Genesi

40 Ka morago ga dilo tše motšheladino* wa kgoši ya Egepeta le yo mogolo wa baapei ba dinkgwa ba senyetša mong wa bona, e lego kgoši ya Egepeta. 2 Ka gona Farao a galefela bahlankedi bao ba gagwe ba babedi. 3 A ba golega ka ntlong ya yo mogolo wa ba go hlokomela bagolegwa, e lego moo Josefa le yena a bego a golegilwe gona. 4 Ke moka yo mogolo wa ba go hlokomela bagolegwa a laela Josefa gore a be le bona gomme a ba hlokomele. Ka gona ba fetša nako e telele ba le tronkong.

5 Motšheladino le moapei wa dinkgwa ba kgoši ya Egepeta bao ba bego ba golegilwe, ba ile ba lora ditoro ka bošego botee, gomme toro ya yo mongwe le yo mongwe e be e na le tlhaloso ya yona. 6 Mesong e latelago ge Josefa a eya go bona, a ba bona ba nyamile. 7 Ke moka a botšiša bahlanka bao ba Farao bao a bego a golegilwe le bona a re: “Go re’ng lehono le bonagala le se la thaba?” 8 Bona ba re go yena: “Re lorile ditoro gomme ga go na motho yo a ka re hlalosetšago tšona.” Josefa a re go bona: “Modimo ke yena feela a ka le hlalosetšago ditoro tšeo. Hle, mpotšeng tšona.”

9 Bjale yo mogolo wa batšheladino a laodišetša Josefa toro ya gagwe gomme a re go yena: “Torong ya ka ke bone mohlare wa diterebe pele ga ka. 10 Mohlareng woo go be go na le makala a mararo gomme ge a dutše a hloga a ile a thunya mapolomo. Ke moka gwa tšwelela makalana ao a nago le diterebe tša go butšwa. 11 Le gona ke be ke swere senwelo sa Farao, gomme ka tšea diterebe tšeo ka di gamolela ka senwelong seo. Ka morago ga moo ka fa Farao senwelo seo.” 12 Ke moka Josefa a re go yena: “Tlhaloso ya yona še: Makala a mararo a emela matšatši a mararo. 13 Matšatši a mararo go tloga gona bjale, Farao o tla go lokolla a go bušetša mošomong wa gago gomme wena o tla fa Farao senwelo sa gagwe, go swana le mathomong ge o be o le motšheladino wa gagwe. 14 Eupša o se ke wa ntebala ge dilo di go sepelela gabotse. Hle o mpontšhe botho* gomme o botše Farao ka nna, e le gore o nthuše gore ke tle ke tšwe tronkong ye. 15 Ge e le gabotse ke tšerwe ka kgang nageng ya Baheberu, mo le gona ga se ka dira selo le ge e le sefe seo se ka dirago gore ke swanelwe ke go ba mo tronkong.”

16 Ge yo mogolo wa baapei ba dinkgwa a bona gore Josefa o hlalositše toro yeo gabotse, a bolela le Josefa a re: “Le nna ke lorile ke rwele dimanki tše tharo tša dinkgwa tše tšhweu hlogong. 17 Ka manking wa ka godimo go be go na le dijo tša mehutahuta tša Farao tšeo di bego di dirilwe ke moapei wa dinkgwa, gomme go be go na le dinonyana tšeo di jago dijo tšeo di lego ka manking woo.” 18 Ke moka Josefa a araba a re: “Tlhaloso ya yona še: Dimanki tše tharo di emela matšatši a mararo. 19 Matšatši a mararo go tloga gona bjale, Farao o tlo go kgaola hlogo gomme a go fega koteng, ke moka dinonyana tša go ja.”

20 Bjale letšatšing la boraro e be e le letšatši la matswalo a Farao, gomme a direla bahlanka ba gagwe ka moka moletlo. Ka gona a lokolla yo mogolo wa batšheladino le yo mogolo wa baapei ba dinkgwa pele ga bahlanka bao ba gagwe. 21 Ke moka a bušetša yo mogolo wa batšheladino mošomong wa gagwe, gomme motšheladino yoo a tšwela pele a šoma go fa Farao dino tša gagwe go swana le mathomong. 22 Eupša a fega yo mogolo wa baapei ba dinkgwa koteng go etša ge Josefa a ba hlaloseditše. 23 Eupša yo mogolo wa batšheladino o ile a lebala ka Josefa.