona o tla e makalela gomme a re: ‘Ke ka baka la eng Jehofa a dirile se ka naga ye le ka ntlo ye?’ 22 Ke moka batho bao ba tla re: ‘Ke ka gobane ba tlogetše Jehofa Modimo wa borakgolokhukhu ba bona, yena yoo a ba ntšhitšego nageng ya Egepeta gomme ba rapela medimo e mengwe, ba e khunamela ba ba ba e hlankela. Ke ka baka leo Modimo a ba tlišeditšego masetlapelo a ka moka.’”