“Thušo Ya-ka E Tšwa Go Jehofa”

Boikgafo bo Tliša Ditšhegofatšo tša Jehofa

MONNA o sepela ka paesekela ka gare ga sethokgwa se segolo sa Cameroon. O ragela paesekela yeo ka diiri tše dintši a phatša ka gare ga maraga ditseleng tšeo di tletšego meetse a lebeletšane le kotsi ka morero wa gore a yo matlafatša batho ba bangwe. Kua Zimbabwe ba bangwe ba sepela dikhilomithara tše 15 go ya go ruta sehlopha seo se lego lekatana, ba rwala diaparo tša bona hlogong gore di se ke tša koloba ge ba phatša ka gare ga dinoka tšeo di tletšego wa go falala. Nageng e nngwe mosadi o tsoga ka iri ya bone mesong gore a etele le go ruta mooki yoo a kgonago go diriša iri e tee feela mesong go ithuta.

Batho bao ba dirago maiteko a ba swana ka eng? Ka moka ga bona ke badiredi ba ka mehla ba Dihlatse tša Jehofa gomme ba tšea karolo modirong wa go ruta batho therešo ya Beibele. Bona ba akaretša babulamadibogo ba ka mehla le ba kgethegilego, baromiwa, balebeledi ba basepedi le baithapi ba dikete bao ba lego magaeng a Bethele go dikologa lefase. Le gona ba hlaolwa ke seka sa boikgafo.a

Maikemišetšo a Nepagetšego

Dihlatse tša Jehofa di ela hloko keletšo ya moapostola Paulo go Timotheo ya gore: “Se O swanetšexo xo se phêxêlêla ké xore Modimo a bônê Ò le mmotexi, Ò le modiri e a se naxo bosodi, e a tsebaxo xo ratha Lentšu la therešô à sa kxopamiše.” (2 Timotheo 2:15) Eupša ke eng seo se tutueletšago Dihlatse tša Jehofa tše makgolo a dikete gore di hlankele e le badiredi ba ka mehla?

Ge badiredi ba ka mehla ba Dihlatse tša Jehofa ba botšišwa lebaka leo ka lona ba katanago ka matla tirelong ya bona go Jehofa, karabo ya bona e bontšhitše gore ba rata Modimo le batho. (Mateo 22:37-39) Se se tloga se swanela ka baka la gore ge maikemišetšo e ka se be a lerato, go dira boiteko e tla ba ga lefeela.—1 Ba-Korinthe 13:1-3.

Modiro wa Boikgafo

Bakriste ka moka ba ineetšego ba amogetše taletšo ya Jesu ya gore: “Xe motho a rata xo nthšala moraxo, a ikxafê, a rwalê [kota ya gagwe ya tlhokofatšo, NW], ’me a ntatêlê.” (Mateo 16:24) Go ineela go bolela gore re ipea ka diatleng tša Jehofa Modimo le tša Jesu Kriste gore ba re laole le go re hlahla. Se se ile sa lebiša ba bantši tirelong ya go ikgafela bodiredi bja nako e tletšego.

Dihlatse tše dintši di leka ka gohle go oketša tirelo ya tšona go Jehofa. Ela hloko mmulamadibogo wa São Paulo kua Brazil yo a nago le nywaga e 56 yo a bitšwago Júlia. O sa dutše a gopola gore: “Ngwanabo rena wa mo-China o ile a nteletša mogala a mpotšiša ge e ba nka kgona go ithuta se-China. Ka baka la nywaga ya-ka ke be ke sa nagane gore nka ithuta leleme le lengwe. Eupša ka morago ga matšatši a mmalwa ke ile ka amogela tlhohlo ya go ithuta lona. Lehono ke kgona go nea dithero tšeo di theilwego mangwalong ka se-China.”

Ofisi ya lekala ya Dihlatse tša Jehofa ya Peru e bega gore: “Nywageng ya morago bjale, babulamadibogo ba makgolo ba bontšhitše sebete le moya wa boikgafo ka go hudugela ditšhemong tšeo di sa abjago. Ba hudugela metseng ya kgole yeo e se nago ditirelo tša motheo moo mešomo e sa hwetšagalego gabonolo. Bana ba babo rena le dikgaetšedi ba ikemišeditše go dira sohle seo ba se kgonago gore ba tšwele pele ba le dikabelong tša bona. Eupša sa bohlokwa kudu ke gore modiro wa bona wa boboledi ke tšhegofatšo mafelong a mantši. Balebeledi ba basepedi ba bega gore go thomilwe dihlopha tše difsa ka thušo ya babulamadibogo ba ba ka mehla bao ba ikgafilego.”

Bakriste ba bangwe ba ile ba bea maphelo a bona kotsing e le gore ba thuše badumedi-gotee le bona. (Ba-Roma 16:3, 4) Molebeledi wa tikologo nageng e nngwe yeo e hlagaditšwego ke ntwa ya mo Afrika o bega gore: “Pele ga ge nna le mosadi wa-ka re ka fihla lephekong la mafelelo gare ga ditikologo tše pedi tšeo e nngwe e laolwago ke mašole a marabele gomme e nngwe e laolwago ke mašole a mmušo, re ile ra dikologwa ke ditona tše nne tša mašole a marabele di e-na le baleti ba tšona gomme ba ile ba rata go tseba gore re bomang. Ge ba hlahloba dikarata tša rena tša boitsebišo ba ile ba thoma go re belaela ge ba bona gore re tšwa ka karolong yeo e laolwago ke mašole a mmušo. Ba ile ba ntatofatša ka gore ke tshebi. Ka gona, ba ile ba rera go ntahlela ka moleteng. Ke ile ka ba hlalosetša gore re bomang gomme mafelelong ba ile ba re tlogela.” Diphuthego di ile tša leboga gakaakang ge banyalani ba bao ba ikgafilego ba kgonne go ba etela!

Palo ya badiredi ba nako e tletšego e tšwela pele e oketšega lefaseng ka bophara go sa šetšwe mathata ao ba lebeletšanago le ona. (Jesaya 6:8) Badiri ba bao ba lego mafolofolo ba thabela tokelo ya bona ya go hlankela Jehofa. Batho ba bangwe ba dimilione ga bjale ba tumiša Jehofa ka moya o bjalo wa boikgafo. Se se feleletša ka gore a ba šegofatše ka mo go oketšegilego. (Diema 10:22) Ba kgodišegile ka tšhegofatšo le thekgo e sa kgaotšego, badiri ba bao ba šomago ka thata ba bontšha boemo bja kgopolo bja mopsalme yo a opetšego ka gore: “Thušo ya-ka e tšwa go Jehofa.”—Psalme 121:2, NW.

[Mongwalo wa ka tlase]

[Ntlhakgolo go letlakala 9]

“Mohla O e-tšwa dirá, sethšaba sa xaxo se tlo ithapa.”—PSALME 110:3

[Lepokisi go letlakala 8]

JEHOFA O THABELA BAHLANKA BA GAGWE BAO BA INEETŠEGO E BILE O A BA RATA

“Tiang matla, Le se kê la têkêma, Le tiêlêlê modirong wa Morêna mo xo fêla, Lè tseba xore xo itapiša xa lena xa se xa lefêla Moreneng.”—1 Ba-Korinthe 15:58.

“Modimo . . . xa a lebale medirô ya lena, le leratô le Le itapišitšexo ka lôna ’ineng la xaxwe.”—Ba-Hebere 6:10.