December

Jesu o ile a swantšha segwera seo a nago le sona le balatedi ba gagwe le tswalano yeo dinku di nago le yona le modiši wa tšona. (Joh. 10:14) Papišo ye e ya swanelega. Dinku di tseba modiši wa tšona e bile di kgona go dira seo a di botšago sona. Monna yo mongwe yoo a bego a etetše naga e nngwe o ile a bona se se direga. O itše: “Re be re nyaka go tšea dinku tšeo dinepe gomme ra di bitša gore di tle kgauswi le rena. Eupša ga se tša tla ka gobane di be di sa tsebe mantšu a rena. Mošemanyana yo a di dišago o ile a tla gomme ge a di bitša tša mo latela.” Seo monna yoo a ilego a se bona se re gopotša mantšu ao Jesu a ilego a a botša dinku tša gagwe goba balatedi ba gagwe. O itše: “Di tla theetša lentšu la ka.” Eupša ka ge Jesu a le legodimong re ka theetša lentšu la gagwe bjang? Re bontšha gore re theetša lentšu la gagwe ka go dira dilo tšeo a re rutilego tšona.—Mat. 7:24, 25. w21.12 16 ¶1-2

Mathomong moapostola Paulo o be a tlaiša Bakriste gomme ka morago a lemoga gore o dira phošo ke moka a ikemišetša go fetoša semelo sa gagwe. (1 Tim. 1:12-16) Jehofa o ile a thuša Paulo gore e be mogolo yo lerato, yo a kwelago ba bangwe bohloko le yo a ikokobeditšego. Paulo o be a tshepa gore Jehofa o tlo mo lebalela go e na le go dula a nagana ka mafokodi a gagwe. O be a tseba gore o dira diphošo. O ile a šoma ka thata go kaonefatša dika tša gagwe tša Bokriste le go ithekga ka Jehofa gore a mo thuše go phetha bodiredi bja gagwe. (1 Bakor. 9:27; Bafilipi 4:13) Bagolo ga ba kgethwe ka gobane ba phethagetše. Eupša Jehofa o letetše gore ba amogele diphošo tša bona le go kaonefatša dika tša bona tša Bokriste. (Baef. 4:23, 24) Mogolo o swanetše go diriša Beibele gore e mo thuše go bona moo a swanetšego go kaonefatša gona ke moka a dire diphetogo. Ge a ka dira bjalo, Jehofa o tlo mo thuša gore a thabe le gore a be mogolo yo botse.—Jak. 1:25. w22.03 29-30 ¶13-15

Re swanetše go dira’ng ge e ba re lemoga gore re ahlotše Mokristegotee le rena? Re swanetše go gopola gore go bohlokwa gore re rate bana babo rena le dikgaetšedi. (Jak. 2:8) Le gona, re ka rapela Jehofa go tšwa pelong gomme re mo kgopele gore a re thuše gore re tlogele go ahlola ba bangwe. Re ka phela ka go dumelelana le seo re se rapeletšego ka gore re fetše nako re na le motho yoo re mo ahlolago. Re ka mo kgopela gore a šome le rena tšhemo goba ra mo mema gore a tle a je le rena. Ge re dutše re tseba motho yoo gakaone, re tla leka go ekiša mohlala wa Jehofa le wa Jesu wa gore re lebelele dilo tše dibotse go yena. Ka go dira bjalo, re tla be re bontšha gore re theetša taelo ya modiši yo botse ya gore re tlogele go ahlola. Go swana le ge dinku di theetša lentšu la modiši wa tšona, le balatedi ba Jesu ba theetša lentšu la gagwe. Eka re ka tšwela pele re theetša lentšu la modiši yo botse go sa šetšwe gore re “mohlatswana” goba “dinku tše dingwe.”—Luka 12:32; Joh. 10:11, 14, 16. w21.12 19 ¶11; 21 ¶17-18

Ge Rehoboama a eba kgoši ya Isiraele, batho ba ile ba tla go yena ba mo kgopela se sengwe. Ba ile ba mo kgopela gore a fokotše mošomo wo tatagwe e lego Solomone a bego a ba file wona. Rehoboama o ile a dira selo se sebotse ka gore a ye go bolela le banna ba bagolo ba Isiraele go ba botšiša gore o swanetše go dirang. Banna ba bagolo ba ile ba botša Rehoboama gore ge a ka dira seo ba mo kgopetšego sona, batho ba tlo mo thekga. (1 Dikg. 12:3-7) Rehoboama o be a sa kgotsofatšwe ke karabo yeo a e hweditšego, ka gona o ile a ya a botšiša banna bao a godilego le bona. Ba ile ba mo eletša gampe ka gore a okeletše batho mošomo wo ba bego ba šetše ba na le ona. (1 Dikg. 12:9-11) Rehoboama a ka be a ile a rapela Jehofa a mmotšiša gore o swanetše go latela keletšo efe. Eupša o ile a kgetha go latela keletšo ya batho bao a godilego le bona. Go ile gwa ba le ditlamorago tše mpe go Rehoboama le go Baisiraele. Dikeletšo tšeo re di hwetšago di ka no se re thabiše. Eupša ge di theilwe Beibeleng re swanetše go di amogela. w22.02 9 ¶6

Ngwanabo rena yoo a ikokobeditšego le yo a nago le boipoetšo ga a nagane feela ka dilo tšeo bana babo rena ba bafsa ba šetšego ba kgona go di dira, eupša o nagana le ka matla ao ba nago le ona. A ka se ba lebelele ba phadišana le yena eupša o tla ba lebelela e le bašomi gotee le yena. Batšofadi ba lebelela bafsa e le dimpho tšeo di tšwago go Jehofa le go leboga seo ba se dirago. Ge bana babo rena bao ba tšofetšego ba felelwa ke matla, ba leboga gore ka phuthegong go na le bafsa bao ba nago le matla bao ba ikemišeditšego go dira mešomo yeo ba se sa kgonago go e dira ka phuthegong. Naomi yoo go bolelwago ka yena ka Beibeleng ke mohlala o mobotse kudu wa motšofadi yoo a ilego a amogela thušo yeo a bego a e newa ke mofsa. Mathomong Naomi o ile a kgopela ngwetši ya gagwe Ruthe yoo le yena e bego e le mohlologadi gore a boele ga gabo. Eupša Ruthe o ile a gapeletša go sepela le Naomi ge a be a boela Betlelehema. Ge ba fihla moo, Naomi o ile a dumela gore Ruthe a mo thuše. (Ruthe 1:7, 8, 18) Ka baka leo, Ruthe le Naomi ba ile ba šegofatšwa kudu! (Ruthe 1:7, 8, 18) Go ba le boikokobetšo go tla thuša batšofadi gore ba ekiše mohlala wa Naomi. w21.09 10-11 ¶9-11

Tatago rena wa legodimong o kwešiša maemo a yo mongwe le yo mongwe wa rena. Mohlomongwe o ka kgona go dira dilo tše dintši go feta ba bangwe. Goba mohlomongwe o ka palelwa ke go dira go swana le ba bangwe ka ge o tšofetše, o sa phele gabotse goba o na le maikarabelo a lapa. O se ke wa fela matla. (Bagal. 6:4) Jehofa a ka se lebale seo o mo direlago sona. Jehofa o tlo thaba ge o mo hlankela ka matla a gago ka moka. Jehofa o kgona go bona le dilo tšeo o nyakago go mo direla tšona. O nyaka gore o thabe le go kgotsofalela seo o kgonago go mo direla sona. Gona bjale re na le khutšo ya monagano ka gobane re a tseba gore Jehofa o a re thuša ge re ena le mathata. (Jes. 41:9, 10) Re a thaba ge re hlankela Tatago rena yo lerato yo a swanelwago ke amogela letago le kgodišo yeo e tšwago go dibopiwa tša gagwe ka moka.—Kut. 4:11. w22.03 24 ¶16; 25 ¶18

Re nyaka go ekiša Jesu, eupša ga se ra swanela go nyama ge re palelwa ke go ekiša Jesu Kriste gabotse. (Jak. 3:2) Morutwana a ka se swane le morutiši ka mo go feletšego. Eupša ge a dula a ithuta diphošong tša gagwe o tlo kgona go dira diphetogo ke moka a ekiša morutiši wa gagwe. Ka mo go swanago ge e ba re diriša seo re ithutago sona ge re bala Beibele le go dira sohle seo re se kgonago go ithuta diphošong tša rena, re tlo kgona go ekiša mohlala wa Jesu Kriste. (Ps. 119:59) Batho ba bantši lehono ba inaganela ba nnoši. Eupša bahlanka ba Jehofa ga ba swane le bona. Re rata mohlala wa Jesu wa go etiša ba bangwe pele e bile re ikemišeditše go o latela. (1 Pet. 2:21) Ge re ka dira sohle seo re ka se kgonago gore re latele mohlala wa Jesu wa go etiša ba bangwe pele, re tlo thaba ka gobane re tla be re kgahliša Jehofa. w22.02 24 ¶16; 25 ¶18

Lehono Jehofa o hlahla bahlanka ba gagwe a diriša Lentšu la gagwe Beibele. Ge re ipha nako ya go naganišiša ka seo Jehofa a re rutago sona, re tlo kgona go latela ditaelo tša gagwe le go phetha bodiredi bja rena ka botlalo. (1 Tim. 4:15, 16.) Tsela e nngwe yeo Jehofa a re hlahlago ka yona ke ka go diriša “mohlanka yo a botegago le wa temogo.” (Mat. 24:45) Ka dinako tše dingwe mohlanka yo a ka re nea ditaelo tšeo re sa di kwešišego gabotse. Ka mohlala re ka hwetša ditaelo tšeo di tlago gore thuša go phologa kotsi ya tlhago yeo re naganago gore e ka se tsoge e diregile moo re dulago. Re swanetše go dira’ng ge re nagana gore tlhahlo yeo re e hwetšago ga e kwagale? Nagana kamoo ka mangwalo a ka Beibeleng ao re a badilego. Ka dinako tše dingwe bahlanka ba Modimo ba ka hwetša ditaelo tšeo di ka bonagalago di sa kwagale ke moka ka morago ba tla ba bona gore di phološa maphelo.—Baa. 7:7; 8:10. w22.03 18-19 ¶15-16

Jesu o ile a bolela a kgodišegile mantšu a temana ya lehono. Jesu o be a tseba gore bophelo bja gagwe bo ka diatleng tša Jehofa e bile a kgodišegile gore Tatagwe o tla mo gopola. Re ka ithuta’ng mantšung a a Jesu? Ikemišetše go dula o botegela Jehofa le ge bophelo bja gago bo le kotsing. E le gore o kgone go dira seo, o swanetše go “bota Jehofa ka pelo ya gago ka moka.” (Die. 3:5) Nagana ka Joshua wa mengwaga e 15 yoo a bego a na le bolwetši bjo bo sa folego. O ile a gana kalafo yeo e bego e sa dumelelane le melao ya Modimo. Pejana ga ge a ka hlokofala o ile a re go mmagwe: “Mma, bophelo bja ka bo ka diatleng tša Jehofa. . . . Nka bolela ke kgodišegile gore ke a tseba gore Jehofa o tlo ntsoša ge a tsoša bahu. O tseba seo se lego ka pelong ya ka e bile ke mo rata kudu.” Yo mongwe le yo mongwe wa rena o swanetše go ipotšiša gore: ‘Ge e ba nka lebana le teko yeo e beago bophelo bja ka kotsing, na ke tla dula ke botegela Jehofa gomme ka tshepa gore o tla nkgopola ge a tsoša bahu?’ w21.04 12-13 ¶15-16

Batho ba Jehofa ba a matlafala ge ba botša batho ba bangwe ditaba tše dibotse. Ge re botša batho ditaba tše dibotse re a thaba, go sa šetšwe gore ba a re theetša goba ga ba re theetše. Ba bangwe ba ka ikwa okare ga ba fetše nako e ntši ba bolela ditaba tše dibotse. Ge e ba o ikwa ka tsela ye, gopola gore Jehofa o a thaba ge a bona o dira sohle seo o ka se kgonago ka gobane o tseba maemo a gago. Jehofa o a tseba gore ba bangwe ba rena re nyaka go botša batho ditaba tše dibotse eupša ga re kgone go tšwa ka magaeng a rena. A ka re thuša gore re kgone go boledišana le bao ba tlago ka magaeng a rena go tlo go re hlokomela goba dingaka le baoki. Re tlo nyama ge e ba re bapiša seo re bego re kgona go se dira nakong e fetilego le seo re se dirago gona bjale. Eupša ge re bona kamoo Jehofa a re thušago gona bjale, re tlo kgona go kgotlelela mathata ao a re welago re thabile. Ga re tsebe gore ke dipeu dife tša therešo tšeo re di bjetšego tšeo di tlago go mela.—Mmo. 11:6. w21.05 24-25 ¶14-17

Go ba le megabaru go ile gwa dira gore Kgoši Dafida a lebale dilo tšeo Jehofa a bego a mo file tšona, go akaretša mahumo, go tuma le go fenya manaba a gagwe a mantši. Dafida o be a kile a bolela gore dilo tšeo Modimo a mo neilego tšona e be e le ‘tše dintši kudu moo a bego a palelwa ke go di bala!’ (Ps. 40:5) Eupša nakong e nngwe Dafida o ile a lebala dilo tšeo Modimo a bego a mo file tšona. Le ge Dafida a be a na le basadi ba mmalwa, o ile a thoma go kganyoga mosadi wa monna yo mongwe. Mosadi yoo e be e le Batseba gomme monna wa gagwe e le Uria wa Mohethe. Dafida o ile a robala le Batseba gomme Batseba a ima. O be a dirile sebe ka go robala le Batseba, eupša o ile a dira sebe le go feta ka go laela gore Uria a bolawe. (2 Sam. 11:2-15) Dafida o be a nagana’ng? Na o be a ipotša gore Jehofa ga a bone seo se diregago? Le ge Dafida a be a hlanketše Jehofa ka mengwaga e mentši, o ile a thoma go ba le megabaru gomme seo sa mmakela mathata a mantši. Eupša se se kgahlišago ke gore mafelelong Dafida o ile a ipona molato gomme a itshola. O ile a leboga kudu gore Jehofa o ile a mo lebalela!—2 Sam. 12:7-13. w21.06 17 ¶10

Re ka bona eka re ka se kgone go swara dithuto tša Beibele. Ka dinako tše dingwe re ka ikwa eka re swanetše go tseba dilo tše dintši goba go ba le bokgoni gore re kgone go ruta motho yo mongwe Beibele. Ge e ba o ikwa ka tsela ye, bona dilo tše tharo tšeo di ka go thušago gore o kgodišege gore o ka kgona go ithuta Beibele le motho yo mongwe. Sa pele, Jehofa o bona o swanelega gore o rute batho ba bangwe Beibele. Sa bobedi, Jesu yo a nago le matla ka moka legodimong le lefaseng o go laetše gore o rute batho ba bangwe. (Mat. 28:18) Sa boraro, o ka kgopela bana beno gore ba go thuše. Jehofa o ile a thuša Jesu gore a tsebe seo a tlago go se bolela, le wena a ka go thuša. (Joh. 8:28; 12:49) Le gona, o ka kgopela molebeledi wa sehlopha sa gago sa tšhemo, mmulamadibogo yo a nago le phihlelo goba mogoeledi yo e lego kgale a swara dithuto tša Beibele gore a go thuše go thoma le go swara thuto ya Beibele. Tsela e nngwe yeo o ka kgonago go swara thuto ya Beibele, ke ka go sepela le yo mongwe wa bagoeledi ba bao ba nago le bokgoni. w21.07 6 ¶12

Ka ge bofelo bo le kgauswi re swanetše go tshepa Jehofa go feta le ge e le neng pele. Ka baka la’ng? Nakong ya masetlapelo a magolo, re ka newa ditaelo tšeo go ka bonagalago di le thata gore re di kwešiše goba re di dire. Ke nnete gore Jehofa a ka se tle a bolela le rena ka go lebanya. A ka re nea ditaelo a diriša batho bao a ba kgethilego. Ka nako yeo ga se ra swanela go belaela tlhahlo yeo re e hwetšago, ra ipotšiša ge e ba e e tšwa go Jehofa. Na o tlo tshepa Jehofa le mokgatlo wa gagwe ka nako yeo? Karabo ya gago e tlo ithekga ka gore o lebelela bjang tlhahlo yeo Modimo a re neago yona a diriša banna bao a ba kgethilego gona bjale. Ge e ba o tshepa tlhahlo yeo re e hwetšago gona bjale, o ka tla wa kgona go latela tlhahlo yeo re tlago go e hwetša nakong ya masetlapelo a magolo. w22.02 6 ¶15

Jehofa o ile a thuša Gideone la banna bao a bego a na le bona ba 300 gore ba fenye ntweng, e lego seo se bego se ka dira gore Gideone le banna ba ba ikgogomoše kudu. Ge banna ba molokong wa Efuraime ba be ba kopana le Gideone, ba ile ba mo direla ditshele go e na le gore ba mo rete. Ka gobane ga se a ba bitša gore ba yo mo thuša go lwa. (Baa. 8:1) Gideone o ile a ba nea mohlala wa kamoo Jehofa a ilego a ba šegofatša ka gona. Banna bao ba ile ba iša “maswafo fase.” (Baa. 8:3) Gideone o ile a ikokobetša e le gore go be le khutšo gare ga batho ba Modimo. Mohlala wa Baefuraime o re ruta gore re swanetše go tshwenyega kudu ka gore leina la Jehofa le retwe go feta go nyaka go šireletša leina la rena. Dihlogo tša malapa le bagolo ba ka ithuta se sengwe mohlaleng wa Gideone. Ba ka ithuta gore ge e ba motho yo mongwe a kwešitšwe bohloko ke selo seo ba se dirilego, ba swanetše go leka go lebelela dilo ka tsela yeo motho yoo a di lebelelago ka yona. Le gona ba ka reta motho yoo ge go na le dilo tšeo a di dirilego gabotse. Seo se tla dira gore ba bontšhe boikokobetšo. Eupša go bohlokwa kudu go dula re na le khutšo le bana babo rena le dikgaetšedi go e na le go leka go ba bontšha gore ba dirile phošo. w21.07 16-17 ¶10-12

Jehofa o bontšhitše gore re bohlokwa ka go re bopa ka seswantšho sa gagwe. Ka ge re bopilwe ka seswantšho sa Modimo, re ka kgona go ba le dika tše dintši tše dibotse tša go swana le lerato, kwelobohloko, go botega le go ba le toka. (Ps. 86:15; 145:17) Ge re na le dika tše, re dira gore Jehofa a retwe e bile re bontšha gore re a mo leboga. (1 Pet. 1:14-16) Ge re itshwara ka tsela yeo e kgahlišago Tatago rena wa legodimong, re a thaba e bile re a kgotsofala. Le gona ka ge Jehofa a re bopile ka seswantšho sa gagwe, re ka kgona go ba batho bao a ba nyakago ka lapeng la gagwe. Jehofa o re diretše legae le lebotse. O ile a bopa lefase nako e telele pele a ka bopa batho. (Jobo 38:4-6; Jer. 10:12) Ka ge Jehofa a le botho e bile a sa timane, o re diretše dilo tše dintši tše dibotse gore re thabe. (Ps. 104:14, 15, 24) Ka nako e nngwe o ile a naganišiša ka dilo ka moka tšeo a di dirilego ke moka a ‘bona e le tše dibotse.’—Gen. 1:10, 12, 31. w21.08 3 ¶5-6

Ka moka ga rena re neilwe modiro wa go bolela ditaba tše dibotse le go dira batho barutiwa. (Mat. 28:19, 20; Baroma 10:14) Na o ka rata go kaonefatša bokgoni bja gago modirong wo wa bohlokwa kudu? Ipeele dipakane tše itšego ge o dutše o ithuta le go diriša seo o ithutilego sona ka poroutšheng ya Go Bala le go Ruta. Ge o ipeela dipakane tša gago, o se ke wa lebala go ipeela pakane ya gore o be le dika tšeo di kgahlišago Modimo. (Bakol. 3:12; 2 Pet. 1:5-8) Ga go pelaelo gore ka moka ga rena re duma eka re ka hlankela Jehofa go feta ka tsela yeo re mo hlankelago ka yona gona bjale. Lefaseng le lefsa re tlo kgona go mo hlankela ka tsela yeo re nyakago ka yona. Eupša ge re sa letile e bile re dira sohle seo re ka se kgonago dikabelong tša rena, re tlo oketša lethabo la rena gomme ra se sa nyama kudu. Sa bohlokwa le go feta re tlo dira gore Jehofa, yena ‘Modimo wa rena yo a thabilego’ a retwe le go tumišwa. (1 Tim. 1:11) Ka gona, a re thabišeng ke ditokelo tšeo re nago le tšona! w21.08 25 ¶18-20

Ge e ba o godišitšwe ke Dihlatse tša Jehofa, o ka ba o ile wa ithuta ka Jehofa go tloga o sa le yo monyenyane. Le gona o ithutile gore ke Mmopi wa dilo ka moka, o na le dika tše dibotse le gore o nyaka gore batho ba tle ba phele paradeiseng. (Gen. 1:1; Dit. 17:24-27) Batho ba bantši ga ba dumele gore Modimo o gona le gore o bopile dilo ka moka. Go e na le moo ba dumela gore dilo tše di phelago di itirile gomme ganyenyane-ganyenyane dilo tšeo tša fetoga diphedi tše dingwe tše dintši tša mehutahuta. Le gona ba bangwe ba batho bao ba bolelago dilo tše, ba rutegile kudu. Ba ka ba ba bolela gore saense e hlatsetše gore Beibele e bolela maaka le gore batho bao ba dumelago gore go na le Mmopi ga se ba rutega goba ga ba bohlale le gore ba forega gabonolo. Ka moka ga rena re swanetše go dula re matlafatša tumelo ya rena, go sa šetšwe gore re na le nako e kaakang re le Dihlatse tša Jehofa. Ge re ka dira seo, re ka se arošwe ke “filosofi le bofora bja lefeela” bjoo bo rutwago ke batho bao ba bolelago gore Beibele e bolela maaka.—Bakol. 2:8. w21.08 14 ¶1-3

Abele, Noa, Aborahama le Jobo ba ile ba bontšha gore ba hlompha Jehofa le go mo rata. Bjang? Ba be ba e kwa Modimo, ba na le tumelo go yena e bile ba mo direla dihlabelo. Ba ile ba hlankela Jehofa ka matla a bona ka moka le gona o ile a amogela borapedi bja bona. Ka morago Jehofa o ile a nea Baisiraele Molao wa Moshe. Melao yeo e be e na le ditaelo tšeo di bontšhago gore Jehofa o nyaka gore ba mo hlankele bjang ka tsela yeo a e amogelago. Ka morago ga gore Jesu a tsošwe bahung, Jehofa o be a se sa nyaka gore batho ba mo rapele ba diriša Molao wa Moshe. (Baroma 10:4) Bakriste ba be ba swanetše go latela molao o mofsa e lego “molao wa Kriste” (Bagal. 6:2) Ba be ba ka latela molao wo ka go ekiša mohlala wa Jesu le go latela dithuto tša gagwe e sego ka go latela melao e mentši go swana le Baisiraele. Lehono Bakriste ba šoma ka thata gore ba ekiše mohlala wa Jesu e le gore ba kgone go kgahliša Jehofa le go ‘hweletša meoya ya bona tapologo.’—Mat. 11:29. w22.03 20-21 ¶4-5

Jehofa o theetša bana ba gagwe. O ile a kwa dithapelo tše dintši tšeo Morwa wa gagwe a ilego a di rapela ge a be a le mo lefaseng. O ile a kwa Jesu a rapela pele a ka dira diphetho tše bohlokwa tša go swana le go kgetha baapostola ba 12. (Luka 6:12, 13) Le gona Jehofa o ile a kwa Jesu a rapela nakong ya ge a be a gateletšegile kudu. Pejana ga ge Judase a ka mo eka, Jesu o ile a rapela Tatagwe a mo kgopela gore a mo thuše go lebeletšana le dilo tšeo di bego di le kgauswi le go mo diragalela. Jehofa ga se a no kwa thapelo yeo ya Morwa wa gagwe yo a mo ratago, eupša o ile a ba a romela morongwa gore a yo mo matlafatša. (Luka 22:41-44) Lehono Jehofa o sa dutše a theetša dithapelo tša bahlanka ba gagwe, le gona o di araba ka tsela e swanetšego le ka nako ya maleba. (Ps. 116:1, 2) Kgaetšedi yo mongwe wa kua India o ile a bona kamoo Jehofa a ilego a araba dithapelo tša gagwe ka gona. O be a na le bothata bja go dula a tshwenyegile kudu gomme o ile a rapela Jehofa ka bjona. O ngwadile gore: “Kgašo ya JW ya May 2019 yeo e bego e bolela ka seo re swanetšego go se dira ge re tshwenyegile, e nthušitše kudu le gona e tlile ka nako yeo ke bego ke e hloka ka yona. Modimo o ile a diriša Kgašo yeo go araba dithapelo tša ka.” w21.09 21-22 ¶6-7

Nagana gore go be go le thata bjang gore Bakriste ba lekgolong la pele ba tlogele dilo ka moka tšeo ba bego ba na le tšona, gomme ba ye go thoma bophelo ka bofsa lefelong le lengwe. Ba be ba swanetše go ba le tumelo ya gore Jehofa o tlo ba hlokomela ka dilo tšeo ba di hlokago. Eupša go be go na le selo seo se ka ba thušago. Mengwaga e mehlano pele Baroma ba ka hlasela Jerusalema, moapostola Paulo o ile a nea Baheberu keletšo yeo e rego: “Tsela ya lena ya bophelo a e se be ya go rata tšhelete, ge le dutše le kgotsofetše ka dilo tše di lego gona. Gobane Modimo o itše: “Le ka mohla nka se ke ka go tlogela le ge e le go go lahla.” E le gore re be le sebete kudu gomme re re: “Jehofa ke mothuši wa ka; nka se boife. Motho a ka ntira’ng?” (Baheb. 13:5, 6) Go be go le bonolo gore batho bao ba kwelego keletšo ya Paulo ba kgotsofalele dilo tšeo ba nago le tšona magaeng a bona a mafsa. Ba be ba kgodišegile gore Jehofa o tlo ba hlokomela ka dilo tšeo ba di hlokago. w22.01 4 ¶7, 9

Ge re nagana ka motho yo a nago le kgaugelo, re ka nagana ka motho yo a nago le botho, lerato, kwelobohloko le go rata go fana. Le gona re ka nagana le ka papišo ya Jesu ya Mosamaria wa kgaugelo. Monna wa Mosamaria yoo a bego a etšwa setšhabeng se sengwe, ‘o ile a gaugela’ monna wa Mojuda yoo mahodu a bego a mmethile e bile a mo tšeetše dilo tša gagwe. Monna yoo wa Mosamaria o ile a ‘kwela Mojuda yo a bego a gobetše bohloko’ gomme a mo hlokomela. (Luka 10:29-37) Papišo ye e bontšha gore Modimo wa rena o na le seka se sebotse sa kgaugelo. Modimo o na le kgaugelo ka gobane a re rata. Le gona, letšatši le letšatši o re bontšha kgaugelo ka ditsela tše dintši. Go na le tsela e nngwe ya go bontšha ba bangwe kgaugelo. Re ka bontšha motho kgaugelo ka go kgetha go se mo otle le ge e ba a swanelwa ke go otlwa. Ka go dira bjalo re ekiša Jehofa yo a bego a dutše a re gaugela le ge re mo direla diphošo. Mopsalme o itše: “Ga se a re swara gaešita le go ya ka tšeo di lebanego dibe tša rena.” (Ps. 103:10) Eupša ka dinako tše dingwe Jehofa a ka diriša bagolo gore ba kgaole motho yoo a dirilego sebe. w21.10 8 ¶1-2

Jehofa o bontšha bahlanka ba gagwe bao ba nago le segwera se sebotse le yena botho bjo bogolo. Bohlatse bja se re bo bona ka seo se ilego sa bolelwa ke Kgoši Dafida le moporofeta Daniele. Ka mohlala, Dafida o itše: “Tšwela pele o bontšha botho bja gago go bao ba go tsebago.” “Botho bja Jehofa ke bja go tloga mehleng ya neng le neng gaešita le go iša mehleng ya neng le neng go bao ba mmoifago.” Le gona Daniele o itše: “Joo Jehofa Modimo wa therešo, yoo a bontšhago botho go bao ba mo ratago le go bao ba bolokago ditaelo tša gagwe.” (Ps. 36:10; 103:17; Dan. 9:4) Go ya ka ditemana tše, Jehofa o bontšha bahlanka ba gagwe botho ka gobane ba mo tseba, ba mmoifa, ba mo rata e bile ba boloka ditaelo tša gagwe. Jehofa o bontšha botho bja gagwe bjo bogolo go batho bao ba mo hlankelago ka tsela yeo a e amogelago. Pele re thoma go hlankela Jehofa, o be a re rata go swana le motho yo mongwe le yo mongwe. (Ps. 104:14) Eupša ka ge gona bjale re le bahlanka ba gagwe, ga a no re rata fela eupša o re bontšha botho bja gagwe bjo bogolo. w21.11 4 ¶8-9

Re swanetše go latela mantšu a a Jesu temaneng ye. Lehono batho ba bantši ba rata go theetša baruti bao ba tumilego. Ba rata baruti bao go fihla bokgoleng bja gore ba ka ba rapela. Batho ba bantši ba ya dikerekeng tša baruti bao, ba reka dipuku tša dikereke tša bona e bile ba ntšha meneelo e mentši kudu go thekga baruti bao. Batho ba bangwe ba dumela selo se sengwe le se sengwe seo baruti bao ba se bolelago. Ga re tshepe gore tsela yeo batho bao ba thabago ka yona ge ba bona baruti ba bona, ba ka thaba ka yona ge Jesu a be a ka tla mo lefaseng! Go fapana le batho ba dikereke, Bakriste ba nnete ga ba na moruti. Le ge re hlompha bao ba re eteletšego pele, re theetša mantšu a Jesu ao a rego: ‘Ka moka le bana ba motho.’ (Mat. 23:8-10) Ga re hlankele batho, go sa šetšwe gore ke baetapele ba bodumedi goba ba dipolotiki. Le gona ga re thekge dilo tšeo ba di dirago. Go e na le moo re thekga Jehofa ka gobane ga re karolo ya lefase. Ka gona dilo tše ka moka di bontšha gore re fapana kudu le madumedi ka moka ao a ipotšago gore a hlankela Modimo ka tsela yeo a e amogelago.—Joh. 18:36. w21.10 20 ¶6-7

Mokriste yo mongwe le yo mongwe yoo a nyakago go ba yo mokgethwa o swanetše go kgonthišetša gore ga go na selo le ge e le sefe goba motho le ge e le ofe yoo a ka dirago gore re se sa ba le segwera se sebotse le Jehofa. Ka ge re le Dihlatse tša Jehofa, ga se ra swanela go dira selo le ge e le sefe seo se ka dirago gore leina le e se sa ba le lekgethwa. (Lef. 19:12; Jes. 57:15) Baisiraele ba be ba bontšha gore Jehofa ke Modimo wa bona ka gore ba latele melao ya gagwe. Lefitiko 18:4 e re: “Le phethe dikahlolo tša ka gomme le lote melao ya ka e le gore le sepele ka yona. Ke nna Jehofa Modimo wa lena.” Kgaolo  19 e bolela ka “melao” e mengwe yeo Baisiraele ba bego ba swanetše go e latela. Ka mohlala, ditemana 5-8, 21, 22 di bolela ka go dira dihlabelo ka diphoofolo. Baisiraele ba be ba swanetše go dira dihlabelo tšeo ka tsela yeo e bego e ka se ‘goboše leina la Jehofa.’ Ge re bala ditemana tšeo di tla re thuša gore re nyake go thabiša Jehofa le go mo nea sehlabelo sa tumišo ka tsela yeo a e amogelago, go swana le kamoo Baheberu 13:15 e re kgothaletša ka gona. w21.12 5-6 ¶14-15

Bafsa bao ba sa tšwago go nyalana ba ka holwa ke diphihlelo tšeo ba di hwetšago go bao ba ilego ba ithuta go ithekga ka Jehofa. Banyalani ba bangwe ba ka ba ba feditše nako e telele ba le tirelong ya nako e tletšego. Ke ka baka la’ng le sa ba kgopele keletšo ge e ba le nyaka go oketša nako yeo le e fetšago le hlankela Jehofa? Ye ke e nngwe ya ditsela tšeo di bontšhago gore le tshepa Jehofa. (Die. 22:17, 19) Gopola gore lenyalo ke mpho yeo e tšwago go Jehofa. (Mat. 19:5, 6) Jehofa o nyaka banyalani ba thabela mpho yeo. Lena banyalani ba bafsa, na le ka lebelela gore le fetša nako ya lena e ntši le dira’ng? Na le dira sohle seo le ka se kgonago go leboga mpho yeo Jehofa a le filego yona? Rapelang Jehofa. Nyakang melao ya motheo ya Beibele yeo e tlago go le thuša go ya ka maemo a lena. Ke moka le diriše keletšo yeo Jehofa a le neago yona. Le ka kgodišega gore le tlo thaba ge le ka dula le ithekgile ka Jehofa le go mo etiša pele maphelong a lena! w21.11 19 ¶16, 18

Jakobo o be a sa ipone a phala ba bangwe. Jakobo o be a sa ipone a le bohlokwa go feta bana babo le dikgaetšedi ka lebaka la ge e le ngwanabo Jesu goba ka baka la dikabelo tše bohlokwa tšeo a bego a na le tšona. O be a bitša Bakristegotee le yena gore ke ‘bana babo bao ba rategago.’ (Jak. 1:16, 19; 2:5) O be sa dire gore batho ba bangwe ba nagane eka ga a dire diphošo. Seo re ithutago sona: Gopola gore ka moka ga rena re dira diphošo. Re se ke ra nagana gore ka tsela e itšego, re phala batho bao re ithutago le bona Beibele. Ka baka la’ng? Ge e ba motho yo re ithutago le yena a ka bona eka ga re dire diphošo, seo se ka dira gore a bone okare a ka se tsoge a kgonne go kwa Modimo. Eupša ge re ka ba botša nnete le go ba hlalosetša gore ga se ka mehla go lego bonolo go phela ka melao ya motheo ya Beibele, le gore re dula re kgopela Jehofa gore a re thuše go fenya mathata ao re kopanago le ona, le bona ba ka bona gore ba ka kgona go hlankela Jehofa. w22.01 11-12 ¶13-14

Ge re nagana go swana le Jesu re tlo kgona go mo ekiša le go tšweletša dika tša gagwe. (Baheb. 1:3) Re ka ipotša gore: ‘Jesu o phethagetše. Nka se kgone go swana le yena!’ Ge e ba o ikwa ka tsela yeo, gopola dintlha tše. Sa pele o bopilwe gore o swane le Jehofa le Jesu. Ka gona o ka kgetha go ba ekiša gomme wa kgona. (Gen. 1:26) Sa bobedi, moya o mokgethwa wa Modimo o na le matla go feta dilo ka moka mo lefaseng. Modimo a ka kgona go go thuša go dira dilo tšeo o ka se kgonego go di dira ka bowena. Sa boraro, Jehofa ga se a letela gore o bontšhe dienywa tša moya ka mo go feletšego ka ge o se wa phethagala. Le gona Tatago rena wa legodimong o tlo nea batho bao ba nago le kholofelo ya go tlo phela ka mo go sa felego mo lefaseng mengwaga e sekete gore ba phethagale. (Kut. 20:1-3) Seo Jehofa a se kgopelago go rena ke gore re leke ka thata gore re ithekge ka yena gore a re thuše. w22.03 9 ¶5-6

Thapelo ga se yona feela yeo e ka ra thušago gore re tiiše segwera sa rena le Jehofa. Go ba gona dibokeng le go ithuta lentšu la Modimo le gona go re thuša gore re batamele kgauswi le Modimo. Na go na le seo o ka se dirago gore o diriše nako ya gago gabotse ge o ithuta le ge o le dibokeng? Ipotšiše gore: “ke eng seo se ntšhitišago ge ke le dibokeng goba ke ithuta Beibele?” Na e ka ba go araba difounu, di e-mail goba go fetola melaetša difounung tša rena goba di dirišweng tše dingwe tša elektroniki? Ge e ba o lemoga gore o palelwa ke go theetša ge o ithuta le ge o le dibokeng, kgopela Jehofa gore a go thuše go theetša. Ge e ba o tshwenyegile goba o nyamile go ka se be bonolo gore o tlogele go nagana ka mathata a gago ge o ithuta Beibele, eupša go bohlokwa gore o dire bjalo. Rapela Jehofa gore a go fe khutšo yeo e tlago go “diša pelo ya gago le matla a gago a monagano.”—Bafil. 4:6, 7. w22.01 29-30 ¶12-14

Kgoši Usia o ile a gana ge ba mo eletša. O ile a tsena ka tempeleng ya Jehofa moo go bego go swanetše go tsena baperisita feela, gomme a nyaka go fiša diorelo. Baperisita ba Jehofa ba ile ba re go yena: “Wena Usia, go fišetša Jehofa diorelo ga se mošomo wa gago, eupša ke mošomo wa baperisita.” Usia o ile a arabela bjang. Ge a ka be a ikokobeditše gomme a tloga kamoo tempeleng kapelapela, Jehofa a ka ba a mo swaretše. Eupša ‘Usia o ile a befelwa.’ Ke ka baka la’ng a ile a gana go eletšwa? O be a nagana gore ka ge e le kgoši, o be a na le tokelo ya go dira se sengwe le se sengwe seo a nyakago go se dira. Eupša Jehofa o be a sa dumelelane le yena. Ka ge Usia a dirile seo a bego a sa swanela go se dira, o ile a ba “molephera go fihlela letšatšing leo a hwilego ka lona.” (2 Dikor. 26:16-21) Mohlala wa Usia o re ruta gore go sa šetšwe gore re bo mang, ge e ba re sa latele melao ya Beibele, Jehofa a ka se sa re amogela. w22.02 9 ¶7

Motho yo a laolwago ke “semelo sa kgale” o nagana le go dira dilo ka tsela yeo Jehofa a sa e ratego. (Bakol. 3:9) A ka ba a inaganela a nnoši, a kwata ka pela, a sa leboge e bile a ikgogomoša. A ka ba a thabela go bogela diswantšho le dibidio tša batho bao ba sa aparago le tšeo di nago le bošoro. Ka ge a na le dika tše dibotse, a ka ba a itsholela dilo tše mpe tšeo a di dirago. Eupša o hloka thušo gore a fetoše tsela yeo a naganago ka yona le yeo a dirago dilo ka yona. (Bagal. 5:19-21; 2 Tim. 3:2-5) Ga se ra phethagala, ka gona ga go le o tee wa rena yoo a ka tlošago dilo tše mpe ka mo go feletšego ka dipelong tša rena le ka monaganong wa rena. Ka dinako tše dingwe re tlo dira goba ra bolela dilo tšeo re tlago go itsholela tšona. (Jer. 17:9; Jak. 3:2) Eupša ge re hlobola semelo sa kgale ga re sa itshwara go swana le kamoo lefase le itshwarago ka gona. Re fetoga batho ba bafsa.—Jes. 55:7. w22.03 3 ¶4-5

Bagolo, lebelelang dika tše dibotse tšeo bana babo lena le dikgaetšedi ba di bontšhago. Ga se ba phethagala eupša yo mongwe le yo mongwe wa bona o na le dika tše dibotse. Ke nnete gore bagolo ba ka swanelwa ke go fela ba eletša bana babo bona le dikgaetšedi. Bagolo ba swanetše go ekiša mohlala wa moapostola Paulo ka go lebelela dilo tše dibotse go bana babo bona le dikgaetšedi go e na le go tenwa ke mantšu ao ba a bolelago le dilo tšeo ba di dirago. Ba swanetše go lemoga gore ngwanabo bona o rata Jehofa, o dula a mo hlankela le ge a na le mathata le gore o nyaka go dira seo se lokilego. Bagolo ba swanetše go se kgopišege ge bana babo bona ba bolela goba ba dira dilo ka tsela e itšego. Bagolo bao ba lebelelago dika tše dibotse go ba bangwe ba dira gore bana babo bona le dikgaetšedi ba ikwe ba ratwa ka phuthegong. Gopolang gore Jehofa ga a le kgopele gore le be bao ba phethagetšego, go e na le moo, o le kgopela gore le mo hlankele ka go botega. (1 Bakor. 4:2) Kgodišegang gore Jehofa o thabela mošomo wo le mo direlago wona. A ka se lebale “modiro wa lena le lerato leo le le bontšhitšego leineng la gagwe, ka ge le hlanketše bakgethwa e bile le tšwela pele le ba hlankela.”—Baheb. 6:10. w22.03 31 ¶19, 21