Na go na le Motho yo a Tlogago a Šetša?
“Mexôkxô ya bahlaki” e fetogile lefula. E tšhollwa ke bahlaselwa ba “mehlakô” e sa balegego lefaseng ka moka. Ba e bilego bahlaselwa gantši ba ikwa “bà se n’e mohomotši”—gore ga go motho le o tee yo a tlogago a e-na le taba le bona.—Mmoledi 4:1.
GO SA šetšwe lefula le la megokgo, ba bangwe ga ba kgomege ka go tlaišega ga magagabo bona. Ba iphoufaletša mahloko a batho ba bangwe, bjalo ka ge go ile gwa dira moperisita le mo-Lefi ba seswantšhong sa Jesu Kriste se se lego mabapi le monna yo a ilego a hlaselwa le go hlakolwa gomme a tlogelwa a idibetše ka thoko ga tsela. (Luka 10:30-32) Ge feela dilo di ba sepelela gabotse gotee le malapa a bona, ga ba tshwenyege ka ba bangwe. Ge e le gabotse, ba re, “Ke tshwenywa ke eng?”
Ga se ra swanela go makatšwa ke se. Moapostola Paulo o ile a bolela e sa le pele gore “mehleng ya bofêlô” batho ba bantši ba tla hloka “leratô.” (2 Timotheo 3:1, 3) Mmogedi yo mongwe o ile a belaela ka mekgwa ya go se šetšane yeo e lego gona. O itše: “Filosofi ya kgale ya ma-Ireland le setšo sa bona sa go hlokomelana le go abelana dilo se tšeelwa sebaka ke mokgwa o mofsa wa go ba baithati.” Lefaseng ka bophara, batho ke bao e lego baithati, bao ba sa kgomegego ka mo go feletšego ka tlalelo ya batho ba bangwe.
Go Nyakega ga Gore go be le Motho yo a Šetšago
Ka kgonthe go a nyakega gore go be le motho yo a šetšago. Ka mohlala, nagana ka monna yo a lewago ke bodutu wa kua Jeremane yoo a ilego a “hwetšwa a dutše ka pele ga thelebišene ya gagwe—nywaga e mehlano ka morago ga lehu la gagwe ka Keresemose.” “Monna [yo] yo a hladilwego e bile e le tšhika-noši ya segole,” yo a kwešitšwego bohloko ke diphihlelo tša gagwe tše nyamišago bophelong, o be a sa lemogwe ke motho gore ga a gona go fihlela ge akhaonto ya panka yeo e lefelelago rente ya gagwe e be e sa hlwe e kgona go mo lefelela. Go be go se na le o tee yo a bego a tloga a e-na le taba le yena.
Nagana gape le ka bahlaselwa bao ba nyakago go thušwa ba balaodi ba matla bao ba nago le megabaru. Tikologong e nngwe, batho ba e ka bago ba 200 000 (e lego kotara ya badudi) “ba bolailwe ke kgatelelo le tlala” ka morago ga gore ba tšeelwe naga ya bona ka bošoro. Goba nagana ka bana bao ba ilego ba bona sehlogo seo se nyakilego se sa dumelege. Pego e nngwe e itše: “Palo ya bana bao ba ilego ba bona ditiro tše dintši tša bošoro [nageng e nngwe]—dipolao, go bethwa le go katwa tšeo ka dinako tše dingwe di bego di dirwa ke bafsa ba bangwe bao ba lego mahlalagading, ke e makatšago.” O ka kwešiša lebaka leo ka lona mohlaselwa wa ditiro tše bjalo tša go hloka toka mo gongwe a ka botšišago ka megokgo gore, “Na go na le motho yo a tlogago a e-na le taba le nna?”
Go ya ka pego ya Ditšhaba tše Kopanego, batho ba dimilione tše dikete tše 1,3 dinageng tšeo di hlabologago ba swanelwa ke go tšwela pele ba iphediša ka tekanyo ya ka tlase ga diranta tše hlano ka letšatši. Ba swanetše go ba ba ipotšiša ge e ba go na le motho yo a nago le taba le bona. Go bjalo le ka bafaladi ba dikete bao go ya ka pego yeo e lego ka go The Irish Times, “ba lebeletšanego le kgetho e thata le e sa thabišego ya go dula kampeng e hlobaetšago goba nageng yeo go yona ba sa amogelwego goba go leka go boela morago nageng ya gabo bona yeo e sa arogantšwego [goba yeo e dubilwego] ke ntwa goba karogano ya botšhaba.” Pego yona yeo e ile ya akaretša go dirwa ga mogato wo o nyamišago: “Tswalela mahlo, bala go fihla ka tharo, ngwana o sa tšwa go hwa. Ke yo mongwe wa bana ba 35 000 bao ba tlago go hwa lehono ka baka la go hloka dijo goba malwetši ao a ka thibelwago.” Ga go makatše ge ba bantši ba lla ba gateletšegile e bile ba kwele bohloko!—Bapiša le Jobo 7:11.
Na tše ka moka di reretšwe gore di be ka mokgwa wo? Ge e le gabotse, na go na le motho yo a sa šetšego feela eupša e le yo a bilego a na le matla a go fediša tlaišego le go fediša bohloko ka moka bjoo batho ba bilego go bjona?
[Picture Credit Line on page 2]
Cover and page 32: Reuters/Nikola Solic/Archive Photos
[Seswantšho go letlakala 3]
A. Boulat/Sipa Press