Kgaolo ya Masome-pedi-hlano

Thapelo ya Boitsholo

Jesaya 63:15–64:12

1, 2. (a) Morero wa tayo ya Modimo ke ofe? (b) Ke kgetho efe yeo ba-Juda ba tlago go lebana le yona ka morago ga go hwetša tayo ya Jehofa?

GO SENYWA ga Jerusalema le tempele ya yona ka 607 B.C.E. e be e le tayo e tšwago go Jehofa, e lego pontšho ya go se e amogele ga gagwe ka mo go feletšego. Setšhaba se se sa kwego sa Juda se ile sa swanelwa ke kotlo e šoro. Lega go le bjalo, Jehofa o be a se a ka a rera gore ba-Juda ba fedišetšwe sa ruri. Moapostola Paulo o ile a umaka morero wa tayo ya Jehofa ge a be a re: “Xo laiwa xohle, xa xo thabiše xe motho à sa laiwa, xo byalo ka e ke ké xo hlokofatšwa; fêla, ka moraxo xo tšweletša seenywa sa tokô le leaxô xo bao ba tlwaetšwaxo xo laiwa.”​—Ba-Hebere 12:11.

² Ba-Juda ba tla arabela bjang phihlelong ye e šoro? Na ba tla hloya tayo ya Jehofa? (Psalme 50:16, 17) Goba na ba tla e amogela e le tlwaetšo? Na ba tla itshola gomme ba fodišwa? (Jesaya 57:18; Hesekiele 18:23) Boporofeta bja Jesaya bo bontšha gore bonyenyane ba bangwe ba badudi ba pele ba Juda ba tla arabela gabotse tayong. Go thoma ditemaneng tša mafelelo tša kgaolo 63 le go tšwela pele go ba go fihla go kgaolo 64, setšhaba sa Juda se bontšhwa e le batho ba itsholago bao ba batamelago Jehofa ka topo e tšwago pelong. Moporofeta Jesaya o rapela thapelo ya boitsholo legatong la batho ba naga ya gabo ge ba tla ba ba le bothopšeng nakong e tlago. Ge a dutše a dira bjalo, o bolela ka ditiragalo tše di tlago bjalo ka ge eka di be di direga pele ga mahlo a gagwe.

Tate yo a Nago le Kwelobohloko

3. (a) Thapelo ya boporofeta ya Jesaya e godiša Jehofa bjang? (b) Thapelo ya Daniele e bontšha bjang gore thapelo ya boporofeta ya Jesaya e emela dikgopolo tša ba-Juda ba itsholago ba ba lego Babele? (Bona lepokisi le le lego go letlakala 362.)

³ Jesaya o rapela Jehofa ka gore: “Lebelela, o le legodimong, o bone o le boagong bjo bokgethwa bja gago bja letago.” Moporofeta o bolela ka magodimo a moya, moo Jehofa le dibopiwa tša gagwe tše sa bonagalego tša moya ba dulago. Ge a bolela dikgopolo tša ba-Juda ba lego bothopša, Jesaya o tšwela pele gore: “E kae phišego ya gago le matla a gago? le kae lešoko la gago, le pelohlomogi ya gago? a di ntšhirogetše?” (Jesaya 63:15, PK) Jehofa o thibetše matla a gagwe gomme a laola maikwelo a gagwe a tseneletšego​—“lešoko la [gagwe], le pelohlomogi ya [gagwe]”—​bathong ba gagwe. Lega go le bjalo, Jehofa ke ‘Tate’ wa setšhaba sa ba-Juda. Aborahama le Isiraele (Jakobo) e be e le bo-rakgolokhukhu ba bona ba tlhago, eupša ge nkabe ba be ba ka tsošetšwa bophelong gape, mohlomongwe ba be ba tla ba le tshekamelo ya go itatola bana ba bona ba bahlanogi. Jehofa o na le kwelobohloko ka tekanyo e kgolo. (Psalme 27:10) Jesaya o bolela ka tsela ya go leboga gore: “Wene, Jehofa, o Tata-wešo, o Molopolodi wa rena; ke lona leina la gago go tloga kgaleng.”​—Jesaya 63:16, PK.

4, 5. (a) Ke ka kgopolo efe Jehofa a dirago gore batho ba gagwe ba fapoge ditseleng tša gagwe? (b) Jehofa o nyaka borapedi bja mohuta mang?

⁴ Jesaya o tšwela pele ka polelo ya go tšwa pelong e rego: “Jehofa, o re’ng ge o lesa re fapoga ditsela tša gago? O thatafaletša’ng dipelo tša rena, di tle di se go boife. Boa, ka baka la bahlanka ba gago, e lego mašika a bohwa bja gago.” (Jesaya 63:17, PK) Ee, Jesaya o rapela gore Jehofa a tle a lebiše tlhokomelo ya gagwe gape go bahlanka ba gagwe. Ka gona, ke ka kgopolo efe Jehofa a dirago gore ba-Juda ba fapoge ditsela tša gagwe? Na Jehofa o ikarabela bakeng sa go thatafala ga dipelo tša bona mo go ba baketšego gore ba se mmoife? Aowa, eupša o a go dumelela gomme ba-Juda ge ba le tlalelong ya bona, ba lla ka taba ya gore Jehofa o ile a ba nea tokologo e bjalo. (Ekisodo 4:21; Nehemia 9:16) Ba kganyoga eka Jehofa nkabe a ile a tsena ditaba gare gore a ba thibele go dira phošo.

⁵ Go ba gona, Modimo ga a dirišane le batho ka tsela yeo. Re dibopiwa tšeo di nago le tokologo ya boikgethelo gomme Jehofa o re dumelela gore re itirele phetho ya ge e ba re tla mo kwa goba ra se mo kwe. (Doiteronomio 30:15-19) Jehofa o nyaka borapedi bjo bo tšwago dipelong le menaganong tšeo di tutuetšwago ke lerato la kgonthe. Ka gona, o dumeletše ba-Juda gore ba bontšhe tokologo ya bona ya boikgethelo gaešita le ge se se ile sa ba dumelela gore ba rabele malebana le yena. Ke ka tsela ye moo a ilego a thatafatša dipelo tša bona.​—2 Koronika 36:14-21.

6, 7. (a) Go tlogela ga ba-Juda ditsela tša Jehofa go feleletša ka eng? (b) Ke kganyogo efe ya lefeela yeo e bontšhwago, eupša ba-Juda ga ba na tshwanelo ya go letela eng?

⁶ Mafelelo ke afe? Jesaya o bolela ka mokgwa wa boporofeta gore: “Sethšaba sa xaxo [se] sekxêthwa se dutše naxa yé lebaka le sexo le kae fêla, manaba a rena a tla a xatakêla sekxêthwa sa xaxo. Re byalo ka ba O sešoxo wa ka wa ba buša xo tloxa kxaleng, bo-ka ba ba sešoxo ba ka ba bitšwa ka ’ina la xaxo.” (Jesaya 63:18, 19) Batho ba Jehofa ba ile ba ba le sekgethwa sa gagwe ka lebakanyana. Ka morago Jehofa o ile a dumelela gore se senywe gomme setšhaba sa gagwe se išwe bothopša. Ge seo se diragetše, go be go le bjalo ka ge eka go be go se na kgwerano magareng ga gagwe le bana ba Aborahama e bile go le bjalo ka ge eka ga se ba ka ba bitšwa ka leina la gagwe. Bjale ka ge e le mathopša Babele, ba-Juda ba goeletša ka go hloka kholofelo ka gore: “A mola O ka be O fatola maxodimo wa foloxa, wa šišinya dithaba pele xa xaxo, wa etša mollô ò fiša mahlaku, mollô x’o bediša meetse, xe ’ina l’axo le tsebišwa manaba a xaxo, dithšaba xe di roromêla xe O fihla.” (Jesaya 64:1, 2) Jehofa ka kgonthe o na le matla a go phološa. Ga go na pelaelo gore nkabe a ile a fologa gomme a lwela batho ba gagwe, a gagola ditshepedišo tša mmušo tše bjalo ka legodimo gomme a pšhatla mebušo yeo e swanago le dithaba. Jehofa nkabe a ile a tsebagatša leina la gagwe ka go bontšha phišego e kgolo legatong la batho ba gagwe.

⁷ Jehofa o ile a dira dilo tše bjalo nakong e fetilego. Jesaya o laodiša gore: “Xe O dira tše di šiišaxo, tše re bexo re sa kxone xo di holofêla. O ka be O foloxa wa šišinya dithaba pele xa xaxo [“dithaba tša šišinyega ka baka la gago,” NW].” (Jesaya 64:3) Ditiro tše bjalo tše dikgolo di bontšhitše matla a Jehofa le Bomodimo bja gagwe. Lega go le bjalo, ba-Juda ba sa botegego ba mehleng ya Jesaya ga ba na tshwanelo ya go letela Jehofa gore a dire ka tsela e bjalo e le gore ba ka holega.

Ke Jehofa a Nnoši yo a ka Phološago

8. (a) Tsela e nngwe yeo ka yona Jehofa a fapanago le medimo ya maaka ya ditšhaba ke efe? (b) Ke ka baka la’ng Jehofa a sa gate mogato wa go phološa batho ba gagwe go sa šetšwe go ba ga gagwe yo a kgonago go dira bjalo? (c) Paulo o tsopola le go diriša Jesaya 64:4 bjang? (Bona lepokisi le le lego go letlakala 366.)

⁸ Medimo ya maaka ga e direle barapedi ba yona ditiro tše matla tša phološo. Jesaya o ngwala gore: “Xo tloxa kxaleng xa xo ešo xwa kwala, xa xo ešo xwa kowa, xa xo ’ihlô le le di bonexo, xe modimo o mongwê a diretše ba ba bexo ba o holofetše, xe e se Wene, Morêna. O xahlanetša motho xe a dira tokô à thabile, le ba Xo xopolaxo bà le ditseleng tša xaxo.” (Jesaya 64:4, 5a) Ke Jehofa a nnoši yo e lego “moputsi wa ba ba mo tsomago.” (Ba-Hebere 11:6, PK) O gata mogato bakeng sa go šireletša bao ba dirago toko le bao ba mo gopolago. (Jesaya 30:18) Na ba-Juda ba ile ba dira ka tsela ye? Aowa. Jesaya o re go Jehofa: “Bona, o be o befetšwe, ka gobane re sentše, gomme ke kgale re le bjalo; a fa re ka phološwa?” (Jesaya 64:5b, PK) Ka ge batho ba Modimo ba e-na le pego ya nako e telele ya go phegelela go direng bobe, ga go na lebaka la gore Jehofa a lese go galefa gomme a gate mogato wa go ba phološa.

9. Ba-Juda ba itsholago ba ka holofela’ng, gomme re ka ithuta’ng go se?

⁹ Ba-Juda ba ka se kgone go dirolla tša nakong e fetilego, eupša ge e ba ba ka itshola gomme ba boela borapeding bjo bo sekilego, ba ka holofela go hwetša tebalelo le ditšhegofatšo tša nakong e tlago. Jehofa o tla putsa ba ba itsholago ka nako ya gagwe e swanetšego ka go ba lokolla bothopšeng bja Babele. Lega go le bjalo, go nyakega gore ba se ke ba fela pelo. Go sa šetšwe boitsholo bja bona, Jehofa a ka se fetoše tšhupa-mabaka ya gagwe. Lega go le bjalo, ge e ba ba dula ba phafogile gomme ba arabela thatong ya Jehofa, ba kgonthišetšwa tokologo mafelelong. Ka mo go swanago, Bakriste lehono ba dula ba letetše Jehofa ba sa fele pelo. (2 Petro 3:11, 12) Re ela hloko mantšu a moapostola Paulo, yo a itšego: “A re se kê ra lapa xo dira botse; xobane xe re sa lesetše, re tlo buna ka lebaka la xôna.”​—Ba-Galatia 6:9.

10. Ke go se kgone gofe mo go bolelwago ka go lebanya thapelong ya Jesaya?

¹⁰ Thapelo ya boporofeta ya Jesaya ga se feela boipobolo bjo bo tlwaelegilego bja sebe. E bontšha go lemoga e le ka kgonthe go se kgone ga setšhaba go iphološa. Moporofeta o re: “Ka moka xa rena re byalo ka wa thšila; ’me tokô ya rena e byalo ka ’aparô se thšilafetšexo. Ka moka xa rena re omile bo-ka matlakala; ’me bosenyi bya rena bo re tšea bo-ka phefô.” (Jesaya 64:6) Nakong ya ge bothopša bo be bo fela, ba-Juda ba itsholago ba ka ba ba be ba tlogetše bohlanogi. Ba ka ba ba be ba retologetše go Jehofa ka ditiro tša toko. Eupša e sa dutše e le ba sa phethagalago. Ditiro tša bona tše dibotse, le ge e le tše di tumišegago, di fo swana le diaparo tše di šilafetšego ge go tliwa tabeng ya go lefelela dibe. Tebalelo ya Jehofa ke mpho e sa swanelago yeo e tutuetšwago ke kgaugelo ya gagwe. Ga se selo seo se ka hwetšwago ka go šomelwa.​—Ba-Roma 3:23, 24.

11. (a) Ke boemo bofe bja moya bjo bo sa kgahlišego bjo bo lego gona gare ga bontši bja ba-Juda ba lego bothopša, gomme ke ka baka la’ng se se ka ba bjalo? (b) Ke bomang bao e bego e le mehlala e mebotse ya tumelo nakong ya bothopša?

¹¹ Ge Jesaya a dutše a lebeletše pele, o bona eng? Moporofeta o rapela ka gore: “Xa xo [yo] a bitšaxo ’ina l’axo, a ithapa a ithswarêlêla ka Wene; xobane O utile sefahloxô s’axo pele xa rena, wa re lesa ra nôlêxa môkô ka bosenyi bya rena.” (Jesaya 64:7) Boemo bja moya bja setšhaba ke bjo bo fokolago kudu. Batho ba be ba dutše ba sa bitše leina la Modimo ka thapelo. Le ge ba se sa hlwa ba e-na le molato wa sebe se se šiišago sa borapedi bja medimo ya diswantšho, go bonala e le ba sa šetšego borapeding bja bona gomme ‘ga go na yo a tsogago gore a itshwarelele’ ka Jehofa. Go molaleng gore ga ba thabele tswalano e botse le Mmopi. Mohlomongwe ba bangwe ba ikwa ba sa swanelwe ke go bolela le Jehofa ka thapelo. Ba bangwe ba ka ba ba dira mediro ya bona ya letšatši le letšatši ka ntle le go nagana ka yena. Go ba gona, gare ga mathopša go na le batho ba bjalo ka Daniele, Hanania, Mišaele, Asaria le Hesekiele gomme ba ke mehlala e mebotse ya tumelo. (Ba-Hebere 11:33, 34) Ge lebaka la nywaga e 70 la bothopša le dutše le batamela go fela, banna ba bjalo ka Hagai, Sakaria, Serubabele le Moperisita yo Mogolo Jošua, ba loketše go etelela pele ka tsela e botse kudu go bitšeng leina la Jehofa. Lega go le bjalo, thapelo ya boporofeta ya Jesaya go bonala e hlalosa boemo bja bontši bja mathopša.

“Go kwa go Phala Sehlabelo”

12. Jesaya o hlalosa bjang go ikemišetša ga ba-Juda bao ba itsholago go fetoša boitshwaro bja bona?

¹² Ba-Juda ba itsholago ba ikemišeditše go fetoga. Ge a ba emela, Jesaya o rapela Jehofa ka gore: “Bjalo Jehofa, ke wene Tata-wešo, gomme rena re letsopa, wene o Mmopi wa rena; rena ka moka re modiro wa diatla tša gago.” (Jesaya 64:8, PK) Mantšu a a bile a bontšha go amogela matla a Jehofa a taolo e le Tate goba Monei wa Bophelo. (Jobo 10:9) Ba-Juda ba ba itsholago ba swantšhwa le letsopa le boleta. Bao ba arabelago tayong ya Jehofa ba ka bopša ka tsela ya seswantšhetšo ka go dumelelana le ditekanyetšo tša Modimo. Eupša se se ka phethwa ge feela Jehofa yo e lego Mmopi a bontšha tebalelo. Ka gona, Jesaya o mo lopa gabedi gore a gopole gore ba-Juda ke batho ba gagwe: “Morêna, se befêlwê wa xo lahla; se dulê Ò sa lebale molato xo ya xo ile. O k’O bônê hlê, ka moka xa rena re sethšaba s’axo.”​—Jesaya 64:9.

13. Boemo bja naga ya Isiraele ke bofe ge batho ba Modimo ba le bothopša?

¹³ Nakong ya bothopša, ba-Juda ba kgotlelela se se fetago go fo ba bothopša nageng ya boheitene. Boemo bjo bo sentšwego bja Jerusalema le tempele ya yona bo tliša kgobošo godimo ga bona gotee le Modimo wa bona. Thapelo ya Jesaya ya boitsholo e laodiša tše dingwe tša dilo tšeo di bakago kgobošo ye: “Metse e mekxêthwa ya xaxo e fetoxile naxa ya lefêla. Motse wa Tsione ké naxa ya lefêla; Jerusalêma ké marope. Ntlo-kxêthwa ya rena e botse-botse, mo bô-tata-wešo ba bexo ba Xo rêta, e fišitšwe ke mollô; ’me tšohle tše di bexo di re kxahla di senyetše.”​—Jesaya 64:10, 11.

14. (a) Jehofa o ile a lemoša bjang ka boemo bjo bo lego gona ga bjale? (b) Le ge Jehofa a be a kgahlišwa ke tempele ya gagwe le dihlabelo tšeo di bego di direlwa moo, ke eng seo e lego sa bohlokwa-hlokwa?

¹⁴ Go ba gona, Jehofa o tloga a lemoga gabotse boemo bja ditaba nageng ya bagologolo ba ba-Juda. Nywaga e ka bago 420 pele ga go senywa ga Jerusalema, o ile a lemoša batho ba gagwe gore ge e ba ba be ba ka hlanogela ditaelo tša gagwe gomme ba hlankela medimo e mengwe, o be a tla ‘ba fediša mo nageng’ gomme tempele e botse e be e tla “fetoga mekgobo ya marope.” (1 Dikxoši 9:6-9, bapiša le NW.) Ke therešo gore Jehofa o be a kgahlišwa ke naga yeo a bego a e neile batho ba gagwe, a kgahlišwa ke tempele e kgahlišago yeo e bego e agetšwe go mo godiša gotee le dihlabelo tšeo a bego a di direlwa. Eupša potego e sa kwanantšhego le go kwa ke tša bohlokwa kudu go phala dilo tše di bonagalago, gaešita le dihlabelo. Moporofeta Samuele o ile a bolela le Kgoši Saulo ka mo go swanetšego gore: “A o re Jehofa a ka kgahlwa ke dihlabelo tša phišo le tša go hlabja go fetiša go kwa lentšu la Jehofa? Bona, go kwa go phala sehlabelo, gomme go theetša go phadiša makhura a dikgapana.”​—1 Samuele 15:22, PK.

15. (a) Ke topo efe yeo Jesaya a e dirago ka mokgwa wa boporofeta go Jehofa, gomme e arabja bjang? (b) Ke ditiragalo dife tšeo di dirilego gore Jehofa mafelelong a lahle Isiraele e le setšhaba?

¹⁵ Lega go le bjalo, na Modimo wa Isiraele a ka lebelela bošula bja batho ba gagwe ba itsholago gomme a šitwa ke go bontšha lešoko? Potšišo e bjalo ke yeo Jesaya a phethago thapelo ya gagwe ya boporofeta ka yona. O lopa legatong la ba-Juda ba thopilwego ka gore: “Morêna, a O ka fo dula Ò sa šetše, xe xo šetše xo le byalo? wa ikhomolêla wa re kokobetša xa-kaakaa?” (Jesaya 64:12) Ge boemo bo fetoga, Jehofa o lebalela batho ba gagwe e le ka kgonthe gomme ka 537 B.C.E., o ba bušetša nageng ya gabo bona e le gore ba ka thomološa borapedi bjo bo sekilego moo. (Joele 2:13) Lega go le bjalo, nywaga-kgolo ka morago, Jerusalema le tempele ya yona di ile tša senywa gape gomme Modimo a feleletša a lahlile setšhaba sa gagwe sa kgwerano. Ka baka la’ng? Ka gobane batho ba Jehofa ba be ba hlanogetše ditaelo tša gagwe gomme ba bile ba ganne Mesia. (Johane 1:11; 3:19, 20) Ge seo se diragetše, Jehofa o ile a hloma setšhaba se sefsa, setšhaba sa moya, e lego “Isiraele ya Modimo” sebakeng sa Isiraele.​—Ba-Galatia 6:16, NW; 1 Petro 2:9.

Jehofa, “Mokwi wa Dithapêlô”

16. Beibele e ruta’ng mabapi le tebalelo ya Jehofa?

¹⁶ Go ka ithutwa dithuto tše bohlokwa go seo se diragaletšego Isiraele. Re a bona gore Jehofa “o lokile gomme o ikemišeditše go lebalela.” (Psalme 86:5, NW) Ka ge re le dibopiwa tše sa phethagalago, re ithekgile ka kgaugelo ya gagwe le tebalelo ya gagwe gore re hwetše phološo. Ga go na mediro ya rena yeo e ka re thušago go hwetša ditšhegofatšo tše. Lega go le bjalo, Jehofa ga a bontšhe tebalelo ka go se kgethe. Ke feela bao ba itsholago dibeng tša bona gomme ba fetoga ba ba lego boemong bja go ka lebalelwa ke Modimo.​—Ditiro 3:19.

17, 18. (a) Re tseba bjang gore Jehofa o kgongwa ke dikgopolo le maikwelo a rena e le ka kgonthe? (b) Ke ka baka la’ng Jehofa a bontšha go se fele pelo bathong ba sebe?

¹⁷ Gape re ithuta gore Jehofa o kgongwa ke dikgopolo le maikwelo a rena ka mo go tseneletšego ge re mmotša wona ka thapelo. Ke “Mokwi wa dithapêlô.” (Psalme 65:2, 3) Moapostola Petro o re kgonthišetša gore: “Mahlô a Morêna a bôna baloki; ’tsêbê tša xaxwe di kwa xe ba lla.” (1 Petro 3:12) Go oketša moo, re ithuta gore thapelo ya boitsholo e swanetše go akaretša boipolelo bja dibe bja boikokobetšo. (Diema 28:13) Lega go le bjalo, se ga se bolele gore re ka diriša kgaugelo ya Modimo ka mo go sa swanelago. Beibele e lemoša Bakriste ‘gore ba se ke ba amogela botho bjo bo sa swanelago bja Modimo gomme ba lahlegelwa ke morero wa bjona.’​—2 Ba-Korinthe 6:1, bapiša le NW.

¹⁸ Sa mafelelo, re ithuta morero wa go se fele pelo ga Modimo mabapi le batho ba gagwe ba sebe. Moapostola Petro o hlalositše gore Jehofa ga a fele pelo “xobane xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.” (2 Petro 3:9) Lega go le bjalo, bao ba dirišago go se fele pelo ga Modimo gampe ka mo go tšwelago pele ba tla otlwa mafelelong. Re bala mabapi le se gore: “Ké [Jehofa] a tl’o xo nea bohle se se lebanexo medirô ya bôná. Ba ba kxotleletšexo xo dira tše botse, bà nyaka letaxô le tumišô le tše di sa senyexexo, bôná ó tlo ba nea bophelô byo bo sa felexo. Ba ba xanaxo, ba se kwe therešô, ba ya ba kwana le bokxôpô, ba tlo bôna pefêlô le boxale.”​—Ba-Roma 2:6-8.

19. Ke dika dife tše di sa fetogego tšeo Jehofa a tlago go di bontšha ka mehla?

¹⁹ Ye ke tsela yeo Modimo a ilego a dirišana le Isiraele ya bogologolo ka yona. Tswalano ya rena le Jehofa lehono e laolwa ke melao e swanago ya motheo ka gobane ga a fetoge. Le ge a sa lese go phetha kotlo e swanelago, o tla dula e le “Jehofa, Modimo yo lešoko, yo kgaugelo, wa go se fele pelo, wa botho le potego e kgolo. E a bolokelago ba dikete tše ntši botho, e a lebalelago bokgopo le dikarogo le dibe.”​—Ekisodo 34:6, 7, PK.

[Lepokisi/Seswantšho go letlakala 362]

Thapelo ya Daniele ya Boitsholo

Moporofeta Daniele o phetše Babele lebakeng ka moka la nywaga e 70 ya bothopša bja ba-Juda. Neng-neng ngwageng wa bo-68 wa bothopša, Daniele o ile a lemoga go tšwa boporofeteng bja Jeremia gore lebaka la go ba ga Isiraele bothopša le be le batamela go fela. (Jeremia 25:11; 29:10; Daniele 9:1, 2) Daniele o ile a retologela go Jehofa ka thapelo​—thapelo ya boitsholo legatong la setšhaba ka moka sa ba-Juda. Daniele o laodiša ka gore: “Ka emišetša sefahlego sa-ka go Morena Modimo go mo tsoma ka dithapelo le ditopo, ka go ikona dijo le ka go apara mokotla le go dula moloreng. Ka rapela go Jehofa, Modimo wa-ka, ka ipobola molato.”​—Daniele 9:3, 4, PK.

Daniele o rapetše thapelo ya gagwe nywaga e ka bago e makgolo a mabedi ka morago ga ge Jesaya a ngwadile thapelo ya boporofeta yeo e hwetšwago go dikgaolo 63 le 64 tša puku ya gagwe. Ga go na pelaelo gore ba-Juda ba bantši ba botegago ba ile ba rapela Jehofa nywageng e thata ya bothopša. Lega go le bjalo, Beibele e gatelela thapelo ya Daniele yeo e bonalago e emela maikwelo a ba-Juda ba bantši ba botegago. Ka go rialo, thapelo ya gagwe e bontšha gore maikwelo a thapelo ya boporofeta ya Jesaya ka kgonthe e be e le maikwelo a ba-Juda ba botegago ba lego Babele.

Ela hloko dilo tše dingwe tše di swanago magareng ga thapelo ya Daniele le ya Jesaya.

Jesaya 63:16‐ Daniele 9:15

Jesaya 63:18‐ Daniele 9:17

Jesaya 64:1-3‐ Daniele 9:15

Jesaya 64:4-7‐ Daniele 9:4-7

Jesaya 64:6‐ Daniele 9:9, 10

Jesaya 64:10, 11‐ Daniele 9:16-18

[lepokisi go letlakala 366]

“Tšeo Leihlo le Sešogo la di Bona”

Lengwalong la gagwe le le yago go ba-Korinthe, moapostola Paulo o tsopotše puku ya Jesaya ge a be a ngwala gore: “Ka mo go ngwadilwego: Tšeo leihlo le sešogo la di bona, gomme tsebe e sešogo ya di kwa, gomme di sešogo tša tsena pelong ya motho, ke tše Modimo a di lokišeditšego ba ba mo ratago.” (1 Ba-Korinthe 2:9, PK)a Polelo ya Paulo goba dipolelo tša Jesaya ga di bolele ka dilo tše Jehofa a di lokišeleditšego batho ba gagwe mabapi le bohwa bja legodimong goba paradeiseng ya nakong e tlago ya lefaseng. Paulo o diriša mantšu a Jesaya go ditšhegofatšo tšeo di bego di šetše di thabelwa ke Bakriste lekgolong la pele la nywaga, tše bjalo ka go kwešiša dilo tše di tseneletšego tša Modimo le go amogela tshedimošo ya moya e tšwago go Jehofa.

Re ka kwešiša dilo tše di tseneletšego tša moya ge feela e le nako e swanetšego ya Jehofa gore a di utolle​—gaešita le gona moo, re ka di kwešiša ge feela re le batho ba moya bao ba nago le tswalano ya kgaufsi le Jehofa. Mantšu a Paulo a šoma go bao ba nago le boemo bja moya bjo bo fokolago goba ba se nago bjona ka mo go feletšego. Mahlo a bona ga a kgone go bona goba go lemoga ditherešo tša moya gomme ditsebe tša bona ga di kgone go kwa goba go kwešiša dilo tše bjalo. Tsebo ya go tseba dilo tšeo Modimo a di lokišeleditšego bao ba mo ratago ga e tsene gaešita le dipelong tša batho ba bjalo. Eupša go bao ba ineetšego go Modimo, go etša ge Paulo a be a ineetše, Modimo o utolotše dilo tše ka moya wa gagwe.​—1 Ba-Korinthe 2:1-16.

[Mengwalo ya ka tlase]

[Seswantšho go letlakala 367]

Jerusalema le tempele ya yona e bile bohwa bja batho ba Modimo “lebaka le sexo le kae fêla”