Mmušo o Reta Dihlatse

KUA Cádiz, Sepania, e lego motse wo e lego boema-kepe wo o lego dikhilomithara tše 500 ka borwa-bodikela bja Madrid, ramotse Doña Teófila Martínez o ile a neelana ka mentlele (o bontšhitšwego ka mo godimo) go Dihlatse tša Jehofa. O balega ka gore: “Mmušo wa mmasepala wa Cádiz go Dihlatse tša Jehofa e le go leboga tirišano ya tšona gotee le maiteko legatong la motse wo.” Dihlatse di dirile eng gore di amogele tlhompho ye?

E ile ya newa bakeng sa go amogela mošomo woo Dihlatse di o dirilego go mpshafatša karolo ya lepatlelo la motse la mmasepala. Lebakeng la mafelo-beke a sego kae, Dihlatse tše makgolo di ile tša ithapela go thuša go tsošološa dintlwana tša ka thoko tša lebatong la ka tlase la lepatlelo la kgwele ya maoto la Carranza. Gona bjale, bohle bao ba dirišago lepatlelo le ba holwa ke dipompi le diphaephe tše di tiilego tšeo di tsentšwego gotee le mabato ao a ilego a dirwa.

Dihlatse tša Jehofa di thabetše tswalano e botse le motse wa Cádiz ka nako e telele. Ngwaga o mongwe le o mongwe mmušo wa mmasepala ka botho o dira gore Dihlatse di hwetše lepatlelo la Carranza bakeng sa go swarela kopano ya tšona ya ngwaga le ngwaga ya selete go sona. Ka gona, Dihlatse di thabela go dira seo di ka se kgonago go thuša go boloka lepatlelo le le boemong bjo bobotse.

Lega go le bjalo, go okeletša maitekong ao a bonwago ao a dirwago ka mehla, Dihlatse tša Jehofa di etela ka mehla ditikologong tša motse bakeng sa go yo thuša setšhaba ka tsela e nngwe. Di tsebatša “ditaba tše di lokilego” tša Mmušo wa Modimo. Go ba gona, ga di kopanele bodireding bja tšona bja phatlalatša e le gore di amogele tumišo e tšwago bathong. Bo dirwa e le go kwa taelo ya Jesu ya go bolela “ditaba tše di lokilego tša mmušo” le gore di “dirê dithšaba ka moka barutiwa.” (Mateo 24:​14, bapiša le NW; 28:​19.) Ka go rialo, Dihlatse tša Jehofa di holofela go hlankela setšhaba ka go ruta batho “mmileng wa tokô.”​— Diema 12:28.