Go Ba Batee Tseleng E Phalago Tšohle Ya Bophelo

Go Ba Batee Tseleng E Phalago Tšohle Ya Bophelo

Ge e ba palo ya baagi ba lefase e tšwela pele e oketšega, kgaufsinyane go tla ba le batho ba dimilione tše dikete tše tshelelago lefaseng. Gaešita le ge ka moka ba e-tšwa go rakgolokhukhu o tee, fela ba bantši ga go bonale ba dumela gore ke ditho tša lapa la lefase ka moka le gore ba ikarabela go Mmopi yo bohlale le yo lerato. Go hloka botee gotee le dithulano magareng ga ditšhaba, merafo le ditlogo go nea bohlatse bjo bo tšhošago mabapi le boemo bjo bjo bo nyamišago bja ditaba.

KA BAKA la maemo a gona bjale a lefase, botee bja lefase ka moka bo ka bonala e le pakane yeo e ka se fihlelelegego. The Columbia History of the World e bolela gore: “Lefase la mehleng yeno ga le na gaešita le kgopolo e tee ka monwana yeo le ka e neago mabapi le taba e bohlokwa kudu ya kamoo go ka phedišanwago gotee ka gona.”

Lega go le bjalo, go tliša botee gare ga badudi ka moka ba lefase ga go nyake kgopolo e mpsha. Tsela e išago boteeng e bolelwa ka botlalo ka Mangwalong a Makgethwa. E ithekgile ka go rapela Yo a bopilego lefase le bophelo ka moka bjo bo lego go lona. Botee bja kgonthe bja kgopolo, morero le tsela ya bophelo bo šetše bo le gona gare ga batho ba Modimo. E le ba fetago dimilione tše hlano le seripa ka palo dinageng tše 233, ke batee tumelong ya bona ya gore tsela ya Modimo ya bophelo ke tsela e phalago tšohle. Ba rapela ka go swana le mopsalme ka gore: “Morêna, nthutê tsela ya xaxo, ke sepelê kè Xo botexetše; pelo ya-ka O e tlêmaxanyê le xo boifa leina la xaxo.”—Psalme 86:11.

Go tlišwa boteeng mo ga batho borapeding bjo bo sekilego go ile gwa bolelwa kgale-kgale e sa le pele ke moporofeta Jesaya. O ngwadile gore: “Go tlo direga bofelong bja mabaka, thaba ya ngwako wa Jehofa e tlo ba e tiišitšwe godimo ga dithaba, e dutše serwalong sa meboto, gomme baditšhaba ba tlo tšhologela go yona. Gomme merafo-rafo e tlo ya e re: A re yeng re rotogeleng thabeng ya Jehofa, ngwakong wa Modimo wa Jakobo, gore a re rute ditsela tša gagwe, re sepele mebileng ya gagwe.”—Jesaya 2:2, 3, PK.

Botee bja Dihlatse tša Jehofa ke bja moswana-noši. Di ja dijo tše swanago tša moya dibokeng tša tšona tša beke le beke diphuthegong tša ka godimo ga tše 87 000 lefaseng ka bophara. (Mateo 24:45-47) Lega go le bjalo, go tloga bogareng bja 1998 go fihla mathomong a 1999, Dihlatse di ile tša bontšha botee bja tšona ka tsela e nngwe—ka go bokana Dikopanong tša tšona tša matšatši a mararo tša “Tsela ya Modimo ya Bophelo” lefaseng ka moka. Dinageng tše 13 dipokano tše di ile tša akaretša baemedi ba bantši ba tšwago dinageng tše fapa-fapanego gomme di be di bitšwa dikopano tša ditšhaba-tšhaba. Tše dingwe di be di bitšwa dikopano tša selete. Eupša dikopano tše ka moka di ile tša nea lenaneo le le swanago la dilo tše dibotse tša moya.

E bile mo go thabišago gakaakang go bona baemedi ba thabilego ba aperego gabotse ba kgeregela ka diholong le ka mapatlelong gore ba rutwe ke Jehofa! Mohlala e bile mantšu a yo mongwe wa baemedi kopanong ya ditšhaba-tšhaba yeo e bego e swaretšwe Michigan, U.S.A. O itše: “E bile mo go thabišago kudu go bona banababo rena ba tšwago lefaseng ka moka—e lego Repabliking ya Czechoslovakia, Barbados, Nigeria, Hungary, England, Holland, Ethiopia, Kenya le dinageng tše dingwe tše dintši—ba gokarelana! E be e le mo gobotse go bona banababo rena ba dula gotee ka botee, ba rothiša megokgo ya lethabo ka baka la lerato leo ba nago le lona go yo mongwe le yo mongwe le go Modimo wa bona yo mogolo, Jehofa.” Sehlogo se se latelago se tla hlahloba lenaneo la kopano leo le ilego la thabelwa ke batho ba dimilione lefaseng ka moka.

[Seswantšho go letlakala 3]