‘Tsomang Jehofa, Lena Baikokobetši Bohle’

“NYAKANG Morêna, lena babôtla [“baikokobetši,” NW] bohle ba lefase, lena Le yaxo ka molaô w’axwe. Tsomang tokô, Le tsomê boikokobetšô; mohlomongwê Le ka efošwa mohla woo wa boxale bya Morêna.”—Tsefanya 2:3.

Moporofeta Tsefanya o boletše mantšu ao a a lebišitše go ‘baikokobetši ba lefase,’ gomme o ba kgothaleditše go “tsoma boikokobetšô” e le gore ba tle ba šireletšwe ‘letšatšing la bogale bja Jehofa.’ Se ga se tlogele pelaelo ya gore boikokobetšo ke bjona selo se se nyakegago bakeng sa phološo. Eupja ka baka la’ng?

Ke ka Baka La’ng o Swanetše go Tsoma Boikokobetšo?

Boikokobetšo ke seka sa go ba le semelo sa bonolo, go se be le boikgantšho goba boikgodišo. Bo tswalane kudu le dika tše dingwe, tše bjalo ka go ba le boipoetšo le bonolo. Ka baka leo, batho ba ikokobeditšego ke bao ba ka rutegago gomme ba ikemišeditše go amogela tayo e tšwago seatleng sa Modimo, gaešita lege e ka bonala e le e nyamišago ka nakwana.—Psalme 25:9; Ba-Hebere 12:4-11.

Boikokobetšo ka bobjona ga bo sepedišane kudu le thuto ya motho goba maemo a gagwe bophelong. Lega go le bjalo, bao ba rutegilego kudu goba ba atlegilego ka tsela ya lefase ba bonala ba ikwa gore ba swanelegela go itirela diphetho ka noši selong se sengwe le se sengwe, gaešita le ditabeng tša borapedi. Se se ka ba thibela go dumelela motho yo mongwe a ba ruta se sengwe goba go amogeleng keletšo le go direng diphetogo tše nyakegago maphelong a bona. Ba bangwe bao ba humilego ka dilo tše di bonagalago ba ka wela mokgweng wo o fošagetšego wa go nagana gore polokego ya bona e ithekgile maruong a bona a dilo tše di bonagalago. Ka gona, ba ikwa ba sa nyake mahumo a moya a tšwago Lentšung la Modimo, Beibele.—Mateo 4:4; 5:3; 1 Timotheo 6:17.

Ela hloko ba-mangwalo, Bafarisei le baperisita ba bagolo ba mehleng ya Jesu. Ka nako e nngwe ge ditona tše ba bego ba di romile go yo swara Jesu di boa di se na yena, Bafarisei ba itše: “E se bê le lena Le arošitšwe? A xo na le e mongwê wa baxolo xoba mofarisei e a mo dumetšexo? Ké sethšaba sé sa xo se tsebe Molaô; sôna ké dihlôbôxwa.” (Johane 7:45-49) Ka mantšu a mangwe, go bona, ke feela ba hlokago tsebo le ba sa rutegago bao e bego e tla ba ba hlokago temogo kudu go ka dumela Jesu.

Lega go le bjalo, Bafarisei ba bangwe ba ile ba gogelwa therešong gomme ba ile ba emelela Jesu le Bakriste. Gare ga ba e be e le Nikodemo le Gamaliele. (Johane 7:50-52; Ditiro 5:34-40) Ka morago ga lehu la Jesu, “lešaba le lentši la baperisita la bušwa ke tumêlô.” (Ditiro 6:7) Ka ntle le pelaelo mohlala o mogolo kudu e bile wa moapostola Paulo. O be a rutilwe ka tlase ga tlwaetšo ya Gamaliele gomme o ile a ba mmoleledi yo a nago le bokgoni kudu le yo a hlompšhago wa Bojuda. Lega go le bjalo, ge nako e dutše e e-ya o ile a arabela ka boikokobetšo pitšong ya Kriste Jesu gomme a fetoga molatedi wa gagwe yo mafolofolo.—Ditiro 22:3; 26:4, 5; Ba-Galatia 1:14-24; 1 Timotheo 1:12-16.

Tše ka moka di bontšha gore go sa šetšwe setlogo seo motho a nago le sona goba kamoo motho a ka bago a ikwa ka gona ga bjale ka molaetša wo o tšwago Beibeleng, mantšu a Tsefanya a sa dutše a šoma. Ge e ba motho a nyaka go amogelwa ke Modimo le go hlahlwa ke Lentšu la gagwe, boikokobetšo ke bja bohlokwa kudu.

Bao ba ‘Tsomago Boikokobetšo’ Lehono

Batho ba dimilione go dikologa lefase ba arabela ditabeng tše di lokilego tša Mmušo. Dihlatse tša Jehofa di swara dithuto tša Beibele tša ka godimo ga dimilione tše nne beke le beke magaeng a batho ba bjalo. Ba ba tšwa ditlogong tše dintši le tše fapa-fapanego le maemong a sa swanego a tša boiphedišo le a tša leago. Lega go le bjalo, selo se tee seo ba swanago ka sona ke gore ba na le boikokobetšo bjo bo lekanego go ka amogela molaetša wa Beibele woo motho yo mongwe a ilego a ba nea wona legaeng la bona goba lefelong le lengwe. Ba bantši ba bona ba dira tšwelopele e botse ka gobane ba ikemišeditše go dira boiteko bja go fenya mapheko tseleng ya bona. Ee, ba gare ga ‘baikokobetši ba lefase’ lehono.

Tšea ka mohlala Maria wa Mexico. O ithutile molao yunibesithing gomme e be e le yo a lotegilego ka tša ditšhelete ka baka la bohwa. Ka baka la se, o ile a thoma go ba le dikgopolo tša go itlogelela tšeo di ilego tša mo fetola motho wa “lerabele, yo a se nago mekgwa, yo a ikgogomošago le wa moila-Modimo” go etša ge a bea se ka tsela yeo. Maria o ile a gopola, “Ke ile ka thoma go nagana gore selo se sengwe le se sengwe se be se ka rarollwa ka tšhelete le gore Modimo o be a se bohlokwa. Ge e le gabotse, ke be ke nagana gore le go ba gona ga a gona.” O okeditše ka gore, “Go nna kereke e be e le selo sa bošilo le go fo ba senyakwa sa tša leago.”

Ka morago, Maria o ile a lemoga diphetogo go motswala wa gagwe ka morago ga ge motswala’gwe a bile yo mongwe wa Dihlatse tša Jehofa. Maria o hlalositše ka gore, “O be a kile a ba yo šoro kudu, gomme ga bjale e be e le motho wa khutšo le wa go loka.” “Meloko e boletše gore e be e le moruti a bile a bala Beibele, gomme ka baka la lebaka leo o be a se sa hlwa a e-nwa le go kitima ka morago ga basadi. Ka gona ke be ke nyaka gore a tle gomme a mpalele Beibele ka gobane ke be ke nagana gore ke yona tsela yeo ka yona ke bego ke tla hwetša khutšo le boiketlo tše ke bego ke di nyaka kudu.” Mafelelo e bile a gore Maria o ile a amogela thuto ya Beibele le banyalani ba Dihlatse.

O be a e-na le dilo tše ntši tšeo a bego a swanetše go di fenya gomme go be go le thata kudu go yena go amogela molao wa motheo wa Beibele wa bohlogo e le gore a ikokobeletše monna wa gagwe. Eupja o ile a dira diphetogo tše dikgolo bophelong le kgopolong ya gagwe. O ipobotše ka gore: “Ke nagana gore ga e sa le go tloga ge banabešo ba tlile legaeng la-ka gomme ba tla le thušo ya Jehofa, go bile le lethabo, boiketlo le tšhegofatšo ya Modimo tšeo di lego legaeng la-ka.” Lehono, Maria ke Hlatse yeo e ineetšego le go kolobetšwa ya Jehofa.

Tabeng ya go phegelela borapedi bja therešo, go na le lefelo le lengwe leo go lona boikokobetšo goba go hlaelelwa ke bjona, go kgathago tema e bohlokwa. Gantši kudu, mosadi ka lapeng o amogela therešo gomme a nyake go hlankela Modimo, eupja monna a dika-dike. Mohlomongwe go thata go banna ba bangwe go amogela kgopolo ya gore go na le motho yo mongwe—Jehofa Modimo—yo mosadi wa gagwe ga bjale a swanetšego go ikokobeletša yena. (1 Ba-Korinthe 11:3) Mosadi kua Chihuahua, Mexico, o ile a kgopela thuto ya Beibele gomme ge nako e dutše e e-ya yena le bana ba gagwe ba šupago ba ile ba ba therešong. Mathomong monna wa gagwe o be a ganetša. Ka baka la’ng? Ka gobane o be a sa rate gore lapa la gagwe le ye ka ntlo le ntlo, le sepediša dipuku tša Beibele. Mohlomongwe o be a nagana gore se se mo theola seriti. Lega go le bjalo, lapa la gagwe le ile la ema le tiile phethong ya lona ya go hlankela Modimo. Ge nako e dutše e e-ya, monna o ile a thoma go bona bohlokwa bja go amogela thulaganyo ya Modimo. Eupja nywaga e 15 e ile ya feta pele ga ge a ka ineela go Jehofa.

Go phatša Mexico ka moka, go sa dutše go e na le ditšhaba tše dintši tše di lego lekatana moo badudi ba gona ba nago le maleme a bona a setlogo a se-India le mekgwa. Molaetša wa Beibele o fihlelela batho ba gomme o ba thuša go kaonefatša boemo bja bona bja tša thuto, bjalo ka ge ba bangwe ba ithuta go bala le go ngwala ge ba dutše ba ithuta therešo. Lega go le bjalo, therešo ya gore batho ba na le thuto e nyenyane goba matlotlo a sego nene a dilo tše di bonagalago ga se gore e bolela gore e tla ba ba arabelago kudu. Boikgogomošo bja semorafe le kgokagano e matla le ditšo tša bagologolo ka dinako tše dingwe di dira gore go be thata go ba bangwe go amogela therešo. Se gape se hlalosa lebaka leo ka lona metsaneng e mengwe ya India, bao ba amogelago therešo gantši ba tlaišwa ke badudi ba bangwe ba metsaneng. Ka gona boikokobetšo bo tšea dibopego tše dintši.

Arabela ka Boikokobetšo

Go thwe’ng ka wena ka noši? Na o arabela therešong ya Lentšu la Modimo? Goba na go thata go wena go amogela ditherešo tše dingwe tša Beibele? Mohlomongwe o tla rata go itlhahloba go bona seo se go šitišago. Na o tshwenywa ke taba ya gore bontši bja batho bao ba amogetšego therešo ke ba setlogo sa bobotlana? Na boikgogomošo bja motho ka noši bo ka ba bo akaretšwa tseleng ya gago ya go nagana? Ke mo gobotse go gopola ka mantšu a moapostola Paulo: “Tše Modimo a ikxethetšexo tšôna ké tše lefase le rexo ké tša bošilo, xore a nyatšišê bohlale bya lôna; ó ikxethetše tše lefase le rexo ké tša phôkôlô, xore a nyatšišê tše matla. Modimo ó ikxethetše dinyatšexi, tše bôtlana, tše e sexo selô, xore a fedišê tšeo ba rexo di xôna, xore xo se bê sa nama se se kaxo ikxanthša pele xa xaxwe.”—1 Ba-Korinthe 1:27-29.

Na o be o ka gana lehumo fela ka gobane o le hweditše ka seswarong sa letsopa se se nyatšegago? Ruri o ka se dire bjalo! Eupja, yeo ke yona tsela ye Modimo a kgethago go tšweletša Lentšu la gagwe le phološago bophelo la therešo go rena, bjalo ka ge moapostola Paulo a hlalosa: “Lehumô leo re le swere ka dibya tša letsopa; xore matla a maxolo e bê a Modimo, e sexo a rena.” (2 Ba-Korinthe 4:7) Boikokobetšo le boipoetšo di tla re dira gore re kgone go bona bohlokwa bja kgonthe bja lehumo, e sego feela “dibya tša letsopa,” goba didirišwa tšeo e lego batho tšeo di le fetišetšago go rena. Ka go dira bjalo, re tla oketša gape le kgonagalo ya go ba ga rena bao ba kago go “efošwa mohla woo wa boxale bya Morêna” le go ba gare ga ba ikokobeditšego ba ‘ba tlogo tšea lefase ya ba kabelo ya bona.’—Tsefanya 2:3; Mateo 5:5.