Jehofa ke Setšhabelo sa Rena

“Ké ka xobane sethšabêlô sa-ka è le Wene Morêna, . . . O ka se kê wa tlêlwa ke bošula.”​—PSALME 91:​9, 10.

1. Ke ka baka la’ng re ka re Jehofa ke setšhabelo sa rena?

JEHOFA ke setšhabelo sa kgonthe bakeng sa batho ba gagwe. Ge e ba re ineetše ka mo go feletšego go yena, re ka ‘dikwa thoko tšohle, gomme ra se pitlaganywe, ra phora-phora gomme ra se gakanege, ra tlaišwa gomme ra se lahlege, ra digelwa fase gomme ra se senyege.’ Ka baka la’ng? Ka gobane Jehofa o re nea “matla a maxolo.” (2 Ba-Korinthe 4:​7-9) Ee, Tatago rena wa legodimong o re thuša go phegelela bophelo bja go boifa Modimo, gomme re ka tšeela pelong mantšu a mopsalme a rego: “Ké ka xobane sethšabêlô sa-ka è le Wene Morêna, O ipeetše Yo-xodimo-dimo a ba sebô sa xaxo. O ka se kê wa tlêlwa ke bošula; dinkhu di ka se batamêle lapa l’axo.”​—Psalme 91:​9, 10.

2. Go ka thwe’ng ka Psalme ya bo-91 le seo e se holofetšago?

² Mantšu ao a Psalme 91 a ka no ba a ngwadilwe ke Moše. Mantšu a mathomong a mmolela e le mongwadi wa Psalme ya bo-90, gomme Psalme ya 91 e latela ka ntle le mantšu a bolelago mongwadi yo mongwe. Mohlomongwe Psalme ya bo-91 e opetšwe ka go šiedišana ke dihlopha tše pedi tša diopedi; e lego gore motho o tee a ka ba a ile a hlabeletša (91:​1, 2), gomme sehlopha sa diopedi se arabela ka go opela (91:​3-8). Go ka direga gore go latela moo go ile gwa kwewa seopedi se se opelago se nnoši (91:9a) gomme sa arabja ke sehlopha (91:9b-13). Ke moka seopedi se se opelago se nnoši se ka ba se ile sa opela mantšu a mafelelo (91:​14-16). Go sa šetšwe gore go be go opelwa bjalo goba go se bjalo, Psalme ya bo-91 e holofetša tšhireletšego ya moya go Bakriste ba tloditšwego e le sehlopha gomme e nea kgonthišetšo e swanago bakeng sa bagwera ba bona bao ba ineetšego e le sehlopha.a Anke re hlahlobeng psalme ye go ya ka pono ya bahlanka ka moka ba bjalo ba Jehofa.

Go Šireletšega ‘Lefelong la Sephiri la Modimo’

3. (a) ‘Lefelo la sephiri la Yo-godimo-dimo’ ke eng? (b) Re hwetša’ng ka go “lala moriting wa Yo-matla-ohle”?

³ Mopsalme o opela ka gore: “Xe ke dutše [lefelong la sephiri la, NW] Yo-xodimo-dimo, ka lala moriting wa Yo-matla-ohle, ke bolêla le Morêna ke re: O ’thšabêlô sa-ka, ’me O sebô sa-ka; O Modimo wa-ka yo ke mmotilexo.” (Psalme 91:​1, 2) ‘Lefelo la sephiri la Yo-godimo-dimo’ ke lefelo la seswantšhetšo la tšhireletšego bakeng sa rena, gomme ka mo go kgethegilego ke tšhireletšego bakeng sa batlotšwa, bao e lego bahlaselwa ba kgethegilego ba Diabolo. (Kutollo 12:​15-17) O be a ka re fediša ka moka ga rena ge nkabe e be e se ka tšhireletšego yeo re e thabelago bjalo ka bao ba dulago le Modimo re le baeng ba moya. Ka go “lala moriting wa Yo-matla-ohle,” re hwetša moriti wa Modimo o šireletšago. (Psalme 15:​1, 2; 121:5) Ga go na setšhabelo se šireletšegilego goba sebo seo se sa hlaselegego gabonolo go phala Morena wa rena yo a Phagamego, Jehofa.​—Diema 18:10.

4. Sathane yo e lego “morei” o diriša maano afe, gomme re phonyokga bjang?

⁴ Mopsalme o oketša ka gore: “Xobane ké Yêna [ Jehofa] a Xo êfêlaxo moutlô wa morei, le lehu le lebe la thsenyêxô.” (Psalme 91:3) Gantši morei kua Isiraele ya bogologolo o be a tanya dinonyana ka go diriša difu goba meutlo. Gare ga difu tša “morei,” Sathane, go na le mokgatlo wa gagwe o mobe le “ditiro tša bohwirihwiri.” (Ba-Efeso 6:​11, mongwalo wa ka tlase ka go NW) Mereo yeo e sa bonagalego e bewa tseleng ya rena bakeng sa go re gogela bobeng le go senya boemo bja rena bja moya. (Psalme 142:3) Lega go le bjalo, ka ge re lahlile go se loke, ‘meoya ya rena e bjalo ka nonyana e phonyokgago molabeng.’ (Psalme 124:​7, 8) Re leboga gakaakang gore Jehofa o re phološa go “morei” yo mobe!​—Mateo 6:13.

5, 6. Ke “lehu” lefe leo le bakilego “thsenyêxô,” eupša ke ka baka la’ng batho ba Jehofa ba sa ineele go lona?

⁵ Mopsalme o bolela ka “lehu le lebe la thsenyêxô.” Bjalo ka leuba la bolwetši bjo bo fetelago, go na le selo seo se bakago “thsenyêxô” bakeng sa lapa la batho le bathekgi ba bogoši bja Jehofa. Mabapi le taba ye, radihistori Arnold Toynbee o ngwadile gore: “Ga e sa le go tloga mafelelong a Ntwa ya II ya Lefase botšhaba bo boeleditše gabedi palo ya dinaga tše ipušago tše phagamego . . . Boemo bja kgopolo bja batho bja gona bjale ke bjo bo aroganago ka mo go oketšegago.”

⁶ Go theoša le nywaga-kgolo, babuši ba bangwe ba ile ba butšwetša mello ya thulano e aroganyago ya ditšhaba-tšhaba. Gape ba ile ba nyaka gore tlhompho e lebišwe go bona goba go diswantšho tše di fapa-fapanego goba maswao. Eupša Jehofa le ka mohla ga se a ka a dumelela gore batho ba gagwe ba botegago ba ineele ‘lehung’ le bjalo. (Daniele 3:​1, 2, 20-27; 6:​8-11; 17-23) Re le borwarre bjo lerato bja ditšhaba-tšhaba, re nea Jehofa boineelo bjo bo feletšego, re boloka boema-gare bja Mangwalo, gomme ka ntle le kgethollo re dumela gore “dithšabeng ka moka [Modimo] ó kxahlwa ke ba ba mmoifaxo, xe ba dira tše di lokilexo.” (Ditiro 10:​34, 35; Ekisodo 20:​4-6; Johane 13:​34, 35; 17:​16; 1 Petro 5:​8, 9) Gaešita le ge re lebeletšana le “thsenyêxô” ka mokgwa wa tlaišo re le Bakriste, re thabile e bile re šireletšegile moyeng “lefelong la sephiri la Yo-godimo-dimo.”

7. Jehofa o re šireletša bjang ka ‘diphego tša gagwe’?

⁷ Go ba le Jehofa e le setšhabelo sa rena, re hwetša khomotšo mantšung a rego: “O Xo šireletša ka ’phêxô tša xaxwe; O khuta ka ’phofa tša xaxwe; pôtêxô ya xaxwe ké kôtsê le sephêmô.” (Psalme 91:4) Modimo o a re šireletša, go swana le ge motswadi wa nonyana a akalalela bana ba gagwe ka go ba šireletša. (Jesaya 31:5) ‘O re šireletša ka diphego tša gagwe.’ Nonyana ka diphego tša yona e khupetša bana ba yona gomme e ba šireletša go dibata. Go swana le mafotwana feela, re šireletšegile ka tlase ga diphego tša Jehofa tša seswantšhetšo ka gobane re tšhabetše mokgatlong wa gagwe wa therešo wa Bokriste.​—Ruthe 2:​12; Psalme 5:​1, 11.

8. Ke bjang “pôtêxô” ya Jehofa e lego kotse e kgolo le sebo?

⁸ Re holofela “pôtêxô.” E bjalo ka kotse e kgolo ya mehleng ya bogologolo, yeo gantši e swanago le mojako le e kgolo ka mo go lekanego go ka šireletša mmele ka moka wa motho. (Psalme 5:​12) Go bota tšhireletšo e bjalo go re lokolla poifong. (Genesi 15:1; Psalme 84:​11) Bjalo ka tumelo ya rena, potego ya Modimo ke kotse e kgolo e šireletšago yeo e thibelago dibetša tše bogale tša Sathane le go šireletša matsweleng a lenaba. (Ba-Efeso 6:​16) Gape ke sebo, mmoto o tiilego woo re emago ka go tia ka morago ga ona.

‘Re ka se ke ra Boifa’

9. Ke ka baka la’ng bošego e ka ba nako e boifišago, eupša ke ka baka la’ng re sa boife?

⁹ Ka baka la tšhireletšo ya Modimo, mopsalme o re: “Tše di šiišaxo tša bošexo O ka se di boife, le xe e le mosêbê o betšwaxo mosexare, le xe e le lehu le lebe le le khukhunaxo lefsifsing, le xe e le thsenyêxô e bolayaxo mosexare.” (Psalme 91:​5, 6) Ka ge ditiro tše dintši tše mpe di dirwa lefsifsing, bošego e ka ba nako e boifišago kudu. Gare ga lefsifsi la moya leo ga bjale le apešitšego lefase, manaba a rena gantši a retologela ditirong tše di arošago ka maiteko a go fediša boemo bja rena bja moya le go emiša modiro wa rena wa boboledi. Eupša ‘ga re boife selo se se šiišago bošego’ ka gobane Jehofa o a re šireletša.​—Psalme 64:​1, 2; 121:4; Jesaya 60:2.

10. (a) Ke eng seo “mosêbê o betšwaxo mosexare” go bonagalago o se bolela, gomme re arabela bjang go wona? (b) “Lehu le lebe le le khukhunaxo lefsifsing” le bjang, gomme ke ka baka la’ng re sa le boife?

¹⁰ “Mosêbê o betšwaxo mosexare” o bonagala o šupa tlhaselo ya molomo. (Psalme 64:​3-5; 94:​20) Ge re phegelela go nea tsebišo ya therešo, kganetšo e bjalo e lego molaleng tirelong ya rena e kgethwa e bonagala e le lefeela. Go feta moo, ga re boife “lehu le lebe le le khukhunaxo lefsifsing.” Le ke lehu la seswantšhetšo leo le tšwelelago gare ga lefsifsi la lefase le le babjago boitshwarong le bodumeding leo le rapaletšego matleng a Sathane. (1 Johane 5:​19) Le tšweletša boemo bjo bo bolayago bja monagano le bja pelo, le tlogela batho ba le lefsifsing mabapi le Jehofa, merero ya gagwe le ditokišetšo tša gagwe tše lerato. (1 Timotheo 6:4) Gare ga lefsifsi le, ga re boife ka ge re thabela seetša sa moya ka bontši.​—Psalme 43:3.

11. Go direga’ng ka bao ba lebeletšanago le ‘polao ya mosegare’?

¹¹ “Thsenyêxô e bolayaxo mosexare” le yona ga e re boifiše. “Mosexare” o ka ba o bolela selo se go thwego ke tshedimošo ya lefase. Bao ba ineelago diponong tša lona tša go rata dilo tše di bonagalago ba lebeletšana le tshenyego ya moya. (1 Timotheo 6:​20, 21) Ge re dutše re tsebatša ka sebete molaetša wa Mmušo, ga re boife le ge e le lefe la manaba a rena, ka gobane Jehofa ke Mošireletši wa rena.​—Psalme 64:1; Diema 3:​25, 26.

12. Ba dikete ba ‘wela’ ka lehlakoreng la bomang, gomme ka tsela efe?

¹² Mopsalme o tšwela pele ka gore: “Le xe hleng xa xaxo xo ka wa ba sekete, ba dikete tše lesome ba wa ’hlakoreng la xaxo la le letona, di ka se kê tša Xo fihlêla. O tlo fo di boxa ka mahlô, wa bôna bakxopô xe ba lefeletšwa.” (Psalme 91:​7, 8) Ka baka la go palelwa ke go dira Jehofa setšhabelo sa bona, ba bantši ba “wa” ka lehu la moya ‘hleng ga rena.’ Ge e le gabotse, ba “dikete tše lesome” ba wetše ‘ka lehlakoreng le letona’ la ba-Isiraele ba lehono ba moya. (Ba-Galatia 6:​16) Eupša go sa šetšwe gore re Bakriste ba tloditšwego goba bagwera ba bona ba ineetšego, re šireletšegile “lefelong la sephiri” la Modimo. Re fo ‘bogela ra bona bakgopo ge ba lefeletšwa,’ bao ba bunago mathata kgwebong, bodumeding le ka ditsela tše dingwe.​—Ba-Galatia 6:7.

‘Re ka se Tlelwe ke Bošula’

13. Ke mabošula afe a sa re welego, gomme ka baka la’ng?

¹³ Gaešita le ge tšhireletšego ya lefase le e phuhlama, re etiša Modimo pele le go kgothatšwa ke mantšu a mopsalme a rego: “Ké ka xobane sethšabêlô sa-ka è le Wene Morêna, O ipeetše Yo-xodimo-dimo a ba sebô sa xaxo. O ka se kê wa tlêlwa ke bošula; dinkhu di ka se batamêle lapa [“tenteng”, PK] l’axo.” (Psalme 91:​9, 10) Ee, Jehofa ke setšhabelo sa rena. Lega go le bjalo, gape re dira Modimo Yo-godimo-dimo ‘sebo sa rena,’ moo re hwetšago polokego gona. Re tumiša Jehofa e le Mmuši yo Mogolo wa Legohle, ‛re mmeile’ e le Mothopo wa rena wa tšhireletšego, le go tsebatša ditaba tše dibotse tša Mmušo wa gagwe. (Mateo 24:​14) Ka gona, ‘ga go na bošula bjo bo tla re tlelago’​—le bjo tee bja mabošula a hlalositšwego pejana psalmeng ye. Gaešita le ge re welwa gotee le ba bangwe ke mabošula a bjalo ka ditšhišinyego tša lefase, madimo, mafula, ditlala le ditlhaselo tša ntwa, tše ga di senye tumelo ya rena goba tšhireletšego ya rena ya moya.

14. Ka ge re le bahlanka ba Jehofa, ke ka baka la’ng re sa fetelwe ke dikotlo tše bolayago?

¹⁴ Bakriste ba tloditšwego ba bjalo ka badiiledi bao ba dulago ditenteng ka ntle ga tshepedišo ye ya dilo. (1 Petro 2:​11) ‘Dinkhu di ka se batamele tente ya bona.’ Go sa šetšwe gore kholofelo ya rena ke ya legodimong goba ya lefaseng, ga re karolo ya lefase, gomme ga re fetetšwe ka dikotlo tše di bolayago moyeng tše bjalo ka boitshwaro bja lona bjo bo gobogilego, go rata dilo tše di bonagalago, bodumedi bja maaka le borapedi bja “sebata” le “seswanthšô” sa sona, Ditšhaba tše Kopanego.​—Kutollo 9:​20, 21; 13:​1-18; Johane 17:16.

15. Ke ka ditsela dife re thabelago thušo ya barongwa?

¹⁵ Mabapi le tšhireletšego yeo re e thabelago, mopsalme o oketša ka gore: “Xobane [ Jehofa] ó Xo rometše Barongwa ba xaxwe, xore ba Xo dišê ditseleng tša xaxo tšohle. Ba tlo Xo kuka ka diatla, xore leoto la xaxo le se kxopyê ke lefsika.” (Psalme 91:​11, 12) Barongwa ba neilwe matla a go re šireletša. (2 Dikxoši 6:​17; Psalme 34:​7-9; 104:4; Mateo 26:​53; Luka 1:​19) Ba re šireletša ‘ditseleng tša rena tšohle.’ (Mateo 18:​10) Re thabela tlhahlo ya barongwa le go hlokomelwa bjalo ka bagoeledi ba Mmušo gomme ga re kgopše moyeng. (Kutollo 14:​6, 7) Gaešita le ‘mafsika’ a bjalo ka dithibelo malebana le modiro wa rena ga a re dire gore re kgopše gomme re lahlegelwe ke go amogelwa ke Modimo.

16. Ditlhaselo tšeo di dirwago ke “tau” le “marabê” di fapana bjang, gomme re arabela bjang go tšona?

¹⁶ Mopsalme o tšwela pele gore: “O tlo xata tau le marabê, wa xatakêla tau ya ledumaedi le bô-mamokêbê.” (Psalme 91:​13) Go fo etša ge tau e nyenyane e hlasela ka tsela e lebanyago ya sefahla-mahlo, a mangwe a manaba a rena a bontšha kganetšo ya wona phatlalatša ka go fetiša melao yeo e hlametšwego go emiša modiro wa rena wa boboledi. Eupša ditlhaselo tše di sa letelwago tše bjalo ka tša marabe go tšwa lefelong la go ikuta le tšona di a re wela. Ba ikutile mo ba sa bonwego, baruti ka dinako tše dingwe ba re hlasela ka badiri ba melao, baahlodi le ba bangwe. Eupša ka thekgo ya Jehofa, re tsoma ka khutšo go ikimolla manyaming dikgorong tša tsheko, ka go rialo re ‘hloma le go šireletša ditaba tše dibotse ka molao.’​—Ba-Filipi 1:7, NW; Psalme 94:​14, 20-22.

17. Re gatakela bjang “tau ya ledumaedi”?

¹⁷ Mopsalme o bolela ka go gatakela “tau ya ledumaedi le bô-mamokêbê.” Tau e nyenyane ya ledumaedi e ka ba bogale kudu, gomme mamokebe e ka ba segagabi se segolo. (Jesaya 31:4) Lega go le bjalo, go sa šetšwe gore tau e nyenyane ya ledumaedi e ka ba bogale gakaakang ge e hlasela sefahla-mahlo, ka tsela ya seswantšhetšo re a e gatakela ka go kwa Modimo go e na le go kwa batho goba mekgatlo e swanago le ditau. (Ditiro 5:​29) Ka gona “tau” e kotsi ga e re gobatše moyeng.

18. “Mamokêbê” o ka re gopotša ka mang, gomme re swanetše go dira’ng ge re le ka tlase ga tlhaselo?

¹⁸ Ka go Septuagint ya Segerika, “mamokêbê” o bitšwa “noga.” Se se ka re gopotša gabotse ka “nôxa e kxolo . . . ; yôna ye ba rexo ké Diabolo le Sathane.” (Kutollo 12:​7-9; Genesi 3:​15) O swana le segagabi se segolo-golo seo se kgonago go pšhatla le go metša bahlaselwa ba sona. (Jeremia 51:​34) Ge Sathane a leka go re tanya, go re pšhatlaganya ka dikgateletšo tša lefase le, le go re metša, anke re itokolleng bokgobeng bja gagwe gomme re gatakeleng “mamokêbê” wo. (1 Petro 5:8) Mašaledi a batlotšwa a swanetše go dira se ge e ba a tla tšea karolo go phethagatšweng ga Ba-Roma 16:20.

Jehofa​—Mothopo wa Rena wa Phološo

19. Ke ka baka la’ng re tšhabela go Jehofa?

¹⁹ Mabapi le morapedi wa therešo, mopsalme o emela Modimo a re: “Ke tlo mo phološa ka xobane a nkxomaretše. Ke tlo mo khutiša xobane ó tseba ’ina la-ka.” (Psalme 91:​14) Polelwana e rego “Ke tlo mo phološa” ka go lebanya e re “Ke tla mmea godimo,” e lego moo go sa fihlelelwego. Re khuta ka Jehofa re le barapedi ba gagwe kudu-kudu ka gobane ‘re mo kgomaretše.’ (Mareka 12:​29, 30; 1 Johane 4:​19) Ka mo go swanago, Modimo ‘o re phološa’ manabeng a rena. Le ka mohla re ka se ke ra fedišwa lefaseng. Go e na le moo, re tla phološwa ka gobane re tseba leina la Modimo e bile re le bitša ka tumelo. (Ba-Roma 10:​11-13) Le gona re ikemišeditše go ‘sepela leineng la Jehofa ka mo go sa felego.’​—Mika 4:5, NW; Jesaya 43:​10-12.

20. Ge Psalme 91 e phetha, Jehofa o holofetša mohlanka wa gagwe yo a botegago eng?

²⁰ Ge Psalme 91 e phetha, Jehofa o bolela ka mohlanka wa gagwe yo a botegago gore: “O tlo mpitša ’me Nna ke tlo mo kwa, ka ba le yêna tlalelong; ke tlo mo namola ’me ka mo xodiša. Ke tlo mo horiša boati bya matšatši, a tlo thaba xe ke mmonthša xo phološa xa-ka.” (Psalme 91:​15, 16) Ge re bitša Modimo ka thapelo ka go dumelelana le thato ya gagwe, o a re araba. (1 Johane 5:​13-15) Re šetše re fetile kgateletšong e kgolo ka baka la bonaba bjo bo fehlwago ke Sathane. Eupša mantšu a rego “[ke tla] ba le yêna tlalelong” a re lokišeletša diteko tša nakong e tlago le go re kgonthišetša gore Modimo o tla re phološa ge tshepedišo ye e kgopo e fedišwa.

21. Batlotšwa ba šetše ba tagafaditšwe ka tsela efe?

²¹ Go sa šetšwe kganetšo ya Sathane e šoro, palo e feletšego ya batlotšwa gare ga rena e tla tagafatšwa legodimong ka nako ya Jehofa e swanetšego​—ka morago ga “boati bya matšatši” mo lefaseng. Lega go le bjalo, ditlhakodišo tša Modimo tše di lemogegago di šetše di tlišeditše batlotšwa letago la moya. Le gona ba na le tokelo e kaakang ya go etelela pele e le Dihlatse tša Jehofa lefaseng mehleng ye ya bofelo! (Jesaya 43:​10-12) Tlhakodišo e kgolo kudu ya Jehofa go batho ba gagwe e tla direga nakong ya ntwa ya gagwe e kgolo ya Haramagedone ge a lwela bogoši bja gagwe gomme a tagafatša leina la gagwe le lekgethwa.​—Psalme 68:4; Hesekiele 38:​23, NW; Kutollo 16:​14, 16.

22. Ke bomang ba tlago go ‘bontšhwa phološo ke Jehofa’?

²² Go sa šetšwe gore re Bakriste ba tloditšwego goba bagwera ba bona ba ineetšego, re lebelela go Modimo bakeng sa phološo. Nakong ya “ ’tšatši le lexolo le le šiišaxo la Morêna,” bao ba hlankelago Modimo ka potego e sa kwanantšhego ba tla phološwa. (Joele 2:​30-32) Rena bao re tlago go bopa “lešaba le lexolo” la baphologi lefaseng le lefsa la Modimo le bao ba tla dulago ba botega nakong ya teko ya mafelelo re tlo ‘horišwa boati bja matšatši ke yena’​—bophelo bjo bo sa felego. Gape o tla tsoša mašaba-šaba. (Kutollo 7:9; 20:​7-15) Ka kgonthe Jehofa o tla thabišwa kudu ke go ‘re bontšha phološo’ ka Jesu Kriste. (Psalme 3:8) Re e-na le ditebelelo tše bjalo tše dikgolo tšeo di letšego ka pele ga rena, a re tšweleng pele re lebelela go Modimo bakeng sa go re thuša gore re baleng matšatši a rena gore re mo tumiše. Ka mantšu a rena gotee le ditiro, anke re tšweleng pele re bontšha gore Jehofa ke setšhabelo sa rena.

[Mengwalo ya ka tlase]

O tla Araba Bjang?

• ‘Lefelo la sephiri la Yo-godimo-dimo’ ke eng?

• Ke ka baka la’ng re sa boife?

• Ke bjang ‘re ka se tlelwego ke bošula’?

• Ke ka baka la’ng re ka re Jehofa ke mothopo wa rena wa phološo?

[Seswantšho go letlakala 17]

Na o tseba gore ke bjang potego ya Jehofa e lego kotse e kgolo go rena?

[Diswantšho go letlakala 18]

Jehofa o thuša bahlanka ba gagwe go dira bodiredi bja bona go sa šetšwe ditlhaselo tše di sa letelwago le kganetšo e lebanyago

[Mothopo]

Cobra: A. N. Jagannatha Rao, Trustee, Madras Snake Park Trust