Go ka Dirwa Eng ka go Nyema Moko?

MOTHO a ka lwantšhana bjang le go nyema moko? Ye ke potšišo yeo e ilego ya botšišwa balebeledi ba basepedi ba bantši, bao ka mehla ba etelago diphuthego tša Dihlatse tša Jehofa. Dikarabo tša bona di ka re thuša gore re seka-seke dibaki tša go nyema moko le ditsela tša go alafa boemo bjo bjo bo ka kgomago Mokriste yo mongwe le yo mongwe.

Go nyakega se se fetago go seka-sekwa ga maemo bakeng sa go lebeletšana le go nyema moko, eupša ditšhupo di ka akaretša go hloka kgahlego ya go rapela goba ya thuto ya motho ka noši, go goga maoto tabeng ya go ba gona dibokeng, go felelwa ke phišego gaešita le go se thabele bagwera ba Bakriste ka tsela e itšego. Lega go le bjalo, se sengwe sa ditšhupo tše dikgolo ke go theoga ga mafolofolo go boleleng ebangedi. Anke re seka-sekeng ditšhupo gomme re ele hloko dikalafo tše itšego.

Go Nyema Moko Modirong wa Rena wa Boebangedi

Jesu Kriste o be a tseba mathata ao a sepedišanago le thomo ya go dira barutiwa. (Mateo 28:​19, 20) O ile a roma balatedi ba gagwe bjalo ka “dinku xare xa diphíri,” a tseba gore modiro wa bona wa boboledi o be o tla ba tlišetša tlaišo. (Mateo 10:​16-23) Lega go le bjalo, le e be e se lebaka la gore ba nyeme moko. Ge e le gabotse, bahlanka ba Modimo bao ba ilego ba ithekga ka Jehofa ka thapelo gantši ba ile ba matlafatšwa ke tlaišo.​—Ditiro 4:​29-31; 5:​41, 42.

Gaešita le ge barutiwa ba Kriste ba be ba sa tlaišwe ka mo go tseneletšego, ga se ka mehla ba bego ba amogelwa gabotse. (Mateo 10:​11-15) Ka mo go swanago, modiro wa boboledi wa Dihlatse tša Jehofa ga se ka mehla o dirwago gabonolo mehleng yeno.a Bathong ba bantši, tumelo ya go dumela go Modimo ke taba ya motho ka noši yeo ba sa ratego go boledišana le motho ka yona. Ba bangwe ga ba nyake go kwa selo ka mokgatlo wa bodumedi wo ba o bebago sefahlego ka tsela e itšego. Ka ntle le pelaelo, go se thabele, go se be gona ga mafelelo goba mathata a mangwe a fapa-fapanego e ka ba methopo e megolo e bakelago go nyema moko. Mapheko a a ka fenywa bjang?

Go Hwetša Mafelelo a Kaone

Lethabo leo re le hwetšago bodireding bja rena ka boripana le tswalana le mafelelo ao a hwetšwago. Ka gona, ke ka tsela efe re ka bago le bodiredi bjo bo enywago dienywa? Ee, re “barei ba xo phutha batho.” (Mareka 1:​16-18) Isiraeleng ya bogologolo barei ba dihlapi ba be ba e-ya go rea bošego mola ba be ba kgona go swara dihlapi tše dintši. Le rena re swanetše go seka-seka tšhemo ya rena e le gore re yo ‘rea dihlapi’ mola batho ba bantši ba le gona gae gomme ba amogela molaetša wa rena kudu. Se se ka dirwa mantšiboa, mafelo-bekeng goba ka nako e nngwe. Go ya ka molebeledi yo mongwe wa mosepedi, se se šoma mafelong ao go ona batho ba gona ba šomago letšatši ka moka. O bolela gore go nea bohlatse mantšiboa gantši go tliša mafelelo a mabotse. Go nea bohlatse ka mogala goba ka mo go sa rulaganyetšwago le gona go re kgontšha go fihlelela batho ba bantši.

Go kgotlelela bodireding go tšweletša mafelelo a mabotse. Kua Bohlabela bja Yuropa le dinageng tše itšego tša Afrika, modiro wa go bolela ka Mmušo o tšwela pele gabotse, gomme se se feleleditše ka dikoketšego tše kgahlišago. Ka mo go swanago, go ile gwa hlongwa diphuthego tše dintši mafelong ao e lego kgale a lebelelwa e le ao a sa enywego goba gaešita le tšhemong yeo e akaretšwago leboelela. Lega go le bjalo, go thwe’ng ge e ba tšhemo ya geno e sa tšweletše mafelelo a bjalo?

Go Kgomarela Boemo bjo Bobotse bja Kgopolo

Go nagana gabotse ka dipakane tšeo di beilwego ke Jesu go tla re thuša gore re se ke ra nyema moko ge re lebeletšane le go se thabele bodireding. Kriste o be a nyaka gore barutiwa ba gagwe ba tsome bao ba swanelegago, e sego gore ba sokolle mašaba a batho. Mabakeng a mmalwa o ile a šupa gore batho ba bantši kudu ba be ba ka se ke ba amogela ditaba tše di lokilego, go fo swana le ge ba-Isiraele ba bantši ba ile ba se ke ba theetša baporofeta ba bogologolo.​—Hesekiele 9:4; Mateo 10:​11-15; Mareka 4:​14-20.

‘Ditaba tše di lokilego tša mmušo’ di amogelwa ka tebogo ke batho bao ba “lemogago dinyakwa tša bona tša moya.” (Mateo 5:3, NW; 24:​14, bapiša le NW.) Ba nyaka go hlankela Modimo ka tsela yeo e laetšwago ke yena. Lega go le bjalo, mafelelo a modiro wa rena a tswalana kudu le boemo bja pelo bja batho go e na le go tswalana le bokgoni bja rena bja go rola molaetša. Ee, re swanetše go dira sohle seo re se kgonago gore re dire gore ditaba tše di lokilego e be tšeo di ipiletšago. Lega go le bjalo, mafelelo a ithekgile ka Modimo, ka gobane Jesu o itše: “Xa xo motho e a kxônaxo xo tla xo Nna, xe a sa xôxwe ke Tate e a nthomilexo.”​—Johane 6:44.

Modiro wa rena wa go bolela ebangedi o tsebatša leina la Jehofa. Go sa šetšwe gore batho ba a theetša goba ga ba theetše, modiro wa rena wa boboledi o tlaleletša tabeng ya go tagafatša leina la Jehofa le lekgethwa. Go feta moo, ka modiro wa rena wa boebangedi, re bontšha gore re barutiwa ba Kriste gomme re na le tokelo ya go tšea karolo thomong e bohlokwa-hlokwa yeo e dirwago mehleng ya rena.​—Mateo 6:9; Johane 15:8.

Go Nyema Moko le Ditswalano

Ditswalano tše itšego tša batho, e ka ba e le tša ka lapeng goba tša ka phuthegong, di ka bakela go nyema moko. Ka mohlala, motho o ba le maikwelo a go se kwešišwe. Go se phethagale ga badumedi-gotee le gona go ka re nyemiša moko. Le mo gape, Mangwalo a ka re thuša kudu.

“Mokgatlo ka moka wa barwarre” lefaseng ka bophara o bopa lapa le legolo la moya. (1 Petro 2:​17, NW) Eupša maikwelo a go ikwa o le karolo ya batho ba ba kopanego a ka hwelela ge mathata a tšwelela ka baka la go se kwane ga batho. Go ya ka bohlatse bjo bo lego gona, Bakriste ba lekgolong la pele la nywaga e be e se ba sa welwego ke mathata a bjalo, ka ge moapostola Paulo a ile a swanelwa ke go ba gopotša leboelela gore ba phedišane gotee ka botee. Ka mohlala, o ile a eletša basadi ba babedi ba Bakriste​—Ebodia le Sintike​—gore ba rarolle go se kwane ga bona.​—1 Ba-Korinthe 1:​10; Ba-Efeso 4:​1-3; Ba-Filipi 4:​2, 3.

Ge e ba se ke bothata, re ka tsošološa bjang lerato la kgonthe la go rata banababo rena le dikgaetšedi? Ka go ikgopotša gore Kriste o ba hwetše le gore le bona, ka go swana le rena, ba bontšhitše tumelo sehlabelong sa gagwe sa topollo. Le rena re ka gopola gore ba bantši ba banababo rena ba ikemišeditše go ekiša Jesu Kriste ka go bea maphelo a bona kotsing bakeng sa rena.

Nywageng e fetilego kua Paris, Fora, Hlatse ya mofsa ga se ya ka ya dika-dika go phamola sutukheise yeo e bego e rwele pomo yeo e bego e beilwe ka ntle ga Holo ya Mmušo. E ile ya theoga ditepisi tše dintši pele e e lahlela ka sedibeng, moo e ilego ya thuthupela gona. Ge e be e botšišwa gore e tutueditšwe ke eng gore e bee bophelo bja yona kotsing ka tsela ye, e ile ya araba ka gore: “Ke ile ka lemoga gore maphelo a rena a be a le kotsing. Ka gona ka nagana gore go be go tla ba kaone gore ke hwe ke nnoši go e na le gore re hwe ka moka.”b Ke tšhegofatšo e kgolo gakaakang go ba le bagwera ba bjalo bao ba ikemišeditšego go latela mohlala wa Jesu kgaufsi gakaakaa!

Go oketša moo, re ka naganišiša ka moya wa tirišano wo o bego o le gona gare ga Dihlatse tša Jehofa tšeo di bego di le dikampeng tša tshwenyo nakong ya Ntwa ya II ya Lefase.c Morago bjale, banababo rena le dikgaetšedi ba Malawi ka mo go swanago ba ile ba ema ka potego ba tiile e le Bakriste ba therešo. Na go ba le kgopolo ya gore banababo rena ba diphuthegong tša lefelong ba be ba tla gata mogato o swanago ka tlase ga maemo a sa kgahlišego ga go re tutueletše gore re hlokomologe goba bonyenyane re fokotše dikgateletšo le mathata a letšatši le letšatši? Ge e ba re hlagolela monagano wa Kriste, ditswalano tša rena tša letšatši le letšatši le barapedi gotee le rena e tla ba mothopo wa tapologo, e sego wa go nyemiša moko.

Maikwelo a Motho ka Noši ao a Nyemišago Moko

“Kholofelo e diegilego e hlokofatša pelo; eupša tebelelo ge e phethega, ke sehlare sa bophelo.” (Diema 13:​12, PK) Mahlong a ba bangwe ba bahlanka ba Jehofa, bofelo bja tshepedišo ye ya dilo ga bo kgaufsi kudu le go tla. Bakriste ba hwetša nako yeo re phelago go yona e le e ‘hlobaetšago le ye go lego thata go lebeletšana le yona,’ go fo etša ba bantši bao e sego badumedi.​—2 Timotheo 3:​1-5.

Lega go le bjalo, Bakriste ka go se swane le bao e sego badumedi ba swanetše go thabela go bona “pontšho” ya go ba gona ga Jesu maemong a a lekago, yeo e bontšhago gore Mmušo wa Modimo o tla tloga o fediša tshepedišo ye e kgopo ya dilo. (Mateo 24:​3-14) Gaešita le ge boemo bo mpefalela pele​—ka ge ruri bo tla ba bjalo nakong ya ‘masetla-pelo a magolo’​—go rena ditiragalo tše ke mothopo wa lethabo ka gobane di tsebatša lefase le lefsa la Modimo le le tlago.​—Mateo 24:​21; 2 Petro 3:13.

Go itebatša ka taba ya go tsena ditaba gare ga Mmušo ditabeng tša mehleng yeno go ka bakela Mokriste gore a gafele nako e ntši kudu go phegeleleng dilo tše di bonagalago. Ge e ba a tla dumelela dilo tše bjalo ka modiro wa boiphedišo le boithabišo di mo tšeela nako ya gagwe ka moka le matla a gagwe ka moka, o tla thatafalelwa ke go phethagatša boikarabelo bja gagwe bja Mangwalo ka tshwanelo. (Mateo 6:​24, 33, 34) Boemo bjo bjalo bja kgopolo bo kgothaletša go ferekana ke moka gwa latela go nyema moko. Molebeledi yo mongwe wa mosepedi o hlalositše gore: “Go leka go aga tshepedišo e mpsha ye e sa rego selo ya mankekišane tshepedišong ye ya dilo ke go iphoufaletša therešo.”

Tše Pedi tša Dikalafo tše Phalago Tšohle

Ka morago ga ge go šetše go dirilwe tlhahlobo, motho a ka hwetša bjang kalafo e šomago? Thuto ya motho ka noši ke e nngwe ya mekgwa e kaone kudu e lego gona. Ka baka la’ng? Molebeledi wa mosepedi o itše: “E re gopotša lebaka leo ka lona re swanetšego go dira seo re se dirago.” Yo mongwe gape o hlalositše gore: “Go bolela ka go fo ithola kgwara go fetoga morwalo ge nako e dutše e e-ya.” Eupša thuto e botse ya motho ka noši e re thuša gore re boele re be le pono e fapanego ka tema yeo re e kgathago ge re dutše re batamela bofelong. Ka kgopolo e swanago, Mangwalo a re gopotša leboelela ka go nyakega ga gore re iphepe gabotse moyeng e le gore re be le lethabo la kgonthe go direng thato ya Modimo.​—Psalme 1:​1-3; 19:​7-10; 119:​1, 2.

Bagolo ba ka thuša ba bangwe gore ba fenye go nyema moko ka go ba direla maeto a bodiši ao a kgothatšago. Dinakong tše tša go etelwa ga motho ka noši, bagolo ba ka bontšha yo mongwe le yo mongwe wa rena gore o lebogwa kudu le gore o na le sebaka se bohlokwa gare ga batho ba Jehofa. (1 Ba-Korinthe 12:​20-26) Ge a bolela ka Bakriste-gotee, mogolo yo mongwe o itše: “Gore ke gatelele bohlokwa bja bona, ke ba gopotša ka dilo tšeo ba di fihleletšego nakong e fetilego. Ke ba hlalosetša gore ba bohlokwa mahlong a Jehofa le gore madi a Morwa wa gagwe a tšholotšwe ka baka la bona. Tsela ye ya go bea mabaka e amogelwa gabotse ka mehla. Gatee-tee ge se se thekgilwe ka ditšhupetšo tše tiilego tša Beibele, bao ba nyemilego moko ba ba boemong bja go ka ipeela dipakane tše difsa, tše bjalo ka thapelo ya lapa gotee le thuto le mmalo wa Beibele.”​—Ba-Hebere 6:10.

Nakong ya ge go dirwa maeto a bodiši, bagolo ba swanetše go ela hloko gore ba se ke ba dira gore go bonagale eka go kgahliša Modimo ga go kgonege. Go e na le moo, bagolo ba ka thuša barapedi-gotee bao ba nyemilego moko gore ba bone gore morwalo wo o rwelwego ke balatedi ba Jesu o bohwefo. Ka baka leo, tirelo ya rena ya Bokriste ke mothopo wa lethabo.​—Mateo 11:​28-30.

Go Fenya go Nyema Moko

Go sa šetšwe gore dibaki tša gona ke dife, go nyema moko ke tlaišo yeo e swanetšego go lwantšhwa. Lega go le bjalo, gopola gore ga re noši ntweng ye. Ge e ba re nyemile moko, a re amogeleng thušo ya bagwera ba rena ba Bakriste, kudu-kudu bagolo. Ka go dira bjalo, re ka fokotša maikwelo a go nyema moko.

Go feta tšohle, re swanetše go retologela go Modimo bakeng sa thušo tabeng ya go fenya go nyema moko. Ge e ba re ithekga ka Jehofa ka thapelo, a ka re thuša gore re fenye go nyema moko ka mo go feletšego. (Psalme 55:​22; Ba-Filipi 4:​6, 7) Lega go le bjalo, rena bjalo ka batho ba gagwe re ka ba le maikwelo a swanago le a mopsalme yo a opetšego ka gore: “Sethšaba se tsebaxo mexobêlô ya thlalalô ké sa lehlôxônôlô, ké sa bao ba ba sepelaxo seetšeng sa ’fahloxô sa xaxo Morêna. Ba tlo hlalalêla ’ina la xaxo ka mehla; ba tlo fadiša xo loka xa xaxo. Xobane bothšephi bya matla a bôná ké Wene, lenaká la rena le tlo phaxama xe re Xo kxahla.”​—Psalme 89:​15-17.

[Mengwalo ya tlase]

[Seswantšho go letlakala 31]

Maeto a bodiši a agago ao a dirwago ke bagolo ba lerato a ka thuša Bakriste gore ba fenye go nyema moko