Tumelo

Tlhaloso: “Xe e le tumêlô ké kholofêlô ye e tiilexo ya xo holofêla tše di letetšwexo; ké xo bôta tše di sa bonwexo ka mahlô.” (Ba-Heb. 11:1) Tumelo ya kgonthe ga se go dumela tšohle, ke gore go dumela selo se sengwe ka ntle le bohlatse bjo bo kwalago goba ka gobane motho a rata go dira bjalo. Tumelo ya kgonthe e nyaka tsebo ya motheo, go tlwaelana le bohlatse gotee le tebogo e tšwago pelong ya go leboga seo bohlatse bjoo bo se bontšhago. Ka gona, gaešita lege e le mo go sa kgonegego go ba le tumelo ya kgonthe ka ntle le tsebo e nepagetšego, fela Beibele e bolela gore ke “ka pelo” moo motho a dumelago.—Ba-Roma 10:10.

Ke ka baka la’ng batho ba bantši ba se na tumelo?

Tumelo ke seenywa sa moya wa Modimo, gomme Modimo o nea ka lethabo moya wa gagwe go bao ba o tsomago. (Ba-Gal. 5:22; Luka 11:13) Ka gona, batho bao ba se nago tumelo ga ba tsome moya woo goba ba dira bjalo ka baka la morero o mobe, goba ba ganetša go dira ga wona maphelong a bona. Dilo tše dintši di tutuetša se:

Go hlaelela ga tsebo e nepagetšego ya Beibele: Beibele e tšweleditšwe ke moya wa Modimo, gomme e buduletšwe ke Modimo. (2 Tim. 3:16, 17; 2 Sam. 23:2) Go palelwa ke go ithuta yona go thibela go ba gona lege e le gofe ga tumelo ya therešo. Gaešita lege ditho tša kereke di ka ba le Dibeibele, fela ge e ba di rutilwe dikgopolo tša batho go e na le Lentšu la Modimo, ruri di tla hlaelelwa ke tumelo ya kgonthe go Modimo le morerong wa gagwe. Gore di tle di rarolle mathata a bophelo, ruri di tla tlwaela go ithekga ka dikgopolo tšeo e lego tša tšona goba tšeo tša batho ba bangwe.—Bapiša le Mateo 15:3-9.

Go forwa ke bodumedi bja maaka: Ba bantši ba forilwe ke boikaketši bja dikereke tša Bojakane, tšeo di ipolelago gore di ruta Lentšu la Modimo eupja di palelwa ke go phela ka go dumelelana le seo le se bolelago. Ba bangwe ba be ba kgomaretše bodumedi bjo e sego bja Bokriste, eupja ba bona dienywa tše dibe medirong ya bjona goba ba hwetša gore ditumelo tša bona ga di ba thuše e le ka kgonthe gore ba bape le mathata a bophelo. Batho ba bjalo ka go hlaelelwa ke tsebo e nepagetšego ya Modimo wa therešo, ruri ba gana dilo tšohle tšeo di lego mabapi le bodumedi.—Bapiša le Ba-Roma 3:3, 4; Mateo 7:21-23.

Go se kwešiše go dumelela ga Modimo bobe: Batho ba bantši ga ba kwešiše lebaka leo Modimo a dumelelago bobe ka lona, gomme ba mmelaela ka baka la dilo tše dibe ka moka tšeo di diregago. Ga ba lemoge gore go sekamela ga motho bobeng ga se ka lebaka la thato ya Modimo, eupja ke ka baka la sebe sa Adama. (Ba-Roma 5:12) Mo gongwe ba ka ba ba sa ele hloko go ba gona ga Sathane Diabolo le ga tutuetšo ya gagwe ditabeng tša lefase, ka gona ba belaela Modimo ka dilo tše dibe tšeo di bakwago ke Sathane. (1 Joh. 5:19; Kut. 12:12) Ge e ba ka tsela e nngwe ba be ba ka ela hloko dilo tše, gona ba be ba ka bona gore Modimo o diega go gata mogato ka gobane ba sa bone gabotse kgang ya bogoši bja legohle, gomme ba sa kwešiše lebaka la gore go se fele pelo ga Modimo go fihlela mo nakong ye go ba buletše sebaka seo se bego se se sa swanela sa phologo. (Ba-Roma 2:4; 2 Pet. 3:9) Le gona, ga ba lemoge e le ka kgonthe gore Modimo o beile nako yeo ka yona a tlago go senyetša ruri batho ka moka bao ba dirago bobe.—Kut. 22:10-12; 11:18; Habak. 2:3.

Maphelo a bušwa ke dikganyogo tša nama le dikgopolo: Gantši, batho bao ba hlaelelwago ke tumelo yeo e nago le seo e se bolelago sa kgonthe, ba ineetše tabeng ya go phegelela dikgahlego tše dingwe. Ba bangwe mo gongwe ba ka bolela gore ba dumela Beibele, eupja mo gongwe ba ka ba ba se ba ka ba ithuta yona gabotse goba mo gongwe ba ka ba ba paletšwe ke go naganišiša ka temogo ka seo ba se balago, mabaka a go dira bjalo le kamoo ba ka e dirišago ka gona bophelong bja letšatši le lengwe le le lengwe. (Bapiša le 1 Koronika 28:9.) Mabakeng a mangwe, ba paletšwe ke go fepa tumelo yeo ba nago le yona, eupja go e na le moo ba dumelela kganyogo ya go kganyoga dilo tše dibe e buša pelo tša bona, e le gore ba tle ba furalele Modimo le ditsela tša gagwe.—Ba-Heb. 3:12.

Motho a ka hwetša bjang tumelo?

Ba-Roma 10:17: “Tumêlô e tšwa xo kweng.” (Bapiša le Ditiro 17:11, 12; Johane 4:39-42; 2 Koronika 9:5-8. Motho o swanetše gore pele a hwetše seo Beibele e se bolelago, gomme o tla matlafatša tumelo ya gagwe ge e ba a ka e hlahloba ka hlokomelo e le gore a tle a kgodišege ka go ba ga yona e botegago.)

Ba-Roma 10:10: “Motho ó dumêla ka pelo.” (Ka go naganišiša ka dilo tša Modimo gore a di leboge, ruri dilo di thoma go kgahliša pelong ya seswantšhetšo.)

Tumelo e matlafatšwa ge motho a dira ka dikholofetšo tša Modimo, gomme a bona bohlatse bja tšhegofatšo ya Modimo go seo a se dirilego.—Bona Psalme 106:9-12.

Seswantšho: Mo gongwe o na le mogwera yo o bego o ka bolela ka yena gore: ‘Ke bota motho yo. Ke holofela gore a ka dira seo a se bolelago; gomme ke tseba gore ge e ba ke e-na le bothata, ruri o tla nthuša.’ Motho lege e le ofe yeo o ka bolelago ka yena, ruri e ka se ke ya ba motho yo o mo tsebilego maabane, na e ka ba yena? E tla ba motho yo o gweranego le yena ka nako e telele, motho yo a ilego a ipontšha a botega ka dinako tšohle. Go bjalo le ka tumelo ya bodumedi. Gore o be le tumelo, ruri o swanetše go diriša nako o tseba Modimo le tsela ya gagwe ya go dira dilo.

Tumelo ya gore go na le Modimo

Bona matlakala 332-338, ka tlase ga hlogo ya ditaba e kgolo ya “Modimo.”

Tumelo ya go dumela kholofetšo ya tshepedišo e mpsha ya go loka ya dilo

Ge motho a thoma go tlwaelana gabotse le pego ya ditiro tša Jehofa go bahlanka ba gagwe, ruri o thoma go ba le kgopolo ya Jošua yo a itšego: “Lena ankê Le lemoxeng ka pelo ka moka le ka môya ka moka, xe xo sa ka xwa hlaêla le setee sa tše botse tše [Jehofa] Modimo wa lena a Le boletšexo ka tšôna; ka moka di tšweletše; xa xo na le setee se se hlokexilexo.”—Još. 23:14.

Dikholofetšo tša Beibele tša bophelo bjo bo mpshafaditšwego, tsogo ya go tsoga bahung le tše dingwe di tiišeleditšwe ke pego ya mehlolo yeo e ilego ya dirwa ke Jesu Kriste. Tše ga se dinonwane. Bala Diebangedi gomme o bone bohlatse bja gore di nea maswao ka moka a go rereša ga histori. Mafelo a thutafase a bolelwa ka maina; maina a babuši ba nako yeo a neilwe; ditaba tšeo di fetago taba ya hlatse ka e tee e bonego ka mahlo di lotilwe. Go akanya ka bohlatse bjo go ka matlafatša tumelo ya gago dikholofetšong tša Beibele.

E-ya Diholong tša Mmušo tša Dihlatse tša Jehofa le dikopanong tša bona tša kakaretšo, gomme o tla iponela ka noši bohlatse bja gore go diriša keletšo ya Beibele go fetola maphelo gomme e ka dira gore batho e be ba ba botegago le go ba le boitshwaro bjo bo lokilego, gore e ka thuša batho ba morafo ka moka le ditšhaba ka moka go phela gotee le go dira gotee ka moya wa bana ba motho ba kgonthe.

Na mediro e nyakega e le ka kgonthe ge e ba motho a e-na le tumelo?

Jak. 2:17, 18, 21, 22, 26: “Tumêlô . . . xe e se na medirô, e ikhwetše ka nnoši. Xe xo ka ba le e a rexo: Wene O na le tumêlô! nna kè na le medirô, ntaetšê tumêlô ya xaxo e se naxo medirô, nna ke Xo laetšê ya-ka tumêlô ka medirô. Šoo Aborahama tata wešo; a xa a ka a lokafala ka medirô mola à bea Isaka morwa wa xaxwe aletareng? Ké mo O bônaxo xore tumêlô e dirišana le medirô ya xaxwe, tumêlô ya tlala ka medirô. Bo-ka mmele xe e le o hwilexo xe o se n’e môya, le yôna tumêlô e hwile xe e se n’e medirô.”

Seswantšho: Lesogana mo gongwe le ka fereya kgarebe gomme la e botša gore le a e rata. Eupja ge e ba le sa gatele pele ka tša lenyalo, na ruri le tla ba le bontšha gore le e rata e le ka kgonthe? Ka mo go swanago, mediro ke tsela ya go bontšha go ba ga kgonthe ga tumelo le lerato la rena. Ge e ba re sa kwe Modimo, gona ruri ga re mo rate goba ga re dumele go loka ga ditsela tša gagwe. (1 Joh. 5:3, 4) Eupja re ka se ke ra hwetša phološo go sa šetšwe mediro yeo re e dirago. Bophelo bjo bo sa felego ke mpho e tšwago go Modimo ka Jesu Kriste, e sego moputso wa mediro ya rena.—Ba-Ef. 2:8, 9.