Doiteronomio

34 Ke moka Moshe a rotogela leganateng la Moaba Thabeng ya Nebo, ntlheng ya Thaba ya Pisiga, yeo e lebanego le Jeriko. Ka gona, Jehofa a mmontšha naga ka moka, e lego ya Gileada go fihla ka ya Dani, 2 le naga ka moka ya Nafutali, ya Efuraime le ya Manase, gotee le naga ka moka ya Juda go fihla ka lewatle la ka bodikela. 3 A mmontšha le Negebe le tikologo ya Jorodane, gotee le moedi wa Jeriko, e lego motse wa mepalema, go fihla ka Tsoare.

4 Ke moka Jehofa a re go yena: “Ye ke naga yeo ke e enetšego Aborahama, Isaka le Jakobo, ka re: ‘Ke tla e nea ditlogolwana tša gago.’ Ke go dumeletše gore o e bone, eupša o ka se tshelele go yona.”

5 Ka morago ga moo, Moshe mohlanka wa Jehofa a hwela moo nageng ya Moaba go ya le kamoo Jehofa a boletšego ka gona. 6 Modimo a mmoloka ka moeding wo o lego nageng ya Moaba go lebana le Bethe-peoro, gomme go ba go fihla le lehono le ga go na motho yo a tsebago gore lebitla la gagwe le kae. 7 Moshe o hlokofetše a na le mengwaga e 120 (lekgolo-masomepedi). Ka nako yeo, o be a sa kgona go bona gabotse e bile a sa na le matla. 8 Baisiraele ba ile ba mo llela ka matšatši a 30 ba le leganateng la Moaba. Ke moka matšatši ao a go llela Moshe a ile a fela.

9 Joshua morwa wa Nuni yena Modimo o be a mo neile bohlale, ka gobane Moshe o be a ile a mmea diatla gore a mo kgethe. Ke moka Baisiraele ba ile ba thoma go mo theetša, gomme ba dira ka mokgwa wo Jehofa a bego a laetše Moshe ka gona. 10 Eupša Isiraeleng ga se gwa ka gwa ba le moporofeta yo a swanago le Moshe, yoo Jehofa a bego a mo tseba gabotse.* 11 O ile a dira dipontšho ka moka le mehlolo yeo Jehofa a bego a mo romile gore a e dire go Farao nageng ya Egepeta, le go bahlanka ba gagwe ka moka le nageng ya gagwe ka moka, 12 a dira le mediro e megolo le yeo e makatšago pele ga Baisiraele ka moka.