Kgaolo ya Lesome-tshela

Molaetša wa Kholofelo Bakeng sa Mathopša a Nyamilego

Jesaya 55:1-13

1. Hlalosa boemo bja mathopša a ba-Juda Babele.

E BE e le nako e nyamišago historing ya Juda. Batho ba Modimo ba kgwerano ba be ba tšerwe nageng ya gabo bona ka kgang gomme ga bjale ba be ba tlaišega bothopšeng Babele. Go ba gona, ba be ba neilwe tekanyo e itšego ya tokologo ya go ka phetha mediro ya bona ya letšatši le letšatši. (Jeremia 29:4-7) Ba bangwe ba ile ba tlwaeletšwa go ba le bokgoni bjo itšego goba ba tsenela mediro ya tša kgwebo.a (Nehemia 3:8, 31, 32) Lega go le bjalo, bophelo bja mathopša a ba-Juda bo be bo se bonolo. A be a le bohlankeng, bobedi nameng le moyeng. Anke re boneng gore e be e le ka tsela efe.

2, 3. Bothopša bo ile bja kgoma bjang go rapela ga ba-Juda Jehofa?

² Ge madira a Babele a be a senya Jerusalema ka 607 B.C.E., a ile a dira se se fetago go fediša naga; gape a ile a šwalalanya le borapedi bja therešo. A ile a hlahlamolla tempele ya Jehofa gomme a e senya, a šitiša thulaganyo ya boperisita ka go thopa ba bangwe ba moloko wa Lefi gomme ba bangwe a ba bolaya. Ka ge go be go se na ngwako wa borapedi, go se na aletare e bile go se na boperisita bjo bo rulagantšwego, ba-Juda ba be ba sa kgone gore ba neele Modimo wa therešo dihlabelo bjalo ka ge Molao o be o laela.

³ Ba-Juda ba botegago ba be ba sa dutše ba ka boloka boemo bja bona bja bodumedi ka go bolla le go latela Molao go fihla tekanyong e itšego ka mo go kgonegago. Ka mohlala, ba be ba ka ila dijo tše di ileditšwego le go boloka Sabatha. Eupša ka go dira bjalo, ba ile ba ipea kotsing ya go kwerwa ke bathopi ba bona, ka gobane ba-Babele ba be ba lebelela ditirelo tša bodumedi tša ba-Juda e le bošilo. Boemo bjo bo nyamišago bja mathopša bo ka bonwa mantšung a mopsalme a rego: “Dinokeng tša kwa Babele, ké mo re bexo re dutše rè lla, rè xopola Tsione. Diletšô tša rena re be re di fexile mexokareng ya xôna. Rè le nthse bathopi ba rena ba re lôpa ba re re ôpêlê; batlaiši ba rena ba re: Thabang, Le re kxaêlê koša ya Tsione.”​—Psalme 137:1-3.

4. Ke ka baka la’ng go be go ka se thuše selo go ba-Juda gore ba tsome phološo ditšhabeng tše dingwe, eupša ba be ba ka retologela go mang bakeng sa thušo?

⁴ Ka gona, mathopša a ba-Juda a be a ka retologela go mang bakeng sa khomotšo? Phološo ya ona e be e tla tšwa kae? Ruri e be e ka se tšwe setšhabeng le ge e le sefe sa ditšhaba tše di e dikologilego! Ka moka ga tšona di be di se na matla a go lwantšha madira a Babele gomme bontši bja tšona bo be bo hloile ba-Juda. Eupša boemo e be e se bja go itlhoboga. Jehofa, yo ba bego ba rabetše malebana le yena nakong ya ge e be e sa le batho ba lokologilego, o ile a fetišetša taletšo e kgothatšago go bona ka kwelobohloko, gaešita le ge ba be ba le bothopša.

“Tlang Meetseng!”

5. Ke eng seo se bolelwago ke mantšu a rego “tlang meetseng”?

⁵ Jehofa ka Jesaya o bolela ka tsela ya boporofeta le mathopša a ba-Juda a lego Babele gore: “Hee, lena ka moka ba le nyorilwego, tlang meetseng! gomme ba le se nago sa go reka, tlang! le reke, le je; tlang, le reke beine le mafsi go [se] tšhelete, go [se] sa go reka.” (Jesaya 55:1, PK) Mantšu a a tletše ditaba tša go swantšhetša. Ka mohlala, ela hloko taletšo e rego: “Tlang meetseng!” Bophelo ka ntle le meetse ga bo kgonege. Ka ntle le seela seo se bohlokwa, rena batho re ka phela feela lebaka la mo e ka bago beke. Ka gona, ke mo go swanelago gore Jehofa o diriša meetse e le tshwantšhišo ya kamoo mantšu a gagwe a tlago go kgoma mathopša a ba-Juda ka gona. Molaetša wa gagwe o tla a lapološa bjalo ka seno se se tonyago letšatšing le le fišago. O tla a tloša boemong bja go nyema moko, gomme wa timola lenyora la ona la go nyorelwa therešo le toko. Le gona o tla a nea kholofelo ya go lokologa bothopšeng. Lega go le bjalo, e le gore a holege, mathopša a ba-Juda a tla swanelwa ke go nwa molaetša wa Modimo, a o ele hloko gomme a dire ka go dumelelana le wona.

6. Ba-Juda ba tla holega bjang ge e ba ba reka “beine le mafsi”?

⁶ Jehofa gape o nea “beine le mafsi.” Mafsi a tiiša mebele ya bana gomme a ba thuša gore ba gole. Ka mo go swanago, mantšu a Jehofa a tla matlafatša batho ba gagwe moyeng gomme a dira gore ba kgone go tiiša tswalano ya bona le yena. Go thwe’ng-ge ka beine? Beine e dirišwa gantši meletlong. Ka Beibeleng, e tswalanywa le katlego le go thaba. (Psalme 104:15) Ka go botša batho ba gagwe gore ba “reke beine,” Jehofa o ba kgonthišetša gore go boela ga bona borapeding bja therešo ka pelo ka moka go tla dira gore ba ‘fele ba thabile.’​—Doiteronomio 16:15; Psalme 19:8; Diema 10:22.

7. Ke ka baka la’ng kwelobohloko yeo Jehofa a e bontšhitšego mathopša e le e lemogegago, gomme e re ruta’ng ka yena?

⁷ Go nea ga Jehofa ba-Juda ba thopilwego tapološo e bjalo ya moya ke go bontšha kgaugelo e kgolo gakaakang! Kwelobohloko ya gagwe ke yeo e lemogegago ka go fetišiša ge re gopola histori ya ba-Juda ya bonganga le borabele. Ga se taba ya gore ba swanelwa ke kamogelo ya Jehofa. Lega go le bjalo, mopsalme Dafida o ile a ngwala nywaga-kgolong pejana gore: “Morêna ké Moxauxedi, ké wa mabobo, ké Mo-se-fêle-pelo wa botho byo boxolo. A ka se lwe ka mehla, a ka se dule à befetšwe xo ya xo ile.” (Psalme 103:8, 9) Go e na le go ikaroganya le batho ba gagwe, Jehofa ke yena a thomago a dira poelano. Ka kgonthe, ke Modimo yo ‘a kgahlwago ke go gaugela.’​—Mika 7:18, bapiša le PK.

Go Bota Bao ba sa Swanelago

8. Bontši bja ba-Juda bo ile bja bota eng, gomme go sa šetšwe temošo efe?

⁸ Go ba go fihla mo nakong ye, ba-Juda ba bantši ga se ba ka ba bota Jehofa ka mo go feletšego bakeng sa phološo. Ka mohlala, pele ga go wa ga Jerusalema, babuši ba yona ba ile ba tsoma thekgo ditšhabeng tše matla, go le bjalo ka ge eka ba gweba ka mebele ya bona go Egipita gotee le Babele. (Hesekiele 16:26-29; 23:14) Jeremia o ile a ba lemoša a e-na le lebaka le le kwagalago ka gore: “Go rogilwe monna e a holofelago batho, e a dirago nama go ba letsogo la gagwe, yo pelo ya gagwe e fularetšego Jehofa.” (Jeremia 17:5, PK) Go ba gona, seo ke sona-sona seo batho ba Modimo ba ilego ba se dira!

9. Ke bjang ba-Juda ba bantši go ka diregago gore ba ‘ntšha tšhelete bakeng sa seo e sego bogobe’?

⁹ Ga bjale ba dirilwe makgoba a se sengwe sa ditšhaba tšeo ba bego ba di botile. Na ba ithutile thuto? Go ka direga gore ba bantši ga se ba ithuta, ka gobane Jehofa o botšiša gore: “Tše e sexo boxôbê Le re’ng Le di nthšetša thšêlêtê? Le re’ng Le nthša tše Le itapišeditšexo tšôna, la rêka se sa horišexo?” (Jesaya 55:2a) Ge e ba ba-Juda ba thopilwego ba botile motho le ge e le ofe ka ntle le Jehofa, gona ba ‘ntšha tšhelete bakeng sa seo e sego bogobe.’ Ruri Babele e ka se ke ya ba lokolla ka baka la molao wa yona wa gore le ka mohla go se dumelelwe mathopša a boela gae. Go bolela therešo, le ge Babele e e-na le pušo e katologilego, tša kgwebo le borapedi bja maaka, ga go na seo e tlago go se nea ba-Juda ba thopilwego.

10. (a) Jehofa o tla putsa bjang ba-Juda ba thopilwego ge e ba ba mo theetša? (b) Jehofa o be a dirile kgwerano efe le Dafida?

¹⁰ Jehofa o dira boipiletšo go batho ba gagwe ka gore: “Kwang se Nna ke se bolêlaxo, ké mo Le tl’o xo ja tše bose, la iphsina ka mahura. Sêkêxang ditsêbê Le tlê xo Nna, Le kwê, xore meôya ya lena e phelê, xore ke dirê kxwêranô le lena, kxwêranô ye e sa felexo ya mabolêta a makxonthe a Dafida.” (Jesaya 55:2b, 3) Kholofelo e nnoši ya batho bao ba sa hwetšego phepo e botse ya moya e go Jehofa yoo ga bjale a bolelago le bona ka tsela ya boporofeta ka Jesaya. Maphelo a bona a ithekgile ka go theetša molaetša wa Modimo, ka gobane o re ka go dira ga bona bjalo, ‘meoya ya bona e tlo phela.’ Ka gona, “kxwêranô ye e sa felexo” yeo Jehofa a tlago go e dira le bao ba arabelago go yena ke eng? Kgwerano yeo e “mabapi le botho bjo lerato go Dafida.” (NW) Nywaga-kgolo pejana, Jehofa o ile a holofetša Dafida gore sedulo sa gagwe sa bogoši se be se tla ba “xôna ka mehla le mehla.” (2 Samuele 7:16) Ka gona, “kxwêranô ye e sa felexo” yeo go bolelwago ka yona mo e šupa pušo.

Moja-bohwa wa Neng le Neng Mmušong wa ka mo go sa Felego

11. Ke ka baka la’ng phethagalo ya kholofetšo yeo Modimo a e dirilego go Dafida e ka bonala e sa kgonege go mathopša a lego Babele?

¹¹ Ke therešo gore kgopolo ya go ba le pušo lelokong la Dafida e ka bonala e sa kgonege go mathopša ao a ba-Juda. Ba lahlegetšwe ke naga ya bona gaešita le ke setšhaba sa bona! Eupša seo e fo ba sa nakwana. Jehofa ga se a lebale kgwerano ya gagwe le Dafida. Go sa šetšwe kamoo go ka bonalago ka gona eka ga go kgonege go ya ka pono ya batho, morero wa Modimo mabapi le Mmušo wa ka mo go sa felego lelokong la Dafida o tla atlega. Eupša bjang, gona neng? Ka 537 B.C.E., Jehofa o lokolla batho ba gagwe bothopšeng bja Babele gomme o ba bušetša nageng ya gabo bona. Na se se feleletša ka go thewa ga mmušo wa ka mo go sa felego? Aowa, ba tšwela pele ba hlankela mmušo o mongwe wa boheitene, e lego wa ba-Meda le ba-Peresia. “Nako e beilwego” ya gore ditšhaba di buše e be e se ya hlwa e fela. (Luka 21:24, bapiša le NW.) Ka ge go be go se na kgoši kua Isiraele, kholofetšo yeo Jehofa a e neilego Dafida e be e tla dula e sa phethagala lebakeng la nywaga-kgolo yeo e bego e sa tla.

12. Ke mogato ofe woo Jehofa a ilego a o gata mabapi le go phethagatša kgwerano ya gagwe ya Mmušo yeo a bego a e dirile le Dafida?

¹² Lebakeng la nywaga e fetago 500 ka morago ga go lokollwa ga Isiraele bothopšeng bja Babele, Jehofa o ile a gata mogato o mogolo mabapi le go phethagatša kgwerano ya Mmušo ge a be a fetišetša bophelo bja Morwa wa gagwe wa leitšibolo, e lego mathomo a modiro wa gagwe wa tlholo, go tšwa letagong la legodimo a bo tsenya popelong ya kgarebe ya mo-Juda e lego Maria. (Ba-Kolose 1:15-17) Ge a tsebatša tiragalo yeo, morongwa wa Jehofa o ile a botša Maria gore: “Yêna-eo e tlo ba e moxolo, ó tlo bitšwa Morwa wa Yo-xodimo-dimo; ’me Morêna ó tlo mo nea sedulô sa Dafida tat’axwe. Ó tlo buša moloko wa Jakobo xo iša mehleng ya neng le neng; ’me boxoši bya xaxwe bo ka se kê bya ba le bofêlô.” (Luka 1:32, 33) Ka gona Jesu o ile a belegelwa lelokong la bogoši la Dafida gomme a tšea tshwanelo ya bogoši e le bohwa. Ge a beilwe sedulong sa bogoši, Jesu o be a tla buša go iša “mehleng ya neng le neng.” (Jesaya 9:6; Daniele 7:14) Ka go rialo tsela e be e bulegile bakeng sa phethagalo ya kholofetšo ya Jehofa ya nywaga-kgolo e mentši ya go nea Kgoši Dafida moja-bohwa wa neng le neng.

“Molaodi wa Ditšhaba”

13. Jesu o ile a ba bjang “hlatse go ditšhaba” nakong ya bodiredi bja gagwe gotee le ka morago ga thotogelo ya gagwe?

¹³ Kgoši ye ya nakong e tlago e tla dira’ng? Jehofa o re: “Bonang ke beile yena gore e be hlatse go ditšhaba, e be kgoši, e be molaodi wa ditšhaba.” (Jesaya 55:4, PK) Ge Jesu a gotše, o ile a ba moemedi wa Jehofa mo lefaseng, e lego hlatse ya Modimo ditšhabeng. Nakong ya bophelo bja gagwe e le motho, bodiredi bja gagwe bo ile bja lebišwa go “dinku tše di timetšexo tša moloko wa Isiraele.” Lega go le bjalo, pejana ga ge a ka rotogela legodimong, Jesu o ile a bolela le balatedi ba gagwe a re: “Ké xôna yang Le dirê dithšaba ka moka barutiwa . . . Tsebang, ke na le lena ka mehla xo fihla bofelong bya lefase.” (Mateo 10:5, 6; 15:24; 28:19, 20) Ka go rialo, ge nako e dutše e e-ya molaetša wa Mmušo o ile wa išwa go bao e sego ba-Juda gomme ba bangwe ba bona ba ile ba ba le karolo phethagatšong ya kgwerano yeo e bego e dirilwe le Dafida. (Ditiro 13:46) Ka tsela ye, gaešita le ka morago ga lehu la gagwe, tsogo le go rotogela ga gagwe legodimong, Jesu o ile a tšwela pele e le “hlatse [ya Jehofa] go ditšhaba.”

14, 15. (a) Jesu o ile a ipontšha bjang e le “moetapele le molaodi”? (b) Balatedi ba Jesu ba lekgolong la pele la nywaga ba be ba e-na le tebelelo efe?

¹⁴ Jesu gape e be e tla ba “moetapele le molaodi.” (NW) Ka go dumelelana le tlhaloso ye ya boporofeta, Jesu ge a be a le lefaseng o ile a amogela ka botlalo boikarabelo bja go ba ga gagwe hlogo gomme a etelela pele maemong ka moka, a tanya tlhokomelo ya mašaba a mantši, a a ruta mantšu a therešo le go bontšha mehola yeo e tlelago bao ba latelago boetapele bja gagwe. (Mateo 4:24; 7:28, 29; 11:5) O ile a tlwaetša barutiwa ba gagwe ka mo go atlegilego, a ba lokišeletša go tlo swarega lesolong la boboledi leo le bego le le ka pele. (Luka 10:1-12; Ditiro 1:8; Ba-Kolose 1:23) Ka nywaga e meraro le seripa feela, Jesu o ile a thea motheo bakeng sa phuthego e nago le botee ya ditšhaba-tšhaba yeo e nago le ditho tše dikete go tšwa merafong e mentši! Ke feela “moetapele le molaodi” wa therešo yo a bego a ka phetha modiro o bjalo o mogolo.b

¹⁵ Bao ba bego ba kgobokeletšwa phuthegong ya Bokriste ya lekgolong la pele la nywaga ba be ba tlotšwa ka moya o mokgethwa wa Modimo gomme ba e-na le tebelelo ya go ba babuši-gotee le Jesu Mmušong wa gagwe wa legodimong. (Kutollo 14:1) Lega go le bjalo, boporofeta bja Jesaya bo fetela ka kua ga mehla ya Bokriste bja pele. Bohlatse bo bontšha gore Jesu Kriste ga se a ka a thoma go buša e le Kgoši ya Mmušo wa Modimo go ba go fihla ka 1914. Go se go ye kae ka morago ga moo, go ile gwa tšwelela boemo gare ga Bakriste ba tloditšwego ba ba lego lefaseng bjoo bo bego bo swana ka dilo tše dintši le boemo bja ba-Juda ba thopilwego ba lekgolong la botshelela la nywaga B.C.E. Ge e le gabotse, seo se diragaletšego Bakriste bao se bopa phethagalo e kgolwanyane ya boporofeta bja Jesaya.

Bothopša le go Lokollwa ga Mehleng Yeno

16. Go bewa ga Jesu sedulong sa bogoši ka 1914 go ile gwa latelwa ke tlalelo efe?

¹⁶ Go bewa ga Jesu sedulong sa bogoši e le Kgoši ka 1914 go ile gwa swawa ka tlalelo e sa hlalosegego ya lefase. Ka baka la’ng? Ka gobane Jesu o ile a leleka Sathane le dibopiwa tše dingwe tše kgopo tša moya legodimong ge a be a e-ba Kgoši. Ge a šetše a lahletšwe lefaseng, Sathane o ile a thoma go tsoša ntwa malebana le bakgethwa ba šetšego, e lego mašaledi a Bakriste ba tloditšwego. (Kutollo 12:7-12, 17) Ditaba di ile tša fihla seremong ka 1918 ge modiro wa boboledi bja phatlalatša o be o nyaka o kgaotša ka mo go feletšego gomme bahlankedi ba ikarabelago ba Mokgatlo wa Watch Tower ba swarwa ka baka la ditatofatšo tša maaka tša go lwantšha mmušo. Ka tsela ye, bahlanka ba mehleng yeno ba Jehofa ba ile ba ya bothopšeng bja moya, bjo bo swanago le bothopša bja kgonthe bja ba-Juda ba bogologolo. Ba ile ba aparelwa ke kgobogo e kgolo.

17. Boemo bja batlotšwa bo ile bja fetošwa bjang ka 1919, gomme ba ile ba matlafatšwa bjang ka nako yeo?

¹⁷ Lega go le bjalo, boemo bja bothopša bja bahlanka ba tloditšwego ba Modimo ga se bja ka bja tšea lebaka le letelele. Ka March 26, 1919, bahlankedi bao ba bego ba swerwe ba ile ba lokollwa gomme ka morago gwa fedišwa ditatofatšo ka moka malebana le bona. Jehofa o ile a tšhollela moya o mokgethwa godimo ga batho ba gagwe ba lokolotšwego, a ba matlafaletša modiro wo o bego o letše ka pele. Ka lethabo, ba ile ba arabela taletšong e rego ba “tšeê meetse a bophelô [a fogo] fiwa fêla.” (Kutollo 22:17) Ba rekile “beine le mafsi go [se] tšhelete, go [se] sa go reka” gomme ba ile ba matlafatšwa moyeng bakeng sa kgolo e makatšago yeo e bego e tla ba gona, yeo mašaledi a tloditšwego a bego a sa ka a e bona e sa le pele gore e tla ba gona.

Lešaba le Legolo le Kitimela go Batlotšwa ba Modimo

18. Ke dihlopha dife tše pedi tšeo di hwetšwago gare ga barutiwa ba Jesu Kriste, gomme di bopa eng lehono?

¹⁸ Barutiwa ba Jesu ba na le e nngwe ya dikholofelo tše tše pedi. Sa pele, “mohlatswana o monyenyane” woo palo ya wona e lego 144 000 o ile wa kgoboketšwa​—e lego Bakriste ba tloditšwego ba bobedi setlogo sa Sejuda gotee le ba ba-Ntle bao e lego “Ba-Isiraele ba Modimo” gomme ba e-na le kholofelo ya go buša le Jesu Mmušong wa gagwe wa legodimong. (Luka 12:32; Ba-Galatia 6:16; Kutollo 14:1) Sa bobedi, mehleng ya bofelo, “lešaba le lexolo” la “dinku tše dingwê” le ile la iponagatša. Ba ba na le kholofelo ya go phela ka mo go sa felego lefaseng la paradeise. Pele ga ge masetla-pelo a magolo a phulega, lešaba le​—leo palo ya lona e sa tsebjego e sa le pele​—le hlankela gotee le mohlatswana o monyenyane gomme dihlopha tše ka bobedi di bopa “mohlape o tee” ka tlase ga “modiši o tee.”​—Kutollo 7:9, 10; Johane 10:16.

19. “Sethšaba” seo Isiraele ya Modimo e bego e sa se tsebe pele se ile sa arabela bjang taletšong ya setšhaba seo sa moya?

¹⁹ Go kgoboketšwa ga lešaba le le legolo go ka lemogwa mantšung a latelago a boporofeta bja Jesaya: “Ké yêna a tl’o xo bitša sethšaba O sa se tsebexo; ’me ’thšaba se sa Xo tsebexo, se tlo tla xo wene ka ’baka la Morêna Modimo wa xaxo, ka ’baka la Mokxêthwa wa Isiraele, ka xe a Xo taxišitše.” (Jesaya 55:5) Nywageng ya ka morago ga go lokollwa ga ona bothopšeng bja moya, mašaledi a tloditšwego mathomong a be a sa kwešiše gore a be a tla dirišetšwa go biletša “sethšaba” se segolo borapeding bja Jehofa pele ga Haramagedone. Lega go le bjalo, ge nako e dutše e tšwela pele, batho ba bantši ba dipelo tše botegago bao ba bego ba se na kholofelo ya legodimong ba ile ba thoma go kopanela le batlotšwa gomme ba hlankela Jehofa ka phišego e swanago le ya batlotšwa. Batho ba bao ba sa tšwago go fihla ba ile ba ela hloko boemo bjo bo tagafaditšwego bja batho ba Modimo, ba lemoga gore Jehofa o be a le gare ga bona. (Sakaria 8:23) Ka bo-1930, batlotšwa ba ile ba thoma go kwešiša gore sehlopha se seo dipalo tša sona di bego di gola gare ga bona ke bomang. Ba ile ba ba ba lemoga gore modiro o mogolo wa go kgoboketša o be o sa dutše o le ka pele. Lešaba le legolo le be le akgofela go ikopanya le batho ba Modimo ba kgwerano e bile e le ka lebaka le le kwagalago.

20. (a) Ke ka baka la’ng go ‘tsoma Jehofa’ e le mo go akgofilego mehleng ya rena, gomme se se dirwa bjang? (b) Jehofa o tla arabela bjang go bao ba mo tsomago?

²⁰ Mehleng ya Jesaya, go ile gwa tšwa taletšo e rego: “Nyakang Morêna è sa le lebaka la xo ka mmôna, Le mmitšeng à sa le kxaufsi.” (Jesaya 55:6) Mantšu a ke a swanetšego mehleng ya rena, bakeng sa bao ba bopago Isiraele ya Modimo gotee le bakeng sa lešaba le legolo leo le golago. Tšhegofatšo ya Jehofa ga se yeo e sa lekanyetšwago, e bile taletšo ya gagwe ga se yeo e dirwago go iša ka mo go sa felego. Bjale ke nako ya go tsoma kamogelo ya Modimo. Ge nako e beilwego ya kahlolo ya Jehofa e fihla, nako e tla be e šetše e ile. Ka gona, Jesaya o re: “E mobe a a lahlê tsela y’axwe; motho yo kxôpô a lahlê dikêlêlô tš’axwe, a boêlê xo Morêna, a mo xauxêlê; a boêlê xo Modimo wa rena, xobane ké wa tebalêlô e nntši.”​—Jesaya 55:7.

21. Setšhaba sa Isiraele se ile sa ipontšha bjang e le seo se sa botegelego boipolelo bjo bo dirilwego ke bo-rakgolokhukhu ba bona?

²¹ Polelwana e rego “a boêlê xo Morêna” e bolela gore bao go nyakegago gore ba itshole ba be ba e-na le tswalano le Modimo pele. Polelwana ye e re gopotša gore dibopego tše dintši tša karolo ye ya boporofeta bja Jesaya di ile tša šoma pele go mathopša a ba-Juda kua Babele. Nywaga-kgolo pele ga moo, bo-rakgolokhukhu ba mathopša a ba ile ba bolela boikemišetšo bja bona bja go ba ba kwago Jehofa ge ba be ba bolela gore: “Xo tloxêla Morêna, le xo y’o hlankêla medimo e šele, a di bê kxolê le rena [“ke selo se se ronago,” NW].” (Jošua 24:16) Histori e bontšha gore “selo se se ronago” se ile sa direga e le ka kgonthe​—leboelela! Go hlaelelwa ke tumelo ga batho ba Modimo ke lebaka leo le dirilego gore e be mathopša kua Babele.

22. Ke ka baka la’ng Jehofa a re dikgopolo le ditsela tša gagwe di phagametše tša batho?

²² Go tla direga’ng ge e ba ba ka itshola? Jehofa ka Jesaya o holofetša gore ke wa “tebalêlô e nntši.” Le gona o oketša ka gore: “Xobane tša-ka dikêlêlô xa se ’kêlêlô tša lena; ’me tša lena ditsela xa se ditsela tša-ka! Ó r’yalo Morêna. Bo-ka maxodimo à le kwa xodimo kxolê le lefase, le ditsela tša-ka di xodimo kxolê le ditsela tša lena; le kêlêlô tša-ka di xodimo kxolê le tša lena.” (Jesaya 55:8, 9) Jehofa o phethagetše gomme dikgopolo le ditsela tša gagwe ke tše di phagamego ka mo go sa fihlelelwego. Gaešita le kgaugelo ya gagwe e tekanyong yeo rena batho le ka mohla re ka se kego ra holofela go ka e fihlelela. Ela hloko: Ge re lebalela mogagabo rena, ke taba ya gore modiradibe o lebalela modiradibe yo mongwe. Re lemoga gore ka nako e nngwe re tla be re nyaka gore yo mongwe wa magagabo rena a re lebalele. (Mateo 6:12) Eupša gaešita le ge le ka mohla go ka se ke gwa nyakega gore a lebalelwe, Jehofa o lebalela ka “tebalêlô e nntši”! Ka kgonthe, ke Modimo wa botho bjo bogolo bjo lerato. Le gona Jehofa ka kgaugelo ya gagwe o bula mašoba a legodimo, a tšhollela ditšhegofatšo go bao ba boelago go yena ka dipelo tša bona ka moka.​—Maleaki 3:10.

Ditšhegofatšo tša Bao ba Boelago go Jehofa

23. Jehofa o swantšhetša bjang kgonthišetšo ya go phethagala ga lentšu la gagwe?

²³ Jehofa o holofetša batho ba gagwe gore: “Bo-ka pula le leswêla dì e-tšwa lexodimong, ’me di se hlwê di boêla xôna, ya ba tša xo nošetša lefase xore le hloxišê dibyalo, di melê, di fê mobyadi peu, le moji boxôbê,​—le Lentšu la-ka le le tšwaxo molomong wa-ka, le ka se boêle xo Nna lè le fêla; le tlo dira se nkxahlaxo, le tlo phêtha se ke le rometšexo sôna.” (Jesaya 55:10, 11) Selo se sengwe le se sengwe seo Jehofa a se bolelago se tla phethagala e le ka kgonthe. Go etša ge pula le lehlwa tšeo di rothago di e-tšwa leratadimeng di phetha morero wa tšona wa go kolobiša lefase le go tšweletša dienywa, ka mo go swanago, lentšu la Jehofa leo le tšwago molomong wa gagwe ke leo le ka botwago ka mo go feletšego. Seo a se holofetšago o tla se phethagatša​—ka mo go sa belaetšego le ganyenyane.​—Numeri 23:19.

24, 25. Ke ditšhegofatšo dife tšeo di bego di boloketšwe mathopša a ba-Juda ao a dirago ka go dumelelana le molaetša wa Jehofa wo a o neilego ka Jesaya?

²⁴ Ka gona, ge e ba ba-Juda ba ela hloko mantšu ao ba a boditšwego ka mokgwa wa boporofeta ka Jesaya, ba be ba ka se ke ba palelwa ke go hwetša phološo yeo Jehofa a e holofeditšego. Ka lebaka leo, ba be ba tla ba le lethabo le legolo. Jehofa o re: “Le tlo tšwa ka go thaba, le sepedišwe ka khutšo; dithaba le meboto di tlo hlalala pele ga lena, gomme dihlare ka moka tša naga di tlo opa magofsi. Bakeng sa meetlwa go tlo mela motsiperese, gomme bakeng sa ditshehlo go tlo mela mirite. Seo e tlo ba tumišo go Jehofa le pontšho e ka se kego ya fedišwa le ka go sa felego.”​—Jesaya 55:12, 13, PK.

²⁵ Ka 537 B.C.E., mathopša a ba-Juda a ile a tšwa e le ka kgonthe Babele ka go thaba. (Psalme 126:1, 2) Ge a fihla Jerusalema, a ile a hwetša naga e pipeditšwe ke meetlwa le ditshehlo​—gopola gore naga e be e dutše e le lešope ka lebaka la nywaga-some. Eupša batho ba Modimo ba boilego bjale ba ka thuša go tliša phetogo e rategago! Dihlare tše ditelele-telele, tše bjalo ka metsiperese (juniper) le mirite (myrtle) di tšeela meetlwa le ditshehlo sebaka. Tšhegofatšo ya Jehofa e bonagala gabotse ge batho ba gagwe ba dutše ba mo hlankela ‘ka go hlalala.’ Go ba bjalo ka ge eka naga ka boyona e thabile.

26. Ke boemo bofe bjo bo šegofaditšwego bjoo batho ba Modimo ba bo thabelago lehono?

²⁶ Mašaledi a Bakriste ba tloditšwego a ile a lokollwa bothopšeng bja ona bja moya ka 1919. (Jesaya 66:8) Ona gotee le lešaba le legolo la dinku tše dingwe, ga bjale ba hlankela Modimo ka lethabo paradeiseng ya moya. E le bao ba se nago sepatso le ge e le sefe sa tutuetšo ya Babele, ba thabela boemo bjo bo kgahlišago bjoo bo fetogilego “tumišo” go Jehofa. Katlego ya bona ya moya e tagafatša leina la gagwe le go mo godiša e le Modimo wa boporofeta bja therešo. Seo Jehofa a ba diretšego sona se bontšha Bomodimo bja gagwe gomme ke bohlatse bja go botegela ga gagwe lentšu la gagwe le kgaugelo ya gagwe go bao ba itsholago. Eka bohle bao ba tšwelago pele ba ‘reka beine le mafsi go se tšhelete, go se sa go reka’ ba ka thabela go mo hlankela ka mo go sa felego!

[Mengwalo ya ka tlase]

[Caption on page 234]

Ba-Juda bao ba swerwego ke lenyora la moya ba laletšwa gore ba ‘tle meetseng’ le go ‘reka beine le mafsi’

[Caption on page 239]

Jesu o itlhatsetše e le “moetapele le molaodi” ditšhabeng

[Caption on page 244]

“E mobe a a lahlê tsela y’axwe”