May

Ka ge Jehofa a re rata, o dirile gore go ngwalwe Diebangedi tše nne go re thuša go tseba Morwa wa gagwe gabotse. Diebangedi tše di re botša ka bophelo bja Jesu le modiro wo a bego a o dira ge a be a le mo lefaseng wa go ruta batho. Di re botša ka dilo tšeo Jesu a bego a di bolela, a di dira le kamoo a bego a ikwa ka gona. Diebangedi tše di re thuša go ‘naganišiša’ gabotse ka mohlala wa Jesu. Di na le mehlala ya dikgato tša Jesu tšeo a re tlogeletšego tšona. Ge re ithuta Diebangedi tše tše nne, re tlo kgona go tseba Jesu gabotse. Seo se tla re thuša gore re kgone go latela dikgato tša gagwe kgauswi. E le gore re holege ge re ithuta Diebangedi tše, ga se ra swanela go no kga ka godimo ge re di bala. Re swanetše go ipha nako ya gore re di bale le go naganišiša ka mo go tseneletšego ka seo re se balago. (Bapetša le Joshua 1:8) Dira gore dipego tšeo o di balago ka Diebangeding di phele. Nagana gore go be go le bjang ge seo o se balago se be se direga. Gore o kgone go dira seo, dira nyakišišo ka dikgatišong tšeo mokgatlo o re neago tšona. w21.04 4-5 ¶11-13

Mengwaga e mentši pele ga ge Jesu a ka tla mo lefaseng, Jehofa o ile a bolela gore Mesia o be a tlo ekwa ka ditsekana tše 30 tša tšhelete ya silifera. (Sak. 11:12, 13) Jesu o be a tlo ekwa ke yo mongwe wa bagwera ba gagwe ba bagolo. (Ps. 41:9) Moporofeta Sakaria o ngwadile gape gore: “Hlaba modiši gore mohlape o gašane.” (Sak. 13:7) Batho bao ba ratago Jehofa ba be ba ka se gane go latela Jesu ge ba bona dilo tšeo di direga, ge e le gabotse tumelo ya bona e be e tlo tia ge ba bona boporofeta bjo bo boletšwego ka Jesu bo phethagala. Na go na le bothata bjo bo swanago lehono? Ee. Mehleng ya rena, bahlanka ba Jehofa ba sego kae bao ba tsebegago kudu ba ile ba tlogela go hlankela Jehofa gomme ya ba bahlanogi, ke moka ba leka go ntšha ba bangwe ka phuthegong. Ba ile ba bolela dilo tšeo di sa kgahlišego ka Dihlatse tša Jehofa, nnete e sa felelago, le go di latofatša ka maaka dikuranteng, radiong, thelebišeneng le Inthaneteng. Eupša bao ba tlogago ba nyaka go hlankela Jehofa ba ka se tlogele go latela Jesu. Go e na le moo, ba a tseba gore Beibele e boletše e sa le pele gore dilo tša mohuta wo di be di tla direga.—Mat. 24:24; 2 Pet. 2:18-22. w21.05 11 ¶12; 12-13 ¶18-19

Beibele e bolela ka mo go kwagalago gore ge nako e dutše e eya, batho ba Modimo ba be ba tlo ba le tsebo e nepagetšego. (Bakol. 1:9, 10) Jehofa o re utollela therešo ganyenyane-ganyenyane. Re swanetše go ikemišetša go se fele pelo go fihla re kwešiša therešo gakaone. Ge bana babo rena bao ba re etelelago pele ba lemoga gore go na le selo seo se swanetšego go kaonefatšwa, ba dira diphetogo kapelapela. Baetapele ba dikereke ba fetoša tsela yeo ba rutago ka yona ka gobane ba nyaka go thabiša batho bao ba tlago dikerekeng tša bona le go nyaka go tuma. Eupša mokgatlo wa Jehofa o fetoša tsela yeo re kwešišago dilo ka yona ka gobane o nyaka go re thuša gore re be le segwera se sebotse le Modimo le gore re mo hlankele go swana le Jesu. (Jak. 4:4) Ge Dihlatse tša Jehofa di dira diphetogo, ga di dire seo ka gobane tsela yeo batho ba naganago ka yona mo lefaseng e fetogile, eupša di dira seo ka gobane di kwešiša Beibele gakaone. Di rata therešo kudu!—1 Bathes. 2:3, 4. w21.10 22 ¶12

O ka dira’ng ge e ba o ikwa o le noši? Dula o nagana ka dilo tšeo Jehofa a go thušago ka tšona. (Ps. 55:22) Go dira bjalo go tla go thuša go bona gore ga o noši. Nagana le kamoo Jehofa a thušago bana babo rena le dikgaetšedi bao ba ikwago ba lewa ke bodutu. (1 Pet. 5:9, 10) Ngwanabo rena Hiroshi yo a bilego Hlatse a nnoši ka gabo ka mengwaga e mentši o re: “Ge re dira sohle seo re ka se kgonago go hlankela Jehofa, seo se ka kgothatša bao e lego Bakriste ba nnoši ka gabo bona.” Le gona eba le lenaneo le lebotse la go ithuta ka Jehofa gomme o le latele. Se se akaretša go botša Jehofa kamoo o ikwago ka gona. Go bala Beibele ka mehla le go naganišiša ka dipego tšeo di bontšhago gore Jehofa o a go rata, go bohlokwa kudu. Bakriste ba bangwe ba swara ka hlogo ditemana tšeo di kgothatšago kudu, go swana le Psalme 27:10 le Jesaya 41:10. Ba bangwe ba bone gore go theetša mmalo wa Beibele le dikgatišo tše di rekhotilwego ge ba lokišeletša diboka, go ba thuša gore ba se ke ba ikwa ba le noši. w21.06 9-10 ¶5-8

Na o hlokofaletšwe? Tiiša tumelo ya gago ya gore nakong e tlago go tlo ba le tsogo ka go bala ka diphihlelo tša ka Beibeleng tša batho bao ba ilego ba tsošwa bahung. Na o nyamišitšwe ke gore yo mongwe wa ka lapeng la geno o kgaotšwe? Bala e le gore o kgodišege gore tayo e bontšha gore Modimo o a re rata. Go sa šetšwe gore o na le mathata afe, diriša nako yeo go tiiša tumelo ya gago go Modimo. Botša Jehofa ka seo se go tshwenyago. O se ke wa phela o nnoši eupša dula o na le bana beno le dikgaetšedi. (Die. 18:1) Dira mešomo yeo e tlago go go thuša gore o kgotlelele le ge ka dinako tše dingwe o ka lla ge o gopola ka seo se go diragaletšego. (Ps. 126:5, 6) Dula o eya dibokeng le tšhemong e bile o bale Beibele ka mehla. E bile o dule o gopola ka dilo tše dibotse tšeo Modimo a tshepišago go tlo re direla tšona nakong e tlago. Ge o bona gore Jehofa o a go thuša, tumelo ya gago go yena e tlo tia le go feta. w21.11 23 ¶11; 24 ¶17

Ke ka tsela efe yeo balatedi ba Jesu ba swanago le “ba banyenyane”? Batho ba lefase ba lebelela bahumi, batho ba go tuma le ba maemo a godimo mmušong e le bona ba lego bohlokwa. Eupša balatedi ba Jesu ba lebelelwa ba se bohlokwa e bile ba nyatšega. (1 Bakor. 1:26-29) Jehofa yena ga a ba lebelele ka tsela yeo. Ke’ng seo se ilego sa dira gore Jesu a bolele ka “ba banyenyane ba”? Barutiwa ba gagwe ba be ba ile ba mmotšiša gore: “Gabotsebotse ke mang yo mogolo kudu Mmušong wa magodimo?” (Mat. 18:1) Bajuda ba bantši ba mehleng yeo ba be ba nyaka gore batho ba ba lebelele ba le bohlokwa kudu. Seithuti se sengwe se re: “Batho ba bangwe ba be ba nagana gore go hlomphiwa le go tuma go bohlokwa kudu bophelong.” Jesu o be a tseba gore Bajuda ba bantši ba be ba nagana gore go bohlokwa gore ba be kaone go feta batho ba bangwe. Ka baka leo, barutiwa ba gagwe ba be ba swanetše go šoma ka thata gore ba se ke ba nagana ka tsela yeo. w21.06 20 ¶2; 21 ¶6, 8; 22 ¶9

Moapostola Paulo o beile mohlala o mobotse bjalo ka mogolo. Ka mohlala ge bana babo ba Thesalonika ba be ba hloka keletšo o ile a ba eletša. Eupša ge a be a ba ngwalela mangwalo, o ile a thoma pele ka go ba reta ka mošomo o mobotse wo ba o dirago, lerato leo ba le bontšhago, le kgotlelelo ya bona. O ile a nagana le ka maemo a bona a ba botša gore o a tseba gore bophelo bja bona ga bo bonolo le gore ba kgotleletše le ge ba tlaišwa. (1 Bathes. 1:3; 2 Bathes. 1:4) O ile a ba botša le gore ba bea mohlala o mobotse go Bakriste ba bangwe. (1 Bathes. 1:8, 9) Ba ile ba thaba kudu ge ba bona Paulo a ba reta! Re a bona gore Paulo o be a rata bana babo kudu. Ka gona o ile a kgona go nea Bathesalonika keletšo mangwalong a mabedi ao a ilego a ba ngwalela ona.—1 Bathes. 4:1, 3-5, 11; 2 Bathes. 3:11, 12.w22.02 15 ¶6

Sathane o diriša baruti go bolela gore Jehofa o sehlogo e bile ke yena a dirago gore batho ba welwe ke mathata. Ba bangwe ba re ge bana ba hlokofala, Modimo o ba tšere gore e yo ba barongwa legodimong. Ruri ao ke maaka a matala! Rena re tseba nnete. Re a tseba gore ge re swerwe ke bolwetši bjo šoro goba re hlokofaletšwe ke batho ba gabo rena, re ka se bee Modimo molato. Go e na le moo, re a tseba gore ka letšatši le lengwe Modimo o tla fodiša malwetši le go tsoša bahu. Ka gona re swanetše go botša batho ba bangwe gore Jehofa Modimo o a re rata. Seo se tla dira gore Jehofa a fetole yoo a mo kwerago. (Die. 27:11) Jehofa ke Modimo yo a nago le kwelobohloko. Ga a nyake go re kwa re lla ka baka la mathata ao a re welago, e ka ba e le go tlaišwa, bolwetši goba mafokodi a rena. (Ps. 22:23, 24.) Ge re ekwa bohloko Jehofa le yena o kwa bohloko, ka baka leo o nyaka go fediša dilo ka moka tšeo di re kwešago bohloko e bile o tlo dira seo.—Bapiša le Ekisodo 3:7, 8; Jesaya 63:9. w21.07 9-10 ¶9-10

Kgauswinyane batho bao ba kwago Jehofa ba tla ba le tokelo e kgolokgolo ya go mo rata le go mo hlankela go ya go ile. Jesu o tlo rarolla mathata ka moka ao a bakilwego ke phetho ya Adama le Efa ge ba be ba kgetha go se sa ba karolo ya lapa la Modimo. Jehofa o tlo tsoša batho ba bantšintši bahung, le go ba nea sebaka sa go tlo phela gabotse lefaseng leo le tla bego le fetogile paradeise. (Luka 23:42, 43) Ge mafelelong batho bao e lego karolo ya lapa la Jehofa ba phethagetše, yo mongwe le yo mongwe wa bona o tla bonagatša “letago le botse” tšeo Dafida a ilego a ngwala ka tšona. Ge e ba o le karolo ya “lešaba le legolo,” o na le kholofelo e kgahlišago kudu. (Kut. 7:9) Modimo o a go rata e bile o nyaka gore o be karolo ya lapa la gagwe. Ka gona dira sohle seo o ka se kgonago go mo thabiša. Letšatši le lengwe le le lengwe, dula o gopola ka kholofetšo yeo Modimo a go neilego yona. Bontšha Tatago wa legodimong gore o leboga tokelo yeo a go neilego yona ya go mo hlankela le kholofelo yeo o nago le yona ya go tlo mo tumiša go ya go ile! w21.08 7 ¶18-19

Moporofeta Jeremia o ile a botša batho ditaba tše dibotse ka mengwaga e mentši eupša ba sa mo theetše e bile ba mo ganetša. O ile a nyama ge batho bao ba bego ba mo ganetša ba be ba mo ‘goboša e bile ba mo kwera’ moo a ilego a ikwa eka a ka tlogela kabelo ya gagwe. (Jer. 20:8, 9) Eupša Jeremia ga se a ka a fela matla! Ke’ng seo se ilego sa mo thuša gore a tšwele pele a botša batho ditaba tše dibotse le go dula a thabile? O ile a nagana ka dilo tše pedi tše bohlokwa. Sa pele, molaetša woo Modimo a bego a kgopetše Jeremia gore a o botše batho, o be o tlo ba thuša gore ba be le “bokamoso le kholofelo.” (Jer. 29:11) Sa bobedi, Jehofa o be a kgethile Jeremia gore a botše batho molaetša wa gagwe. (Jer. 15:16) Le rena re botša batho molaetša woo o tlago go ba thuša gore ba be le kholofelo, e bile re hlatsela seo Jehofa a se boletšego ka gobane re bitšwa ka leina la gagwe. Ge re dula re nagana ka dilo tše tše bohlokwa, re tlo thabela go botša batho ditaba tše dibotse go sa šetšwe gore ba a re theetša goba ga ba re theetše. Ka gona o se ke wa nyama goba wa fela matla ge batho bao o ithutago le bona Beibele ba sa dire tšwelopele kapela. Ga se ra swanela go fela pelo ge re ruta batho Beibele.—Jak. 5:7, 8. w21.10 27 ¶12-13

Re swanetše go dula re tiiša tumelo ya rena go Jehofa go sa šetšwe gore re thomile go mo hlankela neng. Ka baka la’ng? Ka gobane ge e ba re sa hlokomele, tumelo ya rena e ka fokola. Gopola gore tumelo e akaretša go dumela go dilo tša kgonthe tšeo re sa kgonego go di bona. Dilo tšeo re sa kgonego go di bona go ka ba bonolo gore re di lebale. Ka baka leo, Paulo o itše go se be le tumelo ke “sebe seo se re tatetšago gabonolo.” Re ka dira eng gore tumelo ya rena e dule e tiile? (2 Bathes. 1:3) Sa pele, dula o kgopela Jehofa gore a go fe moya o mokgethwa. Ka baka la’ng? Ka gobane moya o mokgethwa o re thuša gore re be le tumelo. (Bagal. 5:22, 23) Ga go kgonege gore re dule re na le tumelo go Mmopi wa rena ge e ba re sa kgopele moya wa gagwe o mokgethwa gore o re thuše. Ge e ba re dula re kgopela Jehofa moya wa gagwe o mokgethwa o tlo re nea wona. (Luka 11:13) Le gona ge re rapela re ka kgopela Jehofa gore: “Re nee tumelo e oketšegilego.” (Luka 17:5) Go oketša moo, dula o ithuta Lentšu la Modimo ka mehla.—Ps. 1:2, 3. w21.08 18-19 ¶16-18

Batšofadi ba bohlokwa ka ditsela tše dintši ka mokgatlong wa Jehofa. Le ge ba ka ba ba se sa na matla ao ba bego ba na le ona, ba na le phihlelo e ntši yeo ba e hweditšego ge ba be ba hlankela Jehofa ka mengwaga e mentši. Jehofa a ka tšwela pele a ba diriša ka ditsela tše dintši. Ka mohlala Beibele e re botša ka mehlala e mebotse ya batšofadi ba botegago, bao ba ilego ba hlankela Jehofa ka mafolofolo gaešita le ge ba be ba tšofetše. Ka mohlala, ge Moshe a be a thoma go ba moporofeta wa Jehofa le moetapele wa setšhaba sa Isiraele, o be a na le mengwaga e ka bago e 80. Ge Daniele a be a na le mengwaga e fetago e 90, Jehofa o ile a no tšwela pele a mo diriša gore e be moporofeta wa gagwe. Le gona, go ka direga gore moapostola Johane o be a na le mengwaga e fetago e 90, ge Jehofa a be a mo diriša gore a ngwale puku ya Kutollo. Simeone yoo a bego “a lokile e bile a boifa Modimo,” go bolelwa ka yena ka makga a sego kae ka Beibeleng eupša Jehofa o be a mo tseba gabotse. E bile o ile a mo fa tokelo ya gore a bone Jesu ge e be e sa le leseana le go mo dira gore a porofete ka lesea leo le mmago lona.—Luka 2:22, 25-35. w21.09 3-4 ¶5-7

Batswadi ba swanetše go hlokomela gore ba se ke ba bapetša bana ba bona goba ba nyaka gore ba dire dilo tšeo ba sa kgonego go di dira. Ge ba ka ba bapetša, bana ba bona ba tlo nyama. (Baef. 6:4) Kgaetšedi Sachiko o re: “Mma o be a nyaka gore ke se ke ka dira phošo le e tee ge ke be ke ngwala ditlhahlobo, gomme seo se be se ka se kgonege. Le ge gona bjale e le kgale ke se sa tsena sekolo, ke fela ke ikwa eka Jehofa ga a nkamogele le ge ke leka ka thata gore ke mo kgahliše.” Kgoši Dafida o itše ga se a “inyakela dilo tše kgolo kudu” goba dilo tšeo a ka se kgonego go di fihlelela. Ka ge a be a ikokobeditše, o ile a kgotsofala le go ba le khutšo ya monagano. (Ps. 131:2) Batswadi ba ka ithuta’ng mantšung a a Dafida? E le gore batswadi ba ikokobetše, ga se ba swanela go letela go dira dilo tšeo ba ka se kgonego go di dira le go letela gore bana ba bona ba dire dilo tšeo ba ka se di kgonego. Batswadi ba ka thuša bana ba bona ka go ba bontšha dilo tšeo ba ka kgonago go di dira le tšeo ba ka se di kgonego, le go ba thuša go ipeela dipakane tšeo ba ka kgonago go di fihlelela. w21.07 21-22 ¶5-6

Jehofa o file yo mongwe le yo mongwe tokologo ya go itirela diphetho. Se se ra gore re swanetše go kgetha ge e ba re tla mo hlankela goba go se mo hlankele. Bafsa ba bangwe ga se ba godišwa ke batswadi bao ba ba rutilego go hlankela Jehofa, eupša ba ile ba kgona go mo hlankela le go dula ba mmotegela. Ba bangwe bao batswadi ba bona ba ilego ba kgona go šoma ka thata go ba ruta go hlankela Jehofa, ka morago ba ile ba tlogela go mo hlankela. Mafelelong yo mongwe le yo mongwe wa rena ke yena a swanetšego go ikgethela ge e ba a nyaka go hlankela Jehofa. (Josh. 24:15) Ka gona lena batswadi bao le kwelego bohloko ka ge bana ba lena ba tlogetše go hlankela Jehofa, le se ke la ipea molato! Ka dinako tše dingwe motswadi o tlogela go hlankela Jehofa a ba a tlogela le lapa la gagwe. (Ps. 27:10) Se se ka kweša bana bohloko ka ge ba lebelela motswadi e le mohlala woo ba swanetšego go o ekiša. Lena bafsa, ge e ba yo mongwe wa batswadi ba lena a kgaotšwe ka phuthegong re le kwela bohloko kudu! Kgodišegang gore Jehofa le yena o a tseba gore seo se le kweša bohloko. Tsebang gore o a le rata e bile o a thaba ge a bona gore le tšwela pele le mo hlankela ka go botega. Gopolang gore ga se la swanela go ipea molato ka phetho yeo e dirilwego ke batswadi ba lena. w21.09 27 ¶5-7

Ge Mokriste a kgaotšwe, re ka mo swantšha le nku yeo e babjago yeo e ka fetetšago tše dingwe. Ka ge segwera sa gagwe le Jehofa se senyegile o swana le motho yoo a babjago. (Jak. 5:14) Go no swana le ge motho yo a babjago a ka fetetša ba bangwe bolwetši bja gagwe, le motho yo segwera sa gagwe le Jehofa se senyegilego a ka dira gore batho ba bangwe ba dire dilo tše mpe. Ka gona, ka dinako tše dingwe go bohlokwa gore motho yo a dirilego sebe ka phuthegong a kgaolwe. Kgalemelo ye e bontšha gore Jehofa o rata bahlanka ba gagwe bao ba botegago e bile e ka dira gore motho yo a dirilego sebe a fetoge gomme a itshole. Eupša le ge motho yoo a kgaotšwe, a ka kgona go ba gona dibokeng moo a tlago go tiiša tumelo ya gagwe gape. A ka kgona le go hwetša dikgatišo tšeo a tlago go ipalela tšona le go bogela Kgašo ya JW. Ge bagolo ba bona tšwelopele yeo a e dirago, ba tlo mo etela gore ba mo thuše go lokiša segwera sa gagwe le Jehofa gape e le gore a tle a boele a be yo mongwe wa Dihlatse tša Jehofa. w21.10 10 ¶9, 11

Lehono re bontšha gore re latela tsela yeo Bakriste ba pele ba bego ba dira dilo ka yona. Ka mohlala, mokgatlo wa rena o rulagantše dilo go swana le Bakriste ba pele. Re na le balebeledi ba basepedi, bagolo le bahlanka ba bodiredi go swana le bona. (Bafil. 1:1; Tito 1:5) Re hlompha melao ya Jehofa ya mabapi le thobalano le lenyalo, tsela yeo re lebelelago madi ka yona e bile re šireletša phuthego go batho bao ba sa nyakego go kwa melao ya Modimo. (Dit. 15:28, 29; 1 Bakor. 5:11-13; 6:9, 10; Baheb. 13:4) Beibele e boletše ka mo go kwagalago gore ke batho bao ba nago le “tumelo e tee” feela bao Modimo a ba amogelago. (Baef. 4:4-6) Ruri ke tokelo e kgolo go ba bahlanka ba Jehofa, go tseba nnete ka yena le ka merero ya gagwe! Eka ka moka ga rena re ka tšwela pele re kgodišegile gore re hweditše nnete. w21.10 22-23 ¶15-17

Kgoši Jehoshafate o ile a kopana le bothata bjo bogolo. Madira a mantši a Baamoni, Bamoaba le banna ba dithabeng tša Seire, ba ile ba tšhošetša Jehoshafate, lapa la gagwe le batho ba gagwe. (2 Dikor. 20:1, 2) Jehoshafate o ile a dira’ng? O ile a kgopela Jehofa gore a mo thuše le go mo fa matla. Thapelo ya Jehoshafate ya boikokobetšo yeo e lego go Dikoronika tša Bobedi 20:5-12, e bontšha gore o be a tshepa Jehofa kudu. Jehofa o ile a araba thapelo ya Jehoshafate ka go roma Jahasiele wa Molefi gore a bolele le yena. O ile a mmotša mantšu ao a tšwelelago mo temaneng ya rena ya lehono. Ka ge Jehoshafate a be a tshepa Modimo kudu, o ile a dira seo a bego a mmoditše sona. Ge Jehoshafate le batho ba gagwe ba ile go kopana le manaba a bona, ka pele ga madira a gagwe o be a beile diopedi tšeo di bego di se tša swara ditšhoša e bile di sa tsebe ntwa gabotse. Jehofa o ile a lwela Jehoshafate gomme a fenya manaba a gagwe.—2 Dikor. 20:18-23. w21.11 15-16 ¶6-7

Re ka kgodišega gore Jehofa o tla dula a re thekga gore re be le segwera se sebotse le yena. (2 Bakor. 4:7-9) Re ka kgodišega gore Jehofa o tlo dula a re bontšha botho bja gagwe bjo bogolo ka gobane mopsalme o ngwadile gore: “Leihlo la Jehofa le lebeletše bao ba mmoifago, le go bao ba letetšego botho bja gagwe.” (Ps. 33:18-22) Pele re hlankela Jehofa, o be a re rata go swana le motho yo mongwe le yo mongwe. Eupša ka ge gona bjale re le bahlanka ba gagwe, ga a no re rata feela, o re bontšha botho bja gagwe bjo bogolo. Ka ge Jehofa a re rata o a re šireletša. Le gona o nyaka gore re dule re na le segwera se sebotse le yena e bile o tlo re direla dilo tše dibotse tšeo a re tshepišitšego tšona. O nyaka gore re dule re le bagwera ba gagwe. (Ps. 46:1, 2, 7) Ka gona ge re na le mathata, Jehofa o tlo re matlafatša gore re dule re na le segwera se sebotse le yena. w21.11 7 ¶17-18

Bontši bja rena re tseba batho bao ba ilego ba bolokela batho ba bangwe sekgopi ka nako e telele, e ka ba bao re tsenago le bona sekolo, bao re šomago le bona goba ba leloko. Gopola ka mohlala wa bana ba bo Josefa bao ba ilego ba mmolokela sekgopi moo ba feleleditšego ba dirile selo se sebe. (Gen. 37:2-8, 25-28) Eupša Josefa ga se a ka a ba bolokela sekgopi. Ge a be a na le maemo a phagamego Egipita e bile a na le sebaka sa gore a itefeletše, o ile a no ba bontšha botho. Josefa ga se a ka a ba bolokela sekgopi, eupša o ile a dira seo se bolelwago ke lengwalo la Lefitiko 19:18. (Gen. 50:19-21) Seo Josefa a ilego a se dira se sepedišana le mantšu ao a lego thapelong ya mohlala. Jesu o re kgothaletša gore re lebalele bao ba re senyetšago. (Mat. 6:9, 12) Le gona Paulo o ile a kgothaletša Bakristegotee le yena ka gore: “Baratiwa, le se ke la itefeletša.”—Baroma 12:19. w21.12 11 ¶13-14

Bošegong bja Nisani 14, 33 C.E., Jesu o ile a ya serapeng sa Getsemane. Ge a fihla moo, o ile a rapela Jehofa go tšwa pelong. (Luka 22:39-44.) Ka nako yeo, o ile a “kgopela Jehofa ka megoo e matla. . . le megokgo.” (Heb. 5:7) Jesu o ile a rapelela eng bošegong bja pele a ka bolawa? O ile a kgopela Jehofa gore a mo nee matla le go mo thuša gore a botege. Jehofa o ile a kwa thapelo yeo ya Morwa wa gagwe gomme a romela morongwa gore a mo matlafatše. Jesu o be a tseba gore go bohlokwa kudu gore a botege le go kgethagatša leina la Tatagwe. Jehofa o ile a theetša Jesu ge a be a mo rapela go tšwa pelong. Ka baka la’ng? Ka gobane Jesu o be a nyaka go dula a botegela Tatagwe le go kgethagatša Leina la gagwe. Ge e ba re tshwenyegile ka go dira se se swanago, Jehofa o tlo araba dithapelo tša rena ge re mo kgopela gore a re thuše.—Ps. 145:18, 19. w22.01 18 ¶15-17

Batho ba bantši lehono ba gana go amogela molaetša wa rena ka ge re sa tsenatsene ditabeng tša dipolotiki. Ba nyaka gore re boute ge go na le dikgetho. Eupša re a tseba gore ge re ka kgetha motho gore a re buše, re tla be re gana go bušwa ke Jehofa. (1 Sam. 8:4-7) Le gona batho ba ka ba ba nagana gore re swanetše go aga dikolo, dipetlele le go dira mediro e mengwe ya go thuša setšhaba. Ga ba nyake go theetša molaetša wa rena ka gobane re šoma ka thata go ba botša ditaba tše dibotse go e na le go leka go rarolla mathata ao a lego gona mo lefaseng. Re ka dira’ng gore re se ke ra šitišwa go latela Jesu? (Mat. 7:21-23) Selo sa bohlokwa kudu go rena ke go dira modiro woo Jesu a re laetšego gore re o dire. Ga se ra swanelwa go šitišwa ke go leka go rarolla mathata a lefase le. Re rata baagišani ba rena e bile re tshwenyegile ka mathata a bona, eupša re a tseba gore tsela e kaonekaone ya go ba thuša ke ka go ba ruta ka Mmušo wa Modimo le go ba thuša go ba le segwera se sebotse le Jehofa. w21.05 7 ¶19-20

Le ge lehono baetapele ba bantši bao ba bušago ditšhaba ba re ba hlankela Modimo, eupša ga ba nyake go tlogela go buša. Go no swana le ge babuši ba mehleng ya Jesu ba ile ba dira, le lehono babuši ba sa ganetša Motlotšwa wa Jehofa ka go hlasela balatedi ba gagwe ba botegago. (Dit. 4:25-28) Jehofa o arabela bjang? Re hwetša karabo go Psalme 2:10-12 yeo e rego: “Bjale lena dikgoši, dirišang temogo; phošollegang lena baahlodi ba lefase. Hlankelang Jehofa ka poifo gomme le thabe ka go thothomela. Atlang morwa, gore Modimo a se tuke bogale le se tlo hwelela tseleng, gobane bogale bja gagwe bo tuka gabonolo. Go thaba bohle bao ba tšhabelago go yena.” Ka botho Jehofa o nea batho ba bao ba ganago go kwa molaetša wa Mmušo sebaka se sengwe. Ba sa dutše ba ka fetoša dikgopolo gomme ba amogela molaetša wa Mmušo wa Modimo. Eupša ga go sa na nako. (Jes. 61:2) Gona bjale go bohlokwa kudu gore batho ba tsebe therešo gomme ba kgethe go hlankela Jehofa kapelapela. w21.09 15-16 ¶8-9

Paulo o itše re swanetše go kgotsofalela dilo tšeo re nago le tšona. (Bafil. 4:12) Se ke “sephiri” seo Paulo a bego a bolela ka sona. Selo sa bohlokwa kudu go rena ke segwera sa rena le Modimo, e sego dilo tšeo re nago le tšona. (Habak. 3:17, 18) Nagana ka seo Moshe a ilego a se botša Baisiraele ka morago ga gore ba fetše mengwaga e 40 ba le lešokeng, o itše: “Jehofa Modimo wa lena o le šegofaditše medirong ka moka ya diatla tša lena. . . . Jehofa Modimo wa lena o bile le lena nywageng ye e masomenne. Ga se la hloka selo.” (Doit. 2:7) Mengwageng yeo e 40 Jehofa o ile a fepa Baisiraele ka manna. Jehofa o ile a dira gore diaparo tšeo ba tlogilego ka tšona Egipita di se ke tša hlagala. (Doit. 8:3, 4) Jehofa o tlo thaba ge re ka ithuta go kgotsofalela dilo tšeo re nago le tšona le ge e ka ba e le tše di nyenyane, ra di lebelela e le dimpho tše di tšwago go yena ke moka ra di leboga. w22.01 5 ¶10-11

Lena banna bao le nyetšego, le ka ithuta mohlaleng wa Jehoshafate. Le na le maikarabelo a go hlokomela malapa a lena le go kgonthišetša gore a dula a šireletšegile. Ge o na le mathata o ka bona eka o ka kgona go a rarolla ka bowena. Eupša o se ke wa ithekga ka matla a gago. Go e na le moo, rapela o nnoši gomme o kgopele Jehofa gore a go thuše, o be o rapele le mosadi wa gago. Nyaka thušo ya Jehofa ka go bala Beibele le dikgatišo tšeo di theilwego Beibeleng tšeo di tšweleditšwego ke mokgatlo wa rena gomme o diriše seo o se balago. Ba bangwe ba ka no se dumelelane le diphetho tšeo o di dirago tšeo o di theilwego Beibeleng. Ba ka go botša le gore tšhelete le dilo tše dingwe tšeo o di rekago di tla šireletša lapa la gago. Eupša o ka gopola mohlala wa Kgoši Jehoshafate. (2 Dikor. 20:1-30) O ile a bontšha gore o tshepa Jehofa ka diphetho tšeo a ilego a di dira. Jehofa ga se a ka a mo tlogela ka ge a be a botega le wena a ka se go tlogele.—Ps. 37:28; Heb. 13:5. w21.11 15 ¶6; 16 ¶8

Modimo o re bopile re ena le dika tša go swana le tša gagwe, ka gona re nyaka go bona batho ba swarwa gabotse. (Gen. 1:26) Ka dinako tše dingwe re ka no se ahlole gabotse le ge re nagana gore re tseba ditaba ka moka. Ka mohlala, gopola gore Jona o be a se a thaba ge Jehofa a kgetha go bontšha batho ba Ninife kgaugelo. (Jona 3:10–4:1) Ditlamorago e bile dife? Batho bao ba fetago ba 120,000 bao ba dulago Ninife ba ile ba phološwa. Mafelelong Jona e be e le yena a swanetšego go phošollwa e sego Jehofa. Ga go hlokagale gore Jehofa a hlalosetše batho gore ke ka baka la eng a dira diphetho tše itšego. Ke nnete gore nakong e fetilego Jehofa o ile a dumelela bahlanka ba gagwe go bolela ka moo ba ikwago ka gona ka diphetho tšeo a di dirilego goba tšeo a tlago go di dira. (Gen. 18:25; Jona 4:2, 3) Ka dinako tše dingwe o be a hlalosa gore ke ka baka la eng a dirile diphetho tše itšego. (Jona 4:10, 11) Eupša Jehofa ga a hloke tumelelo ya rena pele a dira diphetho.—Jes. 40:13, 14; 55:9. w22.02 3-4 ¶5-6

Ge re lebelela ‘ba bangwe ba re feta ka bogolo’ se se bontšha gore re itebelela re le ‘ba banyenyane.’ (Bafil. 2:3) Ge re thoma go itebelela bjalo, ga se gantši re ka kgopišago ba bangwe. Bana babo rena le dikgaetšedi ka moka ba re feta ka tsela e itšego. Re ka kgona go kwešiša taba ye gabotse ge re dula re lebelela dika tša bona tše dibotse. Le gona re swanetše go diriša keletšo ya Paulo yeo a ilego a e ngwalela Bakorinthe yeo e rego: “Ke mang yo a go dirago gore o fapane le yo mongwe? Ke eng ruri seo o nago le sona seo o sa se fiwago? Bjale ge e ba ruri o se filwe, ke ka baka la’ng o ikgantšha bjalo ka ge eka ga se wa se fiwa?” (1 Bakor. 4:7) Re swanetše go hlokomela gore re se ke ra nyaka gore batho ba bangwe ba re hlomphe, goba ra nyaka go ipona re le kaone go feta batho ba bangwe. Ka baka leo, dikgaetšedi tšeo di nago le bokgoni bja go thoma dithuto tša Beibele goba bana babo rena bao ba kgonago go fa dipolelo tše dibotse, ba swanetše go iša theto go Jehofa. w21.06 22 ¶9-10

Bakriste ba bantši ba hwetša go le thata go hwetša batho ka magaeng a bona. Bagoeledi ba bangwe ba dula mafelong ao go nago le meago e mentši yeo go lego thata go tsena go yona yeo e šireleditšwego ke masekhurithi. Masekhurithi ao a ka gana ge batho ba tsena ge e ba ba se ba bitšwa ke motho yo a dulago kamoo. Bagoeledi ba bangwe ba ka tsena ka ntlo le ntlo ba sa šitišwe ke selo eupša ba hwetša batho ba sego kae ka gae goba ba bolela ditaba tše dibotse mafelong ao go dulago batho ba sego kae feela. Bagoeledi ba ka sepela nako e telele ba eya go bona motho o tee feela yoo go ka diregago gore ba ka se mo hwetše ka gae. Ge e ba re kopana le mathata a mohuta wo, ga se ra swanela go fela matla. Leka go fetofetoša nako yeo o yago ka yona tšhemong. Re ka kgona go boledišana le batho ba bantši ge e ba re eya go bona ka nako yeo ba hwetšagalago ka yona. Seo re se tsebago ke gore mafelelong batho ba swanetše gore ba boe ka gae. Bana babo rena ba bantši le dikgaetšedi ba hwetša go le bonolo go bolela ditaba tše dibotse thapama goba bošego ka gobane ke nako yeo batho ba bantši ba hwetšagalago. Go oketša moo, re ka hwetša mong wa ntlo a iketlile gomme a ka re fa nako ya gore re boledišane le yena. w21.05 15 ¶5, 7

Batho ba mehleng ya Jesu ba be ba gana go kwa seo Beibele e se bolelago. Na bothata bjo bo swanago bo gona lehono? Ee. Batho ba bantši ba galefa kudu ge Dihlatse tša Jehofa di sa nyake go ba le bona ge ba keteka meletlo yeo e sa dumelelanego le Mangwalo ya go swana le matšatši a matswalo le Keresemose. Batho ba bangwe ba galefa kudu ge Dihlatse tša Jehofa di sa be gona meletlong ya setšhaba goba di sa latele mekgwa ya go boloka bahu yeo e sa dumelelanego le Mangwalo. Batho bao ba galefišwago ke Dihlatse tša Jehofa ka baka la mabaka ao re sa tšwago go bolela ka ona, ba ka ba ba tloga ba nagana gore bona ba hlankela Modimo ka tsela yeo a e amogelago. Eupša ba ka se kgone go kgahliša Modimo ge e ba ba kgetha go latela ditšo tša batho go e na le go latela dithuto tše di kwagalago tšeo di lego ka Beibeleng. (Mar. 7:8, 9) Re ka dira’ng gore re se ke ra šitišwa go latela Jesu? Re swanetše go rata melao ya Jehofa le melao ya gagwe ya motheo ka pelo ka moka. (Ps. 119:97, 113, 163-165.) Ge re rata Jehofa, re ka se dumele go latela ditšo tšeo di sa mo kgahlišego. Le gona re ka se dumelele selo se re šitiša go dula re rata Jehofa. w21.05 6 ¶15-16

Re swanetše go dira’ng gore re latele keletšo ye ya moapostola Paulo? Re swanetše go tiiša tumelo ya rena ka go ithuta Lentšu la Modimo le go rapela ka mehla le go dula re swaregile ka modiro woo Jehofa a re laetšego gore re o dire. (2 Tim. 4:4) Ge e ba re na le tumelo, re ka se tšhoge ge re ekwa ditaba tše mpe ka Dihlatse tša Jehofa. (Jes. 28:16) Tsela yeo re ratago Jehofa, Lentšu la gagwe le bana babo rena e tlo re thuša gore re se ke ra dumelela batho bao ba tlogetšego therešo ba re šitiša go hlankela Jehofa. Mehleng ya Jesu, batho ba bantši ba ile ba gana go mo latela. Eupša go na le ba bangwe ba bantši bao ba ilego ba mo latela. Batho bao ba akaretša yo mongwe wa lekgotla la Bajuda la Sanhedrine le “lešaba le legolo la baperisita.” (Dit. 6:7; Mat. 27:57-60; Mar. 15:43) Le lehono batho ba dimilione ba latela Jesu. Ka baka la’ng? Ka gobane ba tseba ditherešo tšeo di lego ka Lentšung la Modimo e bile ba a di rata. Lentšu la Modimo le re: “Bao ba ratago molao wa gago ba atetšwe ke khutšo, ga ba na tšhitišo.”—Ps. 119:165. w21.05 13 ¶20-21

Moapostola Paulo o ile a bona gore dilo ka moka tšeo a bego a di dira go hlankela Jehofa o be a sa di dire ka matla a gagwe, eupša o be a thušwa ke Modimo. Jehofa o ile a nea Paulo moya wa gagwe o mokgethwa gore a kgone go dira sohle seo a ka se kgonago go mo hlankela, le ge a be a tlaišwa, a le kgolegong goba a na le mathata a mangwe. Timotheo yo a bego a šoma le Paulo, le yena o be a ithekgile ka Modimo gore a mo thuše gore a kgone go mo hlankela. Ka ge Paulo e be e le moromiwa, Timotheo o be a fela a sepela le yena ge a tšea maeto a gagwe a matelele. Le gona Paulo o be a fela a roma Timotheo go etela diphuthego tše dingwe le go di kgothatša. (1 Bakor. 4:17) Ka dinako tše dingwe Timotheo a ka ba a be a ikwa a sa swanelege. Mohlomongwe ke ka baka leo Paulo a ilego a mmotša gore: “Anke go se be le motho yo a nyatšago bofsa bja gago.” (1 Tim. 4:12) Go ka direga gore ka nako yeo Timotheo o be a na le mootlwa nameng, e lego ‘bolwetši bjo bo bego bo fela bo mo tshwenya.’ (1 Tim. 5:23) Eupša Timotheo o be a tseba gore Jehofa o tla mo nea matla ao a a hlokago gore a botše ba bangwe ditaba tše dibotse le go thuša bana babo.—2 Tim. 1:7. w21.05 21 ¶6-7

Molao wa motheo wo o lego go Jakobo 1:19 o bolela le batho bao ba neago keletšo. Jakobo o ngwadile gore: “Motho yo mongwe le yo mongwe a akgofele go kwa, a diege go bolela a be a diege go galefa.” Mogolo a ka nagana gore o tseba ditaba ka moka, eupša na ke nnete? Diema 18:13 e re gopotša gore: “Ge motho a fetola taba pele a ka ekwa, o bontšha bošilo gomme o a inyatšiša.” Go kaone gore o hwetše ditaba ka botlalo go tšwa go motho yoo ka boyena. Ka gona o swanetše go theetša pele o bolela. Mogolo a ka botšiša gore: “Go direga’ng ka bophelo bja gago? Nka go thuša bjang?” Ge bagolo ba nyakišiša ditaba ka moka ba tlo kgona go thuša le go kgothatša bana babo rena le dikgaetšedi. Go nea keletšo ga se feela go bala mangwalo le go bolela seo re se naganago. Bana babo rena le dikgaetšedi, ba nyaka go bona gore re a ba kwešiša, re a ba rata le gore re nyaka go ba thuša. w22.02 17 ¶14-15