Puku ya Pele ya Samuele
19 Ka morago Saulo o ile a botša Jonathane morwa wa gagwe le bahlanka ba gagwe ka moka gore o nyaka go bolaya Dafida. 2 Ka ge Jonathane morwa wa Saulo a be a rata Dafida kudu, o ile a botša Dafida a re: “Tate o nyaka go go bolaya, ke kgopela o dule o butše mahlo gosasa mesong ke moka o ye lefelong leo le sa tsebjego ke motho gomme o khute. 3 Nna ke tla tšwa ka ya tšhemong le tate gomme ka ema kgauswi le mo o lego gona. Ke tla bolela le tate ka wena gomme ka kwa gore o reng, ke moka ka tla ka go botša.”
4 Jonathane a bolela Dafida gabotse go tatagwe gomme a re go yena: “Anke wena kgoši o se ke wa kweša Dafida mohlanka wa gago bohloko,* ka gobane ga se a go direla phošo gomme dilo ka moka tšeo a bego a go direla tšona di be di go hola. 5 O ile a bea bophelo bja gagwe kotsing ka go bolaya Mofilisita gomme Jehofa o ile a phološa Isiraele ka moka. Le wena o bone seo gomme sa go thabiša kudu. Bjale ke ka baka la’ng o nyaka go dira sebe ka go bolaya Dafida ka gobane ga se a dira selo se sebe? Ge o ka dira bjalo o tla ba o tšholotše madi a motho yo a se nago molato.” 6 Saulo o ile a kwa Jonathane gomme a ena ka gore: “Ke ikana ka Jehofa Modimo yo a phelago gore nka se bolaye Dafida.” 7 Ka morago Jonathane a bitša Dafida gomme a mmotša dilo ka moka tšeo Saulo a di boletšego. Ke moka Jonathane a tliša Dafida go Saulo, gomme Dafida a tšwela pele a hlankela Saulo go etša peleng.
8 Ge nako e dutše e eya, go ile gwa tsoga ntwa gomme Dafida a ya go lwa le Bafilisita, a ba bolaya ka bontši kudu gomme bao ba šetšego ba tšhaba.
9 Jehofa a dumelela moya o mobe gore o tlele Saulo ge a be a dutše ka ntlong ya gagwe a swere lerumo ka seatleng, mola Dafida yena a be a letša harepa. 10 Saulo o ile a leka go hlaba Dafida ka lerumo gore a mo pataganye le leboto, eupša Dafida a phema lerumo leo gomme la hlaba lebotong. Dafida o ile a tšhaba bošegong bjoo gore a phonyokge. 11 Ka morago Saulo a roma batho ntlong ya Dafida gore ba e lete e le gore ba tle ba mmolaye mesong. Eupša Mikala mosadi wa Dafida a botša Dafida a re: “Ge e ba o ka se tšhabe bošegong bjo, gosasa o tla ba o bolailwe.” 12 Gateetee Mikala a ntšha Dafida ka lefasetere gore a tšhabe gomme a phonyokge. 13 Mikala a tšea seswantšho sa modingwana wa lapa* a se bea mpeteng, a tšea le lešela la go dirwa ka boya bja pudi a le bea mo Dafida a bego a samela gona, ke moka a apeša seswantšho seo ka kobo.
14 Saulo a roma batho gore ba yo tšea Dafida, eupša Mikala a re: “O a babja.” 15 Ke moka Saulo a roma batho bao gape go Dafida gomme a re: “Mo tlišeng mo a le mpeteng wa gagwe gore re mmolaye.” 16 Ge batho bao ba fihla moo ba hwetša seswantšho sa modingwana wa lapa mpeteng le lešela la go dirwa ka boya bja pudi moo Dafida a bego a samela gona. 17 Ke moka Saulo a re go Mikala: “Ke ka baka la’ng o nthadiile ka tsela ye gomme wa tšhabiša lenaba la ka gore le phonyokge?” Mikala yena a re: “O itše go nna: ‘Nthuše ke tšhabe! Go sego bjalo ke tlo go bolaya.’”
18 Dafida a tšhaba gomme a phonyokga a ya go Samuele kua Rama. A mmotša dilo ka moka tšeo Saulo a mo dirilego tšona. Ke moka yena le Samuele ba tloga ba yo dula Nayothe. 19 Ge nako e dutše e eya, Saulo a tsebišwa gore: “Tseba gore Dafida o kua Nayothe ya Rama.” 20 Gateetee Saulo a roma batho gore ba yo tšea Dafida. Ge ba bona baporofeta ba batšofadi ba porofeta gomme Samuele a ba etile pele, moya wa Modimo wa tlela batho bao ba romilwego ke Saulo gomme le bona ba thoma go porofeta.*
21 Ge ba botša Saulo ka taba yeo, gateetee a roma batho ba bangwe gomme le bona ge ba fihla ba thoma go porofeta. Saulo a roma batho ba bangwe gape ka lekga la boraro, gomme le bona ba thoma go porofeta. 22 Mafelelong Saulo le yena a ya Rama. Ge a fihla sedibeng se segolo kua Seku a botšiša a re: “Samuele le Dafida ba kae?” Ba mo araba ba re: “Ba kua Nayothe ya Rama.” 23 Ge Saulo a dutše a le tseleng ya go ya Nayothe ya Rama o ile a tlelwa ke moya wa Modimo, a tšama a porofeta go ba go fihla Nayothe ya Rama. 24 Le yena a gagola diaparo tša gagwe a ba a porofeta pele ga Samuele, a patlama moo a hlobotše* letšatši ka moka le bošego ka moka. Ke ka baka leo batho ba ilego ba re: “Na Saulo le yena ke yo mongwe wa baporofeta?”