Kgaolo 15

Go Kaonefatšwa ga Thulaganyo ya Mokgatlo

GO ŠOMA ga mokgatlo wa Dihlatse tša Jehofa go bile le diphetogo tše bohlokwa kudu ga e sa le go tloga ge Charles Taze Russell le badirišani ba gagwe ba thoma go ithuta Beibele gotee la mathomo ka 1870. Ge Barutwana ba pele ba Beibele ba be ba se nene ka palo, ba be ba e-na le mo gonyenyane kudu mo batho ba ka ntle ba bego ba tla go lebelela e le mo go hlaolago mokgatlo. Eupja lehono ge batho ba lebelela diphuthego tša Dihlatse tša Jehofa, dikopano tša tšona le boboledi bja tšona bja ditaba tše di lokilego dinageng tše di fetago 200, ba makatšwa ke tsela yeo mokgatlo o šomago gabotse ka yona. O tšweletše bjang?

Barutwana ba Beibele ba be ba tloga ba kgahlišwa ke go kwešiša e sego feela dithuto tša Beibele eupja gape le tsela yeo tirelo ya Modimo e bego e swanetše go dirwa ka yona, go etša ge go bontšhitšwe ke Mangwalo. Ba ile ba lemoga gore Beibele ga e na tokišetšo ya bao ba bitšwago baruti bao ba nago le sehlopha sa badumedi seo ba tlago go rera go sona. Ngwanabo rena Russell o be a ikemišeditše gore go se be le sehlopha sa baruti gare ga bona. Ka dikarolo tša Morokami, babadi ba wona ba be ba gopotšwa ka mehla gore Jesu o boditše balatedi ba gagwe gore: “Wa lena Mo-êta-pele ké o tee ké Kriste,” eupja “lena ka moka Le bana ba o tee.”—Mat. 23:8, 10.

Mokgatlo wa Pele wa Barutwana ba Beibele

Babadi ba Morokami le dipuku tšeo di tswalanago le wona go se go ye kae ba ile ba lemoga gore bakeng sa gore ba kgahliše Modimo, ba be ba swanetše go kgaotša dikgokagano le kereke lege e le efe yeo e bego e ipontšha e le yeo e sa botegelego Modimo ka go etiša dithuto tša bodumedi le metlwae ya batho pele ga Lentšu la gagwe le le ngwadilwego. (2 Ba-Kor. 6:14-18) Eupja ka morago ga go tšwa dikerekeng tša Bojakane, ba ile ba ya kae?

Sehlogong se se rego “Phuthego,” Ngwanabo rena Russell o ile a hlalosa gore kereke ya therešo, e lego phuthego ya Bokriste ga se mokgatlo wo o nago le ditho tšeo di thekgago dithuto tše itšego tše di hlamilwego ke batho tša tumelo le tšeo maina a tšona a ngwadilwego pukung ya boingwadišo ya kereke. O hlalositše gore go e na le moo, e dirilwe ka batho bao ba “neetšego” nako ya bona, bokgoni bja bona le bophelo bja bona go Modimo le bao ka pele ga bona ba nago le tebelelo ya go ba le karolo Mmušong wa magodimo gotee le Kriste. O itše ba ke Bakriste bao ba kopanego ditlemong tša lerato la Bokriste le kgahlegong e swanago, bao ba arabelago tlhahlong ya moya wa Modimo le bao ba ikokobeletšago bohlogo bja Kriste. Ngwanabo rena Russell o be a sa rate go hloma thulaganyo e nngwe, gomme o be a lwantšhana ka matla le go ba le letsogo ka tsela lege e le efe moyeng wa go ipopa dihlotswana wo o bego o le gare ga bao ba ipolelago gore ke Bakriste.

Ka nako e swanago, o be a lemoga ka mo go tletšego go nyakega ga gore bahlanka ba Morena ba bokane gotee, ka go dumelelana le keletšo e lego go Ba-Hebere 10:23-25. Yena ka noši o ile a ya go etela le go matlafatša babadi ba Morokami le go ba kopanya le ba bangwe bao ba lego tikologong ya gabo bona, bao ba bego ba e-na le kgopolo e swanago. Pejana ka 1881 o ile a kgopela gore bao ba bego ba swara diboka tša ka mehla ba tsebiše ofisi ya Watch Tower mabapi le mo di bego di swarelwa gona. O ile a lemoga bohlokwa bja go ba kopanya ka mehla.

Lega go le bjalo, Ngwanabo rena Russell o ile a gatelela gore ba be ba sa leke go hloma “mokgatlo wa lefaseng.” Go e na le moo o itše, “re kgomarela feela mokgatlo woo wa legodimong—‘bao maina a bona a ngwadilwego legodimong.’ (Ba-Heb. 12:23; Luka 10:20.)” Ka baka la histori e mpe ya Bojakane, go bolela ka “mokgatlo wa kereke” gantši go be go gopotša motho ka go ipopa dihlotswana, pušo ya baruti le go ba setho motheong wa go kgomarela dithuto tša bodumedi tšeo di rulagantšwego ke lekgotla la bodumedi. Ka gona, ge a be a bolela ka bona ka noši, Ngwanabo rena Russell o ile a nagana gore lentšu “mokgatlo” le be le le kaone.

O be a lemoga gabotse gore baapostola ba Kriste ba ile ba bopa diphuthego le go kgetha bagolo ka go e nngwe le e nngwe ya tšona. Eupja o be a dumela gore Kriste le yena o be a le gona, gaešita lege a be a le gona ka mo go sa bonagalego, gomme yena o be a hlahla puno ya mafelelo ya bao e bego e tla ba maja-bohwa gotee le yena. Ka baka la maemo, Ngwanabo rena Russell mathomong o ile a nagana gore nakong ya puno thulaganyo ya bagolo yeo e bego e le gona ka diphuthegong tša Bokriste tša lekgolong la pele la nywaga e be e sa nyakege.

Lega go le bjalo, ge palo ya Barutwana ba Beibele e be e dutše e gola, Ngwanabo rena Russell o ile a lemoga gore Morena o be a laola ditaba ka tsela e fapanego le yeo yena ka noši a bego a e letetše. Go be go nyakega peakanyo kgopolong. Eupja motheong ofe?

Go Kgotsofatša Dinyakwa tša Pele tša Mokgatlo wo o Golago

Morokami (wa Seisemane) wa November 15, 1895 mo e ka bago ka moka ga wona o be o ahla-ahla sehlogo se se rego “Ka Bothakga le ka Thulaganyo.” Ka potego, Ngwanabo rena Russell o ile a dumela moo gore: “Baapostola ba be ba e-na le mo gontši mo ba ka go bolelago go Kereke ya pele mabapi le thulaganyo dipokanong tša bakgethwa; le gona go bonala re ile ra ba bao ba sa elego keletšo ye e bohlale hloko, re nagana gore ga se ya bohlokwa gakaalo ka gobane Kereke e kgaufsi kudu le go fetša tsela ya yona gomme puno ke nako ya go kgethologanya.” Ke’ng seo se ba kgothaleditšego go hlahloba keletšo yeo lefsa?

Sehlogo seo se ile sa lokeletša maemo a mane: (1) Go be go le molaleng gore kgolo ya moya ya batho e be e fapana go ya ka batho. Go be go e-na le meleko, diteko, mathata le dikotsi tšeo e sego bohle bao ba bego ba ikemišeditše go lebana le tšona. Ka gona, go be go nyakega balebeledi ba bohlale le bao ba nago le temogo, banna bao ba nago le phihlelo le bokgoni, bao ba tlogago ba kgahlegela go hlokomela katlego ya moya ya bohle le bao ba kgonago go ba ruta ka therešo. (2) Go be go bonwe gore mohlape o be o nyaka go lwelwa go ‘diphiri tšeo di aperego letlalo la dinku.’ (Mat. 7:15, KJ) Ba be ba nyaka go tiišwa ka go thušwa go hwetša tsebo e feletšego ya therešo. (3) Phihlelo e bontšhitše gore ge e ba go be go sa rulaganywe go kgetha bagolo bakeng sa go šireletša mohlape, ba bangwe ba be ba tla tšea boemo bjoo gomme ba lebelela mohlape e le wa bona. (4) Ka ntle le thulaganyo e botse, batho bao ba botegelago therešo mo gongwe ba be ba tla hwetša ditirelo tša bona di sa amogelwe ka baka la tutuetšo ya ba sego kae bao ba sa dumelelanego le bona.

Go ya ka se, Morokami o itše: “Ga re dika-dike go eletša Dikereke kae le kae go sa šetšwe ge e ba dipalo tša tšona e le tše kgolo goba tše nyenyane, ka keletšo ya Baapostola ya gore phuthegong e nngwe le e nngwe go kgethwe bagolo gare ga bona bakeng sa go ‘fepa’ le go ‘okamela’ mohlape.” (Dit. 14:21-23; 20:17, 28) Diphuthego tša lefelong leo di ile tša latela keletšo yeo e kwalago ya Mangwalo. Wo e be e le mogato o bohlokwa wa go hloma sebopego sa phuthego seo se dumelelanago le seo se bego se le gona mehleng ya baapostola.

Lega go le bjalo, ka go dumelelana le tsela yeo ba bego ba kwešiša ditaba ka yona ka nako yeo, go kgethwa ga bagolo le bateakone bakeng sa go ba thuša, go be go dirwa ka bouto ya phuthego. Ngwageng o mongwe le o mongwe goba gantši kudu ge e ba go nyakega, ditshwanelego tša bao ba bego ba ka hlankela di be di hlahlobja gomme gwa boutwa. Ge e le gabotse e be e le tshepedišo ya pušo-ka-batho, eupja e thibelwa ke dithibelo tšeo di bego di rulaganyeditšwe go šoma e le tšhireletšo. Bohle ka phuthegong ba be ba kgothaletšwa go hlahlobišiša ka kelohloko ditshwanelego tša Beibele le go bontšha ka bouto, e sego kgopolo ya bona ka noši eupja seo ba bego ba dumela gore ke thato ya Morena. Ka ge e be e le feela bao ba “ineetšego ka mo go feletšego” bao ba bego ba dumeletšwe go bouta, bouto ya bona e kopantšwego ge e be e hlahlwa ke Lentšu le moya wa Morena, e be e lebelelwa e le yeo e bontšhago thato ya Morena tabeng yeo. Gaešita lege Ngwanabo rena Russell a ka ba a be a sa lemoge se ka mo go feletšego, go bolelela ga gagwe thulaganyo ye mohlomongwe ka tekanyo e itšego go be go tutuetšwa e sego feela ke boikemišetšo bja gagwe bja go phema go swana lege e le gofe le sehlopha seo se phagamišitšwego sa baruti, eupja gape go tutueditšwe ke setlogo sa gagwe ka noši sa ge e be e sa le mofsa ka Kerekeng ya Congregational.

Ge volume ya Millennial Dawn yeo e bitšwago The New Creation (e gatišitšwego ka 1904) e be e ahla-ahla gape ka botlalo karolo ya bagolo le mokgwa wo ba bego ba swanetše go kgethwa ka wona, tlhokomelo e kgethegilego e ile ya lebišwa go Ditiro 14:23. Di-concordance tšeo di kopantšwego ke James Strong le Robert Young di ile tša bontšhwa e le tšeo di thekgago kgopolo ya gore polelo e rego “ba ba beile go ba bagolo” (KJ) e swanetše go fetolelwa e le “ba ba kgethile go ba bagolo ka go emiša matsogo.” Diphetolelo tše dingwe tša Beibele di bile di bolela gore bagolo ba be ba ‘kgethwa ka go boutelwa.’ (Literal Translation of the Holy Bible ya Young; Emphasised Bible ya Rotherham) Eupja ke bomang bao ba bego ba swanetše go bouta?

Go amogela kgopolo ya gore phuthego ka kakaretšo e be e swanetše go bouta ga se ka mehla go bego go tšweletša mafelelo ao a bego a letetšwe. Bao ba boutago e be e swanetše go ba batho bao ba “ineetšego ka mo go feletšego,” gomme ba bangwe bao ba bego ba kgethilwe ba be ba fihlelela e le ka kgonthe ditshwanelego tša Mangwalo gomme ba hlankela banababo bona ka boikokobetšo. Eupja go bouta gantši go be go bonagatša seo se ratwago ke motho ka noši go e na le Lentšu la Modimo le moya wa gagwe. Ka gona kua Halle, Jeremane, ge ba bangwe bao ba bego ba nagana gore ba swanetše go ba bagolo ba be ba sa hwetše maemo ao ba bego ba a nyaka, ba ile ba baka thulano e šoro kudu. Kua Barmen, Jeremane, gare ga bao ba bego ba le lelokelelong la go kgethwa ka 1927 go be go e-na le banna bao ba bego ba ganetša modiro wa Mokgatlo, gomme go ile gwa ba le mašata a magolo ge go be go emišwa matsogo nakong ya kgetho. Ka gona go be go nyakega go fetogela go bouteng ga ka sephiring.

Morago kua ka 1916, e lego nywaga e mentši pele ga ditiragalo tše, Ngwanabo rena Russell o ile a ngwala a tshwenyegile kudu gore: “Boemo bjo bo nyamišago kudu bja ditaba bo a aparela Diklaseng tše dingwe ge go swanetše go swarwe kgetho. Bahlanka ba Kereke ba leka go ba babuši, babuša-noši ba bagateledi—ka dinako tše dingwe gaešita le go tšea boemo bja modula-setulo wa seboka go bonagala e le ka morero wa go kgonthiša gore bona le bagwera ba bona bao ba kgethegilego ba kgethwa e le Bagolo le Batiakone. . . . Ba bangwe ba leka ka setu go diriša Klase gampe ka go dira gore dikgetho di swarwe ka nako e nngwe yeo e lego e swanetšego kudu go bona le bagwera ba bona. Ba bangwe ba nyaka gore seboka se tlale ka bagwera ba bona, ba tliša batho bao e nyakilego e tloga e le baeng, bao ba sa ikemišetšago go ba gona ka mehla Klaseng, eupja ba e-tla feela ka seka sa bogwera go tla go boutela o mongwe wa bagwera ba bona.”

Na ba ile ba fo swanelwa ke go ithuta kamoo ba ka swarago dikgetho ka gona ka mokgwa wa batho bohle ka tsela e atlegago kudu, goba na go be go e-na le selo seo se tšwago Lentšung la Modimo seo ba bego ba se ba hlwa ba se lemoga?

Go Rulaganyetša Gore Ditaba tše di Lokilego di Bolelwe

Ngwanabo rena Russell o ile a lemoga di sa tloga fase gore bjo bongwe bja boikarabelo bjo bohlokwa kudu bja setho se sengwe le se sengwe sa phuthego ya Bokriste e be e le modiro wa go bolela ebangedi. (1 Pet. 2:9) Morokami o ile wa hlalosa gore mantšu a boporofeta a Jesaya 61:1 a be a sa šome go Jesu feela eupja go molatedi o mongwe le o mongwe wa gagwe yo a tloditšwego ka moya, e lego mantšu a rego: “Jehofa o ntloditše gore ke bolele ditaba tše di lokilego,” goba, go etša ge King James Version e fetolela tsopolo ya Jesu ya temana ye, “O ntloleditše gore ke bolele ebangedi.”—Luka 4:18, NW.

Pejana ka 1881, Morokami (wa Seisemane) o be o e-na le sehlogo se se rego “Go Nyakega Baboledi ba 1 000.” Bjo e be e le boipiletšo go setho se sengwe le se sengwe sa phuthego go diriša nako lege e le efe yeo se ka e kgonago (seripa-gare sa iri, iri, tše pedi goba tše tharo) bakeng sa go ba le karolo go gašeng therešo ya Beibele. Banna le basadi bao ba bego ba se na malapa ao a bego a ithekgile ka bona le bao ba bego ba kgona go neela seripa-gare sa nako ya bona goba go feta moo ka mo go feletšego modirong wa Morena ba be ba kgothaletšwa go tšea modiro wa go ba baebangedi bao ba bapatšago dipuku tša bodumedi. Palo e be e fapa-fapana kudu ngwaga le ngwaga, eupja ka 1885 go be go šetše go e-na le ba ka bago 300 bao ba bago le karolo modirong wo e le babapatši ba dipuku tša bodumedi. Ba bangwe le bona ba be ba e-ba le karolo eupja ka tekanyo e lekanyeditšwego kudu. Babapatši ba dipuku tša bodumedi ba ile ba newa ditšhišinyo mabapi le kamoo ba ka dirago modiro wa bona ka gona. Eupja tšhemo e be e le e kgolo, gomme bonyenyane mathomong ba be ba ikgethela tšhemo le go tloga lefelong le lengwe ba e-ya go le lengwe kudu-kudu ge ba be ba bona go ba loketše. Ka gona ge ba be ba kopana dikopanong, ba be ba dira dipeakanyo tše di nyakegago bakeng sa go lomaganya maiteko a bona.

Ngwageng wo tirelo ya go bapatša dipuku tša bodumedi e thomilego ka wona, Ngwanabo rena Russell o be a e-na le dipampišana tše dintši (goba dipukwana) tšeo di gatišeditšwego go abja ka ntle le tefo. Pampišana e kgahlišago kudu gare ga tše e be e le Food for Thinking Christians yeo go ilego gwa abja dikopi tše 1 200 000 tša yona dikgweding tša pele tše nne. Modiro wo o bego o akaretšwa go rulaganyeng go gatišwa mo le go abja o ile wa baka go bopja ga Zion’s Watch Tower Tract Society bakeng sa go hlokomela dilo tšeo di nyakegago. E le gore go se be le go šitišwa ga modiro nakong ya lehu la gagwe gotee le go nolofatša go swarwa ga meneelo yeo e dirišwago modirong, Ngwanabo rena Russell o ile a kgopela go ngwadišwa ga Mokgatlo ka molao, gomme wo o ile wa ngwalwa ka molao ka December 15, 1884. Se se ile sa tšweletša lekgotla leo le nyakegago la molao.

Ge go be go nyakega, go ile gwa hlongwa diofisi tša makala tša Mokgatlo wa Watch Tower dinageng tše dingwe. Ya pele e ile ya hlongwa kua London, Engelane ka April 23, 1900. E nngwe ya hlongwa kua Elberfeld, Jeremane ka 1902. Nywaga e mebedi ka morago ka lehlakoreng le lengwe la lefase, go ile gwa rulaganywa lekala kua Melbourne, Australia. Nakong ya ge go ngwalwa taba ye, go be go e-na le makala a 99 lefaseng ka bophara.

Gaešita lege dithulaganyo tša mokgatlo tšeo di bego di nyakega bakeng sa go nea dipuku tše dintši tša Beibele di be di tšweletšwa, mathomong diphuthego di be di tlogeletšwe gore di itirele dithulaganyo lege e le dife tša lefelong leo bakeng sa go abja phatlalatša ga molaetša woo. Ka lengwalong la March 16, 1900, Ngwanabo rena Russell o ile a hlalosa kamoo a bego a lebelela taba ka gona. Lengwalo leo, le le bego le e-ya go “Alexander M. Graham le Kereke ya kua Boston, Mass.,” le itše: “Bjalo ka ge ka moka le tseba, ke dirile phetho ya go tlogelela khamphani e nngwe le e nngwe ya batho ba Morena go hlokomela ditaba tša yona ka noši, go ya ka dikahlolo tša tšona ka noši, ke nea ditšhišinyo e sego ka tsela ya go tsena ditaba gare, eupja ka tsela ya go fo nea keletšo.” Se se be se akaretša e sego feela diboka tša bona eupja gape le tsela yeo ba bego ba dira bodiredi bja bona bja tšhemo ka yona. Ka gona, ka morago ga go nea banababo rena keletšo e holago, o ile a phetha ka tlhaloso e rego: “Se ke tšhišinyo feela.”

Mediro e mengwe e be e nyaka tlhahlo e lebanyago e tšwago go Mokgatlo. Mabapi le go bontšhwa ga “Photo-Drama of Creation,” phuthego e nngwe le e nngwe e be e tlogeletšwe go kgetha ge e ba e be e rata le go kgona go hira lefelo la paesekopo goba moago o mongwe bakeng sa go bontšhwa lefelong leo. Lega go le bjalo, go be go nyakega go tloša ditlabakelo motseng o mongwe go ya go o mongwe, gomme dinako tše beilwego di be di swanetše go fihlelelwa; ka gona ditabeng tše Mokgatlo o ile wa nea tlhahlo ya motheo. Phuthego e nngwe le e nngwe e ile ya kgothaletšwa go ba le Komiti ya Drama bakeng sa go hlokomela dithulaganyo tša phuthegong yeo. Eupja mookamedi yo a rometšwego ke Mokgatlo o ile a lebiša tlhokomelo e kgolo ditabeng ka botlalo bakeng sa go kgonthiša gore dilo ka moka di be di sepela gabotse.

Ge ngwaga wa 1914 gomme ka morago wa 1915 o feta, Bakriste bao ba tloditšwego ka moya ba ile ba letela ka phišego phethagalo ya kholofelo ya bona ya legodimong. Ka nako e swanago, ba ile ba kgothaletšwa go dula ba swaregile tirelong ya Morena. Gaešita lege ba be ba lebelela nako ya bona yeo e šetšego ba le nameng e le e kopana kudu, go ile gwa ba molaleng gore, gore ba tšwetše pele boboledi bja ditaba tše di lokilego ka tsela e rulagantšwego go be go nyakega tlhahlo e oketšegilego go feta ge e be e le ba makgolo a sego kae feela ka palo. Nako e kopana ka morago ga ge J. F. Rutherford a bile mopresidente wa bobedi wa Mokgatlo wa Watch Tower, tlhahlo yeo e ile ya newa ka sebopego se sefsa. Ka March 1, 1917, tokollo ya Morokami (wa Seisemane) e ile ya tsebiša gore go tloga ka nako yeo go ya pele, tšhemo ka moka yeo e swanetšego go šongwa ke babapatši ba dipuku tša bodumedi le bašomi ba modiro wa bodiši ka diphuthegong e be e tla abja ke ofisi ya Mokgatlo. Mo go bego go e-na le bašomi ba lefelong leo gotee le babapatši ba dipuku tša bodumedi bao ba tšeago karolo tirelong e bjalo ya tšhemo motseng goba seleteng, ba be ba aroganyetšwa tšhemo ke komiti ya selete yeo e kgethilwego lefelong leo. Thulaganyo ye e bile le letsogo go abjeng mo gogolo kudu ga The Finished Mystery dikgweding tše sego kae feela ka 1917-18. Gape e bile e bohlokwa tabeng ya go kgona go aba ka lebelo kudu dikopi tše 10 000 000 tša go pepentšhwa go matla ga Bojakane pampišaneng yeo e bego e e-na le sehlogo se se rego “Go wa ga Babele.”

Nako e kopana ka morago ga mo, ditho tša sehlopha sa bolaodi sa Mokgatlo di ile tša swarwa, gomme ka June 21, 1918 tša ahlolelwa nywaga e 20 kgolegong. Go bolelwa ga ditaba tše di lokilego go ile gwa nyaka go ema ka mo go feletšego. Na ye e be e le nako yeo ka yona mafelelong ba bego ba tla kopanywa le Morena letagong la legodimo?

Dikgweding tše sego kae ka morago, ntwa e ile ya kgaotša. Ngwageng o latetšego bahlankedi ba Mokgatlo ba ile ba lokollwa. Ba be ba sa dutše ba le nameng. E be e se seo ba bego ba se letetše, eupja ba ile ba phetha ka gore Modimo o swanetše go ba a sa dutše a e-na le modiro wo a nyakago gore ba o dire mono lefaseng.

Ba be ba sa tšwa go feta ditekong tše šoro tša tumelo ya bona. Lega go le bjalo, ka 1919 Morokami (wa Seisemane) o ile wa ba matlafatša ka dithuto tšeo di tutuetšago tša Mangwalo ka sehlogo se se rego “Ba Lehlogonolo ke ba ba sa Boifego.” Tše di ile tša latelwa ke sehlogo sa “Dibaka tša Tirelo.” Eupja banababo rena ba be ba se na pono ya bogolo bja kgolo ya mokgatlo yeo e bego e tla direga nywaga-someng e bego e tla latela.

Mohlala o Swanetšego Bakeng sa Mohlape

Ngwanabo rena Rutherford o ile a lemoga gore, gore modiro o tšwele pele ka tsela e rulagantšwego le e kopanego go sa šetšwe kamoo nako e ka bago e le e kopana ka gona, mohlala o swanetšego bakeng sa mohlape o be o le bohlokwa. Jesu o be a hlalositše balatedi ba gagwe e le dinku, gomme dinku di latela modiši wa tšona. Ee, Jesu ka noši ke Modiši yo Bolo, eupja gape o diriša banna ba bagolo goba bagolo e le badiši ba ka tlase ba batho ba gagwe. (1 Pet. 5:1-3) Bagolo bao e swanetše go ba banna bao ba bago le karolo ka bobona modirong wo Jesu a o abetšego le bao ba kgothaletšago ba bangwe go dira bjalo. Ba swanetše go ba le moya wa boebangedi e le ka kgonthe. Lega go le bjalo, nakong ya ge go abja The Finished Mystery, ba bangwe ba bagolo ba ile ba se tšee karolo; ba bangwe ba ile ba ba ba bolela ka matla go nyamiša ba bangwe gore ba se tšee karolo.

Mogato o bohlokwa kudu wo o išago go lokišeng boemo o ile wa gatwa ka 1919 ge makasine wa The Golden Age o thoma go gatišwa. Wo e be e tla ba sedirišwa se matla sa go tsebatša Mmušo wa Modimo phatlalatša e le tharollo e nnoši ya ka mo go sa felego mathateng a batho. Phuthego e nngwe le e nngwe yeo e bego e kganyoga go ba le karolo modirong wo e be e laleletšwa go kgopela Mokgatlo gore o e ngwadiše e le “mokgatlo wa tirelo.” Ke moka molaodi, goba molaodi wa tirelo bjalo ka ge a ile a tsebja bjalo, yo a bego a sa kgethwe dikgethong tša ngwaga le ngwaga o ile a kgethwa ke Mokgatlo. E le moemedi wa tikologong wa Mokgatlo, o be a swanetše go rulaganya modiro, a abe tšhemo le go kgothaletša phuthego go tšea karolo tirelong ya tšhemo. Ka gona, gotee le bagolo le bateakone bao ba kgethilwego ke batho, mohuta o mongwe wa thulaganyo ya phuthego o ile wa thoma go šoma, e lego wo o bego o lemoga matla a taolo ao a lego ka ntle ga phuthego ya lefelong leo le wo o bego o gatelela kudu go bolelwa ga ditaba tše di lokilego tša Mmušo wa Modimo.

Nywageng e latetšego, modiro wa go goeletša Mmušo o ile wa matlafatšwa ka kudu, bjalo ka ge eka ke ka matla a magolo kudu. Ditiragalo tša ka 1914 le ka morago ga moo di be di dirile gore go be molaleng gore boporofeta bjo bogolo bjo go bjona Morena Jesu Kriste a hlalositšego bofelo bja tshepedišo ya kgale bo be bo phethagala. Go ya ka se, ka 1920 Morokami o ile wa hlalosa gore go etša ge go boletšwe e sa le pele go Mateo 24:14, ye e be e le nako ya go goeletša ditaba tše di lokilego mabapi le “bofelo bja thulaganyo ya kgale ya dilo le go hlongwa ga mmušo wa Mesia.” (Mat. 24:3-14) Ka morago ga go ba gona kopanong ya Barutwana ba Beibele kua Cedar Point, Ohio ka 1922, baemedi ba ile ba tloga ba e-na le moano o dumago ka ditsebeng tša bona: “Tsebatšang, tsebatšang, tsebatšang Kgoši le mmušo wa yona.” Karolo ya Bakriste ba therešo e ile ya lemogega le go feta ka 1931 ge go be go amogelwa leina Dihlatse tša Jehofa.

Go be go le molaleng gore Jehofa o be a abetše bahlanka ba gagwe modiro wo ka moka ga bona ba bego ba ka ba le karolo go wona. Go ile gwa arabelwa ka phišego. Ba bantši ba ile ba dira dipeakanyo tše kgolo maphelong a bona e le gore ba gafele nako ya bona e tletšego modirong wo. Gaešita le gare ga bao ba gafago karolo feela ya nako, palo e kgolo kudu e be e fetša matšatši a tletšego tirelong ya tšhemo mafelo-bekeng. Go arabela kgothatšong yeo e bego e le ka go Morokami (wa Seisemane) le Informant ka 1938 le 1939, Dihlatse tše dintši tša Jehofa ka nako yeo di ile tša leka ka šedi go dirišetša diiri tše 60 kgweding e nngwe le e nngwe tirelong ya tšhemo.

Gare ga Dihlatse tšeo tše di fišegago go be go e-na le bahlanka ba bantši bao ba ikokobeditšego ba ba ineetšego ba Jehofa bao e bego e le bagolo ka diphuthegong. Lega go le bjalo, mafelong a mangwe nywageng ya bo-1920 le nywageng ya pele ya bo-1930 go be go ganwa o šoro kgopolo ya go tšea karolo ga o mongwe le o mongwe tirelong ya tšhemo. Bagolo bao ba kgethilwego ka go boutelwa gantši ba be ba bolela ka go se dumelelane le seo Morokami o se boletšego mabapi le boikarabelo bja go bolela go batho bao ba lego ka ntle ga phuthego. Go gana go theetša seo moya wa Modimo o bego o se botša diphuthego ka Mangwalo a Makgethwa tabeng ye go ile gwa thibela go ela ga moya wa Modimo dihlopheng tšeo.—Kut. 2:5, 7.

Go ile gwa tšewa megato ka 1932 ya go lokiša boemo bjo. Ntlha yeo go bego go tshwenyegilwe kudu ka yona e be e se ge e ba bagolo ba itšego bao ba phagamego ba be ba ka kgopišega goba ge e ba ba bangwe bao ba kopanelago le diphuthego ba ka tlogela. Go e na le moo, kganyogo ya banababo rena e be e le go kgahliša Jehofa le go dira thato ya gagwe. Gore go phethwe morero woo, ditokollo tša Morokami tša August 15 le September 1 ngwageng woo (ka Seisemane) di ile tša lebiša tlhokomelo e kgethegilego sehlogong sa “Mokgatlo wa Jehofa.”

Dihlogo tšeo di ile tša bontšha ka go lebanya gore bohle bao e bego e le karolo ya mokgatlo wa Jehofa ba be ba tla ba ba dira modiro wo Lentšu la gagwe le boletšego gore o swanetše go dirwa lebakeng le la nako. Dihlogo di ile tša bolelela kgopolo ya gore go ba mogolo ga Bokriste e be e se boemo bjoo motho a ka bo kgethelwago ka go boutelwa eupja e be e le boemo bja go fihlelelwa ka kgolo ya moya. Go ile gwa gatelelwa ka mo go kgethegilego thapelo ya Jesu ya gore balatedi ba gagwe e be “batee”—batee le Modimo le Kriste, ka go rialo e be bao ba kopanego ka bobona go direng thato ya Modimo. (Joh. 17:21) Ka mafelelo afe? Sehlogo sa bobedi se ile sa araba ka gore “o mongwe le o mongwe wa mašaledi e swanetše go ba hlatse ya leina le mmušo wa Jehofa Modimo.” Bolebeledi bo be bo sa swanela go newa motho lege e le ofe yo a bego a palelwa goba a gana go dira seo ka mo go kwalago a ka se kgonago go ba le karolo go neeng bohlatse phatlalatša.

Mafelelong a thuto ya dihlogo tše, diphuthego di ile tša laleletšwa go bolela setlamo go bontšha go dumela ga tšona. Ka gona go kgetha ga phuthego ga ngwaga le ngwaga banna gore e be bagolo le batiakone go ile gwa tlogelwa. Kua Belfast, ka Leboa la Ireland le mafelong a mangwe, ba bangwe bao pele e bego e le “bagolo ba ba kgethilwego ka go boutelwa” ba ile ba kgaotša go kopanela; batho ba bangwe bao ba bego ba e-na le kgopolo e swanago le ya bona ba ile ba ba latela. Se se ile sa feleletša ka go fokotšega ga palo ya batho eupja sa matlafatša mokgatlo ka moka. Bao ba ilego ba šala e be e le batho bao ba bego ba ikemišeditše go rwala boikarabelo bja Bokriste bja go nea bohlatse. Go e na le go boutela bagolo, diphuthego—di sa dutše di diriša mekgwa ya pušo-ka-batho—di ile tša kgetha komiti ya tirelo yeo e bopjago ke banna bao ba gotšego moyeng bao ba bego ba tšea karolo ka mafolofolo go neeng bohlatse phatlalatša. Ditho tša phuthego le tšona di be di boutela modula-setulo bakeng sa go okamela diboka tša bona gotee le mongwaledi le ramatlotlo. Ba ka moka e be e le banna bao e bego e le dihlatse tše mafolofolo tša Jehofa.

Ge bjale bolebeledi bja phuthego bo gafetšwe banna bao ba bego ba sa kgahlegele boemo bja bona ka noši eupja ba kgahlegela go dira modiro wa Modimo—go nea bohlatse ka leina la gagwe le Mmušo—le bao ba bego ba bea mohlala o mobotse ka go tšea ga bona karolo go wona, modiro o ile wa tšwela pele gabotse. Gaešita lege ka nako yeo ba be ba sa tsebe seo, go be go e-na le mo gontši mo go swanetšego go dirwa, e lego go nea bohlatse bjo bogolo kudu go feta bjo bo bego bo šetše bo neilwe, go kgoboketša mo ba bego ba sa go letela. (Jes. 55:5) Go molaleng gore Jehofa o be a ba lokišetša wona.

Ba sego kae bao ba nago le kholofelo ya bophelo bjo bo sa felego lefaseng ba be ba thoma go kopana le bona. Lega go le bjalo, Beibele e be e boletše e sa le pele ka go kgoboketšwa ga lešaba le legolo leo le nago le tebelelo ya go phološwa masetla-pelong a magolo ao a tlago. (Kut. 7:9-14) Ka 1935 go hlaolwa ga lešaba le le legolo go ile gwa hlaloswa ka mo go kwalago. Diphetogo tabeng ya go kgethwa ga balebeledi nywageng ya bo-1930 di ile tša hlama mokgatlo kaone bakeng sa go hlokomela modiro wa go ba kgoboketša, go ba ruta le go ba tlwaetša.

Go ba bantši ba Dihlatse tša Jehofa, modiro wo wo o katološitšwego e be e le tiragalo e kgahlišago. Bodiredi bja bona bja tšhemo bo ile bja mpshafatšwa. Lega go le bjalo, ba bangwe ba be ba sa fišegele go dira modiro wa boboledi. Ba ile ba se be le karolo go wona gomme ba leka go lokafatša go se be mafolofolo ga bona ka go bolela gore ga go na lešaba le legolo leo le tlago go kgoboketšwa go fihlela ka morago ga Haramagedone. Eupja ba bantši ba ile ba nagana ka sebaka se se oketšegilego sa go bontšha potego ya bona go Jehofa, le lerato la bona la go rata mogagabo bona.

Ba lešaba le legolo ba ile ba tsena bjang thulaganyong ya mokgatlo? Ba ile ba bontšhwa karolo yeo Lentšu la Modimo le e abetšego “mohlatswana o monyenyane” wa bao ba tloditšwego ka moya, gomme ba šoma ka lethabo ka go dumelelana le thulaganyo yeo. (Luka 12:32-44) Gape ba ile ba lemoga gore go swana le bao ba tloditšwego ka moya, ba be ba e-na le boikarabelo bja go abelana le ba bangwe ditaba tše di lokilego. (Kut. 22:17) Ka ge ba be ba nyaka go ba balata ba lefaseng ba Mmušo wa Modimo, Mmušo woo o swanetše go tla pele maphelong a bona gomme ba swanetše go fišegela go botša ba bangwe ka wona. Gore ba swanele tlhaloso ya Beibele ya bao ba tlago go phološwa masetla-pelong a magolo ba tsenywa lefaseng le lefsa la Modimo, e swanetše go ba batho ba go “hlaboša mantšu xa-xolo ba re: Xo phološa ké xa Modimo wa rena e a dutšexo sedulong sa boxoši, ké xa Kwana.” (Kut. 7:10, 14) Ka 1937 ge dipalo tša bona di be di thoma go oketšega gomme phišego ya bona ya go fišegela Morena e bonagala, le bona ba ile ba laleletšwa go thuša go rwala morwalo wa boikarabelo bja go okamela phuthego.

Lega go le bjalo, ba ile ba gopotšwa gore mokgatlo ke wa Jehofa, ga se wa motho lege e le ofe. Go be go sa swanela go ba le karogano magareng ga mašaledi a ba tloditšwego ka moya le ba lešaba le legolo la dinku tše dingwe. Ba be ba swanetše go šoma gotee tirelong ya Jehofa e le banababo rena le dikgaetšedi. Bjalo ka ge Jesu a itše, “Ke sa na le dinku tše dingwê tše e sexo tša lešaka lé. Le tšôna ke swanetše xo di xapa; ’me di tlo kwa lentšu la-ka, ya tlo ba mohlape o tee le modiši o tee.” (Joh. 10:16) Go ba ga kgonthe ga se go be go thoma go bonala.

Go bile le tšwelopele e makatšago mokgatlong ka lebaka le lenyenyane kudu la nako. Eupja na go be go e-na le mo gontši mo go bego go nyaka go dirwa e le gore ditaba tša diphuthego di swarwe ka go dumelelana ka botlalo le ditsela tša Jehofa, bjalo ka ge di hlalositšwe Lentšung la gagwe le le buduletšwego?

Mokgatlo wa Pušo ya Modimo

Lentšu la Seisemane “theocracy” le bolela “pušo ya Modimo.” Na woo e be e le mohuta wa pušo yeo e bego e buša diphuthego? Na ba be ba sa rapele Jehofa feela eupja gape ba lebelela go yena bakeng sa go sepediša ditaba tša diphuthego tša bona? Na ba be ba dumelelana ka mo go tletšego le seo a se boletšego mabapi le ditaba tše Lentšung la gagwe le le buduletšwego? Sehlogo seo se nago le dikarolo tše pedi sa “Mokgatlo” seo se ilego sa tšwelela ka go Morokami wa June 1 le 15, 1938 (ka Seisemane) se boletše ka go lebanya gore: “Mokgatlo wa Jehofa ga se wa pušo-ka-batho le gatee. Jehofa ke yo a phagamego, gomme mmušo wa gagwe goba mokgatlo ke wa pušo ya Modimo ka mo go tsepamego.” Lega go le bjalo, ka diphuthegong tša tikologong tša Dihlatse tša Jehofa ka nako yeo go be go sa dutše go dirišwa ditshepedišo tša pušo-ka-batho go kgetha bontši bja bao ba bego ba newa modiro wa go okamela diboka le tirelo ya tšhemo. Go be go nyakega diphetogo tše dingwe.

Eupja na Ditiro 14:23 ga se ya bontšha gore bagolo ka diphuthegong ba be ba swanetše go kgethelwa boemo ka ‘go otlollwa ga letsogo,’ go etša ge go boutwa? Sa pele sa dihlogo tšeo tša Morokami tša “Mokgatlo” se ile sa dumela gore temana ye e be e kwetšwe thoko nakong e fetilego. E be e se ka ‘go otlollwa ga letsogo’ ga ditho ka moka tša phuthego moo go kgethwa go bego go dirwa gare ga Barkiste ba lekgolong la pele la nywaga. Go e na le moo go ile gwa bontšhwa gore baapostola gotee le bao ba dumeletšwego ke bona e be e le bona ba bego ba ‘otlolla matsogo a bona.’ Se se be se dirwa e sego ka go tšea karolo boutong ya phuthego eupja ka go bea batho bao ba swanelegago diatla. Se e be e le seka sa go tiiša, go amogela, goba go kgethwa. Ka dinako tše dingwe diphuthego tša pele tša Bokriste di be di bolelela banna bao ba swanelegago, eupja go kgethwa ga mafelelo goba kamogelo e be e newa ke baapostola, bao ba bego ba laetšwe ka go lebanya ke Kriste goba e newa ke bao ba beilwego ke baapostola. (Dit. 6:1-6) Morokami o ile wa lebiša tlhokomelo tabeng ya gore ke feela mangwalong ao a bego a e-ya go balebeledi bao ba ikarabelago (Timotheo le Tito) moo moapostola Paulo ka tlase ga tlhahlo ya moya o mokgethwa, a ilego a nea ditaelo tša go kgetha balebeledi. (1 Tim. 3:1-13; 5:22; Tito 1:5) Ga go le le tee la mangwalo ao a buduletšwego ao a yago go diphuthego leo le bego le e-na le ditaelo tše bjalo.

Ka gona, go kgethwa ga nakong ye bakeng sa tirelo ka diphuthegong go be go swanetše go dirwa bjang? Tsheka-tsheko ya Morokami ya mokgatlo wa pušo ya Modimo e bontšhitše go tšwa Mangwalong gore Jehofa o kgethile Jesu Kriste go ba “hlôxô ya phuthêxô”; gore ge Kriste a boa e le Morena, o be a tla nea “molaki [wa gagwe] e a bôtêxaxo yo bohlale” boikarabelo ‘godimo ga dilo tša gagwe ka moka’; gore molaki yo yo a botegago yo bohlale o be a bopilwe ke bohle bao ba lego lefaseng bao ba tloditšwego ka moya go ba maja-bohwa gotee le Kriste, le bao ba bego ba šoma ka botee ka tlase ga tlhahlo ya gagwe; le gore Kriste o be a tla diriša sehlopha seo sa molaki e le sedirišwa sa gagwe bakeng sa go nea bolebeledi bjo bo nyakegago bja diphuthego. (Ba-Kol. 1:18; Mat. 24:45-47; 28:18) E be e tla ba boikarabelo bja sehlopha sa molaki go diriša ka thapelo ditaelo tšeo di boletšwego ka mo go kwalago Lentšung la Modimo leo le buduletšwego, se le diriša bakeng sa go kgetha bao ba swanelegelago maemo a tirelo.

Ka ge sedirišwa se se bonagalago seo se bego se tla dirišwa ke Kriste e le molaki yo a botegago yo bohlale (gomme ditherešo tša histori ya mehleng yeno tšeo di šetšego di etšwe hloko di bontšha gore “molaki” yo o diriša Mokgatlo wa Watch Tower e le sedirišwa sa molao), Morokami o hlalositše gore tshepedišo ya pušo ya Modimo e be e tla nyaka gore go kgethelwa tirelo go dirwe ka sedirišwa se. Go fo swana le ge diphuthego lekgolong la pele la nywaga di be di amogela sehlopha se bušago kua Jerusalema, le lehono diphuthego di be di ka se ke tša tšwela pele moyeng ka ntle le bookamedi bja motheo.—Dit. 15:2-30; 16:4, 5.

Lega go le bjalo, gore go be le pono e swanetšego ka ditaba, go ile gwa hlaloswa gore ge Morokami o be o bolela ka “Mokgatlo,” se se be se bolela e sego ka lekgotla feela la molao, eupja ka sehlopha sa Bakriste ba tloditšwego seo se bego se hlomile lekgotla leo la molao le go le diriša. Ka gona polelwana yeo e be e emela molaki yo a botegago yo bohlale gotee le Sehlopha sa gagwe se Bušago.

Gaešita le pele ga ge dihlogo tša Morokami tša “Mokgatlo” di gatišwa ka 1938 (ka Seisemane) ge diphuthego tša London, New York, Chicago le Los Angeles di be di gotše go fihla mo e bego e le gabohlale go di arola go ba dihlopha tše nyenyane, di be di kgopetše gore Mokgatlo o kgethe bahlanka ba tšona ka moka. Tokollo ya June 15, 1938 ya Morokami (wa Seisemane) bjale e ile ya laletša diphuthego tše dingwe ka moka gore di gate mogato o swanago. Gore go phethwe morero woo, go ile gwa šišinywa setlamo se se latelago:

“Rena, khamphani ya batho ba Modimo bao ba hlaotšwego bakeng sa leina la gagwe, gomme mo nakong ye . . . . . . . . . . . . re lemoga gore mmušo wa Modimo ke pušo e sekilego ya Modimo le gore Kriste Jesu o tempeleng gomme o na le matla a feletšego le taolo ya mokgatlo o bonagalago wa Jehofa gotee le o sa bonagalego, le gore ‘MOKGATLO’ ke moemedi yo a bonagalago wa Morena lefaseng, ka go rialo re kgopela ‘Mokgatlo’ gore o rulaganye sehlopha se bakeng sa tirelo le go kgetha bahlanka ba ba fapa-fapanego e le gore ka moka ga rena re ka šoma gotee ka khutšo, go loka, kwano le botee bjo bo feletšego. Re kgomareditše lelokelelo la maina a batho bao ba lego sehlopheng se bao ba bonalago go rena e le ba ba gotšego ka tsebo ka mo go tletšego le bao ba bonalago e le ba ba swanelwago gakaone ke go tlatša maemo a itšego a kgethilwego bakeng sa tirelo.”

Mo e nyakilego e ka ba diphuthego ka moka tša Dihlatse tša Jehofa di ile tša dumelelana le se gatee-tee. Ba sego kae bao ba ilego ba se sepedišane le se kapejana ba ile ba kgaotša go ba le karolo lege e le efe go goeletšeng Mmušo, ka go rialo ba kgaotša go ba Dihlatse tša Jehofa.

Mehola ya Tlhahlo ya Pušo ya Modimo

Go molaleng gore ge e ba dithuto, ditekanyetšo tša boitshwaro le megato ya thulaganyo goba ya go nea bohlatse e ka bewa motheong wa tikologo, go se go ye kae mokgatlo o be o tla lahlegelwa ke boemo bja wona le botee. Banababo rena ba be ba ka arolwa gabonolo ke diphapano tša tša leago, tša setlogo le tša botšhaba. Ka lehlakoreng le lengwe, tlhahlo ya pušo ya Modimo e be e tla kgonthišetša gore mehola yeo e tlišwago ke tšwelopele ya moya e fihlelela diphuthego ka moka lefaseng ka bophara ka ntle le tšhitišo. Ka gona go be go tla ba le botee bja kgonthe bjo Jesu a rapetšego gore bo aparele gare ga balatedi ba gagwe ba therešo, gomme modiro wa go bolela ebangedi wo a o laetšego o phethwe ka mo go feletšego.—Joh. 17:20-22.

Lega go le bjalo, ba bangwe ba be ba dutše ba bolela gore ka go bolelela phetogo ye ya thulaganyo, J. F. Rutherford o be a upja a leka go hwetša taolo e kgolwanyane godimo ga Dihlatse le gore o dirišitše tsela ye go tiiša matla a gagwe ka noši a taolo. Na ruri go be go le bjalo? Ga go pelaelo gore Ngwanabo rena Rutherford e be e le monna wa ditumelo tše di tiilego. O be a bolela ka matla le ka go se kwanantšhe bakeng sa seo a bego a dumela gore ke therešo. O be a ka ba yo a sa pepetletšego kudu go rarolleng maemo ge a be a lemoga gore batho ba be ba tshwenyegile kudu ka bona ka noši go feta kamoo ba tshwenyegilego ka gona ka modiro wa Morena. Eupja Ngwanabo rena Rutherford o be a ikokobeditše e le ka kgonthe pele ga Modimo. Bjalo ka ge Karl Klein yo a bilego setho sa Sehlopha se Bušago ka 1974 ka morago a ile a ngwala: “Dithapelo tša Ngwanabo rena Rutherford borapeding bja mesong . . . di ile tša dira gore ke mo rate. Gaešita lege a be a e-na le lentšu le matla gakaalo, ge a be a bolela le Modimo o be a kwala bjalo ka mošemanyana o monyenyane a bolela le tatagwe. Seo se bontšhitše tswalano e botse gakaakang le Jehofa!” Ngwanabo rena Rutherford o be a kgodišegile ka mo go feletšego ka go hlaolwa ga mokgatlo wa Jehofa o bonagalago, gomme o ile a leka go kgonthišetša gore ga go na motho goba sehlopha sa batho seo se bego se ka kgona go thibela banababo rena ba lefelong leo go amogela mohola o tletšego wa dijo tša moya le tlhahlo tšeo Jehofa a bego a di nea bakeng sa bahlanka ba Gagwe.

Gaešita lege Ngwanabo rena Rutherford a dirile ka nywaga e 25 e le mopresidente wa Mokgatlo wa Watch Tower le go gafela matla a gagwe ka moka go tšwetšeng pele modiro wa mokgatlo, e be e se moetapele wa Dihlatse tša Jehofa, gomme o be a sa nyake go ba yena. Kopanong ya kua St. Louis, Missouri, ka 1941, e lego nako e kopana pele ga lehu la gagwe, o ile a bolela ka taba ya boetapele, a re: “Ke nyaka go tsebiša baeng lege e le bafe bao ba lego mo seo le se naganago ka motho yo e lego moetapele wa lena, gore ba se ke ba lebala. Nako le nako ge selo se sengwe se rotoga gomme se thoma go gola, ba bolela gore go na le motho yo e lego moetapele yo a nago le balatedi ba bantši. Ge e ba go e-na le motho lege e le ofe gare ga batheetši ba, yo a naganago gore nna motho yo a emego mo, ke moetapele wa dihlatse tša Jehofa, anke a re Ee.” Karabelo e bile setu se se tlabago, sa kgaotšwa feela ke “Aowa” e gatelelago yeo e tšwago go batheetši ba bantši. Seboledi se ile sa tšwela pele ka gore: “Ge e ba lena bao le lego mo le dumela gore ke fo ba o mongwe wa bahlanka ba Morena, le gore re šoma re bapelane ka botee re hlankela Modimo le go hlankela Kriste, e reng Ee.” Sehlopha se ile sa goa ka ’ntšu le tee ka gore “Ee” ka tsela e kwalago. Kgweding e latelago batheetši kua Engelane ba ile ba arabela ka tsela e swanago tlwaa.

Mafelong a mangwe mehola ya thulaganyo ya pušo ya Modimo e ile ya bonwa kapejana. Mafelong a mangwe go ile gwa tšea nako e telele; bao ba sa kago ba ipontšha e le bahlanka bao ba gotšego ka tsebo le bao ba ikokobeditšego ge nako e dutše e e-ya ba ile ba tlošwa, gomme gwa kgethwa ba bangwe.

Lega go le bjalo, ge tshepedišo ya pušo ya Modimo e hlongwa ka mo go tletšego kudu, Dihlatse tša Jehofa di ile tša thabela go bona seo se bego se boletšwe e sa le pele ke Jesaya 60:17 (PK). Jehofa a diriša dipolelo tša seswantšhetšo go bontšha boemo bjo bo kaonefaditšwego bjo bo bego ba tla ba gona gare ga bahlanka ba Modimo o bolela moo gore: “Ke tla tliša digauta bakeng sa koporo, gomme bakeng sa tshipi ke tlo tliša koporo, bakeng sa mafsika ke tlo tliša tshipi; gomme ke tlo dira khutšo e be magoši a gago, le go loka e be mmuši wa gago.” Se ga se hlalose seo batho ba bego ba tla se dira eupja go e na le moo se hlalosa seo Modimo ka noši a bego a tla se dira gotee le mehola yeo bahlanka ba gagwe ba tlago go e hwetša ge ba dutše ba ikokobeletša seo. Khutšo e swanetše go aparela gare ga bona. Go rata go loka e swanetše go ba matla ao a ba tutueletšago go hlankela.

Go tšwa Brazil, Maud Yuille e lego mosadi wa molebeledi wa lekala, o ile a ngwalela Ngwanabo rena Rutherford gore: “Sehlogo sa ‘Mokgatlo’ se se lego ka go [Merokami (ka Seisemane)] ya June 1 le 15 [1938] di nkgapeletša go hlalosa ka mantšu a sego kae go wena yo Jehofa a dirišago tirelo ya gago ya potego, tebogo ya-ka go Jehofa bakeng sa thulaganyo e kgahlišago yeo a e diretšego mokgatlo wa gagwe o bonagalago, bjalo ka ge e hlalositšwe ka go Merokami ye e mebedi. . . . Ke kimollo e kgolo gakaakang go bona bofelo bja ‘Boipušo bja metsana,’ go akaretša ‘ditshwanelo tša basadi’ le tshepedišo e nngwe yeo e sego ya mangwalo yeo e dirilego gore batho ba bangwe ba amogele dikgopolo tša lefelong leo le kahlolo ya motho go e na le go ikokobeletša [Jehofa Modimo le Jesu Kriste], ka go rialo ba goboša leina la Jehofa. Ke therešo gore ke feela ‘lebakeng le le sa tšwago go feta moo Mokgatlo o ilego wa kgetha bohle ka mokgatlong e le “bahlanka,”’ lega go le bjalo ke lemoga gore ka nywaga e mentši pele ga nako yeo wena le banababo rena bao ba dumelelanago le wena le ile la dumela gore le ‘barwarre le bahlanka ka kgaugelo ya Gagwe.’”

Mabapi le peakanyo ye ya mokgatlo, lekala leo le lego Dihlakahlakeng tša Brithania le ile la bega gore: “Mafelelo a mabotse a se e be e le ao a makatšago kudu. Tlhaloso ya sereto le ya boporofeta ya se go Jesaya kgaolo ya masome-tshela ke yeo e tletšego ka botse eupja ga se ya feteletšwa. O mongwe le o mongwe yo a lego therešong o be a bolela ka yona. E be e le sehlogo se segolo sa poledišano. Maikwelo a kakaretšo a go ba mafolofolo a ile a aparela—e lego a go gatela pele ka mafolofolo ntweng yeo e laetšwego. Ge manyami a lefase a dutše a oketšega, lethabo la go thabela taolo ya pušo ya Modimo le ile la gola.”

Balebeledi ba Basepedi ba Tiiša Diphuthego

Dikgokagano tša mokgatlo di ile tša tiišwa ka mo go oketšegilego ka baka la tirelo ya balebeledi ba basepedi. Lekgolong la pele la nywaga, moapostola Paulo o ile a tsenela modiro o bjalo ka tekanyo e kgolo kudu. Ka dinako tše dingwe, banna ba ba swanago le Baranaba, Timotheo le Tito le bona ba bile le karolo. (Dit. 15:​36; Ba-Fil. 2:​19, 20; Tito 1:​4, 5) Ka moka e be e le baebangedi ba mafolofolo. Go oketša moo, ba ile ba kgothatša diphuthego ka dipolelo tša bona. Ge go be go tsoga dikgang tšeo di ka kgomago botee bja diphuthego, di be di tlišwa go sehlopha se bušago se se laolago. Ka gona, “xe ba sepela le metse yeo,” bao ba neilwego boikarabelo “ba fihliša ditaêlô tšela tše di beilwexo ke baapostola le ba baxolo ba Jerusalêma.” Mafelelo e bile afe? “Diphuthêxô tša tiišwa tumelong, badumedi ba fêla ba ata ka mehla.”​—Dit. 15:1–16:5; 2 Ba-Kor. 11:28.

Nywageng ya bo-1870, Ngwanabo rena Russell o be a šetše a etela dihlopha tša barutwana ba Beibele​—dihlopha tša ba babedi le tša ba bararo gotee le tše kgolo kudu—​go di aga moyeng. Banababo rena ba bangwe ba sego kae ba ile ba tšea karolo nywageng ya bo-1880. Ke moka ka 1894, go ile gwa dirwa dithulaganyo tša gore Mokgatlo o be le diboledi tšeo di swanelegago gabotse tšeo di yago ka mehla go thuša Barutwana ba Beibele gore ba gole tsebong le tebogo ya bona ya go leboga therešo le gore ba batamelane kgaufsi kudu.

Ge e ba go kgonega, seboledi se be se ka fetša letšatši goba matšatši a mmalwa le sehlopha, se nea polelo e tee goba tše pedi tša phatlalatša gomme ka morago sa etela dihlopha tše dinyenyane le batho ka o tee ka o tee bakeng sa go boledišana ka tše dingwe tša dilo tše di tseneletšego tša Lentšu la Modimo. Go ile gwa dirwa boiteko bja go dira gore sehlopha se sengwe le se sengwe kua United States le Canada se etelwe gabedi ka ngwaga, gaešita lege gantši se be se sa etelwe ke ngwanabo rena o tee. Ge go kgethwa diboledi tša basepedi, go ile gwa gatelelwa boipoetšo, boikokobetšo le kwešišo e botse ya therešo gotee le go e kgomarela ka potego le bokgoni bja go e ruta ka mo go kwalago. Bodiredi bja bona e be e se bjo bo lefelwago le gatee. Ba be ba fo newa dijo le marobalo ke banababo rena ba lefelong leo, gomme go fihla bokgoleng bjo bo nyakegago, Mokgatlo o be o ba thuša ka ditshenyagalelo tša tša go sepela. Ba ile ba thoma go tsebja e le basepedi ba bodumedi.

Bontši bja baemedi ba ba basepedi ba Mokgatlo ba be ba ratwa kudu ke bao ba bego ba ba hlankela. A. H. Macmillan wa mo-Canada o gopolwa e le ngwanabo rena yoo go yena Lentšu la Modimo le ilego la ipontšha le le “bo-ka mollô o tukaxo.” (Jer. 20:9) O be a fo swanelwa ke go bolela ka lona, gomme o ile a bolela ka lona, a bolela le batheetši e sego Canada feela eupja gape le dikarolong tše dintši tša United States le dinageng tše dingwe. William Hersee, e lego mosepedi o mongwe wa bodumedi o gopolwa ka lerato ka baka la tlhokomelo e kgethegilego yeo a ilego a e nea bafsa. Dithapelo tša gagwe le tšona di gopolwa ka mo go sa felego ka gobane di be di bontšha go iša ga boemo bja moya mo go bego go kgoma dipelo tša ba banyenyane le ba bagolo ka mo go swanago.

Go sepela go be go se bonolo go basepedi ba bodumedi mehleng ya pele. Ka mohlala, gore a hlankele sehlopha se se lego kgaufsi le Diphororo tša Klamath Oregon, Edward Brenisen o ile a sepela ka setimela pele, gomme bošego ka moka a sepela ka kariki ya dipere, mafelelong a sepela ka koloyana yeo e lapišago ya mapolanka ka dithabeng go ya polaseng mo ba bego ba tla bokana gona. E sa le gosasa kudu, letšatšing la ka morago ga seboka, ngwanabo rena o ile a mo nea pere gore a sepele ka yona dikhilomithara tše 100 go ya seteišeneng sa kgaufsi sa setimela e le gore a kgone go ya kabelong ya gagwe e latelago. E be e le bophelo bjo thata, eupja dipoelo tše dibotse di ile tša tšwelela ka baka la maiteko a basepedi ba bodumedi. Batho ba Jehofa ba ile ba tiišwa, ba kopanywa kwešišong ya bona ya go kwešiša Lentšu la Modimo gomme ba kopanywa gotee gaešita lege ba be ba dula mafelong ao a aroganego kudu.

Ka 1926, Ngwanabo rena Rutherford o ile a thoma go diriša dithulaganyo tšeo di ilego tša fetoša modiro wa basepedi ba bodumedi go se sa ba diboledi feela tša basepedi eupja go ba baokamedi le baboleledi ba basepedi ba tirelo ya tšhemo ya diphuthego. Go gatelela boikarabelo bja bona bjo bofsa, ka 1928 ba be ba bitšwa balaodi ba tikologo ba tirelo. Ba be ba šomišana le banababo rena ba lefelong leo, ba ba nea tlhahlo ya motho ka noši tirelong ya tšhemo. Ka nako ye go be go kgonega gore ba fihlelele phuthego e nngwe le e nngwe kua United States le dinageng tše dingwe mo e ka bago gatee ka ngwaga, mola ba be ba dutše ba ikopanya le batho ba itšego le dihlopha tše nyenyane tšeo di bego di se tša hlwa di rulaganyetšwa tirelo.

Nywageng e latetšego, modiro wa balebeledi ba basepdi o ile wa ba le diphetogo tše di fapa-fapanego. O ile wa oketšwa ka kudu ka 1938 ge bahlanka ka moka ba diphuthego ba be ba kgethwa ka tsela ya pušo ya Modimo. Go etela diphuthego ka mehla nywageng e sego kae e latetšego go ile gwa tšweletša sebaka sa go nea tlwaetšo ya motho ka noši go mohlanka o mongwe le o mongwe yo a kgethilwego, le thušo e oketšegilego go o mongwe le o mongwe tirelong ya tšhemo. Ka 1942, pele ga ge balebeledi ba basepedi ba romelwa gape diphuthegong, ba ile ba rutwa ka mo go nabilego kudu; ka baka leo modiro wa bona o ile wa phethwa ka go swana mo gogolo. Diketelo tša bona e be e le tše kopana kudu (letšatši le tee go ya go a mararo, go ithekgile ka bogolo bja phuthego). Ka nako yeo ba be ba hlahloba dipego tša phuthego, ba kopana le bahlanka ka moka bakeng sa go nea keletšo lege e le efe e nyakegago, ba nea phuthego polelo e tee goba go feta moo gomme ba etelela pele tirelong ya tšhemo. Ka 1946 diketelo di ile tša oketšwa go fihla go beke e tee bakeng sa phuthego e nngwe le e nngwe.

Go tloga ka 1894 go ya go 1927, diboledi tša basepedi tšeo di bego di romelwa ke Mokgatlo pele di be di tsebja e le baemedi ba Tower Tract Society, ka morago tša tsebja e le basepedi ba bodumedi. Go tloga ka 1928 go ya go 1936, ka baka la go gatelelwa ga tirelo ya tšhemo ka mo go oketšegilego, ba ile ba bitšwa balaodi ba tirelo ba tikologo. Go tloga ka July 1936 ba ile ba tsebja e le bahlanka ba tikologo bakeng sa go gatelela tswalano ya bona e swanetšego le banababo rena ba lefelong leo. Go tloga ka 1938 go ya go 1941, bahlanka ba di-zone ba ile ba abelwa go šoma le diphuthego tše sego kae ka go šielana, ka go rialo ba boela ka mehla dihlopheng tše di swanago. Ka morago ga tšhitišo ya mo e ka bago ka ngwaga, tirelo ye e ile ya tsošološwa ka 1942 ka bahlanka go banababo rena. Ka 1948, leina mohlanka wa tikologo le ile la amogelwa; mo nakong ye ke molebeledi wa tikologo.

Go tloga ka 1938 go ya go 1941, bahlanka ba tikologo bao ba bego ba le modirong o mofsa, ba be ba hlankela ka mehla dikopanong tša lefelong leo, moo Dihlatse tšeo di tšwago lefelong le lekanyeditšwego (zone) di bego di kopana bakeng sa lenaneo le le kgethegilego. Ge modiro wo o be o tsošološwa ka 1946, balebeledi ba ba basepedi ba ile ba tsebja e le bahlanka ba selete; mo nakong ye ke balebeledi ba selete.

Thulaganyo ye ya go etela diphuthego e ile ya tlaleletšwa ka 1938 ke tirelo ya mohlanka wa tikologo a phetha karolo e mpsha. O be a akaretša lefelo le legolo, nako le nako a fetša beke le o mongwe le o mongwe wa banababo rena bao ba bego ba sepela go zone (tikologo) bakeng sa go etela diphuthego. Nakong ya ketelo ya gagwe o be a hlankela lenaneong la kopano yeo go yona go bego go e-na le diphuthego ka moka tše di lego go zone yeo. Thulaganyo ye e be e le tutuetšo e kgolo go banababo rena gomme e tšweleditše sebaka sa ka mehla bakeng sa go kolobetša barutiwa ba bafsa.

“Motho yo a Ratago Tirelo”

Gare ga bao ba bego ba e-ba le karolo tirelong ye go tloga ka 1936 e be e le John Booth yo a bilego setho sa Sehlopha se Bušago ka 1974. Ge go be go boledišanwa le yena e le yo go ka diregago gore e be mookamedi wa mosepedi, o ile a botšwa gore: “Seo se nyakegago ga se diboledi tšeo di nago le bokgoni, go nyakega feela motho yo a ratago tirelo le yo a tlago go etelela pele go yona le yo a tlago go bolela ka tirelo dibokeng.” Ngwanabo rena Booth o be a e-na le lerato le bjalo la go rata tirelo ya Jehofa, bjalo ka ge e hlatsetšwe ke tirelo ya gagwe e mafolofolo ya bobulamadibogo ga e sa le go tloga ka 1928, gomme o ile a fehla phišego ya go bolela ebangedi go ba bangwe bobedi ka mohlala le ka mantšu a kgothatšo.

Phuthego ya pele yeo a ilego a e etela ka March 1936 e bile ya Easton, Pennsylvania. O ile a ngwala ka morago gore: “Gantši ke be ke fihla lefelong ka nako bakeng sa tirelo ya tšhemo mesong, ke sware seboka le bahlanka ba khamphani ge tshwehlana e tšea-tšea gomme ka morago ga moo ke sware se sengwe le khamphani ka moka. Gantši ke be ke fetša feela matšatši a mabedi le khamphani le letšatši le tee le sehlopha se senyenyane, ka dinako tše dingwe ke etela dihlopha tše bjalo tše tshelelago ka beke. Ke be ke dula ke le tseleng.”

Nywaga e mebedi ka morago ka 1938, e le mohlanka wa tikologo, o ile a abelwa go hlokomela kopano ya zone (mo nakong ye e tsebja e le kopano ya tikologo) bekeng e nngwe le e nngwe. Tše di ile tša thuša go matlafatša banababo rena dinakong tšeo ka tšona tlaišo e bego e ipha matla mafelong a mangwe. Ge a gopola mehla yeo ka moka le boikarabelo bja gagwe bjo bo fapa-fapanego, Ngwanabo rena Booth o itše: “Beke yona yeo [yeo ke bego ke le hlatse ya molato wa kgorong ya tsheko wo o akaretšago Dihlatse tša Jehofa tše 60 kua Indianapolis, Indiana] ke be ke le mosekišwa molatong o mongwe kua Joliet, Illinois, ke le ramolao wa ngwanabo rena o mongwe molatong o mongwe gape kua Madison, Indiana, gomme go oketša moo ke hlokomela kopano ya zone mafelo-bekeng a mangwe le a mangwe.”

Nywaga e mebedi ka morago ga ge dikopano tše tša zone di tsošološitšwe ka 1946 (bjale ke dikopano tša tikologo), Carey Barber o be a le gare ga bao ba bego ba abelwa go ba bahlanka ba selete. O be a šetše a ile a ba setho sa lapa la Bethele kua Brooklyn, New York ka nywaga e 25. Selete sa gagwe sa mathomo se be se akaretša karolo ka moka ya ka bodikela bja United States. Mathomong, leeto magareng ga mafelo a kopano e be e le dikhilomithara tše 1 600 bekeng e nngwe le e nngwe. Ge palo le bogolo bja diphuthego di dutše di oketšega, maeto ao a ile a fokotšega gomme dikopano tše dintši tša tikologo di be di swarwa gantši lefelong le tee la karolo e kgolo ya naga. Ka morago ga nywaga e 29 ya phihlelo e le molebeledi wa mosepedi, Ngwanabo rena Barber o ile a laletšwa gore a boele ntlong-kgolo ya lefase ka 1977 e le setho sa Sehlopha se Bušago.

Dinakong tša ntwa le tlaišo e šoro, balebeledi ba basepedi gantši ba be ba bea tokologo ya bona le maphelo a bona kotsing bakeng sa go hlokomela katlego ya moya ya banababo bona. Nakong ya ge Nazi e tšea Belgium, André Wozniak o ile a tšwela pele a etela diphuthego le go thuša go di nea dipuku. Ma-Gestapo gantši a be a e-ba kgaufsi kudu le go mo swara eupja ga se a ka a atlega go ka mo swara.

Kua Rhodesia (yeo mo nakong ye e tsebjago e le Zimbabwe) bofelong bja nywaga ya bo-1970, batho ba be ba phela ka poifo gomme go sepela go lekanyeditšwe lebakeng la ntwa ya setšhaba. Eupja balebeledi ba basepedi ba Dihlatse tša Jehofa bjalo ka badiši le balebeledi bao ba nago le lerato, ba ile ba ipontšha go banababo bona ba le “bjalo ka tšhirelo ge phefo e foka.” (Jes. 32:​2, PK) Ba bangwe ba be ba sepela lešokeng ka matšatši a mantši, ba namela le go fologa dithabeng, ba tshela dinoka tše kotsi, ba robala ntle bošego​—tšohle e le gore ba fihlelele diphuthego le bagoeledi bao ba lego lekatana, ba ba kgothaletše go dula ba tiile tumelong. Gare ga ba go be go e-na le Isaiah Makore, yo a ilego a phologa ka lešobana la nalete ge dikolo di be di fofa ka godimo ga hlogo ya gagwe nakong ya ge mašole a mmušo le “balwela-tokologo” ba e-lwa.

Balebeledi ba bangwe ba basepedi ba hlanketše mokgatlo ka nywaga e mentši motheong wa ditšhaba-tšhaba. Bapresidente ba Mokgatlo wa Watch Tower gantši ba be ba etela dinageng tše dingwe bakeng sa go ela hloko dinyakwa tša mokgatlo le go bolela dikopanong. Diketelo tše bjalo di dirile mo gontši go boloka Dihlatse tša Jehofa gohle di lemoga ka mo go feletšego borwarre bja tšona bja ditšhaba-tšhaba. Ngwanabo rena Knorr o ile a phegelela modiro wo ka mehla, a etela lekala le lengwe le le lengwe le legae le lengwe le le lengwe la baromiwa. Ge mokgatlo o dutše o gola, lefase le ile la arolwa ka di-zone tše lesome tša ditšhaba-tšhaba, gomme go tloga ka January 1, 1956, banababo rena bao ba swanelegago ba ile ba thoma go thuša tirelong ye ba le ka tlase ga tlhahlo ya mopresidente e le gore se se ka elwa hloko ka mehla. Diketelo tšeo tša di-zone tšeo mo nakong ye di dirwago ka tlase ga tlhahlo ya Komiti ya Tirelo ya Sehlopha se Bušago di tšwela pele go okeletša boteeng bja lefase ka moka le go tšweleng pele ga mokgatlo ka moka.

Dikaonefatšo tše dingwe gape tše bohlokwa di bile le karolo thulaganyong ya gona bjale ya mokgatlo.

Go Lokišwa mo Gongwe ga Pušo ya Modimo

Bogareng bja Ntwa ya II ya Lefase, Joseph F. Rutherford o ile a hwa, ka January 8, 1942 gomme Nathan H. Knorr a ba mopresidente wa boraro wa Mokgatlo wa Watch Tower. Mokgatlo o be o le ka tlase ga kgateletšo e kgolo kudu ka baka la dithibelo tšeo di beilwego modirong wa wona dinageng tše dintši, bošoro bja dihlopha tša bahlola-mpherefere ka go ikgakanya bjalo ka borata-naga le go golegwa ga Dihlatse ge di dutše di aba dipuku tša Beibele bodireding bja tšona bja phatlalatša. Na phetogo ya bolaodi e be e tla feleletša ka go diegišwa ga modiro nakong e bjalo ya mathata? Banababo rena bao ba hlokometšego ditaba tša taolo ba ile ba lebelela go Jehofa bakeng sa tlhahlo le tšhegofatšo tša gagwe. Ka go dumelelana le kganyogo ya bona bakeng sa tlhahlo ya Modimo, ba ile ba hlahloba lefsa thulaganyo ya mokgatlo go bona ge e ba go be go e-na le mafelo lege e le afe ao a bego a ka dumelelanywa kgaufsi kudu le ditsela tša Jehofa.

Ka gona ka 1944 go ile gwa swarwa kopano ya tirelo kua Pittsburgh, Pennsylvania mabapi le seboka sa ngwaga le ngwaga sa Mokgatlo wa Watch Tower. Ka September 30, pele ga seboka seo sa ngwaga le ngwaga, go ile gwa newa lelokelelo la dipolelo tše bohlokwa kudu ka seo Mangwalo a se bolelago mabapi le mokgatlo wa bahlanka ba Jehofa. Tlhokomelo e ile ya lebišwa go Sehlopha se Bušago. Lebakeng leo go ile gwa gatelelwa gore melao ya motheo ya pušo ya Modimo e swanetše go šoma go makgotla ka moka ao a dirišwago ke sehlopha sa molaki yo a botegago yo bohlale. Go ile gwa hlaloswa gore lekgotla la molao le be le se na batho ka moka ba Modimo “bao ba ineetšego” e le ditho tša lona. Le be le upja le ba emela, le dira e le lekgotla la molao legatong la bona. Lega go le bjalo, go etša ge Mokgatlo e be e le lekgotla la kgatišo leo le bego le dirišwa go nea Dihlatse tša Jehofa dipuku tšeo di bego di e-na le tshedimošo ya moya, Sehlopha se Bušago ka mo go kwalago le ka mo go nyakegago se be se kgokagane kgaufsi kudu le bahlankedi le balaodi ba Mokgatlo woo wa molao. Na melao ya motheo ya pušo ya Modimo e be e dirišwa ka botlalo ditabeng tša wona?

Kwano ya Mokgatlo e ile ya hlalosa thulaganyo ya beng-dišere yeo go yona palo-moka ya moneelo wa $10 (U.S.) e bego e nea monei tshwanelo ya go bouta mabapi le go kgethwa ga ditho tša lekgotla la balaodi le bahlankedi ba Mokgatlo. Mohlomongwe go ile gwa bonala eka meneelo e bjalo e be e nea bohlatse bja kgahlegelo ya kgonthe modirong wa mokgatlo. Lega go le bjalo, thulaganyo ye e ile ya tšweletša mathata. Ngwanabo rena Knorr, e lego mopresidente wa Mokgatlo o ile a hlalosa gore: “Go ya ka ditokišetšo tša kwano ya Mokgatlo, go be go tla bonala eka go ba karolo ya sehlopha se bušago go be go ithekgile ka meneelo go Mokgatlo wa molao. Eupja go ya ka thato ya Modimo se se be se ka se ke sa ba bjalo gare ba batho ba gagwe bao ba kgethilwego e le ka kgonthe.”

E be e le therešo gore Charles Taze Russell yoo ka nywaga ya pele e 32 ya Mokgatlo a bego a le ka pele sehlopheng se bušago, e be e le monei yo a neelago kudu ka tša ditšhelete, wa matla a gagwe, le monagano go Mokgatlo. Eupja e be e se moneelo wa ditšhelete wo o bego o bontšha kamoo Morena a mo dirišitšego ka gona. E be e le boineelo bja gagwe bjo bo feletšego, phišego ya gagwe yeo e sa felego, go emela ga gagwe Mmušo wa Modimo ka go se kwanantšhe le potego ya gagwe e sa senyegego yeo e ilego ya mo swaya pele ga Modimo e le yo a swanelago tirelo. Mabapi le thulaganyo ya pušo ya Modimo, molao wo o a šoma: “Dithô ka moka Modimo ó di beile mmeleng, se sengwê le se sengwê a se bea madulong a sôna, ka mo a ratilexo ka xôna.” (1 Ba-Kor. 12:​18) Ngwanabo rena Knorr o hlalositše gore, “Lega go le bjalo, go etša ge kwano ya Mokgatlo e dumetše gore dišere tša go bouta di newa bao ba neetšego ka ditšhelete modirong wa Mokgatlo, e bonagetše e gatakela goba go roba molao wo wa motheo wa Pušo ya Modimo mabapi le sehlopha se bušago; gomme e bonagetše gape e o bea kotsing goba go o bakela ditšhitišo.”

Ka gona, sebokeng sa kgwebo sa babouti ka moka bao e lego beng-dišere ba Mokgatlo ka October 2, 1944, go ile gwa boutwa ka ’ntšu le tee gore kwano ya Mokgatlo e hlahlobje lefsa gomme e dumelelanywe kgaufsi kudu le melao ya motheo ya pušo ya Modimo. Bjale palo ya ditho e be e ka se ke ya ba yeo e sa lekanyetšwago eupja e be e tla ba magareng ga 300 le 500, bao ka moka ga bona e bego e tla ba banna bao ba kgethilwego ke lekgotla la balaodi e sego motheong wa meneelo ya ditšhelete, eupja ka gobane e le Dihlatse tšeo di gotšego tsebong, tše mafolofolo le tše di botegago tša Jehofa tšeo di bego di šoma ka nako e tletšego modirong wa mokgatlo, goba e le badiredi ba mafolofolo ba diphuthego tša Dihlatse tša Jehofa. Ditho tše di be di tla boutela lekgotla la balaodi gomme lekgotla la balaodi ka morago la kgetha bahlankedi ba lona. Dithulaganyo tše tše difsa di ile tša thoma go šoma ngwageng o latetšego, ka October 1, 1945. Ye e ile ya ipontšha e le tšhireletšo gakaakang mehleng ya ge dihlopha tšeo di tletšego lehloyo di be di laola ka boradia ditaba tša kgwebo leboelela, e le gore di laole makgotla gomme ka morago di a rulaganye lefsa bakeng sa go swanela merero ya tšona ka noši!

Tšhegofatšo ya Jehofa megatong ye ya go tšwela pele tabeng ya go dumelelana le melao ya motheo ya pušo ya Modimo e be e dutše e bonagala. Go sa šetšwe kgateletšo e feteletšego yeo e bego e beilwe godimo ga mokgatlo nakong ya Ntwa ya II ya Lefase, palo ya bagoeledi ba Mmušo e ile ya tšwela pele go oketšega. Ka ntle le go kgaotša, ba ile ba tšwela pele ka mafolofolo go nea bohlatse ka Mmušo wa Modimo. Go tloga ka 1939 go ya go 1946, go bile le koketšego e makatšago ya 157 lekgolong gare ga Dihlatse tša Jehofa, gomme tša fihlelela dinaga tše dingwe tše tshelelago ka ditaba tše di lokilego. Nywageng e 25 e latelago, palo ya Dihlatse tše mafolofolo e ile ya oketšega ka mo e nyakilego go ba tekanyo e nngwe ya 800 lekgolong gomme tša bega modiro wa ka mehla dinageng tše di oketšegilego tše 86.

Tlwaetšo e Rulaganyeleditšwego Balebeledi

Babogi ba bangwe ba ka ntle ba ile ba go lebelela e le mo go sa phemegego gore ge mokgatlo o gola, ditekanyetšo tša wona di tla nyefišwa. Eupja ka mo go fapanego, Beibele e boletše e sa le pele gore go loka le khutšo di be di tla aparela gare ga bahlanka ba Jehofa. (Jes. 60:​17) Seo se be se tla nyaka thuto ya kelohloko le e tšwelago pele ya balebeledi bao ba ikarabelago ka Lentšu la Modimo, kwešišo e botse ya ditekanyetšo tša gagwe tša boahlodi le go dirišwa mo go tsepamego ga ditekanyetšo tšeo. Thuto e bjalo e be e dutše e newa. Thuto e tletšego ya melao ya Modimo ya go loka e be e dutše e newa ka go se kgaotše pele ka go Morokami, gomme taba ye e be e dutše e ithutwa ka thulaganyo ke phuthego e nngwe le e nngwe ya Dihlatse tša Jehofa lefaseng ka bophara. Eupja go oketša go seo, balebeledi ba mohlape ba be ba dutše ba newa tlhahlo e nngwe e oketšegilego kudu.

Balebeledi bao ba etelelago pele ba makala a Mokgatlo ba be ba dutše ba kopanywa bakeng sa tlwaetšo e kgethegilego nakong ya dikopano tša ditšhaba-tšhaba. Go tloga ka 1961 go ya go 1965, dithuto tša sekolo tšeo di rulagantšwego ka mo go kgethegilego tša go tšea dikgwedi tše seswai go ya go tše lesome di be di swarwa bakeng sa bona kua New York. Go tloga ka 1977 go ya go 1980, go be go e-na le lelokelelo le lengwe la dithuto tše kgethegilego tša dibeke tše hlano bakeng sa bona. Tlwaetšo ya bona e be e akaretša thuto ya temana ka temana ya dipuku ka moka tša Beibele gotee le go ahla-ahlwa ga ditaba ka botlalo tša mokgatlo le ditsela tšeo ka tšona go ka tšwetšwago pele boboledi bja ditaba tše di lokilego. Ga go na dikarogano tša botšhaba gare ga Dihlatse tša Jehofa. Go sa šetšwe moo di dulago gona, di kgomarela ditekanyetšo tše di swanago tše di phagamego tša Beibele gomme di dumela le go ruta dilo tše di swanago.

Balebeledi ba tikologo le ba selete le bona ba ile ba newa tlhokomelo e kgethegilego. Bontši bja bona ba tsene Sekolo sa Beibele sa Watchtower sa Gilead goba se sengwe sa Dikolo tša yona tša Katološo. Ka morago ga nako e itšego ba buša ba kopanywa gotee diofising tša makala tša Mokgatlo goba ba kopana mafelong a mangwe ao a swanelegago bakeng sa diseminari tša matšatši a sego kae goba beke.

Ka 1959 tokišetšo e nngwe yeo e kgahlišago kudu e ile ya thoma go šoma. Ye e be e le Sekolo sa Bodiredi sa Mmušo seo se tsenwago ke balebeledi ba tikologo le ba selete gotee le balebeledi ba phuthego. Se thomile e le thuto ya kgwedi e tletšego. Ka morago ga go dirišwa ka ngwaga kua United States, taba ya thuto e ile ya fetolelwa malemeng a mangwe gomme ya dirišwa ka mo go tšwelago pele lefaseng ka moka. Ka ge go be go sa kgonege gore balebeledi ka moka ba rulaganye go se be gona mešomong ya bona ya boiphedišo kgwedi ka moka, go ile gwa dirišwa thulaganyo ya thuto ya dibeke tše pedi go tloga ka 1966.

Sekolo se e be e se seminari ya baruti yeo go yona banna ba bego ba tlwaetšwa bakeng sa go itokišetša go kgethwa bjalo ka baruti. Bao ba bego ba se tsena e be e šetše e le badiredi bao ba kgethilwego. Bontši bja bona ba be ba bile balebeledi le badiši ba mohlape ka masome a nywaga. Lenaneo la thuto ya bona e be e le sebaka sa go ahla-ahla ka mo go tletšego ditaelo tšeo di tšwago Lentšung la Modimo mabapi le modiro wa bona. Go ile gwa gatelelwa kudu bohlokwa bja bodiredi bja tšhemo le kamoo bo ka dirwago ka gona ka mo go atlegago. Ka baka la ditekanyetšo tšeo di fetogago tša boitshwaro lefaseng, nako e ntši le yona e ile ya gafelwa tabeng ya go ahla-ahla go kgomarela ditekanyetšo tša Beibele tša boitshwaro. Sekolo se se ile sa tšwetšwa pele mehleng ya morago bjale ka diseminari nywageng e mengwe le e mengwe e mebedi goba e meraro, gotee le ka diboka tše di holago tšeo di swarwago ke balebeledi ba basepedi ba di swara le bagolo ba lefelong leo ka makga a mmalwa ngwageng o mongwe le o mongwe. Tše di nea sebaka sa go lebiša tlhokomelo e kgethegilego go dinyakwa tša gona bjale. Ke tšhireletšo malebana le go aroga lege e le gofe ditekanyetšong tša Beibele gomme di tlaleletša tabeng ya go swarwa ga maemo ka tsela e swanago diphuthegong ka moka.

Dihlatse tša Jehofa di nweletša pelong keletšo e lego go 1 Ba-Korinthe 1:​10: “Xomme lena Bana-bešo, ke a Le rapêla, ka ’ina la Jesu Kriste Mong ’a rena, ke re: Bohle bolêlang se tee, xore mo xo lena xo se bê le diphapang; Le bê ba xo bapêlana, kxopolô è le e tee, kêlêlô è le e tee.” Yeo ga se tumelelano yeo e gapeletšwago; e tlišwa ke go rutwa ditsela tša Modimo bjalo ka ge di ngwadilwe ka Beibeleng. Dihlatse tša Jehofa di thabela ditsela tša Modimo le morero wa gagwe. Ge e ba motho lege e le ofe a se sa thabela go phela go ya ka ditekanyetšo tša Beibele, o lokologile go tlogela mokgatlo. Eupja ge e ba motho lege e le ofe a thoma go ruta ditumelo tše dingwe goba a nyatša boitshwaro bja Beibele, balebeledi ba gata mogato wa go šireletša mohlape. Mokgatlo o diriša keletšo ya Beibele e rego: “Le phafoxêlê ba ba diraxo dikxaoxanô le dikxopišô, bà xana thutô ye le e rutilwexo. Le ba široxêlê.”​—Ba-Roma 16:​17; 1 Ba-Kor. 5:​9-13.

Beibele e boletše e sa le pele gore Modimo o be a tla dira gore boemo bjo bjalo bo be gona gare ga bahlanka ba gagwe, bjoo go bjona go loka go tlago go aparela gomme gwa tšweletša seenywa sa khutšo. (Jes. 32:​1, 2, 17, 18) Maemo a bjalo a ipiletša ka matla go batho bao ba ratago se se lokilego.

Ke ba bakae ba barati ba bjalo ba go loka bao ba tlago go kgoboketšwa pele ga bofelo bja tshepedišo ya kgale? Dihlatse tša Jehofa ga di tsebe. Eupja Jehofa o tseba seo modiro wa gagwe o tlago go se nyaka, gomme ka nako ya gagwe le ka tsela ya gagwe o kgonthišetša gore mokgatlo wa gagwe o hlametšwe go hlokomela seo.

Go Lokišetša Koketšego e Tšwelelago ka Lebelo

Ge go be go dirwa nyakišišo ka tlase ga tlhahlo ya Sehlopha se Bušago bakeng sa go lokišetša puku ya ditšhupetšo ya Aid to Bible Understanding, tlhokomelo e ile ya lebišwa kudu gape go tsela yeo ka yona phuthego ya Bokriste ya lekgolong la pele la nywaga e bego e rulagantšwe ka gona. Go ile gwa dirwa nyakišišo ya kelohloko ya mantšu a Beibele a bjalo ka “mogolo,” “molebeledi” le “modiredi.” Na mokgatlo wa mehleng yeno wa Dihlatse tša Jehofa o be o ka itumelelanya ka mo go tletšego kudu le thulaganyo yeo e bego e lotilwe ka Mangwalong e le tlhahlo?

Bahlanka ba Jehofa ba be ba ikemišeditše go tšwela pele ba ikokobeletša tlhahlo ya Modimo. Lelokelelong la dikopano tšeo di ilego tša swarwa ka 1971, tlhokomelo e ile ya lebišwa dithulaganyong tša taolo tša phuthego ya pele ya Bokriste. Go ile gwa hlaloswa gore lentšu pre·sbyʹte·ros (monna o mogolo, mogolo) bjalo ka ge le dirišwa ka Beibeleng le be le sa lekanyetšwa go batho ba ba tšofetšego, goba gore le be le šoma go bohle bao ba lego ka phuthegong bao ba gotšego moyeng. Le be le dirišwa kudu-kudu ka kgopolo ya go šupa go balebeledi ba phuthego. (Dit. 11:​30; 1 Tim. 5:​17; 1 Pet. 5:​1-3) Ba ba bile ba hwetša maemo a bona ka go kgethwa, ka go dumelelana le tšeo di nyakegago tšeo di ilego tša ba karolo ya Mangwalo a buduletšwego. (Dit. 14:​23; 1 Tim 3:​1-7; Tito 1:​5-9) Mo go bego go e-na le banna ba ba lekanego bao ba swanelegago, go be go e-ba le bagolo bao ba fetago o tee ka phuthegong. (Dit. 20:​17; Ba-Fil. 1:1) Ba ba be ba bopa “sehlopha sa bagolo,” bao ka moka ga bona ba bego ba e-na le maemo a swanago a bohlankedi gomme go se le o tee wa bona yo e bego e le setho se se phagamego kudu goba se matla ka phuthegong. (1 Tim. 4:​14, NW) Go thuša bagolo, go ile gwa hlaloswa gore gape go be go e-na le “bahlanka ba bodiredi” (NW) bao ba kgethilwego ka go dumelelana le tše di nyakegago tšeo di hlalositšwego ke moapostola Paulo.​—1 Tim. 3:​8-10, 12, 13.

Dithulaganyo di ile tša dirwa kapejana bakeng sa go dira gore mokgatlo o dumelelane kgaufsi kudu le mohlala wo wa Beibele. Tše di ile tša thoma ka Sehlopha se Bušago ka bosona. Ditho tša sona di ile tša oketšwa go feta tše šupago, tšeo di bego di dira e le sehlopha se bušago sa Dihlatse tša Jehofa e le ditho tša lekgotla la balaodi la Watch Tower Bible and Tract Society of Pennsylvania. Go be go se gwa bewa palo e tsepamego ya ditho tša Sehlopha se Bušago. Ka 1971 go be go e-na le tše 11; ka nywaga e mmalwa go be go e-na le tše 18; ka 1992 e be e le tše 12. Ka moka ga bona ke banna bao ba tloditšwego ba Modimo e le maja-bohwa gotee le Jesu Kriste. Ba 12 bao ba bego ba šoma e le ditho tša Sehlopha se Bušago ka 1992, ka nako yeo ba be ba e-na le pego ya nywaga e fetago 728 ya tirelo ya nako e tletšego gare ga bona e le badiredi ba Jehofa Modimo.

Go ile gwa fihlelelwa phetho ka September 6, 1971 ya gore go ba modula-setulo dibokeng tša Sehlopha se Bušago go be go swanetše go dirwa ka go šiedišana ngwaga le ngwaga go ya ka thulaganyo ya tatelano ya ditlhaka tša pele tša difane tša ditho tša sona. Se ge e le gabotse se ile sa thoma go šoma ka October 1. Ditho tša Sehlopha se Bušago le tšona di be di šiedišana ka dibeke go okamela borapeding bja mesong le thutong ya Morokami bakeng sa ditho tša sehlopha sa bašomi ba ntlong-kgolo. Thulaganyo ye e ile ya thoma go šoma ka September 13, 1971 ge Frederick W. Franz a be a etelela pele lenaneo la borapedi bja mesong ntlong-kgolo ya Mokgatlo kua Brooklyn, New York.

Ngwageng o latelago, go ile gwa dirwa tokišetšo ya gore go be le dipeakanyo bolebeleding bja diphuthego. Go be go ka se sa hlwa go e-ba le mohlanka o tee feela wa phuthego yo a thušwago ke palo e beilwego ya bahlanka ba bangwe. Banna bao ba bego ba swanelega go ya ka Mangwalo ba be ba tla kgethelwa go hlankela e le bagolo. Ba bangwe bao ba bego ba fihlelela tše di nyakegago tša Beibele, ba be ba tla kgethelwa go ba bahlanka ba bodiredi. Se se ile sa bula tsela bakeng sa gore ba bantši ba be le karolo boikarabelong bja phuthego, ka go rialo ba hwetše phihlelo e bohlokwa. Ga go le o tee wa Dihlatse tša Jehofa yoo ka nako yeo a bego a lemoga gore palo ya diphuthego e be e tla oketšega ka 156 lekgolong nywageng e 21 e latelago, ya fihlelela palo-moka ya 69 558 ka 1992. Eupja Hlogo ya phuthego, Morena Jesu Kriste go molaleng gore o be a lokišetša seo se bego se e-tla.

Nywageng ya pele ya bo-1970, go ile gwa naganišišwa ka kelohloko ka go rulaganywa lefsa ga Sehlopha se Bušago. Ga e sa le go tloga go hlongweng ga Mokgatlo wa Watch Tower ka 1884, go gatišwa ga dipuku, go hlokomelwa ga modiro wa go bolela ebangedi wa lefase ka bophara le dithulaganyo tša dikolo le dikopano di be di dutše di dirwa ka tlase ga tlhahlo ya ofisi ya mopresidente wa Watch Tower Bible and Tract Society. Eupja ka morago ga tsheka-tsheko ya kelohloko le poledišano ka ditaba ka botlalo ka lebaka la dikgwedi tše dintši, go ile gwa amogelwa thulaganyo e mpsha ka go kwana ka December 4, 1975. Go ile gwa bopja dikomiti tše tshelelago tša Sehlopha se Bušago.

Komiti ya Modula-setulo (yeo e bopjago ke modula-setulo wa gona bjale wa Sehlopha se Bušago, yo e bego e le modula-setulo pele le yo a tlago go latela lelokelelong la go ba modula-setulo) e amogela dipego mabapi le maemo a magolo a tšhoganetšo, dikotsi le masolo a tlaišo gomme e kgonthišetša gore a a rarollwa kapejana le Sehlopha se Bušago. Komiti ya Bongwadi e hlokomela go ngwalwa ga dijo tša moya, go gatišwa ga tšona dikhaseteng le go dirwa ga dikgatišo tša video bakeng sa Dihlatse tša Jehofa le bakeng sa go abja bathong ka kakaretšo, gomme e hlokomela modiro wa go fetolela malemeng a makgolo. Boikarabelo bja Komiti ya go Ruta ke go hlokomela dikolo le dipokano tše nyenyane gotee le dikopano tša selete le tša ditšhaba-tšhaba bakeng sa batho ba Jehofa, gotee le tlhahlo ya lapa la Bethele le go rulaganya taba yeo e tlago go dirišwa bakeng sa merero e bjalo. Komiti ya Tirelo e hlokomela mafelo ka moka a modiro wa boebangedi go akaretša modiro wa diphuthego le balebeledi ba basepedi. Go gatišwa, go phatlalatšwa le go romelwa ga dipuku gotee le go šoma ga difeketori le go swaragana le ditaba tša tša molao le tša kgwebo ka moka di hlokomelwa ke Komiti ya Kgatišo. Le gona Komiti ya Sehlopha sa Bašomi e okamela dithulaganyo tša thušo ya motho ka noši le ya moya ya ditho tša malapa a Bethele gomme e ikarabela ka go laleletša ditho tše difsa go šoma malapeng a Bethele lefaseng ka moka.

Dikomiti tše dingwe tšeo di holago di abelwa go hlokomela difeketori, magae a Bethele le dipolasa tšeo di tswalanago le ntlo-kgolo ya lefase. Dikomiting tše Sehlopha se Bušago se diriša ka mo go tletšego bokgoni bja ditho tša “lešaba le lexolo.”​—Kut. 7:​9, 15.

Gape go ile gwa dirwa dipeakanyo bolebeleding bja makala a Mokgatlo. Ga e sa le go tloga ka February 1, 1976, lekala le lengwe le le lengwe le hlokomelwa ke komiti ya ditho tše tharo goba go feta moo, go ithekgile ka dinyakwa le bogolo bja lekala. Ba ba šoma ka tlase ga tlhahlo ya Sehlopha se Bušago tabeng ya go hlokomela modiro wa Mmušo lefelong la bona.

Ka 1992 go ile gwa newa thušo e oketšegilego go Sehlopha se Bušago ge palo ya bathuši, kudu-kudu ba e-tšwa gare ga lešaba le legolo, ba be ba abelwa go ba le karolo dibokeng le modirong wa komiti ya Bongwadi, ya go Ruta, ya Tirelo, ya Kgatišo le ya Taolo.

Go abja mo ga boikarabelo go ipontšhitše e le mo go holago kudu. Gotee le dipeakanyo tšeo di šetšego di dirilwe ka diphuthegong, go thušitše go tloša lepheko lege e le lefe leo le bego le ka aroša batho go lemogeng gore Kriste ke Hlogo ya phuthego. Go ipontšhitše e le mo go holago kudu go ba le banababo rena ba bantšinyana bao ba eletšanago ka ditaba tšeo di kgomago modiro wa Mmušo. Go oketša moo, go rulaganywa lefsa mo go dirile gore go kgonege go nea tlhokomelo e nyakegago mafelong a mantši mo e bego e nyakega ka go akgofa mehleng yeo go yona mokgatlo o ilego wa gola ka lebelo e le ka kgonthe. Kgale-kgale, Jehofa o ile a bolela e sa le pele ka moporofeta Jesaya gore: “E monyenyane ó tlo tšwa ba sekete; ’me mmôtlana ó tlo tšwa ’thšaba se matla. Ké Nna Morêna ke tl’o xo dira tšeo ka pelá lebakeng la xôna.” (Jes. 60:​22) Ga se feela gore o akgofišitše modiro eupja gape o neile tlhahlo e nyakegago e le gore mokgatlo wa gagwe o bonagalago o ka kgona go hlokomela seo.

Dihlatse tša Jehofa di kgahlegela kudu modiro wo Modimo a di neilego wona gore di o dire mehleng ye ya bofelo ya lefase la kgale, gomme di rulagantšwe gabotse bakeng sa go o phetha. Dihlatse tša Jehofa di bona bohlatse bjo bo lego molaleng bja gore mokgatlo wo ga se wa batho eupja ke wa Modimo le gore Morwa wa Modimo ka noši, Jesu Kriste o a o hlahla. E le Kgoši e bušago, Jesu o tla šireletša balata ba gagwe ba ba botegago masetla-pelong a magolo ao a tlago gomme a kgonthišetša gore ba rulagantšwe ka mo go atlegago bakeng sa go phetha thato ya Modimo Nywageng e Sekete e tlago.

[Mengwalo ya tlase]

Ka 1894, Ngwanabo rena Russell o ile a rulaganyetša gore Zion’s Watch Tower Tract Society e rome banababo rena bao ba swanelegago e le diboledi. Ba be ba neilwe mangwalo a bohlatse ao a saennwego gore ba a dirišetše go itsebiša dihlopheng tša lefelong leo. Mangwalo a a bohlatse a be a sa nee matla a go rera gaešita le go bontšha gore seo moswari wa ona a bego a se bolela se be se swanetše go amogelwa ka ntle le go lekodišišwa ka mo go swanetšego go ya ka Lentšu la Modimo. Lega go le bjalo, ka ge batho ba bangwe ba ile ba kwela thoko morero wa ona, lebakeng la ngwaga Ngwanabo rena Russell o ile a dira gore mangwalo a bohlatse a bušwe. O ile a katanela ka kelohloko go phema selo lege e le sefe seo babogi ba bego ba ka se kwešiša e le ponagalo ya sehlopha sa baruti.

Zion’s Watch Tower, October-November 1881, matl. 8-9.

Ka dinako tše dingwe dihlopha tša tikologong di be di bitšwa “dikereke” ka go dumelelana le leleme leo le bego le dirišwa ka go King James Version. Gape di be di bitšwa di-ecclesia ka go dumelelana le lentšu leo le dirišwago temaneng ya Beibele ya Segerika. Lentšu “diklase” le be le dirišwa ka mo go swanago, ka gobane ge e le gabotse e be e le dihlopha tša barutwana bao ba bokanago ka mehla bakeng sa go ithuta. Ka morago ge di be di bitšwa dikhamphani, se e be e le go bonagatšwa ga go lemoga ga bona gore ba be ba le ntweng ya moya. (Bona mongwalo wa ka thoko wa Psalme 68:11, KJ.) Ka morago ga go gatišwa ga New World Translation of the Christian Greek Scriptures ka 1950, lentšu la Beibele la leleme la mehleng yeno la “phuthego” le ile la thoma go dirišwa ka mehla dinageng tše dintši.

Tlhaloso e lebanyago ya lentšu leo le dirišitšwego temaneng ya Beibele ya Segerika (khei·ro·to·neʹo) ke “go emiša, go otlolla, goba go phagamiša letsogo,” gomme ka tsela e katološitšwego, gape le be le ka bolela “go kgethelwa modiro ka go emiša matsogo.”—A Greek and English Lexicon to the New Testament, ka John Parkhurst, 1845, letl. 673.

Bakeng sa ditaba ka botlalo, bona Kgaolo 25 e rego, “Go Bolela Phatlalatša le ka Ntlo le Ntlo.”

Ka molaodi wa tirelo, tirelo ya tšhemo ya bao ba kopanelago le phuthego goba klase e be e swanetše go begwa go Mokgatlo bekeng e nngwe le e nngwe, go tloga ka 1919.

Go etša ge go hlalositšwe ka pukung ya Organization Method, phuthego e nngwe le e nngwe e be e swanetše go kgetha mothuša-molaodi le mohlokomedi wa setoko. Ba gotee le molaodi yo a kgethilwego ke Mokgatlo ba be ba bopa komiti ya tirelo ya phuthego.

Morokami (wa Seisemane) wa July 1, 1920, matl. 195-200.

Komiti ya tirelo ka nako yeo e be e akaretša ditho tše sego ka godimo ga tše lesome. O mongwe wa ba e be e le molaodi wa tirelo yo a bego a sa kgethwe ka go boutelwa lefelong leo eupja a kgethwa ke Mokgatlo. Ba bangwe ba be ba šoma le yena bakeng sa go rulaganya le go tšwetša pele modiro wa go nea bohlatse.

Ka nywaga e mentši go tloga ka 1932 go ya pele, ba ba be ba bitšwa ma-Jonadaba.

Ge lediri la Segerika khei·ro·to·neʹo le hlaloswa e le leo le bolelago ‘go kgetha ka go otlolla letsogo’ feela, se se palelwa ke go akaretša tlhaloso ya mafelelo ya lentšu le. Ka gona, A Greek-English Lexicon ya Liddell le Scott, yeo e ngwadilwego ke Jones le McKenzie gomme ya gatišwa gape ka 1968, e hlalosa lentšu e le leo le bolelago “go emiša letsogo, ka morero wa go bouta ga motho sebokeng . . . II. c. acc. pers. [ka tsela ya go šupa motho], go kgetha, ka mo go swanetšego ka go emiša matsogo . . . b. ka morago, ka kakaretšo, go kgethwa, . . . go kgethelwa boemo ka Kerekeng, [pre·sby·teʹrous] Dit. tša Baap. [Ditiro tša Baapostola] 14.23.” Go dirišwa moo ga ka morago go be go le nakong mehleng ya baapostola; lentšu le dirišitšwe ka kgopolo yeo ke ra-dihistori wa mo-Juda wa lekgolong la pele la nywaga Josephus ka go Jewish Antiquities, Puku 6, kgaolo 4, serapa 2 le kgaolo 13, serapa 9. Thulaganyo ya popopolelo ka boyona ya Ditiro 14:23 Segerikeng sa mathomo e bontšha gore Paulo le Baranaba e be e le bona bao ba dirilego se se bego se hlaloswa moo.

Ka morago ngwageng wona woo, ka 1938 Organization Instructions yeo e gatišitšwego e le pampišana ya matlakala a mane e ile ya nea ditaba tše dingwe tše di tletšego. E hlalositše gore phuthego ya lefelong leo e be e swanetše go kgetha komiti yeo e tlago go šoma legatong la yona. Komiti yeo e be e swanetše go lebelela banababo rena go ya ka ditshwanelego tšeo di hlalositšwego Mangwalong gomme ba ba bolelele go Mokgatlo. Ge baemedi ba basepedi ba Mokgatlo ba be ba etela diphuthego, ba ile ba hlahloba ditshwanelego tša banababo rena ba lefelong leo le go botega ga bona ge ba phetha dikabelo tša bona. Dipolelelo tša bona le tšona di be di elwa hloko ke Mokgatlo ge o dira dikgetho.

Thulaganyo ye e thomile go šoma ka October 1, 1938. Go be go e-na le bothata bjo bo golago tabeng ya go rulaganya dikopano nywageng ya ntwa, ka gona dikopano tša di-zone di ile tša kgaotšwa go ya bofelong bja 1941. Lega go le bjalo, gape ka 1946 thulaganyo e ile ya mpshafatšwa gomme ditiragalo tšeo go tšona diphuthego tše mmalwa di bego di kopana bakeng sa tlhahlo e kgethegilego di ile tša bitšwa dikopano tša tikologo.

Moko wa dipolelo tše o hwetšwa ditokollong tša Morokami tša October 15 le November 1, 1944 (ka Seisemane).

Ka morago, ba ile ba kgetha ditho tše dingwe tša lapa la Bethele bakeng sa go ba le karolo go hlokomeleng dikabelo tšeo.

Morokami, April 15, 1992, matl. 7-17, 31.

[Seswantšho go letlakala 204]

Sehlopha sa baruti se be se se na sebaka gare ga bona

[Seswantšho go letlakala 205]

Ba be ba sa leke go hloma “mokgatlo wa lefaseng”

[Seswantšho go letlakala 206]

Bagolo ba be ba kgethwa bjang?

[Seswantšho go letlakala 212]

Molaodi yo a kgethilwego ke Mokgatlo

[Seswantšho go letlakala 213]

Bagolo bao ba bego ba sa rate go bolela ka ntle ga phuthego

[Seswantšho go letlakala 214]

Go fokotša dipalo eupja go matlafatšwa phuthego

[Seswantšho go letlakala 218]

Dikgetho di be di swanetše go dirwa bjang?

[Seswantšho go letlakala 220]

Na Rutherford o be a upja a leka go hwetša taolo e kgolwanyane?

[Seswantšho go letlakala 222]

Go ikopanya le ba babedi le ba bararo gotee le dihlopha tše kgolo

[Seswantšho go letlakala 223]

Boikarabelo bjo bofsa bja balebeledi ba basepedi

[Seswantšho go letlakala 234]

Sehlopha se Bušago se se okeditšwego seo go sona go ba modula-setulo go šiedišanwago

[Seswantšho go letlakala 235]

Tlhokomelo e nyakegago mehleng ya koketšego ya kapejana

[Lepokisi go letlakala 207]

Ke ka Baka La’ng go Dirwa Phetogo?

Ge C. T. Russell a be a botšišwa mabapi le go fetola ga gagwe kgopolo ka go kgethwa ga bagolo dihlopheng tše fapa-fapanego tša batho ba Morena, o ile a araba ka gore:

“Pele ga dilo ka moka ke akgofela go le kgonthišetša gore le ka mohla ga se ka ka ka bolela gore ga ke dire diphošo. . . . Ga re gane go gola ka tsebo, le gore bjale re bona thato ya Morena ka leihlo le le fapanego go se nene mabapi le Bagolo goba baetapele dihlopheng tše dinyenyane tše di fapa-fapanego tša batho ba gagwe. Phošo ya rena ya kahlolo e be e le go letela mo gontši go banababo rena ba ba rategago bao ka go tla pejana Therešong, ba ilego ba ba baetapele ba tlhago ba dihlopha tše tše dinyenyane. Kgopolo e botse ka bona yeo re ilego ra e hlagolela ka lerato e be e le ya gore go tseba Therešo go be go tla ba dira gore e be bao ba ikokobetšago kudu, ya ba dira gore ba lemoge go se be ga bona ba bohlokwa ka go fetišiša, le gore selo lege e le sefe seo ba bego ba se tseba le seo ba bego ba kgona go se botša ba bangwe e be e le ka gore e le baboleledi ba Modimo le gore ba dirišwa ke yena. Dikholofelo tša rena tše botse e be e le gore ba ba be ba tla ba mehlala go mohlape ka ditsela ka moka; le gore tlhahlo ya Morena e ka tliša ka phuthegong e nyenyane ngwanabo rena o tee goba ba oketšegilego bao ba nago le bokgoni ka mo go swanago, goba bao ba nago le bokgoni bjo bogolo bja go hlalosa Therešo, gore moya wa lerato o tla ba lebiša go hlomphaneng, ka go rialo ba thušane le go kgothaletšana go tšea karolo tirelong ya Kereke, e lego mmele wa Kriste.

“Re ile ra phetha re naganne ka kgopolo ye gore ditekanyetšo tše kgolo tša kgaugelo le therešo tšeo di bego di swanetše go ba gona mo nakong ye le go lebogwa ke batho bao ba ineetšego ba Morena di be di tla dira gore e be mo go sa nyakegego go bona go latela tsela yeo e hlalositšwego ke baapostola ka Kerekeng ya pele. Phošo ya rena e bile go palelwa ke go lemoga gore dithulaganyo tšeo di hlalositšwego ke baapostola ka tlase ga tlhahlo ya Modimo ke tšeo di phagametšego selo lege e le sefe seo ba bangwe ba bego ba ka se bopa, le gore Kereke ka kakaretšo e tla swanelwa ke go ba le melao yeo e hlomilwego ke baapostola go fihlela ge ka tsogo ya rena ka moka re tla dirwa ba feletšego le ba phethagetšego gomme ra kopana ka go lebanya le Mong wa rena.

“Re ile ra thoma go kwešiša phošo ya rena ganyenyane-ganyenyane ge re dutše re bona moya wa phadišano ka tekanyo e itšego gare ga banababo rena ba ba rategago, le go kganyoga ga ba bangwe go tšea boetapele dibokeng e le boemo go e na le go ba tirelo, le go ntšha le go šitiša go tšwela pele ga banababo rena bjalo ka baetapele, bao ka tlhago ba nago le bokgoni bjo bo swanago le tsebo e lekanago ya therešo, le bokgoni bja go kgatikanya tšhoša ya Moya.”—“Zion’s Watch Tower,” March 15, 1906, letl. 90.

Lepokisi/Diswantšho go letlakala 208, 209]

Meago Yeo e Bego e Dirišwa ke Mokgatlo Nywageng e Lekgolo e Fetilego Tikologong ya Pittsburgh

Bible House yeo e bontšhitšwego mo e ile ya dira e le ntlokgolo ka nywaga e 19, go tloga ka 1890 go ya go 1909

Ngwanabo rena Russell o ithutile mo

Ditho tša lapa la Bible House tšeo di šomilego mo ka 1902

Moago o be o akaretša lefapha le la “typesetting” le “composition” (ka godimo ka go le letona), lefapha la tša thomelo (ka tlase ka go le letona), bobolokelo bja dipuku, mafelo a bodulo a sehlopha sa bašomi le holo (holo ya kopano) yeo e ka dudišago batho ba ka bago 300

[Mongwalo wa tlase]

Ka 1879, ntlo-kgolo e be e le kua 101 Fifth Avenue, Pittsburgh, Pennsylvania. Diofisi di ile tša hudušetšwa 44 Federal Street, Allegheny (ka Leboa la Pittsburgh) ka 1884; gomme ka morago ngwageng wona woo, tša hudušetšwa 40 Federal Street. (Ka 1887, se se ile sa bitšwa 151 Robinson Street.) Ge go be go nyakega sekgoba se se oketšegilego ka 1889, Ngwanabo rena Russell o ile a aga Bible House yeo e bontšhitšwego ka go le letshadi kua 56-60 Arch Street, Allegheny. (Se ka morago se ile sa newa nomoro e mpsha ya 610-614 Arch Street.) Ka lebaka le lekopana ka 1918-19, ba ile ba buša ba ba le ofisi ya bona e kgolo kua Pittsburgh, lebatong la boraro la 119 Federal Street.

[Lepokisi go letlakala 211]

Ke Modiro wa Mang?

Go ya bofelong bja bophelo bja gagwe bja lefaseng, Charles Taze Russell o ile a ngwala gore: “Gantši kudu batho ba Modimo ba lebala gore Morena ka Boyena ke mohlahli wa modiro wa Gagwe. Gantši kudu go naganwa gore, Re tla dira modiro gomme ra kgopela Modimo gore a šome gotee le rena modirong wa rena. Anke re be le kgopolo e nepagetšego ka taba ye, re gopole gore Modimo o rerile gomme o phetha modiro o mogolo; le gore modiro o tla atlega ka mo go feletšego ka ntle le rena le boiteko bja rena; le gore ke tokelo e kgolo yeo e neilwego batho ba Modimo ya go šoma gotee le Modiri wa bona go phetheng merero ya Gagwe, maano a Gagwe, dithulaganyo tša Gagwe ka tsela ya Gagwe. Ge re lebelela ditaba go ya ka pono ye, re swanetše go rapelela le go phakgamela go tseba le go dira thato ya Morena, re kgotsofatšwe ke karolo lege e le efe yeo re e neilwego ka gobane re hlahlwa ke Modimo wa rena. Ye ke thulaganyo yeo Watch Tower Bible and Tract Society e bego e dutše e tsoma go e latela.”—“Morokami” (wa Seisemane) wa May 1, 1915.

[Lepokisi go letlakala 215]

Dipotšišo tša V.D.M.

Ditlhaka V.D.M. di emela mantšu a Selatine “Verbi Dei Minister,” goba Modiredi wa Lentšu la Modimo.

Ka 1916 lelokelelo la dipotšišo tšeo di lego mabapi le ditaba tša Mangwalo le be le lokišetšwa ke Mokgatlo. Bao ba bego ba tla emela Mokgatlo e le diboledi ba ile ba kgopelwa go araba e nngwe le e nngwe ya dipotšišo ka go ngwala. Se se ile sa dira gore Mokgatlo o kgone go tseba menagano, dikgopolo le kwešišo ya bana ba babo rena mabapi le ditherešo tša motheo tša Beibele. Dikarabo tšeo di ngwadilwego di be di swawa ka kelohloko ke lekgotla la tlhahlobo diofising tša Mokgatlo. Bao ba bego ba lebelelwa e le diboledi tše di swanelegago ba be ba swanetše go hwetša dintlha tša 85 lekgolong goba go feta moo.

Ka morago, bontši bja bagolo, batiakone le Barutwana ba bangwe ba Beibele ba ile ba botšiša ge e ba ba be ba ka newa lelokelelo la dipotšišo. Ge nako e dutše e e-ya, go ile gwa hlaloswa gore e be e tla ba mo go holago ge e ba dihlopha tšeo di ka kgetha feela batho bao ba swanelegago bjalo ka V.D.M. e le baemedi ba bona.

Ge Mokgatlo o be o nea dintlha tša Modiredi wa Lentšu la Modimo, se se be se sa bolele gore motho yoo o kgethilwe. Se be se bolela feela gore lekgotla la tlhahlobo diofising tša Mokgatlo le hlahlobile tšwelopele ya dithuto tša motheo ya motho le botumo bja gagwe go fihla bokgoleng bjo itšego, gomme la phetha ka gore o be a swanelega ke go bitšwa Modiredi wa Lentšu la Modimo.

Dipotšišo tša V.D.M. di ka tsela e latelago:

(1) Tiro ya mathomo ya tlholo ya Modimo e be e le eng?

(2) Lentšu “Logos” le bolela’ng mabapi le Morwa wa Modimo? gomme mantšu Tate le Morwa a hlalosa’ng?

(3) Sebe se tsene neng lefaseng gomme bjang?

(4) Kotlo ya Modimo ya sebe go badiradibe ke eng? gomme badiradibe ke bomang?

(5) Ke ka baka la’ng go be go nyakega gore “Logos” a dirwe nama? gomme na O ile a “tswalwa gape”?

(6) Motho Kriste Jesu e be e le wa mohuta mang go tloga bjaneng go fihla lehung?

(7) Jesu ke wa mohuta mang ga e sa le go tloga tsogong; gomme tswalano ya gagwe ya molao le Jehofa ke efe?

(8) Modiro wa Jesu ke ofe Mehleng ye ya Ebangedi​—go tloga nakong ya Pentekoste go fihla mo nakong ye?

(9) Go fihla ga bjale Jehofa Modimo o diretše lefase la batho eng? gomme Jesu o le diretše eng?

(10) Morero wa Modimo mabapi le Kereke ge e phethilwe ke ofe?

(11) Morero wa Modimo ka lefase la batho ke eng?

(12) Mafelelo a bao ba sa laolegego e tla ba eng?

(13) Moputso goba ditšhegofatšo tšeo di tlago go tlela lefase la batho ka go ikokobeletša Mmušo wa Mesia e tla ba dife?

(14) Ke ka megato efe moo modiradibe a ka tsenago tswalanong e bohlokwa le Kriste gotee le Tate wa Legodimong?

(15) Ka morago ga ge Mokriste a tswetšwe ka Moya o Mokgethwa, tsela ya gagwe bjalo ka ge e laetšwe Lentšung la Modimo ke efe?

(16) Na o sokologile sebeng bakeng sa go hlankela Modimo yo a phelago?

(17) Na o neetše bophelo bja gago le matla a gago le bokgoni bja gago ka mo go feletšego go Morena le tirelo ya Gagwe?

(18) Na o bontšhitše boineelo bjo ka kolobetšo ya meetseng?

(19) Na o dirile Keno ya bokgethwa bja bophelo ya I. B. S. A. [International Bible Students Association]?

(20) Na o badile ka kwešišo le ka kelohloko di-“volume” tše tshelelago tša STUDIES IN THE SCRIPTURES?

(21) Na o hweditše tshedimošo e kgolo le mohola go tšona?

(22) Na o dumela gore o na le tsebo e bohlokwa le ya sa ruri ya Beibele yeo e tlago go go dira gore o be yo a swanelegago ka mo go lekanego o le mohlanka wa Morena bophelong bja gago ka moka bjo bo šetšego?

[Diswantšho go letlakala 216, 217]

Meago Yeo e Dirišitšwego Mehleng ya Pele kua Brooklyn

Legae la Bethele

122-124 Columbia Heights

Phapoši ya go jela Legaeng la Bethele

Tabernacle

Diofisi, bobolokelo bja dipuku, lefapha la tša poso, motšhene wa “typesetting” le holo yeo e nago le madulo a 800 di be di le mo, mo 17 Hicks Street (e dirišitšwe go tloga ka 1909 go ya go 1918)

Holo

Difeketori tša Pele

Ditho tša lapa la Bethele tšeo di šomilego feketoring ya Myrtle Avenue ka 1920 (ka go le letona)

35 Myrtle Avenue (1920-22)

18 Concord Street (1922-27)

117 Adams Street (1927- )

[Seswantšho go letlakala 221]

J. F. Rutherford ka 1941. Dihlatse di be di tseba gore e be e se moetapele wa tšona

[Dswantšho go letlakala 224, 225]

Balebeledi ba Basepedi Ba Sego Kae ba ba Dikete Bao ba Hlanketšego

Canada, 1905-33

Engelane, 1920-32

Finland, 1921-26, 1947-70

United States, 1907-15

Dikharabane kua Namibia

Go tloga phuthegong e nngwe go ya go e nngwe—

Greenland

Venezuela

Lesotho

Mexico

Peru

Sierra Leone

Go kopanela le Dihlatse tša lefelong leo tirelong ya tšhemo kua Japane

Go kopana le bagolo ba lefelong leo kua Jeremane

Go nea keletšo e šomago go babulamadibogo kua Hawaii

Go ruta phuthego kua Fora

[Lepokisi/Seswantšho go letlakala 229]

Makgotla a Pele a Molao

Zion’s Watch Tower Tract Society. O hlomilwe la mathomo ka 1881 gomme ka morago wa dirišwa ka molao nageng ya Pennsylvania ka December 15, 1884. Ka 1896 leina la wona le ile la fetošetšwa go Watch Tower Bible and Tract Society. Ga e sa le go tloga ka 1955 o be o dutše o tsebja e le Watch Tower Bible and Tract Society of Pennsylvania.

Peoples Pulpit Association. O hlomilwe ka 1909 mabapi le go hudušetša ga Mokgatlo diofisi tša wona tše kgolo kua Brooklyn, New York. Ka 1939 leina leo le ile la fetošetšwa go Watchtower Bible and Tract Society, Inc. Ga e sa le go tloga ka 1956 o be o dutše o tsebja e le Watchtower Bible and Tract Society of New York, Inc.

International Bible Students Association. O hlomilwe kua London, Engelane ka June 30, 1914.

E le gore go fihlelelwe dinyakwa tša molao, Dihlatse tša Jehofa di ile tša bopa mekgatlo e mengwe ditšhabeng le dinageng tše dintši. Lega go le bjalo, Dihlatse tša Jehofa ga di arolwe go ya ka mekgatlo ya setšhaba goba ya tikologo. Ke borwarre bjo bo kopanego bja lefase ka bophara.

[Lepokisi go letlakala 234]

‘Go Swana le Setšhaba sa Mehleng ya Pele sa Bokriste’

Makasine wa bodumedi wa “Interpretation” o boletše ka July 1956 gore: “Modirong wa tšona wa go rulaganya le wa go nea bohlatse, di [Dihlatse tša Jehofa] batamela kgaufsi kudu go feta sehlopha lege e le sefe go ekišeng setšhaba sa mehleng ya pele sa Bokriste. . . . Ke dihlopha tše sego kae tše dingwe tše di dirišago Mangwalo ka tekanyo e kgolo melaetšeng ya tšona, bobedi ka molomo le ka go ngwala, go etša ge di dira.”

[Seswantšho go letlakala 210]

Go nea tlhokomelo ya kgaufsi, go ile gwa hlongwa diofisi tša makala. La pele le ile la hlongwa kua London, Engelane moagong wo

[Seswantšho go letlakala 226]

John Booth, molebeledi wa mosepedi kua U.S.A. go tloga ka 1936 go ya go 1941

[Seswantšho go letlakala 227]

Carey Barber yoo selete sa gagwe se bego se akaretša karolo e kgolo ya United States

[Seswantšho go letlakala 228]

Ngwanabo rena Knorr o be a etela lekala le lengwe le le lengwe gotee le legae la baromiwa ka mehla

[Seswantšho go letlakala 230]

Balebeledi bao ba etelelago pele ba makala a Mokgatlo ba be ba dutše ba kopanywa bakeng sa tlwaetšo e kgethegilego (New York, 1958)

[Diswantšho go letlakala 231]

Sekolo sa Bodiredi sa Mmušo se neile tlhahlo e bohlokwa bakeng sa balebeledi lefaseng ka moka

Sekolo sa Bodiredi sa Mmušo kampeng ya bafaladi kua Thailand ka 1978; Philippines, 1966 (ka godimo ka go le letshadi)

[Seswantšho go letlakala 232]

Dithuto tša thulaganyo di be di dutše di gatišwa ka go se kgaotše (pele ka Seisemane, ka morago ka maleme a mangwe) bakeng sa go lomaganya modiro wa Dihlatse le go tsebiša bohle ka ditokišetšo tšeo di dirilwego bakeng sa go ba thuša bodireding bja bona