Boipobolo

Tlhaloso: Boipolelo goba go dumela phatlalatša goba ka sephiring (1) ga seo motho a se dumelago goba (2) ga dibe tša gagwe.

Na mokgwa wa poelanyo wo o akaretšago boipobolo bjo bo theetšwago (go ipobola ga motho ditsebeng tša moperisita), ka ge o rutwa ke Kereke ya Katholika ke wa Mangwalo?

Mokgwa woo ka wona moperisita a bitšwago

Mokgwa o tlwaetšwego o dirišwago gantši ke wo: “Ntšhegofatše Tate, ka gobane ke dirile dibe. E šetše e le [nako e telele] ga e sa le ke ipobola la mafelelo.”—Makasine wa U.S. Catholic, October 1982, letl. 6.

Mat. 23:1, 9: “Jesu a bolêla . . . a re: . . . Le se kê la bitša wa mo lefaseng la re: Tata-wešo! xobane Tata-weno ke o tee wa maxodimong.”

Dibe tšeo di ka lebalelwago

“Kereke ka mehla e rutile gore sebe se sengwe le se sengwe go sa šetšwe bogolo bja sona, se ka lebalelwa.”—The Catholic Encyclopedia (yeo e amogetšwego ka molao gore e ka gatišwa), R. C. Broderick (Nashville, Tenn.; 1976), letl. 554.

Ba-Heb. 10:26: “Xobane xe re senya ka boomo xe re šetše re filwe xo tseba therešô, xôna xa xo sa na sedimo sa xo hlatswa sebe seo.”

Mar. 3:29: “E a roxaxo Môya-mokxêthwa, a ka se kê a lebalêlwa neng le neng; ó ôba molato wo o sa felexo.”

Kamoo go itshola go ka bontšhwago ka gona

Moperisita gantši o laela gore mmobodi a bobole ka go bolela palo e itšego ya “bo-Tata-wešo” le “bo-Retang Maria.”

Mat. 6:7: “Xe Le rapêla, Le se kê la touta [ke gore go bolela ka mokgwa wa go ipoeletša mo go se nago morero] byalo ka ba dithšaba; xobane bôná ba re ba tlo kwiwa xe ba bola-bola tše ntši.”

Mat. 6:9-12: “Lena, xe Le rapêla, Le re: Tata-wešo wa maxodimong . . . re lebalêlê melato ya rena.” (Ga go na moo ka Beibeleng re laelwago gore re rapele Maria goba re rapele ka yena. Bona Ba-Filipi 4:6, gape le matlakala 295, 296, tlase ga “Maria.”)

Ba-Roma 12:9: “Leratô le se kê la ikxanthša; Le bê ba ba hloilexo bobe, Le xomarêlê boló.”

Na Jesu ga se a ka a laela baapostola ba gagwe gore ba lebalele dibe?

Joh. 20:21-23: “Byale ka xe Tate a nthomile, byale Nna ke roma bo-lena. Xe a r’yalo a ba budulêla, a re: Amoxêlang Môya-mokxêthwa. Bao Le ba rolaxo dibe ba rotšwe; bao Le sa ba rolexo xa b’a rolwa.”

Baapostola ba ile ba kwešiša bjang se le go se diriša? Ga go na pego ka Beibeleng ya taba lege e le efe yeo go yona moapostola a ilego a theetša boipobolo bja ka sephiring, gomme a bolela tebalelo ya dibe. Lega go le bjalo, ditaelo tša gore re lebalelwe ke Modimo di ngwadilwe ka Beibeleng. Baapostola ka go sepedišwa ke moya o mokgethwa, ba be ba ka tseba ge e ba batho ba bapa le ditaelo tše bjalo gomme gona motheong wo ba be ba ka bolela gore Modimo o ba lebaletše goba ga se a ba lebalela. Ka mohlala, hle bona Ditiro 5:1-11, o bone gape le 1 Ba-Korinthe 5:1-5 le 2 Ba-Korinthe 2:6-8.

Bona gape le hlogo ya ditaba ya “Go Hlatlangwa ga Baapostola.”

Dikgopolo tša barutegi ge e le ka mathomo a boipobolo bjo bo theetšwago di a fapana

The Catholic Encyclopedia, ka R. C. Broderick e re: “Ga e sa le go tloga lekgolong la nywaga la bone, boipobolo bjo bo theetšwago bo ile bja ba mokgwa o amogelwago.” Letl. 58.

New Catholic Encyclopedia e re: “Bo-ra-dihistori ba bantši bao e lego bagwera ba Katholika le Baprotestante ba latiša mathomo a go itshola ga ka sephiring e le tayo e tlwaetšwego ya dikereke tša Ireland, Wales le Brithania, moo Selalelo seo se akaretšago Go Itshola se bego se dirwa ka mehla ke mookamedi wa bodulanoši le baitlami ba gagwe bao e lego baperisita. Ka mokgwa wo wa bodulanoši wa boipobolo le go sepedišwa ga phatlalatša le ga sephiring ga moya e le mohlala, ruri boipobolo bjo bo dirwago leboelela le boipobolo bja boineelo di bonagala di tšweleditšwe go batho feela. . . . Lega go le bjalo, e ile ya ba go thoma lekgolong la bo-11 la nywaga, moo dibe tša sephiring di ilego tša tšweletšwa nakong ya boipobolo le pele ga ge go ka phethwa go itshola.”—(1967), Puku XI, letl. 75.

A. H. Sayce ra-dihistori o a bega: “Puku ya ditirelo e bontšha gore boipobolo bja phatlalatša le bja ka sephiring bo be bo dirwa Babele. Ee, boipobolo bja ka sephiring bo bonala e le bjo e lego bja kgale le go ba mokgwa woo o tlwaetšwego kudu.”—The Religions of Ancient Egypt and Babylonia (Edinburgh, 1902), letl. 497.

Tumelo ya Dihlatse tša Jehofa ke efe ge e le ka boipobolo?

Boipobolo bja tumelo ya motho ka go bolela phatlalatša

Ba-Roma 10:9, 10: “Xobane xe O ipolêla ka molomo wa re: Jesu ké Yêna Morêna! wa r’yalo Ò dumêla ka pelo xore Modimo o mo tsošitše bahung, xôna O tlo phološwa. Xobane motho o dumêla ka pelo a tseb’o lokafala; ó ipolêla ka molomo a tseb’o phološwa.”

Mat. 10:32, 33: “Mang le mang e a mpolêlaxo [Jesu Kriste] pele xa batho, le Nna ke tlo mmolêla pele xa Tate wa maxodimong. Xomme e a ntahlaxo pele xa batho, le Nna ke tlo mo lahla pele xa Tate wa maxodimong.”

Ge motho a direla Modimo sebe

Mat. 6:6-12: “Wene, xe O rapêla, tsêna phapošing ya ngwakô wa xaxo, O tswalêlê mojakô, O rapêlê Tat’axo [yo a lego kutamong]. . . . Tata-wešo wa maxodimong! Leina la xaxo a le kxêthwê; . . . Re lebalêlê melato ya rena byalo ka xe re lebalêla ba ba naxo le melato xo rena.”

Ps. 32:5: “Ka bá ka Xo [Modimo] bobolêla sebe sa-ka, ka se kê ka hlwa ke uta molato; ka re a nke ke ipobôlêlê ka bokxôpô bya-ka xo [Jehofa]. ’Me Wêna wa napa wa nthola molato wa sebe.”

1 Joh. 2:1: “Xe xo ka ba le e a diraxo dibe, xôna re na le Morapeledi xo Tata-wešo, Jesu Kriste Yêna Moloki.”

Ge motho a phošetša wa gabo goba ge a phošeditšwe

Mat. 5:23, 24: “Ké xôna, xe O tliša neô ya xaxo aletareng, ’me Ò le xôna-fao wa êlêlwa xore ngwan’eno ó na le taba le wêna, xôna tloxêla neô ya xaxo moo aletareng, O thômê xo y’o boêlana le ngwan’eno, O tseb’o tliša neô ya xaxo.”

Mat. 18:15: “Xe ngwan’eno a senya, mo sôlê Lè le seng; xe a ka kwa, xôna O tlo rua ngwana weno.”

Luka 17:3: “Xe ngwan’eno à Xo senyetša, mo sôlê; xomme xe a sokoloxa O mo lebalêlê.”

Ba-Ef. 4:32: “Sa lena a e bê xo dirana ka botho le ka bonôlô, le ka xo xauxêlana byalo ka xe Modimo le Yêna a Le xauxetše ka Kriste.”

Ge o mongwe a wetše phošong e kgolo gomme a nyaka thušo ya moya

Jak. 5:14-16: “Xe e mongwê wa lena a babya [moyeng], a bitšê baxolo ba phuthêxô, ba tlê ba mo rapêlêlê bà mo tlodišê makhura Leineng la [Jehofa]. ’Me thapêlô ya tumêlô e tlo phološa molwetši. [Jehofa] o tlo mo tsoša; xe a dirile dibe ó tlo lebalêlwa [ke Modimo]. Ipoleleng sebe seng sa lena; Le rapêlêlane xore Le fodišwê.”

Die. 28:13: “Mmipa-dikaroxô-tš’axwe xa a lêtlêxe; xo tlo xauxêlwa e a ipexaxo ’me a lahla dikaroxô.”

Go ka thwe’ng ge e ba batho bao ba dirago dibe ba sa nyake thušo?

Ba-Gal. 6:1: “Bana bešo, xe motho a thšoxa à wetše molatong, lena ba Le lexo ba Môya, Le mo tsoše ka môya o bonôlô; xomme le lena Le itôtê, xore Le se wêlê molekong.”

1 Tim. 5:20: “Ba ba sentšexo o ba sôlê bohle bà le xona [ke gore batho bao ba tsebago ka taba], xore le ba bangwê ba thšoxê.”

1 Ba-Kor. 5:11-13: “Le se kê la hlakana le motho yo Le rexo ké ngwana weno, moka a ba seotswa, a ba wa mexabaru, a ba wa medimo e šele, a ba wa maroxa, a ba letaxwa, a ba mohlakodi. Motho wa mohuta woo, le xo ja Le se kê la ja le yêna. . . . Lena tlošang motho-mobe mo xare xa lena.”