“Le bê Bakxêthwa Ditseleng tša Lena ka Moka”

“Bang ba bakxêthwa ka xo etša Mokxêthwa Eo a Le biditšexo; Le bê bakxêthwa ditseleng tša lena ka moka. Xobane xo ngwadilwe xwa thwe: Bang ba bakxêthwa, xobane Nna ke e Mokxêthwa.”—1 PETRO 1:15, 16.

1. Ke ka baka la’ng Petro a ile a kgothaletša Bakriste gore e be ba bakgethwa?

KE KA baka la’ng moapostola Petro a ile a nea keletšo e lego ka mo godimo? Ka gobane o ile a bona go nyakega ga gore Mokriste yo mongwe le yo mongwe a diše dikgopolo le ditiro tša gagwe gore a di dumelelanye le bokgethwa bja Jehofa. Ka go rialo, pele ga mantšu a lego ka mo godimo o itše: “Itlemeng mathêka kxopolong ya lena, Le phelê Lè phafoxile . . . Le bê bana ba ba kwaxo, Le lesê xo kêka le tšela tša kxalê tša dikxanyoxô tša mola Lè sa le ba xo se tsebe.”—1 Petro 1:13, 14.

2. Ke ka baka la’ng dikganyogo tša rena e be e se tše kgethwa pele re ithuta therešo?

² Dikganyogo tša rena tša nakong e fetilego e be e se tše kgethwa. Ka baka la’ng? Ka gobane bontši bja rena re be re latela tsela ya lefase ya go dira dilo pele re amogela therešo ya Bokriste. Petro o be a tseba se ge a be a ngwala ka go lebanya gore: “Xa xo sa nyakwa tša mehla ye e fetilexo, tša xe re sa dira tše di ratwaxo ke ba-ntlê tša xo kêka le maiphsinô le dikxanyoxô le botaxwa le bohori le xo nwa, le mekxwa ye e rônaxo ya xo dirêla medimo e šele.” Ee, Petro ga se a bolela ka ditiro tšeo e sego tše kgethwa tšeo di diregago lefaseng la mehleng ya rena, ka gobane di be di sa tsebje ka nako yeo.—1 Petro 4:3, 4.

3, 4. (a) Re ka lwantšha bjang dikganyogo tše fošagetšego? (b) Na Bakriste e swanetše go ba ba sa kgomegego? Hlalosa.

³ Na o lemogile gore dikganyogo tše ke tšeo di ipiletšago nameng, dikwing le maikwelong? Ge re dumelela dilo tše di gola, dikgopolo le ditiro tša rena e ba gabonolo kudu tšeo e sego tše kgethwa. Se se bontšha go nyakega ga go dumelela matla a go nagana a laola ditiro tša rena. Paulo o hlalositše se ka tsela ye: “Ka gona banabešo ke a le lopa ka dikgaugelo tša Modimo, gore le neele mebele ya lena e le sehlabelo se se phelago, se sekgethwa, se se amogelegago go Modimo, e lego tirelo e kgethwa yeo e dirwago ka matla a lena a go nagana.”—Ba-Roma 12:1, 2, NW.

⁴ Gore re neele Modimo sehlabelo se sekgethwa, re swanetše go dumelela matla a go nagana gore a gole, e sego maikwelo. Ke batho ba bantši gakaakang bao ba ilego ba wela boitshwarong bjo bo gobogilego ka gobane ba ile ba dumelela maikwelo a bona a laola boitshwaro bja bona! Seo ga se bolele gore maikwelo a rena a swanetše go gateletšwa; go e na le moo, re ka bontšha bjang lethabo tirelong ya Jehofa? Lega go le bjalo, ge e ba re nyaka go tšweletša dienywa tša moya go e na le mediro ya nama, gona re swanetše go dumelelanya menagano ya rena le tsela ya Kriste ya go nagana.—Ba-Galatia 5:22, 23; Ba-Filipi 2:5.

Bophelo bjo Bokgethwa, Moputso o Mokgethwa

5. Ke ka baka la’ng Petro a be a tshwenyegile ka go nyakega ga bokgethwa?

⁵ Ke ka baka la’ng Petro a be a tshwenyegile gakaakaa ka go nyakega ga bokgethwa bja Bokriste? Ka gobane o be a lemoga gabotse moputso o mokgethwa wo o bego o lefilwe bakeng sa go lopolla batho ba kwago. O ngwadile gore: “Le tsebê xore, tseleng yeo ya lena ya lefêla, ye Le e tšerexo xo bô-tata-weno, xa La ka la hunollwa ka tše di fêlêlaxo bo-ka xauta le silifêra, Le hunolotšwe ka madi a thêkô e kxolo a Kriste, a Yêna Kwana e se naxo senyalô le bosodi.” (1 Petro 1:18, 19) Ee, Mothopo wa bokgethwa e lego Jehofa Modimo, o be a rometše Morwa wa gagwe yo a tswetšwego a nnoši, e lego “Mokgethwa” lefaseng go tla go lefa topollo yeo e bego e tla dumelela batho gore ba be le tswalano e botse le Modimo.—Johane 3:16; 6:69, NW; Ekisodo 28:36; Mateo 20:28.

6. (a) Ke ka baka la’ng go se bonolo go rena go phegelela boitshwaro bjo bokgethwa? (b) Ke’ng seo se ka re thušago go boloka boitshwaro bja rena e le bjo bokgethwa?

⁶ Lega go le bjalo, re swanetše go lemoga gore ga go bonolo go phela bophelo bjo bokgethwa mola re le gare ga lefase la Sathane le le gobogilego. O beela Bakriste ba therešo bao ba lekago go phela tshepedišong ya gagwe ya dilo mereo. (Ba-Efeso 6:12; 1 Timotheo 6:9, 10) Dikgateletšo tša modiro wa boiphedišo, tša kganetšo ya ka lapeng, tša go kwerwa sekolong le kgateletšo ya dithaka di dira gore go nyakege boemo bjo bo tiilego bja moya gore motho a kgomarele bokgethwa. Seo se gatelela karolo e bohlokwa ya thuto ya rena ya motho ka noši le go ba gona ga rena ka mehla dibokeng tša Bokriste. Paulo o eleditše Timotheo ka gore: “Mantšu ao a se naxo senyalô, a O a kwilexo xo nna, O tšeê ka mohlala wa ôna, ka tumêlô le ka leratô, le re le hwetšaxo xo Jesu Kriste.” (2 Timotheo 1:13) Re kwa mantšu ao a neago bophelo bjo bobotse Holong ya rena ya Mmušo le thutong ya rena ya motho ka noši ya Beibele. A ka re thuša go ba ba bakgethwa boitshwarong bja rena letšatši le letšatši maemong a mantši a fapanego.

Boitshwaro bjo Bokgethwa ka Lapeng

7. Bokgethwa bo swanetše go kgoma bjang bophelo bja lapa la rena?

⁷ Ge Petro a be a tsopola Lefitiko 11:44, o dirišitše lentšu la Segerika haʹgi·os, leo le bolelago “go arogana le sebe ka go rialo wa kgethelwa Modimo, selo se sekgethwa.” (An Expository Dictionary of New Testament Words, ka W. E. Vine) Se se swanetše go re kgoma bjang bophelong bja rena bja lapa la Bokriste? Bo swanetše go bolela e le ka kgonthe gore bophelo bja rena bja lapa bo swanetše go thewa leratong, ka gobane “Modimo ké Yêna leratô.” (1 Johane 4:8) Lerato la boikgafo ke oli yeo e nolofatšago ditswalano magareng ga banyalani le magareng ga batswadi le bana.—1 Ba-Korinthe 13:4-8; Ba-Efeso 5:28, 29, 33; 6:4; Ba-Kolose 3:18, 21.

8, 9. (a) Ke boemo bofe bjoo ka dinako tše dingwe bo tšwelelago legaeng la Bokriste? (b) Beibele e nea keletšo efe e kwalago tabeng ye?

⁸ Mohlomongwe re ka nagana gore go bontšha lerato le bjalo go tla itlela feela ka lapeng la Bokriste. Lega go le bjalo, go swanetše go dumelwa gore lerato ga se ka mehla le bušago ka tekanyo yeo le swanetšego go buša ka yona magaeng a mangwe a Bokriste. Mohlomongwe le ka bonala le le bjalo Holong ya Mmušo, eupša bokgethwa bja rena bo ka fokotšega gabonolo kudu ka gae. Ka gona re ka lebala gatee-tee gore mosadi e sa le kgaetšedi ya rena ya Mokriste goba gore monna e sa le yena ngwanabo rena (mohlomongwe le mohlanka wa bodiredi goba mogolo) yola a bonagetšego a hlompšha Holong ya Mmušo. Re a tenega gomme dingangišano tše bogale di ka rotoga. Go ka ba gwa ba le tekanyetšo e šomago gabedi maphelong a rena re sa lemoge. Ga e sa hlwa e le tswalano ya monna yo a swanago le Kriste le mosadi, eupša e fo ba monna le mosadi ba ba sa kwanego. Ba a lebala gore go swanetše go ba le moya wa bokgethwa ka gae. Mohlomongwe ba thoma go bolela bjalo ka batho ba lefase. Go ka ba bonolo gakaakang ka nako yeo gore polelo e mpe le ya go kodutla e tšwe molomong!—Diema 12:18; bapiša le Ditiro 15:37-39.

⁹ Lega go le bjalo, Paulo o eletša ka gore: “Melomong ya lena xo se kê xwa tšwa lentšu le lebe [Segerika, loʹgos sa·prosʹ, “polelo e šilafatšago,” ka go rialo e se e kgethwa]; a xo tšwê le boló la xo iša kaxišô mo e hlaêlaxo, le išê thšexofatšô xo ba ba le kwaxo.” Seo se šupa go bakwi ka moka ba lego ka gae, go akaretša le bana.—Ba-Efeso 4:29; Jakobo 3:8-10.

10. Keletšo e lego mabapi le bokgethwa e šoma bjang go bana?

¹⁰ Bjale keletšo ye yeo e lego mabapi le bokgethwa e šoma ka mo go swanago le go bana ka lapeng la Bokriste. Go bonolo gakaakang go bona gore ba tle gae ba e-tšwa sekolong gomme ba thome go ekiša polelo ya borabele le ya lenyatšo ya dithaka tša bona tša lefase! Bana, le se ke la goketšwa ke boemo bja kgopolo bjo bo bontšhitšwego ke bašemane ba se nago mekgwa bao ba ilego ba roga moporofeta wa Jehofa le bao ba nago le dipolelo tše di hlaswegago tša maroga bao ba swanago le bona lehono. (2 Dikxoši 2:23, 24) Polelo ya lena ga se ya swanela go šilafatšwa ke polelo e gobogilego ya setarateng ya batho bao ba tšwafago kudu goba ba sa naganelego ba bangwe ka go diriša mantšu a hlomphegago. Ka ge re le Bakriste, polelo ya rena e swanetše go ba e kgethwa, e kgahlišago, e agago, ya botho le e “nokilwexo letswai.” E swanetše go re hlaola re le ba fapanego le batho ba bangwe.—Ba-Kolose 3:8-10; 4:6.

Bokgethwa le Ditho tša Lapa la Rena Tšeo di sa Dumelego

11. Ke ka baka la’ng go ba ba bakgethwa go sa bolele go ba ba itirago baloki?

¹¹ Ge re dutše re leka ka kelohloko go bontšha bokgethwa, ga se ra swanela go bonala re ikgodiša le go itira baloki, kudu-kudu ge re dirišana le ditho tša lapa tšeo di sa dumelego. Boitshwaro bja rena bja botho bja Bokriste bonyenyane bo swanetše go ba thuša go lemoga gore re ba fapanego ka tsela e holago, gore re tseba go bontšha lerato le kwelobohloko go etša ge go dirile mo-Samaria wa kgaugelo wa seswantšhong sa Jesu.—Luka 10:30-37.

12. Balekane ba Bakriste ba ka dira bjang gore therešo e be e ipiletšago kudu go balekane ba bona?

¹² Petro o gateletše bohlokwa bja boemo bjo bo swanetšego bja kgopolo go ditho tša lapa la rena tšeo di sa dumelego ge a be a ngwalela basadi ba Bakriste gore: “Le lena Basadi, bušwang ke banna ba lena, xore xe xo na le ba ba xanaxo xo kwa Lentšu, ba tlê ba ruiwê ka xo bôna tsela ye e swerwexo ke basadi, xò se lentšu le le bolêlwaxo, xe ba lemoxile tsela ya lena è le ya xo boifa le xo ila thšila.” Mosadi wa Mokriste (goba monna tabeng yeo) a ka dira gore therešo e be yeo e ipiletšago kudu go molekane yo a sa dumelego ge e ba boitshwaro bja gagwe e le bjo bo sekilego, bja go naganela le bja tlhompho. Se se bolela gore lenaneo la pušo ya Modimo le swanetše go ba le le kobegelago ka mathokong ohle e le gore molekane yo a sa dumelego a se ke a nyatšwa goba a hlokomologwa.a—1 Petro 3:1, 2.

13. Bagolo le bahlanka ba bodiredi ka dinako tše dingwe ba ka thuša bjang banna ba sa dumelego gore ba thabele therešo?

¹³ Bagolo le bahlanka ba bodiredi ka dinako tše dingwe ba ka thuša ka go tseba monna yo a sa dumelego motheong wa bogwera. Ka tsela ye a ka bona gore Dihlatse ke batho ba tlwaelegilego, ba hlomphegago bao ba kgahlegelago dilo tše di fapa-fapanego, go akaretša le ditaba tše dingwe ka ntle le Beibele. Boemong bjo bongwe, mogolo o ile a kgahlegela modiro wa go itloša bodutu wa go rea dihlapi wa monna. E be e le mo go lekanego go fenya lepheko. Mafelelong monna yoo e ile ya ba ngwanabo rena yo a kolobeditšwego. Boemong bjo bongwe gape, monna yo a sa dumelego o be a kgahlegela dithaga tše dinyenyane. Bagolo ga se ba ka ba lahlela toulo. Yo mongwe wa bona o ile a ithuta ka taba ya tšona e le gore nakong e tlago ge a gahlana le monna yo, a kgone go thoma poledišano ka taba yeo e ratwago kudu ke monna yoo! Ka gona, go ba ba bakgethwa ga go bolele go ba ba thata goba go naganela kgaufsi.—1 Ba-Korinthe 9:20-23.

Re ka ba ba Bakgethwa Bjang ka Phuthegong?

14. (a) O mongwe wa mekgwa ya Sathane ya go fokodiša phuthego ke ofe? (b) Re ka ganetša bjang moreo wa Sathane?

¹⁴ Sathane Diabolo ke mothomeletši ka gobane leina la Segerika bakeng sa Diabolo, e lego di·aʹbo·los le bolela “mmegi” goba “mothomeletši.” Go thomeletša ke e nngwe ya dilo tšeo a di kgonago kudu gomme o leka go go diriša ka phuthegong. Mokgwa wa gagwe o rategago kudu ke lesebo. Na re itumelela go ba bahlaselwa ba gagwe ba bonolo boitshwarong bjo bjo e sego bjo bokgethwa? Seo se ka direga bjang? Ka go le thoma, ka go le boeletša goba ka go le theetša. Seema se bohlale se re: “Monna-moradia ó lohlanya batho; [mothomeletši, NW] ó amolla le baxwêra ba bohloko.” (Diema 16:28) Sehlare sa lesebo le go thomeletša ke eng? Re swanetše go kgonthišetša gore polelo ya rena ka mehla ke e agago le e theilwego leratong. Ge e ba re tsoma bothakga go e na le tšeo go thwego ke makgopo a banababo rena, poledišano ya rena e tla ba e kgahlišago ka mehla le ya moya. Gopola gore go ntšha diphošo go bonolo. Le gona, motho yo a sebago ba bangwe go wena a ka seba ka wena go ba bangwe!—1 Timotheo 5:13; Tito 2:3.

15. Ke dika dife tša go swana le tša Kriste tšeo di tlago go thuša gore bohle ka phuthegong e dule e le ba bakgethwa?

¹⁵ Gore re boloke phuthego e le e kgethwa, ka moka ga rena re swanetše go ba le kgopolo ya Kriste gomme re a tseba gore seka sa gagwe se segolo ke lerato. Ka go rialo, Paulo o ile a eletša ba-Kolose gore ba be le kwelobohloko go swana le Kriste ka gore: “Byale, Lè le bahlaolwa ba Modimo, Lè le bakxêthwa le baratiwa, aparang kxauxêlô le botho le boikokobetšô le bolêta le xo se fêle pelo . . . , Le lebalêlanê . . . Se sexolo mo xo tšeo ka moka ké xore Le aparê leratô, yôna tlêmô ya botlalô.” Ka morago o ile a oketša ka gore: “Mo dipelong tša lena xo bušê khutšô ya [Kriste, NW].” Ruri ge re e-na le moya wo wa go lebalela, re ka kgomarela botee le bokgethwa bja phuthego.—Ba-Kolose 3:12-15.

Na Bokgethwa bja Rena bo a Bonagala Tikologong ya Gabo Rena?

16. Ke ka baka la’ng borapedi bja rena bjo bokgethwa e swanetše go ba borapedi bja lethabo?

¹⁶ Go thwe’ng ka baagišani ba rena? Ba re lebelela bjang? Na re phadimiša lethabo la therešo, goba re dira gore e bonale e le morwalo? Ge e ba re le ba bakgethwa go etša ge Jehofa e le yo mokgethwa, gona go swanetše go bonala polelong ya rena le boitshwarong bja rena. Go swanetše go bonala gore borapedi bja rena bjo bokgethwa ke borapedi bja lethabo. Ke ka baka la’ng go le bjalo? Ka gobane Jehofa Modimo wa rena ke Modimo yo a thabilego, yo a nyakago gore barapedi ba gagwe ba hlalale. Ka go rialo, mopsalme o be a ka bolela ka batho ba Jehofa ba mehleng ya bogologolo gore: “Go [thabile, NW] setšhaba seo Jehofa e lego Modimo wa sona.” Na re bonagatša lethabo leo? Na bana ba rena le bona ba bontšha kgotsofalo ya go ba gare ga batho ba Jehofa Holong ya Mmušo le dikopanong?—Psalme 89:15, 16; 144:15b, PK.

17. Ke’ng seo re ka se dirago ka tsela e šomago bakeng sa go bontšha bokgethwa bjo bo leka-lekanego?

¹⁷ Re ka bontšha bokgethwa bja rena bjo bo leka-lekanego ka moya wa rena wa tirišano le botho bja kagišano. Ka dinako tše dingwe go a nyakega gore baagišani ba swarišane, mohlomongwe ka go hlwekiša tikologo goba go etša dinageng tše dingwe, go thuša go kaonefatša ditsela. Tabeng ye, bokgethwa bja rena bo ka bonala kamoo re hlokomelago dirapana tša rena, dijarata goba le dithoto tše dingwe ka gona. Ge e ba re tlogela ditlakala di phatlaletše gohle goba re e-na le jarata e sa hlwekago le e hlaka-hlakanego, mohlomongwe e bile e e-na le dikoloi tša kgale tše di senyegilego moo di bonwago ke bohle, na re ka bolela gore re swara baagišani ba rena ka tlhompho?—Kutollo 11:18.

Bokgethwa Mošomong le Sekolong

18. (a) Ke boemo bofe bjo thata bakeng sa Bakriste lehono? (b) Re ka ba ba fapanego le lefase bjang?

¹⁸ Moapostola Paulo o ile a ngwalela Bakriste motseng wo e sego o mokgethwa wa Korinthe gore: “Ka lengwalô le lengwê ke Le ngwaletše ka re Le se kê la hlakana le diotswa. Xa se xo re ke ra diotswa tša ba lefase lé, le ba mexabaru, le bahlakodi, le ba medimo e šele; xe nka be kè e-ra bôná, xôna e ka ba xo re Le tloxê lefaseng.” (1 Ba-Korinthe 5:9, 10) Bjo ke boemo bjo thata go Bakriste bao ba swanetšego go kopa-kopana le batho ba boitshwaro bjo bo gobogilego goba ba se nago ditekanyetšo tša boitshwaro letšatši le letšatši. Ye ke teko e kgolo ya potego, kudu-kudu ditlogong tšeo go tšona go tlaišwa ka tša botona le botshadi, kgobogo le go se botege di kgothaletšwago goba di tshedišwago mahlo. Boemong bjo re ka se kgone go theoša ditekanyetšo tša rena e le gore re bonale re le “ba tlwaelegilego” go bao ba re dikologilego. Go e na le moo, boitshwaro bja rena bja botho eupša e le bjo bo fapanego bja Bokriste bo swanetše go re dira gore re bonagale bathong ba nago le temogo, go bao ba lemogago dinyakwa tša bona tša moya le bao ba nyakago selo se sekaone.—Mateo 5:3, NW; 1 Petro 3:16, 17.

19. (a) Ke diteko dife tšeo lena bana le nago le tšona sekolong? (b) Batswadi ba ka dira’ng go thekga bana ba bona le boitshwaro bja bona bjo bokgethwa?

¹⁹ Ka mo go swanago, go na le diteko tše dintši tšeo bana ba rena ba lebeletšanago le tšona sekolong. Na lena batswadi le etela sekolo seo bana ba lena ba tsenago go sona? Na le tseba mohuta wa moya o apareditšego moo? Na le na le kgokagano ya kwano le barutiši? Ke ka baka la’ng dipotšišo tše di le bohlokwa? Ka gobane mafelong a mantši a ditoropong a lefase, dikolo di fetogile megola ya bošoro, dihlare-tagi le kopano ya botona le botshadi. Bana ba lena ba ka boloka bjang potego ya bona le boitshwaro bja bona e le tše kgethwa ge e ba ba sa hwetše thekgo e tletšego ya kwelobohloko ya batswadi ba bona? Paulo o eleditše batswadi ka mo go swanetšego ka gore: “Lena Bô-tata-xo-bana! Le se kê la befediša bana ba lena, xore ba se tširoxê.” (Ba-Kolose 3:21) Tsela e nngwe ya go befediša bana ke go palelwa ke go kwešiša mathata a bona a letšatši le letšatši le diteko. Go lokišeletšwa ga diteko sekolong go thoma tikologong ya moya ya legae la Bokriste.—Doiteronomio 6:6-9; Diema 22:6.

20. Ke ka baka la’ng bokgethwa bo le bohlokwa go rena ka moka?

²⁰ Sa mafelelo, ke ka baka la’ng bokgethwa bo le bohlokwa go rena ka moka? Ka gobane bo šoma e le tšhireletšo malebana le ditlhaselo tša lefase la Sathane le tsela ya gagwe ya go nagana. Ke tšhegofatšo gona bjale gomme e tla ba tšhegofatšo le nakong e tlago. Bo thuša go re kgonthišetša bophelo bjo e tlago go ba bophelo bja kgonthe lefaseng le lefsa la go loka. Bo re thuša gore re be Bakriste ba leka-lekanego, ba batamelegago le ba bulegetšego poledišano—e sego bafišegela-thoko ba sa kobegelego ka mathokong ohle. Ka boripana, go re dira gore re swane le Kriste.—1 Timotheo 6:19.

[Mongwalo wa tlase]

Na o a Gopola?

◻ Ke ka baka la’ng Petro a ile a bona go nyakega gore a eletše Bakriste mabapi le bokgethwa?

◻ Ke ka baka la’ng go se bonolo go phela bophelo bjo bokgethwa?

◻ Ke’ng seo ka moka ga rena re ka se dirago gore re godiše bokgethwa ka lapeng?

◻ Gore phuthego e dule e le e kgethwa, ke boitshwaro bofe bjo e sego bjo bokgethwa bjo re swanetšego go bo phema?

◻ Re ka dula bjang re le ba bakgethwa mošomong le sekolong?

[Seswantšho go letlakala 16, 17]

Ka ge re le Dihlatse tša Jehofa, re swanetše go thabela go hlankela Modimo le medirong e mengwe