Kgaolo 19

Go Gola Gotee Leratong

BAAPOSTOLA ba Jesu Kriste ge ba be ba ngwalela Bakriste-gotee le bona ba ile ba hlalosa go nyakega ga gore batho ka o tee ka o tee ba se ke ba gola ka tsebo e nepagetšego feela eupja gape ba gole leratong. Motheo wa se e be e le lerato leo le bontšhitšwego ke Modimo ka boyena le lerato la boikgafo la Kriste yo ba katanetšego go sepela mehlaleng ya gagwe. (Joh. 13:34, 35; Ba-Ef. 4:15, 16; 5:1, 2; Ba-Fil. 1:9; 1 Joh. 4:7-10) E be e le barwarre, gomme ge ba be ba thušana tlemo ya lerato e be e e-ba e tiilego le go feta.

Ge tlala e be e bakela banababo rena ba Judea mathata a tša boiphedišo, Bakriste ba Siria le ba Gerika ba ile ba abelana le bona dithoto tša bona e le gore ba ba thuše. (Dit. 11:27-30; Ba-Roma 15:26) Ge ba bangwe ba be ba tlaišwa, tlaišego yeo e ba wetšego e be e kwewa go tšwa pelong ke Bakriste ba bangwe gomme ba be ba tsoma go ba thuša.—1 Ba-Kor. 12:26; Ba-Heb. 13:3.

Ee, batho ka moka ba na le bokgoni bja go rata, gomme ba bangwe ka ntle le Bakriste ba ba le letsogo ditirong tša go dira batho ba bangwe ka botho. Eupja batho bao ba bego ba le lefaseng la Roma ba be ba lemoga gore lerato le le bego le bontšhwa ke Bakriste e be e le le le fapanego. Tertullian yo a bego a šoma mmušong wa Roma o ile a tsopola dipolelo tša batho ba lefase la Roma mabapi le Bakriste, a re: “Ba re, ‘Bonang kamoo ba ratanago ka gona . . . le kamoo ba ikemišeditšego go hwelana ka gona.’” (Apology, XXXIX, 7) John Hurst o anega ka go History of the Christian Church ya gagwe (Volume I, letlakala 146) gore batho ba Carthage le Alexandria tša bogologolo mehleng ya leuba la malwetši, ba ile ba leleka bao ba bego ba babja gare ga bona gomme ba tšea selo lege e le sefe seo e ka bago sa bohlokwa mebeleng ya bao ba hwago. O bega gore ka mo go fapanego, Bakriste mafelong a ba ile ba abelana dithoto tša bona le ba bangwe, ba oka balwetši le go boloka bahu.

Na Dihlatse tša Jehofa mehleng yeno di dira mediro yeo e bontšhago go tshwenyega mo go bjalo ka boiketlo bja ba bangwe? Ge e ba go le bjalo, na ye e dirwa feela ke batho ba sego kae bao ba lego mafelong a fapa-fapanego, goba na mokgatlo ka kakaretšo o kgothaletša le go thekga maiteko a bjalo?

Thušo e Lerato Diphuthegong tša Tikologong

Gare ga Dihlatse tša Jehofa, go hlokomela ditšhiwana le bahlologadi ka phuthegong gotee le batho lege e le bafe bao ba botegago bao ba lego bothateng bjo šoro go lebelelwa e le karolo ya borapedi bja tšona. (Jak. 1:27; 2:15-17; 1 Joh. 3:17, 18) Mebušo ya lefase ka kakaretšo e nea dipetlele, mafelo a bodulo a batšofadi le dithulaganyo tša tlhokomelo ya badiidi bakeng sa batho bao ba sa šomego setšhabeng ka kakaretšo, gomme Dihlatse tša Jehofa di thekga dithulaganyo tšeo ka go lefa metšhelo ya tšona ka potego. Lega go le bjalo, ka go lemoga gore ke Mmušo wa Modimo feela wo o ka rarollago mathata a batho ka mo go sa felego, Dihlatse tša Jehofa di a ikgafa gotee le go gafa matlotlo a tšona kudu-kudu bakeng sa go ruta ba bangwe ka wona. Ye ke tirelo e bohlokwa yeo go se nago mmušo wa motho wo o e neago.

Ka diphuthegong tše di fetago 69 000 tša Dihlatse tša Jehofa lefaseng ka bophara, dinyakwa tše kgethegilego tšeo di rotogago ka baka la botšofadi le go babja ga batho ba itšego gantši di hlokomelwa motheong wa motho ka noši. Go etša ge go bontšhitšwe go 1 Timotheo 5:4, 8, boikarabelo kudu-kudu bo godimo ga Mokriste o mongwe le o mongwe gore a hlokomele lapa la gagwe. Bana, ditlogolo goba meloko e mengwe ya kgaufsi ba bontšha lerato la Bokriste ka go nea thušo go bao ba tšofetšego le bao ba babjago go ya ka dinyakwa tša bona. Diphuthego tša Dihlatse tša Jehofa ga di fokodiše maikwelo a a boikarabelo ka go ba tšona di rwalago boikarabelo bja lapa. Lega go le bjalo, ge e ba go se na ditho tša kgaufsi tša lapa goba ge e ba bao ba nago le boikarabelo ba tloga ba sa kgone go rwala morwalo ba nnoši, ba bangwe ka phuthegong ba ba thuša ka lerato. Mo go nyakegago, phuthego ka kakaretšo e ka dira tokišetšo ya go nea thušo go ngwanabo rena goba kgaetšedi yo a nyakago thušo yo a nago le pego e telele ya tirelo ya potego.—1 Tim. 5:3-10.

Tlhokomelo ya dinyakwa tše ga se ya tlogelwa gore e direge ka mohlolo. Mananeong a Sekolo sa Bodiredi sa Mmušo seo bagolo ba bilego go sona gantši ga e sa le go tloga ka 1959, boikarabelo bja bona pele ga Modimo tabeng ye e le badiši ba mohlape bo ile bja ahla-ahlwa gantši ka mo go kgethegilego. (Ba-Heb. 13:1, 16) Ga se gore ba be ba sa lemoge senyakwa se pele ga moo. Ka mohlala, ka 1911 Phuthego ya Oldham kua Lancashire, Engelane, e ile ya nea tlhakodišo ya dilo tše di bonagalago go bao ba bego ba lebeletšane le mathata a šoro a tša boiphedišo gare ga bona. Lega go le bjalo, ga e sa le go tloga ka nako yeo mokgatlo wa lefase ka moka o ile wa gola, palo ya bao ba lebeletšanego le mathata a šoro e oketšegile gomme Dihlatse tša Jehofa di lemogile ka mo go oketšegago seo Beibele e bontšhago gore di swanetše go se dira maemong a bjalo. Kudu-kudu nywageng ya morago bjale, boikarabelo bja Mokriste o mongwe le o mongwe go bao ba nago le dinyakwa tše di kgethegilego ba ba lego gare ga bona—batšofadi, balwetši, malapa a motswadi o tee le bao ba lego bothateng bja tša boiphedišo—bo ile bja ahla-ahlwa ke diphuthego ka moka dibokeng tša tšona.a

Go tshwenyega mo go bontšhwago ke Dihlatse ka e tee ka e tee ka ba bangwe go fetela ka kua ga go fo bolela gore, ‘Le apare, le khore.’ Di bontšha kgahlego e lerato ya motho ka noši. (Jak. 2:15, 16) Ela hloko mehlala e sego kae.

Ge mosadi o mofsa wa mo-Sweden, e lego o mongwe wa Dihlatse tša Jehofa a be a swerwe ke meningitis ge a be a etetše Gerika ka 1986, le yena o ile a bona seo se bolelwago ke go ba le bana beno le dikgaetšedi ba Bakriste dinageng tše dintši. Tatagwe kua Sweden o ile a tsebišwa. O ile a ikgokaganya gatee-tee le mogolo wa phuthego ya lefelo leo ya Dihlatse tša Jehofa kua Sweden, gomme ka thušo ya gagwe o ile a kgona go kgokagana le Hlatse ya kua Gerika. Bagwera ba bafsa ba Hlatse ye ya mofsa kua Gerika le ka mohla ga se ba ka ba e tlogela e sa hlokomelwa go fihlela ge e be e ka kgona go boela Sweden dibekeng tše tharo ka morago.

Ka mo go swanago, ge Hlatse e tšofetšego yeo e lego mohlolo kua Wallaceburg, Ontario, Canada e be e nyaka thušo, lapa leo e le thušitšego moyeng le ile la bontšha tebogo ya lona ka go e dira karolo ya lapa. Nywaga e sego kae ka morago ge ba be ba hudugela Barry’s Bay e ile ya huduga le bona. E ile ya dula le bona gomme ba e hlokomela ka lerato ka nywaga e 19 go fihlela e e-hwa ka 1990.

Kua New York City, banyalani ba Dihlatse ba ile ba hlokomela mokgalabje yo a bego a e-tla dibokeng Holong ya bona ya Mmušo, ba dira bjalo ka nywaga e ka bago 15 go fihlela a e-hwa ka 1986. Ge a be a swerwe ke bolwetši bja go hwa lehlakore, ba ile ba mo yela mabenkeleng, ba mo hlwekišetša, ba mo apeela le go mo hlatswetša. Ba ile ba mo swara bjalo ka ge eka e be e le tatago bona.

Dinyakwa tša mehuta e mengwe le tšona di hlokomelwa ka lerato. Banyalani ba Dihlatse kua United States ba be ba rekišitše ntlo ya bona gomme ba hudugela Montana go ya go thuša phuthego ya moo. Lega go le bjalo, ge nako e dutše e e-ya go ile gwa rotoga mathata a magolo a tša maphelo, ngwanabo rena o be a tlogetše mošomo gomme tšhelete ya bona e fedile. Ba be ba tla tšwela pele bjang? Ngwanabo rena o ile a rapelela thušo ya Jehofa. Eitše ge a fetša go rapela, Hlatse-gotee le bona e ile ya kokota mojakong. Ba ile ba intšha gotee bakeng sa kofi. Ge ngwanabo rena a boa o ile a hwetša khaonthara ya ka khitšhing e tletše dijo. Dijo di be di e-na le sephuthelo seo se nago le tšhelete gotee le lengwalo le le balegago ka gore: “Di tšwa go banababo lena le dikgaetšedi bao ba le ratago kudu.” Phuthego e be e lemogile go nyaka ga bona thušo gomme ka moka ba bile le karolo go e neeng. Yena le mosadi wa gagwe ba tutueditšwe kudu ke lerato la bona, ba ile ba lla le go leboga Jehofa, yoo mohlala wa gagwe wa lerato o tutuetšago bahlanka ba gagwe.

Go tshwenyega mo gogolo mo Dihlatse tša Jehofa di go bontšhago go bao ba nyakago thušo gare ga tšona e bile mo go tsebjago gohle. Ka dinako tše dingwe dihwirihwiri di ile tša leka go ikhola ka gona. Ka gona Dihlatse di ile tša swanelwa ke go ithuta go ba šedi mola di sa thibele kganyogo ya tšona ya go thuša bao ba swanetšego.

Ge Ntwa e Tlogela Batho ba Diila

Dikarolong tše dintši tša lefase batho ba ile ba tlogelwa ba diila ka baka la ntwa. Mekgatlo ya tša tlhakodišo e leka go nea thušo, eupja tshepedišo ye gantši e šoma ka go nanya. Dihlatse tša Jehofa ga di lebelele modiro wo o dirwago ke makgotla a bjalo e le wo o di rolago boikarabelo bja tšona go banababo tšona ba Bakriste mafelong a. Ge di lemoga gore banababo tšona ba nyaka thušo, ga di ‘tswalele mejako ya kwelobohloko ya tšona e botho’ bakeng sa batho ba bjalo eupja di dira kapejana seo di ka se kgonago go ba nea tlhakodišo.—1 Joh. 3:17, 18, NW.

Nakong ya Ntwa ya II ya Lefase, gaešita le dinageng tšeo di gateletšwego ke tlhaelelo ya dijo, Dihlatse tšeo di lego dinaga-magaeng tšeo di bego di sa dutše di e-na le dijo di ile tša di abelana le bana ba babo rena bao ba bego ba se na tšona metseng e megolo. Kua Netherlands se se ile sa dirwa ka go ipea kotsing mo gogolo ka baka la dithibelo tše thata tšeo di bego di beilwe ke ma-Nazi. Ge a be a le lesolong le bjalo la tlhakodišo lebakeng le lengwe, Gerrit Böhmermann o be a etile sehlopha sa banababo rena pele ba nametše dipaesekele tšeo di bego di rwele dijo di phuthetšwe ka diseila. Gatee-tee ba ile ba fihla lefelong la go phuruphutšwa motseng wa Alkmaar. Gerrit o itše, “Go be go se ka tsela e nngwe ka ntle le go bota Jehofa ka mo go tletšego.” Ka ntle le go fokotša lebelo kudu, o ile a goeletša go mohlankedi gore: “Wo ist Amsterdam?” (Tsela ya go ya Amsterdam ke efe?) Mohlankedi o ile a širogela ka thoko gomme a šupa pele ge a dutše a goeletša gore: “Geradeaus!” (Ke yona ye o e swerego!) Karabo ya Gerrit e bile ya gore, “Danke schön!” (Ke a leboga!) ge molokeloke ka moka wa dipaesekele o be o dutše o feta ka lebelo le legolo gomme mašaba ao a maketšego a lebeletše. Lebakeng le lengwe Dihlatse di ile tša atlega go tliša ditapola tšeo di tletšego seketswana go banababo tšona kua Amsterdam.

Ka gare-gare ga dikampa tša tshwenyo kua Yuropa, moya wo o be o bontšhwa ke Dihlatse tša Jehofa. Ge a be a golegilwe kampeng ya kgaufsi le Amersfoort, Netherlands, mofsa wa nywaga e 17 o ile a ota go fihlela a e-ba marapo. Eupja nywageng e latetšego, le ka mohla ga se a ka a lebala gore ka morago ga ge ba gapeleditšwe go ithobolla puleng ya matlorotloro go fihlela bošego-gare gomme ka morago ba tingwa dijo, Hlatse yeo e tšwago karolong e nngwe ya kampa e ile ya kgona go mo swara gomme ya katela setsekana sa senkgwa ka seatleng sa gagwe. Kua kampeng ya tshwenyo ya Mauthausen, Austria, Hlatse yeo kabelo ya yona e bego e nyaka gore e tloge karolong e nngwe ya kampa go ya go e nngwe gantši e be e bea bophelo bja yona kotsing ka go iša dijo tšeo Dihlatse di bego di di šadišitše disoleng tša tšona tše dinyenyane go Dihlatse tše dingwe tšeo di bego di tingwa dijo o šoro.

Ka morago ga ntwa Dihlatse tša Jehofa tšeo di bego di golegilwe dikgolegong le dikampeng tša tshwenyo tša Jeremane di be di apere diaparo tša kgolego feela. Thoto ya ba bantši bao ba bego ba se kgolegong e be e sentšwe. Dijo, diaparo le dilo tša go beša di be di hlaela karolong e kgolo ya Yuropa. Dihlatse tša Jehofa dinageng tše di ile tša rulaganya diboka kapejana gomme tša thoma go thuša ba bangwe moyeng ka go abelana le bona ditaba tše di lokilego tša Mmušo wa Modimo. Eupja tšona ka noši di be di nyaka thušo ka ditsela tše dingwe. Bontši bja tšona di be di fokotše kudu ka baka la tlala moo gantši di bego di idibala ka nako ya diboka.

Bjo e be e le boemo bjo Dihlatse di bego di se tša ka tša lebeletšana le bjona ka tekanyo e kgolo gakaalo. Lega go le bjalo, kgweding yona yeo ntwa e fedilego ka yona ka molao tikologong ya Pacific, Dihlatse tša Jehofa di ile tša swara kopano e kgethegilego kua Cleveland, Ohio, yeo go yona di ilego tša ahla-ahla seo se bego se swanetše go dirwa bakeng sa go nea banababo tšona ba Bakriste tlhakodišo dinageng tšeo di hlagaditšwego ke ntwa le kamoo di tlago go dira seo ka gona. Polelo yeo e kgothatšago ya “Mpho ya Gagwe ye e sa Hlalosegego” yeo e neilwego ke F. W. Franz, e ile ya nea keletšo ya Mangwalo yeo e ilego ya kgotsofatša dinyakwa tša boemo ka mo go tletšego.b

Dibekeng tše sego kae gatee-tee ge go be go dumeletšwe go sepela tikologong, N. H. Knorr, e lego mopresidente wa Mokgatlo wa Watch Tower le M. G. Henschel ba be ba le tseleng ya bona ya go ya Yuropa go ya go iponela maemo ka mahlo. Gaešita le pele ga ge ba thoma leeto leo, dithulaganyo tša tlhakodišo di be di šetše di dirišwa.

Dithomelo tša pele di ile tša ya di e-tša Switzerland le Sweden. Tše di oketšegilego di ile tša latela di e-tšwa Canada, United States le dinageng tše dingwe. Gaešita lege palo ya Dihlatse dinageng tšeo di bego di ka kgona go nea thušo e bjalo e be e le mo e ka bago 85 000 feela ka nako yeo, di ile tša thoma go romela diaparo le dijo go Dihlatse-gotee le tšona kua Austria, Belgium, Bulgaria, China, Czechoslovakia, Denmark, Engelane, Finland, Fora, Gerika, Hungary, Italy, Jeremane, Netherlands, Norway, Philippines, Poland le Romania. Bjoo e be e se boiteko bjo bo dirwago gatee feela. Dithomelo tša tlhakodišo di ile tša tšwela pele ka nywaga e mebedi le seripa. Magareng ga January 1946 le August 1948, di ile tša romela dikhilograma tše 479 114 tša diaparo, dipara tše 124 110 tša dieta le dikhilograma tše 326 081 tša dijo e le dimpho go Dihlatse-gotee le tšona. Ga go le karolo ya tšhelete yeo e ilego ya dirišetšwa ditshenyagalelo tša bolaodi. Go hlopha le go phutha go be go dirwa ke baithapi bao ba sa lefšego. Ditšhelete tšeo di neetšwego ka moka di ile tša dirišetšwa go thuša batho bao di bego di reretšwe go ba thuša.

Ee, go nyaka tlhakodišo ga bafaladi le ba bangwe bao ntwa e ba tlogetšego ba diila ga se gwa fela morago kua nywageng ya bo-1940. Go bile le dintwa tše makgolo ga e sa le go tloga ka 1945. Go tshwenyega mo go swanago ga lerato go tšwetše pele go bontšhwa ke Dihlatse tša Jehofa. Se se ile sa dirwa nakong ya ntwa ya Biafra kua Nigeria le ka morago ga yona go tloga ka 1967 go ya go 1970. Thušo e swanago e ile ya newa kua Mozambique nywageng ya bo-1980.

Liberia le gona, go ile gwa ba le tlala e bakilwego ke ntwa yeo e thomilego ka 1989. Ge batho ba dutše ba tšhaba, moago wa Watch Tower kua Monrovia o be o tletše bafaladi ba makgolo. Dijo lege e le dife tšeo di bego di le gona moo gotee le meetse ao a tšwago sedibeng di be di abelanwa ke bobedi baagišani ba Dihlatse le bao e sego Dihlatse. Ka gona gatee-tee ge maemo a be a dumela, ditlabakelo tše di oketšegilego tša tlhakodišo di ile tša tla di e-tšwa go Dihlatse tša Sierra Leone le Côte d’Ivoire kua Afrika Bodikela, Netherlands le Italy kua Yuropa le United States.

Gape ka 1990, ka morago ga ge ntwa ya kua Lebanon e tlogetše dikarolo tša Beirut di bonagala eka go bile le tšhišinyego ya lefase, bagolo gare ga Dihlatse tša Jehofa ba ile ba rulaganya komiti ya tlhakodišo ya tšhoganetšo bakeng sa go nea banababo rena thušo e nyakegago. Ga se ba ka ba swanelwa ke go kgopela baithapi; letšatšing le lengwe le le lengwe ba bantši ba be ba ithapela go thuša.

Lebakeng la kgohlano e kgolo ya tša dipolitiki le ya tša boiphedišo kua Yuropa, Dihlatse tša Jehofa kua Austria, Czechoslovakia, Hungary le Yugoslavia di ile tša romela ditone tše di fetago 70 tša dilo tšeo di nyakegago go banababo tšona ba Bakriste kua Romania ka 1990.

Se se ile sa latelwa ke masolo a oketšegilego a tlhakodišo a go ya ka Bohlabela bja Yuropa. Sehlopha se Bušago se ile sa kgopela ofisi ya lekala ya Mokgatlo wa Watch Tower kua Denmark gore e rulaganye tlhakodišo bakeng sa Dihlatse tšeo di nyakago thušo tša Ukraine. Diphuthego di ile tša tsebišwa gomme di be di ikemišeditše go ba le karolo. Ka December 18, 1991, dilori tše hlano le dibene tše pedi tšeo di bego di otlelwa ke baithapi ba Dihlatse di ile tša goroga Lviv di rwele ditlabakelo tša ditone tše 22—e lego pontšho ya go tshwenyega ga lerato ka banababo tšona ba Bakriste. Go tšwela pele go ya go 1992, dithomelo di ile tša fihla gape di e-tšwa go Dihlatse tša Austria—e lego ditone tše di fetago 100 tša dijo le diaparo. Ditlabakelo tše di oketšegilego di ile tša romelwa di e-tšwa go Dihlatse tša Netherlands—mathomong e le ditone tše 26 tša dijo, gwa latela molokeloke wa dilori tše 11 di rwele diaparo, ke moka gwa tla dijo tše di oketšegilego bakeng sa go lebeletšana le go nyakega mo go tšwelago pele ga thušo. Baamogedi ba be ba leboga Modimo kudu gomme ba lebeletše go yena bakeng sa bohlale tabeng ya go diriša seo se neilwego. Ba ile ba kopana gotee ba rapela pele ga ge ba fološa dilo diloring, gape le ge modiro o phethilwe. Dihlatse tša kua Italy, Finland, Sweden le Switzerland di ile tša romela ditlabakelo tše dingwe tša tlhakodišo. Nakong yeo se se bego se direga ka yona, maemo a mpherefere magareng ga badudi ba repabliki bao pele ba bego ba bopa Yugoslavia, a ile a dira gore go nyakege thušo moo. Dijo, diaparo le dihlare tša kalafo le tšona di ile tša romelwa lefelong leo. Ka nako yeo, Dihlatse tše di lego metseng ya moo di ile tša nea bao magae a bona a sentšwego madulo.

Ka dinako tše dingwe bao ba nyakago thušo ka go akgofa ba mafelong a kgole, gomme boemo bja bona ga bo tsebje. Go be go le bjalo ka malapa a 35 a Dihlatse tša Jehofa kua Guatemala. Metsana ya bona e be e hlasetšwe ke dihlopha tšeo di lwantšhanago. Ge mafelelong ba be ba kgona go boela go yona ka 1989, ba be ba nyaka thušo ya go aga lefsa. Go tlaleletša thušo yeo e neilwego ke mmušo go bao ba boilego, ofisi ya lekala ya Mokgatlo wa Watch Tower e ile ya hloma komiti ya thušo ya tšhoganetšo bakeng sa go thuša malapa a a Dihlatse, gomme Dihlatse tše dingwe tše ka bago 500 tšeo di tšwago diphuthegong tše 50 di ile tša ithapela go thuša ka modiro wa go aga gape.

Go na le maemo a mangwe ao le ona a dirago batho gore e be bao ba nyakago thušo e kgolo kudu e se ka baka la phošo ya bona. Ditšhišinyego tša lefase, madimo a magolo le mafula ke dilo tšeo di diregago gantši. Go boletšwe gore ka kakaretšo lefase le kgongwa o šoro ke dikotsi tše di fetago 25 tše kgolo ngwageng o mongwe le o mongwe.

Ge Matla a Tlhago a Baka Tshenyo

Ge go rotoga maemo a magolo a tšhoganetšo ao a kgomago Dihlatse tša Jehofa ka baka la dikotsi, go gatwa megato ya kapejana bakeng sa go nea thušo e nyakegago. Bagolo ba lefelong leo ba ithutile gore ge ba lebeletšana le maemo a bjalo, ba swanetše go dira boiteko bjo bogolo bja go ikopanya le o mongwe le o mongwe ka phuthegong. Ofisi ya lekala ya Mokgatlo wa Watch Tower yeo e hlokomelago modiro wa Mmušo lefelong leo e hlahloba boemo kapejana, ke moka ya begela ntlo-kgolo ya lefase. Mo go nyakegago thušo e oketšegilego go feta yeo e ka newago tikologong, go dirwa dithulaganyo tšeo di hlokometšwego gabotse, ka dinako tše dingwe gaešita le go tšwa dinageng tše dingwe. Morero ga se go leka go phagamiša boemo bja go phela bja bao ba kgomilwego ke boemo eupja ke go ba thuša gore ba be le dilo tše di nyakegago tša bophelo tšeo ba bego ba di tlwaetše.

Pego feela ya kotsi thelebišeneng ke e lekanego go tutuetša Dihlatse gore di leletše bagolo bao ba ikarabelago ba tikologong mogala go ithapela go šoma goba go nea tšhelete goba ditlabakelo. Ba bangwe ba ka romela ditšhelete ofising ya lekala goba ntlong-kgolo ya lefase gore di dirišwe mererong ya tlhakodišo. Ba a tseba gore go nyakega thušo, gomme ba nyaka go ba le karolo. Mo go nyakegago thušo e kgolo kudu, Mokgatlo wa Watch Tower o ka tsebiša banababo rena tikologong e itšego ka mo go kgethegilego e le gore ba ka thuša ge ba kgona. Go hlongwa komiti ya tša tlhakodišo e le gore e lomaganye tshepedišo ya ditaba tikologong yeo e wetšwego ke kotsi.

Ka gona, ge karolo e kgolo ya Managua, Nicaragua, e be e sentšwe ke tšhišinyego e matla ya lefase ka December 1972, balebeledi ba diphuthego tša Dihlatse tša Jehofa tikologong yeo ba ile ba kopana ka morago ga diiri tše itšego bakeng sa go kopanya maiteko a bona. Gatee-tee go ile gwa hlahlobja ge e ba Hlatse e nngwe le e nngwe motseng e be e šireletšegile. Lona letšatšing leo ditlabakelo tša tlhakodišo di ile tša thoma go fihla di e-tšwa diphuthegong tša kgaufsi; ka morago tša tla ka go akgofa go tšwa Costa Rica, Honduras le El Salvador. Mafelo a 14 a kabo ya dilo tša tlhakodišo a ile a hlongwa go dikologa dikarolo tšeo di lego lekatana tša Managua. Tšhelete le ditlabakelo tšeo di tšwago go Dihlatse dikarolong tše dintši tša lefase di ile tša romelwa Nicaragua ka ntlo-kgolo ya ditšhaba-tšhaba ya Mokgatlo wa Watch Tower. Dijo le ditlabakelo tše dingwe (go akaretša dikerese, mebankgwari le sesepe) di be di abja go ya ka bogolo bja lapa, lapa le lengwe le le lengwe le newa kabo ya matšatši a šupago. Mafelelong, batho ba ka bago 5 000—e lego Dihlatse, malapa a tšona le meloko yeo di bego di dula le yona—ba be ba fepja. Mediro ya tša tlhakodišo e ile ya tšwela pele ka dikgwedi tše lesome. Eitše ge makgotla a mmušo le mokgatlo wa Sefapano se Sehwibidu a bona seo se bego se dirwa, le tšona tša neela dijo, ditente le ditlabakelo tše dingwe.

Ka 1986 ge go thuthupa ga thaba-mollo go be go gapeleditše batho ba 10 000 bao ba tšwago sehlakahlakeng sa Izu-Oshima kgaufsi le Japane gore ba huduge, diketswana tšeo di rwelego bafaladi di ile tša gahlanetšwa ke Dihlatse tša Jehofa tšeo di bego di tsoma ka phišego go hwetša banababo tšona ba moya. O mongwe wa bahudugi o itše: “Ge re be re tloga Oshima, rena ka noši re be re sa tsebe mo re bego re e-ya gona.” Tšohle di diregile ka lebelo kudu. “Lega go le bjalo, ge re fologa sekepe re ile ra bona leswao leo le rego, ‘Dihlatse tša Jehofa.’ . . . Megokgo e ile ya tlala ka mahlong a mosadi wa-ka ka ge a be a thabišitšwe ke kimologo ya go hwetša banababo rena moo ba tlile go re gahlanetše boema-kepeng.” Ka morago ga go bona kamoo bahudugi ba Dihlatse ba bego ba hlokomelwa ka gona e sego feela ge ba goroga eupja gape le ka morago ga moo, gaešita le batho bao pele ba bego ba sa di amogele ba ile ba bolela gore: “Le dirile gabotse ka go kgomarela bodumedi bjoo.”

Dihlatse di dira boiteko bjohle bja go iša thušo mafelong ao a wetšwego ke kotsi kapejana ka mo go kgonegago. Ka 1970 ge Peru e be e wetšwe ke e nngwe ya ditšhišinyego tšeo di senyago kudu tša lefase historing ya yona, ditšhelete tša tlhakodišo ya tšhoganetšo di ile tša romelwa kapejana go tšwa ntlong-kgolo ya lefase kua New York, gomme gwa latela ditone tše 15 tša diaparo. Lega go le bjalo, gaešita le pele ga ge dilo tšeo di rometšwego di fihla, Dihlatse di be di išitše sehlopha sa dikoloi tšeo di rwelego ditlabakelo tša tlhakodišo tikologong yeo go yona metse e megolo le metsana e bego e sentšwe, di dira bjalo diiring tše sego kae ka morago ga ge ditsela di butšwe. Ka mo go tšwelago pele matšatšing le dibekeng tše di latetšego, di ile tša nea thušo e nyakegago bobedi ya dilo tše di bonagalago le ya moya go dihlopha tše di fapa-fapanego godimo kua Andes. Ka 1980, ge dikarolo tša Italy di be di šišintšwe ke tšhišinyego e šoro ya lefase mantšiboeng a November 23, lori ya pele yeo e rwelego ditlabakelo tšeo di rometšwego ke Dihlatse e ile ya goroga tikologong yeo e sentšwego letšatšing le le latelago. Gatee-tee di ile tša hloma khitšhi ya tšona ka noši yeo dijo tšeo di apeilwego ke dikgaetšedi di bego di abja di e-tšwa gona letšatšing le lengwe le le lengwe. Motho yo a bego a bogetše modiro wo wa tlhakodišo sehlakahlakeng se sengwe sa Caribbean, o boletše gore: “Dihlatse di ile tša dira ka lebelo go feta mmušo.” Mohlomongwe se ke sa therešo ka dinako tše dingwe, eupja Dihlatse tša Jehofa di tloga di leboga thušo ya bahlankedi ba mmušo bao ba dirago boiteko bja go fihlelela mafelo a bjalo ao a wetšwego ke kotsi kapejana.

Lebakeng la tlala kua Angola ka 1990, go ile gwa lemogwa gore Dihlatse tša moo di be di nyaka dijo le diaparo o šoro. Lega go le bjalo, go di fihlelela e be e ka ba bothata ka gobane Dihlatse tša Jehofa di be di thibetšwe nageng yeo ka nywaga e mentši. Lega go le bjalo, banababo tšona ba Bakriste ba Afrika Borwa ba ile ba tlatša lori ka ditone tše 25 tša ditlabakelo tša tlhakodišo. Ge ba le tseleng, ba ile ba etela ofisi ya bahlankedi ba mmušo wa Angola gomme ba dumelelwa go tshela mollwane. Gore ba fihlelele banababo rena, ba ile ba swanelwa ke go feta mafelong a 30 ao go ona go thibilego bahlabani le moo leporogo le bego le wele, ba ile ba swanelwa ke go tshela noka yeo e tletšego ka moratho wa nakwana wo o bego o hlomile mo e bego e le leporogo. Go sa šetšwe se ka moka, dilo ka moka tšeo di rometšwego di ile tša fihlišwa di šireletšegile.

Dinakong tša dikotsi, go dirwa mo gontši go feta go fo romela ditlabakelo tša tlhakodišo tikologong yeo. Ge go thuthupa le mollo di be di sentše tikologo lefelong la bodulo la Mexico City ka 1984, Dihlatse di ile tša goroga kapejana bakeng sa go nea thušo. Eupja Dihlatse tše dintši tša tikologong di be di sa tsebje mo di lego gona, ka gona bagolo ba ile ba rulaganyetša go tsoma e nngwe le e nngwe ya tšona ka go se kgaotše. Tše dingwe di be di tšhabetše mafelong a mangwe. Lega go le bjalo, bagolo ba ile ba phegelela go fihlela ge ba di hweditše ka moka. Go ile gwa newa thušo go ya ka seo se bego se nyakega. Boemong bja kgaetšedi yo a bego a hwetšwe ke monna wa gagwe le morwa, seo se be se akaretša go dira dithulaganyo tša poloko le go nea thekgo e tletšego ka morago, ya dilo tše di bonagalago le ya moya go kgaetšedi le bana ba gagwe bao ba šetšego.

Gantši go nyakega mo gontši go feta feela dihlare tša kalafo, dijo tše sego nene le diaparo. Ka 1989 ledimo le ile la wiša dintlo tša Dihlatse tše 117 kua Guadeloupe gomme la senya dintlo tše dingwe tše 300. Dihlatse tša Jehofa tša Martinique di ile tša di thuša kapejana; ka morago Dihlatse tša Fora di ile tša romela ditone tše di fetago 100 tša dikago e le mpho bakeng sa go di thuša. Sehlakahlakeng sa St. Croix ge Hlatse yeo e bego e senyegetšwe ke legae la yona e be e botša bašomi-gotee le yona gore Dihlatse-gotee le yona di be di e-tla di e-tšwa Puerto Rico go tla go thuša, ba itše: “Di ka se ke tša go direla selo. O motho yo moso, ga o Mosepaniši go swana le tšona.” Bašomi-gotee bao ba ile ba makala gakaakang ge go se go ye kae e be e e-na le ntlo e mpsha-mpsha! Ka morago ga tšhišinyego ya lefase kua Costa Rica ka 1991, Dihlatse tša lefelong leo le baithapi ba ditšhaba-tšhaba di ile tša šoma gotee bakeng sa go thuša Dihlatse-gotee le tšona lefelong leo le wetšwego ke kotsi. Di ile tša aga dintlo tše 31 lefsa le Diholo tše hlano tša Mmušo gomme tša lokiša tše dingwe, di sa letela go hwetša moputso. Babogi ba ile ba bolela gore: ‘Dihlopha tše dingwe di bolela ka lerato, lena le a le bontšha.’

Bokgoni bjoo mediro ya tša tlhakodišo e dirwago ka bjona ke Dihlatse tša Jehofa gantši bo ile bja tlaba bao ba lebeletšego. Kua California, U.S.A., ka 1986, leriba le le agilwego la Noka ya Yuba le ile la kgerega gomme mafula a gapeletša batho ba masome a dikete gore ba tloge magaeng a bona. Bagolo ba Bakriste tikologong yeo ba ile ba ikopanya le ntlo-kgolo kua New York, gomme komiti ya tša tlhakodišo ya hlongwa. Gatee-tee ge meetse a thoma go fokotšega, baithapi ba makgolo ba be ba ikemišeditše go šoma. Pele ga ge makgotla a lefase a tša tlhakodišo a be a ka thoma go šoma, magae a Dihlatse a be a šetše a lokišitšwe. Ke ka baka la’ng di ile tša kgona go tšwela pele ka lebelo gakaakaa?

Lebaka le legolo e be e le go ikemišetša ga Dihlatse go ithapa gatee-tee ka ntle le tefo, gotee le go neela ga tšona ka ditlabakelo tšeo di nyakegago. Lebaka le lengwe e be e le gore di be di e-na le phihlelo ya go rulaganya le go šoma gotee, ka ge di dira se ka mehla bakeng sa go rulaganya dikopano tša tšona le go aga Diholo tše difsa tša Mmušo. Eupja lebaka le lengwe le bohlokwa ke gore di ile tša naganišiša ka seo Beibele e se bolelago ge e re: “[Le be le] leratanô le le tletšexo.”—1 Pet. 4:8.

Meneelo yeo e neelwago bakeng sa go fihlelela dinyakwa tše bjalo gantši e tšwa go batho bao ka bobona ba se nago mo gontši. Go bjalo ka ge mangwalo a bona ao a romelwago le yona gantši a bolela: ‘Mpho ke e nyenyane, eupja pelo ya rena ka moka e rata go thuša dikgaetšedi tša rena le banababo rena.’ ‘Ke duma eka nkabe ke romela se se oketšegilego, eupja seo Jehofa a ntumeletšego go ba le sona ke kganyoga go se abelana le ba bangwe.’ Go swana le Bakriste ba lekgolong la pele la nywaga kua Matsedonia, ba kgopela ka potego tokelo ya go ba le letsogo go neeng dilo tše di nyakegago tša bophelo go bao ba nyakago thušo. (2 Ba-Kor. 8:1-4) Ge ma-Korea a fetago 200 000 a be a tlogetšwe a se na magae ka baka la mafula ka 1984, Dihlatse tša Jehofa kua Repabliking ya Korea di ile tša arabela ka lethabo le legolo moo ofisi ya lekala e ilego ya swanelwa ke go tsebiša gore go be go se sa nyakega thušo e nngwe.

Babogi ba ka tloga ba iponela ka noši gore selo se sengwe seo se fetišago maikwelo a boikarabelo goba maikwelo a kakaretšo a go dira setho se tutuetša Dihlatse. Di rata banababo tšona le dikgaetšedi ba Bakriste e le ka kgonthe.

Go oketša tabeng ya go hlokomela dinyakwa tša nama, Dihlatse tša Jehofa di nea tlhokomelo e kgethegilego go dinyakwa tša moya tša banababo tšona mafelong ao a wetšwego ke kotsi. Go dirwa ditokišetšo kapejana ka mo go kgonegago gore diboka tša phuthego di tsošološwe. Kua Gerika ka 1986, se se ile sa nyaka gore go hlongwe tente e kgolo ka ntle ga motse wa Kalamata bakeng sa go dirišwa e le Holo ya Mmušo, le tše nyenyane mafelong a fapa-fapanego bakeng sa Dithuto tša gare ga beke tša Puku tša Phuthego. Ka mo go swanago, ka morago ga ge dinyakwa tša nama tša baphologi ba leraga le le fišago kua Armero, Colombia di kgotsofaditšwe ka 1985, ditšhelete tše di šetšego di ile tša dirišetšwa go aga Diholo tše difsa tša Mmušo bakeng sa diphuthego tše tharo lefelong leo.

Gaešita lege modiro o bjalo wa go aga lefsa o be o tšwela pele, Dihlatse tša Jehofa di ile tša tšwela pele go homotša ba bangwe ka dikarabo tšeo di kgotsofatšago tšeo Lentšu la Modimo le di neago bakeng sa dipotšišo tša bona mabapi le morero wa bophelo, lebaka leo ka lona go nago le dikotsi le lehu gotee le kholofelo ya bokamoso.

Mediro ya tlhakodišo ya Dihlatse ga se ya rerelwa go kgotsofatša dinyakwa tša o mongwe le o mongwe yo a lego lefelong leo le wetšwego ke kotsi. Ka go dumelelana le Ba-Galatia 6:10, mediro ye e reretšwe kudu-kudu ‘bao di amanago le tšona ka tumelo.’ Ka nako e swanago, di thuša ba bangwe ka lethabo ge di kgona. Ka mohlala, di dirile se ge di be di nea bahlaselwa ba tšhišinyego ya lefase kua Italy dijo. Kua United States ge di be di thuša bahlaselwa ba mafula le ledimo, di ile tša hlwekiša le go lokiša le magae a baagišani bao ba gakanegilego ba Dihlatse. Ge di botšišwa lebaka leo ka lona di dirago ditiro tše bjalo tša botho go batho bašele, di fo araba ka gore di rata baagišani ba tšona. (Mat. 22:39) Ka morago ga ledimo le le senyago ka borwa bja Florida, U.S.A., ka 1992, lenaneo leo le rulagantšwego gabotse la tlhakodišo la Dihlatse le be le tsebja kudu moo makgotla a mangwe a kgwebo le batho ka o tee ka o tee, bao e bego e se Dihlatse le bao ba bego ba nyaka go neela meneelo e megolo ba ilego ba e lebiša go Dihlatse. Ba be ba tseba gore dimpho tša bona di be di ka se ke tša fo tlogelwa e le mokgobo goba tša dirišetšwa go hwetša poelo, eupja ka kgonthe di be di tla hola bahlaselwa ba ledimo, bobedi Dihlatse le bao e sego Dihlatse. Go rata ga tšona go thuša batho bao e sego Dihlatse ka dinako tša kotsi go ile gwa lebogwa ka kudu kua Davao Del Norte, Philippines, moo balaodi ba motse ba ilego ba phatlalatša setlamo seo se bolelago bjalo.

Lega go le bjalo, ga se bohle bao ba ratago Bakriste ba therešo. Gantši ke bahlaselwa ba tlaišo e sehlogo. Boemo bjo le bjona bo tliša thekgo e kgolo e larato bakeng sa Bakriste-gotee.

Ge go Lebeletšanwe le Tlaišo e Sehlogo

Moapostola Paulo o ile a bapiša phuthego ya Bokriste le mmele wa motho gomme a re: “Dithô di babalêlanê ka xo kwana. Xe sethô se tee sè hlokofala, dithô ka moka di a hlokofala.” (1 Ba-Kor. 12:25, 26) Ke kamoo Dihlatse tša Jehofa di arabelago ka gona ge di e-kwa dipego mabapi le tlaišo ya banababo tšona ba Bakriste.

Kua Jeremane mehleng ya Bonazi, mmušo o ile wa gata megato e boima kudu e gatelelago malebana le Dihlatse tša Jehofa. Go be go e-na le Dihlatse tše ka bago 20 000 feela Jeremane ka nako yeo, e lego sehlopha se senyenyane seo se bego se hloilwe ke Hitler. Go be go nyakega mogato wa botee. Ka October 7, 1934, phuthego e nngwe le e nngwe ya Dihlatse tša Jehofa Jeremane ka moka e ile ya kopana ka sephiring, ya rapela gomme ya romela mmušo lengwalo leo le bolelago boikemišetšo bja yona bja go tšwela pele e hlankela Jehofa. Ka morago bontši bja bao ba bego ba le gona ba ile ba ya ka ntle le poifo go nea bohlatse go baagišani ba bona ka leina la Jehofa le Mmušo. Letšatšing lona leo Dihlatse tša Jehofa lefaseng ka moka le tšona di ile tša kopana diphuthegong tša tšona, gomme ka morago ga thapelo ya botee tša romela di-cablegram mmušong wa Hitler ka go thekga banababo tšona ba Bakriste.

Ka 1948, ka morago ga ge tlaišo yeo e hlohleleditšwego ke baruti ya go tlaiša Dihlatse tša Jehofa kua Gerika e pepentšhitšwe, mopresidente wa Gerika le bahlankedi bao ba fapa-fapanego ba mmušo ba ile ba amogela mangwalo a dikete ao a tšwago go Dihlatse tša Jehofa legatong la banababo tšona ba Bakriste. A be a e-tšwa Philippines, Australia, Amerika Leboa le Borwa le mafelong a mangwe.

Ge makasine wa Phafoga! (ka Seisemane) o be o pepentšha mekgwa ya tlaišo ya bohlanogi yeo e bego e dirišwa malebana le Dihlatse kua Sepania ka 1961, mangwalo ao a lego kgahlanong le yona a ile a fihla ka boati go balaodi ba mmušo kua Sepania. Bahlankedi ba mmušo ba ile ba makatšwa ke go lemoga gore batho go dikologa lefase ba be ba tseba gabotse seo ba bego ba se dira, ka baka leo gaešita lege tlaišo e ile ya tšwela pele, ba bangwe ba maphodisa ba ile ba thoma go dirišana le Dihlatse ka go itshwara mo gogolo. Le dinageng tše di fapa-fapanego tša Afrika, bahlankedi ba mmušo ba ile ba amogela mangwalo go tšwa go Dihlatse dikarolong tše dintši tša lefase ge di be di lemoga tshwaro e sehlogo yeo e bego e dirwa go banababo tšona le dikgaetšedi ba Bakriste moo.

Ge e ba mmušo o sa arabele ka tsela e kgahlišago, Dihlatse tšeo di tlaišwago ga di lebalwe. Ka baka la go phegelela tlaišong ya bodumedi ka nywaga e mentši, mebušo e mengwe e ile ya ngwalelwa leboelela mangwalo a boipiletšo le a go ngongorega. Go bile bjalo ka Argentina. Lebakeng le lengwe ka 1959 mongwaledi wa Tirelo ya Ditaba tša ka Ntle le tša Bodumedi o ile a iša o mongwe wa banababo rena ka phapošing moo go bego go e-na le mekotla e mentši ya dipuku yeo e tletšego mangwalo ao a bego a e-tšwa lefaseng ka moka. O be a makaditšwe ke gore motho yo a tšwago bokgoleng bja go swana le Fiji o be a ka ngwala a dira boipiletšo bja tokologo ya bodumedi kua Argentina.

Mabakeng a itšego go ile gwa newa tokologo e oketšegilego ge babuši ba be ba lemoga gore batho lefaseng ka bophara ba be ba tseba seo babuši ba bego ba se dira le gore go be go e-na le ba bantši bao ba tshwenyegago e le ka kgonthe. Go bile bjalo kua Liberia ka 1963. Mašole a mmušo a ile a swara baemedi bao ba tlilego kopanong ka sehlogo kua Gbarnga. Mopresidente wa Liberia o ile a ngwalelwa mangwalo a lego kgahlanong le seo ao a tšwago lefaseng ka moka, gomme Kgoro ya Mmušo ya U.S. ya tsena ditaba gare ka gobane moagi wa U.S. a be a akaretšwa. Mafelelong Mopresidente Tubman o ile a romela molaetša ka mogala ntlong-kgolo ya Mokgatlo wa Watch Tower a hlalosa go ikemišetša go amogela baemedi ba Dihlatse tša Jehofa go tla go boledišana ka ditaba. Ba babedi ba baemedi—Milton Henschel le John Charuk—ba be ba kile ba ya Gbarnga. Mna. Tubman o ile a dumela gore seo se bego se diregile e be e le “se sešoro” gomme a re: “Ke manyami gore selo se se bjalo se diregile.”

Ka morago ga poledišano yeo, go ile gwa ntšhwa Taelo ya Semmušo yeo e bego e tsebiša “batho nageng ka moka gore Dihlatse tša Jehofa di tla hwetša tshwanelo le tokelo ya go tsena karolong lege e le efe ya naga ka bolokologi bakeng sa go phetha modiro wa tšona wa boromiwa le borapedi bja bodumedi ka ntle le go swarwa gampe ke motho lege e le ofe. Molao o tla šireletša bobedi tšona ka noši gotee le thoto ya tšona gomme tša ba le tshwanelo ya go rapela Modimo ka bolokologi go ya kamoo matswalo a tšona a di laelago ka gona, mola ba dutše ba e-kwa melao ya Repabliki ka go hlompha folaga ya setšhaba ge e emišitšwe goba e theošitšwe ditirelong ka go ema ka go se šišinyege.” Eupja go be go sa nyakege gore di e dumediše ka go lwantšhana le matswalo a tšona a Bokriste.

Lega go le bjalo, ka 1992 boipolelo bjo bjalo bja semmušo bo be bo sa hlwa bo dirwa kua Malawi, gaešita lege bošoro malebana le Dihlatse tša Jehofa moo bo be bo fokotšegile ka tekanyo e kgolo. Dihlatse tša Jehofa moo e bile bahlaselwa ba tlaišo e šoro kudu ya bodumedi historing ya Afrika. Lephoto le lengwe la tlaišo e bjalo le ile la aparela naga ka 1967; le lengwe la thoma pejana nywageng ya bo-1970. Mangwalo a masome a dikete a ile a ngwalwa legatong la tšona a e-tšwa dikarolong ka moka tša lefase. Go ile gwa letšwa megala. Di-cablegram di ile tša romelwa. Metheong ya maikwelo a setho, batho ba bantši bao ba tumilego ba lefase ba ile ba tutueletšega go bolela.

Bošoro e be e le bjo bo feteletšego kudu mo e lego gore Dihlatse tše ka bago 19 000 tša Jehofa le bana ba tšona di ile tša tshela mollwane tša tšhabela Zambia ka 1972. Diphuthego tša kgaufsi tša Dihlatse kua Zambia di ile tša kgoboketša dijo le mapai kapejana bakeng sa banababo tšona. Tšhelete le ditlabakelo tšeo di neetšwego ke Dihlatse tša Jehofa lefaseng ka moka di ile tša tla ka bontši diofising tša lekala tša Watch Tower gomme tša romelwa go bafaladi ke ofisi ya ntlo-kgolo kua New York. Go ile gwa tla tše di fetišago bakeng sa go kgotsofatša dinyakwa tša bafaladi kampeng kua Sinda Misale. Ge ditaba tša go goroga ga dilori tšeo di rwelego dijo, diaparo le diseila bakeng sa bodulo di dutše di phatlalala kampeng ka moka, banababo rena ba Malawi ba ile ba lla ka lethabo ka baka la pontšho ye ya lerato ya banababo bona ba Bakriste.

Ge tše dingwe tša tšona di golegilwe, Dihlatse-gotee le tšona ga di di furalele gaešita lege go akaretšwa go wela ga motho ka noši kotsing. Nakong ya thibelo kua Argentina ge sehlopha sa Dihlatse se be se tswaleletšwe ka diiri tše 45, Dihlatse tše dingwe tše nne di ile tša di tlišetša dijo le diaparo gomme tšona ka noši tša golegwa. Ka 1989, eitše ge mosadi wa molebeledi wa tikologo kua Burundi a lemoga bothata bja banababo ba Bakriste a leka go ba išetša dijo kgolegong. Eupja yena ka noši o ile a golegwa gomme a tswalelelwa ka dibeke tše pedi ka gobane maphodisa a be a leka go swara monna wa gagwe.

Go okeletša go selo lege e le sefe seo di ka kgonago go se diriša ka ditsela tše ka moka, lerato la go rata banababo tšona ba Bakriste le tutuetša Dihlatse tša Jehofa go phagamiša mantšu a tšona ka go ba rapelela go Modimo. Ga di rapelele gore Modimo a emiše dintwa le tlhaelelo ya dijo gatee-tee, ka gobane Jesu Kriste o boletše dilo tše bjalo e sa le pele bakeng sa mehla ya rena. (Mat. 24:7) Le gona ga di rapelele gore Modimo a thibele tlaišo ka moka, ka gobane Beibele e bolela ka mo go kwalago gore Bakriste ba therešo ba tla tlaišwa. (Joh. 15:20; 2 Tim. 3:12) Eupja di lopa ka pelo ka moka gore banababo tšona ba Bakriste le dikgaetšedi ba matlafatšwe gore ba eme ba tiile tumelong ge ba lebeletšane le bothata lege e le bofe bjo bo ba welago. (Bapiša le Ba-Kolose 4:12.) Dipego tšeo di hlatselago matla a bona a moya di nea bohlatse bjo bogolo bja gore dithapelo tše bjalo di ile tša arabja.

[Mengwalo ya tlase]

[Seswantšho go letlakala 305]

Go hlokomelwa ga maemo ao go ona go nyakegago thušo e kgethegilego ga go tlogelwe gore go direge ka mohlolo

[Seswantšho go letlakala 307]

Thušo yeo e tlišwago ke go kgomega ga lerato ga motho ka noši

[Seswantšho go letlakala 308]

Go lebeletšana le dinyakwa tše kgolo kudu tša tlhakodišo

[Seswantšho go letlakala 312]

Go tsoma ka go se kgaotše bakeng sa go hwetša Hlatse e nngwe le e nngwe lefelong leo le wetšwego ke kotsi

[Seswantšho go letlakala 315]

Go dira botse le go bao e sego Dihlatse

[Seswantšho go letlakala 317]

Megokgo ya lethabo ka baka la lerato la banababo bona ba Bakriste

[Lepokisi go letlakala 309]

“Le Tloga le Ratana”

Ka morago ga go lebelela baithapi ba Dihlatse Lebanon yeo e sentšwego ke ntwa ba tsošološa ka mo go feletšego legae leo le sentšwego la o mongwe wa dikgaetšedi tša bona tša Bakriste, baagišani ba gagwe ba ile ba ikwa ba gapeletšega go botšiša gore: “Lerato le le tšwa kae? Le batho ba mohuta mang?” Mosadi wa mo-Moseleme, a lebeletše ge go dutše go hlwekišwa le go lokišwa legae la Hlatse o ile a bolela gore: “Le tloga le ratana. Bodumedi bja lena ke bjo bo nepagetšego.”

[Lepokisi go letlakala 316]

Banababo Rena le Dikgaetšedi ba Kgonthe

“Arkansas Gazette” e boletše mabapi le bafaladi ba Dihlatse ba ma-Cuba kua Fort Chaf­fee, Arkansas gore: “E bile ba pele-pele ba go bušetšwa ka magaeng a mafsa ka gobane ‘banababo bona le dikgaetšedi’ ba ma-Amerika—Dihlatse-gotee le bona tša Jehofa—ba ile ba ba tsoma. . . . Ge Dihlatse di bitša balekane ba tšona ba moya nageng lege e le efe gore ke ‘banababo tšona le dikgaetšedi,’ ruri di a rereša.”—Tokollo ya April 19, 1981.

[Diswantšho go letlakala 306]

Ka morago ga Ntwa ya II ya Lefase, ba ile ba romela dijo le diaparo go Dihlatse-gotee le bona tšeo di nyakago thušo dinageng tše 18

United States

Switzerland

[Seswantšho go letlakala 310]

Ka 1990 Dihlatse tša dinageng tša kgaufsi di ile tša kopanya boiteko bja tšona bakeng sa go thuša badumedi-gotee le tšona kua Romania

[Diswantšho go letlakala 311]

Dihlatse tšeo di phologilego tšhišinyego ya lefase kua Peru di ile tša aga motse wa tšona ka noši wa bafaladi gomme tša thušana

Ditlabakelo tša tlhakodišo tšeo di tlišitšwego ke Dihlatse tše dingwe (ka tlase) di be di le gare ga tša pele tšeo di fihlilego lefelong leo

[Diswantšho go letlakala 313]

Mediro ya tlhakodišo gantši e akaretša go nea dikago le baithapi bakeng sa go thuša Dihlatse-gotee go aga magae a tšona lefsa

Guatemala

Panama

Mexico

[Seswantšho go letlakala 314]

Mediro ya Dihlatse ya tlhakodišo e akaretša go aga moyeng. Bobedi kua Kalamata, Gerika le ka ntle ga motse, ditente di ile tša hlongwa kapejana bakeng sa diboka