Modimo o Gopola Morwa wa Gagwe

JESU o ile a lla ge mogwera wa gagwe Latsaro a be a hwile. Na o nagana gore Jehofa o ile a kwa bohloko ge Jesu a be a tlaišega le go hwa?— Beibele e bolela gore Modimo a ka ‘kwa bohloko’ le gore a ka ‘kwešwa bohloko’ ke dilo tšeo di diregago.—Psalme 78:40, 41; Johane 11:35.

Na o ka kgona go akanya ka bohloko bjoo Jehofa a ilego a bo kwa ge a be a lebeletše Morwa wa gagwe a e-hwa?— Jesu o be a kgodišegile gore Modimo a ka se ke a mo lebala. Leo ke lebaka le ka lona mantšu ao a a boletšego pele a e-hwa a bego a re: ‘Tate, [bophelo] bja-ka ke bo gafela diatleng tša gago.’—Luka 23:46.

Jesu o be a kgodišegile gore o be a tla tsošwa le gore o be a ka se tlogelwe ‘bodula-bahu’ goba lebitleng. Ka morago ga ge Jesu a tsošitšwe bahung, moapostola Petro o ile a tsopola seo se bego se ngwadilwe ka Beibeleng mabapi le Jesu, ge a re: ‘A ka se ke a leswa a le kwa bo-dula-bahu, gomme mmele wa gagwe ga se wa ka wa bona go bola.’ (Ditiro 2:31; Psalme 16:10) Aowa, mmele wa Jesu ga se wa ka wa bola ka lebitleng, seo se bolela go senyega le go nkga gampe.

Ge Jesu a be a le lefaseng, o ile a ba a botša barutiwa ba gagwe gore o be a ka se tšee lebaka le letelele a hwile. O ile a ba hlalosetša gore o be a tla ‘bolawa gomme a tsošwa ka letšatši la boraro.’ (Luka 9:22) Ka gona, ka kgonthe barutiwa ga se ba swanela go ba ba ile ba makala ge Jesu a be a tsošitšwe. Eupša na ba ile ba makala?— Anke re bone.

E be e le mo e nyakilego go ba ka iri ya boraro thapameng ya Labohlano ge Morutiši yo Mogolo a be a e-hwa koteng ya tlhokofatšo. Josefa yoo e lego setho se se humilego sa lekgotla la Sanhedrine, le yena ke modumedi wa Jesu wa ka sephiring. Ge a be a lemoga gore Jesu o hwile, o ile a ya go Pilato e lego mmuši wa Roma. O ile a mmotšiša ge e ba a be a ka theoša mmele wa Jesu koteng gore a ye go o boloka. Ka morago, Josefa o ile a iša mmele wa Jesu serapeng seo go sona go bego go e-na le lebitla, e lego lefelo leo ditopo di bewago gona.

Ka morago ga gore setopo se tsenywe ka lebitleng, lefsika le legolo le ile la pshikološetšwa mojakong wa lebitla. Ka gona lebitla le be le tswaletšwe. Bjale e be e le letšatši la boraro, e lego Sontaga. Letšatši ga se la hlwa le hlaba, ka gona e sa dutše e le lefsifsi. Banna ba dutše moo gomme ba hlapeditše lebitla. Baperisita ba bagolo ba ile ba ba roma gore ba ye go le hlapetša. Na o tseba lebaka?—

Baperisita le bona ba be ba kwele gore Jesu o boletše gore o be a tla tsošwa ka letšatši la boraro. Ka gona e le go leka go thibela barutiwa ba gagwe gore ba se ke ba utswa setopo ke moka ba bolela gore Jesu o tsošitšwe, baperisita ba ile ba bea bahlapetši lebitleng. Gatee-tee, lefase le ile la thothomela. Ka lefsifsing, go ile gwa tšwelela seetša se se phadimago. E be e le morongwa wa Jehofa! Bahlabani ba be ba tšhogile kudu moo e lego gore ba be ba sa kgone le go sepela. Morongwa o ile a ya lebitleng gomme a pshikološetša lefsika ka thoko. Lebitla le be le se na selo!

Ee, go ile gwa ba bjalo ka ge moapostola Petro ka morago a ile a re: ‘Yena Jesu yo Modimo o mo tsošitše bahung.’ (Ditiro 2:32) Modimo o ile a tsoša Jesu bahung ka mmele wo o swanago le woo Jesu a bego a e-na le wona pele ga ge a ka tla lefaseng. O ile a tsošwa bahung ka mmele wa moya wo o swanago le woo barongwa ba nago le wona. (1 Petro 3:18) Ka gona ge e ba batho ba be ba nyaka go bona Jesu, gona o be a swanetše go ikapeša mmele wa nama. Na seo ke se a ilego a se dira?— Anke re bone.

Bjale letšatši le ile la hlaba. Bahlabani ba be ba sepetše. Maria Magdalena le barutiwa ba bangwe ba Jesu ba basadi ba be ba le tseleng ba lebile lebitleng. Ba ile ba botšana ba re: ‘Ke mang yo a tlogo re pshikološetša lefsika leo le boima?’ (Mareka 16:3) Eupša ge ba fihla lebitleng, lefsika le be le šetše le pshikološeditšwe ka thoko. Ka gona lebitla le be le se na selo! Setopo sa Jesu se be se se gona! Gatee-tee, Maria Magdalena o ile a kitima a yo nyaka ba bangwe ba barutiwa ba Jesu.

Basadi ba bangwe ba ile ba šala lebitleng. Ba ile ba makala ka gore: ‘Na mmele wa Jesu o ka ba o le kae?’ Gatee-tee go ile gwa tšwelela banna ba babedi bao ba bego ba apere diaparo tše di phadimago. E be e le barongwa! Ba ile ba botša basadi gore: ‘Ke ka baka la’ng le nyaka Jesu mo? O tsošitšwe bahung. Sepelang ka pela le yo botša barutiwa ba gagwe.’ Ee, o ka akanya kamoo basadi ba ilego ba kitima ka lebelo ka gona! Ge ba le tseleng, monna o ile a gahlana le bona. Na o tseba gore monna yo e be e le mang?—

Monna yo e be e le Jesu, yoo a bego a ikapešitše mmele wa nama! Le yena o ile a botša basadi gore: ‘Sepelang le yo botša barutiwa ba-ka.’ Basadi ba be ba thabile. Ba ile ba hwetša barutiwa gomme ba re go bona: ‘Jesu o a phela! Re mmone!’ Maria o be a šetše a boditše Petro le Johane ka lebitla leo le se nago selo. Bjale ba be ba le etetše, bjalo ka ge o ka bona mo seswantšhong. Ba ile ba lebelela mašela ao Jesu a bego a tateditšwe ka ona, eupša ba se tsebe gore ke eng seo ba swanetšego go se nagana. Ba be ba nyaka go dumela gore Jesu o be a boetše a phela, eupša se se be se bonagala e le se sebotse kudu go ka ba sa kgonthe.

Ka moragonyana ka Sontaga sona seo, Jesu o ile a tšwelela go ba babedi ba barutiwa ba gagwe bao ba bego ba sepela tseleng ba lebile motsaneng wa Emause. Jesu o ile a sepela le bona gotee le go boledišana le bona, eupša ga se ba ka ba mo tseba ka gobane o be a se na mmele wa nama woo a bego a e-na le wona pele. E bile feela nakong ya ge Jesu a be a e-ja le bona le ge a be a rapela moo ba ilego ba mo tseba. Barutiwa ba ile ba thaba kudu moo ba ilego ba sepela dikhilomithara tše dintši ka go akgofa ba boela Jerusalema! Mohlomongwe e bile lebakanyana ka morago ga gore Jesu a iponagatše go Petro bakeng sa gore a mmontšhe gore O a phela.

Ke moka ka moragonyana bošegong bjoo bja Sontaga, barutiwa ba bantši ba ile ba bokana ka phapošing. Mejako e be e notletšwe. Gatee-tee, ke ge Jesu a le ka moo phapošing a e-na le bona! Bjale ba be ba tseba gore Morutiši yo Mogolo o be a boetše a phela. Akanya kamoo ba bego ba thabile ka gona!—Mateo 28:1-15; Luka 24:1-49; Johane 19:38–20:21.

Ka matšatši a 40 Jesu o ile a tšwelela go barutiwa ba gagwe ka mebele e fapa-fapanego ya nama bakeng sa gore a ba bontšhe gore o a phela. Ke moka o ile a tloga lefaseng gomme a boela go Tatagwe legodimong. (Ditiro 1:9-11) Gatee-tee barutiwa ba ile ba thoma go botša batho ka moka gore Modimo o tsošitše Jesu bahung. Gaešita le ge baperisita ba be ba ba betha le go bolaya ba bangwe ba bona, ba ile ba tšwela pele ba bolela. Ba be ba tseba gore le ge ba ka hwa, Modimo o tla ba gopola go swana le ge a ile a gopola Morwa wa gagwe.

Balatedi bao ba Jesu ba pele ba be ba fapane kudu gakaakang le batho ba bangwe ba lehono! Batho ba ba nagana feela ka mebutla ya Easter le mae ao a pentilwego ka mebala-bala a Easter nakong ya ngwaga yeo Jesu a tsošitšwego ka yona. Eupša Beibele ga e bolele selo ka mebutla ya Easter gotee le mae a gona. E bolela ka go hlankela Modimo.

Re ka swana le barutiwa ba Jesu ka go botša batho gore Modimo o dirile selo se se kgahlišago ge a be a tsoša Morwa wa gagwe bahung. Ga se ra swanela go boifa le ka mohla, gaešita le ge batho ba bolela gore ba tla re bolaya. Le ge re ka hwa, Jehofa o tla re gopola gomme o tla re tsoša, go fo etša ge a ile a tsoša Jesu.

Na ga re thabišwe ke go tseba gore Modimo o gopola bao ba mo hlankelago le gore gape o tla ba tsoša bahung?— Go tseba dilo tše go swanetše go re tutueletša gore re nyake go thabiša Modimo. Na o be o tseba gore re ka kgona go thabiša Modimo?— Anke re boledišane ka seo nakong e tlago.