March

Ga re ikgethele go hloiwa. E bile ga re thabele go tlaišwa ka ge re hlankela Jehofa. Bjale ke ka baka la’ng re ka thaba ge re hloilwe? Nagana ka mabaka a a mararo. Sa pele, ge re kgotlelela Modimo o a thaba. (1 Pet. 4:13, 14) Sa bobedi, ge tumelo ya rena e lekwa e a tia. (1 Pet. 1:7) Sa boraro, re tlo hwetša moputso o mogologolo wa go tlo phela ka mo go sa felego. (Rom. 2:6, 7) Ka moragonyana ga gore Jesu a tsošwe bahung, baapostola ba gagwe ba ile ba latswa lethabo leo a bego a boletše ka lona. Ba ile ba thaba ka morago ga gore ba itiwe le go laelwa gore ba tlogele go ruta batho ka Modimo. Ke ka baka la’ng ba ile ba thaba? Ka “gobane ba be ba tšerwe e le ba ba swanelwago ke go hlomphollwa ka baka la leina la [Jesu].” (Dit. 5:40-42) Ba be ba rata Mong wa bona kudu go feta go boifa go hloiwa ke manaba a bona. Le gona ba ile ba bontšha lerato leo ka go bolela ditaba tše dibotse “ba sa kgaotše.” Lehono bana babo rena ba bantši ba tšwela pele ba hlankela Jehofa ka go mmotegela le ge ba na le mathata. Ba a tseba gore Jehofa a ka se tsoge a lebala modiro wa bona le lerato leo ba le bontšhitšego leineng la gagwe. w21.03 25 ¶18-19

Bakriste bao ba tloditšwego ga ba belegwe ba na le kholofelo ya go yo phela legodimong. Modimo ke yena a ba neago kholofelo yeo. Ba nagana ka yona, ba rapela ka yona e bile ba fela pelo ya go tlo hwetša moputso wa bona wa go yo phela legodimong. Ga ba tsebe gore mebele ya bona ya legodimong e tlo ba bjang. (Bafil. 3:20, 21; 1 Joh. 3:2) Eupša ba fela pelo ya go bona batlotšwa ba bangwe gotee le go buša le bona legodimong. Ba dinku tše dingwe ba fela pelo ya go tlo phela ka mo go sa felego mo lefaseng. Ye ke kganyogo yeo batho ba belegwago ba na le yona. Le gona ba fela pelo ya go tlo fetoša lefase le ka moka gore e be paradeise. Ba fela pelo ya gore letšatši leo ba tlago go kgona go ikagela dintlo, ba bjala dirapa le go thabela bophelo le bana ba bona, le fihle. (Jes. 65:21-23) Ba nyaka go tlo bona mafelo a mantši ao a lego gona mo lefaseng, ba bone dithaba, mašoka, mawatle le go ithuta ka dilo tše dintši tšeo Modimo a di bopilego. Eupša selo seo se ba thabišago kudu ke go tseba gore segwera sa bona le Jehofa se tlo tšwela pele se gola le go feta. w21.01 18-19 ¶17-18

Ka morago ga gore Bababilona ba hlasele Jerusalema le go e fediša, batho ba be ba re: “Ke lešope leo le se nago motho le seruiwa. E gafetšwe seatleng sa Bakaladea.” (Jer. 32:43) Mengwaga e ka bago e 200 ka morago ga gore Joele a ngwale boporofeta bja mabapi le go hlaselwa ga Jerusalema, Jehofa o ile a diriša Jeremia go bolela e sa le pele selo se sengwe gape seo se bego se tlo direga mabapi le tlhaselo ye. O ile a bolela gore batho bao ba bego ba tla hlasela motse woo, ba be ba tla nyaka Baisiraele ka moka bao ba dirilego dilo tše mpe, gomme ba ba swara ba ba iša bothopša. Jeremia 16:16, 18 e re: “‘Šefa ke romela barei ba bantši ba dihlapi,’ o re’alo Jehofa, ‘gomme ba tla ba rea; ka morago ga moo ke tla romela batsomi ba bantši gomme ba tla ba tsoma dithabeng tšohle, mebotong ka moka le mengeng ya magaga. . . . Ke tla . . . lefetša molato wa bona le sebe sa bona ka mo go feletšego.’” Ge Bababilona ba be ba tlo hlasela Baisiraele bao ba sa itsholego, Baisiraele ba, ba be ba ka se kgone go tlo tšhabela lewatleng goba lešokeng. w20.04 5 ¶12-13

Jehofa o ile a nea Lota taelo e itšego, eupša Lota o ile a dikadika go mo theetša. Re ka no ahlola Lota ka gore o be a sa kwe, eupša Jehofa ga se a ka a ngala Lota. “Ka baka la lešoko la Jehofa,” barongwa ba ile ba swara Lota, mosadi wa gagwe le barwedi ba gagwe ka diatla ba ba ntšha motseng woo. (Gen. 19:15, 16) Go na le mabaka a mantši ao a ka bago a ile a dira gore Jehofa a kwele Lota bohloko. Go ka direga gore Lota o be a dikadika ka gobane a be a tšhaba batho bao ba bego ba dula ka ntle ga motse. Go ka ba go bile le mabaka a mangwe ao a ilego a dira gore Lota a dikadike go tšhaba. Go ka direga gore Lota o ile a kwa ka dikgoši tše pedi tšeo di kilego tša wela ka meleteng yeo e nago le sekontiri moeding wa kgauswi le moo Sodoma. (Gen. 14:8-12) Ka ge Lota a be a na le mosadi le bana, o be a sa nyake selo ka bona. Se sengwe ke gore Lota o be a humile, ka gona go ka direga gore o be a na le ntlo e botse kudu moo Sodoma. (Gen. 13:5, 6) Go bolela nnete, mabaka a ka moka a be a sa swanela go dira gore Lota a dikadike go kwa Jehofa. Eupša Jehofa ga se a ka a lebelela diphošo tša Lota kudu, o ile a mo lebelela e le “moloki.”—2 Pet. 2:7, 8. w20.04 18 ¶13-14

Lena bana babo rena ba bafsa, go ka tšea nako gore batho bao le godilego mahlong a bona ba thome go le lebelela bjalo ka motho yo mogolo. Eupša le ka kgodišega gore Jehofa o kgona go bona seo batho ba bangwe ba sa kgonego go se bona. O le tseba gabotse e bile o tseba gore ke eng seo le ka kgonago go se dira. (1 Sam. 16:7) Tiišang segwera sa lena le Modimo. Dafida o ile a tiiša segwera sa gagwe le Modimo ka go lebelela tlholo ya Jehofa. E bile o ile a naganišiša ka seo tlholo e re rutago sona ka Mmopi. (Ps. 8:3, 4; 139:14; Baroma 1:20) Selo se sengwe gape seo le swanetšego go se dira ke gore le kgopele Jehofa gore a le fe matla. Ka mohlala, na bao le tsenago le bona sekolo ba a le kwera ka ge le le ba bangwe ba Dihlatse tša Jehofa? Ge e ba go le bjalo rapelang Jehofa gore a le thuše go lebeletšana le bothata bjoo. Dirišang keletšo yeo le e hwetšago ka Lentšung la Modimo e lego Beibele le ka dikgatišong le dibidiong tša rena. Nako le nako ge le bona Jehofa a le thuša go rarolla bothata bjo le nago le bjona, le tlo mo tshepa le go feta. Go oketša moo, ge batho ba bangwe ba bona gore le ithekgile ka Jehofa, le bona ba tlo go tshepa. w21.03 4 ¶7

Mpho e nngwe ya bohlokwa yeo e sa bonwego ke thapelo. Bagwera ba bagolo ba rata go boledišana le go botšana kamoo ba ikwago ka gona. Segwera sa rena le Jehofa le sona se swanetše go ba bjalo? Jehofa o bolela le rena a diriša lentšu la gagwe e lego Beibele gomme ka go yona o re botša kamoo a ikwago ka gona. Rena re bolela le Jehofa ge re mo rapela, e bile re ka mmotša kamoo re ikwago ka gona. Ka ge Jehofa e le mogwera wa rena yo a re ratago, o theetša dithapelo tša rena e bile o a di araba. Ka dinako tše dingwe o di araba ka pejana. Eupša ka dinako tše dingwe re ka swanelwa ke go rapela gantši le gantši. Seo re swanetšego go kgodišega ka sona ke gore o tlo re araba ka nako ya maleba le ka tsela e botse kudu. Ke nnete gore Modimo a ka re araba ka tsela yeo re bego re sa e letela. Ka mohlala, go e na le gore a tloše teko yeo re lebeletšanego le yona, a ka re nea bohlale le matla a gore ‘re e kgotlelele.’ (1 Bakor. 10:13) Re ka bontšha bjang gore re leboga mpho ye e bohlokwa ya thapelo? Tsela e nngwe ke ka go kwa taelo ya Jehofa ya gore “[re rapele] ka mehla.”—1 Bathes. 5:17. w20.05 27-28 ¶7-8

Batho bao ba kitimago mmarathone ba dula ba lebeletše mo ba yago e le gore ba se ke ba kgopša. Ge e ba ba ka wa ba a tsoga gomme ba tšwela pele ka go kitima. Ga ba dulele go nagana ka seo se ba wišitšego eupša ba dula ba nagana ka go fihla mafelelong a lebelo leo le ka moputso wo ba tlago go o hwetša. Lebelong leo re le kitimago, re ka fela re kgopša gantši, ra dira diphošo ka seo re se bolelago goba ka seo re se dirago. Goba batho bao re kitimago le bona ba ka fela ba dira diphošo tšeo di ka re kwešago bohloko. Ge seo se direga ga se ra swanela go makala. Ka moka ga rena re belegwe re na le sebe e bile re kitima tseleng e pitlaganego yeo e išago bophelong bjo bo sa felego. Ka gona re tlo no fela re thulana gomme seo sa dira gore re fe ba bangwe ‘mabaka a go ba le pelaelo.’ (Bakol. 3:13) Eupša go e na le gore re dule re naganne ka seo se dirilego gore re kgopše, re swanetše go dula re naganne ka moputso gomme re tšwele pele ka lebelo. Ge e ba re ka ngala ge re wele e bile ra gana go tsoga, gona re ka se fetše lebelo leo le go hwetša moputso. Le gona ge re ka gana go tsoga re ka ba ra wiša le ba bangwe bao ba lekago go kitima tseleng ye yeo e pitlaganego. w20.04 26 ¶1; 28 ¶8-9

Moporofeta Daniele o ile a bolela ka seswantšho se segolo seo se dirilwego ka dilo tše di fapafapanego. Karolo e nngwe le e nngwe e swantšhetša mmušo wo o kilego wa buša nageng yeo go bego go na le batho ba Modimo ba bantši. Mebušo ye ga se ya buša ka nako e tee. Maoto a seswantšho seo a be a dirilwe ka tšhipi ye e tswakanego le letsopa. Maoto ao a swantšhetša mmušo wa mafelelo wa lefase, e lego Mmušo wa Maisemane le Maamerika. Boporofeta bjoo bo ra gore mmušo woo o tla be o sa buša ge Modimo a tla be a fediša mebušo ka moka ya batho. Moapostola Johane le yena o ile a bolela ke mebušo e megolo ya lefase yeo e ilego ya ama batho ba Modimo. Boporofeteng bja gagwe, mebušo ye e emelwa ke sebata sa dihlogo tše šupa. Hlogo ya bošupa ya sebata seo e emela mmušo wa lefase wa Maisemane le Maamerika. Taba ye e bohlokwa ka gobane hlogo yeo ya bošupa ke ya mafelelo, ga go sa na hlogo e nngwe. Hlogo yeo ya bošupa e tla be e sa buša ge Jesu Kriste le madira a gagwe a legodimong ba tla be ba fediša sebata seo ka moka.—Kut. 13:1, 2; 17:13, 14. w20.05 14 ¶11-12

Re a tseba gore Modimo ke yena a re filego bophelo, eupša mantšu ao a rego “Modimo ke lerato” a re gopotša gore lerato le tšwa go Modimo. Jehofa o a re rata! Tsela yeo a re ratago ka yona e dira gore re ikwe re šireletšegile, re thabile e bile re kgotsofetše. Bakriste ga se ba swanela go kgetha ge e ba ba ka bontšha lerato goba ba ka se le bontšhe. Go bontšhana lerato ke taelo yeo ba e neilwego yeo ba swanetšego go e latela. (Mat. 22:37-40) Ge re tseba Jehofa gabotse, go ka ba bonolo go latela taelo ya pele yeo e lego ditemaneng tše ka gobane Jehofa o phethagetše, o na le taba le rena e bile o botho. Eupša re ka hwetša go se bonolo gore re latele taelo ya bobedi. Ka baka la’ng? Ka gobane bana babo rena le dikgaetšedi, bao Beibele e rego ke ba bangwe ba baagišani ba rena, ba dira diphošo. Ka dinako tše dingwe ba ka bolela goba ba re dira dilo tšeo di re kwešago bohloko. Jehofa o be a tseba gore go ka se be bonolo gore re latele taelo yeo ya bobedi. Ka baka leo, o ile a diriša bangwadi ba Beibele go re ruta gore ke ka baka la eng re swanetše go ratana le gore re ka dira seo bjang. Yo mongwe wa batho bao a ilego a ba diriša e be e le moapostola Johane.—1 Joh. 3:11, 12. w21.01 8 ¶1-2

Go sa šetšwe gore re sa tšwa go thoma go hlankela Jehofa goba gore re na le nako e telele re mo hlankela, re swanetše go ipotšiša gore: ‘Na ke leka go ganetša Sathane ge a dira gore ke se boife Modimo ka pelo ka moka?’ Ka mohlala, o dira’ng ge o bona diswantšho tšeo di ka dirago gore o nagane ka boitshwaro bjo bobe ge o bogetše thelebišene goba o le Inthaneteng? Go ka ba bonolo gore o ipotše gore seswantšho seo o se bonago goba mmubi woo o o bogetšego ga o kgothaletše bootswa. Eupša na seo e ka ba e le selo seo Sathane a se dirišago go go dira gore o se boife Modimo ka pelo ka moka? Seswantšho seo o se bonego, se ka swantšhwa le selepe seo motho a se dirišago go phapha kota e kgolo. Motho a ka e phapha gatee, ya se arogane. Eupša ge a dutše a e phapha, mafelelong kota yeo e a arogana. Na diswantšho tšeo re di bonago thelebišeneng goba Inthaneteng, tšeo di dirago gore re nagane ka boitshwaro bjo bobe, di ka swantšhwa le selepe seo? Selo seo se ka thomago e le se senyenyane e bile se bonagala se se kotsi, mafelelong se ka dira gore motho a feleletše a dirile sebe gomme a se sa boifa Modimo ka pelo ka moka. Ka gona o se ke wa dumelela selo le ge e le sefe seo se šilafetšego se tsena ka pelong ya gago. Dula o boifa leina la Jehofa ka pelo ka moka! w20.06 11-12 ¶14-15

Re swanetše go dula re thuša batho bao ba fodilego moyeng le go ba kgothatša. Go swana le morwa wa lehlaswa, batho bao ba fodilego moyeng ba ka tšea nako e telele gore ba fole bohloko bjo ba bo kwago. (Luka 15:17-24) Le gona ka ge ba be ba le ka ntle ga phuthego, go ka direga gore segwera sa bona le Jehofa ga se sa swana le mathomong. Re swanetše go ba thuša go lokiša segwera sa bona le Jehofa. Papišong ya nku yeo e timetšego, Jesu o ile a bolela gore modiši o ile a e rwala a e bea magetleng a gagwe ke moka a e bušetša mohlapeng. Modiši yo o be a feditše nako e bile a dirišitše matla a gagwe gore a kgone go hwetša nku e timetšego. Ka ge modiši yo a be a tseba gore nku yeo e ka se kgone go boela mohlapeng ka boyona o ile a e rwala gomme a e thuša. (Luka 15:4, 5) Re ka swanela ke go ipha nako le go diriša matla a rena go thuša batho bao ba fodilego moyeng go fenya mafokodi ao a ba paledišago go boela go Jehofa. Moya wa Jehofa, Lentšu la Gagwe gotee le dikgatišo tša mokgatlo, di ka re thuša gore re kgone go matlafatša batho bao ba fodilego moyeng. Ka gona, ge o kgopelwa gore o badiše motho yo a fodilego moyeng, amogela seo ka diatla tše pedi. w20.06 28 ¶14-15

Yo mongwe le yo mongwe wa rena o swanetše go bontšha lerato ka gobane Bakriste ba nnete ba tsebja ka lona. Eupša gape re swanetše go ba le “tsebo e nepagetšego le temogo e tletšego.” (Bafil. 1:9) Ge re ka se dire bjalo, re ka “išwa kua le kua ke phefo e nngwe le e nngwe ya thuto ka bohwirihwiri bja batho,” go akaretša le dithuto tša bahlanogi. (Baef. 4:14) Ge barutiwa ba bantši ba be ba tlogela go latela Jesu, moapostola Petro o ile a bolela a kgodišegile gore Jesu o na le “mantšu a bophelo bjo bo sa felego.” (Joh. 6:67, 68) Le ge ka nako yeo Petro a be a sa kwešiše gabotse mantšu ao, o ile a dula a botega ka gobane o be a kwešišitše therešo ka Jesu Kriste. Le wena o ka matlafatša kgodišego ya gago ka seo Beibele e se rutago. Ge o ka dira bjalo, o tlo kgona go dula o botega go sa šetšwe seo se ka diregago. Le gona o tlo kgona go matlafatša tumelo ya batho ba bangwe.—2 Joh. 1, 2. w20.07 8 ¶2; 13 ¶18

E le go thuša bana babo rena le dikgaetšedi gore ba dule therešong, re swanetše go ba bontšha kwelobohloko. (1 Joh. 3:10, 11, 16, 17) Re swanetše go ratana ge dilo di sepela gabotse le ge go na le mathata. Ka mohlala, na o tseba ngwaneno goba kgaetšedi yo a hlokofaletšwego yo a nyakago go homotšwa goba yo a hlokago go thušwa ka tsela e itšego? Goba na o kwele ka bana babo rena le dikgaetšedi bao ba wetšwego ke kotsi ya tlhago bao Diholo tša bona tša Mmušo goba magae a bona a senyegilego? Re bontšha gore re rata bana babo rena le dikgaetšedi go tšwa pelong le go ba kwela bohloko ka seo re se bolelago le ka seo re se dirago. Ge re bontšhana lerato re ekiša Tatago rena wa legodimong. (1 Joh. 4:7, 8) Tsela e bohlokwa yeo re bontšhanago lerato ke ka go lebalelana. Ka mohlala, ge e ba ngwanabo rena a re kwešitše bohloko re bontšha gore re a mo rata ka go mo lebalela gomme ra lebala seo a re dirilego sona.—Bakol. 3:13. w20.07 24 ¶14-15

Na motho yo mongwe le yo mongwe yo a tsošitšwego bahung o tlo ba le motho yo a mo swarelago thuto go swana le lehono? Na bao ba tsošitšwego ba tla ya diphuthegong tše itšego e le gore ba tlwaetšwe go ruta bao ba tsošitšwego ka morago ga bona? Re tla swanelwa ke go leta gore re bone. Eupša re tseba gore mafelelong a pušo ya Kriste ya mengwaga e sekete, “lefase le tla tlala tsebo ya Jehofa.” (Jes. 11:9) Nakong yeo re tlo ba le mošomo o montši wo o thabišago wo re swanetšego go o dira! Mengwageng e Sekete ya Pušo ya Jesu Kriste batho ka moka lefaseng ba tla swanelwa ke go tšwela pele ba dira diphetogo e le gore ba kgone go kgahliša Jehofa Modimo. Ka moka ga bona ba tlo ba le kwelobohloko e le gore ba kgone go thuša bao ba tsošitšwego gore ba se sa ba le dikgopolo tše di fošagetšego e le gore ba kgone go phela ka melao ya Jehofa. (1 Pet. 3:8) Bao ba tsošitšwego ba tla lemoga gore batho ba Jehofa ba ikokobeditše e bile ba “šomela phološo ya [bona.]”—Bafil. 2:12. w20.08 16 ¶6-7

Ge e ba re diriša keletšo yeo moapostola Paulo a re neilego yona gomme re thoma go itlhahloba, le rena re tlo thoma go bona gore re na le dimpho tše itšego tšeo ba bangwe ba se nago tšona. Ka mohlala, mogolo yo a itšego a ka ba a se na bokgoni bja go nea dipolelo eupša a thušitše batho ba bantši go tla ka phuthegong. Goba a ka ba a sa kgone go rulaganya dilo gabotse eupša a rata batho, a le botho e bile ditho tše dingwe tša phuthego di kgona go ya go yena gore a di nee keletšo e botse yeo e tšwago ka Mangwalong. Goba a ka ba a tsebega ka go rata go amogela baeng. (Heb. 13:2, 16) Ge re tseba bokgoni bja rena le dimpho tšeo re nago le tšona, re tlo thaba ge re bona kamoo re ka thušago ba bangwe ka phuthegong. Le gona seo se tla re thuša gore re se ke ra jela bana babo rena mona ge ba re phala ka dilo tše dingwe. Le ge ka moka ga rena re le bohlokwa ka phuthegong, re swanetše go dira sohle se re ka se kgonago gore re kaonefatše bokgoni bja rena bja go ruta ba bangwe. w20.08 24 ¶16-18

Kopanong e nngwe ya selete, Ngwanabo rena J. F. Rutherford o ile a nea polelo e bohlokwa ya sehlogo seo se rego, “Lešaba le Legolo.” Kopano yeo e be e swaretšwe Washington, D.C., U.S.A. ka 1935. Polelong yeo ya gagwe, Ngwanabo rena Rutherford o ile a hlalosa gore ke bomang bao e bego e tla ba karolo ya “lešaba le legolo” leo go bolelwago ka lona go Kutollo 7:9. Go fihla ka nako yeo, Barutwana ba Beibele ba be ba nagana gore lešaba le legolo e be e le sehlopha sa batho bao ba bego ba tla ya legodimong, eupša ba be ba sa botege go swana le batlotšwa. Ngwanabo rena Rutherford o ile a diriša Mangwalo go hlalosa gore lešaba le legolo le ka se ye go phela legodimong, eupša lešaba le legolo ke ba dinku tše dingwe bao ba tlago go phologa ‘masetlapelo a magolo’ gomme ba tla ba phela ka mo go sa felego mo lefaseng. (Kut. 7:14) Jesu o tshepišitše gore: “Ke na le dinku tše dingwe tšeo e sego tša lešaka le; le tšona ke swanetše go di tliša gomme di tla theetša lentšu la ka, ya ba mohlape o tee wa modiši o tee.” (Joh. 10:16) Ba “dinku tše dingwe” bao go bolelwago ka bona mo, ke Dihlatse tša Jehofa tšeo di botegago tšeo di nago le kholofelo ya go tlo phela ka mo go sa felego lefaseng la Paradeise.—Mat. 25:31-33, 46. w21.01 14 ¶1-2

Re swanetše go bontšha boikgafo e le gore re tle re kgotlelele go fihlela re fetša modiro wa rena wa go bolela ditaba tše dibotse. (Mat. 28:19, 20) Ga re belegwe re na le boikgafo. Go e na le moo, ka tlhago re rata go dira dilo tšeo go lego bonolo go di dira. Ka ge gantši go se bonolo go dira dilo tšeo di lego bohlokwa, re swanetše go ithuta go ba le boitshwaro goba boikgafo. Ka gona re hloka thušo gore re kgone go dira dilo tšeo re ka bago re thatafalelwa ke go di dira. Jehofa o re nea thušo yeo a diriša moya wa gagwe o mokgethwa. (Bagal. 5:22, 23) Moapostola Paulo o be a na le boikgafo. Eupša o boletše gore o be a swanetše go “tula” goba go itia mmele wa gagwe e le gore a kgone go dira se se lokilego. (1 Bakor. 9:25-27) O ile a botša ba bangwe gore ba be le boitshwaro le gore ba dire dilo ka moka “ka bothakga le ka thulaganyo.” (1 Bakor. 14:40) Re swanetše go šoma ka thata gore re dule re hlankela Jehofa, seo se akaretša go botša batho ditaba tše dibotse ka mehla.—Dit. 2:46. w20.09 6-7 ¶15-17

Lehono dinageng tše dintši re bolela ditaba tše dibotse ka bolokologi. Na o dula nageng yeo mmušo o re dumelelago go hlankela Jehofa re lokologile? Ge e ba go le bjalo, ipotšiše gore: ‘Ke diriša bjang tokologo yeo?’ Mehla ye ke e kgahlišago go batho ba Jehofa, ka gobane ba swaregile ka modiro o mogolo kudu wa go bolela ditaba tše dibotse wo o sa kago wa dirwa mo lefaseng. Go na le dilo tše dintši tšeo re ka di dirago go thekga modiro wo. O ka diriša bjang ka bohlale nako ya ge go na le khutšo? (2 Tim. 4:2) Ke ka baka la’ng o sa hlahlobe maemo a gago gomme wa bona ge e ba wena goba yo mongwe ka lapeng a ka oketša nako yeo a e fetšago a bolela ditaba tše dibotse, mohlomongwe ka go tšea bobulamadibogo? Gona bjale ga se nako ya go ikgobokeletša mahumo le dilo tše dintši, ka gobane dilo tšeo re ka se phologe le tšona nakong ya masetlapelo a magolo. (Die. 11:4; Mat. 6:31-33; 1 Joh. 2:15-17) Bagoeledi ba bantši ba ithutile leleme le lengwe gore ba kgone go thuša batho ba bangwe go ithuta ka Jehofa. Mokgatlo wa Jehofa o re file dilo tše dintši tšeo re ka di dirišago go ruta batho ditaba tše dibotse ka maleme a ka godimo ga a 1 000! w20.09 16 ¶9-11

Lešole la nnete le a botega. Le lwa ka thata gore le šireletše batho bao le ba ratago goba dilo tšeo di lego bohlokwa go lona. Paulo o ile a kgothaletša Timotheo gore a bontšhe boineelo go Modimo, e lego go hlankela Modimo ka go mmotegela. (1 Tim. 4:7) Ge re rata Modimo kudu e bile re ineetše go yena, seo se tlo dira gore re swarelele ka go tia therešong. (1 Tim. 4:8-10; 6:6) Lešole la nnete gape le swanetše go šoma ka thata e le gore le tle le kgone go dula le swanelega go ya ntweng. Timotheo o ile a kgona go lwa le Sathane ka gobane o ile a latela keletšo yeo Paulo a mo neilego yona, gomme a šoma ka thata gore a lwantšhe dikganyogo tše di fošagetšego, a be le dika tše dibotse e bile a fetše nako a na le bana babo le dikgaetšedi ka phuthegong. (2 Tim. 2:22) Gore Timotheo a kgone go dira seo, o be a swanetše go šoma ka thata. Le rena re swanetše go šoma ka thata gore re tle re fenye dikganyogo tše di fošagetšego. (Baroma 7:21-25) Le gona re swanetše go šoma ka thata gore re fetoše semelo sa rena gomme re be le dika tše dibotse. (Baef. 4:22, 24) E bile ge re hlwele re šoma ka thata gomme re lapile, re ka swanelwa ke go ikgoga gore re ye dibokeng.—Baheb. 10:24, 25. w20.09 28 ¶9-11

Re swanetše gore re se ke ra fela pelo ge re thuša motho yo re ithutago le yena gore mafelelong a ineele go Jehofa gomme a kolobetšwe. Eupša re swanetše go tseba ge e ba motho yoo a nyaka go hlankela Jehofa. Na morutwana yo o a bontšha gore o leka go dira dilo tšeo Jesu a re laetšego gore re di dire? Goba na o no nyaka feela go ithuta ditaba tše di kgahlišago tša ka Beibeleng? Dula o lebelela ge e ba morutwana a dira tšwelopele. Ka mohlala, na o go botša ka tsela yeo a ikwago ka yona ka Jehofa? Na o diriša leina la Jehofa ge a rapela? (Ps. 116:1, 2) Na o thabela go bala Beibele? (Ps. 119:97) Na o tla dibokeng ka mehla? (Ps. 22:22) Na o dirile diphetogo bophelong go bontšha gore o diriša seo a ithutago sona? Na o botša ba gabo goba bagwera ba gagwe ka seo a ithutago sona? (Ps. 9:1) Potšišo ya bohlokwa ke gore, na yena o nyaka go ba yo mongwe wa Dihlatse tša Jehofa? (Ps. 40:8) Ge e ba motho yoo o ithutago le yena a sa dire tšwelopele dilong ka moka tšeo re boletšego ka tšona, ka bohlale leka go hwetša gore ke ka baka la eng a sa dire tšwelopele ke moka ka botho le ka go se pepetletše o boledišane le yena ka taba yeo gomme o mo thuše. w20.10 18 ¶14-15

Tatago Jesu wa legodimong e lego Jehofa ka mehla o dira diphetho tše dibotse, le batswadi ba Jesu e lego Josefa le Maria le bona ba ile ba dira diphetho tše dibotse. Eupša ge Jesu a be a gola o ile a swanelwa ke go itirela diphetho. (Bagal. 6:5) Go no swana le rena, le yena o be a kgona go kgetha seo a nyakago go se dira. O be a ka no kgetha go itirela seo a se ratago. Eupša o ile a kgetha go dula a na le segwera se sebotse le Jehofa. Ka morago ga gore Jesu a tsebe gore Jehofa o nyaka a dira eng, o ile a kgetha go dira seo. (Joh. 6:38) O be a tseba gore batho ba bantši ba be ba tlo mo hloya. Le ge a be a sa nyake go hloiwa, o ile a no kgetha go kwa Jehofa. Ge Jesu a be a kolobetšwa ka 29 C.E., selo se bohlokwa go yena e be e le go dira seo Jehofa a se nyakago. (Baheb. 10:5-7) Le nakong ya ge a be a ehwa koteng ya tlhokofatšo, o be a sa ikemišeditše go dira thato ya Tatagwe.—Joh. 19:30. w20.10 29 ¶12; 30 ¶15

Na o tseba bana babo rena le dikgaetšedi ka phuthegong bao ba tlaišegago ka baka la bolwetši goba bao ba lebeletšanego le mathata a mangwe, goba mohlomongwe bao ba hlokofaletšwego ke ba gabo bona? Ge re ekwa gore go na le motho yo a hlokago thušo, re swanetše go kgopela Jehofa gore a re thuše go dira goba go bolela selo seo se ka thušago motho yoo. Mantšu goba ditiro tša rena e ka ba kgothatšo yeo ngwanabo rena goba kgaetšedi a e hlokago. (1 Pet. 4:10) Re a tseba gore re ka ba le sebete ka ge Jehofa a na le rena. O re thuša a diriša Jesu le barongwa. Gape o re thuša a diriša babuši ge e ba seo se dumelelana le morero wa gagwe. Ka ge bontši bja rena re šetše re bone, Jehofa o diriša moya wa gagwe o mokgethwa go dira gore bana babo rena le dikgaetšedi ba kgone go re thuša. Go swana le moapostola Paulo, yo mongwe le yo mongwe wa rena o na le lebaka le lebotse la go bolela a kgodišegile gore: “Jehofa ke mothuši wa ka; nka se boife. Motho a ka ntira’ng?”—Baheb. 13:6. w20.11 17 ¶19-20

Baapostola ba be ba na le bohlatse bjo bontšhago gore Jehofa o be a na le bona. O be a ba neile matla a go kgona go dira mehlolo. (Dit. 5:12-16; 6:8) Lehono Jehofa ga a re nee matla a go dira mehlolo. Eupša o diriša Beibele go re kgonthišetša gore ge re tlaišetšwa toko, re a thaba ka gobane seo re se dirago se a mo kgahliša. (1 Pet. 3:14; 4:14) Ka gona ga se ra swanela go dula re naganne ka gore re tlo dira eng ge re tlaišwa nakong e tlago. Go e na le moo, re swanetše go dira sohle se re ka se kgonago gore re matlafatše segwera sa rena le Jehofa le go tshepa gore o tla re thekga le go re phološa. Re swanetše go tshepa kholofetšo ya Jesu yeo e rego: “Ke tla le nea mantšu ao le tlago go a bolela gotee le bohlale tšeo baganetši ba lena ka moka ba ka se kgonego go di ganetša goba go di ngangiša.” Le gona Jesu o re tshepišitše gore: “Ka go kgotlelela ga lena, le tla rua meoya ya lena.” (Luka 21:12-19) O se ke wa lebala gore Jehofa o gopola dilo ka moka ka bahlanka ba gagwe bao ba hwago ba mmotegela e le gore a tle a kgone go ba tsoša. w21.01 4 ¶12

Moapostola Paulo e be e se motho wa mathomo wa go bolela ka kholofelo ya gore bahu ba tla tsošwa. Jobo le yena o ile a bolela ka taba ye. O be a kgodišegile gore Modimo o tla mo gopola gomme a mo tsoša gore a tle a phele gape. (Jobo 14:7-10, 12-15) “Tsogo ya bahu” ke e nngwe ya dithuto tša “motheo” tšeo Bakriste ka moka ba di dumelago. (Baheb. 6:1, 2) Paulo o bolela ka tsogo ya bahu go Bakorinthe ba Pele kgaolo 15. Seo a se ngwadilego se swanetše go ba se ile sa kgothatša Bakriste ba mehleng ya gagwe. Go sa šetšwe gore o na le nako e telele gakaakang o dumela gore bahu ba tlo tsošwa, seo se bolelwago kgaolong yeo se tla matlafatša tumelo ya gago. Taba ya gore Jesu Kriste o ile a tsošwa bahung, ke yona e re kgodišago gore batho ba gabo rena bao ba hlokofetšego ba tla tsošwa. Taba yeo e be e le gare ga “ditaba tše dibotse” tšeo Paulo a ilego a di botša Bakorinthe. (1 Bakor. 15:1, 2) Ge e le gabotse, o ile a bolela gore ge e ba Mokriste a sa dumele gore Jesu o tsošitšwe bahung, gona tumelo ya gagwe ga e na mohola.—1 Bakor. 15:17. w20.12 2 ¶2-4

Ke eng seo se ilego sa thuša moapostola Petro gore a se sa ikwa a nyamile? O ile a thušwa ke go gopola gore Jesu o ile a mo rapelela gore tumelo ya gagwe e se ke ya fela. Jehofa o ile a araba thapelo yeo ya Jesu yeo e tšwago pelong. Ka moragonyana, Jesu o ile a iponagatša go Petro gore a mo kgothatše. (Luka 22:32; 24:33, 34; 1 Bakor. 15:5) Jesu o ile a iponagatša le go baapostola ba gagwe ka moka ka morago ga gore ba fetše bošego ka moka ba leka go rea dihlapi eupša ba se ba rea selo. Ka nako yeo Jesu o ile a nea Petro sebaka sa gore a mmontšhe gore o a mo rata. Jesu o be a lebaletše mogwera yo wa gagwe e bile o ile a mo nea modiro o mongwe. (Joh. 21:15-17) Tsela yeo Jesu a ilego a swara Petro ka yona e re bontšha gore o na le kgaugelo go swana le Tatagwe. Ka gona, ge re dira diphošo re se ke ra nagana gore Jehofa a ka se tsoge a re lebaletše. Re swanetše go dula re gopola gore ke Sathane a nyakago re nagana gore Jehofa a ka se tsoge a re lebaletše. Le gona re swanetše go dula re nagana kamoo Jehofa a re ratago ka gona le gore o tseba mafokodi a rena e bile o ikemišeditše go dula a re lebalela. E bile re swanetše go mo ekiša ge ba bangwe ba re kweša bohloko.—Ps. 103:13, 14. w20.12 20-21 ¶17-19

Re ka ithuta se sengwe mehlaleng ya bao ba ilego ba tshwenyega kudu gomme ba se tshepe Jehofa. Go ithuta ka mehlala yeo e mebe go tla re thuša gore re se ke ra bušeletša diphošo tšeo ba di dirilego. Ka mohlala, ge Kgoši Asa a be a thoma go buša o ile a ithekga ka Jehofa gore a mo thuše ge a be a na le mathata. Eupša ka morago o ile a se sa kgopela thušo go Jehofa, a kgetha go itharollela mathata. (2 Dikor. 16:1-3, 12) Ge re sa tsebe ditaba ka botlalo, re ka nagana gore Asa o dirile gabotse ka go kgopela thušo go Baasiria. Eupša go be go se bjalo. Jehofa o ile a diriša moporofeta yo mongwe go botša Asa gore: “Ka baka la ge o ithekgile ka kgoši ya Siria wa se ithekge ka Jehofa Modimo wa gago, ka lona lebaka leo madira a kgoši ya Siria a phonyokgile ka seatleng sa gago.” (2 Dikor. 16:7) Re swanetše go itlhokomela gore re se ke ra nagana gore re ka kgona go rarolla mathata a rena re sa nyake tlhahlo ya Jehofa ka go bala Lentšu la Gagwe. Ge re tshepa Jehofa, o tla re thuša gore re dire phetho e botse le ge re swanelwa ke go dira phetho e itšego kapejana. w21.01 6 ¶13-15

Gona bjale ba bangwe ba batho ba Modimo ba bolawa ke tlala ka baka la ge ba se na tšhelete ya go reka dijo goba ka baka la mathata ao a bakilwego ke ntwa. Ba bangwe ba golegilwe ka baka la tumelo ya bona. Eupša ba lešaba le legolo ba thabišwa ke go tseba gore ka morago ga gore ba phologe ge lefase le la Sathane le tla be le fedišwa, ba tla dula ba na le dijo tše dintši e bile Jehofa o tla ba hlahla. Ge Jehofa a tla be a fediša lefase le la Sathane, o tla kgonthišetša gore lešaba le legolo le šireletšwa kgalefong ya gagwe yeo e swanago le ‘phišo e babolago.’ Ka morago ga masetlapelo a magolo, Jesu o tla iša bao ba phologilego “didibeng tša meetse a bophelo” bjo bo sa felego. (Kut. 7:17) Nagana ka se: Lešaba le legolo le tlo diragalelwa ke selo seo se sa kago sa diragalela batho ba bangwe. Gare ga batho ka moka ba bantšintši bao ba kilego ba phela, ke bona feela bao go ka diregago gore ba ka se tsoge ba hwa! (Joh. 11:26) Ba dinku tše dingwe ba leboga Jehofa le Jesu ka kholofelo e kgahlišago yeo ba nago le yona! w21.01 16-17 ¶11-12

Bošegong bja pele ga ge a ka bolawa, Jesu o be a nagana ka mathata ao a bego a tla wela barutiwa ba gagwe. Ka baka la ge Jesu a be a rata barutiwa ba gagwe, o ile a kgopela Tatagwe gore a “ba šireletše ka baka la yo kgopo.” (Joh. 17:14, 15) Jesu o be a tseba gore ka morago ga gore a boele legodimong, Sathane o be a tlo tšwela pele a elwa le motho yo mongwe le yo mongwe yo a nyakago go hlankela Jehofa. Ke ka baka leo re hlokago gore Jehofa a re šireletše. Lehono re hloka tšhireletšo ya Jehofa go feta le ge e le neng pele. Ka baka la’ng? Ka gobane Sathane o rakilwe legodimong “a galefile kudu.” (Kut. 12:12) O dirile gore batho ba bangwe ba nagane gore ge ba re tlaiša ba direla “Modimo tirelo e kgethwa.” (Joh. 16:2) Ba bangwe bao ba sa dumelego go Modimo ba re tlaiša ka gobane re sa dire dilo tšeo ba di dirago. Go sa šetšwe gore ke ka baka la eng batho ba re tlaiša, ga re tšhoge. Ke ka baka la’ng re sa tšhoge? Temana ya letšatši ya lehono e re file karabo. w21.03 26 ¶1, 3

Dilo ka moka tšeo Jehofa a di dirago, o di dira ka baka la lerato. Jehofa o bontšhitše gore o a re rata ka go re hlokomela. Ka ge Jehofa a re rata, o re neile sehlabelo sa Jesu sa topollo. Jesu le yena o bontšhitše gore o a re rata ka go re hwela. (Joh. 3:16; 15:13) Ga go na selo le ge e le sefe seo se ka dirago gore Jehofa le Jesu ba se sa rata batho bao ba botegago. (Joh. 13:1; Baroma 8:35) Ka mo go swanago, dilo ka moka tšeo monna yo e lego hlogo ya lapa a di dirago o swanetše go di dira ka lerato. Ke ka baka la’ng seo se le bohlokwa? Moapostola Johane o araba ka gore: “Yo a sa ratego ngwanabo yo a mmonago [goba lapa la gagwe leo a le bonago], a ka se rate Modimo yo a sa kago a mmona.” (1 Joh. 4:11, 20) Monna yo a ratago lapa la gagwe o ekiša Jehofa le Jesu ka go thuša ba lapa la gagwe gore ba dule ba na le segwera se sebotse le Jehofa, gore ba ikwe ba le bohlokwa e bile o a ba hlokomela. (1 Tim. 5:8) O tlo ruta bana ba gagwe a ba a ba kgala ge ba dira diphošo. Le gona o tlo dira diphetho tšeo di bontšhago gore o hlompha Jehofa le go rata lapa la gagwe. w21.02 5 ¶12-13

Tatago rena yo a re ratago o a tseba gore dilo tše mpe tšeo di re diragaletšego nakong e fetilego di ka dira gore re ikwe re nyamile. Ba ile ba ithuta le gore Jehofa o kgona go bona dika tše dibotse tšeo re nago le tšona le ge rena re sa nagane gore re na le tšona. (1 Joh. 3:19, 20) Motho yo mongwe a ka ba a leka ka thata go tlogela selo se itšego se se fošagetšego. Eupša a ka bušeletša phošo yeo gape gomme seo sa dira gore a ikwe a nyamile. Nnete ke gore gantši re a nyama ge re dirile sebe. (2 Bakor. 7:10) Eupša motho ga se a swanela go nyamišwa ka mo go feteletšego ke diphošo tša gagwe moo a feleletšago a nagana gore: ‘Ga ke na mohola. Jehofa a ka se tsoge a ntebaletše.’ Seo ga se therešo e bile se ka dira gore re tlogele go hlankela Jehofa. Ka gona re swanetše go ‘lokiša ditaba le Jehofa,’ re mo rapele gomme re kgopele gore a re lebalele. (Jes. 1:18) Ge Jehofa a bona gore o tloga o itshola go tšwa pelong, o tlo go lebalela. Go oketša moo, eya go bagolo. Ba tla go thuša ba sa go felele pelo gore o lokiše segwera sa gago le Jehofa.—Jak. 5:14, 15. w20.12 23 ¶5-6

Jesu o be a hlompha basadi. O be a sa swane le Bafarisei bao ba bego ba nyatša basadi. Bafarisei ba be ba sa bolele le mosadi pele ga batho e bile ba be ba ka se tsoge ba boletše le mosadi ka mangwalo a makgethwa. Eupša Jesu o ile a ruta banna le basadi. (Luka 10:38, 39, 42) Le gona o ile a dumelela basadi ba bangwe gore ba sepele le yena ge a be a eya go ruta batho ka Modimo. (Luka 8:1-3) Jesu o ile a ba a fa basadi ba bangwe tokelo ya gore ba ye ba botše baapostola ba gagwe gore o tsošitšwe bahung. (Joh. 20:16-18) Moapostola Paulo o ile a gopotša Timotheo ka go lebanya gore a hlomphe basadi. Paulo o be a sa lebale gore mmago Timotheo le makgolo wa gagwe ke bona ba mo rutilego “mangwalo a makgethwa” pele. (2 Tim. 1:5; 3:14, 15) Ge Paulo a be a ngwalela Baroma lengwalo, o ile a dumediša dikgaetšedi tše dingwe ka maina. Paulo o be a lemoga seo dikgaetšedi tšeo di se dirilego e bile o ile a leboga mošomo o mobotse woo di o dirilego.—Baroma 16:1-4, 6, 12; Bafil. 4:3. w21.02 15 ¶5-6