Thapelo

Tlhaloso: Go bolelwa ga megopolo ya motho ka mokgwa wa borapedi, ka go hlaboša lentšu goba ka go se le hlaboše, go Modimo wa therešo goba medimong ya maaka.

Na o bolela go etša ge ba bantši ba bolela, gore ga o hwetše dikarabo dithapelong tša gago?

Ke dithapelo tša bomang tšeo Modimo a ratago go di kwa?

Ps. 65:2; Dit. 10:34, 35: “Batho ka moka ba tla xo Wene Mokwi wa dithapêlô.” “Modimo xa a bebe motho. Anthe dithšabeng ka moka ó kxahlwa ke ba ba mmoifaxo, xe ba dira tše di lokilexo.” (Setšhaba sa motho, mmala wa motho wa letlalo goba maemo a motho a tša boiphedišo ruri ga a thuše selo tabeng. Eupja maikwelo a pelo ya motho gotee le tsela ya gagwe ya bophelo di dira bjalo.)

Luka 11:2: “Xe Le rapêla Le re: Tata-wešo wa maxodimong! Leina la xaxo a le kxêthwê.” (Na dithapelo tša gago di išwa go Tate, yena yo Beibele e bolelago gore leina la gagwe ke Jehofa? Goba, na go e na le moo o iša dithapelo tša gago go “bakgethwa”?)

Joh. 14:6, 14: “Jesu a re: Tsela ké Nna, le therešô, le bophelô. Xa xo e a tlaxo xo Tate xe e se ka Nna. Xe Le kxopêla selô ka Leina la-ka, e tlo ba Nna ke se diraxo.” (Na o rapela ka leina la Jesu Kriste, o dutše o lemoga gore wena ka ge o le modiradibe o swanetše gore a go boelanye?)

1 Joh. 5:14: “Kholofêlô ye e tiilexo, ye re Mo holofetšexo ka yôna, ké xe re tseba xore ó a re kwa xe re kxopêla se se amanaxo le thatô ya xaxwe.” (Lega go le bjalo, gore o be le kholofelo e bjalo ruri o swanetše gore o tsebe thato ya Modimo pele. Le gona, o kgonthiše gore dikgopelo tša gago di dumelelana le yona.)

1 Pet. 3:12: “Mahlô a [Jehofa] a bôna baloki; ’tsêbê tša xaxwe di kwa xe ba lla. Xomme sefahloxô sa [Jehofa] se lebile ba xo dira bobe.” (Na o šetše o dirišitše nako go ithuta seo Jehofa a se bolelago ka Lentšu la gagwe, ge e le mabapi le seo se lokilego le seo e lego se sebe?)

1 Joh. 3:22: “Se re kaxo se kxopela, re tla se amoxêla xo Modimo, xobane re tlo ba rè e-ya ka melaô ya xaxwe, ré dira se se Mo kxahlaxo.” (Na ruri ke kganyogo ya gago gore o kgahliše Modimo gomme na o ikemišeditše e le ka kgonthe go kwa melao yeo ya gagwe yeo o šetšego o e tseba?)

Jes. 55:6, 7: “Nyakang [Jehofa] è sa le lebaka la xo ka mmôna, Le mmitšeng à sa le kxaufsi. E mobe a a lahlê tsela y’axwe; motho yo kxôpô a lahlê dikêlêlô tš’axwe, a boêlê xo [Jehofa], a mo xauxêlê; a boêlê xo Modimo wa rena, xobane ké wa tebalêlô e ntši.” (Jehofa ka kgaugelo o laletša gaešita le batho bao ba dirilego dilo tše mpe gore ba tle go yena ka thapelo. Eupja gore ba tle ba amogelwe ke Modimo, ruri ba swanetše gore ba sokologe e le ka kgonthe ditseleng tša bona tše mpe le megopolo ya bona gomme ba fetole ditsela tša bona.)

Ke’ng yeo e ka dirago gore dithapelo tša motho di se ke tša amogelwa ke Modimo?

Mat. 6:5: “Le mohla Le rapêlaxo, Le se etšê baikaketši; xobane ba rata xo rapêla bà eme phuthexong le maxahlanong a mekxôtha, è le xore ba bônwê ke batho. Ruri, ke a Le botša, ké xôna xe ba tšere moputsô wa bôná.” (Gape le Luka 18:9-14)

Mat. 6:7: “Xe Le rapêla, Le se kê la touta byalo ka ba dithšaba; xobane bôná ba re ba tlo kowa xe ba bola-bola tše ntši.”

Die. 28:9, PK: “E a thibelago tsebe ya gagwe go kwa molao; le thapelo ya gagwe ke makgapha.”

Mika 3:4, PK: “Mohlang woo ba tlo goeletša go Jehofa, fela a ka se ke a ba arabela; eupja o tlo ba utela sefahlogo sa gagwe lebakeng leo, ka gobane ba befišitše mediro ya bona.”

Jak. 4:3: “Le a rapêla, ’me xa Le fiwe selô, ka xe Le rapêla ka mokxwa o mobe, Lè kxopêla tše Le rataxo xo di tšitlanya Lè e-ya le dikxanyoxô tša lena.”

Jes. 42:8; Mat. 4:10: “Ké Nna Morêna [“Yahweh,” JB; “Jehofa,” NW], ké lôna ’ina la-ka; borêna bya-ka nka se ké ka bo fa yo mongwê; le xo rêtwa xa-ka nka se xo neêle medimo ya diswanthšô.” “O khunamele Morêna Modimo wa xaxo [“Jehofa Modimo wa gago,” NW], O dirêlê Yêna à nnoši!” (Thapelo ke mokgwa wa borapedi. Ge e ba o rapela pele ga dilo tšeo di betlilwego goba diswantšho, ruri na se se tla kgahliša Modimo?)

Jes. 8:19: “Xe ba ka re: Botšišang ba medimo, le ba maphala le didupe! Le tlo re: A sethšaba xa se botšiše Modimo wa sôna? A fa bahu ba ka botšišwa ditaba tša ba ba phelaxo?”

Jak. 1:6, 7: “A a kxopêlê ka tumêlô, a se dika-dikê; xobane e a dikadikaxo ó swana le lephoto la lewatlê, le le tsošwaxo ke phefô la akxa-akxwa ke yôna. Motho yo byalo a se kê a re ó tlo fiwa selô ke [Jehofa].”

Ke ditaba dife tša tshwanelo tšeo go ka rapelwago ka tšona?

Mat. 6:9-13: “Lena, xe Le rapêla, Le re: [1] Tata-wešo wa maxodimong! Leina la xaxo a le kxêthwê; [2] Mmušô wa xaxo a o tlê; [3] thatô ya xaxo a e dirwê mono lefaseng byalo ka xe e dirwa lexodimong; [4] Re fê lehono boxôbê bya rena bya ka mehla; [5] Re lebalêlê melato ya rena byalo ka xe re lebalêla ba ba naxo le melato xo rena; [6] O se re išê molekong; xomme O re phološê bobeng.” (Hlokomela gore leina la Modimo le morero wa gagwe di swanetše go etišwa pele.)

Ps. 25:4, 5: “[Jehofa], ntsebišê ditsela tša xaxo, O nthutê mebila ya xaxo. O nketetšê ka therešô ya xaxo, ’me O nthutê, xobane Modimo wa xo mphološa ke Wene.”

Luka 11:13: “Xe ešita lena Le lexo ba babe, Lè tseba xo nea bana ba lena dineô tše botse, a Tata-weno wa maxodimong xa a Le fetiše kxolê?”

1 Ba-Thes. 5:17, 18: “Le se kxaotše xo rapêla. Mo xo tšohle Le leboxê.”

Mat. 14:19, 20: “[Jesu] a tšea dinkxwa tšeo tše thlano le hlapi tše pedi, a lelalêla lexodimong a leboxa, a ngwatha à nea barutiwa dinkxwa tšeo, bôná ba nea batho. Bohle ba ja ba hora.”

Jak. 5:16: “Le rapêlêlanê.”

Mat. 26:41: “Phakxamang Le rapêlê, xore Le se tsênê melekong.”

Ba-Fil. 4:6: “A Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô.”

Ge e ba o Mongwe a Bolela Gore

‘Rapela le nna pele gomme ka morago o nnee molaetša wa gago’

Mo gongwe o ka araba ka gore: ‘Ke thabela go tseba gore o motho yo a lemogago bohlokwa bja thapelo. Dihlatse tša Jehofa le bona ba rapela ka mehla. Eupja go na le selo se sengwe seo Jesu a se boletšego mabapi le nako le mokgwa wo go ka rapelwago ka wona, e lego seo mo gongwe e ka bago se sefsa go wena. Na o be o tseba gore o boditše barutiwa ba gagwe gore ba se ke ba rapela phatlalatša ka kgopolo ya gore ba bangwe ba ba bone gore ke batho bao ba ineetšego borapeding? . . . (Mat. 6:5)’ Mo gongwe o ka oketša ka gore: ‘Hlokomela seo a tšwetšego pele go se bolela gore e swanetše go ba seo re kgongwago ke sona kudu, le seo re swanetšego go se etiša pele dithapelong tša rena. Se ke seo ke tlilego go abelana le wena ka sona. (Mat. 6:9, 10)’

Goba o ka re: ‘Ke tseba gore baemedi bao ba tšwago dihlopheng tše dingwe tša bodumedi ba dira seo. Eupja Dihlatse tša Jehofa ga ba dire seo, ka gobane Jesu o laetše barutiwa ba gagwe gore ba dire modiro wa bona wa boboledi ka mokgwa o mongwe. Go e na le go ba botša gore, “Ge le tsena lapeng, le thome ka go rapela,” ruri hlokomela seo a se boletšego go etša ge se hwetšwa mo go Mateo 10:12, 13. . . . Bona mo Mat 10 temaneng ya 7 seo ba bego ba swanetše go bolela ka sona. . . . Mmušo woo o be o ka thuša bjang batho bao ba swanago le wena le nna? (Kut. 21:4)’