Psalme
Koša ya Dafida.
141 Wena Jehofa ke a go bitša.
Etla ka pela hle gomme o nthuše.
Ke kgopela o nkwe ge ke go bitša.
2 Anke thapelo ya ka e be bjalo ka seorelo seo se lokišeditšwego gabotse pele ga gago,
Gomme thapelo ya ka e tseneletšego e be bjalo ka sebego sa mabele sa mantšiboa.
3 Hle Jehofa, anke o nthuše gore ke laole seo ke se bolelago.
O se ke wa dumelela go etšwa mantšu a mabe molomong wa ka.
4 Ke kgopela o nthuše gore ke se ke ka kganyoga go dira dilo tše mpe,
Gore ke se ke ka thekga batho ba babe ge ba dira dilo tše mpe,
Le gore ke se ke ka ja dijo tša bona tša maemo.
5 Ge moloki a ka nkotla, e tla be e le go mpontšha lerato,*
Ge a ka nkgalemela, go tla ba go le bjalo ka ge eka o ntšhela makhura hlogong,
E lego seo nka se se ganego.
Ke tla dula ke mo rapelela le ge a le mathateng.
6 Le ge batho ba bangwe ba ka ema godimo ga leswika gomme ba lahlela baahlodi ba bona fase,
Batho ba tla theetša seo ke se bolelago ka gobane se kgahliša.
8 Lega go le bjalo, ke ithekgile ka wena, wena Mmuši Morena Jehofa.
Ke tšhabetše go wena.
O se ntlogele ke ehwa.
9 Ntšhireletše gore ke se tanywe ke melaba yeo ba mpeetšego yona,
O ntšhireletše le go melaba ya batho ba babe.
10 Ba babe ba tanywa ke dinete tša bona tša go rea dihlapi,
Mola nna ke feta ke šireletšegile.