December

Na Jehofa o na le matla a go tsoša bahu? Ee go bjalo! Ke “Ramatlaohle.” (Kut. 1:8) O na le matla a go fenya lenaba le lengwe le le lengwe, go akaretša le lehu. (1 Bakor. 15:26) Lebaka le lengwe leo le dirago gore re tshepe gore Modimo o na le bokgoni bja go tsoša batho bahung ke gore ga a lebale. O bitša naledi e nngwe le e nngwe ka leina. (Jes. 40:26) Le gona, o gopola batho bao ba hlokofetšego. (Jobo 14:13; Luka 20:38) O gopola selo se sengwe le se sengwe ka batho bao a tlago go ba tsoša, go akaretša tsela yeo ba bopegilego ka yona, dilo tšeo ba di dirilego le dilo tšeo ba di gopolago. Ruri re ka tshepa kholofetšo ya Modimo ya go tlo tsoša bahu ka gobane re a tseba gore o na le matla e bile o tloga a nyaka go dira bjalo. Lebaka le lengwe la gore re dumele kholofetšo ye ke ka gobane go šetše go bile le batho bao Modimo a ilego a ba tsoša. Mehleng ya Beibele, o ile a diriša banna bao ba botegago, go akaretša le Jesu, go tsoša bahu. w23.04 9-10 ¶7-9

Ge e ba re boledišana le batho ba bangwe ka šedi le ka boleta ba ka nyaka go re theetša gomme ba nyaka go tšwela pele ba boledišana le rena. Ke nnete gore ge e ba motho a nyaka go ngangišana le rena goba a kwera ditumelo tša rena, ga go hlokagale gore re tšwele pele re boledišana le yena. (Die. 26:4) Eupša batho ba bantši ba ka no se swane le yena, ge e le gabotse ba bantši ba ka nyaka go re theetša. Go molaleng gore ge re ka ithuta go ba boleta re tlo holega kudu. Rapela Jehofa gore a go fe matla e le gore o dule o le boleta ge o araba dipotšišo tše thata goba ge batho ba sa go sware gabotse. Gopola gore go ba boleta go ka dira gore poledišano ya lena e se ke ya feleletša e le ngangišano. Le gona, ge e ba o araba ba bangwe ka boleta le ka tlhompho, o ka thuša batho bao ba go theeditšego gore ba fetoše tsela yeo ba naganago ka yona ka rena le ka seo Beibele e se rutago. ‘Dula o loketše go emela’ ditumelo tša gago gomme o “dire bjalo ka moya o boleta le ka tlhompho e tseneletšego.” (1 Pet. 3:15) Ka gona, leka ka thata gore o dule o le boleta! w23.09 19 ¶18-19

Ekwa ka ditsela tše nne tšeo re ka bontšhago go se fele pelo ka tšona. Ya pele, motho yo a sa felego pelo o diega go galefa. O leka go dula a išitše maswafo fase le ge a le ka tlase ga kgatelelo. (Ek 34:6) Ya bobedi, motho yo a sa felego pelo o kgona go leta a išitše maswafo fase. Ge selo se itšego se tšea nako e telele gore se direge, motho yo bjalo o leka go itshwara. (Mat. 18:​26, 27) Ya boraro, motho yo a sa felego pelo ga a dire dilo ka lebelo. Ge motho yo a sa felego pelo a na le selo se bohlokwa seo a swanetšego go se dira, ga a kitimele go se dira goba go kitimela go fetša go se dira. Go ena le moo, o beela nako ka thoko ya gore a rulaganye go dira selo seo a nyakago go se dira. Ke moka o nea mošomo o mongwe le o mongwe nako yeo e o swanetšego. Ya bone, motho yo a sa felego pelo o kgotlelela mathata ka ntle le go ngongorega. Motho yo a sa felego pelo o tlo kgotlelela mathata a dutše a naganišiša ka dilo tše dibotse tšeo di diregago bophelong bja gagwe. (Bakol. 1:11) Bjalo ka Bakriste, re swanetše go bontšha seka sa go se fele pelo ka ditsela tše tše nne. w23.08 20-21 ¶3-6

Lebaka le legolo leo le dirago gore re šireletše dipelo tša rena tša seswantšhetšo ke gore Jehofa o hlahloba dipelo tša rena. Seo se bolela gore o kgona go bona dilo tšeo ba bangwe ba sa kgonego go di bona go rena le go tseba gore re batho ba mohuta mang. Ge e ba re dula re nagana ka keletšo ya gagwe yeo e ka re thušago gore re tle re phele go ya go ile, o tlo re rata. (Joh. 4:14) Ke moka re ka se tsoge re kwešitšwe bohloko ke maaka a Sathane le a batho ba babe gotee le boitshwaro bja bona. (1 Joh. 5:​18, 19) Ge re dutše re e ba le segwera se sebotse le Jehofa, re tlo mo rata kudu le go mo hlompha. Ka ge re sa nyake go kweša Tatago rena bohloko, re tlo hloya le go nagana go dira selo se sebe. Marta e lego kgaetšedi wa kua Croatia yo a ilego a lekega go dira bootswa o ngwadile gore: “Ke be ke sa kgone go nagana gabotse e bile ke thatafalelwa ke go lwantšhana le go dira dilo tše mpe. Eupša go boifa Jehofa go ile gwa ntšhireletša.” Go ile gwa mo šireletša bjang? Marta o re o naganišišitše ka ditlamorago tšeo di tlišwago ke go dira dilo tše mpe. Le rena re ka mo ekiša. w23.06 20-21 ¶3-4

Jesu o be a tseba gore morero wa Jehofa ke go tagafatša leina la Gagwe le go tloša dilo ka moka tšeo ba ilego ba mo thomeletša ka tšona. Ke ka baka leo Mong wa rena a rutilego balatedi ba gagwe gore ba rapele ka tsela ye: “Tatago rena wa magodimong, leina la gago a le kgethagatšwe.” (Mat. 6:9) Jesu o be a kwešiša gore bjo ke bothata bjo bogolo bjo tlholo ya Tatago rena wa legodimong ka moka, e lebeletšanego le bjona. Ga go sebopiwa le ge e le sefe legodimong goba lefaseng seo se ilego sa tagafatša leina la Jehofa go fetiša Jesu. Le ga go le bjalo, ge Jesu a be a golegwa, o ile a latofatšwa ka gore o rogaka Modimo! Jesu o be a tseba gore go senya leina le lekgethwa la Tatagwe e be e le sebe se segolo kudu. O be a tshwenyegile kudu ka gore o be a latofatšwa ka molato wa mohuta woo. Le e ka ba e bile lebaka le legolo leo le dirilego gore Jesu a be “bohlokong” diiri pele a ka swarwa.—Luka 22:​41-44. w24.02 11 ¶11

Re swanetše go rata Jehofa le Jesu go feta ba malapa a gabo rena ge re dutše re kitima lebelo le la bophelo. (Mat. 10:37) Se ga se bolele gore re swanetše go tlogela maikarabelo a rena a ka gae bjalo ka ge eka a re šitiša go thabiša Modimo le Kriste. Eupša e le gore Jehofa Modimo le Jesu Kriste ba re amogele, re swanetše go phethagatša boikarabelo bja rena bja ka gae. (1 Tim. 5:​4, 8) Ge re dira seo re tlo thaba. Jehofa o a tseba gore malapa a tlo thaba ge monna le mosadi ba ratana e bile ba hlomphana, ge batswadi ba rata bana ba bona e bile ba ba tlwaetša, le ge bana ba ekwa batswadi ba bona. (Baef. 5:33; 6:​1, 4) Go sa šetšwe boikarabelo bjo o nago le bjona bja ka lapeng, tshepa keletšo ya Beibele e bohlale go ena le go ithekga ka maikwelo a gago, setšo sa geno, goba seo batho bao go thwego ke ditsebi ba se bolelago. Diriša dikgatišo tšeo di theilwego Beibeleng ka botlalo. Dikgatišo tše di na le ditšhišinyo tša kamoo o ka dirišago melao ya motheo ya Beibele ka gona. w23.08 28 ¶6-7

Kgaetšedi wa Mokriste o swanetše go ithuta go dira dilo tše itšego. Dilo tše dingwe tšeo mosetsana a ithutago go di dira e sa le yo monyenyane di tlo mo thuša bophelong bja gagwe ka moka. ka mohlala, ithute go bala le go ngwala gabotse. Ditšong tše dingwe, go bala le go ngwala ga go lebelelwe e le dilo tše bohlokwa tšeo basadi ba ka ithutago tšona. Eupša go bohlokwa gore Mokriste yo mongwe le yo mongwe a ithute go bala le go ngwala. (1 Tim. 4:13) Ka gona, o se ke wa dumelela selo se go šitiša go bala le go ngwala gabotse. O tlo holega bjang? Go ithuta go bala le go ngwala go ka go thuša gore o hwetše mošomo. O tlo kgona go ithuta Lentšu la Modimo le go le ruta ba bangwe. Sa bohlokwa le go feta ke gore ge o bala le go naganišiša ka Lentšu la Jehofa, o tlo batamela kgauswi le yena.—1 Tim. 4:15. w23.12 20 ¶10-11

Kgopela Jehofa gore a go thuše go gana diteko. Ka ge re se ra phethagala, re dula re lwantšhana le go nyaka go dira dilo tše di fošagetšego. Sathane o dira sohle se a ka se kgonago go re šitiša go dira se sebotse. Tsela e nngwe yeo a nyakago go senya menagano ya rena ka yona, ke ka boithabišo bjo bo gobogilego. Boithabišo bjoo bo ka tlatša menagano ya rena ka dikgopolo tše di sa hlwekago, e lego dikgopolo tšeo di ka dirago gore Jehofa a re lebelele re se ra hlweka gomme se se ka dira gore re feleletše re dirile sebe se segolo. (Mar. 7:​21-23; Jak. 1:​14, 15) Re hloka gore Jehofa a re thuše go lwantšhana le go dira dilo tše di fošagetšego. Jesu o akareditše mantšu a thapelong ya gagwe ya mohlala, o itše: “O se re tsenye molekong, eupša o re hlakodiše go yo kgopo.” (Mat. 6:13) Jehofa o ikemišeditše go re thuša, eupša re swanetše go thoma pele ka go mo kgopela thušo. Re swanetše go dira dilo ka go dumelelana le seo re se rapelelago. w23.05 6-7 ¶15-17

Ge banyalani ba šoma ka thata gore ba be le segwera seo se tiilego le Tatago bona wa legodimong e bile ba ikemišeditše go diriša keletšo ya gagwe, seo se tlo ba thuša gore ba pheme mathata ao a ka dirago gore lerato la bona le fole. Batho bao ba nago le segwera seo se tiilego le Jehofa ba tlo mo ekiša le go hlagolela go ba le dika tšeo a di bontšhago e lego botho, go se fele pelo le go lebalela. (Baef. 4:32–5:1) Lerato leo banyalani ba nago le lona le tlo gola ge eba ba na le dika tše. Kgaetšedi Lena yo a nago le mengwaga e fetago e 25 a nyetšwe, o re, “Go bonolo go rata motho wa moya le go mo hlompha.” Nagana ka mohlala wa ka Beibeleng. Ge Jehofa a be a nyaka batho bao e ka bago batswadi ba Mesia, o ile a kgetha Maria le Josefa go tšwa go ditlogolo tše dintši tša Dafida. Ka baka la’ng? Ka gobane ka moka ga bona ba be ba rata Jehofa, e bile Jehofa o be a tseba gore ba tlo ithekga ka yena lenyalong la bona. w23.05 21 ¶3-4

Le ge Moetapele wa rena Jesu Kriste a phethagetše, bao a ba kgethilego gore ba etelele pele mo lefaseng ga se ba phethagala. Re ka thatafalelwa ke go ba kwa, kudu ge ba re kgopela gore re dire selo seo re sa nyakego go se dira. Moapostola Petro le yena ka nako e nngwe o ile a thatafalelwa ke go kwa. Ge morongwa a be a mo laela gore a je dijo tšeo di bego di se tša hlweka go ya ka Molao wa Moshe, o ile a gana gararo. (Dit. 10:​9-16) Ka baka la’ng? O be a sa kwešiše tlhahlo e mpsha. Ka lehlakoreng le lengwe, moapostola Paulo o ile a kwa ge banna ba Bakriste bao ba bego ba le Jerusalema, ba mo laela gore a tšee banna ba bane a ye le bona tempeleng gore a itlhwekiše go bontšha gore o sa phela ka Molao wa Moshe. Paulo o be a tseba gore Bakriste ga ba sa phela ka tlase ga Molao wa Moshe le gore a se a ka a dira phošo. Eupša Paulo o ile a dira seo ba mo kgopelago sona. O ile “a sepela le banna bao letšatšing le le latelago, a itlhwekiša ka mokgwa wa setlwaedi le bona.” (Dit. 21:​23, 24, 26) Go kwa ga Paulo go dirile gore ka phuthegong go be le botee le khutšo.—Baroma 14:​19, 21. w23.10 10 ¶15-16

Ke nnete gore o ka no se bolele gore poifo ke seka se bohlokwa seo bagwera ba nnete ba swanetšego go ba le sona. Bao ba nyakago go ba le segwera se sebotse le Jehofa, ba swanetše go “mmoifa.”Go sa šetšwe gore re na le nako e kaakang re hlankela Jehofa, ka moka ga rena re swanetše go dula re mmoifa. Go boifa Modimo go bolela’ng? Motho yo a ratago Jehofa go tšwa pelong o mmontšha gore o a mo rata e bile ga a nyake go dira selo le ge e le sefe seo se ka senyago segwera sa gagwe le yena. Jesu o be a “boifa Modimo.” (Baheb. 5:7) O be a sa boife Jehofa ka mo go feteletšego goba go mo tšhaba. (Jes. 11:​2, 3) Go e na le moo, o be a mo rata go tšwa pelong e bile a nyaka go mo kwa. (Joh. 14:​21, 31) Go swana le Jesu, re hlompha Jehofa ka pelo ka moka e bile re a mmoifa ka gobane o na le lerato, o bohlale, o lokile e bile o na le matla. Le gona re a tseba gore Jehofa o a re rata e bile o na le taba le gore re arabela bjang ge a re ruta. Eupša ka dinako tše dingwe re ka mo thabiša goba ra mo kweša bohloko.—Ps. 78:41; Die. 27:11. w23.06 14 ¶1-2; 15 ¶5

Ge Kgoši Usia a šetše a na le matla, o ile a lebala gore Jehofa ke yena a mo neilego matla ao le bokgoni. Ke’ng seo re ithutago sona? Re swanetše go dula re ikgopotša gore ditšhegofatšo tšeo re nago le tšona le ditokelo tšeo re di hweditšego di tšwa go Jehofa. Go ena le gore re ikgantšhe ka dilo tšeo re di fihleletšego, re swanetše go leboga Jehofa ka dilo tšeo re kgonago go di dira. (1 Bakor. 4:7) Ka boikokobetšo, re swanetše go dula re gopola gore ga se ra phethagala gomme re tlo fela re swanelwa ke go eletšwa. Ngwanabo rena yo a lego mengwageng ya bo 60 o ngwadile gore: “Ke ithutile gore ga se ka swanela go kgopišega ge ke newa keletšo. Ge ke newa keletšo ka baka la diphošo tšeo ke felago ke di dira, ke leka go kaonefatša gomme ka hlankela Jehofa ka pelo ka moka.” Ge re ka boifa Jehofa gomme ra ikokobetša, dilo di tlo re sepelela gabotse.—Die. 22:4. w23.09 10 ¶10-11

Bakriste ba nakong e fetilego ba be ba swanetše go kgotlelela. Le ge ba be ba na le mathata a go swana le ao batho ba mehleng ya bona ba bego ba na le ona, ba be ba na le mathata a mangwe ao a oketšegilego ka baka la ge e le Bakriste. Ba bantši ba bona ba be ba tlaišwa, ba sa tlaišwe ke baetapele ba bodumedi ba Bajuda le baetapele ba Roma feela, eupša ba tlaišwa le ke ba malapa a gabo bona. (Mat. 10:21) Le gona, ba be ba swanetše go lwantšhana le dithuto tša maaka tša bahlanogi tšeo di bego di baka dikarogano ka phuthegong. (Dit. 20:​29, 30) Lega go le bjalo, Bakriste bao ba ile ba kgotlelela. (Kut. 2:3) Bjang? Ba ile ba naganišiša ka mehlala ya batho ba ka Beibeleng bao ba ilego ba kgotlelela, go swana le Jobo. (Jak. 5:​10, 11) Ba ile ba rapelela gore ba be le matla. (Dit. 4:​29-31) Bakriste bao, ba ile ba gopola gore Jehofa o tlo ba šegofatša ge ba ka kgotlelela. (Dit. 5:41) Le rena re ka kgona go kgotlelela ge e ba re dula re ithuta Lentšu la Modimo le go bala dikgatišo tša rena gomme ra kwa ka mehlala ya batho bao ba ilego ba kgotlelela, ke moka ra naganišiša ka yona. w23.07 3 ¶5-6

Jehofa le Jesu ba ka se tsoge ba re lahlile. Ka morago ga gore moapostola Petro a latole Jesu gararo o be a sa tsebe gore a dire’ng. Na o be a tla tlogela go ba molatedi wa Kriste goba o be a tla kgotlelela? Jesu o ile a lopa Jehofa gore a thuše Petro gore a se ke a felelwa ke tumelo. Jesu o ile a botša Petro ka thapelo yeo a ba a mo kgonthišetša gore o tla kgona go tiiša bana babo. (Luka 22:​31, 32) Go gopola mantšu ao a Jesu go ka ba go ile gwa kgothatša Petro. Ge re swanetše go dira diphetho tše bohlokwa maphelong a rena, Jehofa a ka diriša badiši ba lerato gore ba re nee thušo yeo re e hlokago e le gore re kgone go kgotlelela. (Baef. 4:​8, 11) Go no swana le ge Jehofa a ile a thuša Petro le baapostola ba bangwe, le rena ge re ka etiša Mmušo wa gagwe pele o tlo re thuša ka dilo tšeo re di hlokago. w23.09 24-25 ¶14-15

Jehofa o lemoga le dilo tše dinyenyane tšeo re di direlago batho ba bangwe. O lebelela seo e le tsela ya go mo adima gomme o ikemišeditše go re lefa. Ge eba o ile wa hlankela bjalo ka mogolo, Jehofa o gopola mošomo woo o o dirilego, le lerato leo le bego le go šušumetša gore o dire mošomo woo. (1 Bakor. 15:58) E bile o bona le lerato leo o tšwelago pele o le bontšha. Jehofa o nyaka gore re tšwele pele re mo rata le go rata batho ba bangwe. Re ka kgona go tšwela pele re rata Jehofa ka go bala Lentšu la gagwe le go naganišiša ka lona le ka go dula re boledišana le yena ka thapelo. Re ka tšwela pele re bontšha gore re rata bana babo rena le dikgaetšedi ka go dula re ba thuša. Ge lerato la rena le dutše le gola, re tlo batamela kgauswi kudu le Jehofa le bana babo rena le dikgaetšedi. E bile re tlo thabela segwera seo ka mo go sa felego! w23.07 10 ¶11; 11 ¶13; 13 ¶18

Mokriste yo mongwe le yo mongwe o swanetše go ikgethela gore o hlokomela bjang bophelo bja gagwe. Ge Bakriste ba kgetha mehuta ya tša kalafo, ba swanetše go latela melao ya Beibele ya gore ba ile madi le gore ba se dirišane le meoya e mebe. (Dit. 15:20; Bagal. 5:​19, 20) Eupša ba itirela phetho ya gore ba tla amogela mehuta efe ya tša kalafo. Le ge re ka ba re nagana gore mohuta o itšego wa kalafo o ka thuša goba wa gobatša motho, re swanetše go hlompha diphetho tšeo bana babo rena le dikgaetšedi ba di dirago mabapi le mehuta ya kalafo yeo ba e nyakago. Re swanetše go dula re gopola dintlha tše di latelago tše nne: (1) Mmušo wa Modimo ke ona feela o tlago go fodišetša batho sa ruri. (Jes. 33:24) (2) Mokriste yo mongwe le yo mongwe o swanetše go “kgodišega” ka seo a se kgethago. (Baroma 14:5) (3) Ga e ra swanela go ahlola batho ba bangwe goba ra ba tšeela diphetho. (Baroma 14:13) (4) Bakriste ba bontšhana lerato e bile ba a kwešiša gore go ba le botee ka phuthegong go bohlokwa kudu go feta sela yeo ba lebelelago dilo ka yona.—Baroma 14:​15, 19, 20. w23.07 24 ¶15

Na o tšeela godimo segwera sa gago le Jehofa? Ke nnete gore go bjalo! Batho ba bantšhi go tloga kgale ba be ba dutše ba ikwa ka tsela yeo o ikwago ka yona. (Ps. 104:​33, 34) Ba bantšhi ba ile ba itima dilo tše dintšhi gore ba kgone go hlankela Jehofa. Se ke seo Banasari ba Isiraele ya kgale goba bao ba bego ba tsebja e le ba “ineetšego” ba se dirilego. Lentšu le le hlalosa gabotse Baisiraele bao ba bego ba na le mafolofolo, bao ba ilego ba ikgafela go hlankela Jehofa ka tsela e kgethegilego. Molao wa Moshe o be o dumelela monna goba mosadi gore a direle Jehofa keno e kgethegilego ya gore o tla phela e le Monasari ka nako e itšego. (Num. 6:​1, 2) Ge Moisiraele a be a dira keno yeo, o be a swanetše go latela melao yeo Baisiraele ba bangwe go bego go sa hlokagale gore ba e latele. Ge e ba go le bjalo, ke ka baka la’ng Moisiraele a be a ka kgetha go ba Monasari? Moisiraele yoo a ka ba a be a hlohleletšwa ke lerato leo a ratago Jehofa ka lona e bile a bontšha gore o leboga dimpho tše dintšhi tšeo Jehofa a mo filego tšona.—Doit. 6:5; 16:17. w24.02 14 ¶1-2

Ka Beibeleng, lentšu la Seheberu leo le fetoletšwego e le “potego,” goba “botho bjo bogolo,” le hlalosa lerato leo gantši Modimo a le bontšhago bahlanka ba gagwe. Lentšu leo le ka dirišetšwa gape go hlalosa lerato leo bahlanka ba Modimo ba le bontšhanago. (2 Sam. 9:​6, 7) Potego ya rena e ka gola ge nako e dutše e eya. A re boneng gore Daniele o ile a bontšha bjang se. Potego ya Daniele e ile ya lekwa gantši bophelong bja gagwe. E nngwe ya diteko tše dikgolo e diregile ge a be a le mengwageng ya gagwe ya bo 90. Batho ba ka mošate ba be ba sa rate Daniele e bile ba sa hlomphe le Modimo yo a mo hlankelago. Ka gona, ba ile ba loga leano la gore Daniele a bolawe. Ba ile ba dira gore kgoši e ntšhe molao woo o bego o tla dira gore go bonagale gore na Daniele o tla botegela Modimo goba kgoši. Selo feela seo Daniele a bego a swanetše go se dira go bontšha gore o botegela kgoši, e be e le go tlogela go rapela Jehofa ka matšatši a 30. Daniele o ile a kgetha go dula a botegela Jehofa.—Dan. 6:​12-15, 20-22. w23.08 5 ¶10-12

Jehofa o nyaka gore re dule re rata bana babo rena le dikgaetšedi. Ge e ba motho yo mongwe a palelwa ke go bontšha seka se itšego sa Bokriste, re ka no phetha ka gore seo se diregile ka baka la ge a se a phethagala. (Die. 12:18) Modimo o rata bahlanka ba gagwe bao ba botegago le ge ba mo direla diphošo. Ga a dule a re kwatetše ge re mo direla diphošo e bile a ka se tsoge a re lahlile. (Ps. 103:9) Go bohlokwa gore re ekiše Tatago rena yo a lebalelago! (Baef. 4:32–5:1) Ge bofelo bo dutše bo batamela, re swanetše go dula re le kgauswi le bana babo rena le dikgaetšedi. Re ka letela gore tlaišego e oketšege. Re ka golegwa ka baka la tumelo ya rena. Ge seo se ka direga, re tlo hloka bana babo rena le dikgaetšedi go feta le ge e le neng pele.—Die. 17:17. w24.03 15-16 ¶6-7

Beibele e bolela ka baswa bao ba ilego ba hlankela Jehofa e sa le ba banyenyane, a ba rata ke moka ba ba le bophelo bjo bo kgahlišago. Yo mongwe wa baswa bao e be e le Dafida. O ile a kgetha go ba ka lehlakoreng la Jehofa e sa le yo monyenyane, ke moka ka morago a ba kgoši e botegago. (1 Dikg. 3:6; 9:​4, 5; 14:8) O ka kgothatšwa ke go bala ka pego ya bophelo bja Dafida le tsela yeo a hlanketšego Jehofa ka go botega ka yona. Goba o ka ithuta ka mohlala wa Mareka goba wa Timotheo. O tlo bona gore ba ile ba hlankela Jehofa e sa le ba banyenyane gomme a ba amogela. Tsela yeo o phelago ka yona gona bjale e ka kgoma bokamoso bja gago. Ge o ka tshepa Jehofa gomme wa se ithekge ka tlhaologanyo ya gago, o tlo go thuša gore o dire diphetho tše dibotse. Mafelelong o tlo ba le bophelo bjo bo thabišago le bjo bo nago le morero. Gopola gore Jehofa o tšeela godimo dilo tšeo o mo direlago tšona. Ga go na tsela e kaone yeo o ka phelago ka yona go phala ya go hlankela Tatago wa legodimong. w23.09 13 ¶18-19

Moapostola Paulo o be a tseba gore bana babo le dikgaetšedi ba Bakriste ga se ba phethagala. Ka mohlala, ba bangwe ba ile ba thoma go mo ahlola ge a be a thoma go kopanela le phuthego. (Dit. 9:26) Ka morago, ba bangwe ba ile ba bolela ka yena gampe gomme ba mo senya leina. (2 Bakor. 10:10) Paulo o ile a bona mogolo a dira phetho e fošagetšego yeo e ka bago e ile ya kgopiša batho ba bangwe. (Bagal. 2:​11, 12) Le gona Mareka, e lego yo mongwe wa batho bao ba bego ba šoma kgauswi le Paulo o ile a mo nyamiša kudu. (Dit. 15:​37, 38) Paulo nkabe a ile a tlogela go kopanela le phuthego ka baka la dilo tšeo di mo nyamišitšego. Go ena le moo, o ile a dula a lebelela bana babo le dikgaetšedi gabotse gomme a dula a hlankela Jehofa ka mafolofolo. Ke eng seo se thušitšego Paulo gore a kgotlelele? Paulo o be a rata bana babo le dikgaetšedi. Tsela yeo Paulo a bego a rata ba bangwe ka yona e mo thušitše gore a lebelele dika tša bona tše dibotse e sego mafokodi a bona. Le gona, lerato le thušitše Paulo go dira seo go boletšwego ka sona temaneng ya rena ya lehono. w24.03 15 ¶4-5

Dipego tše dintši ka Beibeleng di bontšha bohlokwa bja go ba boleta. Yo mongwe wa batho bao ba ilego ba bontšha boleta ke Isaka. Ge a be a dula Gerara, nageng ya Bafilisita, baagišani ba gagwe bao ba bego ba mo jela mona ba ile ba phušetša didiba tšeo bahlanka ba tatagwe ba bego ba di epile. Go e na le gore Isaka a lwele didiba tšeo le ge e be le tša gagwe, o ile a kgetha go tšea ba ntlo ya gagwe gomme a ya kgole ke moka a epa didiba tše dingwe. (Gen. 26:​12-18) Le gona moo, Bafilisita ba ile ba mmotša gore didiba tšeo di lego moo, ke tša bona. Maemong ao ka moka, Isaka o ile a dula a theošitše maswafo. (Gen. 26:​19-25) Ke eng seo se ilego sa mo thuša gore a dule a le boleta ge batho ba bangwe ba be ba mo hlasela? O swanetše go ba a ile a bona mohlala o mobotse wa batswadi ba gagwe. O ile a ithuta go phedišana le batho ba bangwe ka khutšo go tatagwe e lego Aborahama gomme a ithuta go ba le “moya wo o homotšego le o boleta” go mmagwe e lego Sara.—1 Pet. 3:​4-6; Gen. 21:​22-34. w23.09 15 ¶4

Jehofa ka lerato o ile a romela Morwa wa gagwe yo a tswetšwego a nnoši gore a tle lefaseng a tlo ruta batho ka Mmušo wa gagwe le go neela bophelo bja gagwe gore a re lokolle sebeng le lehung. Ke moka ka morago, Jehofa o ile a tsošetša Jesu legodimong gore a buše e le Kgoši ya Mmušo wa Modimo. Taba e kgolokgolo yeo go bolelwago ka yona ka Beibeleng ke gore leina la Modimo le tlo kgethagatšwa ge a phethagatša morero wa gagwe ka lefase a diriša Mmušo wa gagwe wo o lego ka tlase ga Kriste. Morero wa Jehofa o ka se tsoge o fetogile. O re tshepišitše gore o tlo phethagatša selo se sengwe le se sengwe seo a se boletšego. (Jes. 46:10.; Baheb. 6:​17, 18) Ka nako ya maleba, lefase le tlo dirwa paradeise, moo bana ba Adama le Efa ba tlo thabelago go ‘phela ka mo go sa felego’ ba lokile e bile ba phethagetše. (Ps. 22:26) Jehofa o sa na le morero o mongwe o mogolo go feta woo. Morero wa gagwe o mogolo ke go dira gore bahlanka ba gagwe ka moka ba legodimong le ba lefaseng ba be le botee. Ke moka batho ka moka ba tlo ikokobeletša yena gore e be Mmuši wa bona. (Baef. 1:​8-11) Na ga o thabele tsela ye e kgahlišago yeo Jehofa a phethagatšago morero wa gagwe ka yona? w23.10 20 ¶7-8

Ge Bajuda bao ba tlogilego Babilona ba fihla Jerusalema, go ile gwa feta nako e nyenyane feela ke moka ba thoma go ba le mathata a tša ditšhelete, gwa ba le mathata a dipolotiki nageng yeo e bile ba be ba ganetšwa. Ba bangwe ba ile ba thatafalelwa ke go dira gore go tsošološa tempele ya Jehofa e be selo seo se tlago pele maphelong a bona. Ka gona, Jehofa o ile a romela baporofeta ba babedi e lego Hagai le Sakaria gore ba thuše batho go tsošološa phišego ya bona ya go hlankela Jehofa, e lego seo se ilego sa ba le mafelelo a mabotse. (Hag. 1:1; Sak. 1:1) Eupša mo e ka bago mengwaga e 50 ka morago, Bajuda ba ile ba hloka go kgothatšwa gape. Esera yo e bego e le mongwalolodi wa sethakga wa molao, o ile a tloga Babilona a ya Jerusalema gore a kgothatše batho ba Modimo e le gore ba kgone go dira gore go hlankela Jehofa go tle pele maphelong a bona. (Esera 7:​1, 6) Go swana le ge diporofeto tšeo di neilwego ke Hagai le Sakaria di ile tša thuša batho ba Modimo nakong e fetilego gore ba tšwele pele ba tshepa Jehofa ge ba be ba ganetšwa, le rena di ka re thuša lehono gore re dule re tshepa gore Jehofa o tla re thuša ge re kopana le mathata.—Die. 22:19. w23.11 14-15 ¶2-3

Re ka bontšha bjang badumedigotee le rena gore re a ba rata? Tsela e nngwe yeo re ka dirago seo ka yona ke ka go ba homotša. Re tlo kgona go “tšwela pele re homotšana” ge e ba re na le kwelobohloko. (1 Bathes. 4:18) Re ka bontšha bjang gore re ratana go tšwa pelong? Ka go lebalela ba bangwe diphošo tša bona le ge go ka ba thata go dira bjalo. Ke ka baka la’ng go le bohlokwa kudu lehono gore re ratane? Petro o re nea lebaka, o re: “Bofelo bja dilo tšohle bo batametše. Ka gona, . . . ratanang ka lerato le le tseneletšego.” (1 Pet. 4: 7, 8) Re swanetše go letela’ng ge bofelo bja tshepedišo ye e kgopo ya dilo bo dutše bo batamela? Jesu o ile a botša balatedi ba gagwe gore: “Le tla ba ba hloilwego ke ditšhaba tšohle ka baka la leina la ka.” (Mat. 24:9) Re swanetše go dula re na le botee e le gore re kgone go kgotlelela ge batho ba bangwe ba re hloile. Ge e ba re rata bana babo rena le dikgaetšedi, Sathane a ka se kgone go re aroganya ka gobane re a ratana.—Bafil. 2:​1, 2. w23.11 13 ¶18-19

Therešo yeo e lego ka Lentšung la Modimo e na le matla a magolo. Ge re ruta batho ka Jehofa le ka tsela yeo a lego ka yona, re bona selo se sengwe seo se kgahlišago kudu. Maaka ao Sathane a a rutilego batho a tloga ganyenyane-ganyenyane gomme batho ba thoma go lebelela Tatago rena ka tsela yeo re mo lebelelago ka yona. Ba makatšwa ke matla a gagwe a sa felego. (Jes. 40:26) Ba tshepa gore ke Modimo wa toka. (Doit. 32:4) Ba ithuta dilo tše dintšhi ka bohlale bja gagwe bjo bogolo. (Jes. 55:9; Baroma 11:33) Ba kgothatšwa ke go tseba gore ke lerato. (1 Joh. 4:8) Ge ba dutše ba batamela kgauswi le Jehofa, kholofelo yeo ba nago le yona ya go tlo phela ka mo go sa felego e le bana ba Modimo e ba ya kgonthe go bona. Re na le tokelo e kgolo kudu ya go thuša batho gore ba batamele kgauswi le Tatago bona! Ge re dira bjalo Jehofa o re lebelela re le “bašomigotee le yena.”—1 Bakor. 3:5. w24.02 12 ¶15

Ge e ba o ithuta Beibele le Dihlatse tša Jehofa goba o godišwa ke Dihlatse tša Jehofa, na o nagana ka go kolobetšwa? Ge e ba go le bjalo, o dira gabotse kudu! Le ga go le bjalo pele o ka kolobetšwa o tlo swanelwa ke go ineela go Jehofa. O ineela bjang go Jehofa? O mo tshepiša ka thapelo gore o tlo hlankela yena a nnoši le gore o tlo mo etiša pele bophelong bja gago. Le gona o mo tshepiša le gore o tlo tšwela pele o mo rata “ka pelo ya gago ka moka, ka moya wa gago ka moka, ka monagano wa gago ka moka le ka matla a gago ka moka.” (Mar. 12:30) Ge o ineela go Jehofa o dira seo ka sephiring, mola ge o kolobetšwa o dira seo phatlalatša. O bontšha batho gore o ineetše go Jehofa. Boineelo ke selo se sekgethwa. O swanetše go phelela se o se tshepišitšego Jehofa, e bile Jehofa le yena o letetše gore o dire bjalo.—Mmo. 5:4. w24.03 2 ¶2; 3 ¶5

Manyalo ka moka a na le mathata. Beibele e bolela ka mo go kwagalago gore batho bao ba lego lenyalong ba ba le “tlaišego nameng.” (1 Bakor. 7:28) Ka baka la’ng? Ka gobane lenyalong go tsena batho ba babedi bao ba sa phethagalago, bao ba nago le dika tša go se swane e bile ba rata goba ba sa rate dilo tša go swana. Banyalani ba ka ba ba etšwa ditšong tše sa swanego goba ba godišitšwe ka ditsela tše di sa swanego. Ge nako e dutše e eya, ba ka bontšha dika tšeo molekane yo mongwe a bego a sa di bone pele ba nyalana. Dilo tšeo ka moka di ka dira gore go be le mathata lenyalong. Go e na le gore yo mongwe a bone gore le yena a ka ba a na le phošo gomme ba leke go e lokiša, a ka thoma go bea yo mongwe molato. Ba ka ba ba nagana gore tharollo ya mathata ke go arogana goba go hlalana. Eupša go lahlela toulo ga go lokiše bothata. Jehofa o nyaka gore batho bao ba lego lenyalong ba hlomphe lenyalo le ge go le thata go phedišana le balekane ba bona. w24.03 16 ¶8; 17 ¶11

Ka morago ga gore o ineele go Jehofa le go kolobetšwa, o ile wa tšwela pele o ithuta ka yena le go mo rata kudu gomme wa kgodišega gore dilo tšeo a re tshepišitšego tšona di tlo direga ka nnete. (Baheb. 5:13–6:1) Mohlomongwe o ka ba o ile wa diragalelwa ke seo go bolelwago ka sona go Baroma 5:​2-4. O kile wa ba le mathata a mantšhi, wa a kgotlelela gomme seo sa dira gore Modimo a go amogele. Ka ge o tseba gore Modimo o a go rata, o na le lebaka le legolo leo le dirago gore o tle o hwetše dilo tšeo a re tshepišitšego tšona. O tshepa gore dikholofetšo tšeo Modimo a re tshepišitšego tšona di tlo phethagala go feta kamoo o bego o tshepa ka gona mathomong. Wena ka noši o a bona gore kholofelo ye o nago le yona ke ya kgonthe. Kholofelo ye e tloga e go kgoma. Ka mantšu a mangwe, e kgoma selo se sengwe le se sengwe se o se dirago bophelong le go fetoša tsela ye o swarago ba geno ka yona, diphetho tše o di dirago le kamoo o dirišago nako ya gago ka gona. Moapostola Paulo o bolela ka ntlha e nngwe e bohlokwa ya kholofelo yeo re nago le yona ka morago ga gore Modimo a re amogele. O go kgonthišetša gore dilo tše Modimo a go tshepišitšego tšona di tlo phethagala.—Baroma 15:13. w23.12 12-13 ¶16-19

Ge re na le mathata re ka no se kgone go nagana goba go dira dilo ka tsela yeo re tlwaetšego go di dira ka yona ka mehla. Re ka ikhwetša re tšeatšea ke maikwelo. Jehofa o re thuša bjang ge a bona re ikwa re hlakahlakane ka tsela yeo? O re tshepiša gore o tla re matlafatša. Ge go ka tsoga moya ka lewatleng, sekepe se ka thoma go tšewa ke moya. Dikepe tše dintšhi di na le tshetledi yeo e ka di thušago gore di se ke tša tšewa ke moya. Tshetledi yeo e kgona go dira gore sekepe se seke sa nwelela le go dira gore banamedi ba ikwe ba bolokegile. Eupša tshetledi e kgona go šoma gabotse ge sekepe se sepela. Ka mo go swanago, Jehofa o tlo re matlafatša ge re tšwela pele re mmotegela le go mo hlankela ka go botega le ge re na le mathata. w24.01 22 ¶7-8

Ge o ikwa o tšhoga ipotšiše gore, ‘Ke’ng seo Jehofa a šetšego a se dirile?’ Naganišiša ka dilo tšeo a di bopilego. Ka mohlala ge re “[šetša] ka kelohloko” kamoo Jehofa a hlokomelago dinonyana le matšoba e lego dilo tšeo e sego tša bopša ka seswantšho sa gagwe e bile di sa kgone go mo hlankela, se se tlo re thuša go tshepa gore ka nnete le rena Jehofa o tlo re hlokomela. (Mat. 6:​25-32) Bona gape le seo Jehofa a se diretšego bahlanka ba gagwe. O ka ithuta ka mohlala wa motho wa ka Beibeleng yo a bontšhitšego tumelo goba o ka bala ka phihlelo ya mohlanka wa Jehofa wa lehono. Go oketša moo naganišiša kamoo Jehofa a šetšego a go hlokometše ka gona. O go gogetše bjang therešong? (Joh. 6:44) O arabile bjang dithapelo tša gago? (1 Joh. 5:14) O holwa bjang ke sehlabelo sa Morwa wa gagwe yo a rategago letšatši le lengwe le le lengwe?—Baef. 1:7; Baheb. 4:​14-16. w24.01 4 ¶6; 7 ¶17