Ditaba tše Dibotse Tšeo di Ratago Gore o di kwe

GE Jesu a be a le lefaseng, barutiwa ba gagwe ba ile ba tla go yena gomme ba mmotšiša gore: “Pontšho ya go ba gona ga gago le ya bofelo bja tshepedišo ya dilo e tla ba efe?” O ile a araba ka gore go be go tla ba le dintwa tšeo di akaretšago ditšhaba tše dintši, ditlala, mauba a bolwetši, ditšhišinyego tša lefase, go oketšega ga go hloka molao, barutiši ba maaka ba bodumedi bao ba arošago ba bantši, go hloiwa le go tlaišwa ga balatedi ba gagwe ba therešo gotee le go tapa ga lerato la batho ba bantši la go rata toko. Ge dilo tše di be di tla thoma go direga, go be go tla bontšha gore Kriste o gona ka tsela e sa bonagalego le gore Mmušo wa legodimo o be o batametše. Tše e be e tla ba ditaba tše di kgahlišago—ditaba tše dibotse! Ka gona Jesu o ile a oketša ka mantšu a e le karolo ya pontšho: “Gomme ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo bo fihlago.”—Mat. 24:3-14, bapiša le NW.

Ka botšona, ditiragalo tša lefase tša morago bjale ke tše mpe, eupša seo di se swayago ke se sebotse, e lego go ba gona ga Kriste. Maemo ao go boletšwego ka ona ka mo godimo a thomile go bonagala ngwageng woo wo o ilego wa tsebatšwa ka gohle wa 1914! O ile wa swaya bofelo bja Mabaka a Ba-ntle le go thoma ga nako ya phetogo go tloga pušong ya batho go ya Pušong ya Kriste ya Nywaga e Sekete.

Gore go be go swanetše go ba le nako ya phetogo go bontšhwa ke Psalme ya bo-110, ditemana 1 le 2 gotee le Kutollo 12:7-12. Moo go bontšhwa gore Kriste o be a tla dula ka letsogong le letona la Modimo legodimong go fihla nakong ya go ba ga gagwe Kgoši. Ke moka ntwa ya legodimong e be e tla feleletša ka go lahlelwa ga Sathane lefaseng, go tliše madimabe lefaseng gomme Kriste o be a tla buša gare ga manaba a gagwe. Phedišo e feletšego ya bokgopo e be e tla tla ka ‘masetla-pelo a magolo,’ ao a tlago go feleletša ka ntwa ya Haramagedone gomme ya latelwa ke Pušo ya Kriste ya khutšo ya Nywaga e Sekete.—Mateo 24:21, 33, 34; Kutollo 16:14-16.

Beibele e re: “Tseba xore mehleng ya bofêlô xo tlo tla mabaka a mathata. Batho e tlo ba ba xo ithata, ba mexabaru, ba lenyatšô le baikxoxomoši, le ba maroxa, le ba xo se kwe batswadi, ba xo se leboxe, ba xo se ile selô. E tlo ba ba-hlala-leratô, babata-sekxoro, e tlo ba dihwirihwiri, le ba ba sa tsebexo xo ithswara, manaba a tše boló; e tlo ba baeki, baipuši, baikxanthši, ba xo iphsina ba lahlile Modimo. Xe O ba bôna, O tlo re ba n’e borapedi; anthe matla a byôna xa ba a dumele. Ba ba byalo O ba xerulê.”—2 Timotheo 3:1-5.

Ba bangwe ba ka ganetša ka gore dilo tše di bile gona nakong ya pele historing ya motho, eupša therešo ke gore ga se tša ka tša direga ka tekanyo e swanago le ye. Bjalo ka ge bo-radihistori le bahlalosi ba bolela, le ka mohla ga se gwa ka gwa ba le nako lefaseng e swanago le yeo e bilego gona go tloga ka 1914 go ya pele. (Bona letlakala 7.) Madimabe e bile a magolo kudu go feta le ge e le neng pele. Go feta moo, ge e le ka dibopego tše dingwe tša pontšho ya Kriste ya mehla ya bofelo, ditherešo tše di swanetše go elwa hloko: Go goeletšwa ga lefaseng ka bophara ga go ba gona ga Kriste le go goeletšwa ga Mmušo, e bile ga tekanyo e sa kago ya bonwa pele historing. Go tlaišetšwa boboledi le ka mohla ga se gwa ka gwa lekana le mo go wetšego Dihlatse tša Jehofa. Tše makgolo a mantši tša tšona di ile tša bolawa dikampeng tša tshwenyo tša Nazi. Go fihla le lehono Dihlatse tša Jehofa di thibetšwe mafelong a mangwe mola go a mangwe di swarwa, di golegwa, di hlokofatšwa le go bolawa. Se ka moka ke karolo ya pontšho yeo Jesu a e neilego.

Go etša ge go boletšwe e sa le pele go Kutollo 11:18, ‘ditšhaba di galefetše’ Dihlatse tše di botegago tša Jehofa gomme se se bontšha gore “boxale” bja Jehofa bo tla bontšhwa malebana le ditšhaba tšeo. Lengwalo lona le le bolela gore Modimo o tla “senya basenya-lefase.” Le ka mohla ga se gwa ka gwa ba le nako historing ya motho yeo ka yona matla a lefase a go thekga bophelo a ilego a bewa kotsing gakaakaa. Lega go le bjalo, mo nakong ye dilo di fetogile! Bo-rathutamahlale ba bantši ba lemošitše gore ge e ba motho a tšwela pele go šilafatša lefase, e tla ba leo go ka se sa hlwago go kgonega go dula go lona. Eupša Jehofa ‘o le diretše gore le dulwe ke batho,’ gomme o tla fediša bašilafatši ba lona pele ga ge ba phetha tshenyo ya bona ya go senya lefase.—Jesaya 45:18.

DITŠHEGOFATŠO TŠA LEFASENG KA TLASE GA MMUŠO

Kgopolo ya go ba le batho bao ba phelago mo lefaseng e le balata ba Mmušo wa Modimo mo gongwe e ka kwagala e le e makatšago go ba bantši ba ba dumelago Beibele bao ba naganago gore bohle bao ba phološitšwego ba legodimong. Beibele e bontšha gore ke palo e nyenyane feela yeo e yago legodimong le gore bao ba tlago go phela ka mo go sa felego lefaseng e tla ba lešaba le legolo le le se nago palo. (Psalme 37:11, 29; Kutollo 7:9; 14:1-5) Gore Mmušo wa Modimo ka tlase ga Kriste o tla tlala lefase gomme wa le buša go bontšhwa ke boporofeta bjo bo lego ka pukung ya Beibele ya Daniele.

Mmušo wa Kriste moo o swantšhwa e le lefsika leo le kgomogilego bogošing bja Jehofa bjo bo swanago le thaba. Le otla le go pšhatlaganya seswantšho seo se emelago ditšhaba tše matla tša lefase, gomme “lefsika lôna le le thubilexo seswanthšô seo, . . . la ba thaba e kxolo, la tlala lefase ka moka.” Boporofeta bo tšwela pele ka gore: “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.”—Daniele 2:34, 35, 44.

Dihlatse tša Jehofa di rata go go botša ka Mmušo wo le ka kholofelo yeo e thekgwago ke Mangwalo ya bophelo bjo bo sa felego lefaseng leo le hlwekišitšwego le leo le botsefaditšwego. Ba dimilione bao ba phelago mo nakong ye gotee le ba dimilione tše dintši kudu bao ba lego mabitleng a bona gona bjale ba tla ba le sebaka sa go dula go lona ka mo go sa felego. Ka gona, morero wa Jehofa wa mathomong wa go bopa lefase le go bea batho ba babedi ba mathomo go lona o tla phethega ka tlase ga Pušo ya Kriste Jesu ya Nywaga e Sekete. Paradeise ye ya lefaseng le ka mohla e ka se ke ya ba yeo e tenago. Go swana le ge Adama a be a abetšwe modiro tšhemong ya Edene, batho ba tla ba le mediro e hlohlago ya go hlokomela lefase gotee le dimela le diphoofolo tšeo di lego go lona. Ba “tlo phela ka tše ba itiretšexo tšôna, tša tlo bá tša ba ônalêla diatleng.”—Jesaya 65:22; Genesi 2:15.

Go ka newa mangwalo a mantši bakeng sa go bontšha maemo ao a tlago go ba gona ge thapelo yeo Jesu a re rutilego yona e arabja: “Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.” (Mateo 6:10) Lega go le bjalo, anke le le le tee e be le le lekanego mo nakong ye: “Ka kwa lentšu le lexolo lè e-tšwa lexodimong lè re: Šoo ngwakô wa Modimo mo xare xa batho; ó tlo axa le bôná, ya ba sethšaba sa xaxwe. ’Me Yêna mong Modimo ó tlo ba le bôná è le Modimo wa bôná. ’Me Yêna Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile. E a dutšexo sedulong sa boxoši a re: Šidio; dilô tšohle ke di dira tše mpsha.—Nna a ntaêla a re: Ngwala, xobane ’taba tšé ké tša xo rereša le xo bôtêxa.”—Kutollo 21:3-5.

[Ntlhakgolo go letlakala 15]

“Dinako tše hlobaetšago tšeo go lego thata go lebeletšana le tšona,”

EUPŠA “e tla ba gona bofelo bo fihlago”

[Seswantšho go letlakala 18]

Netherlands

[Seswantšho go letlakala 18]

Nigeria