Jesaya
64 Ge nkabe o ile wa gagola magodimo gore o theoge,
E le gore dithaba di šišinyege ka baka la gago,
2 Go no swana le ge mollo o tšhuma mašašana,
E bile mollo o bediša meetse,
Gona leina la gago le tla tsebja ke manaba a gago!
Le gona ditšhaba di tla thothomela pele ga gago.
3 Ge o be o dira dilo tše di makatšago tšeo re bego re sa tshepe gore o tla di dira,
O ile wa theoga gomme dithaba tša šišinyega pele gago.
4 Go tloga kgale ga go na yo a ilego a hlwaya tsebe goba go kwa Modimo,
Le gona ga go na yo a ilego a mmona ntle le wena,
Yo a thušago bao ba dulago ba mo letile.
5 O kopane le bao ba thabelago go dira dilo tšeo di lokilego,
Bao ba go gopolago gomme ba latela ditsela tša gago.
O ile wa galefa ge re be re dira dibe,
Le gona re ile ra di dira ka nako e telele.
Bjale na re swanetše go phološwa?
6 Ka moka ga rena re swana le motho yo a sego a hlweka,
Gomme mediro ya rena ka moka ya go loka e swana le lešela la ditšhila la mosadi yo a bonago kgwedi.
Ka moka ga rena re tla pona go swana le letlakala la mohlare,
Gomme diphošo tša rena di tla re tšea bjalo ka ge eka re tšewa ke phefo.
7 Ga go na yo a bitšago leina la gago,
E bile ga go na yo a lekago go nyaka thušo ya gago,
Ka gobane o re utetše sefahlego sa gago,
Gomme wa dira gore re fedišwe ka baka la diphošo tša rena.
8 Eupša wena Jehofa, o Tatago rena.
Rena re letsopa gomme wena o Mmopi wa rena.
Ka moka ga rena re mošomo wa diatla tša gago.
9 Wena Jehofa, o se ke wa galefa kudu,
O se ke wa gopola diphošo tša rena go ya go ile.
Hle gopola gore ka moka ga rena re setšhaba sa gago.
10 Metse ya gago e mekgethwa e fetogile lešoka.
Tsione le yona e fetogile lešoka,
Gomme Jerusalema e fetogile lerope.
11 Tempele ya rena e kgethwa le e botse,
Yeo borakgolokhukhu ba rena ba bego ba go tumiša go yona,
E fišitšwe mollong,
Gomme dilo tša rena ka moka tšeo re bego re di rata di šwalalantšwe.
12 Wena Jehofa, na o tla dula o sa bolele selo ge o bona dilo tše?
Na o tla dula o homotše gomme wa re tlogela re hlakišwa o šoro?