Ke ka Baka La’ng re Swanetše go ba le Teka-tekano Ditebelelong tša Rena?
DIKHOLOFELO tšeo di phethagalago le dipakane tšeo di fihlelelwago di re nea maikwelo a kgotsofalo. Lega go le bjalo, ka mo go dumelegago bontši bja ditoro tša rena gotee le ditebelelo ga di tšwelele ka mokgwa wo re kganyogago ka gona. Go nyamišwa leboelela bophelong go ka re dira gore re ikwe re ipefelela e bile re befelela le ba bangwe. Monna yo bohlale o ile a bolela ka mo go swanetšego gore: “Kholofelo e diegilego e hlokofatša pelo.”—Diema 13:12, PK.
Mabaka a mangwe ao a ka bakago maikwelo a go nyama ke afe? Re ka šomela bjang tabeng ya go ba bao ba nago le teka-tekano ditebelelong tša rena? Go feta moo, ke ka baka la’ng go dira bjalo go ka re hola?
Ditebelelo le Manyami
Ka baka la go akgofa ga bophelo mehleng yeno, ge re dutše re leka kudu go sepedišana le bjona, ke mo go bonagalago eka re boela morago kudu. Dilo tšeo di nyakago nako ya rena le matla a rena e ka ba tšeo di sa kgaotšego, gomme ge re palelwa ke go fetša seo re bego re thomile go se dira, go na le tshekamelo ya go ikahlola. Re ka ba ra thoma go ikwa bjalo ka ge eka re nyamiša ba bangwe. Cynthia yo e lego mosadi le mma yo a tsebago dikgatelelo tša go ba motswadi o re: “Go ba yo a sa tsepamago ge ke phošolla bana ba-ka le go ikwa gore ga ke ba tlwaetše ka mo go lekanego ke mo go befedišago.” Stephanie, e lego mofsa o bolela mabapi le thuto ya gagwe gore: “Ga ke na nako e lekanego ya go dira dilo tšohle tšeo ke nyakago go di dira, gomme seo se mpakela maikwelo a go iphelela pelo.”
Ditebelelo tšeo di phagamego ka mo go feteletšego di ka fetogela gabonolo go ba go nyaka gore dilo di dirwe ka mokgwa o phethagetšego, gomme se e ka ba seo se ferekanyago kudu. Ben, monna yo mofsa yo a nyetšego o ipolela ka gore: “Ge ke hlahloba ditiro tša-ka, megopolo goba maikwelo, ka mehla ke bona kamoo di ka bego di ile tša kaonefatšwa ka gona. Ke dula ke lebeletše gore dilo di dirwe ka mokgwa o phethagetšego, gomme se se baka go fela pelo, go tlalelwa le go nyama.” Gail e lego mosadi wa Mokriste o re: “Go nagana ka mokgwa o phethagetšego ga go dumelele sebaka sa go palelwa. Re nyaka go ba bo-mma le basadi ba maemo a godimo. Re swanetše go ba bao ba tšweletšago bakeng sa gore re thabe, ka gona boiteko bjo bo senyegelago fase bo re kweša bohloko.”
Lebaka le lengwe gape leo le ka bakago go nyama ga motho ka noši ke boemo bjo bo fokolago bja tša maphelo le botšofadi. Go fokotšega ga mosepelo le matla di godiša mafokodi a rena gomme tša tlaleletša maikwelong a tlalelo. Elizabeth o re: “Ke be ke ikwa ke iphelela pelo ka ge ke be ke sa kgone go phetha dilo tšeo e bego e le tše bonolo kudu le tšeo di tlwaelegilego pele ke babja.”
Se se boletšwego ka mo godimo ke mohlala wa seo se ka bakelago maikwelo a go nyama. Ge a sa laolwe, maikwelo a bjalo a ka ba a re lebiša tabeng ya go dumela gore ga re thabelwe ke ba bangwe. Ka gona, ke megato efe e nepagetšego yeo re ka e tšeago bakeng sa go lebeletšana le go nyama le go hlagolela ditebelelo tšeo di nago le teka-tekano?
Ditsela tša go Hlagolela Ditebelelo Tšeo di Nago le Teka-tekano
Sa pele, gopola gore Jehofa ke yo a nago le teka-tekano le yo a kwešišago. Psalme 103:14 e re gopotša gore: “Xobane Yêna ó tseba lebopô le re lexo ka lôna, xa a lebale xe re le lerole.” Ka go tseba bokgoni bja rena le mafokodi a rena, Jehofa o letetše go tšwa go rena seo re kgonago go mo nea sona. Le gona selo se tee seo a re kgopelago sona ke “xo sepela le Modimo [wa rena re] n’e boipoetšô.”—Mika 6:8.
Jehofa gape o re kgothaletša gore re retologele go yena ka thapelo. (Ba-Roma 12:12; 1 Ba-Thesalonika 5:17) Lega go le bjalo, seo se re thuša bjang? Thapelo e tiiša le go leka-lekanya tsela ya rena ya go nagana. Thapelo e tseneletšego ke go dumela gore re nyaka thušo—ke pontšho ya boipoetšo le boikokobetšo. Jehofa o fišegela go araba dithapelo tša rena ka go re nea moya wa gagwe o mokgethwa, woo dienywa tša wona di akaretšago lerato, botho, bonolo le boitshwaro. (Luka 11:13; Ba-Galatia 5:22, 23) Thapelo gape e fokotša pelaelo le tlalelo. Elizabeth o re, ka thapelo “o hwetša khomotšo e sa tsebjego go tšwa mothopong le ge e le ofe.” Kevin o dumela gore: “Ke rapelela pelo e fodilego le monagano o hlwekilego e le gore nka kgona go lebeletšana le bothata. Jehofa le ka mohla ga a ke a nnyamiša.” Moapostola Paulo o be a tseba mohola o bohlokwa wa thapelo. Ke ka baka leo a kgothaditšego ka gore: “Mo xo ka xo ba le tše Le di nyakaxo, Le di tlišê pele xa Modimo . . . Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.” (Ba-Filipi 4:6, 7) Ee, go boledišana le Jehofa ka kgonthe go a šoma bakeng sa go re thuša go hlagolela ditebelelo tšeo di nago le teka-tekano ka rena le ka ba bangwe.
Lega go le bjalo, ka dinako tše dingwe re nyaka kgonthišetšo ya kapejana. Lentšu le le bolelwago ka nako e swanetšego ke le lebotse. Polelo ya go ntšhetšana sa mafahleng le mogwera yo o mmotago le yo a godilego tsebong e ka re thuša go hwetša pono e nngwe ka seo se re bakelago gore re ikwe re nyamile goba re belaela. (Diema 15:23; 17:17; 27:9) Bafsa bao ba katanago le ditlalelo ba hwetša e le gore go nyaka keletšo ya batswadi go ba thuša go hwetša teka-tekano. Kandi o bolela ka go leboga gore: “Tlhahlo e lerato e tšwago go batswadi ba-ka e ntirile gore ke be yo a nago le tlhaologanyo kudu le yo a leka-lekanego, gape ke be yo batho ba thabelago go ba le nna kudu.” Ee, kgopotšo e lego go Diema 1:8, 9 ke yeo e lego nakong kudu: “Ngwan’a-ka! Theetša tayô ya tat’axo; O se nyatšê thutô ya mm’axo. Tšôna-tšeo e tlo ba seala se se ratêxaxo mo hloxong ya xaxo, le pheta molaléng wa xaxo.”
Mafelelo a monagano wa motho yo a nyakago gore dilo di dirwe ka mokgwa o phethagetšego ke ao a akaretšwago gabotse ke seema sa Seisemane seo se rego: “Go letela bophelo gore e be bjo bo swanelago dinyakwa tša rena ka mo go kgethegilego ke go ipiletša tlalelo.” Bakeng sa go phema se, go nyakega peakanyo tseleng ya go nagana. Boikokobetšo le boipoetšo—go ba le pono ya kgonthe ka mafokodi a rena—ka kgonthe di tla godiša ka go rena ditebelelo tšeo di leka-lekanego le tšeo di kwagalago. Ka mo go swanetšego, Ba-Roma 12:3 e re lemoša gore, “xo se kê xwa ba le e a ithsemaxo a fetiša moo xo mo swanetšexo.” Go oketša moo, Ba-Filipi 2:3 e re kgothaletša go ba le boipoetšo le go lebelela ba bangwe e le bao ba phagamego.
Elizabeth yo go boletšwego ka yena pejana, e be e le yo a iphelelago pelo ka baka la bolwetši bja gagwe. Go yena, go be go nyakega nako bakeng sa gore a hwetše pono ya Jehofa ka dilo le go ikwa a homotšega ka go tseba gore ga a lebale tirelo ya rena. Colin ga a kgone go sepela ka baka la bolwetši bjo bo fokodišago. Mathomong o be a e-na le maikwelo a gore bodiredi bja gagwe bo be bo nyakile e se bja selo ge bo bapišwa le seo a bego a se dira ge a be a sa phela gabotse. Ka go naganišiša ka mangwalo a bjalo ka 2 Ba-Korinthe 8:12, o ile a kgona go fediša maikwelo ao. Temana ye e re: “Xobane xe thatô e botse è le xôna, xo tlo thabêlwa se motho a se swerexo; xe a hlaêlwa, xa xo taba.” Colin o re: “Gaešita le ge ke e-na le se senyenyane seo nka se neago, ke sa dutše ke kgona go nea, gomme se ke seo se amogelegago go Jehofa.” Go Ba-Hebere 6:10 re gopotšwa gore: “Xobane Modimo xa a bebe motho, xa a lebale medirô ya lena, le leratô le Le itapišitšexo ka lôna ’ineng la xaxwe.”
Ka gona, re ka lemoga bjang ge e ba ditebelelo tša rena e le tšeo di nago le teka-tekano? Ipotšiše, ‘Na ditebelelo tša-ka di sepedišana le ditebelelo tša Modimo?’ Ba-Galatia 6:4 e re: “Motho a a šetšê modirô wa xaxwe; ké mo a tl’o xo rêtwa ka tša xaxwe, e sexo ka tša e mongwê.” Gopola gore Jesu o itše: “Joko ya-ka ke e botho gomme morwalo wa-ka ke o bohwefo.” Ee, ka ge re le Bakriste, re na le joko yeo re swanetšego go e rwala, eupša ke e “botho” e bile e “bohwefo,” gomme Jesu o holofeditše gore e tla ba mo go lapološago ge e ba re ithuta go e rwala ka mo go swanetšego.—Mateo 11:28-30, NW.
Ditebelelo Tšeo di Nago le Teka-tekano di Tliša Meputso
Meputso ya kapejana le yeo e swarelelago e tlišwa ke go theetša le go diriša keletšo ya Lentšu la Modimo ge re dutše re katanela go hlagolela ditebelelo tšeo di nago le teka-tekano. Gare ga dilo tše dingwe, go re swara gabotse mmeleng. Jennifer, yo a ilego a holwa ke dikgopotšo tša Jehofa o re: “Ke na le matla a oketšegilego le phišego ka bophelo.” Ka mo go swanetšego, Diema 4:21, 22 e re kgothaletša go ela hloko dipolelo tša Jehofa ka mahlo a rena le pelo ya rena, “xobane di phediša ba ba di hwetšaxo; di ba fodiša mmele wohle.”
Moputso o mongwe ke wa go phela gabotse monaganong le maikwelong. Theresa o re: “Ge ke nweletša monagano wa-ka le pelo ya-ka Lentšung la Modimo, ke hwetša gore ka mehla ke motho yo a thabilego kudu.” Ke therešo, re sa dutše re tlo lebeletšana le manyami bophelong. Lega go le bjalo, re tla kgona go lebeletšana le ona gabonolo kudu. Jakobo 4:8 e kgothatša ka gore: “Batamêlang Modimo, le Yêna a Le batamêlê.” Jehofa gape o holofetša go re matlafatša bakeng sa go lebeletšana le ditlhohlo tša bophelo le go re šegofatša ka khutšo.—Psalme 29:11.
Go ba le ditebelelo tšeo di nago le teka-tekano go re kgontšha go dula re tsepame moyeng. Se gape ke tšhegofatšo. Re ka tsepelela dilong tše bohlokwa kudu bophelong. (Ba-Filipi 1:10) Dipakane tša rena e ba tša kgonthe le tšeo di fihlelelegago, tšeo di tlišago lethabo le legolo le kgotsofalo. Re tla ba bao ba ikemišeditšego kudu go ineela go Jehofa, re tseba gore o tla dira gore dilo di direge ka tsela e kaone kudu. Petro o re: “Ké xôna, ikokobetšeng ka tlase xa seatla se matla sa Modimo, xore a Le xodišê lebakeng la xôna.” (1 Petro 5:6) Na go ka ba le selo se sengwe seo se putsago kudu go phala go godišwa ke Jehofa?
[Seswantšho go letlakala 31]
Go hlagolela ditebelelo tšeo di nago le teka-tekano go ka re thuša go lebeletšana le ditlalelo le manyami