Boipušo
Tlhaloso: Boemo bjoo go bjona motho a sego, goba a bolelago gore ga se a ithekga ka ba bangwe, gomme ga a tlase ga tlhahlo goba tutuetšo ya bona. Batho ka go newa matla a go ikgethela ruri ba na le kganyogo ya tlhago ya go rata boipušo. Lega go le bjalo, kganyogo ye ge e ka kgotsofatšwa kudu e baka go se kwe gaešita le bohlanogi.
Ge batho ba kgorela melao ya Beibele ka thoko, ruri na ba hunologa e le ka kgonthe?
Ba-Roma 6:16, 23, PK: “A ga le tsebe gobane yoo le ineelago go yena go mo kwa, le bahlanka ba eo le mo kwago; le ge e le ba sebe go ya lehung, le ge e le go kwa go ya go lokeng? . . . Moputso wa sebe ke lehu, eupja neo ya kgaugelo ya Modimo ke bophelo bjo bo sa felego mo go Kriste Jesu, Morena wa rena.”
Ba-Gal. 6:7-9: “Le se kê la timêla; Modimo xa a kwêrwe. Se motho a se byalaxo, ké sôna se a tl’o xo se buna. E a byalaxo mo nameng ya xaxwe, se a tl’o xo se buna nameng ké thsenyêxô. E a byalaxo Moyeng, se a tl’o xo se buna Moyeng ké bophelô byo bo sa felexo. A re se kê ra lapa xo dira botse.”
Boitshwaro bja botona le botshadi: “E a diraxo bootswa yêna o senyetša mmele wa xaxwe.” (1 Ba-Kor. 6:18) “Xe e le e a otswaxo . . . ó ithsenyetša bophelô.” (Die. 6:32) (Mabapi le bosodoma, hle bona Ba-Roma 1:24-27.) (Dikopano tše di gobogilego tša botona le botshadi mo gongwe di ka bonagala e le tše di thabišago ka nakonyana. Eupja di iša malwetšing a šišimišago, boimaneng bjo bo sa nyakegego, go ntšhwa ga dimpa, lehufa, letswalo le le tshwenyegilego, mathata a kelello gaešita le go se amogelwe ke Modimo yoo dikholofelo tša rena tša bophelo bja nako e tlago di ithekgilego ka yena.)
Go gagamalela mahumo a dilo tše di bonagalago: “Ba ba rataxo xo huma ba wêla melekong le mereong; ba ya le dikxanyoxô tše ntši tša bošilo tše di xobošaxo motho tša mo senya, tša mo tekesetša thsenyexong le tahlexong. Xobane mexabaru ké wôna modu wa bobe ka moka; xomme ba bangwê ba xo kêkêla xo tšôna ba aroxile tumêlô ba ikobêla mehlakô e mentši.” (1 Tim. 6:9, 10) “Kè tlo . . . bolêla le môya wa-ka ka re: Môya wa-ka, O na le dilô tše ntši tše di lekanetšexo nywaxa e mentši. Khutša-xê, O jê, O nwê, O ipshinê. Modimo a tla a re: O setlaêla! Ka byôna bošexo byó môya wa xaxo o tlo tlošwa xo wene; ’me tšeo O di bolokilexo e tlo ba tša mang? Ké tšôna tša e a ikxobêlaxo mahumô à sa ruele Modimong.” (Luka 12:19-21) (Mahumo a dilo tše di bonagalago ga a tliše lethabo la neng le neng. Maiteko a go hwetša mahumo gantši a baka malapa ao a se a thabago, bophelo bjo bo sa thabišego le go senyega moyeng.)
Go itahlela dinong tše di tagago: “Yo madi-mabe ké mang?—Mahlomola a xo mang?—Dikxang di xo mang?—Manyami a xo mang?—Dinthô tša lefêla di xo mang?—Mahlô-mahwibidu a xo mang?—Ké tša bao ba tsêtsaxo mabyalweng, ba xo y’o leka setswaka sa sebelá. Ka moraxo se Xo loma bo-ka nôxa, se Xo thswêla ’hloko bya petla.” (Diema 23:29, 30, 32) (Go nwa mo gongwe go ka bonagala mathomong e le mo go thušago motho go lebala mathata a gagwe, eupja ga go a lokiše. Ge a tlogwa ke bjala, o hwetša mathata a sa dutše a le gona gomme gantši a bile a okeditšwe ke a mangwe. Dino tše di tagago ge di dirišwa ka go tshela mollwane di senya go hlomphega ga motho, bophelo bja gagwe, bophelo bja lapa la gagwe gotee le kwano ya gagwe le Modimo.)
Go dirišwa ka phošo ga dihlare-tagi: Bona matlakala 142-148 tlase ga “Dihlare-tagi.”
Bagwera ba babe: Ge e ba sehlopha sa basenyi se be se ka go botša gore se tseba kamoo se ka hwetšago ka gona tšhelete e ntši ka ntle le modiro o mogolo, ruri na o be o ka tloga le sona? “Se swarê ka tsela ya bôná; iletša leoto la xaxo mebila ya bôná. Xobane maoto a bôná a kitimêla bobe; ba kxanyêla xo y’o thula madi.” (Die. 1:10-19) Ge e ba motho e se morapedi wa Jehofa, eupja a bonala a le yo a kgahlišago e le ka kgonthe, ruri na o be o tla mo lebelela e le mogwera o mobotse? Sikeme e be e le morwa wa kgoši ya Kanana gomme Beibele e bolela gore e be e le “yêna mokxomana e moxolo motseng wa tat’axwe,” eupja o ile a “swara [Dina] a mo kata, a mo senya.” (Gen. 34:1, 2, 19) Na therešo ya gore batho ba bangwe mo gongwe ba ka se ke ba dumela ditherešo tšeo o ithutilego tšona Lentšung la Modimo, e swanetše go go dira gore o se ba ele hloko? “Le se ke la forwa. Ditlwaelano tše mpe di senya mekgwa e mebotse.” (1 Ba-Kor. 15:33, NW) Jehofa o be a ka ikwa bjang ge e ba o be o ka kgetha batho bao ba sa mo ratego gore e be bagwera ba gago? Mmoleledi wa Jehofa o ile a botša kgoši ya Juda yeo e dirilego seo, gore: “O tlo tlêlwa ke kxalefô ya [Jehofa].”—2 Kor. 19:1, 2.
Ke mang yo a kgothaletšago batho go kwa ba hunologile gore ba ka itirela diphetho tšeo e lego tša bona ka ntle le go ela hloko ditaelo tša Modimo?
Gen. 3:1-5: “Xomme nôxa [ka go dirišwa e le mmoleledi wa Sathane; bona Kutollo 12:9] . . . ya bolêla le mosadi ya re: Afá Modimo ó boletše a re: Dihlare tšohle tša thšemo yé Le se kê la di ja? Mosadi a botša noxa a re: Dihlare tša thšemo yé dienywa tša tšôna re a di ja. Fêla dienywa tša sehlare séla sa mo xare xa thšemo, tšôna Modimo o itše: Le se kê la di ja, ’me Le se kê la di swara, xore Le se hwê. Ké mo nôxa e boditšexo mosadi ya re: Le ka se kê la hwa lehu. Xe e le Modimo, yêna ó tseba xore mohla Lè se jaxo mahlô a lena a tlo buduloxa la ba byalo ka Modimo, la tseba botse le bobe.”
Ke moya ofe wo o sepedišago motho ge a hlokomologa thato ya Modimo, e le gore a tle a kgotsofatše dikganyogo tša gagwe?
Ba-Ef. 2:1-3: “Le lena ba Le bexo Le hwetše dikaroxong le dibeng, [Modimo] ó Le phedišitše. Le be Le ile le tšôna ka mokxwa wa lefase leno [leo Sathane e lego mmuši wa lona], Lè bušwa ke mmuši wa mmušô wa sebakeng, ke môya wo mehleng yeno o diraxo ka matla mo baneng ba xo se kwe. Le rena ka moka re be re ile le bôná ka dikxanyoxô tša nama ya rena, rè sa dira se se bexo se ratwa ke nama le maikwêlô a rena, rè sa le bana ba ba swanaxo le ba bangwê bao ba tswaletšwexo xo tlo xalefêlwa.”
Ke maikwelo afe a boipušo ao go lego bohlokwa gore bao ba bolelago gore ba direla Modimo ba a pheme?
Die. 16:18: “Mafadi a latêlwa ke thôbêxô; xo wa xo etilwe pele ke boipoti.”
Die. 5:12: “Wa tlo re: Ke be ke re’ng ke nyatša tayô? Ke be ke re’ng xe pelo ya-ka e xana xo sôlwa?” (Kgopolo e bjalo e ka lahlela motho mathateng a magolo go etša ge lengwalo le bontšha.)
Num. 16:3: “Ba rapa lešaba ba tsoxêla Moše le Arone [bao Jehofa a bego a ba diriša e le balebeledi ba batho ba gagwe] ba re: Le a ikxodiša! Hleng ba phuthêxô bohle kè ba bakxêthwa ka moka xa bôná, ’me [Jehofa] ó mo xo bôná! Le re’ng Le ipea xodimo xa phuthêxô ya [Jehofa]?”
Juda 16: “Kè batho ba xo hlwa bà tsôta, kè baxaladi, ba ba yaxo ka dikxanyoxô tša bôná, ’me melomo ya bôná e bolêla ka xo ikxoxomoša; ba rêta motho á le xôna, xore ba hwetše tše di ba holaxo.”
3 Joh. 9: “Dioterefe e a rataxo xo ba moxolo wa bôná.”
Die. 18:1: “Mo-dula-thokô ó ile le boithatêlô; tše byôbana tšohle ó xanana natšô.”
Jak. 4:13-15: “Eriyeng, lena ba Le rexo: Lehono, le xe e le ka moswana, re tlo ya motseng wa bokêtê, ra y’o dula xôna ra fetša ngwaxa, ra šaba ra rua. Le r’yalo Lè sa tsebe tša ka moswana. Le xôna bophelô bya lena kè eng? E fo ba kxodi ye e bônalaxo lebakanyana fêla ya tloxa e široxa. Xo kaone xe Le ka re: Xe [Jehofa] a rata ra phela, re tla dira tšé le tšela.”
Ge go kganyoga ga motho go ipuša go mo dira gore a ekiše lefase leo le sego ka phuthegong ya Bokriste, gona o laolwa ke mang? Gomme Modimo o lebelela se bjang?
1 Joh. 2:15; 5:19: “Le se kê la rata lefase le tše lefaseng; xe motho a rata lefase, leratô la Tata-wešo xa le xôna mo xo Yêna.” ‘Lefase ka moka le rapaletše matleng a yo mobe.’
Jak. 4:4: “E a rataxo xo xwêrana le lefase, ó itira lenaba la Modimo.”