Bohlale bja go Boifa Modimo bo Bonagatšwa Bjang?

“BOHLALE bya modiidi bo a nyatšwa, le mantšu a xaxwe xa a kwewe.” Ka mantšu a, Kgoši Salomo yo bohlale o ile a phetha kanegelo ya monna yo a diilago eupša e le yo bohlale yoo a ilego a efoša motse ka moka go senyweng. Lega go le bjalo, ka manyami, “xwa se be le motho wa xo leboxa monna eo wa modiidi.”​—Mmoledi 9:14-16.

Batho ba na le tshekamelo ya go tšeela fase batho bao ba diilago, gaešita le ge badiidi ba dirile ditiro tše dikgolo. Se e bile sa therešo tabeng ya Jesu. Jesaya o porofetile mabapi le yena gore: “E a lahlilwexo ke banna, monna wa dihlokofalô, wa xo tsebya ka mahloko.” (Jesaya 53:3) Jesu o ile a nyatšwa ke ba bangwe feela ka gobane a be a se na maemo goba botumo bja baetapele ba mehleng ya gagwe. Lega go le bjalo, o be a e-na le bohlale bjo bo bego bo feta kgole kudu bja motho le ge e le ofe wa sebe. Batho ba motsaneng wa gabo Jesu ba ile ba gana go dumela gore ‘morwa yo wa mmetli’ o be a bonagatša bohlale bjo bjalo le go dira mediro e matla gakaakaa. Lega go le bjalo, seo e be e le phošo e kgolo kudu ka gobane pego e tšwela pele ka go bolela gore Jesu “felô fao xa a ka a dira mehlôlô e mentši, ka xobane ba be ba sa dumele.” A tahlegelo e kgolo gakaakang bakeng sa batho bao!​—Mateo 13:54-58.

Anke re se ke ra dira phošo e bjalo e swanago. Jesu o itše: “Bohlale bo bônala ka bana ba byôna.” Bao ba dirago modiro wa Modimo le go abelana le ba bangwe bohlale bja legodimong ga ba hlaolwe ka maemo a bona goba boemo bja bona setšhabeng eupša ba hlaolwa ka “dienywa tše botse” tšeo ba di bonagatšago​—tumelo ya bona e theilwego Beibeleng gotee le mediro ya bona.​—Mateo 7:18-20; 11:19.