THUTO 30
Batho Bao o ba Ratago Bao ba Hlokofetšego ba tlo Phela Gape!
Lehu le re kweša bohloko kudu. Ke ka baka leo Beibele e rego lehu ke lenaba. (1 Bakorinthe 15:26) Go Thuto 27, o ithutile gore Jehofa o tlo fediša lenaba le. Eupša go tlo direga’ng ka batho bao ba šetšego ba hlokofetše? Thutong ye, o tlo ithuta ka selo se sengwe seo se kgahlišago kudu, seo Jehofa a re tshepišago sona. Jehofa o re tshepiša gore o tlo tsoša batho ba bantši kudu bao ba hlokofetšego, gore ba tle ba phele gape gomme ba thabele bophelo go ya go ile. Na ka nnete se se ka kgonega? Na bao ba tsošitšwego mabitleng ba tlo phela legodimong, goba ba tlo phela mo lefaseng?
1. Jehofa o nyaka go tlo dira eng batho bao ba hlokofetšego?
Jehofa o fela pelo ya go tlo tsoša batho bao ba hlokofetšego gore ba tle ba phele gape. Monna yo mongwe yo a bitšwago Jobo yoo a bego a na le tumelo, o be a tshepa gore Modimo o be a ka se mo lebale ge a hlokofetše. O ile a botša Modimo gore: ‘O tla mpitša, gomme nna ke tla go araba ke le lebitleng.’—Bala Jobo 14:13-15.
2. Re tseba bjang gore batho bao ba hlokofetšego ba tlo phela gape?
Ge Jesu a be a le mo lefaseng, Modimo o ile a mo fa matla a gore a kgone go tsoša bahu. Jesu o ile a tsoša ngwanenyana yo a bego a na le mengwaga e 12, le morwa wa mosadi yoo e bego e le mohlologadi. (Mareka 5:41, 42; Luka 7:12-15) Ka morago, mogwera wa Jesu yoo a bego a bitšwa Latsaro, o ile a hlokofala. Jesu o ile a mo tsoša le ge a be a šetše a na le matšatši a mane a hlokofetše e bile a bolokilwe lebitleng. Ka morago ga gore Jesu a rapele Modimo, o ile a goeletša ka lentšu le le hlabošago a re: “Latsaro, tšwaa!” Ke moka ‘Latsaro a tšwa ka moo lebitleng’ a phela! (Johane 11:43, 44) E no nagana feela gore ba gabo Latsaro le bagwera ba gagwe ba ile ba thaba bjang!
3. Beibele e re tshepiša gore go tlo direga eng ka bahu?
Beibele e re tshepiša gore: “Go tla ba le tsogo ya [bahu.]” (Ditiro 24:15) Batho bao Jesu a ilego a ba tsoša ge a be a le mo lefaseng, ga se ba ka ba ya legodimong. (Johane 3:13) Ka morago ga gore a ba tsoše, ba ile ba phela gape gona mo lefaseng. E se kgale, Jesu o tlo tsoša batho ba bantši kudu gore ba tle ba thabele bophelo go ya go ile paradeiseng gona mo lefaseng. O ile a re “bohle bao ba lego mabitleng,” o tlo ba tsoša. Le bao re ka naganago gore ba lebetšwe, Modimo yena o sa ba gopola.—Johane 5:28, 29.
ITHUTE KA MO GO TSENELETŠEGO
Ithute ka Beibeleng gore ke ka baka la eng re tshepa gore Jesu o na le matla a go tsoša bahu le gore o tlo ba tsoša. Ekwa gore go tseba ka tsogo ya bahu go ka go homotša bjang, le go go thuša gore o tsebe gore dilo di tlo loka nakong e tlago.
4. Jesu o ile a bontšha gore o kgona go tsoša bahu
Ithute ka mo go oketšegilego gore Jesu o ile a direla mogwera wa gagwe e lego Latsaro eng. Balang Johane 11:14, 38-44, gomme le boledišaneng ka dipotšišo tše di latelago:
Re tseba bjang gore Latsaro o be a hlokofetše ka nnete?—Bona temana 39.
Ge e ba Latsaro a ile a ya legodimong, na o nagana gore Jesu o be a ka mo tsoša gore a phele gape mo lefaseng?
5. Batho ba bantši ba tlo tsošwa mabitleng!
Balang Psalme 37:29, gomme le boledišaneng ka potšišo e latelago:
Batho ba bantši bao ba tla bego ba tsošitšwe mabitleng ba tlo phela kae?
Jesu o tlo tsoša batho ba bantši kudu, ba go loka le bao ba sa lokago. Balang Ditiro 24:15, gomme le boledišaneng ka potšišo e latelago:
Wena o ka rata go tlo bona mang a tsošitšwe mabitleng?
Nagana ka taba ye: Jesu a ka se palelwe ke go tsoša bahu, go no swana le ge tate a kgona go tsoša ngwana wa gagwe yo a robetšego
6. Go tseba ka tsogo ya bahu go a re homotša, e bile go re thuša go tseba gore bophelo ga bo felele mo
Pego ya Beibele yeo e bolelago ka morwedi wa Jairo, e homoditše le go kgothatša batho ba bantši bao ba hlokofaletšwego. Balang pego yeo go Luka 8:40-42, 49-56.
Pele ga ge Jesu a ka tsoša morwedi wa Jairo yoo a bego a hlokofetše, o ile a botša tatago ngwanenyana yoo gore: “O se ke wa boifa, wena bontšha tumelo feela.” (Bona temana 50.) Go tseba gore tlo ba le tsogo ya bahu go ka go thuša bjang . . .
ge o hlokofaletšwe ke motho yo o mo ratago?
ge o bona okare o kgauswi le go hwa?
Bapalang BIDIO ye, gomme le boledišaneng ka potšišo e latelago:
Batswadi ba Phelicity ba ile ba homotšwa le go kgothatšwa bjang ke go tseba gore go tlo ba le tsogo ya bahu?
BATHO BA BANGWE BA RE: “Ga go kgonege gore bahu ba tsoge mabitleng.”
Wena o nagana’ng?
Ke lengwalo lefe leo o ka le šomišago leo le bontšhago gore go tlo ba le tsogo ya bahu?
O ITHUTILE ENG?
Beibele e re tshepiša gore go tlo ba le batho ba bantši kudu bao ba tlago go tsošwa mabitleng. Jehofa o nyaka gore ba tle ba phele gape, e bile o file Jesu matla a gore a tle a ba tsoše.
Dipotšišo
Re tseba bjang gore Jehofa le Jesu ba fela pelo ya go tlo tsoša bahu?
Na batho ba bantši bao ba tla bego ba tsošitšwe mabitleng ba tlo phela legodimong goba mo lefaseng? Gore’ng o re’alo?
Ke ka baka la’ng o tshepa gore batho bao o ba ratago bao ba hlokofetšego ba tlo phela gape?
ITHUTE KA MO GO OKETŠEGILEGO
Bala ka dilo tšeo o ka di dirago tšeo di ka go thušago gore o fole bohlokong bjo o bo kwago ge o hlokofaletšwe.
“Dilo Tšeo di ka Thušago Bao ba Hwetšwego” (Phafoga! ya No. 3 2018.)
Na ka nnete mangwalo a Beibele a ka thuša motho yo a hlokofaletšwego?
Bana bao ba hlokofaletšwego ke batho bao ba ba ratago ba ka thušwa ke’ng?
Na go na le batho bao ba tlago go tsošetšwa go yo phela legodimong? Ke bomang bao ba ka se kego ba tsošwa gore ba tle ba phele gape?