Tsogo

Tlhaloso: A·naʹsta·sis, ke lentšu la Segerika leo le fetolelwago e le “tsogo,” leo gabotse-botse le bolelago “go ema gape” gomme le bolela go tšwa bahung. Polelo e tletšego ya “tsogo ya bahu” e dirišwa gantši Mangwalong. (Mat. 22:31; Dit. 4:2; 1 Ba-Kor. 15:12) Ka Sehebere ke techi·yathʹ ham·me·thimʹ, leo le bolelago “go tsoga ga bahu.” (Mat. 22:23, mongwalo wa ka tlase go kgatišo ya Ditšhupetšo ya NW) Tsogo e akaretša go tsošološwa ga tsela ya motho ya bophelo yeo Modimo a dutšego a gopola ka yona. Ka go ya ka thato ya Modimo go motho, gona motho o bušetšwa mmeleng wa nama goba wa moya gomme a tsebja gape ka go ba le lebopo le megopolo e swanago le yela a bego a e-na le yona nakong ya ge a be a e hwa. Tokišetšo ya tsogo ya bahu ke pontšho e kgolo ya botho bjo bo se bja swanelago bja Jehofa; e bontšha bohlale le matla a gagwe, gomme ke tsela yeo ka yona morero wa gagwe wa mathomo mabapi le lefase o tlago go phethwa.

Na tsogo ke go kopana gape ga moya woo o se nago sebopego gotee le mmele wa nama?

Ee, gore se se tle se kgonege ruri batho ba swanetše go ba le moya wo o se nago sebopego woo o ka arogago mmeleng wa nama. Beibele ga e rute selo se se bjalo. Kgopolo yeo e tšerwe filosofing ya ba-Gerika. Thuto ya Beibele mabapi le moya (soul) e bolelwa matlakaleng 340-343. Bakeng sa bohlatse ge e le ka mathomo a go dumela ga Bojakane moyeng wo o se nago sebopego le wo o sa hwego, hle bona matlakala 344, 345.

Na Jesu o ile a tsošwa ka mmele wa nama, gomme na o na le mmele o bjalo legodimong mo nakong ye?

1 Pet. 3:18, NW: “Kriste o hwile gatee ya ba moka bakeng sa dibe, motho yo a lokilego a hwela ba sa lokago, e le gore a tle a le iše go Modimo, o bolailwe mmeleng, eupja a phedišwa moyeng [“ka Moya,” KJ; “moyeng,” RS, NE, Dy, JB].” (Jesu tsogong ya gagwe bahung o ile a tsošwa ka mmele wa moya. Mantšu “nama” le “moya” lengwalong la Segerika ke ao a ganetšanago gomme bobedi bja wona a ka sebopego sa sedirelwa; ka gona, ge e ba mofetoledi a diriša phetolelo “ka moya,” ruri o swanetše go bolela ka go dumelelana gore “ka nama” goba ge e ba a diriša “nameng,” o swanetše go bolela le gore “moyeng.”)

Dit. 10:40, 41: “Ké Yêna [Jesu Kriste] yo Modimo a mo tsošitšexo ka letšatši la boraro, a mo dira wa xo bônaxala. E se bê xo bônwa ke sethšaba ka moka; a bônwa ke dihlatse tše di bexo di hlaotšwe pele ke Modimo.” (Ke ka baka la’ng ba bangwe ba se ba ka ba mmona le bona? Ka gobane e be e le sebopiwa sa moya gomme go etša ge barongwa ba be ba dira nakong e fetilego, o ile a ikapeša mebele ya nama go itira gore a bonagale, gomme o dirile se feela ge a le gare ga barutiwa ba gagwe.)

1 Ba-Kor. 15:45: “Xo ngwadilwe xwa thwe: Motho wa pele, Adama, a napa a ba môya o phelaxo, le Adama wa mafêlêlô [Jesu Kriste yo a bego a phethagetše go etša ge Adama a be a le bjalo nakong ya ge a be a bopja] Yêna ké môya wo o phedišaxo.”

Luka 24:36-39 e bolela’ng ge e le mabapi le mmele woo Jesu a ilego a tsošwa ka wona?

Luka 24:36-39: “Bà [barutiwa] sa bolêla tšeo, Yêna Jesu a êma xare xa bôná, a re: Khutšô a e bê le lena! ’Me ba thšoxa ba boifa, ba re ba bôna seriti. Yêna a bolêla le bôná a re: Le thšoxa’ng? Ké ka ’baka la’ng xe dipelong tša lena xò tsoxa pelaêlô? Bônang diatla tša-ka le maoto a-ka; Le bônê xe e le Nna ka sebele. Nkxwatheng Le bônê, xobane seriti xa se na nama le mašapo, tše Le mpônaxo kè na natšô’.”

Batho ba ka se ke ba bona meoya, ka gona barutiwa ba ile ba gopola e le ka kgonthe gore ba be ba bona seriti goba pono. (Bapiša le Mareka 6:49, 50.) Jesu o ile a ba kgonthišetša gore e be e se seriti; ba be ba ka bona mmele wa gagwe wa nama gomme ba be ba ka o swara ba kwe marapo; le gona o ile a ja pele ga bona. Ka mokgwa o swanago, barongwa mehleng ya pele ba be ba ikapeša mebele ya nama e le gore ba tle ba bonwe ke batho; ba ile ba ja gomme ba bangwe ba ile ba ba ba nyala le go ba le bana. (Gen. 6:4; 19:1-3) Jesu ka morago ga tsogo ya gagwe, ga se a tšwelela ka mehla ka mmele o swanago wa nama (mo gongwe e be e le go tiiša megopolong ya bona taba ya gore ka nako yeo e be e le moya), gomme o ile a se ke a lemogwa kapejana gaešita le ke bagwera ba gagwe ba kgonthe. (Joh. 20:14, 15; 21:4-7) Lega go le bjalo, ka go tšwelela ga gagwe gantši go bona a ikapešitše mebele ya nama gomme a bolela le go dira dilo tšeo ba bego ba ka di bapiša le tša Jesu yo ba bego ba mo tseba, ruri o ile a matlafatša tumelo ya bona tabeng ya gore o be a tsošitšwe e le ka kgonthe bahung.

Ge e ba barutiwa ba be ba tloga ba bone Jesu ka mmele wo a lego ka wona mo nakong ye legodimong, gona Paulo ka morago o be a ka se ke a bolela ka Kriste yo a tagafaditšwego e le “Yêna seswanthšô sa lebopô le Modimo a lexo ka lôna,” ka gobane Modimo ke Moya gomme le ka mohla ga se a ka a ba nameng.—Ba-Heb. 1:3; bapiša le 1 Timotheo 6:16.

Ge re bala ka dipego tša go iponagatša ga Jesu ka morago ga tsogo, gona re thušwa go kwešiša gabotse ge e ba re gopola ka 1 Petro 3:18 le 1 Ba-Korinthe 15:45, tšeo di tsopotšwego letlakaleng 429.

Bona le matlakala 221, 222, tlase ga “Jesu Kriste.”

Ke bomang bao ba tlago go tsošwa go ba le karolo bophelong bja legodimo gotee le Kriste, gomme ke’ng seo ba tlago go se dira moo?

Luka 12:32: “Se boifê, wene mohlatswana o monyenyane, xobane Tata-weno ó ikxahletšwe ke xo Le fa mmušô.” (Ba ga ba akaretše batho ka moka bao ba dumelago; ke palo e nyenyane. Go ba ga bona legodimong go na le morero.)

Kut. 20:4, 6: “Ka bôna didulô tša boxoši; xwa dula ba ba neilwexo xo ahlola; . . . Wa lehlôxônôlô, mokxêthwa ké eo a naxo le kabêlô tsoxong yeo ya pele. Lehu la bobedi xo bôná-bao xa le na matla. Sa bôná ké xo ba baperisita ba Modimo le ba Kriste; ba tlo buša le Yêna nywaxa e sekete.”

Bona le matlakala 241-247, tlase ga hlogo ya ditaba ya “Legodimo.”

Na bao ba tsošetšwago bophelong bja legodimo ba tla feleletša ba e na le mebele e tagafaditšwego ya nama moo?

Ba-Fil. 3:20, 21: “Morêna Jesu Kriste . . . mebele ya rena ye e nyatšexaxo yé, ó tlo e fa lebopô le šele, ya tlo swana le mmele wa xaxwe wa letaxô; ké tše a tl’o xo di dira ka matla ao a kxônaxo xo buša tšohle ka ôna.” (Na se se bolela gore ke mebele ya bona ya nama yeo e tlago go feleletša e dirilwe ya letago magodimong? Goba na se bolela gore go e na le go ba le mebele e nyatšegago ya nama, ruri ba tla apešwa mebele ya letago ya moya ge ba tsošetšwa bophelong bja legodimo? Anke lengwalo le le latelago le arabe.)

1 Ba-Kor. 15:40, 42-44, 47-50: “Mebele ya lexodimo e xôna. Le mebele ya lefase e xôna. Letaxô la ya lexodimo le šele; le la ya lefase le šele. Le xo tsoxa xa bahu xo byalo. . . . O byalwa è le mmele wa nama; o tlo tsoxa è le mmele wa môya. . . . Motho wa pele [Adama] ó tšwa mmung; motho wa bobedi [Jesu Kriste] o tšwa lexodimong, ké wa xôna-kua. Ba lefase ba swana le yêna-yola wa xo tšwa mmung; ba lexodimo ba swana le Yêna-eo wa xo tšwa lexodimong. Byalo ka xe re apere seswanthšô sa wa mmu, le seswanthšô sa wa lexodimo re tlo se apara. Se nna ke se bolêlaxo, lena Bana bešo, ke re: Nama le madi xa se tšôna di tl’o xo ja lefa mmušong wa Modimo.” (Mo ga go dumelelwe go tswakanywa lege e le gofe ga mehuta e mebedi ya mebele, goba go iša mmele wa nama legodimong.)

Jesu o bontšhitše bjang seo tsogo e tlago go se bolela bathong ka kakaretšo?

Joh. 11:11, 14-44: “[Jesu a re go barutiwa ba gagwe:] Latsaro moxwêra-rena ó robetše; xomme ke ya xo mo tsoša borokong. . . . Ké mo Jesu a ba boditšexo ka thlatholoxanyô, a re: Latsaro ó hwile. . . . Jesu xe a fihla Bethania, a hwetša matšatši è šetše e le a manê à [Latsaro] le lebitleng. . . . Jesu a re [go Mareta kgaetšedi ya Latsaro]: Ké Nna tsoxô le bophelô. . . . A hlaboša lentšu a re: Latsaro! Tšwaa O tlê mó! Mohu a tšwa à tatetšwe matsôxô le maoto ka mašela, sefahloxong à tatetšwe ka lešelana. Jesu a re: Mo tlemolleng Le mo lesê a ikêlê.” (Ge e ba Jesu a ka be a bušitše Latsaro boemong bja lethabo bophelong bjo bongwe, ruri seo e ka be e ile ya ba go se be le botho. Eupja go tsoša ga Jesu Latsaro boemong bja go se phele e bile botho go Latsaro gotee le go dikgaetšedi tša gagwe. Latsaro o ile a phela gape e le motho.)

Mar. 5:35-42: “Xwa fihla ba xa-moxolo wa phuthêxô, ba re: Morwedi wa xaxo ó hwile. Moruti eo O sa mo lapišetša’ng? Jesu xe a e-kwa bà r’yalo, a bolêla le moxolo wa phuthêxô a re: Se thšoxê! Sa xaxo a e bê xo dumêla. . . . A bitša tata xo ngwanenyana le mm’axwe, le bao a bexo a tlile nabô’, a tsêna nabô’ moo ngwanenyana a letšexo xôna. A mo swara ka seatla, a re: Thalitha kumi! Ké xo re: Mosetsanyana, ke re: Tsoxa! À sa r’yalo ké xe mosetsanyana à tsoxa, a sepela. E be e le wa nywaxa e lesome le metšô e mebedi. Batho ba swara ke tlalêlô e kxolo.” (Ge tsogo ya batho ka kakaretšo e direga lefaseng nakong ya Pušo ya Kriste ya Nywaga e Sekete, ruri batswadi ba dimilione tše dintši le bana ba bona ka ntle le pelaelo ba tla thaba kudu ge ba kopana gape.)

Ke ditebelelo dife tšeo di tlago go letela bao ba tsošetšwago bophelong mo lefaseng?

Luka 23:43, NW: “Ruri ke a go botša lehono, O tla ba le nna Paradeiseng.” (Lefase ka moka le tla fetolelwa paradeiseng tlase ga pušo ya Kriste e le Kgoši.)

Kut. 20:12, 13: “Ka bôna bahu bà eme pele xa Modimo, ba banyane le ba baxolo. Xwa phuthollwa mangwalô; xwa bulwa le lengwê e lexo Puku ya Bophelô. Bahu ba sekišwa ka tše di ngwadilwexo mangwalong, xò iwa ka medirô ya bôná. . . . Bohle ba sekišwa xò iwa ka medirô ya bôná.” (Go bulwa ga mangwalo ge e le gabotse go bolela nako ya go rutelwa thatong ya Modimo, ka go dumelelana le Jesaya 26:9. Taba ya gore “puku ya bophelô” e ile ya bulwa e bontšha gore go na le sebaka sa batho bao ba tlago go amogela thuto yeo ka gore maina a bona a ngwalwe pukung yeo. Tebelelo ya bophelo bjo bo sa felego phethegong ya batho e ka pele ga bona.)

Bona le matlakala 325-330, tlase ga “Mmušo.”

Na ba bangwe ba tla tsošetšwa feela go tla go ahlolwa gomme ka morago ba išwe lehung la bobedi?

Ke’ng seo se bolelwago ke Johane 5:28, 29? E re: “Xo tla lebaka leo bohle ba lexo mabitleng ba tl’o xo kwa Lentšu la Morwa-Modimo ka lôna. Xomme ba tlo tšwa; ba ba dirilexo tše botse ba tlo tsoxa ba phela; ba ba dirilexo tše mpe ba tlo tsoxa ba lahlwa.” Seo Jesu a bego a se bolela mo se swanetše go kwešišwa seetšeng sa kutollo yeo a ilego a e nea Johane ka morago. (Bona Kutollo 20:12, 13, e tsopotšwego letlakaleng 432.) Bao ba ilego ba dira dilo tše di botse gotee le bao ba ilego ba dira dilo tše dibe nakong e fetilego ba tla “sekišwa xò iwa ka medirô ya bôná.” Mediro efe? Ge e ba re be re ka ba le kgopolo ya gore batho ba be ba tla ahlolwa ka baka la mediro yeo ba e dirilego bophelong bja bona bja nako e fetilego, gona se se be se ka se ke sa dumelelana le Ba-Roma 6:7: “E a hwilexo, ó hunolotšwe sebeng.” Le gona e be e tla ba go hloka tlhaloganyo go tsošetša batho feela gore ba tle ba senywe. Ka gona, Jesu go Johane 5:28, 29a, o be a bolela ka tsogo; gomme karolong e šetšego ya Joh 5 temana ya 29, o be a bolela ka mafelelo ao a bego a tla direga ka morago ga ge ba tlišitšwe phethegong ya batho gomme ba ahlotšwe.

Kutollo 20:4-6 e bontšha’ng ge e le ka bao ba tlago go tsošetšwa lefaseng?

Kut. 20:4-6: “Ka bôna didulô tša boxoši; xwa dula ba ba neilwexo xo ahlola; ka bôna meôya ya ba ba kxaotšwexo dihlôxô ka ’baka la bohlatse bya Jesu le ka ’baka la Lentšu la Modimo, . . . Bôná-bao ka ba bôna bà phedile, bà buša le Kriste nywaxa e sekete. Xe e le bahu ba bangwê xa ba ka ba boêla ba phela, xwa bá xwa feta nywaxa yeo e sekete. Yêla ké yôna tsoxô ya pele. Wa lehlôxônôlô, mokxêthwa ké eo a naxo le kabêlô tsoxong yeo ya pele. Lehu la bobedi xo bôná-bao xa le na matla. Sa bôná ké xo ba baperisita ba Modimo le ba Kriste; ba tlo buša le yêna nywaxa e sekete.”

Lefoko la pele Kut 20 temaneng ya 5 le tsentšhitšwe ka mašakaneng go NW le Mo go thuša mmadi gore a kgomaganye seo se latelago polelo yeo e lego ka mašakaneng gotee le yeo e e latelago. Ka ge go boletšwe gabotse, ruri ga se “bahu ba bangwê” bao ba nago le karolo tsogong ya pele. Tsogo yeo ke ya bao ba tlago go buša le Kriste ka nywaga e sekete. Na se se bolela gore ga go batho bao ba tlago go phela nywageng e sekete ka ntle le bao ba tlago go buša legodimong le Kriste? Aowa; ka gobane ge e ba se e le yona taba, gona go be go tla bolela gore ga go motho yo ba bego ba tla ba ba mo direla e le baperisita gomme moo ba bušago gona e be e tla ba lefase leo e lego lešoka.

Ke bomang bao e lego “bahu ba bangwê”? Ke batho ka moka bao ba hwilego ka baka la sebe sa Adama, le bao gaešita lege e le baphologi ba masetla-pelo a magolo goba bao mo gongwe ba ka belegwago Nywageng e Sekete, ba tlago go nyaka go imollwa matleng a tlišago lehu a sebe se se bjalo.—Bapiša le Ba-Efeso 2:1.

Ke ka tlhaloganyo efe moo ba sa ‘boelego ba phela,’ go fihlela bofelong bja nywaga e sekete? Se ga se bolele tsogo ya bona. ‘Go boela ba phela’ mo go akaretša mo gontši go feta go ba gona feela e le batho. Go bolela go hwetša phethego ya motho ba hunologile matleng ka moka a sebe sa Adama. Hlokomela gore go bolelwa ga se temaneng ya 5 go dirwa kapejana ka morago ga ge temana yeo e etilego pele e bolela gore bao ba tlago go ba legodimong ke bao ba ‘phetšego.’ Tabeng ya bona, ruri go bolela bophelo bjo bo hunologilego matleng ka moka a sebe; ba bile ba šegofaditšwe ka mo go kgethegilego ka go se hwe. (1 Ba-Kor. 15:54) Go “bahu ba bangwê” ka nako yeo, go swanetše go bolela bophelo bjo bo tletšego phethegong ya motho.

Ke bomang bao ba tlago go akaretšwa tsogong ya lefase?

Joh. 5:28, 29: “Di se kê tša Le tlaba; xobane xo tla lebaka leo bohle ba lexo mabitleng [a kgopotšo] ba tl’o xo kwa Lentšu la Morwa-Modimo [lentšu la Jesu] ka lôna. Xomme ba tlo tšwa.” (Lentšu la Segerika leo le fetoletšwego gore ‘mabitleng a kgopotšo’ ga se bontši bja taʹphos [lebitla, e lego leo go bolokilwego motho o tee go lona] goba haiʹdes [lebitleng, e lego lebitla le le tlwaetšwego la batho ba hwilego], eupja ke bontši ka mokgwa wa sedirelwa sa mne·meiʹon [go gopola, lebitla la kgopotšo]. Le bolela kudu ka go gopolwa ga motho yo a hwilego. Ga se batho bao megopolo ya bona e phumotšwego Gehenna ka baka la dibe tše di sa lebalelwego, eupja ke batho bao ba gopolwago ke Modimo bao ba tlago go tsošwa ba e-na le sebaka sa go phela ka mo go sa felego.—Mat. 10:28; Mar. 3:29; Ba-Heb. 10:26; Mal. 3:16.)

Dit. 24:15, PK: “Ke na le kholofelo go Modimo, . . . ya gore go tlo ba le tsogo ya bahu, ya ba ba lokilego, le ya ba ba sa lokago.” (Ee, batho bao ba phetšego ka go dumelelana le ditsela tša Modimo tše di lokilego gotee le batho bao ka baka la go se tsebe ba dirilego dilo tšeo di sa lokago ba tla tsošwa. Beibele ga e arabe dipotšišo tša rena ka moka ge e ba batho ba bangwe ba itšego bao ba hwilego, ba tla tsošwa. Eupja re ka holofela gore Modimo yo a tsebago ditaba tšohle, o tla dira ka go se hlaole ka toka ya gagwe yeo e sepedišanago le kgaugelo, moo a ka se kego a hlokomologa melao ya gagwe ya go loka. Bapiša le Genesi 18:25.)

Kut. 20:13, 14: “Lewatlê la nthša bahu ba lôna; le lehu, le bo-dula-bahu tša nthša bahu ba xo tšôna. Bohle ba sekišwa xò iwa ka medirô ya bôná. Lehu le bo-dula-bahu tša lahlêlwa bodibeng bya mollô. Ké lôna lehu la bobedi.” (Ka gona, bao lehu la bona le bakilwego ke sebe sa Adama ba tla tsošwa, go sa šetšwe ge e ba ba be ba hwetše mawatleng goba ba bolokilwe Hades, e lego lebitla le le tlwaetšwego la lefaseng la batho ba hwilego.)

Bona le hlogo ya ditaba e kgolo ya “Phološo.”

Ge e ba batho ba dimilione tše dikete ba tla tsošwa bahung, ruri ke kae moo ka moka ga bona ba tlago go phela gona?

Tekanyo yeo e dirwago ka go se kgama-kgame ya palo ya batho bao ba kilego ba phela lefaseng ke 20 000 000 000. Ka ge re šetše re bone, ga se ba ka moka bao ba tlago go tsošwa. Eupja gaešita lege e ba re ka bolela gore ba tla tsošwa, ruri go tla ba le madulo a ba lekanego. Lefase lehono le lekanywa gore le dira disekwerekhilomithara tše 147 600 000. Ge e ba seripa sa tše se be se ka beelwa ka thoko bakeng sa merero e mengwe, gona go be go tla ba go sa dutše go šetše mo e ka bago 0,37 ya heketere bakeng sa motho o mongwe le o mongwe, yeo e bego e tla nea dijo tše dintši kudu. Modu wa tlala wa mehleng yeno ga se ka baka la go palelwa ga lefase ke go tšweletša dijo tše di lekanego, eupja ke ka baka la bonaba bja bopolitiki le megabaru ya tša papatšo.

Bona le letlakala 236, tlase ga hlogo ya ditaba ya “Lefase (Earth).”