Kgaolo ya Masome-pedi-nne

Jehofa o Itirela Leina le Lebotse

Jesaya 63:1-14

1, 2. (a) Bakriste ba na le kgahlego efe ya motho ka noši ka “letšatši la Jehofa” le le tlago? (b) Ke kgang efe e kgolo yeo e akaretšwago tabeng ya go tla ga letšatši la Jehofa?

MO E nyakilego go ba nywaga e dikete tše pedi, Bakriste ba be ba ‘letetše e bile ba dutše ba gopola go ba gona ga letšatši la Jehofa.’ (2 Petro 3:12, bapiša le NW; Tito 2:13.) Ke mo go kwešišegago gore ba fišegela go tla ga letšatši leo. Go ba gona, le tla swaya go thoma ga go imollwa ga bona go ditla-morago tše senyago tša go se phethagale. (Ba-Roma 8:22) Gape le tla bolela go fela ga dikgateletšo tšeo di ba tlaišago ‘dinakong tše tše hlobaetšago tšeo go lego thata go lebeletšana le tšona.’​—2 Timotheo 3:1, NW.

² Lega go le bjalo, le ge letšatši la Jehofa le tla tlišetša baloki kimologo, gape le tla bolela tshenyego go “ba ba sa tsebexo Modimo, le ba ba sa kwexo Ebangedi ya Mong wa rena Jesu Kriste.” (2 Ba-Thesalonika 1:7, 8) Se ke sa bohlokwa gore go naganišišwe ka sona. Na Modimo ruri o tla fediša ba kgopo e le feela bakeng sa go hlakodiša batho ba gagwe maemong a gateletšago? Kgaolo ya bo-63 ya Jesaya e bontšha gore go na le kgang e kgolo e akaretšwago, e lego go kgethagatšwa ga leina la Modimo.

Mogwanto wa Mohlabani yo e Lego Mofenyi

3, 4. (a) Boporofeta bjo bo lego go Jesaya kgaolo 63 bo boletšwe ka tlase ga maemo afe? (b) Ke mang yo Jesaya a mmonago a gwantela thoko ya Jerusalema, gomme diithuti tše dingwe di mo hlaola e le mang?

³ Go Jesaya kgaolo 62, re badile ka go lokollwa ga ba-Juda bothopšeng bja Babele le go bušetšwa ga bona nageng ya gabo bona. Ge e le gabotse, go rotoga potšišo e rego: Na mašaledi a tsošološitšwego a ba-Juda a swanetše go boifa go šwalalanywa gape ke ditšhaba tše dingwe tša manaba? Pono ya Jesaya e thuša kudu go fokotša poifo ya bona. Boporofeta bo thoma ka gore: “Ke mang ela a tlago a e-tšwa Edomo, a apere diaparo tše khubedu, a e-tšwa Botsira, a tagilego ka diaparo tša gagwe, e a sepedišago matla a magolo?”​—Jesaya 63:1a, PK.

⁴ Jesaya o bona mohlabani, yo matla le yo a fenyago a gwantela thoko ya Jerusalema. Diaparo tša gagwe tše di tagilego di bontšha gore ke wa maemo a phagamego kudu. O tla a e-tšwa ka thoko ya motse wo o tumilego kudu wa Edomo, e lego Botsira, seo se bontšhago gore o fentše ka phenyo e kgolo nageng yeo ya lenaba. Mohlabani yo e ka ba mang? Diithuti tše dingwe di mo hlaola e le Jesu Kriste. Ba bangwe ba dumela gore ke moetapele wa tša bohlabani wa mo-Juda e lego Judas Maccabaeus. Lega go le bjalo, mohlabani ka boyena o bontšha seo a lego sona ge a araba potšišo e botšišitšwego ka gore: “Ke Nna ke bolelago go loka, ke lego Yo matla go phološa.”​—Jesaya 63:1b, PK. 

5. Mohlabani yo a bonwago ke Jesaya ke mang, gomme ke ka baka la’ng o araba bjalo?

⁵ Ga go na pelaelo gore mohlabani yoo ke Jehofa Modimo ka boyena. Felo go gongwe o hlaloswa e le yo a nago le ‘bogolo bja matla a magologolo’ e bile e le “E a bolelago go loka.” (Jesaya 40:26, PK; 45:19, 23, PK) Diaparo tše di tagilego tša mohlabani di re gopotša mantšu a mopsalme a rego: “Wene Jehofa, Modimo wa-ka, o e mogolo ka kudu, o apere phadimo le letago.” (Psalme 104:1, PK) Le ge Jehofa e le Modimo wa lerato, Beibele e bontšha gore o tšea maemo a mohlabani ge go nyakega.​—Jesaya 34:2; 1 Johane 4:16.

6. Ke ka baka la’ng Jehofa a e-tšwa ntweng kua Edomo?

⁶ Ka gona, ke ka baka la’ng Jehofa a e-tšwa ntweng kua Edomo? Ba-Edomo, e lego bahlohleletši ba tšwelago pele ba lehloyo leo le thomilego ka rakgolokhukhu wa bona Esau, ke manaba a kgale a batho ba Modimo ba kgwerano. (Genesi 25:24-34; Numeri 20:14-21) Go nwelela ga lehloyo leo Edomo e hloilego Juda ka lona go ile gwa bonagala kudu-kudu nakong ya tshenyego ya Jerusalema ge ba-Edomo ba be ba hlohleletša mašole a Babele. (Psalme 137:7) Jehofa o tšea lehloyo le le bjalo e le go rumola yena ka noši. Ga go makatše gore o ile a ikemišetša go ntšha tšhoša ya gagwe ya tefetšo malebana le Edomo!​—Jesaya 34:5-15; Jeremia 49:7-22.

7. (a) Boporofeta bja malebana le Edomo bo ile bja phethagala bjang mathomong? (b) Edomo e swantšhetša eng?

⁷ Ka baka leo, pono ya Jesaya ke yeo e kgothatšago kudu go ba-Juda ba boelago Jerusalema. E ba kgonthišetša bodulo bjo bo šireletšegilego legaeng la bona le lefsa. Ka kgonthe, mehleng ya moporofeta Maleaki, Modimo o ile a dira ‘dithaba tša Edomo marope, gomme bohwa bja yona, a bo gafela diphukubje tša naga.’ (Maleaki 1:3) Ka gona, na se se bolela gore boporofeta bja Jesaya bo ile bja phethagala ka botlalo mehleng ya Maleaki? Aowa, ka gobane go sa šetšwe boemo bja yona bja go ba lešope, Edomo e be e ikemišeditše go aga mafelo a yona a phušotšwego lefsa gomme Maleaki o ile a tšwela pele a bitša Edomo “selete sa bokgopo” le “batho bao Jehofa a ba ahlotšego go iša mehleng ya ka mo go sa felego.”a (Maleaki 1:4, 5, NW) Lega go le bjalo, go ya ka boporofeta, Edomo ga e akaretše feela ditlogolo tša Esau. E šoma e le leswao la ditšhaba ka moka tšeo di ipontšhago e le manaba a barapedi ba Jehofa. Ditšhaba tša Bojakane e bile tšeo di tšwago pele kudu tabeng ye. Go tla direga’ng ka Edomo ye ya mehleng yeno?

Bofotlelo bja Morara

8, 9. (a) Mohlabani o bonwa ke Jesaya a swaregile modirong ofe? (b) Bofotlelo bja seswantšhetšo bo gatakelwa neng gona bjang?

⁸ Jesaya o botšiša mohlabani yo a boago gore: “Naa ’aparô tš’axo di hubetše ka’ng? Hleng kobô ya xaxo e etša ya mofotli wa morara!” Jehofa o araba ka gore: “Ke tš’o fôtla kè nnoši, kè se n’e motho wa sethšaba se sengwê; ’me ke ba xatakile kè befetšwe, ke ba phšatlaxantše ka boxale bya-ka, ’me madi a bôná a ntletše diaparô, ke hubetše kobô mo xo fèla.”​—Jesaya 63:2, 3.

⁹ Mantšu a a hlalosago ka mo go tseneletšego a hlalosa polao e kgolo. Go ba gona, gaešita le diaparo tše di tagilego tša Modimo di thankgetše, go swana le diaparo tša motho yo a fotlago bofotlelong bja morara! Bofotlelo bja morara ke seka se se swantšhetšago gabotse boemo bja go kgakgelwa bjoo manaba a Jehofa Modimo a ikhwetšago a le go bjona ge Modimo a gata mogato wa go a fediša. Bofotlelo bjo bja morara bja seswantšhetšo bo tla gatakelwa neng? Diporofeto tša Joele le tša moapostola Johane le tšona di bolela ka bofotlelo bja morara bja seswantšhetšo. Bofotlelo bja morara bja diporofeto tšeo bo tla gatakelwa ge Jehofa a gatakela manaba a gagwe tshenyegong ka Haramagedone. (Joele 3:13; Kutollo 14:18-20; 16:16) Bofotlelo bja boporofeta bja Jesaya bo šupa pele nakong yona yeo.

10. Ke ka baka la’ng Jehofa a re o gataketše bofotlelo bja morara ka boyena?

¹⁰ Ka gona, ke ka baka la’ng Jehofa a re o gataketše bofotlelo bjo bja morara a nnoši, go se na motho yo a nago le yena go tšwa ditšhabeng? Na Jesu Kriste ka ge e le moemedi wa Modimo, a ka se ke a etelela pele go gatakeleng bofotlelo bja morara? (Kutollo 19:11-16) O tla dira bjalo, eupša Jehofa o bolela ka batho e sego dibopiwa tša moya. O bolela gore ga go na motho yo a ka kgonago go phetha modiro wa go tloša balatedi ba Sathane lefaseng. (Jesaya 59:15, 16) Go tlogelelwa Modimo Ra-matla-ohle gore a tšwele pele a ba gatakela ka bogale bja gagwe, go fihlela ba pšhatlagantšwe ka mo go feletšego.

11. (a) Ke ka baka la’ng Jehofa a tliša “letšatši la tefetšo”? (b) Ke bomang bao e bego e le “balopololwa” mehleng ya bogologolo, gomme ke bomang lehono?

¹¹ Jehofa o hlalosa ka mo go tšwelago pele lebaka leo ka lona a dirago modiro wo ka boyena, o re: “Pelong ya-ka ke rerile letšatši la tefetšo, gomme ngwaga wa balopololwa ba-ka o fihlile.” (Jesaya 63:4, PK)b Ke Jehofa a nnoši yo a nago le tshwanelo ya go phetha tefetšo godimo ga bao ba kwešago batho ba gagwe bohloko. (Doiteronomio 32:35) Mehleng ya bogologolo “balopololwa” e be e le ba-Juda bao ba ilego ba tlaišwa diatleng tša ba-Babele. (Jesaya 35:10; 43:1; 48:20) Mehleng yeno ke mašaledi a tloditšwego. (Kutollo 12:17) A lopolotšwe bothopšeng bja bodumedi go etša batho ba bogologolo bao ba bilego le maemo a go swana le a ona. Go swana le ba-Juda bao, batlotšwa gotee le bagwera ba bona ba “dinku tše dingwê” e bile bahlaselwa ba tlaišo le kganetšo. (Johane 10:16) Ka go rialo boporofeta bja Jesaya bo kgonthišetša Bakriste lehono gore ka nako e beilwego ya Modimo, O tla tsena ditaba gare legatong la bona.

12, 13. (a) Ke ka tsela efe Jehofa a se nago mothuši wa go mo thuša? (b) Letsogo la Jehofa le tliša bjang phološo, gomme o thekgwa bjang ke kgalefo ya gagwe?

¹² Jehofa o tšwela pele gore: “Ka tadietša mahlô, ka hlôka wa xo nthuša; ka kxotsa xò se wa xo ntlatša; ka thušwa ke letsôxô la-ka, ka tlatšwa ke kxalefò ya-ka. ’Me dithšaba ke di xataketše kè befetšwe; tša thêkxêsêla kè di xalefetše, madi a thšoloxêla fase.”​—Jesaya 63:5, 6.

¹³ Ga go na mothuši yo e lego motho yo a ka bolelago gore o swanelwa ke kgodišo bakeng sa letšatši le legolo la tefetšo la Jehofa. E bile Jehofa ga a nyake thekgo le ge e le efe ya motho bakeng sa go phetha thato ya gagwe.c Letsogo la gagwe la matla a sa lekanywego ke leo le lekanego go ka phetha modiro woo. (Psalme 44:3; 98:1; Jeremia 27:5) Go oketša moo, kgalefo ya gagwe e a mo thekga. Bjang? Ka kwešišo ya gore kgalefo ya Modimo ga se maikwelo a sa laolegego, eupša ke kgalefo ya go loka. Ka ge Jehofa ka mehla a gata megato motheong wa melao ya motheo ya go loka, kgalefo ya gagwe e a mo thekga gomme e mo hlohleletša go ‘tšhollela madi’ a manaba a gagwe “fase,” e le gore manaba a kokobetšwe le go fenywa.​—Psalme 75:8; Jesaya 25:10; 26:5.

Botho bjo Lerato bja Modimo

14. Ke dikgopotšo dife tše di swanetšego tšeo Jesaya a di neago ga bjale?

¹⁴ Mehleng e fetilego, ba-Juda ba ile ba lahlegelwa gatee-tee ke tebogo ya go leboga dilo tšeo Jehofa a ba diretšego tšona. Ka gona, ke mo go swanetšego gore Jesaya a ba gopotše lebaka leo ka lona Jehofa a ilego a dira dilo tše bjalo. Jesaya o tsebatša gore: “A nke ke tlôtlê mabobo a [“botho bjo lerato bja,” NW] Morêna, ke yê ka tše Morêna a re diretšexo tšôna tšohle, le botho-boxolo bya xaxwe bya xe a setša moloko wa Isiraele ka dikxauxêlô le ka mabobo a xaxwe. Xobane ó itše: Ka kxonthe batho bá ké ’thšaba sa-ka, ké bana ba-ka ba ba ka se kexo ba aketša; ’me Nna ke Mophološi wa bôná. Mehlakong ya bôná yohle, ó be a hlaka le Yêna; Morongwa wa ’fahloxô s’axwe a ba namolêla, a ba lokolola ka leratô la xaxwe le ka xo ba hlômôxêla pelo, a ba kuka a ba rwala mehla yohle neng le neng.”​—Jesaya 63:7-9.

15. Ke bjang gomme ka baka la’ng Jehofa a ilego a bontšha botho bjo lerato baneng ba Aborahama kua Egipita?

¹⁵ A mohlala o mobotse gakaakang wo Jehofa a o beago mabapi le go bontšha botho bjo lerato goba lerato la potego e sa kwanantšhego! (Psalme 36:7; 62:12) Jehofa o ile a bopa kgokagano e lerato le Aborahama. (Mika 7:20) O ile a holofetša mopatriareka gore ditšhaba ka moka tša lefase di be di tla itšhegofatša ka peu ya gagwe goba bana ba gagwe. (Genesi 22:17, 18) Jehofa o ile a kgomarela kholofetšo yeo, a bontšha botho bjo bogolo bakeng sa ngwako wa Isiraele. Tiro e lemogegago kudu gare ga ditiro tša gagwe tša potego e sa kwanantšhego e bile ya go hlakodiša ga gagwe bana ba Aborahama bokgobeng bja Egipita.​—Ekisodo 14:30.

16. (a) Ke pono efe yeo Jehofa a bego a e-na le yona ge a be a dira kgwerano le Isiraele? (b) Modimo o dirišana bjang le batho ba gagwe?

¹⁶ Ka morago ga Khudugo, Jehofa o ile a tliša Isiraele Thabeng ya Sinai gomme a bolela kholofetšo ye: “E tlo re ge le e-kwa lentšu la-ka ruri, gomme le lota kgwerano ya-ka, le tlo ba leruo la-ka . . . Gomme go Nna le tlo ba mmušo wa baperisita le setšhaba se se kgethegilego.” (Ekisodo 19:5, 6, PK) Na Jehofa o be a aketša ge a be a holofetša se? Aowa, ka gobane Jesaya o utolla gore Jehofa o ipoditše gore: “Ka kxonthe batho bá ké ’thšaba sa-ka, ké bana ba-ka ba ba ka se kexo ba aketša.” Seithuti se sengwe se re: “Polelwana ‘ka kxonthe’ ga se taelo ya bogoši goba e newago ka go tseba dilo e sa le pele: ke kholofelo le kgodišego tša lerato.” Ee, Jehofa o dirile kgwerano ya gagwe ka kgodišego ya kgonthe, a tloga a nyaka gore batho ba gagwe ba atlege. Go sa šetšwe mafokodi a bona a bonagalago, o bontšhitše gore o a ba bota. Ke mo go kgahlišago gakaakang go rapela Modimo yo a botago barapedi ba gagwe ka potego e bjalo! Bagolo lehono ba dira go gontši go matlafatša bao ba ba gafetšwego gore ba ba hlokomele ge ba bonagatša go bota ka tsela e swanago botho bja motheo bja batho ba Modimo.​—2 Ba-Thesalonika 3:4; Ba-Hebere 6:9, 10.

17. (a) Ke bohlatse bofe bjo Jehofa a ilego a bo nea mabapi le lerato la gagwe go ba-Isiraele? (b) Ke kgodišego efe yeo re ka bago le yona lehono?

¹⁷ Lega go le bjalo, mopsalme o bolela mabapi le ba-Isiraele gore: “Ba lebala Modimo, Mophološi wa bona, e a dirilego tše dikgolo kua Egipita.” (Psalme 106:21, PK) Boemo bja bona bja kgopolo bja go se kwe le bja go thatafatša melala gantši bo ile bja feleletša ka go tsena ga bona maemong a kotsi. (Doiteronomio 9:6) Na Jehofa o ile a kgaotša go ba bontšha botho bjo lerato? Go fapana le seo, Jesaya o hlalosa gore “mehlakong ya bôná yohle, ó be a hlaka le Yêna.” A kwelobohloko e kaakang yeo Jehofa a nago le yona! Go etša tate le ge e le ofe yo lerato, Modimo o kwešitšwe bohloko ke go bona bana ba gagwe ba tlaišega, gaešita le ge tlaišego e be e bakilwe ke bošilo bja bona ka noši. Go etša ge go boletšwe e sa le pele e bile e le go bonagatša lerato la gagwe, o ile a romela “morongwa wa ’fahloxô s’axwe,” mohlomongwe e le Jesu pele ga go ba gona ga gagwe e le motho, e le gore a ba etelele pele go ba tsentšha Nageng ya Kholofetšo. (Ekisodo 23:20) Ka go rialo Jehofa o ile a kuka setšhaba gomme a se rwala, “byalo ka monna xe a kuka ngwana wa xaxwe.” (Doiteronomio 1:31; Psalme 106:10) Lehono re ka kgodišega gore Jehofa o tseba ka tsela e swanago ka ditlaišego tša rena le gore o re kwela bohloko ge re le dikgateletšong tše boifišago. Re ka ‘lahlela dipelaelo tša rena ka moka godimo ga gagwe ka kgodišego ka gobane o a re hlokomela.’​—1 Petro 5:7, bapiša le NW.

Modimo o Fetoga Lenaba

18. Ke ka baka la’ng Jehofa a ile a fetoga lenaba la batho ba gagwe?

¹⁸ Ka gona, le ka mohla ga se ra swanela go diriša botho bjo lerato bja Modimo gampe. Jesaya o tšwela pele gore: “’Me bôná ba nganga, ba nyamiša Môya w’axwe o mokxêthwa. A bá a ba fetoxêla lenaba a lwa nabôʹ.” (Jesaya 63:10) Jehofa o ile a lemoša gore gaešita le ge e le Modimo wa kgaugelo le lešoko, “fêla, a [ka] se kê a lesa xo ôtla mosenyi.” (Ekisodo 34:6, 7) Ba-Isiraele ba ile ba ipakela kotlo ka go thoma mokgwa wa borabele. O ile a gopotša Moše gore: “O se kê wa bá wa lebala, xobane O rumotše Morêna Modimo wa xaxo kwa lešokeng. Xo tloxa mola Ò khuduxa naxeng ya Egipita xo fihla xe Le tsêna felô fá, Le be Le le ba xo ngangana le Morêna.” (Doiteronomio 9:7) Ka go ganetša tutuetšo e botse ya moya wa Modimo, ba ile ba o kweša bohloko goba ba o nyamiša. (Ba-Efeso 4:30) Ba ile ba gapeletša Jehofa gore a fetoge lenaba la bona.​—Lefitiko 26:17; Doiteronomio 28:63.

19, 20. Ke dilo dife tšeo ba-Juda ba di gopolago, gomme ka baka la’ng?

¹⁹ Gare ga tlaišego ya bona, ba-Juda ba bangwe ba tutueletšega go naganišiša ka tša nakong e fetilego. Jesaya o re: “Ké mo sethšaba sa xaxwe se eletšwexo mehla yela ya boxolo-xolo ya Mošê, sa re: O kae Mo-re-nthša-lewatleng ka modiši yola wa mohlape w’axwe? O kae Yola a naxo a bea Môya w’axwe mo pelong ya xaxwe? E a romilexo letsôxô l’axwe la borêna la sepela le Mošê lè bapetše le yêna; e a naxo a fatola meetse pele xa bôná, a itirêla ’ina, ya ba la neng le neng. A ba sepediša madibeng, mašokeng, bo-ka pitsi ye e sá kxopyexo. Môya wa Morêna o ba [gorošitše] byalo ka mohlape xe o foloxêla meeding.”​—Jesaya 63:11-14a.

²⁰ Ee, ka go tlaišwa ke mafelelo a go se kwe, ba-Juda ba hlologetše matšatši a ge Jehofa e be e le Molopolodi wa bona go e na le go ba lenaba la bona. Ba gopola kamoo ‘badiši’ ba bona, Moše le Arone ba ilego ba ba etelela pele ka mo go šireletšegilego go phatša Lewatle le Lehwibidu. (Psalme 77:20; Jesaya 51:10) Ba gopola nako yeo ka yona, go e na le go kweša moya wa Modimo bohloko, ba bego ba eteletšwe pele ke moya woo ka tlhahlo yeo e bego e newa ke Moše le banna ba bangwe ba bagolo ba kgethilwego ka moya. (Numeri 11:16, 17) Gape ba gopola ba bona “letsogo la letago” (PK) la Jehofa le matla le dirišwa legatong la bona ka Moše! Ge nako e dutše e e-ya, Modimo o ile a ba ntšha lešokeng le legolo le le šiišago kudu gomme a ba iša nageng yeo e elago mafsi le dinose​—lefelo la khutšo. (Doiteronomio 1:19; Jošua 5:6; 22:4) Lega go le bjalo, gona bjale ba-Isiraele ba a tlaišega ka baka la ge ba lahlegetšwe ke tswalano ya bona e amogelegago le Modimo!

‘Leina le Lebotse la Gagwe’

21. (a) Ke tokelo efe e kgolo yeo Isiraele nkabego e bile le yona mabapi le leina la Modimo? (b) Lebaka le legolo la Modimo la go lokolla ditlogolo tša Aborahama Egipita e be e le lefe?

²¹ Lega go le bjalo, go lahlegelwa ga ba-Isiraele ke dilo tše di bonagalago ga se selo ge go bapišwa le go lahlegelwa ke tokelo yeo ba ilego ba e phaela ka thoko, e lego ya go tšea karolo go tumišeng leina la Modimo. Moše o ile a holofetša ba-Isiraele gore: “Morêna ó tlo Xo tiiša wa ba sethšaba sa xaxwe se sekxêthwa byalo ka xe a Xo enetše; ó tlo dira byalo xe O hlôkômêla ditaêlô tša xaxwe, wa swara ka tsela ya xaxwe, Yêna Morêna Modimo wa xaxo. Ké mo dithšaba tšohle tša lefase di tl’o xo bôna xobane leina la [Jehofa, PK] le kwala mo xo lena; xomme ba tlo Le boifa.” (Doiteronomio 28:9, 10) Ge Jehofa a be a gata mogato wa go lwela ditlogolo tša Aborahama, a di hlakodiša bokgobeng bja Egipita, o be a sa dire bjalo e le feela go dira gore bophelo e be bjo bo di loketšego kudu goba bjo bo kgahlišago go tšona. O be a gata mogato bakeng sa selo se sengwe sa bohlokwa-hlokwa ka go fetišiša​—leina la gagwe. Ee, o ile a kgonthišetša gore leina la gagwe le ‘tsebatšwa lefaseng ka moka.’ (Ekisodo 9:15, 16) Le gona ge Modimo a be a bontšha kgaugelo ka morago ga borabele bja Isiraele lešokeng, lebaka la gagwe la go dira bjalo e be e se go tšewa ke maikwelo. Jehofa ka boyena o itše: “Ka dirêla ’ina la-ka, xore ke se le nyatšišê mo dithšabeng.”​—Hesekiele 20:8-10.

22. (a) Ke ka baka la’ng Modimo a tla lwela batho ba gagwe gape nakong e tlago? (b) Lerato la rena la go rata leina la Modimo le kgoma ditiro tša rena ka ditsela dife?

²² A phetho e matla gakaakang yeo Jesaya a e neago ga bjale boporofeteng bjo! O re: “Wene o sepedišitše setšhaba sa gago ka mokgwa o bjalo, e le gore o itirele leina le le tagilego.” (Jesaya 63:14b, PK) Bjale go ka bonwa gabotse lebaka leo ka lona Jehofa a lwago ka matla ka baka la go kgahlegela batho ba gagwe. Ke gore a itirele leina le lebotse. Ka go rialo boporofeta bja Jesaya bo dira e le kgopotšo e matla ya gore go rwala leina la Jehofa ke tokelo e kgolo kudu gotee le boikarabelo bjo bogolo. Bakriste ba therešo lehono ba rata leina la Jehofa go feta kamoo ba ratago maphelo a bona ka noši. (Jesaya 56:6; Ba-Hebere 6:10) Ga ba rate go dira selo le ge e le sefe seo mohlomongwe se ka tlišetšago leina leo le lekgethwa kgobogo. Ba arabela leratong la Modimo la potego e sa kwanantšhego ka go dula ba mmotegela ka go se kwanantšhe. Le gona ka ge ba rata leina le lebotse la Jehofa, ba hlologetše letšatši la ge a tla gatakela manaba a gagwe bofotlelong bja kgalefo ya gagwe​—e sego feela ka gore seo se tla ba hola eupša e le ka gobane seo se tla lebiša go tumišweng ga leina la Modimo yo ba mo ratago.​—Mateo 6:9.

[Mengwalo ya ka tlase]

[Caption on page 359]

Jehofa o be a e-na le ditebelelo tše dikgolo bakeng sa batho ba gagwe