Dipotšišo tše Tšwago go Babadi
Na ke mo go amogelegago go ya ka Mangwalo gore Mokriste a bee seatla sa gagwe godimo ga Beibele gomme a ikane gore o tla bolela therešo feela kgorong ya tsheko?
Motho yo mongwe le yo mongwe o swanetše go itirela phetho ya gagwe ka noši tabeng ye. (Ba-Galatia 6:5) Lega go le bjalo, Beibele ga e ganetše go dira keno ya gore motho o tla bolela therešo kgorong ya tsheko.
Go dira keno ke kgale e dutše e le mokgwa wo o bego o atile gohle. Ka mohlala, mehleng ya bogologolo ba-Gerika ba be ba emišetša seatla legodimong goba ba kgoma aletare ge ba dutše ba dira keno. Nakong ya ge moikani wa mo-Roma a be a ena, o be a swara lefsika ka seatleng sa gagwe gomme a ikana ka gore: “Ge e ba nka dira boradia ka boomo, anke [modimo] Jupiter a ntahlele ntle go tšohle tšeo e lego tše dibotse ge a phološa motse le sebo, go etša ge ke lahla lefsika le.”—Cyclopedia of Biblical, Theological, and Ecclesiastical Literature, ka John McClintock le James Strong, Bolumo VII, letlakala 260.
Ditiro tše bjalo e be e le pontšho ya tshekamelo ya batho ya go lemoga go ba gona ga modimo yo a kgonago go bona batho le yo ba ikarabelago go yena. Go tloga mehleng ya bogologolo, barapedi ba Jehofa ba therešo ba ile ba lemoga gore o be a tseba seo ba bego ba se bolela le go se dira. (Diema 5:21; 15:3) Go be go le bjalo ka ge eka ba be ba ena pele ga Modimo, goba gore e be e le hlatse ya bona. Ka mohlala, se se ile sa dirwa ke Boase, Dafida, Salomo le Tsedekia. (Ruthe 3:13; 2 Samuele 3:35; 1 Dikxoši 2:23, 24; Jeremia 38:16) Barapedi ba Modimo wa therešo ba ile ba ba ba dumela go enišwa ke ba bangwe. Se se bile bjalo tabeng ya Aborahama le ya Jesu Kriste.—Genesi 21:22-24; Mateo 26:63, 64.
Ka dinako tše dingwe motho yo a bego a dira keno pele ga Jehofa o be a dira seka se itšego seo se bego se sepedišana le yona. Aborama (Aborahama) o ile a botša kgoši ya Sodoma gore: “Ke emišetša letsogo la-ka go Jehofa, Modimo Yo godimo-dimo, mohlodi wa legodimo le lefase!” (Genesi 14:22, PK) Morongwa yo a bego a bolela le moporofeta Daniele “[o ile] a emišetša letsogo la gagwe le letona le la ntsogošo legodimong, ge a ena ka Yo a phelago ka go sa felego.” (Daniele 12:7, PK) Gaešita le Modimo o bolelwa e le yo ka tsela ya seswantšhetšo a emišago letsogo la gagwe ge a ena.—Doiteronomio 32:40; Jesaya 62:8.
Ga go na thibelo ya Mangwalo tabeng ya go dira keno. Lega go le bjalo, Mokriste ga se a swanela go ikana e le gore a thekge taba e nngwe le e nngwe yeo a e bolelago. Jesu o itše: “Mo xo ya lena polêlô ‘E’ e bê ‘E’, ‘Aowa’ e bê ‘Aowa.’” (Mateo 5:33-37) Morutiwa Jakobo o boletše ntlha e swanago. Ge a be a re “Le se kê la êna,” o be a lemoša malebana le go dira keno le ditabeng tše sa rego selo. (Jakobo 5:12) Bobedi Jesu le Jakobo ga se ba bolela gore go fošagetše go dira keno ya go bolela therešo kgorong ya tsheko.
Ka gona-ge, go thwe’ng ge e ba Mokriste yo a lego kgorong ya tsheko a kgopelwa gore a ene gore bohlatse bja gagwe ke bja therešo? A ka no ikwa gore a ka dira keno e bjalo. Ge e ba go se bjalo, a ka dumelelwa gore a kgonthišetše ka go tia gore ga a bolele maaka.—Ba-Galatia 1:20.
Ge e ba tshepedišo ya kgorong ya tsheko e akaretša go emiša seatla goba go se bea godimo ga Beibele ge go dirwa keno, Mokriste a ka no kgetha go dira bjalo. A ka no ba a gopola ka mehlala ya Mangwalo ya go dira seka se itšego seo se sepedišanago le keno. Go Mokriste, sa bohlokwa kudu go feta go dira seka se itšego ge a ena ke gore a gopole gore o ikana pele ga Modimo gore o tla bolela therešo. Keno e bjalo ga se selo se senyenyane. Ge e ba Mokriste a ikwa gore a ka araba potšišo yeo a e botšišwago ka tlase ga maemo a bjalo e bile a swanetše go e araba, gona o swanetše go gopola gore o enne gore o tla bolela therešo, e lego seo ge e le gabotse Mokriste a nyakago go se bolela ka dinako tšohle.