“Ketelo Ya-ka Holong ya Mmušo”

Laura,a e lego morutwana wa kholetšheng, o ile a newa kabelo ya gore a be gona tirelong ya bodumedi ke moka a ngwale pego ka phihlelo ya gagwe. O ile a kgetha Dihlatse tša Jehofa gomme sehlogo sa taodišo ya gagwe se be se re, “Ketelo Ya-ka Holong ya Mmušo.” Ke eng seo Laura a hweditšego e le se se fapanego ka Dihlatse? Gare ga dilo tše dintši tšeo a di boletšego go be go na le tše di latelago.

Bana: “Bana ka moka ba be ba dutše ka phapošing e tee le batho ba bagolo. Dikerekeng ka moka tšeo ke ilego ka ya go tšona, bana ba tlogela batswadi ba bona gomme ba ya Sekolong sa Sontaga.”

Go kwana ga merafo: “Gantši, dikereke di gogela ditho tša sehlopha se itšego sa morafo goba sa moloko. . . . Lega go le bjalo, Dihlatse tša Jehofa di be di dutše gotee ka moka e bile e sego ka dihlophana-hlophana.”

Moya wa go amogela batho: “Batho ba bantši ba ile ba tla gomme ba mpolediša. . . . Ba bangwe ba ile ba ba ba mpotšiša ge e ba ke na le yoo ke ithutago Beibele le yena. Lega go le bjalo, ga se ka ka ka ikwa eka ba a nkgapeletša. Ba . . . ile ba ntlogela gore ke ikgethele.”

Ga go ntšhwe dikoleke: “Selo se sengwe seo se ilego sa tloga se ntlaba e be e le gore ga go le o tee yo a bego a tšea koleke. . . . Dikerekeng tšeo nkilego ka ya go tšona go tšewa dikoleke gaešita le ka diklaseng tša bana.”

Go na le diphuthego tše ka bago 90 000 tša Dihlatse tša Jehofa lefaseng ka bophara. Ke ka baka la’ng o sa etele yeo e lego kgaufsi le wena?

[Mengwalo ya tlase]