Karolo 11

Motheo Wa Lefase Le Lefsa Gona Bjale O A Thewa

1, 2. E le go phethagatšwa ga boporofeta bja Beibele, ke eng seo se diregago ka pele ga mahlo a rena?

SELO se sengwe se se kgahlišago ke therešo ya gore motheo wa lefase le lefsa la Modimo gona bjale o gare o a thewa, mola lefase la Sathane le senyega. Re bona ka mahlo a rena ge Modimo a kgoboketša batho go tšwa ditšhabeng ka moka gomme a ba dira motheo wa lekoko le lefsa la lefase leo kgaufsinyane le tlago go dula legatong la lefase la mehleng yeno leo le sa kopanago. Ka Beibeleng go 2 Petro 3:13, lekoko le le lefsa le bitšwa “lefase le lefsa.”

² Boporofeta bja Beibele bo bolela gape gore: “Bofelong bya mabaka [nako yeo bjale re phelago go yona] . . . Merafo-rafo e tlo ya xôna è re: A re yeng, re rotoxêlê thabeng ya Morêna [borapedi bja gagwe bja therešo], . . . a re rutê ’tsela tš’axwe.”—Jesaya 2:2, 3.

3. (a) Boporofeta bja Jesaya bo phethega go bomang? (b) Puku ya mafelelo ya Beibele e re’ng ka se?

³ Boporofeta bjoo gona bjale bo a phethega magareng ga bao ba ikokobeletšago ‘ditsela tša Modimo le ba ba sepelago go tšona.’ Puku ya mafelelo ya Beibele e bolela gore lekoko le la ditšhaba ka moka le le ratago khutšo ke “lešaba le lexolo la batho . . . ba dithšaba ka moka, le meloko ka moka, le merafô ka moka, le maleme ka moka,” e lego borwarre bja kgonthe bja lefase ka moka bjo bo direlago Modimo e le ngata e tee. Beibele e bolela gape gore: “Ké bôná ba ba tšwaxo tlaišexong e kxolo.” Se se bolela gore ba tla phologa bofelo bja tshepedišo ye e mpe ya dilo.—Kutollo 7:9, 14; Mateo 24:3.

Borwarre bja Kgonthe bja Ditšhaba ka Moka

4, 5. Borwarre bja lefase ka bophara bja Dihlatse tša Jehofa bo kgonega bjang?

⁴ Dihlatse tša Jehofa tše dimilione di leka ka matla go phela ka go dumelelana le ditaelo tša Modimo le ditsela tša gagwe. Di na le kholofelo e tiilego ya go hwetša bophelo bjo bo sa felego lefaseng le lefsa la Modimo. Ka go phela maphelo a bona a letšatši le letšatši ka go theetša melao ya Modimo, ba mmontšha go rata ga bona go ikokobeletša tsela ya gagwe ya go buša gona bjale gaešita le lefaseng le lefsa. Kae le kae, go sa šetšwe gore ke ba setšhaba goba morafe ofe, ba theetša melao e swanago—melao yeo e beilwego ke Modimo ka Lentšung la Gagwe. Ke ka baka leo e lego borwarre bja kgonthe bja ditšhaba ka moka, lekoko la lefase le lefsa leo le tlago go dirwa ke Modimo.—Jesaya 54:13; Mateo 22:37, 38; Johane 15:9, 14.

⁵ Dihlatse tša Jehofa ga di ipethe kgara ka baka la borwarre bja tšona bjo bo kgethegilego bja lefase ka moka. Di a tseba gore se se tlišitšwe ke moya o matla wa Modimo wo o šomago go batho bao ba ikokobeletšago melao ya gagwe. (Ditiro 5:29, 32; Ba-Galatia 5:22, 23) Ke modiro wa Modimo. Go bjalo ka ge Jesu a itše, “tše di sa kxônexexo xo batho, di kxônêxa xo Modimo.” (Luka 18:27) Ka gona Modimo yo a dirilego gore go be le legohle le le sa felego ke yena yo a dirago gore go be le lekoko le le tiilego la lefase le lefsa.

6. Ke ka baka la’ng go ka thwe borwarre bja Dihlatse tša Jehofa ke mohlolo wa mehleng yeno?

⁶ Ka gona, tsela ya Jehofa ya go buša lefaseng le lefsa le gona bjale e ka bonwa ka seo a se tšweletšago motheong wa lefase le lefsa woo gona bjale o thewago. Le gona, seo a se dirilego ka Dihlatse tša gagwe ka tsela e itšego ke mohlolo wa mehleng yeno. Ka baka la’ng? Ka gobane o rulagantše Dihlatse tša Jehofa gore e be borwarre bja kgonthe bja lefase ka bophara bjo bo ka se kego bja kgaolwa ke dikgahlego tše di arolago batho tša botšhaba, tša morafe goba tša bodumedi. Lege Dihlatse e le tše dimilione ka palo gomme di dula dinageng tše fetago 200, di kopane bjalo ka ngata e tee. Borwarre bjo bja lefase ka bophara bjo bo sa kago bja bonwa historing ka moka, ruri ke mohlolo wa mehleng yeno—modiro wa Modimo.—Jesaya 43:10, 11, 21; Ditiro 10:34, 35; Ba-Galatia 3:28.

Go Hlaola Batho ba Modimo

7. Jesu o boletše gore balatedi ba gagwe ba therešo ba be ba tla hlaolwa ka’ng?

⁷ Batho bao Modimo a ba dirišago e le motheo wa lefase la gagwe le lefsa ba ka hlaolwa bjang gape? Ke bomang bao ba phethagatšago mantšu a Jesu go Johane 13:34, 35? O itše: “Ke le nea molaô o mofsa, wa xo re Le ratanê, wa xo re Le ratanê byalo ka Nna xe kè Le ratile. Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” Dihlatse tša Jehofa di dumela mantšu a Jesu gomme di a a diriša. Bjalo ka ge Lentšu la Modimo le laela, di na le “leratanô le tletšexo.” (1 Petro 4:8) Di ‘apere lerato, yona tlemo ya botlalo.’ (Ba-Kolose 3:14) Ka gona lerato la borwarre ke “sekgomaretši” seo se ba swaragantšhago gotee lefaseng ka bophara.

8. Johane wa Pele 3:10-12 e hlaola batho ba Modimo ka tsela efe gape?

⁸ Le gona, 1 Johane 3:10-12 e re: “Ké xôna moo xo bônaxalaxo ba e lexo bana ba Modimo, le ba e lexo bana ba Diabolo. E a sa yexo ka tokô, xa a’ tswalwa ke Modimo, bo-ka le eo a sa ratexo ngwan’abô. Ké yôna taba ye Le e kwilexo xo tloxa mathomong, yé ya xore re ratanê. Re se etše Kaine e a tswetšwexo ke E-mobe, a bolaya ngwan’abô.” Ka gona, batho ba Modimo ke borwarre bja lefase ka moka bjo bo se nago bošoro.

Sebopego se Sengwe se se ba Hlaolago

9, 10. (a) Bahlanka ba Modimo ba be ba tla tsebja ka go dira modiro ofe mehleng ya bofelo? (b) Dihlatse tša Jehofa di phethagaditše Mateo 24:14 bjang?

⁹ Go na le tsela e nngwe gape ya go hlaola bahlanka ba Modimo. Boporofeteng bja gagwe bjo bo lego mabapi le bofelo bja lefase, Jesu o boletše ka dilo tše dintši tšeo di bego di tla swaya nako yeo e lego mehla ya bofelo. (Bona Karolo 9.) Sebopego sa motheo sa boporofeta bjo se bolelwa mantšung a gagwe a lego go Mateo 24:14: “Ebangedi yé ya mmušô wa maxodimong e tlo xoêlêlwa lefaseng ka moka xore e bê bohlatse mo xo dithšaba tšohle; ya tlo ba xôna bofêlô bo fihlaxo.”

¹⁰ Na re bone go phethega ga boporofeta bjoo? Ee. Ga e sa le mehla ya bofelo e thoma ka 1914, Dihlatse tša Jehofa di boletše ditaba tše di lokilego tša Mmušo wa Modimo lefaseng ka moka ka tsela yeo Jesu a laetšego ka yona, e lego ka go ya malapeng a batho. (Mateo 10:7, 12; Ditiro 20:20) Dihlatse tše dimilione di etela batho setšhabeng se sengwe le se sengwe gore di boledišane le bona ka lefase le lefsa. Se se ile sa feleletša ka gore o hwetše pukwana ye ka ge modiro wa Dihlatse tša Jehofa o akaretša go gatiša le go phatlalatša dipuku tše dimilione tše dikete tše di bolelago ka Mmušo wa Modimo. Na o tseba batho lege e ka ba bafe bao ba bolelago ka Mmušo wa Modimo ka ntlo le ntlo lefaseng ka moka? Mareka 13:10 e bontšha gore modiro wo wa go bolela le go ruta o swanetše go dirwa “pele,” e be gona bofelo bo tlago.

Go Araba Kgang e Kgolo ya Bobedi

11. Ka go ikokobeletša pušo ya Modimo, Dihlatse tša Jehofa di phethagatša eng gape?

¹¹ Ka go ikokobeletša melao le melao ya motheo ya Modimo, Dihlatse tša Jehofa di phetha selo se sengwe gape. Di bontšha gore Sathane o be a aketša ge a be a re batho ba be ba ka se botegele Modimo ge ba le tekong, ka go dira bjalo ba arabela kgang e kgolo ya bobedi yeo e amanago le go botega ga batho. (Jobo 2:1-5) Dihlatse ka ge e le lekoko la batho ba dimilione ba ba tšwago ditšhabeng ka moka di bontšha gore bjalo ka sehlopha se setee, di botegela pušo ya Modimo. Gaešita lege e le batho ba ba sa phethegago, ba kgomarela lehlakore la Modimo la kgang ya bogoši bja legohle go sa šetšwe kgateletšo ye e tšwago go sathane.

12. Dihlatse ka tumelo ya tšona di ekiša bomang?

¹² Lehono, Dihlatse tše tša Jehofa tše dimilione di tlaleletša ka bohlatse bja tšona bohlatseng bjo bo neilwego ke lelokelelo le letelele la dihlatse tše dingwe tša nakong e fetilego tšeo di ilego tša bontšha go botegela Modimo. Tše dingwe tša tšona e be e le Abele, Noage, Jobo, Aborahama, Sara, Isaka, Jakobo, Debora, Ruthe, Dafida le Daniele, ge re bala ba sego kae feela. (Ba-Hebere, kgaolo 11) Bjalo ka ge Beibele e bolela, ke ‘leru le legolo la dihlatse tše botegago.’ (Ba-Hebere 12:1) Ba, gotee le ba bangwe go akaretša le barutiwa ba Jesu ba bontšhitše potego ya bona go Modimo. Le gona Jesu ka noši o beile mohlala o mogolo kudu ka go kgomarela potego ka mo go feletšego.

13. Ke mantšu afe ao Jesu a a boletšego ka Sathane ao a bonagetšego e le therešo?

¹³ Se se bontšha gore seo Jesu a ilego a se bolela ka Sathane go baetapele ba bodumedi e be e le therešo: “Xe byale Le tsoma xore Le mpolayê, Nna motho wa xo Le botša therešo ye ke e kwilexo xo Modimo . . . Tata-weno yo le tšwaxo xo yêna ké Diabolo; ’me le phêxêlla xo dira medirô ya yêna tata-weno eo. Ké yêna senokwane xo tloxa mathomong, xobane mo xo yêna therešô xa e yo’. Xe a bolêla maaká, ó bolêla tša xaxwe; xobane ké yêna moaketši le rra-xo-moaketši.”—Johane 8:40, 44.

O Kgetha Eng?

14. Ke eng se se diregago ka motheo wa lefase le lefsa gona bjale?

¹⁴ Motheo wa lefase le lefsa wo ga bjale o thewago ke Modimo lekokong la ditšhaba ka moka la Dihlatse tša Jehofa o tielela pele. Ngwaga le ngwaga batho ba dikete tše makgolo ba diriša boikgethelo bja bona motheong wa tsebo e nepagetšego bakeng sa go amogela pušo ya Modimo. Ba fetoga karolo ya lekoko la lefase le lefsa, gomme ba phagamiša lehlakore la Modimo la kgang ya bogoši bja legohle, gomme ba bontšha gore Sathane ke moaketši.

15. Modiro wa go kgethologanya woo Jesu a swaraganego le wona mehleng ya rena ke ofe?

¹⁵ Ka go kgetha ga bona pušo ya Modimo ba swanelegela go bewa “letsoxong le letona” la Kriste ge a dutše a kgethologanya “dinku” go “dipudi.” Boporofeteng bja gagwe mabapi le mehla ya bofelo, Jesu o boleletše pele gore: “Dithšaba ka moka di tlo phuthêlwa pele xa xaxwe, ’me o tlo ba kxêtholoxanya byalo ka modiši xe a kxêtholoxanya dinku le dipudi. Dinku ó tlo di bea ka letsoxong la xaxwe le letona; dipudi a di bea xo la ntsôxôšô.” Dinku ke batho ba ikokobeditšego bao ba kopanelago le banababo Kriste le bao ba emago le bona gomme ba thekga pušo ya Modimo. Dipudi ke batho ba dinganga bao ba sa amogelego banababo Kriste le bao ba sa itshwenyego ka go thekga pušo ya Modimo. Mafelelo a seo ke afe? Jesu o itše: “’Me bôná [dipudi] ba tlo ya thlokofatšong ye e sa felexo; baloki [dinku] bôná ba tlo ya bophelong byo bo sa felexo.”—Mateo 25:31-46.

16. O swanetše go dira’ng ge e ba o nyaka go phela Paradeiseng e tlago?

¹⁶ Ka kgonthe, Modimo o na le taba le rena! Kgaufsinyane o tla tliša paradeise e thabišago ya lefaseng. Na o nyaka go phela Paradeiseng yeo? Ge e ba o nyaka, bontšha go leboga ga gago ditokišetšo tša Jehofa ka go ithuta ka yena le ka go diriša seo o ithutago sona. “Nyakang Morêna è sa le lebaka la xo ka mmôna, Le mmitšeng à sa le kxaufsi. E mobe a a lahlê tsela y’axwe; motho yo kxôpô a lahlê dikêlêlô tš’a-xwe, a boêlê xo Morêna, a mo xauxêlê; a boêlê xo Modimo wa rena, xobane ke wa tebalêlô e nntši.”—Jesaya 55:6, 7.

17. Ke ka baka la’ng ge go se na nako ya go gadima morago tabeng ya go kgetha gore re tla hlankela mang?

¹⁷ Tiego e tswala tahlego. Bofelo bja tshepedišo ye ya kgale bo kgaufsi kudu. Lentšu la Modimo le eletša ka gore: “Le se kê la rata lefase le tše lefaseng; xe motho a rata lefase, leratô la Tata wešo xa le xôna mo xo Yêna. Xobane tšohle tše lefaseng, e lexo kxanyoxô ya nama, le kxanyoxô ya mahlô, le xo phela ka xo ikxoxomoša, xa di tšwe xo Tata wešo, di tšwa lefaseng. Xomme lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.”—1 Johane 2:15-17.

18. Ke mogato ofe wo o tla dirago gore o kgone go letela ka kholofelo go phela lefaseng le le kgahlišago le lefsa la Modimo?

¹⁸ Batho ba Modimo gona bjale ba tlwaeletšwa go phela bophelo bjo bo sa felego lefaseng le lefsa. Ba ithuta tsebo ya moya gotee le bokgoni bjo bongwe tšeo di nyakegago bakeng sa go tšweletša paradeise. Re go kgothaletša go kgetha Modimo e le Mmuši le go thekga modiro wo o phološago bophelo wo a laelago gore o dirwe lefaseng ka moka lehono. Ithute Beibele le Dihlatse tša Jehofa, gomme o tsebe Modimo yo ruri a nago le taba le wena le yo a tlago go fediša ditlaišego. Ka tsela ye le wena o ka ba karolo ya motheo wa lefase le lefsa. Ka go dira bjalo o ka kgona go lebelela pele ka kholofelo go amogeleng kgaugelo ya Modimo le go phela ka mo go sa felego lefaseng leo le lefsa le le kgahlišago.

[Seswantšho go letlakala 31]

Dihlatse tša Jehofa di na le borwarre bja kgonthe bja ditšhaba ka moka

[Seswantšho go letlakala 32]

Gona bjale go thewa motheo wa lefase le lefsa la Modimo