Kgaolo 25

Go Bolela Phatlalatša le ka Ntlo le Ntlo

GE JESU KRISTE a be a roma barutiwa ba gagwe o ile a ba laela gore: “Le re ge le sepela, le bolele le re, ‘Mmušo wa magodimo o batametše.’” (Mat. 10:7, NW) Taelong ya gagwe ya boporofeta go Bakriste ba therešo bao ba bego ba tla phela bofelong bja tshepedišo ya dilo o itše: “Ditaba tše tše di lokilego tša mmušo di tla bolelwa lefaseng ka moka leo go agilwego go lona gore e be bohlatse.” (Mat. 24:14, NW) Seo se be se bolela’ng?

Se be se sa bolele gore ba be ba swanetše go aga dikereke, ba letše tšhipi gomme ba letele phuthego gore e kgobokane go tla go ba theetša ba nea thero gatee ka beke. Lediri la Segerika leo le fetoletšwego mo e le “bolela” (ke·rysʹso) ge e le gabotse le bolela “go dira kgoeletšo e le go tsebatša.” Kgopolo ga se ya go nea dithero go sehlopha se se lekanyeditšwego sa barutiwa, eupja ke go dira kgoeletšo ya bolokologi ya phatlalatša.

Jesu ka noši o beile mohlala wa kamoo se se bego se swanetše go dirwa ka gona. O ile a ya mafelong ao a bego a ka hwetša batho go ona. Lekgolong la pele la nywaga, batho ba be ba bokana ka mehla disinagogeng go ya go kwa ge Mangwalo a balwa. Jesu o ile a diriša dibaka ka mo go holago bakeng sa go bolela go bona moo, e sego motseng o tee feela eupja metseng le metsaneng Galilea le Judea ka moka. (Mat. 4:23; Luka 4:43, 44; Joh. 18:20) Gantši kudu, dipego tša Ebangedi di bontšha gore o ile a bolela lebopong la lewatle, thitong ya thaba, tseleng, metsaneng le magaeng a bao ba ilego ba mo amogela. Kae le kae mo a bego a hwetša batho, o be a bolela ka morero wa Modimo bakeng sa batho. (Luka 5:3; 6:17-49; 7:36-50; 9:11, 57-62; 10:38-42; Joh. 4:4-26, 39-42) Ge a be a roma barutiwa ba gagwe, o ile a ba laela gore ba ye magaeng a batho go ya go tsoma bao ba swanelegago le go ba nea bohlatse ka Mmušo wa Modimo.—Mat. 10:7, 11-13.

Dihlatse tša Jehofa mehleng yeno di katanetše go latela mohlala wo o beilwego ke Jesu le barutiwa ba gagwe ba lekgolong la pele la nywaga.

Go Goeletša Ditaba tša go ba Gona ga Kriste

Ge Charles Taze Russell le badirišani ba gagwe ba be ba thoma go kwešiša tsela e dumelelanago ya therešo yeo e hlalositšwego Lentšung la Modimo, ba be ba tutueditšwe kudu ke seo ba ithutilego sona ka morero le mokgwa wa maboo a Kriste. Ngwanabo rena Russell o ile a bona bohlokwa bja go tsebatša seo gotee le go akgofa ga go dira seo. O ile a rulaganya ditaba tša gagwe gore a ye mafelong ao go ona go bego go e-na le batho bao a bego a ka bolela le bona ka ditherešo tše tša Beibele. O ile a ya dibokeng tša bodumedi tša ebangedi tše di swarelwago ntle gomme a inea dibaka tša go bolela le bona go etša ge Jesu a ile a bolela disinagogeng. Eupja go se go ye kae o ile a lemoga gore go be go ka phethwa mo go oketšegilego ka ditsela tše dingwe. Go ithuta ga gagwe Mangwalo go ile gwa bontšha gore Jesu le baapostola ba gagwe ba dirile karolo e kgolo ya boboledi bja bona ge ba be ba bolela thopeng le batho ka o tee ka o tee le ge ba be ba etela ka ntlo le ntlo. O ile a lemoga gape bohlokwa bja go tiiša poledišano ka go tlogela selo seo se gatišitšwego diatleng tša batho.

Ka 1877 o be a šetše a gatišitše pukwana ya The Object and Manner of Our Lord’s Return. Nywaga e mebedi ka morago o ile a thoma go gatiša ka mehla makasine wa Zion’s Watch Tower and Herald of Christ’s Presence. Ee, morero e be e le go bolela goba go goeletša ditaba tše bohlokwa mabapi le go ba gona ga Kriste.

Pejana ka 1881, dipuku tša Barutwana ba Beibele di be di neelwa ka ntle le tefo kgaufsi le dikereke—e sego mejakong ya dikereke eupja kgaufsi le tšona e le gore batho bao ba bego ba sekametše bodumeding ba di hwetše. Bontši bja Barutwana ba Beibele ba ile ba neela dipuku tše bjalo go bao ba ba tlwaetšego goba ba di romela ka poso. Ka 1903, Morokami (wa Seisemane) o ile wa eletša gore ba katanele go fihlelela bohle ka go abja ga dipampišana ka ntlo le ntlo, go e-na le go lebiša tlhokomelo go bao ba yago kerekeng. Ga se Barutwana ka moka ba Beibele bao ba ilego ba dira se, eupja ba bantši ba ile ba arabela ka phišego kudu. Ka mohlala, go begilwe gore metseng e mentši e megolo kua United States gotee le metsaneng ya yona e lego bokgoleng bja dikhilomithara tše 16 goba go feta moo mahlakoreng ka moka, mo e nyakilego go ba ntlo e nngwe le e nngwe e be e etetšwe. Dipampišana tše dimilione goba dipukwana di ile tša abja ka tsela ye. Ka nako yeo Barutwana ba bantši ba Beibele bao ba bilego le karolo go gašeng ditaba tše di lokilego ba ile ba dira seo ka go aba dipampišana le dipuku tše dingwe ka ditsela tše di fapa-fapanego ka ntle le tefo.

Ba bangwe ba Barutwana ba Beibele—ba sego kae kudu ka palo—ba ile ba dira e le baebangedi bao e lego babapatši ba dipuku tša bodumedi, ba diriša karolo e kgolo ya nako ya bona modirong wo ka mo go feletšego.

Babapatši ba Mafolofolo ba Dipuku tša Bodumedi ba Etelela Pele

Taletšo ya pele ya banna le basadi bao ba ineetšego bao ba bego ba ka diriša tekanyo e kgolo ya nako ya bona tirelong ye e ile ya dirwa ka April 1881. Ba be ba neela beng ba dintlo le bo-rakgwebo pukwana e nyenyane yeo e hlalosago ditherešo tša Beibele gotee le peeletšo ya Morokami. Morero wa bona e be e le go tsoma bao ba swerwego ke tlala ya therešo le go abelana seetša le bona. Ka nakwana ba ile ba leka go fo bolela taba e lekanego feela bakeng sa go tutuetša kgahlego, ba tlogela legaeng le lengwe le le lengwe sephuthelwana seo se nago le dipuku gore mong wa ntlo a di hlahlobe, gomme ba boela matšatšing a sego kae. Beng ba bangwe ba dintlo ba be ba buša dipuku; ba bangwe ba be ba ka rata go di reka; gantši go be go e-ba le dibaka tša poledišano. Mabapi le morero wa bona, Morokami (wa Seisemane) o itše: “Ga se go rekišwa ga diputhelwana goba go tšewa ga dipeeletšo eupja ke go gašwa ga therešo, ka go dira batho gore ba di bale.”

Palo ya bao ba bego ba tšea karolo boebangeding bjo bja go bapatša dipuku tša bodumedi e be e le e nyenyane kudu. Nywageng e 30 ya mathomo, dipalo tša bona di be di feta-fetana go tloga go ba sego kae go ya go ba 600 goba go feta moo. Babapatši ba ba dipuku tša bodumedi e be e le babulamadibogo ka kwešišo ya kgonthe ya lentšu leo, ba thoma tšhemo e mpsha. Anna Andersen e be e le o mongwe yo a ilego a kgotlelela tirelong ye ka nywaga-some e mentši, gantši a sepela ka paesekele, gomme yena ka noši a fihlelela mo e nyakilego go ba toropo e nngwe le e nngwe kua Norway ka ditaba tše di lokilego. Babapatši ba bangwe ba dipuku tša bodumedi ba ile ba ya dinageng dišele, gomme e be e le ba pele bao ba ilego ba iša molaetša dinageng tše bjalo ka Finland, Barbados, El Salvador, Guatemala, Honduras le Burma (yeo bjale e lego Myanmar). Gape go be go e-na le ba bangwe bao ba bego ba se ba lokologa go ka hudugela mafelong a mangwe eupja e le bao ba bego ba šoma e le baebangedi bao e lego babapatši ba dipuku tša bodumedi tšhemong ya gabo bona.

Modiro wo o dirilwego ke babapatši ba dipuku tša bodumedi e be e le o mogolo kudu. O mongwe yo a bego a šoma lebopong la ka bodikela la United States o ngwadile ka 1898 gore dikgweding tše 33 tše di fetilego, o ile a sepela dikhilomithara tše 12 800 ka pere ya gagwe le karikana, a nea bohlatse ditoropong tše 72, a dira diketelo tše 18 000, a sepediša dipuku tše 4 500, a amogela dipeeletšo tše 125, a aba dipampišana tše 40 000 gomme a bona batho ba 40 ba sa amogele molaetša feela eupja gape ba thoma go o abelana le ba bangwe. Sehlopha se se bopjago ke monna le mosadi bao ba nyalanego seo se šomago kua Australia se ile sa atlega go tlogela dipuku tše 20 000 ka diatleng tša batho bao ba thabelago lebakeng la nywaga e mebedi feela le seripa.

Na go sepedišwa ga dipuku tše dintši e be e le selo seo se sa tlwaelegago? Pego ya 1909 e bontšha gore mo e ka bago babapatši ba 625 ba dipuku tša bodumedi (palo-moka ya bao ba bego ba le lelokelelong ka nako yeo) ba ile ba amogela dipuku tše di tlemilwego tše 626 981 go tšwa go Mokgatlo gore ba di sepedišetše batho ka kakaretšo (e lego palo-gare ya go feta tše sekete bakeng sa mmapatši o mongwe le o mongwe wa dipuku tša bodumedi), go oketša tekanyong e kgolo ya dipuku tšeo di sa lefelelwego. Gantši ba be ba ka se rwale dipuku tše di lekanego ge ba e-ya ka ntlo le ntlo, ka gona ba be ba tšea diotara gomme ba boela ka morago go di iša.

Lega go le bjalo, ba bangwe ba ile ba gana ka gore: “Se ga se boboledi!” Eupja ge e le gabotse go etša ge Ngwanabo rena Russell a hlalositše, e be e le boboledi bja mohuta o atlegago kudu. Go e na le go fo kwa thero e tee feela, batho ba be ba amogela dithero tše dintši tše di gatišitšwego, ka go rialo ba kgona go di thabela leboelela gomme ba hlahloba dikagare tša tšona ka Beibeleng ya bona ka noši. Bjo e be e le boebangedi bjo bo ilego bja ela hloko therešo ya gore thuto e akaretšago e hlamile batho gore ba kgone go bala. Puku ya The New Creation e hlalositše gore: “Therešo ya gore baebangedi ba ba šoma go ya ka mekgwa yeo e dumelelanago le mehla ya rena go e na le mekgwa yeo e dumelelanago le mehla e fetilego ga e ganetše modiro wo, go fo swana le ge therešo ya gore ba sepela ka dinamelwa tša malahla le tša mohlagase go e na le go sepela ka maoto goba ka dikamela e sa ganetšane. Go bolela ka ebangedi go dirwa ka go neela Therešo . . . , e lego Lentšu la Modimo.”

Kgahlego ya kgonthe ya Barutwana ba Beibele ya go kgahlegela go thuša ba bangwe e bontšhitšwe ke go dirwa ga dilo ka botlalo moo ge nako e dutše e e-ya go ilego gwa ba seka seo se hlaolago modiro wa bona wa boboledi. Morokami (wa Seisemane) wa March 1, 1917 o hlalositše lenaneo ka tsela e latelago: Sa pele, babapatši ba dipuku tša bodumedi ba be ba etela magae a lego tikologong, ba neela di-volume tša Studies in the Scriptures. Ke moka bašomi ba badišia ba be ba tla etela ba e-ya ka maina ao a ngwadilwego ke babapatši ba dipuku tša bodumedi goba ao a tlišitšwego sebokeng sa phatlalatša. Ba ile ba katanela go tutuetša kganyogo ya go bala dipuku, ba kgothaletša bao ba thabelago gore ba be gona dipolelong tšeo di rulagantšwego ka mo go kgethegilego gomme ba dira boiteko bja go rulaganya dihlopha bakeng sa thuto ya Beibele ya ba-Berea. Ge go be go kgonega, babapatši ba dipuku tša bodumedi ba be ba akaretša tikologo yeo gape gomme ka morago bašomi ba badiši ba latela bakeng sa go ikopanya le bao ba bontšhitšego kgahlego. Ka morago, bašomi ba bangwe ba sehlopha ba be ba tla etela magae ao ka molaetša wa boithapo, go etša ge ba be ba bitša dipampišana le dipuku tše dingwe tše di sa lefelelwego tšeo ba bego ba di neela. Se se ile sa dira gore go kgonege gore o mongwe le o mongwe a amogele bonyenyane selo seo se ka tutuetšago kganyogo ya go ithuta mo go oketšegilego ka morero wa Modimo.

Ge mmapatši o tee feela goba ba babedi ba dipuku tša bodumedi ba be ba šoma tikologong gomme go se na phuthego, babapatši ba dipuku tša bodumedi gantši ba be ba dira modiro wa go latelela ka noši. Ka gona ge Hermann Herkendell le mošomi-gotee le yena ba be ba e-ya Bielefeld, Jeremane e le babapatši ba dipuku tša bodumedi ka 1908, ba ile ba laelwa ka mo go kgethegilego go tlwaelanya bao ba thabelago lefelong leo le go bopa phuthego. Nywaga e sego kae ka morago, Morokami o ile wa bolela ka babapatši ba bangwe ba dipuku tša bodumedi bao ba bego ba nea tlhokomelo ya motho ka noši go batho bao ba thabelago go fihla bokgoleng bja ge ba hlomile sehlopha sa Barutwana ba Beibele toropong goba motseng o mongwe le o mongwe wo ba bego ba šoma go wona.

Go ile gwa newa thušo e bohlokwa modirong wo ka 1921 ka pukung ya The Harp of God. E rulaganyeleditšwe go hola ba bafsa ka mo go kgethegilego, puku ye mafelelong e ile ya ba le kabo ya dikopi tše 5 819 037 ka maleme a 22. Go thuša bao ba ilego ba hwetša puku ye, Mokgatlo o ile wa rulaganyetša thuto yeo e swarwago ka go ngwalelana ya thuto yeo e rulagantšwego ka dihlogo tša ditaba tša Beibele. Thuto ye e be e e-na le dipotšišo tše 12 tšeo di bego di romelwa ka lebaka la dibeke tše 12. Go dirišwa puku ye, go ile gwa dirwa le dithulaganyo tša dipoledišano tša sehlopha sa Beibele magaeng a batho bao ba thabelago. Barutwana ba bantši ba Beibele ba be ba e-ba gona ka mehla thutong e bjalo.

Lega go le bjalo, Dihlatse di be di lemoga gabotse gore tšhemo e be e le e kgolo gomme tšona di se nene ka palo.—Luka 10:2.

Go Fihlelela ba Bantši Mola di se Nene ka Palo

Morokami o ile wa hlalosa gore bao e bego e le Bakriste bao ba tloditšwego ka moya e le ka kgonthe ba be ba e-na le boikarabelo bjo ba bo neilwego ke Modimo bja go hwetša le go thuša bohle bao e bego e le Bakriste ba botegago, ba ka ba ba be ba e-ya kerekeng goba ba sa ye. (Jes. 61:1, 2) Se se be se ka dirwa bjang?

Barutwana ba Beibele ba babedi (J. C. Sunderlin le J. J. Bender) bao ba ilego ba romelwa Engelane ka 1881 ba ka be ba ile ba phetha mo gonyenyane kudu ba nnoši; eupja ka thušo ya masogana a makgolo ao a bego a lefša bakeng sa tirelo ya ona, ba ile ba kgona go aba dikopi tše 300 000 tša Food for Thinking Christians ka nakwana feela. Adolf Weber yo a ilego a boela Switzerland le ditaba tše di lokilego nywageng ya magareng ya bo-1890, o be a e-na le tšhemo e kgolo yeo e nabelago dinageng tše mmalwa yeo a bego a swanetše go bolela go yona. O be a tla e akaretša bjang ka moka? Yena ka noši o ile a ya mafelong a kgole e le mmapatši wa dipuku tša bodumedi, eupja gape o ile a tsenya diphatlalatšo tša papatšo dikuranteng le go dira dithulaganyo tša gore barekiši ba dipuku ba akaretše dipuku tša Watch Tower dikabong tša bona. Sehlopha se senyenyane sa Barutwana ba Beibele kua Jeremane ka 1907 se ile sa rulaganyetša gore dipampišana tše 4 850 000 tša matlakala a mane di romelwe gotee le dikuranta. Go se go ye kae ka morago ga ntwa ya pele ya lefase, ngwanabo rena wa Latvia yo e bego e le setho sa sehlopha sa bašomi ntlong-kgolo kua New York o ile a lefelela diphatlalatšo dikuranteng nageng yeo a belegetšwego go yona. Monna yo a ilego a arabela go e nngwe ya diphatlalatšo tšeo o ile a ba Morutwana wa pele wa Beibele kua Latvia. Lega go le bjalo, go dirišwa ga ditsela tše bjalo tša go phatlalatša ga se gwa ka gwa tšea sebaka sa go nea bohlatse ka nama le go tsoma bao ba swanelegago ka ntlo le ntlo. Go e na le moo, go ile gwa dirišetšwa go katološa kgoeletšo.

Lega go le bjalo, go be go gatišwa se se fetago diphatlalatšo tša papatšo dikuranteng. Nywageng ya go iša Ntweng ya I ya Lefase ka tlase ga tlhokomelo ya Ngwanabo rena Russell, dithero tša gagwe di be di gatišwa ka mehla. Lebakeng le lekopana, se se ile sa dirwa ka tekanyo e kgolo kudu. Dikuranta tše di fetago 2 000 gotee le dipeeletšo tše kopanego tše 15 000 000 di be di tšweletša dithero tše ka nako e swanago kua United States, Canada, Brithania, Australia le Afrika Borwa. Na go be go ka dirwa mo go oketšegilego? Ngwanabo rena Russell o be a nagana bjalo.

Ka morago ga nywaga e mebedi ya tokišetšo, pontšho ya pele ya “Photo-Drama of Creation” e ile ya bontšhwa ka January 1914. “Photo-Drama” e be e bontšhwa ka dikarolo tše nne. Lenaneo la diiri tše seswai le be le akaretša diswantšho tše di sepelago le di-slide, di bapalwa ka nako e swanago le dikgatišo tša lentšu. Ruri e be e le tšweletšo e sa tlwaelegago yeo e bego e reretšwe go aga tebogo ya go leboga Beibele le morero wa Modimo bjalo ka ge o hlalositšwe ka go yona. Dipontšho di be di rulagantšwe e le gore metse e 80 e ka kgona go bontšhwa ka letšatši le tee. Go be go dirwa phatlalatšo e sa le pele ka dikuranta, palo e kgolo ya dipampiri tša go kgomaretšwa mafasetereng le go abja ka tekanyo e kgolo ga pampišana e gatišitšwego yeo e sa lefelelwego yeo e reretšwego go tsoša kgahlego ya go kgahlegela “Photo-Drama.” Kae le kae mo e bego e bontšhwa gona, mašaba a be a e-tla go e bona. Ka ngwaga “Photo-Drama” e be e fihleletše batheetši bao ba fihlago go palo-moka ya batho ba 8 000 000 kua United States le Canada, gomme go be go begwa mašaba a mangwe a mantši kua Brithania le kontinenteng ya Yuropa gotee le Australia le New Zealand. “Photo-Drama” e ile ya latelwa ke pontšho e nngwe e kopana (yeo e se nago diswantšho tše di sepelago) bakeng sa go dirišwa ditoropong tše nyenyane le ditikologong tša naga. Drama e ile ya tšwela pele e dirišwa ka maleme a fapa-fapanego bonyenyane ka nywaga-some e mebedi. Go ile gwa tsošwa kgahlego e kgolo, gwa tlišwa maina a bao ba thabelago gomme gwa dirwa maeto a go boela.

Ka morago, nywageng ya bo-1920 go ile gwa ba le sedirišwa se sengwe sa go phatlalatša molaetša wa Mmušo ka gohle. Ngwanabo rena Rutherford o be a dumela ka go tia gore seatla sa Morena se be se bonagatšwa tšweletšong ya sedirišwa seo. E be e le eng? Radio. Nywaga ya ka tlase ga e mebedi ka morago ga ge seteišene sa pele sa lefase sa tša papatšo se thomile dikgašo tša ka mehla (ka 1920), J. F. Rutherford, mopresidente wa Mokgatlo wa Watch Tower o ile a bolela radiong bakeng sa go gaša therešo ya Beibele. Se e be e le sedirišwa seo se bego se kgona go fihlelela batho ba dimilione ka nako e tee. Nywageng e mengwe e mebedi ka 1924, Mokgatlo o be o e-na le seteišene sa wona ka noši sa radio sa WBBR seo se bego se šoma kua New York. Ka 1933, e lego ngwaga wo o dirilego histori, diteišene tše 408 di be di dirišwa bakeng sa go iša molaetša dikontinenteng tše tshelelago. Go oketša dikgašong tšeo di gašwago thwii, go be go gatišwa mananeo a lego mabapi le dihlogo tše dintši e sa le pele. Phatlalatšo e kgolo ya tikologong ka go abja ga ditsebišo tšeo di gatišitšwego e ile ya dirwa e le gore batho ba tsebe ka dikgašo le gore ba kgone go holwa ke tšona. Dikgašo tše di ile tša fediša kgethollo e kgolo le go bula mahlo a batho ba dipelo tše di botegago. Batho ba bantši ka baka la go boifa baagišani ba bona le baruti, ba ile ba phema go ya dibokeng tšeo di bego di thekgwa ke Barutwana ba Beibele, eupja se ga se sa ka sa ba thibela go theetša radio thopeng ka magaeng a bona. Dikgašo ga se tša ka tša tšea sebaka sa go nyakega ga go nea bohlatse ka ntlo le ntlo; eupja di ile tša iša therešo ya Beibele mafelong ao go bego go le thata go a fihlelela, gomme tša bula dipoledišano tše di kgahlišago ge Dihlatse di be di etela ka nama magaeng.

Boikarabelo bja o Mongwe le o Mongwe bja go Nea Bohlatse

Boikarabelo bja go ba le karolo ka nama go neeng bohlatse bo be bo ile bja hlaloswa ka go Morokami ka nywaga-some a mentši. Eupja go tloga ka 1919 go ya pele, e be e le taba yeo e ahla-ahlwago ka mehla dipukung tšeo di gatišitšwego le mananeong a kopano. Lega go le bjalo, go batho ba bantši go be go se bonolo go batamela batho bao ba sa ba tsebego mejakong ya bona, gomme mathomong e be e le palo e nyenyane feela ya Barutwana ba Beibele yeo e bego e tšea karolo ka mehla go neeng bohlatse ka ntlo le ntlo.

Go ile gwa newa kgothatšo ya Mangwalo e thabišago pelo. Sehlogo seo se tšweleditšwego ditokollong tša Morokami tša August 1 le 15, 1919 (ka Seisemane) e be e le se se rego “Ba Lehlogonolo ke ba ba sa Boifego.” Se ile sa lemoša malebana le go boifa batho, sa lebiša tlhokomelo go sebete sa bahlabani ba 300 ba Gideoni bao ba bego ba phakgame gomme ba ikemišeditše go hlankela ka tsela lege e le efe yeo Morena a bego a e laetše, le malebana le maemo ao a bego a bonala a sa fenyege, gomme sa reta go ithekga ga Elisa ka sebete ka Jehofa. (Baa. 7:1-25; 2 Dikx. 6:11-19; Die. 29:25) Ka 1921 sehlogo se se rego “E-bang le Sebete” ga se sa gatelela feela boikarabelo eupja le tokelo yeo go hlankela o le ka lehlakoreng la Morena go lego yona malebana le bahlabani ba kgopo ba lefsifsi ka go ba le karolo go direng modiro wo o boletšwego e sa le pele go Mateo 24:14. Bao maemo a bona a bego a ba thibela ba ile ba kgothaletšwa gore ba se ke ba nolega moko le gore ka nako e swanago ba se ke ba tlogela go dira seo ba bego ba ka se kgona.

Ka dipoledišano tše lebanyago tša Mangwalo, Morokami o ile wa kgonthišetša gore bohle bao ba bego ba ipolela gore ke bahlanka bao ba tloditšwego ba Modimo ba lemoga boikarabelo bja bona bja go ba bagoeledi ba Mmušo wa Modimo. Tokollo ya August 15, 1922 (ka Seisemane) e be e e-na le sehlogo seo se lebanyago se se rego “Tirelo e Bohlokwa”—ke gore, tirelo ya go ekiša Kriste, tirelo yeo e bego e tla iša motho magaeng a ba bangwe go ya go ba botša ka Mmušo wa Modimo. Ka morago ngwageng wona woo go ile gwa bontšhwa gore, gore tirelo e bjalo e be e bohlokwa mahlong a Modimo, e swanetše go tutuetšwa ke lerato. (1 Joh. 5:3) Sehlogo se se lego tokollong ya June 15, 1926 (ka Seisemane) se boletše gore Modimo ga a kgahlišwe ke borapedi bjo bo rulagantšwego le gatee; seo a se nyakago ke go kwa, gomme seo se akaretša go lemogwa ga tsela lege e le efe yeo a e dirišago bakeng sa go phetha morero wa gagwe. (1 Sam. 15:22) Ngwageng o latelago ge go be go ahla-ahlwa “Morero wa Bakriste Lefaseng,” tlhokomelo e ile ya lebišwa karolong ya Jesu e le “Hlatse ye e bôtêxaxo, Morereši” le therešong ya gore moapostola Paulo o ile a bolela “phatlalatša le ka ntlo le ntlo.”—Kut. 3:14; Dit. 20:20, NW.

Go ile gwa newa dithero tše di tletšego bakeng sa gore bagoeledi ba di sware ka hlogo ka go Bulletin, e lego letlakala la bona la thuto ya tirelo la kgwedi le kgwedi. Go ile gwa kgothaletšwa go ba le karolo tirelong ya tšhemo ka mehla bekeng e nngwe le e nngwe. Eupja palo ya bao ba bego ba nea bohlatse e le ka kgonthe ka go etela ka ntlo le ntlo e be e le e nyenyane mathomong, gomme ba bangwe bao ba ilego ba thoma ga se ba ka ba tšwela pele modirong. Ka mohlala, kua United States palo-gare ya palo ya bao go bego go begwa beke le beke gore ba tšea karolo tirelong ya tšhemo ka 1922 e be e le 2 712. Eupja ka 1924 palo e be e theogetše go 2 034. Ka 1926, palo-gare e ile ya hlatlogela go 2 261 ka tlhora ya ba 5 937 bao ba tšeago karolo bekeng e tee ya modiro o kgethegilego.

Ka morago mafelelong a 1926 Mokgatlo o ile wa thoma go kgothaletša diphuthego go akaretša karolo ya Sontaga e le nako ya go nea bohlatse ka sehlopha le go neela e sego dipampišana feela ka nako yeo eupja le dipuku tša go ithuta Beibele. Ka 1927, Morokami (wa Seisemane) o ile wa kgothaletša bao ba botegago ka diphuthegong gore ba tloše maemong a bogolo, bao polelo goba ditiro tša bona di bego di bontšha gore ga ba amogele boikarabelo bja go nea bohlatse phatlalatša le ka ntlo le ntlo. Ka gona go ka thwe dikala tšeo di bego di sa enywe di ile tša tlošwa gomme tšeo di ilego tša šala tša thenelwa e le gore di enywe dienywa tše dintši bakeng sa go tumiša Modimo. (Bapiša le papišo ya Jesu go Johane 15:1-10.) Na se ka kgonthe se ile sa feleletša ka koketšego go tumišeng Jehofa phatlalatša? Ngwageng wa 1928 go ile gwa ba le koketšego ya 53 lekgolong palo-gareng ya palo ya beke le beke ya bao ba tšeago karolo go neeng bohlatse kua United States!

Dihlatse di be di se sa hlwa di nea batho pampišana e sa lefelelwego gomme tša fetela pele. Bontši bja tšona di be di bolela le beng ba dintlo ka bokopana, di katanela go tsoša kgahlego molaetšeng wa Beibele gomme ka morago tša ba neela dipuku gore ba di bale.

Dihlatse tšeo tša pele ruri di be di e-na le sebete, gaešita lege e se ka moka ga tšona tšeo di bego di le bohlale. Lega go le bjalo, di ile tša dula di arogile go dihlopha tše dingwe tša bodumedi. Ga se tša fo bolela gore o mongwe le o mongwe o swanetše go hlatsela tumelo ya gagwe. Di be di go dira e le ka kgonthe ka dipalo tšeo di tšwelago pele di oketšega.

Dikarata tša Bohlatse le Dikeremafomo

Mafelelong a 1933 go ile gwa thongwa mokgwa o fapanego wa go bolela. Dihlatse di be di fo nea batho karata ya bohlatse yeo e bego e e-na le molaetša o mokopana gore mong wa ntlo a o bale. Ye e be e le e holago kudu go bagoeledi ba bafsa ka mo go kgethegilego, bao ba bego ba se ba tlwaetšwa kudu mehleng yeo. Ka kakaretšo, ba be ba bolela ditlhaloso tše sego kae tše kopana ka morago ga ge karata e badilwe; ba bangwe ba be ba bolela nako e telele kudu ba diriša Beibele. Go dirišwa ga dikarata tša bohlatse go tšwetše pele go fihla nywageng ya bo-1940. Go ile gwa dumelela go akaretšwa ga tšhemo ka lebelo gomme gwa dira gore Dihlatse di kgone go fihlelela batho ba bantši, go tlogela dipuku tše dintši tša bohlokwa tša Beibele diatleng tša bona, go nea bohlatse bjo bo swanago gaešita le go neela molaetša go batho bao di bego di sa kgone go bolela leleme la bona. Gape go be go tšweletša dinako tša go leša dihlong ge beng ba dintlo ba be ba tšea karata gomme ba tswalela mejako ya bona, ka gona se se dira gore go nyakege gore Hlatse e kokote gape gore e hwetše karata gape!

Dipolelo tše di gatišitšwego tša Beibele le tšona di bile le karolo e kgolo nywageng ya bo-1930 le mathomong a nywaga ya bo-1940. Ka 1934 tše dingwe tša Dihlatse di ile tša thoma go rwala keremafomo ya go šikarwa ge di be di e-ya go nea bohlatse. Motšhene wo o be o imela, ka gona di be di o bea ka koloing ya tšona goba tša o tlogela lefelong leo le swanetšego go fihlela ge di hweditše batho bao ba bego ba rata go theetša polelo yeo e gatišitšwego ya Beibele. Ka gona ka 1937 go ile gwa thongwa go dirišwa keremafomo ya go šikarwa mojakong. Mogato e be e le o bonolo: Ka morago ga go bolela gore e rwele molaetša o bohlokwa wa Beibele, Hlatse e be e tla bea nalete rekotong gomme ya e tlogela gore e bolele. Kasper Keim, e lego mmulamadibogo wa Mojeremane yo a bego a šoma kua Netherlands o be a thabetše “Arone” wa gagwe kudu, go etša ge a be a bitša keremafomo ya gagwe bjalo, ka gobane o be a hwetša go le thata go nea bohlatse ka se-Dutch. (Bapiša le Ekisodo 4:14-16.) Ka baka la go fagahla, ka dinako tše dingwe lapa ka moka le be le theetša direkoto.

Ka 1940 go be go dirišwa dikeremafomo tše di fetago 40 000. Ngwageng wona woo go ile gwa tšweletšwa mohuta o mofsa wo o hlamilwego le go agwa ke Dihlatse, gomme wa dirišwa ka mo go kgethegilego kua Dinageng tša Amerika. E ile ya tsoša go fagahla mo gogolo kudu ka gobane beng ba dintlo ba be ba sa kgone go bona rekoto ge e dutše e bapalwa. Rekoto e nngwe le e nngwe e be e le ya 78 rpm gomme e le ya botelele bja metsotso e mene le seripa. Dihlogo e be e le tše kopana le tše di lebanyago: “Mmušo,” “Thapelo,” “Tsela e yago Bophelong,” “Boraro Botee,” “Pakatori,” “Lebaka Leo ka Lona Baruti ba Ganetšago Therešo.” Dipolelo tše di fihlago go 90 di ile tša gatišwa; direkoto tše di fetago milione di ile tša dirišwa. Dithero e be e le tše di kwagalago le tšeo go lego bonolo go di kwešiša. Beng ba dintlo ba bantši ba ile ba theetša ka tebogo; ba sego kae ba ile ba arabela ka bošoro. Eupja bohlatse bjo bo atlegago le bjo bo dumelelanago bo be bo newa.

Go Kwatša Ditaba tše di Lokilego ka Sebete Mafelong a Batho Bohle

Gaešita lege dikarata tša bohlatse le direkoto tša keremafomo di be di “bolela” ka tekanyo e kgolo, go be go nyakega sebete se segolo go ba Hlatse nywageng yeo. Mohuta wa mošomo wo o be o iša Dihlatse ka e tee ka e tee pele ga batho ka kakaretšo.

Ka morago ga kopano ya 1931 kua Columbus, Ohio, Dihlatse tša Jehofa di ile tša aba pukwana ya The Kingdom, the Hope of the World yeo e bego e akaretša setlamo se se rego “Temošo e Tšwago go Jehofa” yeo e bego e lebišitšwe “Go Babuši le go Setšhaba.” Di ile tša lemoga gore ka ge e le Dihlatse tša Jehofa, di be di e-na le boikarabelo bjo bogolo bja go bolela temošo yeo e hlalositšwego Lentšung la gagwe. (Hesek. 3:17-21) Ga se tša ka tša fo romela dipukwana tšeo ka poso goba tša di šwametša ka tlase ga mabati. Di ile tša di iša ka nama. Di ile tša etela baruti ka moka, gomme go iša bokgoleng bjo bo kgonegago tša etela le bo-ra-dipolitiki, balaodi ba madira le balaodi ba mekgatlo e megolo. Go oketša moo, di ile tša etela batho ka kakaretšo dinageng tše ka bago lekgolo tšeo go tšona Dihlatse tša Jehofa di bego di nea bohlatse ka mo go rulagantšwego ka nako yeo.

Ka 1933 di be di diriša metšhene e matla ya go bapala direkoto bakeng sa go bapala dikgatišo tša dipolelo tša Beibele tšeo di lebanyago mafelong a batho bohle. Ngwanabo rena Smets le Ngwanabo rena Poelmans ba ile ba nametša ditlabakelo tša bona paesekeleng ya maotwana a mararo gomme ba ema ka thoko ga yona ge e be e dutše e goeletša molaetša mafelong a mebaraka le kgaufsi le dikereke kua Liège, Belgium. Gantši ba be ba e-ba moo diiri tše lesome ka letšatši. Batho ba kua Jamaica ba be ba tla fo kgobokana ge ba be ba e-kwa mmino, ka gona banababo rena moo ba be ba bapala mmino pele. Ge mašaba a be a kgeregela ditseleng tše kgolo a e-tšwa mafelong a dithokgwa go ya go bona seo se bego se direga, a be a tla hwetša Dihlatse tša Jehofa di neela molaetša wa Mmušo.

Tše dingwe tša didirišwa tšeo tša metšhene ya go bapala direkoto di be di tsentšwe dikoloing le diketswaneng, di e-na le digodiša-medumo ka godimo bakeng sa go dira gore modumo o fihle kgole. Bert le Vi Horton kua Australia ba be ba diriša bene yeo e nago le segodiša-modumo se segolo ka godimo, yeo e bego e ngwadilwe mantšu a rego “Molaetša wa Mmušo.” Ngwageng o mongwe ba ile ba dira mo e nyakilego go ba setarata se sengwe le se sengwe kua Melbourne gore se dume ka go pepentšhwa mo go tutuetšago maikwelo ga bodumedi bja maaka le ditlhaloso tše di thabišago pelo tša ditšhegofatšo tša Mmušo wa Modimo. Nywageng yeo Claude Goodman o be a bula madibogo kua India. Go dirišwa ga koloi yeo e nago le segodiša-modumo gotee le direkoto tše di lego ka maleme a lefelong leo go ile gwa mo dira gore a kgone go fihlelela mašaba a magolo mafelong a thekišo, diphakeng, go bapa le tsela—kae le kae mo batho ba bego ba ka hwetšwa gona.

Ge banababo rena kua Lebanon ba be ba emiša koloi ya bona yeo e nago le segodiša-modumo mmotong gomme ba gaša dipolelo, modumo o be o theogela tlase meeding. Batho bao ba lego metsaneng bao ba bego ba sa bone mo lentšu le tšwago gona ka dinako tše dingwe ba be ba tšhoga, ba nagana gore Modimo o be a bolela le bona a le magodimong!

Lega go le bjalo, go be go e-na le dinako tše sego kae tša poifo go banababo rena. Lebakeng le lengwe kua Siria, moperisita wa motsaneng o ile a tlogela dijo tša gagwe tša matena tafoleng, a topa lehlotlo la gagwe le legolo gomme a kitimela go lešaba leo le bego le kgobokanela go tlo kwa kgašo ya polelo ya Beibele go tšwa koloing yeo e nago le segodiša-modumo. A emišitše lehlotlo la gagwe ka pefelo e bile a goeletša, o ile a laela gore: “Tima! Ke go laela gore o time!” Eupja banababo rena ba ile ba lemoga gore e be e se batho ka moka bao ba bego ba dumelelana le yena; go be go e-na le bao ba nyakago go kwa. Go se go ye kae, ba bangwe ba lešaba ba ile ba kuka moperisita gomme ba mmušetša ntlong ya gagwe moo ba ilego ba mmea tafoleng ya matena gape! Go sa šetšwe kganetšo ya baruti, Dihlatse di ile tša kgonthišetša ka sebete gore batho ba hwetša sebaka sa go kwa.

Lebakeng le gape go be go dirišwa ka tekanyo e kgolo dipampiri tša go athwa tša phatlalatšo tšeo di bego di aparwa ke Dihlatse mafelong a kgwebo ge di dutše di aba ditaletšo bakeng sa dipolelo tše di kgethegilego. Se se thomile ka 1936 kua Glasgow, Scotland. Ngwageng wona woo mokgwa o swanago wa go phatlalatša o ile wa dirišwa kua London, Engelane, gomme ka morago wa dirišwa kua United States. Nywaga e mebedi ka morago phatlalatšo e bjalo e ile ya tlaleletšwa ka go rwala maswao ao a bego a phagamišetšwa godimo a hlometšwe dikoteng. Maswao a a be a goeletša gore, “Bodumedi ke Moreo le Kgwebo ya Bofora”b le “Hlankela Modimo le Kriste Kgoši.” Nakong ya kopano, molokeloke wa bagwanti bao ba rwelego maswao a e be e ka ba wa botelele bja dikhilomithara tše mmalwa. Ge ba be ba dutše ba gwanta ka setu ba šalane morago ditarateng tša leema-ema, mafelelo e be e le a swanago le a madira a Isiraele ya kgale ge a be a dikologa Jeriko pele ga ge maboto a yona a e-wa. (Još. 6:10, 15-21) Go tloga kua London, Engelane go ya Manila kua Philippines, go nea bohlatse phatlalatša mo go bjalo ka sebete go be go dirwa.

Go ile gwa dirišwa mokgwa o mongwe gape wa go nea bohlatse phatlalatša ka 1940. Ka go dumelelana le lengwalo leo le bolelago ka ‘bohlale bja kgonthe bjo bo goeletšago ditarateng,’ ka February ya ngwaga wona woo Dihlatse tša Jehofa di ile tša thoma go abja ga Morokami le Consolation (yeo bjale e tsebjago e le Phafoga!) dikhutlong tša ditarata.c (Die. 1:20, NW) Di be di goeletša meano yeo e gogelago tlhokomelo dimakasineng le molaetšeng wo di o swerego. Metseng e megolo le ditorotswaneng dikarolong ka moka tša lefase, go bona Dihlatse tša Jehofa di neela dimakasine tša tšona e bile selo se se tlwaelegilego. Eupja go dira modiro woo go be go nyaka sebete, gomme sebete se bjalo se be se nyakega kudu-kudu ge modiro wo o be o thoma ka ge e be e le mehla yeo go yona go bego go e-na le tlaišo e kgolo yeo e sepedišanago le moya wa botšhaba wa mehleng ya ntwa.

Dihlatse ge di be di biletšwa go tšea karolo go neeng bohlatse phatlalatša mo go bjalo, di ile tša arabela ka tumelo. Palo ya bao ba tšeago karolo ka noši modirong e ile ya tšwela pele e oketšega. Ba be ba go lebelela e le tokelo go bontšha potego ya bona go Jehofa ka tsela ye. Eupja go be go e-na le mo gontši mo ba swanetšego go ithuta gona.

O Mongwe le o Mongwe a Kgone go Hlalosa Tumelo ya Gagwe

Go ile gwa thoma lenaneo le le sa tlwaelegago la thuto ka 1942. Le thomile ntlong-kgolo ya lefase ya Dihlatse tša Jehofa, gomme ngwageng o latelago la thoma go dirišwa diphuthegong tša Dihlatse lefaseng ka bophara. Di holofetše gore moya wa Modimo o be o le godimo ga tšona le gore o beile lentšu la gagwe melomong ya tšona, di be di ikemišeditše go bolela lentšu leo gaešita lege batlaiši ba be ba ka di amoga dipuku tša Watch Tower goba Beibele ka boyona. (Jes. 59:21) Go be go šetše go e-na le dinaga tše bjalo ka Nigeria, moo Dihlatse di bego di e-na le Beibele feela bakeng sa go e diriša ge di bolela, ka ge mmušo o be o thibetše dipuku ka moka tša Watch Tower e bile o tšere dipuku tšeo ba bantši ba banababo rena ba bego ba e-na le tšona makgobapukung a bona ka noši.

E be e le ka February 16, 1942 ge Ngwanabo rena Knorr a be a hloma thuto e tšwetšego pele bodireding bja pušo ya Modimo Legaeng la Bethele kua Brooklyn, New York. Sekolo se ile sa nea tlhahlo ditabeng tše di swanago le nyakišišo, go itlhalosa ga motho ka mo go kwalago le ka mo go nepagetšego, go dira thulaganyo bakeng sa go neela dipolelo, go neela dipolelo ka tsela e atlegago, go hlalosa dikgopolo ka tsela e kgodišago le go ba le temogo. Bobedi banababo rena le dikgaetšedi ba be ba dumelelwa go ba gona, eupja e be e le banna feela ba ba bego ba laleletšwa go ngwadiša gomme ba neele dipolelo tša barutwana tšeo go tšona ba bego ba tla newa keletšo. Kapejana mehola e ile ya bonala e sego feela go boleleng sethaleng eupja gape le go atlegeng kudu boboleding bja ntlo le ntlo.

Ngwageng o latelago sekolo se se ile sa thoma go katološetšwa diphuthegong tša Dihlatse tša Jehofa lefaseng ka bophara. Mathomong se be se le ka Seisemane, ka morago sa ba ka maleme a mangwe. Morero o boletšwego wa sekolo e be e le go thuša o mongwe le o mongwe wa Dihlatse tša Jehofa go kgona go ruta ba bangwe ge a be a etela batho ka ntlo le ntlo, a dira maeto a go boela le go swara dithuto tša Beibele. Hlatse e nngwe le e nngwe e be e tla thušwa go ba modiredi yo a swanelegago. (2 Tim. 2:2) Ka 1959, dikgaetšedi le tšona di ile tša newa sebaka sa go ngwadiša sekolong le go nea dipolelo ka dikago tša polelo tša tirelong ya tšhemo—di sa bolele le batheetši ka moka, go e na le moo di bolela le motho yo a abetšwego go tšea karolo ya mong wa ntlo. Le gona go be go sa felele moo.

Ga e sa le go tloga ka 1926, baemedi ba basepedi ba Mokgatlo ba be ba dutše ba šoma le Dihlatse ka e tee ka e tee tirelong ya tšhemo bakeng sa go di thuša go kaonefatša bokgoni bja tšona. Lega go le bjalo, kopanong ya ditšhaba-tšhaba kua New York ka 1953, balebeledi ba tikologo le ba selete ba dutše ka pele ga sethala, Ngwanabo rena Knorr o ile a hlalosa gore modiro o mogolo wa bahlanka ka moka goba balebeledi, e swanetše go ba go thuša Hlatse e nngwe le e nngwe gore e be modiredi wa ntlo le ntlo wa ka mehla. O itše, “O mongwe le o mongwe o swanetše go kgona go bolela ditaba tše di lokilego ka ntlo le ntlo.” Go ile gwa thongwa lesolo la lefase ka moka bakeng sa go phetha se.

Ke ka baka la’ng taba ye e be e gatelelwa gakaakaa? Ela hloko United States e le mohlala: Nakong yeo 28 lekgolong ya Dihlatse e be e lekanetša modiro wa yona feela go abeng dipampišana goba go ema ditarateng ka dimakasine. Le gona Dihlatse tša ka godimo ga 40 lekgolong di be di tšea karolo tirelong ya tšhemo ka sewelo feela, di fetiša dikgwedi ka ntle le go nea bohlatse le gatee. Go be go nyakega thušo e lerato ka sebopego sa tlwaetšo ya motho ka noši. Go ile gwa dirwa dithulaganyo tšeo di bego di tla dira gore go kgonege gore Dihlatse ka moka tša Jehofa tšeo e bego e se ya hlwa e e-ba Dihlatse tša ka ntlo le ntlo di newe thušo tabeng ya go batamela batho mejakong ya bona, di bolele le bona ka Beibele le go araba dipotšišo tša bona. Di be di tla ithuta go lokišetša dithero tša Mangwalo tšeo di bego di tla tšea mohlomongwe metsotso e meraro bakeng sa batho bao ba bego ba swaregile, goba mo e ka bago metsotso e seswai bakeng sa ba bangwe. Morero e be e le go thuša Hlatse e nngwe le e nngwe go ba moebangedi yo a gotšego ka tsebo wa Mokriste.

E be e se balebeledi ba basepedi feela bao ba ilego ba nea tlhahlo ye. Bahlanka ba tikologong goba balebeledi le bona ba ile ba e nea; gomme nywageng e latetšego Dihlatse tše dingwe tše di swanelegago gabotse di ile tša abelwa go tlwaetša batho ba itšego. Ka nywaga e mentši go be go newa dipontšho mabapi le kamoo modiro o ka dirwago ka gona Sebokeng sa Tirelo sa beke le beke sa phuthego. Eupja bjale se se be se sepedišana le go gatelelwa mo go oketšegilego ga tlwaetšo ya motho ka noši tšhemong.

Mafelelo e be e le a kgahlišago kudu. Palo ya Dihlatse tšeo di bolelago ka ntlo le ntlo e ile ya oketšega go etša palo ya bao ba bego ba tšea karolo ka mehla bodireding bja tšhemo. Nywageng e lesome feela, palo-moka ya Dihlatse lefaseng ka bophara e ile ya hlatlogela go 100 lekgolong. Gape di be di dira maeto a mangwe a go boela a 126 lekgolong bakeng sa go yo arabela batho bao ba thabelago dipotšišo tša Beibele, gomme di be di swara dithuto tše 150 lekgolong tša ka mehla tša magae tša Beibele le bao ba bego ba bontšha go swarwa ke tlala ya therešo ya Beibele. Ruri di be di ipontšha e le badiredi bao ba swanelegago.

Ka baka la ditšo tše di fapa-fapanego tša thuto le tša setlogo tšeo Dihlatse tše di bego di e-tšwa go tšona, le therešo ya gore di be di phatlaletše dihlopheng tše nyenyane lefaseng ka moka, lebaka leo ka lona Dihlatse di neago Jehofa Modimo theto go e na le motho bakeng sa tsela yeo di ilego tša hlangwa le go tlwaetšwa ka yona go goeletša ditaba tše di lokilego le molaleng.—Joh. 14:15-17.

Boboledi bja Ntlo le Ntlo —Leswao Leo le Hlaolago

Dihlopha tše dingwe tša bodumedi di be di kgothaletša ditho tša tšona ka dinako tše di sa swanego go etela magaeng a batho setšhabeng sa gabo tšona bakeng sa go bolela ka bodumedi. Batho ba bangwe ba ile ba go leka. Ba bangwe ba be ba bile ba ka dira seo e le baromiwa ka nywaga e mmalwa, eupja go felela moo. Lega go le bjalo, ke feela gare ga Dihlatse tša Jehofa moo bohle, ba banyenyane le ba bagolo, banna le basadi, ba tšeago karolo ngwageng o mongwe le o mongwe bodireding bja ntlo le ntlo. Ke Dihlatse tša Jehofa feela tšeo di katanelago e le ka kgonthe go fihlelela lefase ka moka leo go agilwego go lona ka molaetša wa Mmušo, ka go kwa taelo ya boporofeta e lego go Mateo 24:14.

Ga se gore Dihlatse tša Jehofa ka moka di hwetša modiro wo o le bonolo.d Ka mo go fapanego, bontši bja tšona ge di be di thoma go ithuta Beibele la mathomo di ile tša re: ‘Go na le selo se tee seo nka se tsogego ke se dirile gomme seo ke go ya ka ntlo le ntlo!’ Lega go le bjalo, ke modiro woo mo e nyakilego go ba o mongwe le o mongwe wa Dihlatse tša Jehofa a tšeago karolo go wona ge e ba a phetše gabotse go ka dira bjalo. Le gona tše dintši tšeo di sa phelago gabotse mmeleng di a o dira lega go le bjalo—di sepela ka ditulo tša digole, ka dikota, bjalo bjalo. Tše dingwe—tšeo di tlogago di sa kgone go tloga magae a tšona, goba di thibeletšwe ka nakwana, goba e le gore di fihlelele batho bao ka ntle le moo ba ka se kego ba fihlelelwa—di nea bohlatse ka mogala goba ka go ngwala mangwalo. Ke ka baka la’ng di dira boiteko bjo bja boikemišetšo?

Ge di thoma go tseba Jehofa, lerato la tšona la go mo rata le fetoša pono ya tšona ka moka ka bophelo. Di nyaka go bolela ka yena. Dilo tše di kgahlišago tšeo a di boloketšego bao ba mo ratago ke tše botse kudu gore di ka ipolokela tšona. Di ikwa di e-na le boikarabelo pele ga Modimo bja go lemoša batho ka masetla-pelo a magolo ao a tlago. (Mat. 24:21; bapiša le Hesekiele 3:17-19.) Eupja ke ka baka la’ng di go dira ka go ya ka ntlo le ntlo?

Di a tseba gore Jesu o ile a ya magaeng a batho go ya go bolela le go ruta. (Mat. 10:11-14) Di lemoga gore ka morago ga ge moya o mokgethwa o tšholotšwe ka Pentekoste ya 33 C.E., baapostola ba ile ba tšwela pele go tsebatša ditaba tše di lokilego ka ntle le go kgaotša “ntlong-kxêthwa [Jerusalema] le mo malapeng.” (Dit. 5:42) Hlatse e nngwe le e nngwe e tseba Ditiro 20:20 (NW) yeo e bolelago gore moapostola Paulo o ile a ruta “phatlalatša le ka ntlo le ntlo.” Le gona di bona bohlatse bjo bontši bja tšhegofatšo ya Jehofa modirong wo wa mehleng yeno. Ka gona ge di dutše di hwetša phihlelo bodireding bja ntlo le ntlo, modiro wo di kilego tša o boifa gantši o ba selo seo di se fagahlelago ka phišego.

Le gona di o dira ka mo go tletšego. Di boloka dipego tše di etšwego hloko e le gore di ka boela gape go ya go bolela le batho lege e le bafe bao ba bego ba se gona gae. Ga se seo feela, eupja di etela leboelela legaeng le lengwe le le lengwe.

Ka baka la go atlega ga bodiredi bja ntlo le ntlo, baganetši dinageng tše dintši ba ile ba leka go o thibela. E le gore di hwetše tlhompho ya molao bakeng sa tshwanelo ya tšona ya go bolela ka ntlo le ntlo, Dihlatse tša Jehofa di ile tša dira boipiletšo go bahlankedi ba mmušo. Mo go nyakegago, di ile tša ya kgorong ya tsheko bakeng sa go hloma ka molao tshwanelo ya go gaša ditaba tše di lokilego ka mokgwa wo. (Ba-Fil. 1:7, NW) Moo mebušo yeo e gatelelago e ilego ya phegelela go ganetšeng modiro o bjalo, Dihlatse tša Jehofa ka dinako tše dingwe di ile tša fo o dira ka tsela e sa lemogegego kudu, goba ge e ba go nyakega, tša diriša ditsela tše dingwe bakeng sa go fihlelela batho ka molaetša wa Mmušo.

Gaešita lege dikgašo tša radio le thelebišene di be di dutše di dirišwa go gaša molaetša wa Mmušo, Dihlatse tša Jehofa di lemoga gore go kopana ga motho ka noši mo go dirwago gore go kgonege ka diketelo tša ntlo le ntlo ke mo go atlegago kudu. Go nea sebaka se kaone kudu sa go araba dipotšišo tša beng ba dintlo ka o tee le o tee le go tsoma bao ba swanelegago. (Mat. 10:11) Leo ke le lengwe la mabaka ao ka ona ka 1957, Mokgatlo wa Watch Tower o ilego wa rekiša seteišene sa radio sa WBBR kua New York.

Lega go le bjalo, ka morago ga ge Dihlatse tša Jehofa di neile bohlatse ka botšona, ga di nagane gore modiro wa tšona o phethilwe. Ke mathomo-mayo feela.

‘Le Dire Barutiwa . . . le ba Rute’

Jesu o laetše balatedi ba gagwe gore ba dire se se fetago go bolela. Ka go ekiša yena, le bona ba swanetše go ruta. (Mat. 11:1) Pele ga ge a rotogela legodimong, o ile a ba laela gore: “Ké xôna yang Le dirê dithšaba ka moka barutiwa, . . . le ka xo ba ruta xo boloka tšohle tše ke Le laetšexo tšôna.” (Mat. 28:19, 20) Go ruta (Segerika, di·daʹsko) go fapana le go bolela ka kgopolo ya gore morutiši o dira se se fetago go goeletša; o a ruta, a hlalosa le go nea bohlatse.

Pejana ka April 1881, Morokami (wa Seisemane) o ile wa nea ditšhišinyo tše kopana mabapi le kamoo go ka rutwago ka gona. Ba bangwe ba babapatši ba dipuku tša bodumedi ba pele ba ile ba kgonthišetša gore ba boela go bao ba bontšhitšego kgahlego, go ya go ba kgothaletša go bala dipuku tša Mokgatlo le go kopana le ba bangwe bakeng sa thuto ya ka mehla ya Lentšu la Modimo. Puku ya The Harp of God (yeo e gatišitšwego ka 1921) gantši e be e dirišetšwa morero woo. Lega go le bjalo, ka morago ga moo go ile gwa dirwa mo go oketšegilego kudu ka tsela ya go nea tlhokomelo ya motho ka noši go batho bao ba thabelago. Dipolelo tšeo di gatišitšwego tša Beibele gotee le tlhahlo e gatišitšwego ya thuto di be di dirišwa kudu modirong wo. Seo se ile sa tšwelela bjang?

Ga e sa le go tloga mathomong a 1933, Mokgatlo o be o tlaleleditše dikgašo tša wona tša radio ka direkoto tšeo di bapalwago motšheneng wa go šikarwa wa go bapala direkoto diholong tša diboka, diphakeng, dikgorong tša difeketori, bjalo bjalo. Lebakeng le lekopana, Dihlatse tšeo di bego di hweditše batho bao ba thabelago ge di be di etela ka ntlo le ntlo di ile tša dira ditokišetšo tša go boela go ya go ba bapalela direkoto tše magaeng a bona. Ge puku ya Riches e be e hwetšagala ka 1936, go ile gwa dirišwa ditlhaloso tšeo di tšwago go yona ka morago ga dikgatišo, bakeng sa go hloma dithuto tšeo go tšona go bego go tla tla batho bao ba thabelago bao ba lego lefelong leo. Modiro wo o ile wa gatelelwa ka mo go kgethegilego ka morero wa go thuša bao ba lebeletšwego go ba ditho tša “lešaba le lexolo” gore ba ithute therešo.—Kut. 7:9.

Mo e nyakilego go ba ka nako yeo, sehlopha sa pušo ya baruti sa Katholika se ile ya oketša kgateletšo ya sona go beng le balaodi ba diteišene tša radio gotee le makgotla a mmušo boitekong bja boikemišetšo bja go thibela mananeo a kgašo a Watch Tower. Kgopelo yeo e saenetšwego ke batho ba 2 630 000 kua United States e ile ya kgopela ngangišano ya phatlalatša magareng ga J. F. Rutherford le mohlankedi yo a phagamego wa Kereke ya Roma Katholika. Ga go le o tee wa baruti ba Katholika yo a bego a ikemišeditše go amogela tlhohlo yeo. Ka gona ka 1937, Ngwanabo rena Rutherford o ile a dira dikgatišo tšeo di nago le dihlogo tše di rego “Ba Pepentšhitšwe” le “Bodumedi le Bokriste,” tšeo di ilego tša nea dithuto tša motheo tša Beibele, kudu-kudu ka go ganetša dithuto tša motheo tša Katholika tšeo e sego tša mangwalo. Taba e swanago e ile ya gatišwa ka dipukwaneng tša Protection le Uncovered gomme kopi ya Uncovered ya išwa ka nama go o mongwe le o mongwe yo a saenetšego topo e le gore batho ba ipalela ka noši ditherešo tša Beibele tšeo sehlopha sa pušo ya baruti sa Katholika se bego se tsoma go di khupetša.

Gore go thušwe batho go lemoga dikgang gabotse le go hlahloba go ba ga tšona tšeo di theilwego Mangwalong, pukwana ya Model Study No. 1 e ile ya gatišwa bakeng sa go dirišwa dibokeng tšeo di rulaganyeditšwego batho bao ba thabelago. Pukwana e be e e-na le dipotšišo, dikarabo le mangwalo a go thekga dikarabo tšeo di neilwego. Sa pele, moswari wa thuto o be a tla bapala e tee goba go feta moo ya di-disc tša dipolelo tše di gatišitšwego tše di boletšwego ka mo godimo e le gore o mongwe le o mongwe a kwe polelo ka moka. Ka morago go be go tla latela poledišano go dirišwa taba yeo e neilwego ka pukwaneng ya Model Study le go hlahloba mangwalo ka boona. Model Study No. 1 e ile ya latelwa ke No. 2 le No. 3 tšeo di kopantšwego le dipolelo tše dingwe tše di gatišitšwego. Dithuto tše bjalo di ile tša rulaganywa la mathomo mafelong ao go ona go bego go ka kgobokana dihlopha tša batho bao ba thabelago, eupja go se go ye kae di be di swarwa le batho ka o tee ka o tee le malapa.

Ga e sa le go tloga ka nako yeo go be go dutše go newa dipuku tše dintši tše di kgahlišago kudu bakeng sa go dirišwa kudu-kudu ke Dihlatse tša Jehofa ge di swere dithuto tša magae tša Beibele. Tšeo di bego di abja ka tekanyo e kgolo e be e le “Let God Be True,” Therešo ye Išago Bophelong bjo bo sa Felego le O ka Phela ka mo go sa Felego Paradeiseng mo Lefaseng. Gape go be go e-na le dipukwana tša matlakala a 32—“Ditaba tše tše di Lokilego tša Mmušo,” God’s Way Is Love, ‘Bonang, Dilo ka Moka ke di Dira tše Mpsha’ le tše dingwe tše dintši. Tše di ile tša latelwa ke dipukwana tše di swanago le Thabela Bophelo Lefaseng ka mo go sa Felego! yeo e nago le tlhaloso e bonolo kudu le yeo go lego bonolo go e kwešiša ya dithuto tša motheo tša Beibele.

Go dirišwa ga didirišwa tše gotee le tlwaetšo e tseneletšego ya phuthego le ya motho ka noši go feleleditše ka koketšego e kgolo kudu palong ya dithuto tša magae tša Beibele tšeo di swarwago. Ka 1950, dithuto tša magae tša Beibele tšeo gantši di bego di swarwa bekeng e nngwe le e nngwe di ile tša fihlelela palo-gare ya 234 952. Dithuto tšeo di bego di sa tšwele pele ka mo go kgotsofatšago di be di kgaotšwa. Barutwana ba bantši ba ile ba tšwela pele go fihla moo bona ka noši ba ilego ba ba barutiši. Go sa šetšwe go fetoga ga ka mehla, palo e tšwetše pele e gola, gantši e oketšega ka lebelo. Ka 1992, Dihlatse di be di swara dithuto tše 4 278 127 tša magae tša Beibele lefaseng ka bophara.

Gore go phethwe modiro wo o mogolo wa go bolela le go ruta ka maleme ka moka ao a lego gona lefaseng, Dihlatse tša Jehofa di ile tša diriša dipuku tše di gatišitšwego ka tekanyo e kgolo. Se se ile sa nyaka mediro e megolo kudu ya go gatiša.

[Mengwalo ya tlase]

[Seswantšho go letlakala 556]

Kae le kae mo a bego a hwetša batho, Jesu o be a bolela ka morero wa Modimo bakeng sa batho

[Lepokisi go letlakala 559]

Tšhegofatšo e Kgethegilego Modirong wa Ntlo le Ntlo

“Go swana le go tleng ga gagwe la mathomo, modiro wa ntlo le ntlo go e na le go bolela phuluphiting, o bonala o šegofatšwa ke Morena ka mo go kgethegilego.”​—“Morokami” (wa Seisemane) wa July 15, 1892.

[Lepokisi go letlakala 570]

Lebaka Leo ka Lona Dihlatse di Etelago Leboelela

Ge o be o hlalosa lebaka leo ka lona Dihlatse tša Jehofa di etelago leboelela legaeng le lengwe le le lengwe, “Morokami” (wa Seisemane) wa July 1, 1962 o itše: “Maemo a tšwela pele go fetoga. Lehono motho a ka fo se be gona gae, nakong e tlago a ka ba gona. Lehono a ka ba a swaregile kudu go ka theetša, eupja nakong e tlago a ka ba a se a swarega. Lehono setho se tee sa lapa se araba mojakong, nakong e tlago go araba setho se sengwe; gomme Dihlatse di tshwenyegile ka go fihlelela e sego feela legae le lengwe le le lengwe dikabelong tša tšona eupja gape ge e ba go kgonega, motho o mongwe le o mongwe yo a gotšego monaganong legaeng le lengwe le le lengwe. Gantši malapa a arogane ka bodumedi, ka gona ga se ka mehla go kgonegago gore setho se tee se bolelele lapa ka moka. Ka ntle le moo batho ba dula ba huduga, ka gona Dihlatse le ka mohla di ka se ke tša kgodišega ka yo di tlago go mo hwetša mojakong o itšego.

“Ga se feela gore maemo a a fetoga, eupja batho ka bobona ba a fetoga. . . . Ka baka la tabanyana e nyenyane feela motho a ka fo ba a be a sa thaba gomme a tloga a sa rate go bolela ka bodumedi goba selo lege e le sefe go sa šetšwe yo a tlilego mojakong wa gagwe, eupja ga se phetho e bohlale go nagana gore o tla ba le kgopolo yeo nakong e nngwe. Goba, ka gobane motho a be a sa thabele le gatee go bolela ka bodumedi kgweding e fetilego ga go bolele gore a ka se ke a thabela go bolela ka bjona kgweding ye. Ga e sa le go tloga nakong e fetilego ge Hlatse e be e etetše, motho yo a ka ba a ile a ba le phihlelo e nyamišago ka mo go feteletšego goba a lemoga selo se sengwe seo ka tsela e itšego se ilego sa mo dira gore a ikokobetše go e na le go ikgogomoša, a swarwe ke tlala le go lemoga senyakwa sa gagwe sa moya go e na le go ba yo a kgotsofetšego.

“Ka ntle le moo, molaetša wo Dihlatse di o tlišago o kwagala o sa tlwaelega go batho ba bantši gomme ba palelwa ke go lemoga go akgofa ga wona. Ke feela ka go o kwa leboelela moo ba ka o kwešišago ganyenyane-ganyenyane.”

Lepokisi/Picture on page 574]

Go Diriša “Tsela e Nngwe le e Nngwe e Kgonegago”

“Rena bao re lego ka gare ga mokgatlo wa Morena re lekile ka tsela e nngwe le e nngwe e kgonegago go lebiša tlhokomelo [ya lefase] molaetšeng wa bophelo. Re dirišitše meano, diphatlalatšo tša papatšo tše di tletšego letlakala, radio, dikoloi tše di nago le digodiša-modumo, dikeremafomo tša go šikarwa, dikopano tše kgolo, megwanto ya bagwanti bao ba rwelego maswao le lešaba leo le golago la badiredi ba ntlo le ntlo. Modiro wo o thušitše go aroganya batho​—bao ba ratago Mmušo o hlomilwego wa Modimo ka lehlakoreng le lengwe, bao ba o lwantšhago ka go le lengwe. Wo e be e le modiro wo o boletšwego e sa le pele ke Jesu bakeng sa moloko wa-ka.”—E ngwadilwe ka 1987 ke Melvin Sargent a e-na le nywaga e 91.

[Picture]

Melvin Sargent

[Graph on page 574]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Koketšego ya Dithuto tša Magae tša Beibele

4 000 000

3 000 000

2 000 000

1 000 000

1950 1960 1970 1980 1992

[Diswantšho go letlakala 557]

Dimilione tše masome tša dipampišana tše di ile tša abja ka ntle le tefo kgaufsi le dikereke, ka ntlo le ntlo le ka poso

[Diswantšho go letlakala 558]

Baebangedi bao e lego babapatši ba dipuku tša bodumedi ba ile ba aba dipuku tše di hlalosago Beibele

[Seswantšho go letlakala 559]

Anna Andersen o ile a fihlelela mo e nyakilego go ba toropo e nngwe le e nngwe kua Norway ka dipuku tša Beibele

[Seswantšho go letlakala 560]

Diphatlalatšo tša kuranta di thušitše go fihlelela batho bao ba bego ba sa fihlelelwe ka ditsela tše dingwe

[Seswantšho go letlakala 561]

Dikuranta tše di fetago 2 000 dikontinenteng tše nne di ile tša fetiša dithero tša Ngwanabo rena Russell ka nako e swanago

[Diswantšho go letlakala 562]

“Photo-Drama of Creation” e ile ya nea bohlatse bjo matla go batho ba dimilione dinageng tše dintši

[Seswantšho go letlakala 563]

Ka radio, J. F. Rutherford o ile a kgona go nea bohlatse go batho ba dimilione lefaseng ka bophara ka magaeng a bona

[Seswantšho go letlakala 564]

Ba ikemišeditše go sepela ka paesekele go ya go nea bohlatse ka sehlopha kua Engelane

[Seswantšho go letlakala 565]

Go tloga ka 1933, go be go dirišwa dikarata tše di gatišitšwego tša bohlatse

[Seswantšho go letlakala 566]

Dipolelo tšeo di gatišitšwego tša Beibele di ile tša nea bohlatse bjo matla nywageng ya bo-1930 le ya bo-1940

[Seswantšho go letlakala 567]

Dikoloi tšeo di nago le digodiša-modumo, ka dinako tše dingwe tše dintši tša tšona (go etša mo Australia) di be di dirišwa bakeng sa go gaša therešo ya Beibele mafelong a batho bohle

[Seswantšho go letlakala 568]

Maswao ao a hlabišeditšwego seetša mafasetereng a magae a Dihlatse tša Jehofa a ile a nea bohlatse ka dinako tšohle

[Seswantšho go letlakala 568]

Dipampiri tša go athwa tša phatlalatšo le maswao di bile le karolo bohlatseng bja sebete bja phatlalatša (go etša mo Scotland)

[Seswantšho go letlakala 569]

Go abja ga “Morokami” le “Consolation” setarateng (go etša ge go bontšhitšwe mo U.S.A.) go thomile ka 1940

[Seswantšho go letlakala 569]

Go tloga ka 1943, banababo rena ka diphuthegong ba ile ba newa tlwaetšo ya go bolela phatlalatša

[Diswantšho go letlakala 571]

Dithuto tša magae tša Beibele di swarwa le batho bao ba thabelago. Ka mo tlase ke dipuku tšeo di reretšwego seo ka mo go kgethegilego—di gatišitšwe pele ka Seisemane, ka morago tša gatišwa ka maleme a mangwe a mantši

[Diswantšho go letlakala 572, 573]

Dihlatse tša ba banyenyane le ba bagolo, banna le basadi lefaseng ka moka di tšea karolo go neeng bohlatse ka ntlo le ntlo

Romania

Bolivia

Zimbabwe

Hong Kong

Belgium

Uruguay

Fiji