Hlankela Modimo ka Moya wa go Rata

MOAPOSTOLA Paulo o ngwadile gore: “Xomme nna nka ikxafa ka ipheletša, xore ke phološê meôya ya lena.” (2 Ba-Korinthe 12:15) Ke eng seo mantšu a a go botšago sona mabapi le boemo bja kgopolo bjo bahlanka ba Jehofa ba swanetšego go leka go bo hlagolela? Go ya ka seithuti se sengwe sa Beibele, ge Paulo a be a ngwalela Bakriste ba kua Korinthe mantšu ao, o be a re: “Ke rata go diriša matla a-ka, nako, bophelo le tšohle tšeo ke nago le tšona bakeng sa boiketlo bja lena, bjalo ka ge tate ka lethabo a dira bakeng sa bana ba gagwe.” Paulo o be a ikemišeditše go ‘ipheleletša,’ goba go “lapa le go felelwa ke matla,” ge e ba se e be e le seo se bego se tla nyakega bakeng sa go phethagatša bodiredi bja gagwe bja Bokriste.

Go feta moo, Paulo o dirile tše ka moka ka go “ikxafa.” The Jerusalem Bible e re, o be a “rata ka mo go tletšego” go dira bjalo. Go thwe’ng ka wena? Na o rata go diriša nako ya gago, matla, ditalente le mahumo o hlankela Jehofa Modimo le dikgahlego tša ba bangwe, gaešita le ge go dira bjalo ka dinako tše dingwe go bolela go “felelwa ke matla le go lapa”? Le gona na o tla dira se ka go “ikxafa”?

Ba Gana ka mo go Feletšego go Hlankela

Batho ba bantši ga ba dika-dike feela go hlankela Modimo eupša ba gana ka go lebanya go dira bjalo. Moya wa bona ke wa go hloka tebogo, wa go ipuša ka boithati gaešita le wa borabele. Sathane o ile a gokeletša Adama le Efa tseleng e bjalo ya go nagana. Ka phošo o ile a bolela gore ba tla “ba byalo ka Modimo, [ba] tseba botse le bobe”​—ba kgona go itirela diphetho ka noši mabapi le se se lokilego le se se fošagetšego. (Genesi 3:1-5) Bao ba nago le moya o swanago lehono ba nagana gore ba swanetše go ba le tokologo e feletšego bakeng sa go dira e le ka kgonthe seo ba se kganyogago ka ntle le tlamo le ge e le efe go Modimo goba tšhitišo e tšwago go yena. (Psalme 81:11, 12) Ba nyaka go diriša sohle seo ba nago le sona bakeng sa go fihlelela dikganyogo tša bona ka noši.​—Diema 18:1.

Mohlomongwe ga o thekge pono ye e feteletšego. Mohlomongwe o leboga e le ka kgonthe mpho ya bophelo yeo o e thabelago ga bjale gaešita le tebelelo e kgahlišago kudu ya go phela ka mo go sa felego lefaseng la paradeise. (Psalme 37:10, 11; Kutollo 21:1-4) O ka ba o leboga Jehofa ka mo go tseneletšego bakeng sa go loka mo a go bontšhago go wena. Eupša ka moka ga rena re nyaka go ba bao ba phafogetšego kotsi ya gore Sathane a ka kgopamiša go nagana ga rena ka tsela ya gore tirelo ya rena ge e le gabotse e ka ba yeo e sa amogelegego go Modimo. (2 Ba-Korinthe 11:3) Se se ka direga bjang?

Tirelo ya go Rata e a Nyakega

Jehofa o nyaka tirelo ya go rata le ya pelo ka moka. Le ka mohla ga a re gapeletše go dira thato ya gagwe. Ke Sathane yo a tla dirago selo le ge e le sefe bakeng sa go re gatelela goba go goketša batho go dira thato ya gagwe. Mabapi le go hlankela Modimo, Beibele e bolela ka boikarabelo, melao, dinyakwa le tše dingwe. (Mmoledi 12:13; Luka 1:6) Lega go le bjalo, boikemišetšo bja rena bjo bogolo bakeng sa go hlankela Modimo ke gore re a mo rata.​—Ekisodo 35:21; Doiteronomio 11:1.

Go sa šetšwe gore Paulo o dirile mo gontši gakaakang tirelong ya Modimo, o be a tseba gore se se be se ka se bolele selo le gatee ‘ge e ba a se na lerato.’ (1 Ba-Korinthe 13:1-3) Ge bangwadi ba Beibele ba bolela ka Bakriste e le makgoba a Modimo, ga ba bolele ka bohlanka bjo bo nyatšegago bjo bo theilwego kgapeletšong. (Ba-Roma 12:11; Ba-Kolose 3:24) Seo se bolelwago ke go ikokobeletša ka go rata mo go theilwego leratong leo le tseneletšego le leo le tšwago pelong bakeng sa Modimo le Morwa wa gagwe, Jesu Kriste.​—Mateo 22:37; 2 Ba-Korinthe 5:14; 1 Johane 4:10, 11.

Tirelo ya rena go Modimo gape e swanetše go bontšha lerato leo le tseneletšego ka batho. Paulo o ile a ngwalela phuthego ya Thesalonika gore: “Se re bexo rè na nasô’ rè le makxatheng a lena ké bonôlô bya mma xo bana xe a amuša ngwana wa xaxwe.” (1 Ba-Thesalonika 2:7) Dinageng tše dintši lehono, bo-mma ba na le boikarabelo bja molao bja go hlokomela bana ba bona. Eupša e le ka kgonthe bo-mma ba bantši ga ba dire se feela bakeng sa go kwa molao, na ga go bjalo? Aowa. Ba dira bjalo ka gobane ba rata bana ba bona. Go ba gona, mma yo a amušago o dira boikgafo bjo bogolo ka lethabo bakeng sa bana ba gagwe! Ka ge Paulo a be a e-na le “thloloxêlô” e swanago bakeng sa bao a bego a ba hlankela, o be a ‘thabile ka mo go kgahlišago’ (“a ikemišeditše,” King James Version; “a thabile,” New International Version) go diriša bophelo bja gagwe ka noši bakeng sa go ba thuša. (1 Ba-Thesalonika 2:8) Lerato le re tutueletša go ekiša mohlala wa Paulo.​—Mateo 22:39.

Go Thwe’ng ka Tirelo ya go se Rate?

Ee, ga se ra swanela go dira gore lerato la boithati le fete lerato la Modimo le batho. Ka ntle le moo, go na le kotsi ya kgonthe ya gore re ka dira feela tirelo ya pelo e sa felelago le ya go se rate. Re ka ba ra thoma le go ba le sekgopi se itšego, re ikwe re nyamile gore re ka se phele maphelo a rena ka mo go sekilego go ya ka dikganyogo tša rena ka noši. Se se ile sa diragalela ba-Isiraele ba bangwe bao ba ilego ba lahlegelwa ke lerato la bona la go rata Modimo eupša ba sa dutše ba neela tirelo e itšego go yena ka kgopolo feela ya modiro. Mafelelo e bile afe? Go hlankela Modimo e ile ya ba go “itapiša” go bona.​—Maleaki 1:13.

Dibego le ge e le dife tšeo di išwago go Modimo ka mehla di swanetše go ba ‘tšeo di phetšego gabotse,’ tšeo di se nago bosodi le tše ‘kaone’ tšeo di hwetšagalago. (Lefitiko 22:17-20; Ekisodo 23:19) Lega go le bjalo, go e na le go nea Jehofa tše kaone go diphoofolo tša bona, batho ba mehleng ya Maleaki ba ile ba thoma go neela ka tšeo ba bego ba tloga ba sa di nyake bona ka noši. Karabelo ya Jehofa e bile efe? O ile a botša baperisita gore: “Xe mo aletareng Le tšiša se se foufetšexo, a Le re xa se bobe? Xe Le ipexa ka se se hlotšaxo le ka se babyaxo, a Le re xa se bobe? O k’O di išê xo mokxôma; a di ka mo kxahla? A a ka Xo iša mahlo? . . . La tšiša tša xo tšeêlwa batho, le tše di hlotšaxo, le tše di babyaxo; xe Le tšiša dibexô ka mokxwa woo, xôna Morêna wa mašaba ó re: A Le re nka kxahlwa ke tšôna-tšeo di e-tšwa diatleng tša lena?”​—Maleaki 1:8, 13.

Se se ka direga bjang go le ge e le mang wa rena? Dihlabelo tša rena di ka fetoga “morwalo” go rena ge e ba re hloka pelo e ratago e le ka kgonthe le moya wa gona. (Ekisodo 35:5, 21, 22; Lefitiko 1:3; Psalme 54:6; Ba-Hebere 13:15, 16) Ka mohlala, na Jehofa o hwetša mašaledi a mehla ya rena?

Na motho le ge e le ofe a ka nagana e le ka kgonthe gore go be go tla amogelega go Modimo ge e ba setho sa kgonthe sa lapa goba mo-Lefi yo a fišegago ka tsela e itšego a gapeletša mo-Isiraele yo a sa ratego go kgetha phoofolo ya gagwe e kaone bakeng sa sehlabelo ge e ba a be a sa nyake go e neela e le ka kgonthe? (Jesaya 29:13; Mateo 15:7, 8) Jehofa o ile a gana dihlabelo tše bjalo gomme mafelelong a gana le bona batho bao ba ilego ba di neela.​—Hosea 4:6; Mateo 21:43.

Go Thabela go Dira Thato ya Modimo

Go neela Modimo tirelo yeo a tlago go e amogela, re swanetše go latela mohlala wa Jesu Kriste. O itše: “Xa ke nyake se Nna ke se rataxo, ke nyaka se se ratwaxo ke E a nthomilexo.” (Johane 5:30) Jesu o ile a hwetša lethabo le legolo ka go hlankela Modimo ka go ithatela. Jesu o ile a phethagatša mantšu a Dafida a boporofeta a rego: “Ke kxahlwa ke xo dira tše di thabêlwaxo ke Wêna Modimo wa-ka.”​—Psalme 40:8.

Gaešita le ge Jesu a ile a thabišwa ke go dira thato ya Jehofa, se se be se se bonolo ka mehla. Ela hloko seo se ilego sa direga pele ga go swarwa ga gagwe, go lekwa le polao. Ge a be a le serapeng sa Getsemane, Jesu o be a “nyamile ka xoxolo” e bile a “tlaletšwe.” Ka gona, kgateletšo ya maikwelo e be e le e šoro kudu moo e lego gore ge a be a rapela “dikudumêla tša xaxwe tša ba byalo ka marotholodi a madi a rôthêlaxo fase.”​—Mateo 26:38; Luka 22:44.

Ke ka baka la’ng Jesu a ile a lebeletšana le tlalelo e bjalo? Ruri ga se ka baka la dikgahlego tša gagwe ka noši goba go se rate le ge e le gofe go dira thato ya Modimo. O be a ikemišeditše go hwa, gaešita le go arabela ka matla mantšung a Petro a rego: “Morêna! A k’O lôtêxê, tšeo di se kê tša Xo dirêxêla.” (Mateo 16:21-23) Seo se bego se tshwenya Jesu e be e le gore ke bjang lehu la gagwe bjalo ka sesenyi seo se nyatšegago le bego le tla kgoma Jehofa le leina la Gagwe le lekgethwa. Jesu o be a lemoga gore Tatagwe o be a tla kwa bohloko kudu go bona Morwa wa gagwe yo a rategago a swarwa ka mokgwa wo o sehlogo.

Jesu gape o be a kwešiša gore o be a le kgaufsi le nako ya bohlokwa ya go phethagatša morero wa Jehofa. Go theetša ka potego melao ya Modimo ka ntle le pelaelo go tla bontšha gore Adama a ka ba a ile a dira kgetho e swanago. Go botega ga Jesu go tla pepentšha polelo ya Sathane ya maaka ya gore batho ge ba le ka tlase ga teko ba ka se hlankele Modimo ka go rata le ka potego. Ka Jesu, Jehofa kgaufsinyane o tla phšatlaganya Sathane gomme a tloše mafelelo a borabele bja gagwe.​—Genesi 3:15.

A boikarabelo bjo bogolo gakaakang bjo bo lego magetleng a Jesu! Leina la Tatagwe, khutšo ya legohle le phologo ya lapa la motho, ka moka di be di ithekgile ka potego ya Jesu. A lemoga se, o ile a rapela ka gore: “Tata, xe xo kxônêxa, a senwêlô sé se fetê se ntloxê. Fêla, e se bê ka mo xo rataxo Nna, e bê ka mo xo rataxo Wene.” (Mateo 26:39) Gaešita le ka tlase ga kgateletšego e šoro kudu, Jesu le ka mohla ga se a ka a dika-dika go go rata ga gagwe go theetša thato ya Tatagwe.

“Môya o Mafolofolo, ’me Nama e a Fôkôla”

Ka mokgwa woo Jesu a ilego a lebeletšana le kgateletšego ya maikwelo e šoro ka gona ge a be a hlankela Jehofa, re ka letela gore Sathane a tsenye kgateletšego go rena bjalo ka bahlanka ba Modimo. (Johane 15:20; 1 Petro 5:8) Go feta moo, ga se ra phethagala. Ka gona, gaešita le ge re hlankela Modimo ka go rata, go ka se be bonolo go rena go dira bjalo. Jesu o ile a bona ka mokgwa wo baapostola ba gagwe ba ilego ba katanela ka gona go dira sohle seo a bego a ba kgopetše go se dira. Ke ka baka leo a itšego: “Xobane môya o mafolofolo, ’me nama e a fôkôla.” (Mateo 26:41) Go be go se na selo sa leabela seo se fokolago nameng ya gagwe ya motho e phethagetšego. Lega go le bjalo, ka monaganong o ile a nagana ka go fokola ga nama ya baapostola ba gagwe, go se phethagale mo ba ilego ba go abela go Adama yo a sa phethagalago. Jesu o tsebile gore ka baka la go se phethagale ga leabela le mafokodi a motho ao a bakwago ke seo, ba tla katanela go dira sohle seo ba bego ba nyaka go se dira tirelong ya Jehofa.

Ka gona, re ka ikwa bjalo ka moapostola Paulo, yo a bego a gateletšegile kudu ge go se phethagale go šitiša bokgoni bja gagwe bja go hlankela Modimo ka mo go tletšego. Paulo o ngwadile gore: “Se se lexo xôna ké xo rata; xo dira botse xôna xo a hlaya.” (Ba-Roma 7:18) Ka mo go swanago le rena re ka se ke ra dira ka mo go feletšego dilo ka moka tše dibotse tšeo re kganyogago go di dira. (Ba-Roma 7:19) Se ga se ka baka la go se rate le ge e le gofe ka lehlakoreng la rena. Ke feela ka gobane bofokodi bja nama bo thibela gaešita le maiteko a rena a kaone.

Anke re se ke ra itlhoboga. Ge e ba re e-na le boikemišetšo bjo bo tšwago pelong bja go dira sohle seo re ka se kgonago, ka kgonthe Modimo o tla amogela tirelo ya rena. (2 Ba-Korinthe 8:12) Anke re ‘direng seo re ka se kgonago’ go ekiša moya wa Kriste wa go kwa ka mo feletšego thato ya Modimo. (2 Timotheo 2:15, NW; Ba-Filipi 2:5-7; 1 Petro 4:1, 2) Jehofa o tla putsa le go thekga moya o bjalo wa go rata. O tla re nea “matla a fetišago a tlhago” go lefa bakeng sa mafokodi a rena. (2 Ba-Korinthe 4:7-10, NW) Le rena ka thušo ya Jehofa, go etša Paulo, “re ikgafile ka lethabo gomme re tla ikgafa ka mo go feletšego,” (NW) tirelong ya Gagwe e bohlokwa.

[Seswantšho go letlakala 21]

Paulo o ile a hlankela Modimo ka go rata ka bokgoni bja gagwe ka moka

[Seswantšho go letlakala 23]

Gaešita le ka tlase ga kgateletšo e šoro, Jesu o ile a dira thato ya Tatagwe