Le ka Mohla o se ke wa ba Lehodu!

NA GO na le motho yo a kilego a go utswetša selo?— Seo se ile sa dira gore o ikwe bjang?— Motho le ge e le ofe yo a ilego a se utswa ke lehodu, gomme ga go na motho yo a ratago lehodu. Na o nagana gore go tla bjang gore motho e be lehodu? Na o belegwa e le lehodu?—

Re sa tšwa go ithuta gore batho ba belegwa ba e-na le sebe. Ka gona ka moka ga rena ga se ra phethagala. Eupša ga go na motho yo a belegwago e le lehodu. Lehodu le ka ba le e-tšwa lapeng le lokilego. Batswadi ba lona, bana babo lona le dikgaetšedi tša lona ba ka ba ba botega. Eupša kganyogo ya motho ka noši ya go kganyoga dilo tše swanago le tšhelete le dilo tšeo tšhelete e ka di rekago e ka mo dira gore a fetoge lehodu.

Ke mang yo o ka bolelago gore e bile lehodu la pele?— Anke re nagane ka seo. Morutiši yo Mogolo o tsebile motho yoo ge a be a sa le legodimong. Lehodu leo e be e le morongwa. Eupša ka ge Modimo a dirile barongwa ka moka e le ba phethagetšego, go tlile bjang gore morongwa yoo a fetoge lehodu?— Ee, bjale ka ge re ithutile go Kgaolo 8 ya puku ye, o ile a nyaka selo seo e bego e se sa gagwe. Na o sa gopola gore e be e le sefe?—

Ka morago ga ge Modimo a bopile monna le mosadi ba pele, morongwa yoo o ile a nyaka gore ba mo rapele. O be a se na tshwanelo ya gore ba mo rapele. Ba be ba swanetše go rapela Modimo. Eupša o ile a utswa tshwanelo yeo! Ka go dira gore Adama le Efa ba mo rapele, morongwa yo o ile a fetoga lehodu. O ile a fetoga Sathane Diabolo.

Ke’ng seo se dirago gore motho e be lehodu?— Kganyogo ya go kganyoga seo e sego sa gagwe. Kganyogo ye e ka ba e matla kudu moo e lego gore e ka dira gore le batho ba lokilego ba dire dilo tše mpe. Ka dinako tše dingwe, batho bao ba fetogago mahodu ga ba ke ba itshola gomme ba dira dilo tše dibotse gape. Yo mongwe wa bona e be e le moapostola wa Jesu. Leina la gagwe e be e le Judase Isikariothe.

Judase o be a tseba gore go utswa ke phošo ka gobane o be a rutilwe Molao wa Modimo go tloga nakong ya ge e sa le mošemanyana. O be a tseba gore Modimo o be a kile a bolela a le legodimong gomme a botša batho ba gagwe gore: “O se kê wa utswa.” (Ekisodo 20:15) Ge Judase a šetše a godile, o ile a gahlana le Morutiši yo Mogolo gomme a ba yo mongwe wa barutiwa ba gagwe. Ka morago, Jesu o ile a ba a kgetha Judase gore e be yo mongwe wa baapostola ba gagwe ba 12.

Jesu le baapostola ba gagwe ba be ba sepela gotee. Ba be ba e-ja dijo tša bona gotee. Tšhelete ka moka ye sehlopha se bego se e-na le yona e be e bolokwa ka lepokising. Jesu o ile a nea Judase lepokisi leo gore a le hlokomele. Ke therešo gore tšhelete e be e se ya Judase. Eupša o tseba seo Judase a ilego a se dira ka morago ga lebakanyana?—

Judase o ile a thoma go tšea tšhelete ka lepokising mola a be a se a swanela go dira bjalo. O be a e tšea ba bangwe ba sa mmone, gomme o ile a ba a leka go hwetša ditsela tša go hwetša e ntši. O ile a thoma go dula a nagana ka tšhelete. Anke re bone gore kganyogo ye e fošagetšego e ile ya lebiša go eng matšatši a sego kae feela pele Morutiši yo Mogolo a ka bolawa.

Maria, kgaetšedi ya mogwera wa Jesu e lego Latsaro, o ile a tšea makhura a theko ya godimo gomme a a tšhela dinaong tša Jesu. Eupša Judase o ile a belaela. Na o tseba lebaka?— O ile a bolela gore makhura a ka be a ile a rekišwa gomme tšhelete ya newa badiidi. Eupša o be a tloga a nyaka gore go be le tšhelete e ntši ka lepokising bakeng sa gore a kgone go e utswa.—Johane 12:1-6.

Jesu o ile a botša Judase gore a se ke a tshwenya Maria yo a bego a bontšhitše botho kudu gakaakaa. Judase ga se a rata ge Jesu a be a mmotša seo, ka gona o ile a ya go baperisita ba bagolo, bao e bego e le manaba a Jesu. Ba be ba nyaka go swara Jesu, eupša ba be ba nyaka go dira seo e le bošego gore ba se bonwe ke batho.

Judase o ile a botša baperisita gore: ‘Ke tla le botša kamoo le ka hwetšago Jesu ka gona, ge e ba le ka mpha tšhelete. Le tla mpha bokae?’

Baperisita ba ile ba araba ka gore: ‘Re tla go fa mašeleng a masome a mararo.’—Mateo 26:14-16.

Judase o ile a tšea tšhelete. Go be go le bjalo ka ge eka o be a rekiša Morutiši yo Mogolo go banna bao! Na o ka akanya motho le ge e le ofe a dira selo se se bjalo se sebe?— Ka manyami, seo ke mohuta wa selo se se diregago ge motho a fetoga lehodu gomme a utswa tšhelete. O rata tšhelete go feta kamoo a ratago batho ba bangwe goba gaešita le go rata Modimo.

Mo gongwe o ka bolela gore, ‘Nka se tsoge ke ratile selo le ge e le sefe go feta kamoo ke ratago Jehofa Modimo.’ Ke mo go botse gore o ikwa ka tsela yeo. Ge Jesu a be a kgetha Judase e le moapostola, mohlomongwe ke kamoo Judase a bego a ikwa ka gona. Ba bangwe bao ba ilego ba fetoga mahodu mo gongwe ba ka be ba be ba ikwa ka tsela yeo. A re bolele ka ba bangwe ba bona.

Yo mongwe e be e le mohlanka wa Modimo yo a bitšwago Akane, yo a phetšego nako e telele pele ga ge Morutiši yo Mogolo a ka belegwa. Akane o ile a bona kobo e botse, tšhipi ya gauta le ditsekana tša silifera. E be e se tša gagwe. Beibele e bolela gore e be e le tša Jehofa ka gobane di be di tšeetšwe manaba a batho ba Modimo. Eupša Akane o be a di nyaka kudu moo a ilego a ba a di utswa.—Jošua 6:19; 7:11, 20-22.

Mohlala o mongwe šo. Kgale-kgale Jehofa o ile a kgetha Dafida gore a buše e le kgoši godimo ga ba-Isiraele. Ka letšatši le lengwe Dafida o ile a thoma go lebelela mosadi yo mobotse e lego Batseba. O ile a dula a lebeletše Batseba gomme a nagana gore a mo tšee gore a dule le yena e le mosadi wa gagwe. Lega go le bjalo, e be e le mosadi wa Uria. Ke’ng seo Dafida a ka bego a ile a se dira?—

Dafida a ka be a ile a kgaotša go nagana ka go tšea Batseba. Eupša ga se a ka a dira bjalo. Ka gona Dafida o ile a ya le yena ga gagwe. Ke moka a rulaganyetša gore Uria a bolawe. Ke ka baka la’ng Dafida a ile a dira dilo tše tše mpe?— Ka gobane o ile a tšwela pele a nyaka mosadi wa motho yo mongwe.—2 Samuele 11:2-27.

Ka gobane Dafida a ile a itshola, Jehofa o ile a mo tlogela gore a phele. Eupša go tloga ka nako yeo go ya pele Dafida o ile a ba le mathata a mantši. Bjo bongwe bja ona e bile gore morwa wa gagwe Abesalomo o ile a nyaka go tšeela tatagwe Dafida bogoši. Ka gona ge batho ba be ba e-tla go bona Dafida, Abesalomo o be a ba gokarela gomme a ba atla. Beibele e re: ‘Abesalomo a tšwela pele a utswa dipelo tša banna ba Isiraele.’ O ile a kgodiša batho bao gore ba nyake go mo dira kgoši go e na le Dafida.—2 Samuele 15:1-12.

Na o kile wa nyaka selo se sengwe kudu go etša kamoo Akane, Dafida le Abesalomo ba ilego ba dira ka gona?— Ge e ba selo seo e le sa motho yo mongwe, go se tšea ka ntle le tumelelo ke go se utswa. Na o sa gopola seo lehodu la pele, Sathane, le bego le se nyaka?— Le be le nyaka gore batho ba le rapele go e na le go rapela Modimo. Ka gona Sathane o utswitše ka go dira gore Adama le Efa ba mo rapele.

Ge motho a e-na le selo, o na le tshwanelo ya go bolela gore ke bomang bao ba ka se dirišago. Ka mohlala, mo gongwe o ka ya go bapala le bana ba bangwe ga gabo bona. Na e be e tla ba mo go swanetšego gore o tšee selo se sengwe moo gomme o tle le sona gae?— Ka ntle le ge e ba bo-tatago bona goba bo-mmago bona ba go botša gore o ka se tšea. Ge e ba o ka tšea selo wa ya le sona gae ka ntle le go ba kgopela, gona seo ke go utswa.

Ke ka baka la’ng mo gongwe o ka lekega gore o utswe?— Ka gobane o nyaka selo seo e sego sa gago. Gaešita le ge o sa bonwe ke motho ge o se tšea, ke mang yo a go bonago?— Jehofa Modimo. Le gona re swanetše go gopola gore Modimo o hloile go utswa. Ka gona lerato la go rata Modimo le moagišani wa gago le tla go thuša gore o se ke wa ba lehodu le ka mohla.