Dinku Tše Dingwe Le Kgwerano E Mpsha

“Ba mathokô . . . , bohle ba-lôta-sabatha ba se e xoboše, kxwêranô ya-ka ba e xomarêla, ke tlo ba tliša fá thabeng e kxêthwa ya-ka.” —JESAYA 56:6, 7.

1. (a) Go ya ka pono ya Johane, ke eng seo se fihlelelwago ge diphefo tša kahlolo ya Jehofa di sa thibilwe? (b) Johane o bone lešaba lefe le le makatšago?

PONONG ya bone ka pukung ya Kutollo, moapostola Johane o ile a bona diphefo tše nne tša go senya tša kahlolo ya Jehofa di thibetšwe mola go swawa ga ditho ka moka tša “Isiraele wa Modimo” go feleletšwa. Ba ke ba mathomo bao ba šegofaditšwego ka Jesu, karolo e kgolo ya peu ya Aborahama. (Ba-Galatia 6:16, PK; Genesi 22:18; Kutollo 7:1-4) Ponong yona yeo Johane o ile a bona “lešaba le lexolo la batho ba xo sexo motho e a kxônaxo xo ba bala, ba dithšaba ka moka, le meloko ka moka, le merafô ka moka, le maleme ka moka; . . . ba hlaboša mantšu xa-xolo ba re: Xo phološa ké xa Modimo wa rena e a dutšexo sedulong sa boxoši, ké xa Kwana.” (Kutollo 7:9, 10) Ka go bolela gore, “Xo phološa . . . ké xa Kwana,” lešaba le legolo le bontšha gore le lona le šegofatšwa ka Peu ya Aborahama.

2. Lešaba le legolo le ile la bonala neng gomme le hlaolwa bjang?

² Lešaba le le legolo le ile la lemogwa morago kua ka 1935 gomme lehono le na le palo ya go feta dimilione tše hlano. E le le le swaetšwego go phologa masetla-pelo a magolo, ditho tša lona di tla hlaolelwa bophelo bjo bo sa felego ge Jesu a aroganya “dinku” go “dipudi.” Bakriste ba lešaba le legolo ba gare ga “dinku tše dingwê” seswantšhong sa Jesu sa mašaka. Ba holofela go phela ka mo go sa felego lefaseng la paradeise.—Mateo 25:31-46; Johane 10:16; Kutollo 21:3, 4.

3. Bakriste ba tloditšwego le dinku tše dingwe ba fapana bjang ge e le mabapi le kgwerano e mpsha?

³ Bakeng sa ba 144 000, tšhegofatšo ya kgwerano ya Aborahama e dirwa ka kgwerano e mpsha. Bjalo ka batšea-karolo kgweranong ye, ba “bušwa ke kxauxêlô” le ‘go bušwa ka Molao wa Kriste.’ (Ba-Roma 6:15; 1 Ba-Korinthe 9:21) Ka gona, ke feela ditho tše 144 000 tša Isiraele ya Modimo tšeo di jelego ka mo go swanetšego diswantšhetšo tša Segopotšo sa lehu la Jesu le gona Jesu o dirile kgwerano ya Mmušo le bona feela. (Luka 22:19, 20, 29) Ditho tša lešaba le legolo ga se batšea-karolo kgweranong e mpsha. Lega go le bjalo, di ba gotee le Isiraele ya Modimo gomme di dula le yona ‘nageng’ ya yona. (Jesaya 66:8) Ka gona, ke mo go kwalago go bolela gore le bona ba bušwa ke botho bjo bo sa swanelago bja Jehofa le go bušwa ke molao wa Kriste. Gaešita le ge e se batšea-karolo kgweranong e mpsha, ba holwa ke yona.

“Ba Mathokô” le “Isiraele wa Modimo”

4, 5. (a) Go ya ka Jesaya, ke sehlopha sefe seo se tla hlankelago Jehofa? (b) Jesaya 56:6, 7 e phethagatšwa bjang go lešaba le legolo?

⁴ Moporofeta Jesaya o ngwadile gore: “Ba mathokô ba xo diilêla xa Morêna, ’me ba mo dirêla, ba rata ’ina la Morêna, ’me ya ba balata ba Morêna, bohle ba-lôta-sabatha ba se e xoboše, kxwêranô ya-ka ba e xomarêla, ke tlo ba tliša fá thabeng e kxêthwa ya-ka, ka ba thabiša Ntlong ya-ka ya thapêlô; dihlabêlô tša bôná le didimo tša bôná ke tlo di thabêla di e-tla aletareng ya-ka.” (Jesaya 56:6, 7) Isiraeleng se se be se bolela gore “ba mathokô” bao e sego ba-Isiraele, ba be ba tla rapela Jehofa—ba rata leina la gagwe, ba kwa ditekanyetšo tša kgwerano ya Molao, ba boloka Sabatha gomme ba nea dihlabelo tempeleng e lego “Ngwakô wa thapêlô” wa Modimo.—Mateo 21:13.

⁵ Mehleng ya rena “ba mathokô ba xo diilêla xa Morêna” ke lešaba le legolo. Ba ba direla Jehofa gotee le Isiraele ya Modimo. (Sakaria 8:23) Ba nea dihlabelo tše swanago tše di amogelegago bjalo ka Isiraele ya Modimo. (Ba-Hebere 13:15, 16) Ba rapela tempeleng ya Modimo ya moya, e lego “ngwakô [wa gagwe] wa thapêlô.” (Bapiša le Kutollo 7:15.) Na ba boloka Sabatha ya beke le beke? Batlotšwa le ge e le dinku tše dingwe ga ba laelwa go dira se. (Ba-Kolose 2:16, 17) Lega go le bjalo, Paulo o ile a bolela le Bakriste ba tloditšwego ba ba-Hebere gore: “Xo sa na le khutšô ya Sabatha ye e šaletšexo sethšaba sa Modimo. Xobane e a tsenexo khutšong yeo ya Modimo, le yêna ó khutša à phethile medirô ya xaxwe byalo ka Modimo xe a khutšitše à phethile ya xaxwe.” (Ba-Hebere 4:9, 10) Ba-Hebere bao ba tsene ‘khutšong ye ya Sabatha’ ge ba be ba ipea ka tlase ga “tokô ya Modimo” gomme ba khutša go hlwa ba leka go itokafatša ka mediro ya Molao. (Ba-Roma 10:3, 4) Bakriste ba tloditšwego ba Ba-ntle ba thabela khutšo e swanago ka go ipea ka tlase ga toko ya Jehofa. Lešaba le legolo le ba gotee le bona khutšong yeo.

6. Dinku tše dingwe lehono di gomarela kgwerano e mpsha bjang?

⁶ Go feta moo, dinku tše dingwe di gomarela kgwerano e mpsha go fo swana le ge ba mathoko ba ile ba gomarela kgwerano ya Molao. Ka tsela efe? E sego ka go ba batšea-karolo go yona eupša ka go ipea ka tlase ga melao yeo e tswalanago le yona le go holwa ke dithulaganyo tša yona. (Bapiša le Jeremia 31:33, 34.) Go swana le bagwera ba bona ba ba tloditšwego, dinku tše dingwe di ngwadilwe molao wa Jehofa ‘dipelong tša tšona.’ Di rata melao le melao ya motheo ya Jehofa le go e kwa ka mo go tseneletšego. (Psalme 37:31; 119:97) Go swana le Bakriste ba tloditšwego, di tseba Jehofa. (Johane 17:3) Go thwe’ng ka lebollo? Nywaga e ka bago 1500 pele ga go dira kgwerano e mpsha, Moše o ile a kgothaletša ba-Isiraele gore: “Bollang bošoboro bya dipelo tša lena.” (Doiteronomio 10:16; Jeremia 4:4) Le ge lebollo la kgapeletšo la nama le fetile le Molao, bobedi batlotšwa le dinku tše dingwe ba swanetše go ‘bolotša’ dipelo tša bona. (Ba-Kolose 2:11) Sa mafelelo, Jehofa o lebalela dinku tše dingwe diphošo tša tšona motheong wa ‘madi a Jesu a tšholotšwego a kgwerano.’ (Mateo 26:28; 1 Johane 1:9; 2:2) Modimo ga a ba thwale e le barwa ba gagwe ba moya bjalo ka ge a thwetše ba 144 000. Eupša o bolela dinku tše dingwe e le tše di lokilego ka kgopolo yeo Aborahama a ilego a bolelwa a lokile ka yona e le mogwera wa Modimo.—Mateo 25:46; Ba-Roma 4:2, 3; Jakobo 2:23.

7. Ke tebelelo efe yeo e bulegelago dinku tše dingwe lehono tšeo di bolelwago di lokile go swana le Aborahama ge a ile a bolelwa a lokile?

⁷ Bakeng sa ba 144 000, go bolelwa e le ba lokilego go bula tsela ya gore ba be le kholofelo ya go buša le Jesu Mmušong wa legodimong. (Ba-Roma 8:16, 17; Ba-Galatia 2:16) Bakeng sa dinku tše dingwe, go bolelwa e le tše di lokilego e le bagwera ba Modimo go di dumelela go ba le kholofelo ya bophelo bjo bo sa felego lefaseng la paradeise—e ka ba ka go phologa Haramagedone e le karolo ya lešaba le legolo goba ka ‘tsogo ya baloki.’ (Ditiro 24:15) Ke tokelo e kgolo gakaakang go ba le kholofelo e bjalo le go ba mogwera wa Mmuši wa legohle, go ba ‘modudi ngwakong wa gagwe’! (Psalme 15:1, 2) Ee, bobedi batlotšwa le dinku tše dingwe ba šegofaditšwe ka tsela e kgahlišago ka Jesu e lego Peu ya Aborahama.

Letšatši le Legolo la Poelano

8. Ke eng seo se bego se swantšhetšwa e sa le pele ke dihlabelo tša Letšatši la Poelano ka tlase ga Molao?

⁸ Ge a be a ahla-ahla kgwerano e mpsha, Paulo o ile a gopotša babadi ba gagwe ka Letšatši la Poelano la ngwaga le ngwaga ka tlase ga kgwerano ya Molao. Letšatšing leo dihlabelo tše di aroganego di be di neelwa—se sengwe e le sa moloko wa boperisita wa Lefi gomme se sengwe e le sa meloko e 12 yeo e sego ya boperisita. Se se hlalositšwe kgale e le se se bego se emela sehlabelo se segolo sa Jesu seo se bego se tla hola bobedi ba 144 000 bao ba nago le kholofelo ya legodimong le ba dimilione bao ba nago le kholofelo ya lefaseng.a Paulo o bontšhitše gore phethagatšong, mehola ya sehlabelo sa Jesu e dirwa ka Letšatši la Poelano le legolo tlase ga kgwerano e mpsha. Bjalo ka Moperisita yo Mogolo wa letšatši le le legolo, Jesu o ile a nea bophelo bja gagwe bjo bo phethagetšego e le sehlabelo sa poelanyo e le gore a hweletše batho “topollô ya neng le neng.”—Ba-Hebere 9:11-24.

9. Ba le kgweranong e mpsha, ke eng seo Bakriste ba tloditšwego ba ba-Hebere ba bego ba ka se hwetša?

⁹ Bakriste ba bantši ba ba-Hebere ba lekgolong la pele la nywaga e be e sa le “baxale mo xo tša Molaô [wa Moše].” (Ditiro 21:20) Ka gona, Paulo o ile a ba gopotša ka mo go swanetšego gore: “[Jesu ke] Mmoelanyi wa kxwêrano e mphsa . . . , xore ka lehu leo le tlilexo ya ba la xo lefa dikaroxô tša mehla ya kxwêranô ya kxalê, ba ba bileditšwexo bohwa byo bo sa felexo ba kxônê xo amoxêla se se holofedišitšwexo.” (Ba-Hebere 9:15) Kgwerano e mpsha e lokolotše Bakriste ba ba-Hebere kgweranong ya kgale yeo e bego e pepentšha go ba le sebe ga bona. Ka thušo ya kgwerano e mpsha, ba kgonne go hwetša “bohwa [bja legodimong] byo bo sa felexo.”

10. Batlotšwa le dinku tše dingwe ba leboga Modimo bakeng sa eng?

¹⁰ “Mang le mang” yo “a dumêlaxo Morwa,” o tla holwa ke sehlabelo sa topollo. (Johane 3:16, 36) Paulo o itše: “Kriste, ge a dirilwe sehlabelo gatee, go rwala dibe tša ba bantši, o tlo bonagalela la bobedi ba ba mo letetšego a se na sebe, e be poloko ya bona.” (Ba-Hebere 9:28, PK) Lehono, bao ba nyakago Jesu ka phišego ba akaretša Bakriste ba batlotšwa ba Isiraele ya Modimo bao ba sa lego gona le dimilione tšeo di dirago lešaba le legolo tšeo le tšona di nago le bohwa bja ka mo go sa felego. Dihlopha ka bobedi di leboga Modimo bakeng sa kgwerano e mpsha le ditšhegofatšo tše di neago bophelo tšeo di tswalanago le yona go akaretša le Letšatši le legolo la Poelano le bodiredi bja Moperisita yo Mogolo e lego Jesu Sekgethwa-kgethweng sa legodimong.

Go Swarega Tirelong e Kgethwa

11. Ka matswalo a hlwekišitšwego ka sehlabelo sa Jesu, batlotšwa gotee le dinku tše dingwe ba dira’ng ka lethabo?

¹¹ Lengwalong la gagwe la go ya go ba-Hebere, Paulo o gateletše mohola o phagamego wa sehlabelo sa Jesu thulaganyong ya kgwerano e mpsha ge se bapišwa le dibego tša dibe tlase ga kgwerano ya kgale. (Ba-Hebere 9:13-15) Sehlabelo se sekaone sa Jesu se kgona go “hlatswa matswalô a rena ra tšwa ’thšila tša medirô ye e hwilexo, ra tla ra dirêla Modimo e a phelaxo [“tirelo e kgethwa,” NW].” Bakeng sa Bakriste ba ba-Hebere, “medirô ye e hwilexo” e be e akaretša “dikaroxô tša mehla ya kxwêranô ya kxalê.” Bakeng sa Bakriste lehono, e akaretša dibe tšeo di dirilwego nakong e fetilego tšeo go tšona go bilego le boitsholo bja therešo gomme e le tšeo Modimo a ba lebaletšego tšona. (1 Ba-Korinthe 6:9-11) Ba e-na le matswalo a hlwekišitšwego, Bakriste ba tloditšwego ba “dirêla Modimo e a phelaxo [“tirelo e kgethwa,” NW].” Le lešaba le legolo le dira bjalo. Ba hlwekišitše matswalo a bona “mading a Kwana,” ba ka tempeleng e kgolo ya Modimo ya moya “ba Mo hlankêla [“nea tirelo e kgethwa,” NW] mosexare le bošexo.”—Kutollo 7:14, 15.

12. Re bontšha bjang gore re na le “tumelo e phethegilego”?

¹² Go oketša moo, Paulo o itše: “A re batameleng ka pelo e rerešago, ka tumelo e phethegilego, re fokilwe dipelo go tlošetšwa letswalo le le lebe, gomme re hlatswitšwe mmele ka meetse a sekilego.” (Ba-Hebere 10:22, PK) Re ka bontšha bjang gore re na le “tumelo e phethegilego”? Paulo o kgothaleditše Bakriste ba ba-Hebere gore: “A re xomareleng moênô wa kholofêlô ya rena [ya legodimong] rè sa šišinyexe; xobane e a re holofedišitšexo ó a bôtêxa. A re hlôkômêlaneng seng sa rena, re išanê leratong le medirong e botse. Re se ngalê phuthêxô ya xešo ka mokxwa wa ba bangwê; sa rena a e bê xo eletšana, xa-xolo ka xe letšatši le le kxaufsi; le lena Le a di bôna.” (Ba-Hebere 10:23-25) Ge e ba tumelo ya rena e phela, le rena re ka “se tlogele go bokana ga rena gotee.” (NW) Re tla thabela go iša le go išwa ke banababo rena medirong e mebotse le go matlafaletšwa modiro o bohlokwa wa go tsebatša kholofelo ya rena phatlalatša go sa šetšwe gore ke ya lefaseng goba legodimong.—Johane 13:35.

“Kxwêranô ya Neng le Neng”

13, 14. Kgwerano e mpsha ke ya neng le neng ka ditsela dife?

¹³ Go direga’ng ge ba mafelelo ba ba 144 000 ba hwetša kholofelo ya bona ya legodimong? Na kgwerano e mpsha e tla kgaotša go šoma? Nakong yeo, lefaseng go tla be go se na le setho se se šetšego sa Isiraele ya Modimo. Batšea-karolo ka moka kgweranong ba tla ba le Jesu ‘mmušong wa Tatagwe.’ (Mateo 26:29) Eupša re gopola mantšu a Paulo lengwalong la gagwe la go ya go ba-Hebere a rego: ‘Modimo Rakhutšo . . . o tsošitše bahung Modiši yo mogolo wa dinku ka madi a kgwerano ya neng le neng.’ (Ba-Hebere 13:20, mongwalo o sekamego ke wa rena; Jesaya 55:3.) Kgwerano e mpsha ke ya neng le neng ka kgopolo efe?

¹⁴ Sa pele, ka go se swane le kgwerano ya Molao, le ka mohla e ka se tšeelwe legato. Sa bobedi, mafelelo a go šoma ga yona ke a sa ruri go swana le bogoši bja Jesu. (Bapiša Luka 1:33 le 1 Ba-Korinthe 15:27, 28.) Mmušo wa legodimong o na le sebaka sa ka mo go sa felego mererong ya Jehofa. (Kutollo 22:5) Sa boraro, dinku tše dingwe di tla tšwela pele go holwa ke tokišetšo ya kgwerano e mpsha. Pušong ya Kriste ya Nywaga e Sekete batho ba ba botegago ba tla tšwela pele ba “hlankêla [Jehofa] mosexare le bošexo bà le Ntlong e kxêthwa ya xaxwe” go fo swana le ge ba dira gona bjale. Jehofa a ka se rotoše dibe tša bona tše di lebaletšwego motheong wa “madi a . . . Kxwêranô” a Jesu. Ba tla tšwela pele go thabela boemo bjo bo lokilego e le bagwera ba Jehofa gomme molao wa gagwe o tla be o sa ngwadilwe dipelong tša bona.

15. Hlalosa tswalano ya Jehofa le barapedi ba gagwe ba lefaseng le lefsa.

¹⁵ Na Jehofa mo nakong yeo o tla kgona go bolela ka bahlanka ba ba batho gore: ‘Ke Modimo wa bona, gomme bona ke setšhaba sa-ka’? Ee. “Ó tlo axa le bôná, ya ba sethšaba sa xaxwe. ’Me Yêna mong Modimo ó tlo ba le bôná è le Modimo wa bôná.” (Kutollo 21:3, mongwalo o sekamego ke wa rena.) E tla ba “mešaša ya bakxêthwa” e lego baemedi ba lefaseng ba “Motse-moratexi,” e lego monyadiwa wa legodimong wa Jesu Kriste. (Kutollo 14:1; 20:9; 21:2) Se ka moka se tla kgonega ka baka la tumelo ya bona ‘mading a Jesu a tšholotšwego a kgwerano’ le go ikokobeletša ga bona dikgoši le baperisita ba legodimong bao e bego e le Isiraele ya Modimo ge ba be ba le mo lefaseng.—Kutollo 5:10.

16. (a) Ke dikgonagalo dife tšeo di letetšego bao ba tlago go tsošetšwa lefaseng? (b) Ke ditšhegofatšo dife tšeo di tlago go tla mafelelong a nywaga e sekete?

¹⁶ Go thwe’ng ka bahu bao ba tsošwago mo lefaseng? (Johane 5:28, 29) Le bona ba tla laleletšwa go “šexofala” ka Jesu e lego Peu ya Aborahama. (Genesi 22:18) Gape ba tla swanelwa ke go rata leina la Jehofa, ba mo hlankela, ba nea dihlabelo tše di amogelegago le go nea tirelo e kgethwa ngwakong wa gagwe wa thapelo. Ba ba dirago bjalo ba tla tsena khutšong ya Modimo. (Jesaya 56:6, 7) Mafelelong a nywaga e sekete, ba ba botegago ka moka ba tla ba ba išitšwe phethegong ya batho ka bodiredi bja Jesu Kriste le baperisita-gotee le yena ba 144 000. Ba tla ba ba lokilego, e sego feela go bolelwa ba lokile e le bagwera ba Modimo. Ba tla “boêla ba phela” ba lokologile ka mo go feletšego sebeng le lehung leo ba le abetšego go Adama. (Kutollo 20:5; 22:2) A tšhegofatšo e kaakang yeo e tlago go ba yona! Go tšwa ponong ya rena lehono, go bonagala e ka modiro wa Jesu le ba 144 000 wa boperisita o tla ba o phethilwe ka nako yeo. Ditšhegofatšo tša Letšatši le legolo la Poelano di tla ba di dirišitšwe ka mo go tletšego. Go feta moo, Jesu o tla “bušetša Modimo Tat’axwe mmušô.” (1 Ba-Korinthe 15:24) Go tla ba le moleko wa mafelelo bakeng sa batho, ke moka Sathane le batemona ba gagwe ba tla fedišetšwa sa ruri.—Kutollo 20:7, 10.

17. Ka baka la lethabo leo le re letetšego ke eng seo yo mongwe le yo mongwe wa rena a swanetšego go ikemišetša go se dira?

¹⁷ Ke karolo efe, ge e ba e le gona yeo “kxweranô ya neng le neng” e tlago go e tšea nakong yeo e kgahlišago yeo e tlago go thoma? Yeo ga se taba ya rena. Seo Jehofa a se utolotšego go fihla bokgoleng bjo ke se se lekanego bakeng sa bjale. Se re tlogela re maketše. Anke o nagane—bophelo bjo bo sa felego o le karolo ya “maxodimo a mafsa le lefase le lefsa”! (2 Petro 3:13) Anke go se be le selo seo se fokodišago kganyogo ya rena ya go hwetša kholofetšo yeo. Go ema re tiile go ka fo se be bonolo. Paulo o itše: “Xo rata xore Le se fêlê pelo, xore ka xo dira thatô ya Modimo Le tšeê se Le se holofedišitšwexo.” (Ba-Hebere 10:36) Lega go le bjalo, gopola gore bothata le ge e le bofe bjo bo swanetšego go fenywa, kganetšo le ge e le efe yeo e swanetšego go hlolwa di a timelela ge di bapetšwa le lethabo leo le re emetšego. (2 Ba-Korinthe 4:17) Ka gona, anke go se be le o tee wa rena wa “xo xomêla moraxo le xo y’o lahlwa.” Go e na le moo, eka re ka itlhatsela re le “ba tumêlô ya xo y’o rua bophelô.” (Ba-Hebere 10:39) Eka ka moka ga rena re ka bota Jehofa ka mo go tletšego, Modimo wa dikgwerano bakeng sa tšhegofatšo ya ka mo go sa felego ya yo mongwe le yo mongwe wa rena.

TIRELO E KGETHWA KA TEMPELENG Lešaba le legolo le rapela le Bakriste ba tloditšwego ka lapeng la lefaseng la tempele e kgolo ya Jehofa ya moya. (Kutollo 7:14, 15; 11:2) Ga go na le lebaka la go fetša ka gore ba ka Lapeng la ka thoko la Ba-ntle. Ge Jesu a be a le lefaseng go be go na le Lapa la Ba-ntle tempeleng. Lega go le bjalo, dithulaganyong tše di buduletšwego tša tempele ya Salomo le ya Hesekiele, go be go se na tokišetšo ya Lapa la ba-Ntle. Tempeleng ya Salomo go be go na le lapa la ka ntle moo ba-Isiraele le basokologi, banna le basadi ba bego ba rapela gotee. Se ke sebopego sa boporofeta sa tempele ya moya moo Johane a bonego lešaba le legolo le nea tirelo e kgethwa. Lega go le bjalo, ke baperisita feela le ba-Lefi bao ba bego ba ka tsena ka lapeng la ka gare moo aletare e kgolo e bego e le gona; ke baperisita feela ba bego ba ka tsena Sekgethweng; gomme ke moperisita yo mogolo feela yo a bego a ka tsena Sekgethwa-kgethweng. Lapa la ka gare le Sekgethwa di kwešišwa di swantšhetša boemo bja moswana-noši bja moya bjoo Bakriste ba tloditšwego ba nago le bjona lefaseng. Sekgethwa-kgethwa se swantšhetša legodimo ka bolona, moo Bakriste ba tloditšwego ba hwetšago bophelo bja go se hwe gotee le Moperisita wa bona yo Mogolo wa legodimong.—Ba-Hebere 10:19, 20.

[Mengwalo ya tlase]

Na o Kwešišitše?

◻ Ka ntle le Bakriste ba tloditšwego, ke bomang bao ba šegofalago ka Peu ya Aborahama?

◻ Ka go šegofatšwa ka kgwerano e mpsha, ke bjang dinku tše dingwe di swanago le basokologi ka tlase ga kgwerano ya kgale?

◻ Dinku tše dingwe di šegofatšwa bjang ka tokišetšo ya Letšatši le legolo la Poelano?

◻ Ke ka baka la’ng Paulo a biditše kgwerano e mpsha gore ke “kxwêranô ya neng le neng”?

[Seswantšho go letlakala 23]

Ka baka la lethabo leo le re letetšego, a re beng le “tumêlô ya xo y’o rua bophelô”