Kgaolo ya Lesome

Kholofetšo ya Kgoši ya Khutšo

Jesaya 8:19–9:7

1. Batho ba fetile ka tlase ga maemo afe ga e sa le go tloga mehleng ya Kaine?

NYWAGENG e dikete tše tshelelago e fetilego ngwana wa mathomo wa motho o ile a belegwa. Leina la gagwe e be e le Kaine, gomme go belegwa ga gagwe e be e le mo go kgethegilego kudu. Batswadi ba gagwe le barongwa gaešita le Mmopi ba be ba se ba ka ba bona ngwana wa motho pele. Lesea le le le sa tšwago go belegwa le ka be le ile la tlišetša morafo o ahlotšwego wa batho kholofelo. E ile ya ba mo go nyamišago gakaakang ge ka morago ga ge a godile a ile a fetoga mmolai! (1 Johane 3:12) Ga e sa le go tloga ka nako yeo batho ba ile ba bona dipolao tše dingwe tše dintši. Batho bjalo ka ge ba sekametše go direng bobe, ga ba na khutšo magareng ga bona goba le Modimo.​—Genesi 6:5; Jesaya 48:22.

2, 3. Ke ditebelelo dife tšeo di ilego tša bulwa ke Jesu Kriste, gona re swanetše go dira’ng gore re amogele dikholofetšo tše bjalo?

² Mo e ka bago nywaga e dikete tše nne ka morago ga go belegwa ga Kaine, ngwana yo mongwe o ile a belegwa. Leina la gagwe e be e le Jesu, gomme go belegwa ga gagwe le gona e be e le mo go kgethegilego kudu. O belegwe ke kgarebe ka matla a moya o mokgethwa​—e lego pelego e nnoši e bjalo historing. Nakong ya ge a belegwa lešaba la barongwa ba thabilego le ile la opelela Modimo ditumišo la re: “Tumišô a e yê xo Modimo maxodimo-dimong; lefaseng xo bê le khutšo, kxahlišô bathong.” (Luka 2:13, 14) Go e na le go ba mmolai, Jesu o ile a bulela batho tsela ya go ba le khutšo le Modimo le go hwetša bophelo bjo bo sa felego.​—Johane 3:16; 1 Ba-Korinthe 15:55.

³ Jesaya o ile a porofeta gore Jesu o be a tla bitšwa “Kgoši ya Khutšo.” (Jesaya 9:6, NW) O be a tla neela bophelo bja gagwe bakeng sa batho, ka go rialo a dira gore tshwarelo ya dibe e kgonege. (Jesaya 53:11) Lehono khutšo le Modimo le tshwarelo ya dibe di ka hwetšwa motheong wa go ba le tumelo go Jesu Kriste. Eupša ditšhegofatšo tše bjalo ga di itlele feela. (Ba-Kolose 1:21-23) Bao ba di nyakago ba swanetše go ithuta go kwa Jehofa Modimo. (1 Petro 3:11; bapiša le Ba-Hebere 5:8, 9.) Mehleng ya Jesaya, Isiraele le Juda di dira se se fapanego kudu.

Go Retologela go Batemona

4, 5. Boemo bja ditaba ke bofe mehleng ya Jesaya, gona ba bangwe ba retologela go mang?

⁴ Ka baka la go se kwe ga bona, batho ba mehleng ya Jesaya ba boemong bjo bo hlaswegago bja boitshwaro, ba moleteng o kgonthišeditšwego wa lefsifsi la moya. Gaešita le mmušo wa ka borwa wa Juda yeo e lego lefelo la tempele ya Modimo ga o na khutšo. Ka baka la go se botege ga sona, setšhaba sa Juda se tšhošetšwa ka tlhaselo ke ba-Asiria gomme se letetšwe ke dinako tše thata. Se retologela go mang bakeng sa thušo? Ka manyami, ba bantši ba retologela go Sathane e sego go Jehofa. Aowa, ga ba bitše Sathane ka leina. Go e na le moo, go etša Kgoši Saulo wa bogologolo ba dirišana le meoya, ba nyaka ditharollo tša mathata a bona ka go leka go boledišana le bahu.​—1 Samuele 28:1-20.

⁵ Ba bangwe ba bile ba kgothaletša mokgwa wo. Jesaya o šupa bohlanogi bjo bjalo ge a re: “Xe ba ka re: Botšišang ba medimo, le ba maphala le didupe [tše di bolelago ditaba tše di sa kwegego, PK]! Le tlo re: A sethšaba xa se botšiše Modimo wa sôna? A fa bahu ba ka botšišwa ditaba tša ba ba phelaxo?” (Jesaya 8:19) Didupe di ka fora batho ka go “bolela ditaba tše di sa kwegego.” Medumo e bjalo yeo go thwego e tšwa go meoya ya bahu, e ka dirwa ke sedupe ka boikgakantšho go le bjalo ka ge eka e tšwa mothopong o šele. Lega go le bjalo, ka dinako tše dingwe batemona ba ka akaretšwa ka go lebanya gomme ba itira bahu bjalo ka ge go ka ba go diregile bjalo nakong ya ge Saulo a be a botšiša moloi wa Endoro.​—1 Samuele 28:8-19.

6. Ke ka baka la’ng ba-Isiraele bao ba ilego ba retologela go dirišaneng le meoya e le bao ba nago le molato ka mo go kgethegilego?

⁶ Se ka moka se tšwela pele kua Juda go sa šetšwe gore Jehofa o ileditše mokgwa wa go dirišana le meoya. Ka tlase ga Molao wa Moše, ke molato o swanelwago ke kotlo ya lehu. (Lefitiko 19:31; 20:6, 27; Doiteronomio 18:9-12) Ke ka baka la’ng batho bao e lego ba kgethegilego ba Jehofa ba dira molato o mogolo gakaakaa? Ka gobane ba furaletše Molao wa Jehofa le keletšo ya gagwe gomme ba ‘retetše ka go forwa ke dibe.’ (Ba-Hebere 3:13) “Dipelo tša bôná di reteletše wa makhura,” gomme ba arogane le Modimo wa bona.​—Psalme 119:70.a

7. Ba bantši lehono ba ekiša bjang ba-Isiraele ba mehleng ya Jesaya, gona bokamoso bja ba bjalo e tla ba eng ge ba sa sokologe?

⁷ Mohlomongwe ba nagana gore, ‘Molao wa Jehofa o tla re hola’ng ge re lebane le tlhaselo e lego kgaufsi ya ba-Asiria?’ Ba nyaka tharollo ya kapejana le e bonolo bakeng sa bothata bja bona gomme ga se ba ikemišetša go letela gore Jehofa a phethe thato ya gagwe. Le mehleng ya rena ba bantši ba hlokomologa molao wa Jehofa gomme ba botšiša didupe, ba hlahloba di-horoscope le go retologela dibopegong tše dingwe tša boloi bakeng sa go rarolla mathata a bona. Lega go le bjalo, ke mo go se nago tlhaologanyo lehono gore ba phelago ba nyake dikarabo go bahu go fo swana le ge go be go le bjalo morago nakong yeo. Bokamoso bja mang le mang yoo ka go se sokologe a dirago dilo tše bjalo bo tla swana le bja “babolai, le diotswa, . . . le ba medimo e šele, le bohle ba maaká.” Ga ba na ditebelelo tša bophelo nakong e tlago.​—Kutollo 21:8.

‘Molao le Bohlatse’ tša Modimo

8. “Molaô” le “bohlatse” tšeo lehono re swanetšego go ba re e-ya go tšona bakeng sa tlhahlo ke eng?

⁸ Molao wa Jehofa wa go thibela go dirišana le meoya gotee le ditaelo tša gagwe tše dingwe ga di a utegela Juda. Di bolokilwe ka go ngwalwa. Lehono Lentšu la gagwe le hwetšagala ka sebopego sa lona se feletšego le ngwadilwe. Ke Beibele yeo e sa akaretšego feela kgoboketšo ya melao le ditaelo tša Modimo, eupša le pego ya ditirišano tša Modimo le batho ba gagwe. Pego ye ya Beibele ya ditirišano tša Jehofa e bopa bohlatse, e re ruta ka semelo le dika tša Jehofa. Go e na le go botšiša bahu, ke kae moo ba-Isiraele ba swanetšego go ya gona bakeng sa tlhahlo? Jesaya o araba ka gore: “[Go] molaô le bohlatse.” (Jesaya 8:20a) Ee, bao ba nyakago tshedimošo ya kgonthe ba swanetše go ya Lentšung la Modimo leo le ngwadilwego.

9. Na go tsopola Beibele nako le nako go na le mehola le ge e le efe go badira-dibe ba sa sokologego?

⁹ Ba-Isiraele ba bangwe bao ba nweletšego go dirišaneng le meoya ba ka ba ba ipolela gore ba hlompha Lentšu la Modimo leo le ngwadilwego. Eupša dipolelo tše bjalo ke tša lefeela le tša bofora. Jesaya o re: “Ruri ba tla tšwela pele ba bolela seo se dumelelanago le polelo ye, seo se ka se bego le seetša sa mahube.” (Jesaya 8:20b, NW) Jesaya mo o lebišitše polelong efe? Mohlomongwe o lebiša polelong e rego: “[Go] molaô le bohlatse.” Go ka direga gore bahlanogi ba bangwe ba ba-Isiraele ba šupa Lentšung la Modimo ka tsela yeo bahlanogi le ba bangwe ba ka tsopolago Mangwalo ka yona lehono. Eupša tše ke dipolelo feela. Go tsopola Mangwalo go ka se lebiše ‘seetšeng sa mahube’ le ge e le sefe goba tshedimošong e tšwago go Jehofa ge e ba go sa sepedišane le go dira thato ya Jehofa le go phema mekgwa e sa hlwekago.b  

“E Sexo Tlala ya Boxôbê”

10. Setšhaba sa Juda se tlaišega bjang ka baka la go lahla Jehofa?

¹⁰ Go se kwe Jehofa go feleletša ka go fsifala kgopolo. (Ba-Efeso 4:17, 18) Ka kgopolo ya moya, setšhaba sa Juda se foufetše, ga se na kwešišo. (1 Ba-Korinthe 2:14) Jesaya o hlalosa boemo bja sona ka gore: “Ba putla-putla naxa bà imetšwe, ba na le tlala.” (Jesaya 8:21a) Ka baka la go se botege ga setšhaba​—kudu-kudu nakong ya pušo ya Kgoši Ahasi​—go phologa ga Juda e le mmušo o ikemetšego go kotsing. Setšhaba se dikaneditšwe ke manaba. Madira a ba-Asiria a tlaiša metse ya Juda ka go latelana. Lenaba le senya naga e tšweletšago gomme le dira gore dijo di hlaele. Ba bantši “bà imetšwe, ba na le tlala.” Eupša naga e tlaišwa ke mohuta o mongwe wa tlala. Nywaga-someng e sego kae pejana Amosi o ile a porofeta gore: “Tsebang-xê! Ó r’yalo Morêna Mong ’a bohle. Xo tla matšatši a ke tl’o xo romêla tlala mo faseng, e sexo tlala ya boxôbê, e sexo lenyôra la meetse; e tlo ba xo lla xo kwa Lentšu la Morêna.” (Amosi 8:11) Juda bjale e tlaišwa ke tlala e bjalo ya moya!

11. Na Juda e tla ithuta thuto tayong yeo e e hwetšago?

¹¹ Na Juda e tla ithuta thuto gomme ya boela go Jehofa? Na setšhaba sa yona se tla tlogela go dirišana le meoya le go rapela diswantšho gomme sa boela “[go] molaô le bohlatse”? Jehofa o bona karabelo ya sona e sa le pele: “Xe tlala e ba swere, ba nape ba tlala pelo, ba roxa kxoši ya bôná le Modimo wa bôná.” (Jesaya 8:21b) Ee, ba bantši ba tla bea kgoši ya bona yeo e lego motho molato wa go ba lebiša boemong bjo. Ba bangwe ka bošilo ba tla be ba bea Jehofa molato wa masetla-pelo a bona! (Bapiša le Jeremia 44:15-18.) Lehono ba bantši ba arabela ka tsela e swanago, ba bea Modimo molato wa masetla-pelo a bakilwego ke bokgopo bja batho.

12. (a) Go furalela Modimo go lebišitše Juda go eng? (b) Go rotošwa dipotšišo dife tša bohlokwa?

¹² Na go roga Modimo go tla tlišetša baagi ba Juda khutšo? Aowa. Jesaya o bolela e sa le pele gore: “Ba iša mahlô xodimo, ba buša ba lebêlêla tša mo ’faseng, ba hwetša è le tlalêlô le lefsifsi, è le boso le mohlakô, bà kxoromeletšwe kxamping.” (Jesaya 8:22) Ka morago ga go lebelela legodimong ba bea Modimo molato, ba lebelela gape lefaseng, ditebelelong tša bona tša go hloka kholofelo. Go furalela ga bona Modimo go lebišitše masetla-pelong. (Diema 19:3) Lega go le bjalo, go thwe’ng ka dikholofetšo tšeo Modimo a di dirilego go Aborahama, Isaka le Jakobo? (Genesi 22:15-18; 28:14, 15) Na Jehofa o tla palelwa? Na ba-Asiria goba matla a mangwe a tša bohlabani a tla fediša lešika la bogoši le le holofeditšwego Juda le Dafida? (Genesi 49:8-10; 2 Samuele 7:11-16) Na ba-Isiraele ba tla dula ba le lefsifsing ka mo go sa felego?

Naga ‘e Gobošwago’

13. “Galilea dithšabeng” ke eng, gomme go tla bjang gore e ‘gobošwe’?

¹³ Jesaya bjale o bolela ka e nngwe e šoro kudu ya ditiragalo tša masetla-pelo tšeo di tlelago ditlogolwana tša Aborahama ka gore: “Fêla, fá xo lexo ditlalêlô byale, xo ka se dule xò le lefsifsi. Byalo ka mola kxalê naxa ya Sebulone le ya Nafutali è kile ya xoboxa, [mehleng e tlago] di tlo xodiša tsela ya lewatleng, ya mošola wa Jorodane, ya Galilea dithšabeng.” (Jesaya 8:23, bapiša le PK.) Galilea ke lefelo la mmušo wa ka leboa wa Isiraele. Boporofeteng bja Jesaya e akaretša “naxa ya Sebulone le ya Nafutali” gape le “tsela ya lewatleng,” e lego tsela ya bogologolo yeo e bego e bapile le Lewatle la Galilea gomme e e-ya Lewatleng la Mediterranean. Mehleng ya Jesaya, tikologo e bitšwa “Galilea dithšabeng,” mohlomongwe ka baka la gore bontši bja metse ya yona e dulwa ke bao e sego ba-Isiraele.c Naga ye e ‘gobošwa’ bjang? Ba-Asiria ba baheitene ba a e thopa, ba iša ba-Isiraele bothopša gomme ba dudiša lefsa baheitene bao e sego ditlogolwana tša Aborahama tikologong ka moka. Ka gona, mmušo wa meloko e lesome wa ka leboa o hwelela historing e le setšhaba se se arogilego!​—2 Dikxoši 17:5, 6, 18, 23, 24.

14. Ke ka kgopolo efe “lefsifsi” la Juda e tla bago le lenyenyane go la mmušo wa meloko e lesome?

¹⁴ Juda le yona e ka tlase ga kgateletšo ya ba-Asiria. Na e tla hwelela ‘lefsifsing’ la ka mo go sa felego go etša ge go dirile mmušo wa meloko e lesome o emelwago ke Sebulone le Nafutali? Aowa. “Mehleng e tlago,” Jehofa o tla tlišetša tikologo ya mmušo wa ka borwa wa Juda ditšhegofatšo gaešita le naga yeo pele e bego e bušwa ke mmušo wa ka leboa. Bjang?

15, 16. (a) Ke ‘mehla [efe] e tlago’ yeo ka yona boemo bo tlago go fetogela “naxa ya Sebulone, le naxa ya Nafutali”? (b) Ke bjang naga yeo e bego e gobošwa e godišwago?

¹⁵ Moapostola Mateo o araba potšišo ye pegong ya gagwe e buduletšwego ya bodiredi bja Jesu bja lefaseng. Ge a hlalosa matšatši a pele a bodiredi bjoo, Mateo o re: “[Jesu] a khuduxa Natsaretha, a tla a axa Kaperenaume motseng wa lewatleng, wa naxeng ya Sebulone le Nafutali. Ya ba xôna xo phêthêxa se se boletšwexo ke Jesaya moporofeta e a itšexo: Naxa ya Sebulone, le naxa ya Nafutali, tseleng ya lewatlê, mošola wa Jorodane, Galilea dithšabeng, sethšaba se se dutšexo ’fsifsing se bôna seetša se sexolo; ’me ba ba dutšexo naxeng le moriting wa lehu, ba hlabêlwa ke seetša se sexolo.”​—Mateo 4:13-16.

¹⁶ Ee, “mehleng e tlago” e boletšwego ke Jesaya e sa le pele ke nako ya bodiredi bja Kriste bja lefaseng. Karolo e kgolo ya bophelo bja Jesu bja lefaseng e feditšwe Galilea. O thomile bodiredi bja gagwe seleteng sa Galilea gomme a thoma go tsebiša gore: “Mmušô wa maxodimo o batametše.” (Mateo 4:17) Ge a le Galilea, o neetše Thuto ya gagwe e tumilego ya Thabeng, a kgetha baapostola ba gagwe, a dira mohlolo wa gagwe wa mathomo gomme a tšwelela go balatedi ba 500 ka morago ga tsogo ya gagwe. (Mateo 5:1–7:27; 28:16-20; Mareka 3:13, 14; Johane 2:8-11; 1 Ba-Korinthe 15:6) Ka tsela ye Jesu o phethagaditše boporofeta bja Jesaya ka go godiša “naxa ya Sebulone, le ya Nafutali.” Go ba gona, Jesu ga se a ka a lekanyetša bodiredi bja gagwe bathong ba Galilea. Ka go bolela ditaba tše dibotse nageng ka moka, Jesu ‘o dira gore go godišwe’ setšhaba ka moka sa Isiraele go akaretša le Juda.

“Seetša se Sexolo”

17. “Seetša se sexolo” se phadima bjang Galilea?

¹⁷ Lega go le bjalo, go thwe’ng ka go bolela ga Mateo ka “seetša se sexolo” Galilea? Ye le yona e be e le tsopolo e tšwago boporofeteng bja Jesaya. Jesaya o ngwadile gore: “Sethšaba se se sepelaxo lefsifsing se bona seetša se sexolo. Ba ba dutšexo moriting wa lehu ba hlabêlwa ke seetša.” (Jesaya 9:1SE) Lekgolong la pele la nywaga C.E. seetša sa therešo se be se khupeditšwe ke maaka a boheitene. Baetapele ba bodumedi bja ba-Juda ba be ba okeditše bothata ka go kgomarela metlwae ya bona ya bodumedi yeo ka yona ba bego ba “dirile molao wa Modimo lefeela.” (Mateo 15:6, PK) Baikokobetši ba be ba gateletšwe le go gakantšhwa ba latela ‘bahlahli ba difofu.’ (Mateo 23:2-4, 16) Ge Jesu yo e lego Mesia a be a tšwelela, mahlo a batho ba bantši ba ba ikokobeditšego a ile a budullwa ka tsela e tlabago. (Johane 1:9, 12) Modiro wa Jesu ge a be a le lefaseng le ditšhegofatšo tše di tlišwago ke sehlabelo sa gagwe di hlaloswa ka mo go nepagetšego boporofeteng bja Jesaya e le “seetša se sexolo.”​—Johane 8:12.

18, 19. Bao ba arabetšego seetšeng ba bile le lebaka lefe la go thaba kudu?

¹⁸ Bao ba arabetšego seetšeng ba ile ba ba le lebaka le oketšegilego la go thaba. Jesaya o tšwetše pele ka gore: “Sethšaba O se atišitše; lethabô la sôna O le xodišitše; ba thaba pele xa xaxo byalo ka xe xo thabya punong, byalo ka xe xo hlalalwa xe xo abaxanywa dithebola.” (Jesaya 9:2SE) Ka baka la modiro wa go bolela wa Jesu le balatedi ba gagwe, batho ba dipelo tše di botegago ba a tla gomme ba bontšha kganyogo ya bona ya go rapela Jehofa ka moya le ka therešo. (Johane 4:24) Mašaba a ile a amogela Bokriste nywageng ya ka tlase ga e mene. Ba dikete tše tharo ba ile ba kolobetšwa letšatšing la Pentekoste ya 33 C.E. Go se go ye kae ka morago ga moo, “palô ya banna ya ba dikete tše thlano.” (Ditiro 2:41; 4:4) Ge barutiwa ba be ba dutše ba bonagatša seetša ka phišego, “palô ya barutiwa ya ba e kxolo-kxolo motseng wa Jerusalêma. Le lešaba le lentši la baperisita la bušwa ke tumêlô.”​—Ditiro 6:7.

¹⁹ Go swana le bao ba thabelago puno e kgolo goba bao ba thabelago go aroganywa ga dithebola tše bohlokwa ka morago ga phenyo e kgolo ya madira, balatedi ba Jesu ba ile ba thabela koketšego. (Ditiro 2:46, 47) Ge nako e dutše e e-ya, Jehofa o ile a dira gore seetša se phadime gare ga ditšhaba. (Ditiro 14:27) Ka gona batho ba merafo ka moka ba ile ba thabela gore ba buletšwe tsela ya go batamela Jehofa.​—Ditiro 13:48.

“Bo-ka Mohla Wola wa Midiane”

20. (a) Ba-Midiane ba ile ba ipontšha ka ditsela dife e le manaba a Isiraele, gomme Jehofa o ile a fediša bjang tšhošetšo yeo ba bego ba e tšweletša? (b) Jesu o tla fediša bjang tšhošetšo e tšweletšwago ke manaba a batho ba Modimo ‘mohla [o tlago] wa Midiane’?

²⁰ Mafelelo a modiro wa Mesia ke a ka mo go sa felego, bjalo ka ge re bona mantšung a latelago a Jesaya a rego: “Xobane O robile yoko ye e bexo e ba imêla, le kxati e bexo e tia maxetla a bôná, le lepara la baxapeletši ba bôná; O di robile bo-ka mohla wola wa Midiane.” (Jesaya 9:3SE) Nywaga-kgolong ya pele ga mehla ya Jesaya, ba-Midiane le ba-Moaba ba ile ba loga maano-mabe a go goketša Isiraele sebeng. (Numeri 25:1-9, 14-18; 31:15, 16) Ka morago, ba-Midiane ba ile ba tšhošetša ba-Isiraele ka go phuruphutša le go rebola metse le mašemo a bona ka nywaga e šupago. (Baahlodi 6:1-6) Eupša ka morago Jehofa ka mohlanka wa gagwe Gideoni o ile a aroša le go bolaya madira a ba-Midiane. Ka morago ga ‘mohla wa Midiane’ ga go na bohlatse bja gore batho ba Jehofa le ka mohla ba ile ba tlaišwa ke ba-Midiane gape. (Baahlodi 6:7-16; 8:28) Nakong e tlago e lego kgaufsi, Jesu Kriste yo e lego Gideoni yo mogolo o tla bolaya manaba a mehleng yeno a batho ba Jehofa. (Kutollo 17:14; 19:11-21) Ke moka “bo-ka mohla wola wa Midiane,” phenyo e feletšego le ya ka mo go sa felego di tla hwetšwa, e sego ka bokgoni bjo bo sa tlwaelegago bja batho, eupša ka matla a Jehofa. (Baahlodi 7:2-22) Batho ba Modimo le ka mohla ba ka se ke ba tlaišega gape ka tlase ga joko ya kgatelelo!

21. Boporofeta bja Jesaya bo bontšha’ng mabapi le bokamoso bja ntwa?

²¹ Dipontšho tša matla a Modimo ga se go tagafatšwa ga ntwa. Jesu yo a tsošitšwego ke Kgoši ya Khutšo, gomme ka go fediša manaba a gagwe o tla tliša khutšo e sa felego. Jesaya bjale o bolela ka didirišwa tša ntwa e le tšeo di fedišetšwago sa ruri ka mollo: “Xobane diêta ka moka tša xo rôtôba thlabanong, le diaparô tše di thankxetšwexo madi, e tlo ba tša xo fišwa, di lewê ke mollô.” (Jesaya 9:4SE) Ditšhišinyego tše di bakwago ke go gatakela ga diputsi tša mašole a gwantago di ka se sa kwewa gape le ka mohla. Diaparo tše di thankgetšego madi tša bahlabani bao ba reteleditšwego ke ntwa di ka se sa hlwa di bonwa. Ntwa e ka se sa ba gona!​—Psalme 46:9.

“Moeletši”

22. Jesu o neilwe leina lefe le le nago le ditlhaloso tše dintši tša boporofeta ka pukung ya Jesaya?

²² Nakong ya go belegwa ga gagwe ga mohlolo, yo a belegelwago go ba Mesia o ile a amogela leina Jesu, le le bolelago “Jehofa ke Phološo.” Eupša o na le maina a mangwe, e lego maina a boporofeta ao a hlalosago tema ya gagwe e bohlokwa le boemo bja gagwe bjo bo phagamišitšwego. Leina le lengwe le le bjalo ke Imanuele, le le bolelago gore “Modimo ó na le rena.” (Jesaya 7:14) Jesaya bjale o hlalosa leina le lengwe la boporofeta: “Xobane re tswaletšwe ngwana, re neilwe morwa, yo pušô e lexo lexetleng la xaxwe. Leina la xaxwe ké: Matete, Moeletši, Modimo yo matla, Tatê wa xo sa felexo, Kxoši ya [Khutšo, NW].” (Jesaya 9:5SE) Ela hloko tlhaloso e tletšego ya leina le leo le bolelago mo gontši la boporofeta.

23, 24. (a) Jesu ke “Moeletši” ka tsela efe? (b) Baeletši ba Bakriste ba ka ekiša bjang mohlala wa Jesu lehono?

²³ Moeletši ke motho yo a neago keletšo. Jesu Kriste ge a be a le lefaseng o ile a nea keletšo e botse kudu. Ka Beibeleng re bala gore “mašaba a batho a tlabya ke thutô ya xaxwe.” (Mateo 7:28) Ke Moeletši yo bohlale le yo a kgomegago yo a nago le kwešišo e sa tlwaelegago ya tlhago ya motho. Keletšo ya gagwe ga e a lekanyetšwa go kgalemeleng goba go omanyeng. Gantši e ka sebopego sa thuto le keletšo e lerato. Keletšo ya Jesu e botse kudu ka gobane ka mehla ke e bohlale, e phethagetšego le e se nago phošo. Ge e latelwa, e lebiša bophelong bjo bo sa felego.​—Johane 6:68.

²⁴ Keletšo ya Jesu ga e fo tšwa kgopolong ya gagwe e bohlale. Go e na le moo, o re: “Thutô ya-ka xa se ya-ka; ké ya E a nthomilexo.” (Johane 7:16) Go etša ge go be go le bjalo ka Salomo, Jehofa Modimo ke Mothopo wa bohlale bja Jesu. (1 Dikxoši 3:7-14; Mateo 12:42) Mohlala wa Jesu o swanetše go tutuetša barutiši le baeletši ka phuthegong ya Bokriste gore ka mehla ba thee thuto ya bona Lentšung la Modimo.​—Diema 21:30.

“Modimo yo Matla” le “Tatê wa xo sa Felexo”

25. Leina “Modimo yo Matla” le re botša’ng ka Jesu yo a lego legodimong?

²⁵ Jesu gape ke “Modimo yo Matla” le “Tatê wa xo sa Felexo.” Se ga se bolele gore o thopa matla a taolo le boemo bja Jehofa yo e lego “Modimo Tata wešo.” (2 Ba-Korinthe 1:2) “Eo [Jesu] . . . a se re: xo swana le Modimo xo mo ana hlôxô.” (Ba-Filipi 2:6) O bitšwa Modimo yo Matla, e sego Modimo Ra-matla-ohle. Jesu le ka mohla ga se a ka a inagana e le Modimo yo Matla ka Moka, ka gobane o bolela ka Tatagwe e le “Modimo wa go rereša o nnoši,” ke gore, Modimo a nnoši yo a swanetšego go rapelwa. (Johane 17:3, PK; Kutollo 4:11) Ka Mangwalong lentšu “modimo” le ka bolela “yo matla.” (Ekisodo 12:12; Psalme 8:5; 2 Ba-Korinthe 4:4) Pele Jesu a e-tla lefaseng e be e le “modimo,” “à le ka lebopô le Modimo a lexo ka lôna.” Ka morago ga tsogo ya gagwe o ile a boela boemong bjo bo phagamego le go feta magodimong. (Johane 1:1; Ba-Filipi 2:6-11) Go feta moo, leina “modimo” le na le tlhaloso e oketšegilego. Baahlodi Isiraeleng ba be ba bitšwa “medimo”​—nakong e nngwe Jesu ka boyena o ile a ba bitša bjalo. (Psalme 82:6; Johane 10:35) Jesu ke Moahlodi yo a kgethilwego wa Jehofa, “e a tl’o xo sekiša ba ba phelaxo le ba ba hwilexo.” (2 Timotheo 4:1; Johane 5:30) Go molaleng gore o bitšwa ka tshwanelo gore ke Modimo yo Matla.

26. Ke ka baka la’ng Jesu a ka bitšwa “Tatê wa xo sa Felexo”?

²⁶ Sereto se se rego “Tatê wa xo sa Felexo” se šupa matla le tshwanelo tša Kgoši yeo e lego Mesia le matla a go nea batho tebelelo ya bophelo bjo bo sa felego lefaseng. (Johane 11:25, 26) Bohwa bja motswadi wa rena wa pele Adama e be e le lehu. Jesu yo e lego Adama wa mafelelo, “Yêna ké môya wo o phedišaxo.” (1 Ba-Korinthe 15:22, 45; Ba-Roma 5:12, 18) Go fo etša ge Jesu yo e lego Tate wa go sa Felego a tla phela ka mo go sa felego, batho ba ba kwago le bona ba tla thabela mehola ya go ba ga gagwe tate ka mo go sa felego.​—Ba-Roma 6:9.

“Kgoši ya Khutšo”

27, 28. Ke mehola efe e kgahlišago e tlelago balata ba “Kgoši ya Khutšo” gona bjale le nakong e tlago?

²⁷ Ka ntle le bophelo bjo bo sa felego, motho o bile o nyaka khutšo le Modimo gotee le mogagabo. Gaešita le lehono bao ba ikokobeletšago pušo ya “Kgoši ya Khutšo” ba ‘tšere ditšhoša tša bona ba rula megoma ka tšona, ba tšea marumo ba rula magwetla ka ona.’ (Jesaya 2:2-4) Ga ba boloke maikwelo a lehloyo ka baka la diphapano tša dipolitiki, tša naga, tša merafo goba tša boiphedišo. Ba kopane borapeding bja Modimo a nnoši wa therešo Jehofa, gomme ba katanela go kgomarela ditswalano tša khutšo le baagišani ba bona bobedi ka gare le ka ntle ga phuthego.​—Ba-Galatia 6:10; Ba-Efeso 4:2, 3; 2 Timotheo 2:24.

²⁸ Ka nako ya Modimo e swanetšego, Kriste o tla thea lefaseng khutšo yeo e tlago go ba ya lefase ka bophara, e hlomilwego ka go tia le ya sa ruri. (Ditiro 1:7) “Bogolo bja bogoši bja gagwe le khutšo di ka se ke tša fela mo [sedulong sa bogoši] sa Dafida le mmušong wa gagwe, gore a o tiiše, a o thatafatše ka kahlolo ya [“toka,” NW] le ka go loka, bjalo le go iša mehleng e sa felego.” (Jesaya 9:6a, PK) Ge a diriša tshwanelo ya gagwe e le Kgoši ya Khutšo, Jesu a ka se ke a retologela mekgweng ya bonkgwete. Balata ba gagwe ba ka se ke ba amogwa tokologo ya bona ya go dira kgetho gomme ba bušwa ka kgapeletšo. Go e na le moo, sohle seo a tlago go se phetha e tla ba ‘ka toka le ka go loka.’ A phetogo e lapološago gakaakang!

29. Re swanetše go dira’ng ge e ba re kganyoga go thabela tšhegofatšo ya khutšo ya ka mo go sa felego?

²⁹ Ka baka la ditlhaloso tše di kgahlišago tša leina la Jesu la boporofeta, phetho ya Jesaya ya karolo ye ya boporofeta bja gagwe ke e kgahlišago e le ka kgonthe. O ngwala gore: “Lehufa [“phišego,” NW] la Jehofa Tsebaothe le tla dira seo.” (Jesaya 9:6b, PK) Ee, Jehofa o gata mogato ka phišego. Ga go selo se a se dirago a le pelo-pedi. Re ka kgodišega gore selo le ge e le sefe se a se holofetšago o tla se phetha ka botlalo. Ka gona, ge e ba motho le ge e le ofe a hlologetšwe go thabela khutšo ya ka mo go sa felego, a a hlankele Jehofa ka pelo ka moka. Go swana le Jehofa Modimo le Jesu Kgoši ya Khutšo, eka bahlanka ka moka ba Modimo e ka ba “dirôtô medirong e botse.”​—Tito 2:14.

[Mengwalo ya ka tlase]

[Caption on page 122]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Koratsima

Kaperenaume

Betsaida

Molala wa Genetsareta

Lewatle la Galilea

Magdala

Tiberia

Noka ya Jorodane

GADARA

Gadara

[Caption on page 119]

Matswalo a Kaine le Jesu bobedi a be a kgethegile kudu. Ke feela a Jesu ao a bilego le mafelelo a thabišago

[Caption on page 121]

Go tla ba le tlala e šoro kudu go feta tlala ya senkgwa le lenyora la meetse

[Caption on page 127]

Jesu e be e le seetša nageng