Genesi

46 Ka gona Isiraele o ile a tšea ba lapa la gagwe le dilo ka moka tšeo a bego a na le tšona gomme ba sepela. Ge ba fihla Beresheba o ile a direla Modimo wa Isaka tatagwe dihlabelo. 2 Ke moka bošego Modimo a bolela le Isiraele torong a re: “Jakobo, Jakobo!” Yena a re: “Ke nna yo!” 3 A re: “Ke nna Modimo wa nnete, yena Modimo wa tatago. O se ke wa tšhaba go ya Egepeta, ka gobane ge o le moo ke tla go dira setšhaba se segolo. 4 Nna ke tla sepela le wena ge o eya Egepeta e bile ke tla go buša nageng ye. Le gona ge o hlokofala, Josefa ke yena a tlago go tswalela mahlo a gago ka seatla sa gagwe.”

5 Ka morago ga moo Jakobo a tloga Beresheba. Barwa ba gagwe ba mo nametša dikariki tšeo Farao a bego a di rometše, ba nametša le bana ba bona le basadi ba bona. 6 Ba tšea le diruiwa tša bona le dithoto tša bona ka moka tšeo ba bilego le tšona ge ba be ba le nageng ya Kanana. Mafelelong Jakobo le bana ba gagwe ka moka ba fihla Egepeta. 7 A fihla Egepeta le barwa ba gagwe le barwedi ba gagwe le ditlogolo tša gagwe ka moka.

8 Bjale a ke maina a barwa ba Isiraele, e lego barwa ba Jakobo bao ba tlilego Egepeta: Morwa wa mathomo wa Jakobo e be e le Rubeni.

9 Barwa ba Rubeni e be e le Hanoge, Palu, Hetserone le Karami.

10 Barwa ba Simeone e be e le Jemuele, Jamini, Ohada, Jakine, Tsohara le Shaulo, yoo mmagwe e bego e le Mokanana.

11 Barwa ba Lefi e be e le Gerishone, Kohathe le Merari.

12 Barwa ba Juda e be e le Ere, Onane, Shela, Peretse le Tsera. Eupša Ere le Onane ba hwetše nageng ya Kanana.

Barwa ba Peretse e be e le Hetserone le Hamulu.

13 Barwa ba Isakara e be e le Tola, Pufa, Iyobo le Shimerone.

14 Barwa ba Sebulone e be e le Serede, Elone le Jahalele.

15 Bao ke bona barwa ba Lea bao a bilego le bona le Jakobo kua Padana-arama. O ile a belega Dina morwedi wa gagwe gona moo. Barwa le barwedi ba gagwe ka moka e be e le ba 33.

16 Barwa ba Gada e be e le Tsifione, Hagi, Shuni, Etsebone, Eri, Arodi le Areli.

17 Barwa ba Ashere e be e le Jimina, Ishifa, Ishifi le Beria, gomme morwedi wa Ashere e be e le Sera.

Barwa ba Beria e be e le Hebere le Malakiele.

18 Bao ke bana le ditlogolo tša Jakobo le Silipa yoo Labane a mo neilego morwedi wa gagwe Lea. Bana ka moka le ditlogolo tša Jakobo le Silipa e be e le ba 16.

19 Barwa ba Ragele mosadi wa Jakobo e be e le Josefa le Benjamini.

20 Ge Josefa a be a le kua nageng ya Egepeta, o ile a ba le bana le Asenatha morwedi wa Potifera moprista wa kua Oni. Bana bao e be e le Manase le Efuraime.

21 Barwa ba Benjamini e be e le Bela, Bekere, Ashebele, Gera, Naamane, Ehi, Roshi, Mopimi, Hupimi le Arede.

22 Bao ke bana le ditlogolo tša Ragele le Jakobo. Ka moka ga bona e be e le ba 14.

23 Morwa wa Dani e be e le Hushimi.

24 Barwa ba Nafutali e be e le Jahasele, Guni, Jesere le Shileme.

25 Bao ke bona bana le ditlogolo tša Jakobo le Biliha yoo Labane a mo neilego Ragele morwedi wa gagwe. Ka moka ga bona e be e le ba šupago.

26 Bana le ditlogolo ka moka tša Jakobo bao ba sepetšego le yena ge a eya Egepeta e be e le ba 66, re sa bale dingwetši tša gagwe. 27 Barwa ba Josefa bao a bilego le bona ge a le Egepeta e be e le ba babedi. Batho ka moka ba ntlong ya Jakobo bao ba tlilego Egepeta e be e le ba 70.

28 Jakobo a romela Juda gore a mo ete pele a ye go Josefa gomme a mo tsebiše gore o tseleng ya go ya Goshene. Ge ba fihla nageng ya Goshene, 29 Josefa a laela batho gore ba lokišetše kariki ya gagwe tsela gomme a sepela a yo gahlanetša Isiraele tatagwe kua Goshene. Gateetee ge a fihla go yena o ile a mo gokarela gomme a fetša nako e telele a lla. 30 Ke moka Isiraele a re go Josefa: “Bjale gona nka ikhwela, ke bone sefahlego sa gago gomme ke a tseba gore o sa phela.”

31 Ke moka Josefa a bolela le bana babo le ba lapa la tatagwe a re: “E re ke yeng go Farao gomme ke mmotše gore: ‘Bana bešo le ba lapa la tate bao ba bego ba le nageng ya Kanana ba tlile mo go nna. 32 Le gona banna bao ke badiši, ba tlile le dinku tša bona le diruiwa tša bona ka moka le dilo tša bona ka moka tšeo ba bego ba na le tšona kua Kanana.’ 33 Bjale ge Farao a ka le bitša gomme a le botšiša gore le šoma go dira eng, 34 le mmotše gore: ‘Rena bahlanka ba gago ke go tloga kgale re le badiši, go tloga bosweng bja rena go fihla gona bjale. Le borakgolokhukhu ba rena e be e le badiši. Mohlomongwe Farao a ka le dumelela gore le tle le dule nageng ya Goshene, ka gobane badiši ka moka ba dinku ba šišimiša Baegepeta.”