Ke ka Baka la Eng go le Bohlokwa Gore o ye Dibokeng tša Dihlatse tša Jehofa?

Na o kile wa memiwa gore o tle dibokeng tša Dihlatse tša Jehofa? Ge e ba o sa ka wa ya, o ka no tšhošwa ke go tlo ya la mathomo. O ka ipotšiša gore: ‘Ge e le gabotse go direga’ng dibokeng tša Dihlatse tša Jehofa? Ke ka baka la’ng diboka tšeo di le bohlokwa? Gona ke ka baka la’ng ke swanetše go ya moo?’ Thutong ye, o tlo kwa gore go ba gona dibokeng tša Dihlatse tša Jehofa go ka go thuša bjang gore o be mogwera wa Modimo, le gore wena ka bowena di ka go hola bjang.

1. Ke ka baka la eng Dihlatse tša Jehofa di bokana mmogo?

Ekwa gore mongwadi yo mongwe wa Beibele o ile a bolela gore ke ka baka la eng go le bohlokwa go bokana le batho ba bangwe. O itše: ‘Ke tla reta Jehofa gare ga mašaba a phuthego.’ (Psalme 26:​12) Ka mo go swanago, lehono Dihlatse tša Jehofa le tšona di thaba kudu ge di bokana mmogo. Lefaseng ka moka, di bokana beke e nngwe le e nngwe gore di tumiše Jehofa ka go mo opelela, le ka go mo rapela. Le gona, ngwaga o mongwe le o mongwe, di bokana ka makga a mmalwa e le dihlopha tše dikgolo, gore di dire se se swanago.

2. Ge o ka tla dibokeng tša Dihlatse tša Jehofa, o tlo ithuta eng?

Dibokeng tša rena re ithuta ka Lentšu la Modimo, gomme ra le ‘hlatholla le go dira gore le kwagale.’ (Bala Nehemia 8:8.) Ge o ka tla dibokeng, o tlo ithuta ka Jehofa le go kwa gore ke Modimo wa mohuta mang. Ge o dutše o ekwa gore Modimo o go rata kudu, o tlo nyaka go ba mogwera wa gagwe. Le gona o tlo kwa gore a ka go thuša bjang gore o ipshine ka bophelo.​—Jesaya 48:​17, 18.

3. Batho bao o tlago go bokana le bona dibokeng tša Dihlatse tša Jehofa ba ka go thuša bjang?

Jehofa o re laela gore ‘re hlokomelane le go hlohleletšana leratong le medirong e mebotse, re sa tlogele go bokana ga rena gotee.’ (Baheberu 10:​24, 25) Dibokeng tša rena o tlo kopana le batho bao ba ratanago kudu, e bile ba rata go ithuta ka mo go oketšegilego ka Jehofa, go no swana le wena. O tlo kwa ge ba kgothatšana ka seo ba ithutago sona nakong ya diboka, gomme o tlo ba bona gore ba swara magang pele ga diboka, le ka morago ga tšona. (Bala Baroma 1:​11, 12.) Le gona ge o le moo, o tlo tsebana le batho bao ba thabilego kudu le ge ba na le mathata, go sa šetšwe gore ba nyetše goba ga se ba nyala. A e no ba a mangwe a mabaka ao a bontšhago gore Jehofa o nyaka gore re be gona dibokeng ka mehla.

ITHUTE KA MO GO TSENELETŠEGO

4. Diboka tša Dihlatse tša Jehofa

Bakriste ba pele ba be ba dula ba bokana mmogo, gore ba tumiše Jehofa. (Baroma 16:​3-5) Balang Bakolose 3:​16, gomme le boledišaneng ka potšišo e latelago:

• Bakriste ba pele ba be ba hlankela Jehofa bjang?

BIDIO: Ke Eng Seo se Diregago Holong ya Mmušo? (2:12)

• Ge o be o lebeletše bidio ye le seswantšho se, ke dilo dife tšeo di dirwago ka Holong ya Mmušo, tšeo o bonago di swana le tšeo di bego di dirwa ke Bakriste ba pele bao go bolelwago ka bona go Bakolose 3:16?

• Na go na le selo se sengwe gape seo se go kgahlilego ka diboka tša rena mo bidiong ye, goba mo seswantšhong se?

Balang 2 Bakorinthe 9:​7, gomme le boledišaneng ka potšišo e latelago:

• Ke ka baka la’ng Dihlatse tša Jehofa di sa nyake dikoleke dibokeng tša tšona?

Boledišana le morutwana wa gago ka seo se tlago go direga go tše dingwe tša diboka tša beke ye.

• Gare ga dilo tše re boledišanego ka tšona, ke karolo efe ya diboka yeo e go kgahlago kudu?

Na o be o tseba?

Ge o ka ya wepesaeteng ya rena ya jw.org/nso, o tlo hwetša gore lefaseng ka moka, Dihlatse tša Jehofa di swara diboka tša tšona kae le gona neng.

1. Dibokeng tša rena re ba le dipolelo, dipontšho e bile re bogela dibidio. Di thoma le go tswalela ka koša le thapelo

2. Nakong ya diboka, go na le dikarolo tšeo batho bao ba dutšego fase ba kgopelwago go nea dikarabo

3. Batho ka moka ba a amogelwa. E ka ba malapa, bao ba sego ba nyala, batšofadi le bana

4. Diboka tša rena ke mahala. Dihlatse tša Jehofa ga di ntšhiše batho tšhelete ge ba tsena mojako, e bile ga di sepediše dipoleiti tša dikoleke

5. Go nyakega gore o iteke gore o ye dibokeng

Nagana ka mohlala wa lapa la gabo Jesu. Ngwaga le ngwaga, lapa la gabo Jesu le be le tloga Natsaretha, gomme le eya tempeleng yeo e bego e le Jerusalema go yo hlankela Jehofa. Le be le swanelwa ke go sepela matšatši a mmalwa ditseleng tšeo di bego di sa sepelege. Balang Luka 2:​39-42, gomme le boledišaneng ka dipotšišo tše di latelago:

• Na o nagana gore ge lapa la gabo Jesu le be le eya Jerusalema, le be le swanelwa ke go dira maiteko?

• Ke ka baka la’ng le wena o ka swanelwa ke go dira maiteko gore o ye dibokeng?

• Na o nagana gore go bohlokwa gore o leke ka thata gore o ye dibokeng, le ge go dira bjalo go se bonolo? Ke ka baka la’ng o re’alo?

• Ke ka baka la’ng re swanetše go ya dibokeng ka mehla?

O ITHUTILE ENG?

Go ya dibokeng tša Dihlatse tša Jehofa, go tla go thuša gore o ithute ka mo go oketšegilego ka Jehofa, gwa go thuša gore o mo rate kudu le go mo hlankela gotee le batho ba bangwe.

Dipotšišo

• Ke ka baka la’ng Jehofa a re kgothaletša gore re bokane mmogo?

• Ge o ka ya dibokeng tša Dihlatse tša Jehofa, o tlo ithuta’ng?

• O nagana gore go ya dibokeng go ka go thuša ka tsela efe e nngwe?

ITHUTE KA MO GO OKETŠEGILEGO

Na o tšhošwa ke go ya dibokeng? Ge e ba go le bjalo, ekwa gore go tlile bjang gore monna yo mongwe, yoo le yena a bego a ikwa ka tsela yeo, a feleletše a rata go ba gona dibokeng.

Re ka se Tsoge re Lebetše Tsela Yeo ba Ilego ba re Dumediša ka Yona (4:16)

Ekwa gore go tlile bjang gore lesogana le lengwe le thabele diboka, le gore le ile la dira eng gore le dule le eya dibokeng.

Ke be ke sa Nyake go Lofa Diboka! (4:33)

Ekwa gore batho ba bangwe ba ikwa bjang ka go ba gona dibokeng tša Dihlatse tša Jehofa.

“Ke ka Baka la Eng o Swanetše go ya Holong ya Mmušo ya Dihlatse tša Jehofa?” (Sehlogo seo se lego wepesaeteng)

Ekwa gore motho yoo e bego e le tsotsi o ile a fetoga bjang ka morago ga gore a ye dibokeng tša Dihlatse tša Jehofa.

“Ga go Moo ke Bego ke Eya Gona Ntle le Sethunya sa ka” (Morokami wa July 1, 2014.)