Jesaya

65 “Ke be ke dutše ke ikemišeditše go thuša bao ba sa lekego go ntseba.

Ke be ke dutše ke ikemišeditše go thuša bao ba sa kago ba kgopela gore ke ba hlahle,

 2  Ke feditše letšatši ka moka ke kgopela batho ba dinganga gore ba boele go nna,

Bao ba sepelago tseleng yeo e sego ya loka,

Bao ba dirago seo ba se ratago.

 3  Ke setšhaba sa batho bao ba dulago ba nkgopiša ba sa tšhabe selo,

Bao ba dirago dihlabelo mašemong e bile ba thuntšha muši wa dihlabelo godimo ga ditena.

 4  Ba dula mabitleng,

E bile ba fetša bošego ka moka ba le mafelong ao a utegilego,

Ba eja nama ya kolobe,

E bile sopo ya dilo tše di šilafetšego e ka dibjaneng tša bona.

 5  Ba re: ‘Emela kgole. O se ke wa mpatamela,

Ka gobane ke yo mokgethwa go go feta.’

 6  Bonang! Go ngwadilwe pele ga ka.

Nka se ke ka no ema,

Eupša ke tla ba otla,

Ke tla ba otla ka baka la dilo ka moka tšeo ba di dirilego,

 7  Ka ba otla ka baka la melato ya bona le ka baka la melato ya borakgolokhukhu ba bona.

Ka gobane ba thuntšhitše muši wa dihlabelo dithabeng,

Gomme ba nkgoboša ba le mebotong,

Ke tla thoma pele ka go ba otla ka baka la ditiro tša bona ka moka tše mpe,” o realo Jehofa.

“Go no swana le ge go ka ba le ntšhuhla ya diterebe yeo motho a ka dirago beine e mpsha ka yona,

Gomme yo mongwe a re: ‘O se ke wa e senya ka gobane e sa na le mohola,’

Le nna ke tla dira se se swanago ka bahlanka ba ka,

Nka se ke ka ba fediša ka moka.

 9  Ke tla tšea bana go tšwa molokong wa Jakobo,

Le go tšwa molokong wa Juda, gomme e tla ba bona ba jago bohwa dithabeng tša ka.

Batho ba ka bao ke ba kgethilego ba tla dula nageng yeo,

Le bahlanka ba ka ba tla dula moo.

10  Sharona e tla ba lefelo leo dinku di fulago go lona,

Gomme Moedi wa Akore ya ba moo dikgomo di khutšago gona,

Se ke tla se dira ka baka la batho ba ka bao ba ntsomago.

11  “Eupša lena le gare ga bao ba lebalago nna Jehofa,

Le lebala le thaba ya ka e kgethwa,

E bile le tekela modimo wa Mahlatse tafola,

La ba la tšhelela modimo yo a laolago bokamoso beine e tswakilwego.

12  Ka gona ke tla dira gore le bolawe ka sabola,

Ka moka ga lena le tla inama gore le bolawe,

Ka gobane ke le biditše, eupša ga se la nkaraba,

Ke boletše, eupša la se theetše.

Le ile la tšwela pele le dira dilo tše mpe mahlong a ka,

E bile la kgetha go dira seo se sa nkgahlego.”

14  Bonang! Bahlanka ba ka ba tlo goeletša ka ge dipelo tša bona di thabile,

Eupša lena le tlo lla ka ge dipelo tša lena di tla be di kwele bohloko,

E bile le tla lla gabohloko ka ge le tla be le gateletšegile.

15  Le tla itirela leina le lebe leo batho ba ka bao ke ba kgethilego ba tla le dirišago go lakaletša batho ba bangwe dilo tše mpe,

Gomme Mmuši Morena Jehofa o tla bolaya yo mongwe le yo mongwe wa lena,

Eupša bahlanka ba gagwe o tla ba bitša ka leina le lengwe,

16 E le gore yo mongwe le yo mongwe yo a nyakago go šegofatšwa mo lefaseng,

A tle a šegofatšwe ke Modimo wa nnete,

Gomme yo mongwe le yo mongwe yo a dirago keno mo lefaseng,

A ene ka Modimo wa nnete.

Ka gobane mathata a nakong e fetilego a tla be a lebetšwe,

E bile mahlo a ka a ka se a bone gape.

17  Bonang ke dira magodimo a maswa le lefase le leswa,

Gomme dilo tša kgale di ka se sa gopolwa,

E bile di ka se sa tšwelela le pelong.

Ke dira gore Jerusalema e dire gore batho ba yona ba thabe,

E bile ba hlalale.

19  Ke tla thabela Jerusalema ka ba ka thabela batho ba ka,

Go yona go ka se sa kwagala batho bao ba llago ka ge ba nyamile goba ba gateletšegile.”

20  “Go ka se be le lesea leo le phelago matšatši a sego kae feela,

E bile go ka se be le mokgalabje yo a tlago go hwa a se a tšwa a khora bophelo,

Ka gobane motho le ge e le ofe yo a hwago a na le mengwaga e lekgolo o tla be a lebelelwa e sa le mošemanyana,

Gomme modiradibe yena o tla hwa ka ge a rogakilwe, le ge a na le mengwaga e lekgolo.

21  Ba tla aga dintlo gomme ba dula go tšona,

E bile ba tla bjala mašemo a diterebe gomme ba ja dienywa tša ona.

22  Ba ka se ke ba aga dintlo gomme gwa dula motho yo mongwe,

E bile ba ka se ke ba bjala eupša gwa ja batho ba bangwe.

Ka gobane batho ba ka ba tla phela nako e telele go swana le mohlare,

Gomme batho bao ke ba kgethilego ba tla thabela mošomo wa bona ka mo go feletšego.

23  Ba ka se berekele mahala,

E bile bana bao ba ba belegago

Ba ka se welwe ke mathata,

Ka gobane bona le ditlogolo tša bona ba tla be ba šegofaditšwe ke Jehofa.

24  Le pele ba ka goeletša ke tla be ke šetše ke ba arabile,

E tla re ba sa bolela, ke tla ba ke šetše ke ba kwele.

25  Phiri le kwana di tla fula gotee,

Gomme tau e tla ja bjang bjalo ka kgomo,

Ge e le noga yona e tla ja lerole.