Lebaka Leo ka Lona re Swanetšego go Rata Jesu

AKANYA o le ka gare ga sekepe seo se nwelelago. Na o be o tla nyaka gore motho yo mongwe a go phološe?— Go thwe’ng ge e ba motho yo mongwe a be a ka gafa bophelo bja gagwe bakeng sa go dira bjalo?— Ee, seo ke se Jesu Kriste a ilego a se dira. Bjalo ka ge re ithutile go Kgaolo 37, o ile a gafa bophelo bja gagwe gore e be topollo e le gore re ka phološwa.

Ke therešo gore Jesu ga a re phološe gore re se ke ra kgangwa ke meetse. O re phološa go eng? Na o sa gopola?— O re phološa sebeng le lehung tšeo re di abetšego go Adama. Gaešita le ge batho ba bangwe ba ile ba dira dilo tše mpe kudu, Jesu le bona o ba hwetše. Na o be o ka bea bophelo bja gago kotsing bakeng sa go leka go phološa batho ba bjalo?—

Beibele e re: ‘Go hwela moloki, e šetše e le taba ye e nyakago go se be gona, ge e le yo botho, mohlomongwe motho a ka tlema pelo a mo hwela.’ Lega go le bjalo, Beibele e hlalosa gore Jesu ‘o hwetše badiradibe.’ Bao ba akaretša le batho bao ba sa hlankelego Modimo le gatee! Beibele e oketša ka gore: ‘Le ge re be re sa dutše re le badiradibe [re sa dutše re dira dilo tše mpe], Kriste o ile a re hwela.’—Ba-Roma 5:6-8.

Na o ka nagana ka moapostola yo a bego a kile a dira dilo tše mpe kudu?— Moapostola yoo o ile a ngwala gore: ‘Jesu Kriste o tlile lefaseng go tla go phološa badiradibe, bao ke lego thwadi ya bona.’ Moapostola yo a boletšego seo e be e le Paulo. O ile a bolela gore ‘kgale e be e le lešilo’ le gore o be a kile a keka ‘le bobe.’—1 Timotheo 1:15; Tito 3:3.

Nagana feela gore ke lerato le lekaakang leo Modimo a bego a e-na le lona ka go romela Morwa wa gagwe gore a tle go hwela batho ba bjalo! Hle tšea Beibele ya gago gomme o bale ka se go Johane kgaolo 3, temana 16. Moo e re: ‘Modimo o ratile lefase [e lego batho bao ba phelago godimo ga lefase] gakaakaa, a ba a le nea Morwa wa gagwe yo a tswetšwego a nnoši, gore mang le mang yo a mo dumetšego a se ke a lahlega, eupša a be le bophelo bjo bo sa felego.’

Jesu o ile a bontšha gore o be a re rata ka lerato le le swanago le leo Tatagwe a bego a e-na le lona. Mohlomongwe o ka ba o gopola gore go Kgaolo 30 ya puku ye, re badile ka dilo tše dingwe tšeo di ilego tša tlaiša Jesu bošegong bjoo a golegilwego ka bjona. O ile a išwa legaeng la Moperisita yo Mogolo Kayafa, moo A ilego a sekišwa gona. Go ile gwa bitšwa Dihlatse tša maaka tšeo di ilego tša bolela maaka ka Jesu, gomme batho ba ile ba mo tia ka matswele. Ke ka nako yeo Petro a ilego a latola gore o tseba Jesu. Bjale anke re akanye re le moo gomme re kgona go bona dilo tše dingwe gape tšeo di diregago.

E ba mesong. Jesu o letše a sa robala bošego ka moka. Ka ge tsheko ya bošego e be e se e swanetšego, kapejana baperisita ba ile ba bokanya lekgotla la Sanhedrine goba kgoro-kgolo ya ba-Juda, gomme ba swara tsheko e nngwe gape. Mo le gona ba ile ba latofatša Jesu ka melato ya go senyetša Modimo.

Ka morago baperisita ba ile ba tlema Jesu gomme ba mo iša go Pilato, e lego mmuši wa Roma. Ba ile ba botša Pilato gore: ‘Jesu o lwantšha mmušo. O swanetše go bolawa.’ Eupša Pilato o be a kgona go bona gore baperisita ba be ba bolela maaka. Ka gona Pilato o ile a ba botša gore: ‘Ga ke hwetše molato go monna yo. Ke tlile go mo lokolla.’ Eupša baperisita le ba bangwe ba ile ba goeletša ka gore: ‘Aowa, ga a bolawe!’

Ka morago, Pilato o ile a leka gape go botša batho gore o tlile go lokolla Jesu. Eupša baperisita ba ile ba dira gore batho ba goeletše ka gore: ‘Ge e ba o mo lokolla, le wena o lwantšha mmušo! A a bolawe!’ Lešaba le ile la thoma go hlaba lešata kudu. Na o tseba seo Pilato a ilego a se dira?—

O ile a ineela. O ile a thoma ka go dira gore Jesu a bethwe. Ke moka o ile a mo iša go bahlabani gore a yo bolawa. Ba ile ba rweša Jesu mphapahlogo wa meetlwa hlogong gomme ba mo kwera ka go mo khunamela. Ka morago ba ile ba nea Jesu kota e kgolo gore a e rwale gomme ba mo iša ka ntle ga motse lefelong leo le bitšwago Legateng. Moo ba ile ba kokotela Jesu koteng yeo diatleng le maotong. Ke moka ba ile ba e emiša e le gore Jesu a ka lekelela go yona. O be a e-tšwa madi. O be a e-kwa bohloko kudu.

Jesu ga se a ka a hwa gatee-tee. O ile a lekelela gona moo koteng. Baperisita ba bagolo ba ile ba mo kwera. Mofeti ka tsela yena o ile a re: ‘Ge e ba o le morwa wa Modimo, gona iphološe moo koteng!’ Eupša Jesu o be a tseba seo Tatagwe a bego a mo rometše gore a tlo se dira. O be a tseba gore o be a swanetše go gafa bophelo bja gagwe bjo bo phethagetšego e le gore re ka kgona go ba le sebaka sa go hwetša bophelo bjo bo sa felego. Mafelelong, mo e nyakilego go ba ka iri ya boraro thapama, Jesu o ile a goeletša Tatagwe gomme a hwa.—Mateo 26:36–27:50; Mareka 15:1; Luka 22:39–23:46; Johane 18:1–19:30.

Jesu o be a fapane kudu gakaakang le Adama! Adama ga se a ka a bontšha lerato la go rata Modimo. O ile a se kwe Modimo. Adama gape ga se a ka a bontšha gore o a re rata. Ka ge a ile a dira sebe, ka moka ga rena re belegetšwe sebeng. Eupša Jesu o ile a bontšha lerato la go rata Modimo le la go re rata. O be a e-kwa Modimo ka dinako tšohle. Le gona o ile a gafa bophelo bja gagwe e le gore a ka tloša tshenyo yeo Adama a re baketšego yona.

Na o leboga selo se se kgahlišago seo Jesu a se dirilego?— Ge o rapela Modimo, na o mo leboga bakeng sa ge a ile a re nea Morwa wa gagwe?— Moapostola Paulo o ile a leboga seo Kriste a mo diretšego sona. Paulo o ngwadile gore Morwa wa Modimo ‘yo a nthatilego gomme a ikgafa ka baka la-ka.’ (Ba-Galatia 2:20) Jesu o hwetše nna gotee le wena. O ile a gafa bophelo bja gagwe bjo bo phethagetšego e le gore re kgone go hwetša bophelo bjo bo sa felego! Ka kgonthe leo ke lebaka le matla leo ka lona re swanetšego go rata Jesu.

Moapostola Paulo o ile a ngwalela Bakriste motseng wa Korinthe gore: ‘Gobane re tutuetšwa ke lerato la go rata Kriste.’ Ke tutuetšo ya mohuta mang yeo lerato la go rata Kriste le re neago yona? O nagana’ng?— Hlokomela karabo ya Paulo: ‘O hwile bakeng sa bohle gore ba ba phelago ba se ke ba hlwa ba iphelela eupša ba phelele Yena.’—2 Ba-Korinthe 5:14, 15.

Na o ka kgona go nagana ka ditsela tšeo ka tšona o ka bontšhago gore o phelela go thabiša Kriste?— Ee, tsela e nngwe ke ka go botša ba bangwe dilo tšeo o ithutilego tšona ka yena. Goba nagana ka se: O ka ba o le noši, ka gona mmago goba tatago ba ka ba ba sa bone seo o se dirago goba go ka ba go se na motho yo mongwe yo a bonago. Na o tla lebelela mananeo a TV goba mohlomongwe wa lebelela dilo go Internet tšeo o tsebago gore di ka se thabiše Jesu?— Gopola gore Jesu ga bjale o a phela gomme o kgona go bona dilo ka moka tšeo re di dirago!

Lebaka le lengwe gape leo ka lona re swanetšego go rata Jesu ke ka gobane re nyaka go ekiša Jehofa. Jesu o itše: ‘Tate o a nthata.’ Na o tseba lebaka leo ka lona a ratago Jesu le gore ke ka baka la’ng le rena re swanetše go mo rata?— Ka gobane Jesu o be a ikemišeditše go hwa e le gore thato ya Modimo e kgone go direga. (Johane 10:17) Ka gona anke re direng seo Beibele e re botšago sona ge e re: ‘Ke gona e-bang baetši ba Modimo bjalo ka bana ba ba rategago. Le tšee ka tsela ya lerato, bjalo ka Kriste ge yena a le ratile, a ikgafa ka baka la lena.’—Ba-Efeso 5:1, 2.