Thabela Tirelo ya Gago e Kgethwa

GO FIHLELELA pakane lege e le efe ya bohlokwa, re swanetše go ikemišetša go dira boikgafo. Go ba ngaka ya tša kalafo go tšea nywaga e mentši ya thuto le boikemišetšo, gaešita le tšhelete. Sebapadi sa dipapadi tša go laetša matla a mmele se dirišitše nako e kgolo ya bofsa bja sona se katanela mediro ya ka mehla e thata kudu le yeo e tšwelago pele boitekong bja go se hwe matwa bja go fihlelela phethego. Moletši wa piano yo a kgonago ka mo go swanago a ka lebelela morago nywageng ya tlwaetšo ya boikgafo.

Lega go le bjalo, go na le pakane e tee yeo e tlišago meputso e megolo kudu go feta boikgafo lege e le bofe bjo bo swanetšego go lefša. Pakane yeo ke efe? Ke tokelo ya go ba mohlanka wa Yo Godimo-dimo, Jehofa Modimo. Go sa šetšwe boikgafo lege e le bofe bjo re bo dirago ka sebopego sa nako, tšhelete goba matla, tokelo ya go nea Mmopi wa rena tirelo e kgethwa e tliša meputso yeo e ka se bapetšwego. Mantšu a moapostola Paulo ke a therešo: “Se se holaxo xohle ké borapedi ka xe bo na le kholofedišô ya bophelo byono le ya byo bo tl’o xo tla.” (1 Timotheo 4:8) Anke re boneng kamoo seo e lego sa therešo ka gona.

Ge re Ithuta ka Lekga la Pele ka Modimo

Ba bantši bao ba arabelago gabotse ditabeng tše di lokilego gomme ba thoma go ithuta Beibele, go bonala ba sa lemoge bogolo bja diphetogo tšeo di tlago go tšwelela maphelong a bona. Sa pele, moithuti yo mofsa wa Beibele a ka lahlegelwa ke bagwera ba bangwe bao ba sa kwešišego lebaka leo ka lona a se sa hlwago a dirišana le bona medirong yeo ga bjale a e lemogago e le yeo e hlomphollago Modimo. (1 Petro 4:4) Ba bangwe ba ka lebeletšana le kganetšo ya lapa gomme ba ka kwešwa bohloko ke go bona bao ba ba ratago ba bontšha go se rate, gaešita le lehloyo bakeng sa Jehofa. (Mateo 10:36) Seo e ka ba boikgafo bjo thata.

Mošomong goba sekolong, le gona go tla ba le boikgafo bjo bo swanetšego go dirwa. Moithuti yo mofsa wa Beibele ge nako e dutše e e-ya o tla kgaotša go kopanela meletlong ya lefase goba menyanyeng e mengwe. A ka se sa hlwa a theetša polelo e sa hlwekago ya bašomi-gotee le yena goba ba a tsenago le bona sekolo, le gona a ka se sa hlwa a sa abelana le bona metlae e lešago dihlong. Go e na le moo, o tla leka go diriša keletšo yeo e hwetšwago go Ba-Efeso 5:3, 4 e rego: “Xe e le bootswa, le dithšila ka moka, le mexabaru, tše byalo le xo bolêlwa di se ke tša bolêlwa mo xo lena; ké sôna se se swanetšexo bakxêthwa. Le tša dihlong di se kê tša ba xôna, le dipolêlo tša bošilo, le metlaê e sa lokaxo. A xo atišê xo kwala teboxô.”

Diphetogo tše bjalo di ka dira moithuti wa Beibele gore e be tšhika noši. Seo e ka ba se thata, kudu-kudu go mofsa yo a sa lego sekolong. Ka go swanela go lebeletšana le matšatši a maikhutšo ka go latelana, gotee le dithuto tšeo e sego tša Modimo tša go swana le tlhagelelo le kgateletšo ya ka mehla ya gore o ye le mogofe, Bakriste bao e sa lego bafsa ba swanetše go lwela tumelo ya bona ka mehla. Go latela ditsela tša Modimo go tla ba dira ba ba fapanego gomme go ka feleletša ka go kwerwa ke bao ba tsenago le bona ka klaseng le ke barutiši. Se e tloga e le se thata go se amogela kudu-kudu nakong ya nywaga e kgomegago kudu ya bofsa, eupja kamogelo ya Modimo e swanelwa ke boikgafo bjoo.

Na Ruri e Tloga e le Boikgafo?

Dilo tše dingwe tšeo pele di bonagalago e le boikgafo di feleletša e le ditšhegofatšo. Ba bangwe ba swanelwa ke go kgaotša mokgwa wa go diriša motšoko. (2 Ba-Korinthe 7:1) Se e ka ba katano, eupja e ba tšhegofatšo e kgolo gakaakang ge mokgwa woo o mobe o hlaswegago o fentšwe mafelelong! Go ka bolelwa se swanago mabapi le go fenya go lemalela dihlare-tagi tše dingwe goba bjala. Bophelo ke bjo bokaone gakaakang ge go se na mekgwa e bjalo e senyago! Ba bangwe ba ile ba swanelwa ke go lokiša ditaba tša bona tša manyalo. Bao ba dulago gotee ka ntle le mohola wa lenyalo ba swanetše go nyalana goba go kgaotša go dula gotee. (Ba-Hebere 13:4) Bao ba dulago le basadi ba bantši ba swanetše go kgomarela mosadi wa bofsa bja bona feela. (Diema 5:18) Ditokišo tše bjalo di akaretša boikgafo, eupja di tliša khutšo ka gae.

Nagana ka Meputso

Ruri, motho lege e le ofe yo a kwago melao ya Jehofa o holega e le ka kgonthe. Ka lekga la pele bophelong bja gagwe, moithuti wa Beibele a ka thoma go bitša Mmopi wa gagwe ka leina la Gagwe, Jehofa. (Psalme 68:4) Moithuti o thoma go rata Jehofa ge a dutše a ithuta ka dilo tše kgahlišago tšeo A di dirilego le tšeo a sa tlago go di direla batho. Dinageng tšeo go tšona poifo ya bahu e lego e tlwaelegilego, o lebala ka poifo ye ya tumela-khwele a tseba gore bahu ba robetše, ba letetše tsogo. (Mmoledi 9:5, 10) Le gona, a kimollo e kaakang go tseba gore Jehofa ga a hlokofatše batho ka mo go sa felego diheleng! Ee, therešo ka kgonthe e a mo lokolla.—Johane 8:32.

Ge morutwana a dutše a dumelelanya bophelo bja gagwe ka mo go tšwelago pele le ditekanyetšo tša Jehofa, o hwetša letswalo le le hlwekilego le boitlhompho. Go ithuta go phela bjalo ka Mokriste wa therešo go mo thuša go hlokomela lapa la gagwe kaone, e lego seo se tlišago kgotsofalo e kgolo le lethabo. Ka morago, go na le taba ya go ba gona dibokeng Holong ya Mmušo. A phihlelo e kgahlišago gakaakang! Mo go na le batho bao ruri ba dirišago lerato le borutho leo Beibele e bolelago gore le swanetše go hlaola batho ba Modimo. (Psalme 133:1; Johane 13:35) Polelo ya bona ke e hlwekilego le e agago ge ba bolela “matete a Modimo.” (Ditiro 2:11) Ee, go ikopanya le “mokgatlo ka moka wa banababo rena” ke mothopo wa lethabo. (1 Petro 2:17, NW) Bogwera bjo bo bjalo bjo bobotse bo thuša morutwana wa Beibele go ‘apara motho e mofsa, e a bopetšwego go etša Modimo go lokeng le kgethegong ya makgonthe.’—Ba-Efeso 4:24.

Mogato wa Boineelo

Ge motho a dutše a tšwela pele tsebong, mafelelong o tutuetšwa ke lerato bakeng sa Jehofa go neela bophelo bja gagwe go yena le go bontšha boineelo bjo ka kolobetšo ya meetseng. (Mateo 28:19, 20) Keletšo ya Jesu ke gore pele morutiwa wa gagwe a gata mogato wo, o swanetše go bala ditshenyagalelo. (Luka 14:28) Gopola, Mokriste yo a ineetšego o bea thato ya Jehofa pele gomme a furalela dilo tša nama. O šoma ka thata go furalela “medirô ya nama” gomme a hlagolela “dienywa tša Môya.” (Ba-Galatia 5:19-24) Keletšo yeo e hwetšwago go Ba-Roma 12:2 ga bjale e phetha karolo e tletšego bophelong bja gagwe: “Le se kê la ipapetša le ba mehla yeno; šatoxang ka xo mphsafala kxopolô, xore Le tlê Le hlaoloxanyê se e lexo thatô ya Modimo, e lexo se botse le se se kxahlišaxo, se e lexo sa botlalô.” Ka go rialo, Mokriste yo a ineetšego o phela bophelo bja gagwe ka maikwelo a mpshafaditšwego a go ba le morero.

Lega go le bjalo, hlokomela seo a se amogelago. Gare ga dilo tše dingwe, ga bjale o na le tswalano ya motho ka noši le Mmopi wa legohle. O bolelwa e le yo a lokilego ge e le ka go ba mogwera wa Modimo! (Jakobo 2:23) Ka kwešišo e tseneletšego kudu, o bitša Modimo e le “Tata-wešo wa maxodimong.” (Mateo 6:9) Tšhegofatšo e nngwe bakeng sa motho yo a sa tšwago go ineela ke go tseba gore bophelo bo na le morero e le ka kgonthe, le gore o phela bophelo bja gagwe ka go dumelelana le morero woo. (Mmoledi 12:13) Ka go latela mohlala wa Jesu, a ka hlatsela Diabolo e le moaketši ka go dula a botega. Seo se tliša lethabo le lekaakang pelong ya Jehofa!—Diema 27:11.

Ee, ge Mokriste a dutše a kgotlelela tseleng ya go botega, go na le boikgafo bjo bo oketšegilego bjo bo swanetšego go dirwa. Go nyakega nako gore o swarege thutong e nago le morero ya motho ka noši le ya phuthego ya Lentšu la Modimo. (Psalme 1:1-3; Ba-Hebere 10:25) Nako bakeng sa bodiredi bja tšhemo e swanetše go rekwa medirong e mengwe. (Ba-Efeso 5:16) Nako le boiteko le tšona di a nyakega gore o be gona dibokeng tša Dihlatse tša Jehofa le go ya dikopanong tša tšona tše dinyenyane le tše dikgolo. Go ka nyakega boikgafo go ba le karolo go thekgeng Holo ya Mmušo ka tša ditšhelete le modiro wa boboledi wa lefase ka bophara. Lega go le bjalo, go etša ge dimilione tša Bakriste di ka hlatsela seo, go ba le karolo ka pelo ka moka dilong tše bjalo go tliša lethabo. Jesu o itše: “Lešexo la monei le phala la monewa.”—Ditiro 20:35.

Meputso ya go thekga modiro wa Jehofa e ba yeo e fetago kgole kudu ditshenyagalelo. Ge re dutše re gola tsebong, bodiredi bja rena e ba bjo bo enywago kudu le bjo bo thabišago. Ka kgonthe, ga go selo seo se ka tlišago kgotsofalo e kgolo kudu go feta go ruta motho yo mongwe therešo ya Beibele le go bona motho yoo a amogela borapedi bja Jehofa. Le gona ge e ba morapedi yo mofsa e le setho sa lapa, mohlomongwe e le ngwana yo a tlwaeditšwego ka ‘thuto le keletšo ya Morena,’ seo se tliša lethabo le le kgethegilego. (Ba-Efeso 6:4) Re bona ditšhegofatšo tše di humilego tša Modimo maitekong a rena a go ba “badirišani ba gagwe.”—1 Ba-Korinthe 3:9.

Ditšhegofatšo tše Dingwe tša Tirelo e Botegago

Ke therešo gore re tla ba le mathata ge feela tshepedišo ye ya dilo e sa le gona. Go bonala mathata e tla ba a šoro kudu ge nako ya Diabolo e dutše e e-ba e kopana. Mo gongwe re ka swanelwa ke go welwa ke tlaišo goba ra kgotlelela teko. Eupja tsebo ya gore Modimo o na le rena e a re homotša gomme ya re nea matla a go kgotlelela. (1 Ba-Korinthe 10:13; 2 Timotheo 3:12) Bakriste ba bangwe gotee le rena ba kgotleletše nywaga e mentši ya tshwaro e sehlogo, eupja ba ile ba kgotlelela ka baka la lerato la bona la go rata Modimo. Bao ba kgotlelelago diteko tša mehuta e fapanego ka katlego ba ikwa go etša kamoo baapostola ba ilego ba ikwa ka gona ge ba be ba bethwa gomme ka morago ba lokollwa. Ditiro 5:41 e a laodiša: “Baapostola ba tloxa moo bà thabile ka xo re, xe ba xobošitšwe ka ’baka la Leina la Jesu, ké xôna xe ba xodišitšwe.”

Moputso bakeng sa go kgotlelela o feta kgole tshenyagalelo gaešita le mo nakong ye. Eupja gopola, boineelo go Modimo “bo na le kholofedišô” e sego feela “ya bophelô byono,” eupja gape “le ya byo bo tl’o xo tla.” (1 Timotheo 4:8) Ditšhegofatšo tša yo a kgotlelelago ke tše di humilego gakaakang! Ge e ba o botega, o tla phologa masetla-pelo a magolo ao a swayago bofelo bja tshepedišo ye ya dilo. Goba ge e ba o e-hwa pele ga tiragalo yeo e tlago go dira histori, o tla tsošetšwa lefaseng le lefsa leo le tlago go latela. (Daniele 12:1; Johane 11:23-25) Anke o nagane ka maikwelo a tlhalalo ao o tlago go ba le ona ka nako yeo ge o kgona go bolela gore: “Ka thušo ya Jehofa, ke kgonne!” Ke mo go kgahlišago gakaakang go ba le kabelo lefaseng leo, leo ‘go tseba Morena go tlogo go tlala lefase lohle boka meetse ge a nabile lewatleng.’—Jesaya 11:9.

Ee, go nyakega se se itšego go hlankela Modimo. Eupja ge go bapetšwa le meputso, seo re se gafago ke se senyenyane kudu. (Ba-Filipi 3:7, 8) Ka baka la sohle seo Modimo a se direlago bahlanka ba gagwe mo nakong ye le seo a sa tlogo go se dira nakong e tlago, re bušeletša mantšu a mopsalme a rego: “Morêna ke tlo mo leboxa ka’ng tše di botse tšohle tše a ntiretšexo tšôna?”—Psalme 116:12.