Kgaolo ya Bone

Ntlo ya Jehofa e Phagamišitšwe

Jesaya 2:1-5

1, 2. Ke mantšu afe ao a ngwadilwego lebotong la lefelo la Ditšhaba tše Kopanego, gona mothopo wa ona ke ofe?

“BA TLO tšea ditšhoša ba rula megoma ka tšona. Gomme marumo a bona ba rula magwetla: go ka se be le setšhaba se se tlago go tšwela se sengwe lerumo. Ba tlo lesa go ithuta go hlabana.” Mantšu a a ngwadilwe lebotong la lefelo la Ditšhaba tše Kopanego New York City. Ka nywaga-some e mentši mothopo wa tsopolo yeo o be o sa tsebje. Ka ge maikemišetšo a UN e le go tliša khutšo ya lefase ka bophara, go be go le bonolo go phetha ka gore tsopolo e tšwa go bathei ba UN ka 1945.

² Lega go le bjalo, ka 1975 leina Jesaya le ile la betlwa lebotong ka tlase ga tsopolo. Ke ka nako yeo moo go ilego gwa bonala gore mantšu e be e se a mehleng yeno. Ge e le gabotse, a be a ngwadilwe e le boporofeta nywageng e fetago 2 700 e fetilego go seo bjale e lego kgaolo ya bo-2 ya puku ya Jesaya. Barati ba khutšo ba ile ba naganišiša ka nywaga e dikete ka tsela le nako yeo dilo tšeo Jesaya a di boletšego e sa pele di tlago go direga ka yona. Ga go sa nyakega gore re ipotšiše. Lehono ka pele ga rena re bona phethagalo e lemogegago ya boporofeta bjo bja kgale.

3. Ditšhaba tšeo di rulago megoma ka ditšhoša tša tšona ke dife?

³ Ditšhaba tšeo di rulago megoma ka ditšhoša ke dife? Ruri, ga se ditšhaba tša mehleng yeno tša dipolitiki le mebušo. Go fihla mo nakong ye ditšhaba tše di rutše ditšhoša goba dibetša tša go lwa le go šireletša “khutšo” ka matla. Ge e le gabotse, tshekamelo ya ditšhaba ka mehla e bile ya go rula ditšhoša ka megoma ya tšona! Boporofeta bja Jesaya bo phethagala go baemedi ba tšwago ditšhabeng ka moka, e lego batho bao ba rapelago Jehofa “Modimo wa khutšô.”​—Ba-Filipi 4:9.

Ditšhaba Tšeo di Kgeregelago Borapeding bjo bo Sekilego

4, 5. Ditemana tša mathomo tša Jesaya kgaolo 2 di bolela eng e sa le pele, gona ke’ng seo se gatelelago go botega ga mantšu ao?

⁴ Jesaya kgaolo 2 e thoma ka mantšu a: “Šé taba ye Jesaya morwa wa Amotsi, a e bonexo è nêpa Juda le Jerusalêma. Bofelong bya mabaka thaba ya Ntlo ya Morêna e tlo ba e thekxilwe xodimo xa dithaba, è beilwe xodimo xa meboto; ’me dithšaba tšohle di tlo thšoloxêla mo xo yôna.”​—Jesaya 2:1, 2.

⁵ Hlokomela gore seo Jesaya a se bolelago e sa le pele ga se kakanyo feela. Jesaya o laetšwe go bega ditiragalo tšeo “di swanetšego go direga”​—ka ntle le go palelwa. Selo le ge e le sefe seo Jehofa a se rerago se ‘tla phethega.’ (Jesaya 55:11) E le go gatelela go botega ga kholofetšo ya gagwe, Modimo o ile a budulela moporofeta Mika yo a phetšego mehleng ya Jesaya go ngwala ka pukung ya gagwe boporofeta bjo bo swanago le bjo bo ngwadilwego go Jesaya 2:2-4.​—Mika 4:1-3.

6. Boporofeta bja Jesaya bo phethagala neng?

⁶ Boporofeta bja Jesaya bo swanetše go phethagatšwa neng? “Bofelong bya mabaka.” New International Version e balega ka gore: “Mehleng ya bofelo.” Mangwalo a Bakriste a Segerika a boletše e sa le pele dibopego tšeo di bego di tla hlaola nako ye. Gare ga tšona go akareditšwe dintwa, ditšhišinyego tša lefase, mauba a malwetši, tlhaelelo ya dijo, le “dinako tše di hlobaetšago tšeo go lego thata go lebeletšana le tšona.”a (2 Timotheo 3:1-5, bapiša le NW; Luka 21:10, 11.) Phethagalo ya diporofeto tše bjalo e nea bohlatse bjo bontši bja gore re phela “bofelong bya mabaka,” e lego mehleng ya bofelo ya tshepedišo ye ya gona bjale ya lefase. Ka gona, ke mo go kwagalago gore re letele go bona dilo tšeo Jesaya a di boletšego e sa le pele di phethagala mehleng ya rena.

Thaba Yeo go Swanetšwego go Rapelwa go Yona

7. Jesaya o nea seswantšho sefe sa boporofeta?

⁷ Jesaya o nea seswantšho se se kwagalago sa boporofeta ka mantšu a sego kae. Re bona thaba e telele e e-na le ntlo ya letago tlhoreng ya yona, e lego tempele ya Jehofa. Thaba ye e phagametše dithaba le meboto tše di e dikologilego. Lega go le bjalo, ga e hlole bobe goba go boifiša; ke e ipiletšago. Batho ba ditšhaba ka moka ba hlologelwa go rotogela thabeng ya ntlo ya Jehofa; ba kgeregela go yona. Go bonolo go bona se ka leihlo la monagano, eupša se bolela’ng?

8. (a) Meboto le dithaba di tswalanywa le eng mehleng ya Jesaya? (b) Go kgeregela ga ditšhaba ‘thabeng ya ntlo ya Jehofa’ go swantšhetša’ng?

⁸ Mehleng ya Jesaya meboto le dithaba gantši di tswalanywa le borapedi. Ka mohlala, di dira e le mafelo a borapedi bja diswantšho le mafelo a makgethwa a medimo ya maaka. (Doiteronomio 12:2; Jeremia 3:6) Lega go le bjalo, ntlo goba tempele ya Jehofa e kgabiša tlhora ya Thaba ya Moria Jerusalema. Ba-Isiraele ba botegago ba etela Jerusalema ka makga a mararo ka ngwaga le go namela Thaba ya Moria go ya go rapela Modimo wa therešo. (Doiteronomio 16:16) Ka gona go kgeregela ga ditšhaba ‘thabeng ya ntlo ya Jehofa’ go swantšhetša go kgobokana ga batho ba bantši borapeding bja therešo.

9. “Thaba ya Ntlo ya Morêna” e emela’ng?

⁹ Ee, lehono batho ba Modimo ga ba kgobokane thabeng ya kgonthe e nago le tempele ya mafsika. Tempele ya Jehofa ya Jerusalema e ile ya senywa ke madira a Roma ka 70 C.E. Ka ntle le moo, moapostola Paulo o hlalositše gore tempele ya Jerusalema le tabarenakele yeo e bilego gona pele ga yona e be e le tša seswantšhetšo. Di be di emela selo sa kgonthe se segolo sa moya, e lego “Ntlo-kxêthwa ya makxonthe ye e hlomilwexo ke Modimo, e sa kaxo ya hlôngwa ke motho.” (Ba-Hebere 8:2) Ntlo-kgethwa ya moya ke thulaganyo bakeng sa go batamela Jehofa borapeding bjo bo theilwego sehlabelong sa Jesu Kriste sa topollo. (Ba-Hebere 9:2-10, 23) Ka go dumelelana le se, “thaba ya Ntlo ya Morêna” yeo go bolelwago ka yona go Jesaya 2:2 e emela borapedi bjo bo phagamišitšwego bjo bo sekilego bja Jehofa mehleng ya rena. Bao ba amogelago borapedi bjo bo sekilego ga ba kgobokane lefelong le ge e le lefe la tša thutafase; ba kgobokana boteeng bja borapedi.

Go Phagamišwa ga Borapedi bjo bo Sekilego

10, 11. Borapedi bja Jehofa bo phagamišitšwe ka kgopolo efe mehleng ya rena?

¹⁰ Moporofeta o bolela gore “thaba ya Ntlo ya Morêna” goba borapedi bjo bo sekilego, e “tlo ba e thekxilwe xodimo xa dithaba” e bile “è beilwe xodimo xa meboto.” Nako e telele pele ga mehla ya Jesaya, Kgoši Dafida o ile a tliša areka ya kgwerano Thabeng ya Tsione Jerusalema, yeo e bego e le dimithara tše 760 ka godimo ga tekanyo ya lewatle. Areka e ile ya dula moo go fihlela e fetišetšwa tempeleng e feditšwego Thabeng ya Moria. (2 Samuele 5:7; 6:14-19; 2 Koronika 3:1; 5:1-10) Ka go rialo, mehleng ya Jesaya areka e kgethwa e be e šetše e phagamišitšwe le go bewa ka tempeleng, boemong bjo bo phagamego go feta meboto e mentši tikologong yeo e bego e dirišetšwa borapedi bja maaka.

¹¹ Ee, borapedi bja Jehofa bo be bo dutše bo phagametše ditiro tša bodumedi tša bao ba hlankelago medimo ya maaka ka kgopolo ya moya. Lega go le bjalo, mehleng ya rena Jehofa o phagamišeditše borapedi bja gagwe godimo kudu ka godimo ga dibopego ka moka tša borapedi bjo bo sa hlwekago, ee, ka godimo-dimo ga “meboto” le “xodimo xa dithaba” ka moka. Go bjalo bjang? Kudu-kudu ka go kgobokanya bao ba nyakago go mo rapela “ka Môya le ka therešô.”​—Johane 4:23.

12. “Bana ba mmušô” ke bomang, gona ke go kgoboketšwa gofe mo go diregilego?

¹² Kriste Jesu o boletše ka “bofêlô bya lebaka leno” e le nako ya puno ge barongwa ba tla be ba kgoboketša “bana ba mmušô”​—bao ba nago le kholofelo ya go buša le Jesu letagong la legodimo. (Mateo 13:36-43) Go tloga ka 1919 Jehofa o ile a matlafatša “ba bexo ba šaletše” ba barwa ba gore ba tšee karolo gotee le barongwa modirong wa go buna. (Kutollo 12:17) Ka go rialo sa mathomo go kgoboketšwa “bana ba mmušô,” e lego bana babo Jesu ba tloditšwego. Ka morago ba tšea karolo modirong o mongwe wa go kgoboketša.

13. Jehofa o šegofaditše mašaledi a tloditšwego bjang?

¹³ Nakong ye ya puno, Jehofa o thušitše mašaledi ka mo go tšwelago pele go kwešiša le go diriša Lentšu la gagwe, Beibele. Se le sona se tlaleleditše go phagamišeng borapedi bjo bo sekilego. Le ge “lefsifsi le khurumeditše lefase, boso bo thibile dithšabeng,” batlotšwa ba “bônêxa byalo ka dietša” gare ga batho, ba hlwekišitšwe le go sekišwa ke Jehofa. (Jesaya 60:2; Ba-Filipi 2:15) Ba ‘tladitšwe tsebo ya go tseba thato ya gagwe, le bohlale ka moka le tlhaologanyo ya moya,’ ba bao ba tloditšwego ka moya ba “taxa byalo ka letšatši bà le mmušong wa Ta’ta bô.”​—Ba-Kolose 1:9; Mateo 13:43.

14, 15. Go tlaleletša go kgoboketšweng ga “bana ba mmušô,” ke go kgoboketšwa gofe mo go ilego gwa dirwa, gona se se ile sa bolelwa e sa le pele ke Hagai bjang?

¹⁴ Go feta moo, ba bangwe ba kgeregetše ‘thabeng ya ntlo ya Jehofa.’ Ba biditšwe ke Jesu gore ke “dinku tše dingwê” tša gagwe, ba ba na le kholofelo ya go phela ka mo go sa felego lefaseng la paradeise. (Johane 10:16; Kutollo 21:3, 4) Go thoma nywageng ya bo-1930, ba ile ba bonagala ka dikete, ka morago ka dikete tše makgolo, gomme bjale ka dimilione! Ponong yeo e neilwego moapostola Johane ba hlaloswa e le “lešaba le lexolo la batho ba xo sexo motho e a kxônaxo xo ba bala, ba dithšaba ka moka, le meloko ka moka, le merafô ka moka, le maleme ka moka.”​—Kutollo 7:9.

¹⁵ Moporofeta Hagai o boletše e sa pele ka go tšwelela ga lešaba le le legolo. O ngwadile gore: “Morêna wa mašaba ó re: Xo sa šetše lebakanyana, ké mo ke tl’o xo šišinya lexodimo le lefase, le lewatlê le naxa. Le dithšaba ka moka ke tlo di šišinya, xwa tseb’o tla matsaka a dithšaba ka moka [bao ba tladitšego Bakriste ba tloditšwego borapeding bjo bo sekilego]; ’me Ntlo yé ke tlo e tlatša letaxô.​—O r’yalo Morêna wa mašaba.” (Hagai 2:6, 7) Go ba gona ga “lešaba [le] le lexolo” le le sa dutšego le gola gotee le bagwera ba lona ba tloditšwego go phagamiša, ee, go godiša borapedi bjo bo sekilego ka ntlong ya Jehofa. Le ka mohla pele ga se gwa ka gwa bolelwa ka ba bantši gakaakaa e le ba kopanego borapeding bja Modimo wa therešo, gomme se se tlišetša Jehofa le Kgoši ya gagwe e beilwego sedulong sa bogoši, Jesu Kriste letago. Kgoši Salomo o ngwadile gore: “Bokwala bya kxoši ké boxolo bya sethšaba.”​—Diema 14:28.

Borapedi bo Phagamišitšwe Maphelong a Batho

16-18. Ke diphetogo dife tšeo ba bangwe ba di dirilego e le gore ba rapele Jehofa ka tsela e amogelegago?

¹⁶ Jehofa o swanelwa ke theto ka moka bakeng sa go phagamiša borapedi bjo bo sekilego mehleng ya rena. Lega go le bjalo, bao ba mmatamelago ba na le tokelo ya go tšea karolo modirong wo. Go fo swana le ge go nyakega boiteko go namela thaba, go nyakega boiteko go ithuta le go phela ka go dumelelana le ditekanyetšo tša Modimo tša go loka. Go swana le Bakriste ba lekgolong la pele la nywaga, bahlanka ba Modimo lehono ba tlogetše ditsela tša go phela le mekgwa yeo e sa dumelelanego le borapedi bja therešo. Diotswa, barapedi ba diswantšho, dihlotlolo, mahodu, ba megabaru, matagwa le ba bangwe ba fetotše ditsela tša bona gomme ba “hlatswitšwe” mahlong a Modimo.​—1 Ba-Korinthe 6:9-11.

¹⁷ Mohlala ke phihlelo ya mosadi yo mongwe yo mofsa yo a ngwadilego gore: “Nkile ka ba ke lahlegile ke se na kholofelo. Ke be ke phela bophelo bja boitshwaro bjo bo gobogilego le bja botagwa. Ke ile ka tsenwa ke malwetši a fetelago ka dikopano tša botona le botshadi. Gape ke be ke rekiša dihlare-tagi gomme ke se na taba le selo le ge e le sefe.” Ka morago ga go ithuta Beibele, o ile a dira diphetogo tše dikgolo kudu e le gore a itumelelanye le ditekanyetšo tša Modimo. Bjale o re: “Ke thabela khutšo ya monagano, boitlhompho, kholofelo ka bokamoso, lapa la kgonthe gomme se kaone go feta tšohle, tswalano le Tatago rena Jehofa.”

¹⁸ Gaešita le ka morago ga ge re le boemong bjo bo amogelwago pele ga Jehofa, ka moka re swanetše go tšwela pele re phagamiša borapedi bjo bo sekilego ka go bo bea boemong bjo bo phagamego maphelong a rena. Nywageng e dikete e fetilego, Jehofa o ile a bolela kgodišego ya gagwe ka Jesaya gore go be go tla ba le mašaba lehono ao a bego a tla fišegela go dira borapedi bja gagwe selo sa bohlokwa kudu maphelong a ona. Na o gare ga ona?

Setšhaba se se Rutwa Tsela ya Jehofa

19, 20. Batho ba Modimo ba rutwa’ng, gona kae?

¹⁹ Jesaya o re botša se oketšegilego ka bao ba amogelago borapedi bjo bo sekilego lehono. O re: “Merafo-rafo e tlo ya xôna è re: A re yeng, re rotoxêlê thabeng ya Morêna, Ngwakong wa Modimo wa Jakobo, a re rutê ’tsela tš’axwe, [gomme re tla sepela ditseleng tša gagwe,] xobane molaô o tlo tšwa Tsione, Lentšu la Morêna le tlo tšwa Jerusalêma.”​—Jesaya 2:3, bapiša le NW.

²⁰ Jehofa ga a tlogele batho ba gagwe ba lelera bjalo ka dinku tše di timetšego. Ka Beibele le ka dipuku tše di theilwego Beibeleng, o tsenya “molaô” wa gagwe le “Lentšu” la gagwe ka go bona e le gore ba ithute ditsela tša gagwe. Tsebo ye e ba hlamela go “sepela ditseleng tša gagwe.” Go tšwa dipelong tše di tletšego tebogo le ka go dumelelana le tlhahlo ya Modimo, ba boledišana ka ditsela tša Jehofa. Ba kgobokana gotee dikopanong tše dikgolo le ka dihlopha tše dinyenyane​—Diholong tša Mmušo le magaeng a batho​—e le gore ba theetše le go ithuta ditsela tša Modimo. (Doiteronomio 31:12, 13) Ka go rialo ba ekiša mohlala wa Bakriste ba pele bao ba bego ba bokana gotee bakeng sa go kgothatšana le go tutueletšana go tlala ‘lerato le mediro e botse.’​—Ba-Hebere 10:24, 25.

21. Bahlanka ba Jehofa ba tšea karolo modirong ofe?

²¹ Ba laletša ba bangwe go ‘rotogela’ borapeding bjo bo phagamego bja Jehofa Modimo. Se se dumelelana gabotse gakaakang le taelo yeo Jesu a e neilego barutiwa ba gagwe pejana ga ge a rotogela legodimong! O ile a ba botša gore: “Ké xôna yang Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna.” (Mateo 28:19, 20) Ka thekgo ya Modimo, Dihlatse tša Jehofa ka go kwa di ya lefaseng ka moka, di ruta le go dira barutiwa, di ba kolobetša.

Go Rula Megoma ka Ditšhoša

22, 23. Jesaya 2:4 e bolela eng e sa le pele, gona mohlankedi yo mongwe wa UN o ile a bolela’ng ka sona?

²² Bjale re tla temaneng e latelago, yeo e lego karolo ya seo se ngwadilwego lebotong la lefelo la UN. Jesaya o ngwala gore: “O tlo buša ba dithšaba, ó tlo ahlolêla ba merafo-rafo. Ké mo ba tl’o xo tšea dithšoša ba rula mexomá ka tšôna, ba tšea marumô ba rula maxwêtla ka ôna. Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana.”​—Jesaya 2:4.

²³ Go fihlelela se go tla ba thata kudu. Federico Mayor, molaodi-pharephare wa Mokgatlo wa Ditšhaba tše Kopanego wa Thuto, Thutamahlale le Setlogo o kile a re: “Kgobogo ka moka ya ntwa ye e tlišwago magaeng a rena mehleng yeno ka didirišwa tša go theetša le go bogelwa ga go bonale e kgona go thibela go tšwela pele ga motšhene o mogolo wa ntwa o rulagantšwego le go hlokomelwa nywaga-kgolong e mentši. Meloko ya gona bjale e na le modiro o mogolo o nyakilego o sa kgonege wa Beibele wa go ‘rula megoma ka ditšhoša’ le go fetoga go tloga tutuetšong ya ntwa​—e godišitšwego go tloga nakong e sa gopolwego​—go ya maikwelong a khutšo. Go fihlelela se e tla ba kgato e kaone le e tumišegago kudu yeo ‘motse wa lefase ka bophara’ o ka e fihlelelago, le bohwa bjo kaone go ditlogolwana tša rena.”

24, 25. Mantšu a Jesaya a phethagala go bomang, gona ka tsela efe?

²⁴ Ditšhaba ka kakaretšo le ka mohla di ka se ke tša fihlelela pakane ye e phagamego. Di tloga di ka se e fihlelele. Mantšu a Jesaya a phethagatšwa ke batho ba tšwago ditšhabeng tše dintši bao ba kopanego borapeding bjo bo sekilego. Jehofa o ‘lokišitše ditaba’ gare ga bona. O rutile batho ba gagwe go phedišana ka khutšo. Ruri, lefaseng le aroganego le le le laolwago ke ntwa, ba tšere ‘ditšhoša tša bona ba rula megoma ka tšona gomme ba tšea marumo a bona ba rula magwetla ka ona’ ka mokgwa wa tshwantšhetšo. Bjang?

²⁵ Ka mohlala, ga ba tšee lehlakore dintweng tša ditšhaba. Nakwana pele ga lehu la Jesu, banna ba itlhamilego ba ile ba tla go mo swara. Ge Petro a be a khwamola tšhoša ya gagwe gore a šireletše Mong wa gagwe, Jesu o ile a re go yena: “Bušetša thšoša ya xaxo bodulong bya yôna; xobane e a swaraxo thšoša, ó tlo bolawa ka yôna.” (Mateo 26:52) Ga e sa le go tloga ka nako yeo, balatedi ba dikgato tša Jesu ba rutše megoma ka ditšhoša tša bona gomme ba tlogela go rwala dibetša bakeng sa go bolaya mogagabo bona le go tlogela go thekga maiteko a ntwa ka ditsela tše dingwe. Ba ‘phegelela go ba le khutšo le bohle.’​—Ba-Hebere 12:14, PK.

Go Phegelela Ditsela tša Khutšo

26, 27. Ke bjang batho ba Modimo ba ‘tsomago khutšo le go e kganyelela’? Nea mohlala.

²⁶ Khutšo ya batho ba Modimo e fetela ka kua ga go gana go tsena ntweng. Le ge ba hwetšwa dinageng tše di fetago 230 e bile ba emela maleme a sa balegego le ditlogo, ba thabela khutšo seng sa bona. Go bona go hwetšwa phethagalo ya mehleng yeno ya mantšu a Jesu yo a boditšego barutiwa ba gagwe lekgolong la pele la ngwaga gore: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” (Johane 13:35) Bakriste lehono ke “ba-dira-khutšô.” (Mateo 5:9) Ba ‘tsoma khutšo le go e kganyelela.’ (1 Petro 3:11, PK) Jehofa “Modimo yo a neago khutšo,” ke yena a ba thekgago.​—Ba-Roma 15:33, NW.

²⁷ Go na le mehlala e kgahlišago ya bao ba ithutilego go ba badira-khutšo. Lesogana le ngwala ka bophelo bja lona bja nakong e fetilego ka gore: “Phihlelo e bohloko e ile ya nthuta kamoo nka itšhireletšago ka gona. E ile ya ntira gore ke be šoro ke befelwe mabapi le bophelo. Ka mehla ke be ke feleletša ke e-lwa. Letšatši le lengwe le le lengwe go be go e-ba le ngwana yo ke lwago le yena tikologong, ka dinako tše dingwe ka matswele, ka dinako tše dingwe ka mafsika goba mapotlelo. Ke gotše ke e-na le bošoro kudu.” Lega go le bjalo, mafelelong o ile a arabela taletšong ya go ya “thabeng ya Morêna, Ngwakong wa Modimo.” O ile a ithuta ditsela tša Modimo gomme a ba mohlanka wa Modimo yo a nago le khutšo.

28. Bakriste ba ka dira’ng go kganyelela khutšo?

²⁸ Bontši bja bahlanka ba Jehofa ga ba tšwe maemong a bjalo a bošoro. Lega go le bjalo, gaešita le dilong tše dinyenyane​—ditiro tša botho, go swarela le kwelo-bohloko​—ba katanela go godiša khutšo le ba bangwe. Gaešita le ge ba sa phethagala, ba katanela go diriša keletšo ya Beibele e rego “le fêlê Lè rwalana; Le lebalêlanê xe xo na le e a naxo le taba le e mongwê.”​—Ba-Kolose 3:13.

Bokamoso bja Khutšo

29, 30. Go na le tebelelo efe ka lefase?

²⁹ Jehofa o dirile selo se se kgahlišago “bofelong [bjo] bya mabaka.” O kgobokeditše batho bao ba nyakago go mo hlankela go tšwa ditšhabeng ka moka. O ba rutile go sepela ditseleng tša gagwe, e lego ditsela tša khutšo. Ba ke bao ba tlago go phologa “tlaišexong e kxolo” e tlago gomme ba fetela lefaseng le lefsa la khutšo moo ntwa e tla fedišetšwago sa ruri.​—Kutollo 7:14.

³⁰ Ditšhoša​—dibetša​—di ka se hlwe di e-ba gona. Mopsalme o ngwadile ka nako yeo ka gore: “Tlang, Le bônê! Šé medirô ya Morêna, Mo-hlôla-thšoxô-faseng, Mo-fediša-dintwa xo fihla mafelong a lefase, Mo-rôbaka-mará, Mo-thokxa-marumô, Mo-thsuma-dikôtsê-ka-mollô!” (Psalme 46:8, 9) Ka baka la tebelelo e bjalo, kgothatšo e latelago ya Jesaya ke e swanetšego lehono go swana le ge e be e le bjalo nakong ya ge a e ngwala: “Hee lena ba sethšaba sa Jakobo, tlang re sepeleng seetšeng sa Morêna.” (Jesaya 2:5) Ee, anke seetša sa Jehofa se bonegele tsela ya rena gona bjale gomme re tla sepela tseleng ya gagwe ka mo go sa felego.​—Mika 4:5.

[Mengwalo ya ka tlase]