Kgaolo ya Bone

“Lena Le Dihlatse Tša-ka”!

Jesaya 43:1-28

1. Jehofa o diriša boporofeta bjang, gomme batho ba gagwe ba swanetše go arabela bjang boporofeteng bjo bo phethagaditšwego?

BOKGONI bja go bolela bokamoso e sa le pele ke selo se sengwe seo se hlaolago Modimo wa therešo go medimo ka moka ya maaka. Eupša ge Jehofa a porofeta, o nagana ka seo se fetago go fo hlatsela Bomodimo bja gagwe. Ka ge go bontšhitšwe go Jesaya kgaolo 43, Jehofa o dira gore boporofeta bo hlatsele bobedi Bomodimo bja gagwe le lerato la gagwe bakeng sa batho ba gagwe ba kgwerano. Le gona, batho ba gagwe ba ka se lemoge boporofeta bjo bo phethagaditšwego ke moka ba dula ba homotše; ba swanetše go hlatsela seo ba se bonego. Ee, ba swanetše go ba dihlatse tša Jehofa!

2. (a) Boemo bja moya bja Isiraele ke bofe mehleng ya Jesaya? (b) Jehofa o budulla mahlo a batho ba gagwe bjang?

² Ka mo go nyamišago, mehleng ya Jesaya Isiraele e boemong bjo bobe moo Jehofa a bilego a lebelela setšhaba se e le se se golofetšego moyeng. “Tlišang sethšaba se foufetšexo, mola mahlô à le xôna; xo tlê ba difoa, hleng ditsêbê ba sa na natšô.” (Jesaya 43:8) Batho bao e lego difofu le difoa moyeng ba ka hlankela Jehofa bjang e le dihlatse tša gagwe tše phelago? Go na le tsela e tee feela. Mahlo a bona a swanetše go budullwa gomme ditsebe di thibollwe ka mohlolo. Ruri Jehofa o dira seo! Bjang? Sa pele, Jehofa o diriša kotlo e šoro​—badudi ba mmušo wa ka leboa wa Isiraele ba ya bothopša ka 740 B.C.E., gomme ba Juda ba ya ka 607 B.C.E. Ka morago, Jehofa o gata mogato ka matla legatong la batho ba gagwe ka go ba lokolla gomme a bušetša mašaledi a tsošološitšwego moyeng le a itsholago nageng ya gabo ona ka 537 B.C.E. Ge e le gabotse, Jehofa o tloga a kgodišegile gore morero wa gagwe boemong bjo o ka se ke wa šitišwa moo e lego gore nywaga e ka bago 200 e sa le pele, o bolela ka go lokollwa ga Isiraele bjalo ka ge eka go šetše go diragetše.

3. Ke kgothatšo efe yeo Jehofa a e neago mathopša a nakong e tlago?

³ “Byale Yêna Mmopi wa xaxo, wene Jakobo, e a Xo dirilexo, wene Isiraele, ó bolêla ó re: Se boifê, xobane ke Xo lopolotše; ke Xo biditše ka leina la xaxo, O wa-ka. Xe O tsêna xar’a meetse, ke tlo ba le wêna; xe O sela dinoka, di ka se kê tša Xo tšea; xe O phatša mellô, O ka se kê wa fsa, O ka se tlabolwe ke kxabo. Xobane Nna Morêna ke Modimo wa xaxo, Nna Mokxêthwa wa Isiraele, ke Mophološi wa xaxo.”​—Jesaya 43:1-3a.

4. Jehofa ke Mmopi wa Isiraele bjang, gomme ke kgonthišetšo efe yeo a e neago batho ba gagwe mabapi le go boela ga bona nageng ya gabo bona?

⁴ Jehofa o kgahlegela Isiraele ka mo go kgethegilego ka gobane ke setšhaba sa gagwe. Ke tlholo ya gagwe ka noši phethagatšong ya kgwerano ya Aborahama. (Genesi 12:1-3) Ka go rialo, Psalme 100:3 (PK) e re: “Tsebang gobane Jehofa ke Modimo; ke Yena a re dirilego, ga ra itira, re setšhaba sa gagwe, re dinku tša mafulo a gagwe.” Ka ge e le Mmopi le Molopolodi wa Isiraele, Jehofa o tla bušetša batho ba gagwe nageng ya gabo bona ba šireletšegile. Mapheko a bjalo ka meetse, dinoka tša dikgogola le maganata a fišago, a ka se ke a ba thibela goba go ba gobatša, go fo etša ge dilo tše swanago di se tša ka tša thibelela bo-rakgolokhukhu ba bona ge ba le tseleng ya go ya Nageng ya Kholofetšo nywaga e sekete pejana.

5. (a) Mantšu a Jehofa a homotša Isiraele ya moya bjang? (b) Bagwera ba Isiraele ya moya ke bomang, gomme ba ba be ba swantšhetšwa ke bomang?

⁵ Mantšu a Jehofa gape a nea khomotšo go mašaledi a mehleng yeno a Isiraele ya moya, yeo ditho tša yona e lego “mmopya e mofsa” yo a tswetšwego ka moya. (2 Ba-Korinthe 5:17) Ka go itšweletša ka sebete ka pele ga “meetse” ao e lego batho, ba ile ba thabela tšhireletšo e lerato ya Modimo go phatša mafuleng a seswantšhetšo. Mollo o tšwago go manaba a bona ga se o ba gobatše, eupša go e na le moo, o thušitše go ba hlwekiša. (Sakaria 13:9; Kutollo 12:15-17) Tlhokomelo ya Jehofa e bile e katologetše go “lešaba le lexolo” la “dinku tše dingwê,” leo le tladitšego setšhaba sa Modimo sa moya. (Kutollo 7:9; Johane 10:16) Ba ba be ba swantšhetšwa ke “lešaba la mahlakanasêla” leo le ilego la tšea leeto la Khudugo go tloga Egipita gotee le ba-Isiraele, e bile ba swantšhetšwa ke bao e sego ba-Juda ba boilego le mathopša a lokolotšwego Babele.​—Ekisodo 12:38; Esera 2:1, 43, 55, 58.

6. Jehofa o ipontšha bjang e le Modimo wa toka mabapi le go lopollwa ga (a) Isiraele ya nama? (b) Isiraele ya moya?

⁶ Jehofa o holofetša go phološa batho ba gagwe go tšwa Babele ka madira a Meda le Peresia. (Jesaya 13:17-19; 21:2, 9; 44:28; Daniele 5:28) Ka ge e le Modimo wa toka, Jehofa o tla lefa “bathwalwa” ba gagwe ba ba-Meda le ba-Peresia topollo e swanetšego bakeng sa go lopolla Isiraele. “Ke nthša naxa ya Egipita le ya Kuše [“Ethiopia,” NW] le ya Seba, xe ke rekolola wene. Ke hwetša Ò ratêxa, Ò le wa thêkô-kxolo. ’Me Nna ke a Xo rata, ka nthša batho le dithšaba tša xo rekolla bophelô bya xaxo.” (Jesaya 43:3b, 4) Histori e tiišetša gore Mmušo wa Peresia o ile wa fenya Egipita, Ethiopia le Seba ya kgaufsi, go fo etša ge Modimo a boletše e sa le pele. (Diema 21:18) Ka 1919, Jehofa ka mo go swanago o ile a lokolla mašaledi a Isiraele ya moya bothopša ka Jesu Kriste. Lega go le bjalo, Jesu o be a sa nyake moputso bakeng sa ditirelo tša gagwe. E be e se mmuši wa moheitene. Le gona o be a lokolla banababo ba moya. Ka ntle le seo, ka 1914 Jehofa o be a šetše a mo file ‘ditšhaba e le lefa la gagwe le magomo a lefase e le a gagwe.’​—Psalme 2:8.

7. Jehofa o ikwa bjang ka batho ba gagwe, bobedi mehleng ya bogologolo le mehleng yeno?

⁷ Ela hloko kamoo Jehofa a bolelago ka gona maikwelo a gagwe a lerato phatlalatša go mathopša a rekolotšwego. O ba botša gore ke ba “bohlokwa” (NW) le ba “hlomphegago” (NW) go yena le gore o a ba ‘rata.’ (Jeremia 31:3) O ikwa ka tsela e swanago​—gaešita le go feta moo​—ka bahlanka ba gagwe ba botegago ka go se kwanantšhe lehono. Bakriste ba tloditšwego ba dirilwe gore ba be le tswalano le Modimo, e sego ka tswalo eupša ka go dirišwa ga moya o mokgethwa wa Modimo ka morago ga boineelo bja bona bja motho ka noši go Mmopi wa bona. Jehofa o gogetše batho ba go Morwa wa gagwe le go yena ka noši gomme o ngwadile melao ya gagwe le melao ya motheo dipelong tša bona tše di amogelago.​—Jeremia 31:31-34; Johane 6:44.

8. Ke kgonthišetšo efe yeo Jehofa a e neago mathopša, gomme a tla ikwa bjang ka go phološwa ga ona?

⁸ Ge a nea mathopša kgonthišetšo e nngwe gape, Jehofa o oketša ka gore: “Se boifê; Nna ke na naxô’; ba xeno ke tlo ba tliša bà e-tšwa Bohlabêla; ke tlo ba kxobêla bà e-tšwa Bodikêla. Ke tlo re Lebowa kè re: Ba nthšê! Ka ra Borwa kè re: Se ba thibêlê! Tšiša barwa ba-ka ba tšwê moo kxolê, le barwedi ba-ka ba tšwê moo maxomong a lefase, bohle ba bitšwaxo ka leina la-ka, ba ke ba hlodilexo ka ithetiša ka bôná, ba ke ba bopilexo ka ba dira.” (Jesaya 43:5-7) Gaešita le dikarolo tša kgole-kgole tša lefase ga se tšeo Jehofa a ka se kgonego go di fihlelela ge nako e e-tla ya gore a lokolle barwa le barwedi ba gagwe le go ba bušetša nageng ya gabo bona e rategago. (Jeremia 30:10, 11) Ga go pelaelo gore mahlong a bona topollo ye e tla feta kgole kudu go phološwa ga setšhaba pejana go tšwa Egipita.​—Jeremia 16:14, 15.

9. Ke ka ditsela dife tše pedi Jehofa a tswalanyago ditiro tša gagwe tša phološo le leina la gagwe?

⁹ Ka go gopotša batho ba gagwe gore ba bitšwa ka leina la gagwe, Jehofa o tiišetša kholofetšo ya gagwe ya go phološa Isiraele. (Jesaya 54:5, 6, PK) Go feta moo, Jehofa o kgokaganya leina la gagwe le dikholofetšo tša gagwe tša topollo. Ka go dira bjalo, o kgonthišetša gore o tla hwetša letago ge lentšu la gagwe la boporofeta le phethagatšwa. Ga go na mofenyi wa Babele yo a tlago go newa kgodišo yeo e swanelago Modimo a nnoši yo a phelago.

Medimo e Tshekong

10. Ke tlhohlo efe yeo Jehofa a e tšweletšago pele ga ditšhaba le medimo ya tšona?

¹⁰ Jehofa ga bjale o nea kholofetšo ya gagwe ya go lokolla Isiraele e le motheo bakeng sa tsheko ya legohle yeo go yona a sekišago medimo ya ditšhaba. Re bala gore: “Ba-ntlê bohle a ba kxobokanê, xo bothwê ba merafô. Ké mang wa bôná [wa medimo ya bona] a kxônaxo xo bolêla taba yé? A re botšê tša boxolo-xolo; ba [medimo ya bona] nthšê dihlatse tša bôná, ba rerešê re ba kwê; ba kxônê xo thwe ba boletše taba-taba.” (Jesaya 43:9) Jehofa o tšweletša tlhohlo e boifišago pele ga ditšhaba tša lefase. Ge e le gabotse, o re: ‘Anke medimo ya lena e hlatsele gore ke medimo ka go bolela bokamoso e sa le pele ka mo go nepagetšego.’ Ka ge e le Modimo a nnoši wa therešo yo a ka porofetago ka go se foše, teko ye e tla pepentšha baikgakanyi bohle. (Jesaya 48:5) Eupša Ra-matla-ohle o oketša ka tumelelano e nngwe ya tša molao: Bohle bao ba ipolelago gore ke medimo ya therešo ba swanetše go tšweletša dihlatse, bobedi dipolelelong-pele tša bona le phethagatšong ya tšona. Go ba gona, Jehofa ga a ipeele thoko senyakweng se sa molao.

11. Ke thomo efe yeo Jehofa a e neago mohlanka wa gagwe, gomme Jehofa o utolla’ng ka Bomodimo bja gagwe?

¹¹ Ka ge e se na thušo, medimo ya maaka ga e kgone go tšweletša dihlatse. Ka gona, ka mo go lešago dihlong kudu, lepokisi leo hlatse e emago go lona tshekong le dula le se na motho. Eupša bjale go tla nako ya Jehofa ya gore a hlatsele Bomodimo bja gagwe. O retologela go batho ba gagwe, a re: “Lena Le dihlatse tša-ka, Le bahlanka ba-ka ba ke ba hlaotšexo xore Le ntsebê, Le lemoxê xore ké Nna, yo xo sexo modimo yo mongwê pele xa-ka, yo xo sa tl’o xo ba le e mongwê moraxo xa-ka. [Jehofa, NW] ké Nna kè nnoši; xa xo Mophološi xe e se Nna. Ké Nna ke boletšexo tšeo, xomme ka phološa; ka bolêla, xò se modimo o šele xo lena; ’me lena Le dihlatse tša-ka, tša xe ke le Modimo. . . . Le neng le neng ké Nna yêna-é; kà swara, xa xo monamoledi; kà dira, xo ka nthibêla mang?”​—Jesaya 43:10-13.

12, 13. (a) Ke bohlatse bofe bjo bontši bjo batho ba Jehofa ba swanelwago ke go bo tšweletša? (b) Leina la Jehofa le ile la tuma bjang mehleng yeno?

¹² Karabelong ya mantšu a Jehofa, lepokisi leo hlatse e emago go lona tshekong gatee-tee le tlala wa go falala ka lešaba le le thabilego la dihlatse. Bohlatse bja tšona ke bjo bo kwagalago le bjo bo sa belaetšego. Go swana le Jošua, di hlatsela gore ‘selo se sengwe le se sengwe seo Jehofa a se boletšego se phethagetše. Ga go le lentšu le tee leo le paletšwego.’ (Jošua 23:14) Seo se sa dutšego se duma ditsebeng tša batho ba Jehofa ke mantšu a Jesaya, Jeremia, Hesekiele le baporofeta ba bangwe bao ba boletšego e sa le pele bjalo ka ge eka ke ka lentšu le tee ka go thopša ga Juda le go phološwa ga yona ka mohlolo bothopša. (Jeremia 25:11, 12) Mophološi wa Juda, Korese, o ile a bolelwa ka leina nako e telele pele a ka belegwa!​—Jesaya 44:26–45:1.

¹³ Ka baka la bohlatse bjo bjo bontši, ke mang yo a ka ganago gore Jehofa ke Modimo a nnoši wa therešo? Ka go se swane le medimo ya boheitene, ke Jehofa a nnoši yo a sa bopšago; ke yena a nnoši yo e lego Modimo wa therešo.a Ka baka leo, batho bao ba bitšwago ka leina la Jehofa ba na le tokelo ya moswana-noši le e thabišago kudu ya go tlo anegela meloko ya nakong e tlago le ba bangwe bao ba botšišago ka yena ditiro tša gagwe tše di makatšago. (Psalme 78:5-7) Ka tsela e swanago, Dihlatse tša Jehofa tša mehleng yeno di na le tokelo ya go tsebatša leina la Jehofa lefaseng ka moka. Ka bo-1920 Barutwana ba Beibele ba ile ba lemoga ka mo go oketšegilego bohlokwa bjo bo tseneletšego bja leina la Modimo, Jehofa. Ke moka ka July 26, 1931, kopanong ya Columbus, Ohio, mopresidente wa Mokgatlo, Joseph F. Rutherford, o ile a tšweletša setlamo se se nago le sehlogo se se rego, “Leina le Lefsa.” Mantšu a rego, “Re kganyoga go tsebja le go bitšwa ka leina leo, ke gore, dihlatse tša Jehofa,” a ile a thabiša batla-kopanong bao ba ilego ba amogela setlamo ka go goeletša ka gore “Ee!” Ga e sa le go tloga ka nako yeo, leina la Jehofa le ile la tuma lefaseng ka bophara.​—Psalme 83:18 (Psalme 83:19, PK).

14. Jehofa o gopotša ba-Isiraele eng, gomme ke ka baka la’ng kgopotšo ye e le nakong?

¹⁴ Jehofa o hlokomela bao ba rwalago leina la gagwe ka tlhompho, o ba lebelela e le “thaka ya leihlo la gagwe.” (PK) O gopotša ba-Isiraele ka se, a ba botša kamoo a ilego a ba phološa ka gona go tšwa Egipita gomme a ba etelela pele ka mo go šireletšegilego go phatša lešoka. (Doiteronomio 32:10, 12) Ka nako yeo go be go se na modimo o šele gare ga bona, ka gobane ba iponetše ka mahlo a bona go kokobetšwa mo go feletšego ga medimo ka moka ya Egipita. Ee, medimo ka moka ya Egipita ga se e kgone go šireletša Egipita goba go thibela go tloga ga Isiraele. (Ekisodo 12:12) Ka mo go swanago, Babele e matla yeo lefelo la yona la setoropo le tletšego ka bonyenyane ditempele tše 50 tša medimo ya maaka, e ka se kgone go thibela letsogo la Ra-matla-ohle ge a lokolla batho ba gagwe. Go molaleng gore “xa xo Mophološi” ka ntle le Jehofa.

Dipere tša Ntwa di a wa, Dikgolego di a Bulega

15. Jehofa o porofeta eng mabapi le Babele?

¹⁵ “Morêna Molopolodi wa lena, Mokxêthwa wa Isiraele, ó re: Ké ka ’baka la bô-lena xe ke roma xwa iwa Babele, xe bafaladi ba Kaladea kè ba theošetša xo ma-sela-watlê, a ba bexo ba fadiša ôna. Ké Nna Morêna Mokxêthwa wa lena, Mo-hlôla-Isiraele; ké Nna Kxoši ya lena. O r’yalo Morêna mo-thula-tsela-mawatleng, mmula-mmila mo meetseng-maxolo, Mo-nthša-madirá ka makoloi le dipitsi le makôkô a baxale. Ba tekotšwe bohle, ba ka se hlwê ba tsoxa, ba kunyêlêla bo-ka ’rumola se se timaxo.”​—Jesaya 43:14-17.

16. Ke eng seo se tlago go wela Babele, bagwebi ba ba-Kaladea le bohle bao e bego e ka ba bašireletši ba Babele?

¹⁶ Babele e swana le kgolego go mathopša ka gore e a thibela go boela Jerusalema. Eupša ditšhireletšo tša Babele ga se lepheko go Ra-matla-ohle, Yena yoo pejana a ilego a bula ‘tsela [Lewatleng le Lehwibidu], a bula mmila mo meetseng a magolo’​—ao mohlomongwe e bego e le meetse a Jorodane. (Ekisodo 14:16; Jošua 3:13) Ka tsela e swanago, motseta wa Jehofa, Korese o tla dira gore Eforate e matla e fokotšege, e lego seo se tlago go dumelela bahlabani ba gagwe gore ba tsene motseng. Bagwebi ba ba-Kaladea bao ba sesago mekerong ya Babele​—mekero ya meetse bakeng sa dikepe tše dikete tša kgwebo le bakeng sa diketswana tšeo di rwalago medimo ya Babele​—ba tla lla ba nyamile ge motse-mošate wa bona o matla o e-wa. Go swana le dikoloi tša Farao tša ntwa Lewatleng le Lehwibidu, dikoloi tša ntwa tša lebelo tša Babele e tla ba tšeo di sa thušego selo. Di ka se e phološe. Mohlasedi o tla fediša maphelo a bao e bego e tla ba bašireletši gabonolo kudu go fo swana le ge motho a tima thapo e kunyelelago ya lebone la makhura.

Jehofa o Iša Batho ba Gagwe Gae ka mo go Šireletšegilego

17, 18. (a) Jehofa o porofeta selo sefe “se sefsa”? (b) Ke ka tsela efe batho ba tlago go lebala tša kgale, gona ka baka la’ng?

¹⁷ Ge a bapiša ditiro tša gagwe tša pejana tša go phološa le seo a tla tlogago a se dira, Jehofa o re: “Lebalang tša kxalê; Le se šetšê tše di fetilexo. Ké Nna é! Ke dira tše mphsa, di šetše di tšwêlêla; a xa Le di bône? Ruri, ke tlo thula tsela lešokeng le dinoka mo naxeng e thsêhla. Diphôôfôlô tša lešôka di tlo nthêta, le phukubyê le mphšê, xobane ke tšweletša meetse lešokeng, le dinoka mo naxeng e thsêhla, xore xo nošwê sethšaba sa-ka, bahlaolwa ba-ka. Sôna sethšaba sé, se ke ipopetšexo sôna se tlo mpolêla ka dirêtô.”​—Jesaya 43:18-21.

¹⁸ Ge a re “lebalang tša kxalê,” Jehofa ga a re gore bahlanka ba gagwe ba phumole ditiro tša gagwe tša nakong e fetilego tša phološo menaganong ya bona. Ge e le gabotse, bontši bja ditiro tše ke karolo ya histori e buduletšwego ke Modimo ya Isiraele gomme Jehofa o laetše gore go tšwa ga bona Egipita go gopolwe ngwaga le ngwaga monyanyeng wa Paseka. (Lefitiko 23:5; Doiteronomio 16:1-4) Lega go le bjalo, Jehofa bjale o nyaka gore batho ba gagwe ba mo tumiše motheong wa “selo se sengwe se sefsa” (NW)​—selo seo ba tlago go iponela sona ka noši. Se ga se akaretše feela go phološwa ga bona Babele eupša se akaretša le leeto la bona la mohlolo la go ya gae, mohlomongwe ka go sepela tseleng e lebanyago ya leganateng. Nageng yeo ya lekwala, Jehofa o tla ba bulela “tsela” gomme o tla dira mediro e matla go etša seo a se diretšego ba-Isiraele mehleng ya Moše​—ruri, o tla fepa bao ba boelago morago ge ba le leganateng gomme a fediša lenyora la bona ka dinoka tša kgonthe. Ditokišetšo tša Jehofa e tla ba tše dintši kudu moo e lego gore gaešita le dibata di tla tumiša Modimo gomme tša tlogela go hlasela batho.

19. Mašaledi a Isiraele ya moya le bagwera ba ona ba sepela bjang ‘tseleng e kgethwa’?

¹⁹ Ka mo go swanago, ka 1919 mašaledi a Isiraele ya moya a ile a lokollwa bothopša bja Babele gomme a wela tseleng yeo Jehofa a bego a a lokišeleditše yona, “tsela-kxêthwa.” (Jesaya 35:8) Ka go se swane le ba-Isiraele, ga se ba ka ba swanelwa ke go sepela go phatša leganata le le fišago go tloga lefelong le lengwe la kgonthe go ya go le lengwe gomme leeto la bona le be le ka se phethwe ka morago ga dikgwedi tše sego kae ge ba gorogile Jerusalema. Lega go le bjalo, “tsela-kxêthwa” e ile ya lebiša mašaledi a Bakriste ba tloditšwego paradeiseng ya moya. Tabeng ya bona, ba dula ‘tseleng yeo e kgethwa’ ka ge ba sa dutše ba swanelwa ke go tšea leeto go feta tshepedišong ye ya dilo. Ge feela ba dutše tseleng e kgolo​—ge feela ba ela hloko ditekanyetšo tša Modimo tša bohlweki le bokgethwa​—ba dutše paradeiseng ya moya. Le gona ba thabišwa gakaakang ke go tlatšwa ke lešaba le legolo la bagwera “bao e sego ba-Isiraele”! Ka go fapana kudu le bao ba ithekgilego ka tshepedišo ya Sathane, mašaledi gotee le bagwera ba ona ba tšwela pele ba thabela monyanya o humilego wa moya seatleng sa Jehofa. (Jesaya 25:6; 65:13, 14) Ka go lemoga tšhegofatšo ya Jehofa bathong ba gagwe, batho ba bantši ba go swana le dibata ba fetotše ditsela tša bona gomme ba tumiša Modimo wa therešo.​—Jesaya 11:6-9.

Jehofa o Utolla go kwa ga Gagwe Bohloko

20. Isiraele ya mehleng ya Jesaya e fošeditše Jehofa bjang?

²⁰ Mehleng ya bogologolo mašaledi a tsošološitšwego a Isiraele e be e le batho ba fetogilego ge ba bapišwa le moloko o kgopo wa mehleng ya Jesaya. Jehofa o bolela ka ba ba ba boletšwego morago gore: “Xe e le wêna Jakobo, xa se wêna O mpiditšexo, xa wa ka wa itapiša ka Nna, wêna Isiraele. Dikwanyana tša didimo tš’axo, xa wa ka wa di tlišetša Nna. Xa wa ka wa xodiša Nna ka dihlabêlô tša xaxo; xa nka ka Xo rwadiša dilobá, xa nka ka Xo lapiša ka ditlôlô. Xa wa ka wa nthêkêla diôrêlô ka thsipi e thsêhla; xa wa ka wa nkhoriša ka makhura a didimo tš’axo. Ruri O nthloletše modirô ka dibe tša xaxo, O ntapišitše ka makxôpô a xaxo.”​—Jesaya 43:22-24.

21, 22. (a) Ke ka baka la’ng go ka thwe dilo tšeo Jehofa a di nyakago ga di boima? (b) Gabotse-botse, batho ba dira bjang gore Jehofa a ba hlankele?

²¹ Ka go bolela gore, “xa nka ka Xo rwadiša dilobá, xa nka ka Xo lapiša ka ditlôlô,” Jehofa ga a re gore sehlabelo le diorelo (karolo ya sebego se sekgethwa) ga di nyakege. Ka kgonthe, tše ke karolo ya motheo ya borapedi bja therešo ka tlase ga kgwerano ya Molao. Go bjalo le ka “diôrêlô,” tšeo di šupago calamus yeo e nkgago bose, e lego motswako wa monkgo o bose wa makhura a makgethwa a go tlotša. Ba-Isiraele ba be ba hlokomologa go dirišwa ga dilo tše tirelong ya tempele. Eupša na dinyakwa tše bjalo ke tše boima? Le gatee-tee! Dilo tšeo Jehofa a di nyakago di bohwefo ge di bapišwa le tša medimo ya maaka. Ka mohlala, modimo wa maaka Moloko o be o nyaka gore bana ba dirwe dihlabelo​—selo seo Jehofa a bego a se a ka a se nyaka le ka mohla!​—Doiteronomio 30:11; Mika 6:3, 4, 8.

²² Ge feela nkabe ba-Isiraele ba bile le temogo ya moya, gona le ka mohla ba be ba ka se ke ba ‘lapiša Jehofa.’ Ka go lebelela Molaong wa gagwe, ba be ba tla bona lerato la gagwe le le tseneletšego leo a ba ratago ka lona gomme ba mo nea “makhura,” e lego karolo e kaone-kaone ya dihlabelo tša bona ka lethabo. Go e na le moo, ba ipolokela makhura ka megabaru. (Lefitiko 3:9-11, 16) Setšhaba se se kgopo se imetša Jehofa gakaakang ka morwalo wa dibe tša sona​—ge e le gabotse, se mo dira gore a se hlankele!​—Nehemia 9:28-30.

Tayo e Tšweletša Dienywa

23. (a) Ke ka baka la’ng tayo ya Jehofa e le e swanetšego kudu? (b) Go laya ga Modimo Isiraele go akaretša’ng?

²³ Gaešita le ge e le e šoro, gomme e le bjalo ka mo go swanetšego, tayo ya Jehofa e fihlelela mafelelo a kganyogegago, e dira gore kgaugelo e kgonege. “Ké Nna ke phomolaxo bokxeloxi bya xaxo kè dira ka ’baka la-ka, ’me ke se hlwê ke xopola dibe tša xaxo. Nkeletšê-xê, re sekišanê; xo bolêlê wêna xo bônalê xe O se molato. Tat’axo wa mathômô ó dirile dibe, ’me ba-êta-pele [“bahlatholodi,” mongwalo wa ka tlase wa NW] b’axo ba be ba nthlanoxêla. Nna ka nyatšiša baxolo ba Ntlo-kxêthwa, Jakobo ka mo dira sexafiwa-moka, Isiraele a ba sexoboxa.” (Jesaya 43:25-28) Go etša ditšhaba ka moka tša lefase, Isiraele e tšwa go Adama, “wa mathômô.” Ka gona, ga go na mo-Isiraele yo a ka itlhatselago a se na “molato.” Gaešita le “baboleledi” (NW) ba Isiraele​—barutiši goba bahlatholodi ba yona ba Molao​—ba dirile sebe malebana le Jehofa gomme ba ruta maaka. Ka gona, Jehofa o tla gafela setšhaba sa gagwe ka moka “tshenyegong” (NW) le go ba “sexoboxa.” Gape o tla nyatšiša bohle bao ba hlankelago ‘ntlong-kgethwa’ ya gagwe goba sekgethweng sa gagwe.

24. Jehofa o tla lebalela batho ba gagwe ka lebaka lefe le legolo​—bobedi ba bogologolo le ba mehleng yeno​—lega go le bjalo, maikwelo a gagwe ka bona ke afe?

²⁴ Lega go le bjalo, ela hloko gore kgaugelo yeo e tlago ya Modimo e ka se fo ba gona ka baka la boitsholo bja Isiraele; e tla ba ka baka la Jehofa. Ee, leina la gagwe le a akaretšwa. Ge nkabe a tlogele Isiraele e le bothopšeng bja sa ruri, leina la gagwe le be le tla gobošwa ke babogedi. (Psalme 79:9; Hesekiele 20:8-10) Ka mo go swanago le lehono, phološo ya batho ke selo se se latelago kgethagatšo ya leina la Jehofa le go lwelwa ga bogoši bja gagwe. Lega go le bjalo, Jehofa o rata bao ba amogelago tayo ya gagwe ka ntle le kgonono le bao ba mo rapelago ka moya le ka therešo. O bontšha lerato la gagwe la go ba rata​—go sa šetšwe gore ke batlotšwa goba dinku tše dingwe​—ka go phumola dikarogo tša bona motheong wa sehlabelo sa Jesu Kriste.​—Johane 3:16; 4:23, 24.

25. Ke dilo dife tše di makatšago kudu tše Jehofa a tlago go di dira nakong e tlago e lego kgaufsi, gomme re ka bontšha bjang tebogo ya rena gona bjale?

²⁵ Go feta moo, Jehofa kgaufsinyane o tla bontšha lerato la gagwe go lešaba le legolo la barapedi ba gagwe ba botegago ka go se kwanantšhe ge a ba direla selo se sengwe se sefsa ka go ba phološa “tlaišexong e kxolo” a ba tsenya ‘lefaseng le lefsa’ le le hlwekišitšwego. (Kutollo 7:14; 2 Petro 3:13) Ba tla iponela ka noši ponagatšo e makatšago kudu ya matla a Jehofa ao a kilego a bonwa ke batho. Tebelelo ya kgonthe ya tiragalo yeo e dira mašaledi a tloditšwego le bohle bao ba bopago lešaba le legolo gore ba thabe le go phela letšatši le lengwe le le lengwe ka go dumelelana le taelo yeo e phagamego e rego: “Lena Le dihlatse tša-ka”!​—Jesaya 43:10.

[Mengwalo ya ka tlase]

[Seswantšho go letlakala 48, 49]

Jehofa o tla thekga ba-Juda tseleng ya bona ya go ya gae Jerusalema

[Diswantšho go letlakala 52]

Jehofa o hlohla ditšhaba gore di tšweletše dihlatse tša medimo ya tšona

1. Sehlwa-seeme sa “bronze” sa Baali  2. Diswantšho tša letsopa tša Asiterothe  3. Boraro botee bja Egipita bja Horus, Osiris le Isis  4. Medimo ya Gerika e lego Athena (ka go le letshadi) le Aphrodite

[Diswantšho go letlakala 58]

“Lena Le dihlatse tša-ka.”​—Jesaya 43:10