Na Batho Bao ba Dirago Dilo tše Mpe ba ka Fetoga?

NA E be e ka se be mo gobotse ge motho yo mongwe le yo mongwe a be a ka dira se se lokilego?— Eupša ga go motho yo a dirago dilo tše dibotse ka dinako tšohle. Na o tseba lebaka leo ka lona ka dinako tše dingwe re dirago dilo tše mpe gaešita le ge re nyaka go dira botse?— Ka gobane ka moka ga rena re belegwe re e-na le sebe. Eupša batho ba bangwe ba dira dilo tše dintši tše mpe kudu. Ba hloile batho ba bangwe le go ba kweša bohloko ka boomo. Na o nagana gore ba ka fetoga gomme ba ithuta go ba ba lokilego?—

Lebelela lesogana le mo seswantšhong leo le hlokometšego diaparo tša ka ntle tša bao ba thumago Stefano ka mafsika. Leina la gagwe la Sehebere ke Saulo, eupša leina la gagwe la se-Roma ke Paulo. O be a thabišitšwe ke gore Stefano, yo e lego morutiwa wa Morutiši yo Mogolo, o a bolawa. Anke re bone lebaka leo ka lona Saulo a dirago dilo tše bjalo tše mpe.

Saulo e be e le wa sehlopha sa bodumedi bja Bojuda seo se bitšwago Bafarisei. Bafarisei ba be ba e-na le Lentšu la Modimo, eupša ba be ba lebiša tlhokomelo e kgolo dithutong tša baetapele ba bangwe ba bodumedi bja bona ka noši. Se se ile sa dira gore Saulo a dire dilo tše mpe.

Ge Stefano a be a golegwa kua Jerusalema, Saulo le yena o be a le gona moo. Stefano o ile a išwa kgorong ya tsheko, moo ba bangwe ba baahlodi e bego e le Bafarisei. Gaešita le ge go be go bolelwa dilo tše mpe ka Stefano, Stefano ga se a ka a tšhoga. O ile a bolela ka sebete gomme a nea baahlodi bohlatse bjo bobotse ka Jehofa Modimo le ka Jesu.

Eupša baahlodi bao ga se ba ka ba thabela seo ba bego ba se kwa. Ba be ba šetše ba tseba mo gontši ka Jesu. Ge e le gabotse, pejana ga tiragalo ye, ba ile ba rulaganyetša gore Jesu a bolawe! Eupša ka morago ga moo, Jehofa o ile a bušetša Jesu legodimong. Ga bjale, go e na le gore ba fetoše ditsela tša bona, baahlodi ba ile ba lwantšha barutiwa ba Jesu.

Baahlodi ba ile ba swara Stefano le go mo ntšhetša ka ntle ga motse. Ba ile ba mo wišetša fase gomme ba mo thuma ka mafsika. Le gona, bjalo ka ge o ka bona seswantšhong se, Saulo o be a le gona moo a bogetše. O be a nagana gore ke mo go swanetšego gore Stefano a bolawe.

Na o tseba lebaka leo ka lona Saulo a bego a nagana ka tsela yeo?— Ee, Saulo o feditše bophelo bja gagwe ka moka e le Mofarisei, gomme o be a dumela gore dithuto tša Bafarisei ke tšeo di nepagetšego. O be a tšea banna bao e le mehlala, ka gona o be a ba ekiša.—Ditiro 7:54-60.

Ka morago ga gore Stefano a bolawe, ke’ng seo Saulo a ilego a se dira?— O ile a leka go fediša barutiwa ba bangwe ba Jesu ka moka! O ile a leba thwii magaeng a bona gomme a ntšha banna gotee le basadi. Ke moka ka morago o ile a ba lahlela kgolegong. Barutiwa ba bantši ba ile ba swanelwa ke go tloga Jerusalema, eupša ga se ba ka ba kgaotša go bolela ka Jesu.—Ditiro 8:1-4.

Se se ile sa dira gore Saulo a hloye barutiwa ba Jesu le go feta. Ka gona o ile a ya go Moperisita yo Mogolo e lego Kayafa ke moka a hwetša tumelelo ya go golega Bakriste bao ba bego ba le motseng wa Damaseko. Saulo o be a nyaka go ba tliša Jerusalema e le bagolegwa gore ba tlo otlwa. Eupša ge a be a le tseleng ya go ya Damaseko, go ile gwa direga selo se makatšago.

Go ile gwa gadima legadima legodimong, gomme lentšu la re: ‘Saulo! Saulo! O ntlhomaretše’ng?’ E be e le Jesu yo a bolelago a le legodimong! Seetša e be e le seo se phadimago kudu moo e lego gore se ile sa foufatša Saulo, gomme batho bao ba bego ba sepela le Saulo ba ile ba swanelwa ke go mo hlahla go fihla Damaseko.

Matšatši a mararo ka morago, Jesu o ile a tšwelela ponong go yo mongwe wa barutiwa ba gagwe yo a bego a bitšwa Anania kua Damaseko. Jesu o ile a botša Anania gore a etele Saulo, a mo tloše bofofu le go boledišana le yena. Ge Anania a be a boledišana le yena, Saulo o ile a amogela therešo e lego mabapi le Jesu. O ile a boela a bona gape. Tsela ya gagwe ka moka ya bophelo e ile ya fetoga, gomme a fetoga mohlanka yo a botegago wa Modimo.—Ditiro 9:1-22.

Na bjale o bona gore ke ka baka la’ng Saulo a be a dira dilo tše mpe?— Ke ka gobane a be a rutilwe dilo tše di fošagetšego. O be a latela banna bao ba bego ba sa botegele Modimo. Le gona e be e le setho sa sehlopha seo se bego se etišitše dikgopolo tša batho pele go e na le Lentšu la Modimo. Eupša ke ka baka la’ng Saulo a ile a fetoša bophelo bja gagwe gomme a thoma go dira botse, gaešita le ge Bafarisei ba bangwe ba be ba tšwela pele go lwantšha Modimo?— Ke ka gobane ga se gore Saulo o be a hloile therešo e le ka kgonthe. Ka gona ge a be a bontšhwa seo se nepagetšego, e be e le yo a ikemišeditšego go se dira.

Na o tseba seo Saulo a ilego a ba sona ka morago?— Ee, o ile a thoma go tsebja e le moapostola Paulo yo e lego moapostola wa Jesu. Le gona gopola gore Paulo o ngwadile dipuku tše dintši tša Beibele go feta motho le ge e le ofe yo mongwe.

Go na le batho ba bantši ba swanago le Saulo bao ba ka fetogago. Eupša ga go bonolo ka gobane go na le motho yo a šomago ka matla go dira batho gore ba dire dilo tše mpe. Na o tseba gore motho yoo ke mang?— Jesu o boletše ka yena ge a be a tšwelela go Saulo yo a bego a le tseleng ya go ya Damaseko. Moo Jesu o ile a bolela le Saulo a le legodimong gomme a re: ‘Ke go romela gore o yo budulla mahlo a batho, o ba tloše lefsifsing o ba iše seetšeng le go ba tloša matleng a Sathane go ba iša go Modimo.’—Ditiro 26:17, 18.

Ee, ke Sathane Diabolo yo a lekago go dira gore motho yo mongwe le yo mongwe a dire dilo tše mpe. Na ka dinako tše dingwe o hwetša go le thata go dira se se nepagetšego?— Ka moka ga rena re hwetša go le thata. Sathane o dira gore go be thata. Eupša go na le lebaka le lengwe leo ka lona go sego bonolo go dira se se lokilego. Na o tseba lebaka leo?— Ke ka gobane re belegwa re e-na le sebe.

Ke sebe se seo ka dinako tšohle se dirago gore go be bonolo gore re dire se se fošagetšego go e na le go dira se se nepagetšego. Ka gona, re swanetše go dira’ng?— Ee, re swanetše go katanela go dira se se nepagetšego. Ge re dira seo, re ka kgonthišega gore Jesu yo a re ratago o tla re thuša.

Ge Jesu a be a le lefaseng, o ile a bontšha gore o be a rata batho bao ba bego ba dira dilo tše mpe eupša ba fetogile. O be a kwešiša kamoo go bilego thata ka gona gore ba fetoge. Ka mohlala, go be go e-na le basadi ba bangwe bao ba bilego le dikopano tša botona le botshadi le banna ba bantši. Ka kgonthe se e be e le se sebe. Beibele e bitša basadi ba gore ke diotswa.

Ka nako e nngwe, mosadi yo bjalo o ile a kwa ka Jesu gomme a ya moo a bego a le gona ngwakong wa Mofarisei. O ile a tšhela makhura dinaong tša Jesu gomme a phumola megokgo ya gagwe yeo e bego e le dinaong tša Jesu ka moriri wa gagwe. O be a itsholela dibe tša gagwe kudu, ka gona Jesu o ile a mo lebalela. Eupša Mofarisei o be a sa nagane gore o swanetše go lebalelwa.—Luka 7:36-50.

Na o tseba seo Jesu a ilego a se botša Bafarisei ba bangwe?— O ba boditše gore: ‘Diotswa di tlo le šia tša tsena mmušong wa Modimo.’ (Mateo 21:31) Jesu o ile a bolela se ka gobane diotswa tše di be di dumela go yena, gomme di ile tša fetola ditsela tša tšona tše mpe. Eupša Bafarisei ba ile ba tšwela pele ba dira barutiwa ba Jesu dilo tše mpe.

Ka gona ge Beibele e bontšha gore seo re se dirago ke se sebe, re swanetše go ikemišetša go fetoga. Le gona ge re ithuta seo Jehofa a nyakago re se dira, re swanetše go fišegela go se dira. Gona Jehofa o tla re thabela gomme o tla re nea bophelo bjo bo sa felego.